November

Sibolis, i ma musu na mangalo pamarentaon ni Debata. Dileai ibana do Jahowa, didok ibana, ndang adong jolma na olo manomba Jahowa sian ias ni rohana. (Job 2:4, 5) Nunga muba sangkap ni Sibolis? Ndang! Martaontaon dung didabu sian surgo, diunjuni ibana dope naposo ni Debata. (Pgk. 12:10) Sahat tu saonari, didok Sibolis dope jolma mangoloi Debata ala mangkaringkothon dirina sandiri. Ndang lomo rohana hita manomba Debata. Molo hita marsitaonon alani pangunjunan, taingot ma on di pingkiranta. Di sada inganan, Sibolis dohot angka surusuruanna mangida aha na laho taulahon tingki hita marsitaonon jala las rohana hita mandele. Di inganan na asing, adong Jahowa, dung i Jesus Kristus Raja na miniahan dohot marribu surusuruan. Diida nasida hita marungkil, alai diurupi nasida hita patoguhon rohanta! Las rohanasida mangida hita marhabengeton jala marsihohot tu Jahowa. Dung i, tabege muse Jahowa mandok, songon na di surat di ayat sadarion. w16.04 2:8, 9

Molo boi do tapasae parsoalanta dohot donganta, dapot hita ma ibana gabe donganta muse. Alai, molo nunga mangkatai manang na pigapiga hali dohot ibana, ndang boi dope mardame, tatogihon ma sintua. Jotjot do ndang pola ingkon tapangke sude cara na dipaboa di Mateus 18:15-17. Boasa songon i? Alana, jotjot do na mangulahon dosa i manopoti salana jala olo ibana muba. Alani i, ndang pola ingkon dipabali ibana. Rade ma na marhansit ni roha i manalpuhon hasalaan ni donganna asa mardame nasida. Alani i, songon poda ni Jesus, ndang ingkon tatogihon sintua laho pasaehon parsoalan i. Alai, molo ndang boi dope mardame nang pe nunga tapangke cara na parjolo dohot cara na paduahon, tapasahat ma parsoalan i tu sintua. w16.05 1:15, 16

Hita mamaritahon holan Harajaon ni Debata do na tolap paluahon jolma sian hasusaan. Dung i, boi hita marsada dohot angka donganta di liat portibi on ala tongtong do hita netral. Ndang songon agama palsu na parsidohot tu politik, gabe mambahen jolma marmusu. (1 Ptr. 2:17) Ala naung lam jonok hita tu ujung ni pamarentaon ni Sibolis, olo do on mambahen maol hita tongtong netral. Torop halak saonari ndang olo mardame jala marginjang ni roha, mambahen nasida ndang marsada. (2 Tim. 3:3, 4) Adong do donganta na gabe susa ala muba politik di negara ni nasida. I do alana, porlu taparade rohanta sian saonari asa boi netral tingki masa hasusaan alani politik. w16.04 4:3, 4

Adong halak marpingkir, sude do boi ulahonon ni nasida. Alai, lomo do rohanta mangulahon ulaon na mambahen las roha ni Jahowa. Alani i, andorang so tatontuhon aha na laho tapillit, porlu tapingkirhon aha na disurat di Bibel jala taulahon. Umpamana, dipaboa do di Bibel songon dia pangkilalaan ni Debata taringot mudar, alani i taihuthon ma i. (1 Mus. 9:4; Ul. 15:28, 29) Boi do hita mangido pangurupion sian Jahowa asa tapillit na dumenggan jala mambahen las rohaNa. Aha na tapillit, mangkorhon do i tu hita. Molo tapillit na denggan, mambahen hita jonok tu Jahowa. Alai molo tapillit na so denggan, sega ma paralealeonta tu Ibana. Aha na tapillit, boi do muse mangkorhon tu na asing. Ndang lomo rohanta mangulahon aha pe na mambahen gale haporseaon ni donganta. Ndang lomo rohanta muse mambahen parsoalan tu donganta di huria. Alani i, ringkot do hita laho mamillit na dumenggan.​—Rom 14:19. w16.05 3:4, 5

Molo tapangke tingkinta marsiajar Bibel dohot angka bukunta, on mambahen las roha ni Jahowa. (Eps. 5:15, 16) Alai, adong na porlu taparrohahon. Aha ma i? Molo ndang manat hita, boi do didok rohanta angka ayat na adong di Bibel dohot hatorangan na adong di bukunta, ndang marlangku tu hita. Umpamana, songon dia do molo angka ayat na disurat ndang hombar tu na masa di ngolunta? Manang, songon dia do pangkilalaanta molo na tinuju ni buku i ndang apala tu hita? Jahaonta do i manang na ndang? Molo ndang denggan tajaha, ndang dapotta be hatorangan na boi marlaba tu hita. Ingkon taingot do, sude hatorangan i ro sian Jahowa. w16.05 5:5, 6

Dipangke Jahowa do huria dohot angka sintua laho manopa hita. Umpamana, molo diida sintua gale partondionta, urupanna do hita. Alai, poda na dilehon laho mangurupi hita ndang sian pamingkirion ni nasida sandiri. Marhite tangiang, dipangido nasida pangantusion dohot bisuk sian Jahowa. Dilului nasida do hatorangan sian Bibel dohot angka publikasi na mangurupi hita. Ala taboto cara ni Jahowa manopa hita, on mangurupi hita asa denggan paralealeonta tu angka dongan di huria. Dung i, denggan ma hita maradophon halak di humaliangta dohot parsiajar Bibelta. Ndang dipaksa nasida muba, alai marhite patikNa diurupi do nasida. Ingkon nasida do na mamillit laho muba manang na ndang. w16.06 1:13, 14

Adong do tudosan na sarupa na dipaboa apostel Johannes. Ibana paingothon, molo dihaholongi sasahalak na adong di portibi on, i ma ”lomolomo ni roha ni daging, giotgiot ni roha ni mata dohot na manenganengahon sinadongan” jala ”ndang di bagasan ibana holong ni roha ni Ama i”. (1 Joh. 2:15, 16) Alani i, porlu manat taparrohahon dirinta asa unang tahaholongi portibi on. Olo do ra gabe taharingkothon hiburan, artis, model ni pangkean dohot gaya ni jolma di portibi on. Manang, tahalomohon ”hatimbulon”, songon singkola na satimbotimbona. Ala nunga jonok tano na imbaru, tongtong ma taingot hata na patoguhon sian si Musa di 5 Musa 6:4! Molo taantusi jala pos rohanta tu ”Jahowa Debatanta i, Jahowa Sasadasa”, ingkon tasomba ma Ibana hombar tu lomo ni rohaNa.​—Heb. 12:28, 29. w16.06 3:14

Ndang pola godang na tahaporluhon asa tongtong mangolu. Na tahaporluhon, i ma sipanganon, pangkean, dohot jabu. Alai, ndang marnasae sude na tahalomohon. Dirimpu godang halak do dihaporluhon nasida sude na dihalomohon rohana. Marimbar do na dihalomohon halak na tading di negara na pogos dohot halak na tading di negara maju. Di pigapiga inganan, lomo do roha ni halak asa adong hpna, sepeda motorna, manang asa adong tanona. Alai di inganan na asing, halak mangkalomohon baju na arga, jabu na balga, dohot motor na arga. Ndang soal didia hita maringanan manang sadia godang hepengta, olo do ra tahalomohon angka barang na so tahaporluhon manang na so tartuhorta.​—Heb. 13:5. w16.07 1:1-3

Godang do halak mandok, ndang porlu mananda Debata. (Mat. 5:3) Dilehon nasida do godang tingki dohot gogona laho mandapot sude na adong di portibi on. (1 Joh. 2:16) Tondi parbadia ma na manogunogu hita, tapasiding ma tondi ni portibi on. Marhite tondiNa, diurupi Jahowa do hita mangantusi angka na laho masa. (1 Kor. 2:12) Alai, ingkon manat do hita. Na tahaporluhon ganup ari pe, boi mambahen hita ndang marhiras ni roha manomba Jahowa. (Luk. 21:34, 35) Ra halak mandok, na oto do hita ala porsea naung mangolu di tingki parpudi hita. (2 Ptr. 3:3-7) Alai, unang ma gabe gale haporseaonta alani i. Tangkas do taboto nunga jonok ajal ni portibi on. Asa ditogutogu tondi parbadia, ringgas ma hita marpungu rap dohot dongan sahaporseaon. w16.07 2:13, 14

Pigapiga halak mandok, martangiang mambahen nasida tarapul, nang pe ndang diboto nasida na ditangihon Debata do tangiang i manang na ndang. Ringkot do botoon ni nasida, Jahowa do ”sitangihon tangiang”. Jesus mandok, ”Molo dipangido hamu manang aha” marhitehite goarhu, sai na oloanku do. (Joh. 14:14) Boi do tapangido ”manang aha” hombar tu lomo ni roha ni Jahowa. Si Johannes manurat, ”On do hiras ni rohanta maradophon Ibana: Molo tapangido manang aha marguru tu lomo ni rohana, tangihononna do hita.” (1 Joh. 5:14) Ulaon na denggan do mangurupi halak asa mangantusi tangiang mambahen hita tarapul, jala jonok tu ”habangsa parasiasian” ni Jahowa. (Heb. 4:16) Tingki tapaboa tu halak songon dia asa ditangihon Jahowa tangiang, na mangurupi nasida do hita gabe aleale ni Debata jala mandapot pangapulion tingki marsitaonon.​—Ps. 4:2; 145:18. w16.07 4:11, 12

Molo tahaholongi Jahowa jala marsihohot, marhiras ni roha ma hita marbarita na uli. Alai, ala marsahit manang matua, ndang boi be godang talehon tingkinta marbarita sian jabu tu jabu. Aha ma na boi taulahon? Ingot ma, na mamuji Jahowa do hita tingki tapaboa barita na uli tu sude na tajumpangi, umpamana dokter manang perawat. Tingki dipenjara alani haporseaon, boi do tongtong hita marbarita disi. On mambahen las roha ni Jahowa. (Poda 27:11) Las do roha ni Jahowa molo tongtong hita marsihohot nang pe keluarganta ndang manomba Jahowa. (1 Ptr. 3:1-4) Nang pe tingki susa, boi do hita mamuji Jahowa molo tongtong maraleale tu Ibana jala maju di partondion. Pasupasuon ni Jahowa do hita molo tapatogu paralealeonta tu Ibana jala mangalehon na dumenggan. w16.08 3:19, 20

Lapatanna, ndang na gabe sumurung baoa sian borua. Tingki laho manompa borua, didok Jahowa do, ”Ndang jadi punjung [manang ndang mardongan] jolma i; hubahen ma di ibana sada pangurupina bahen donganna.” (1 Mus. 2:18) Ingkon urupan ni borua do asa boi denggan tungganedolina manguluhon rumatanggana. Tungganedoli pe ingkon maniru Jesus, ”ulu ni huria i”, na patuduhon holong. Molo diulahon i, pos ma roha ni tungganeboruna mangihuthon jala mangurupi tungganedolina. Halak Kristen na mangkaholongi dongan saripena maniru Jesus na mangkaholongi siseanna. (Joh. 13:34, 35; 15:12, 13; Eps. 5:25) Ingkon masihaholongan do nasida jala olo mangalehon ngoluna humongkop dongan saripena. w16.08 2:3, 4

Hata na patoguhon boi mambahen halak na asing tongtong manomba Jahowa. Unang ma lupa hita, na patoguhon donganta do hita tingki talehon komentar na denggan di parpunguan. Marhite pangurupion ni Jahowa, dipatogu do tangan ni si Nehemia dohot halak Jahudi. Dipadenggan nasida ma tembok Jerusalem holan di bagasan 52 ari! (Neh. 2:18; 6:15, 16) Si Nehemia ndang holan mangidaida ulaon i, alai dohot do ibana padengganhon tembok Jerusalem. (Neh. 5:16) Ditiru angka sintua do si Nehemia. Dohot do nasida mangurupi ulaon konstruksi dohot paiashon Bale Harajaon. Dipatogu nasida do dongan sahaporseaon na marsitaonon marhite manjumpangi nasida jala manogihon nasida rap marbarita na uli.​—Jes. 35:3, 4. w16.09 1:15, 16

Marsitutu do naposo ni Debata mangihuthon poda on, ”Antong, bunu hamu ma ruasmuna, angka na di tano on: parmainanon, hahodaron, riting ni roha, hisaphisap na roa.” (Kol. 3:2, 5) Pigapiga donganta nunga pasidingkon hasomalan na rorang, alai tongtong do nasida marsitutu mangalo giotgiot na sala. Molo ndang manat hita, caranta marpangkean boi mambahen nasida maol mangihuthon poda sian Bibel dohot mangalo giotgiot na sala. (1 Kor. 6:9, 10) Olo do hita mambahen nasida maol manundalhon giotgiot na sala? Tingki rap hita dohot dongan sahaporseaon, tarlinggomi do hita sian pangkorhon ni harorangon. Nang pe dipaloas hita mamillit na laho tapangke, martanggungjawab do hita mamangke pangkean na mangurupi angka halak asa tongtong badia di pamingkirion, pangkataion, dohot parniulaon.​—1 Ptr. 1:15, 16. w16.09 3:9, 10

Natuatua di Prancis mandok, ”Nang pe porsea hami tu Jahowa, alai ndang pintor porsea ianakhonnami tu Jahowa. Haporseaon ndang warisan sian natuatua. Alani i, sabar ma natuatua mangajari ianakhonna.” Donganta di Australia manurat, ”Ndang mura mangurupi ianakhon asa marhaporseaon. Ra, nunga dibahen hamu na dumenggan laho mangalusi sungkunsungkun ni nasida. Alai, olo do disungkun muse sungkunsungkun na sarupa! Alus na dilehon hamu saonari, ndang sae laho mangurupi nasida dung magodang.” Dung magodang ianakhon, ingkon tangkas do patorangon ni natuatua muse tu ibana taringot tu sungkunsungkunna. Porlu do diantusi natuatua marragam cara mangurupi ianakhonna asa mangkaholongi Jahowa. Molo hamu sahalak natuatua, hea do dipingkirhon hamu cara mangajari ianakhonmuna asa mangkaholongi Jahowa, jala tongtong manomba Ibana nang pe nunga magodang? Tutu, ndang boi holan sahalakta mangulahon on. (Jer. 10:23) Pangido ma pangurupion ni Jahowa. LehononNa do tudutudu. w16.09 5:1, 2

Ndang mura mamparsiajari hasomalan na baru di halak na sian negara na asing. Dilehon si Rut do sitiruon na denggan. Parjolo, diargai ibana do hasomalan ni halak di ingananna tading tingki mangido ibana asa dohot papunguhon biur ni gandum. (Rut 2:7) Ndang adong di roha ni si Rut na marhak ibana papunguhon biur ni gandum jala ingkon mandapot pangurupion. Paduahon, didok si Rut do mauliate ala dipatudu nasida haburjuon tu ibana. (Rut 2:13) Molo denggan do donganta sian negara na asing patuduhon pangargaion, angka dongan di huria dohot halak na asing pe lam mangargai nasida. Las do rohanta ala burju Jahowa jala lomo rohaNa asa sude halak mambege barita na uli. Ra, adong do na so boi marsiajar Bibel manang marpungu tingki di negarana. Alai, saonari ma tingkina pajumpang dohot hita. Taurupi ma nasida asa las rohanasida tading di ingananta. w16.10 1:17-19

Marjuta naposo ni Debata mangihuthon Jesus. Dirimangi nasida do janji ni Debata jala tongtong marsihohot nang pe marsitaonon. Umpamana si Rudolf Graichen, na tubu di Jerman taon 1925. Tingki poso dope ibana, digantung natuatuana do gombar taringot ayat ni Bibel di jabunasida. Didok ibana, ”Sada gombar patuduhon taringot gompul dohot birubiru, anak ni hambing dohot babiat, anak ni lombu dohot singa. Sude mardame jala nasida diuluhon sada dakdanak.” (Jes. 11:6-9) On mangurupi si Rudolf mangarimangi taringot paradeiso jala lam togu ma haporseaonna. Tongtong do ibana marsihohot tu Jahowa nang pe dianiaya Gestapo Nazi dohot Stasi Komunis Jerman Timur. Martahan do si Rudolf mangadopi sitaonon na asing. Mate ma omakna alani tipus di kamp konsentrasi Ravensbrück. Ditandatangani bapakna ma surat na mandok, ndang olo be ibana gabe Sitindangi Ni Jahowa. w16.10 3:12-14

Taihuthon do poda di Bibel, ala taboto Hata ni Debata do i. Di Bibel, dipaboa do poda na mangurupi hita pasidingkon parsoalan jala paturehon parangenta. Songon dia do hita maradophon poda i? Pingkirhon ma dua borua na miniahan di abad na parjolo, si Euodia dohot si Sintike. Didok di Bibel, marsoal do nasida, alai ndang dipaboa aha alana. Ra, on pe mambahen angka dongan na asing di huria marsogo ni roha. Dipaboa di Bibel, diurupi si Paulus do nasida na dua asa mardame. Ditangihon nasida do si Paulus jala tongtong marlas ni roha manomba Jahowa. (Plp. 4:2, 3) Saonari, adong do sipata parsoalanta dohot dongan sahaporseaon. Molo taihuthon poda sian Bibel, boi do tapasae parsoalan i. Sasintongna, boi do hita pasidingkon parsoalan. Molo unduk hita tu poda na sian Bibel, on patuduhon na taihuthon jala taargai do Hata ni Jahowa.​—Ps. 27:11. w16.11 3:1-3

Hita sude porlu dipatogu. Tarlumobi, natuatua ingkon patoguhon ianakhonna. Sahalak guru na margoar si Timothy Evans patorangkon, dakdanak ”porlu dipatogu songon suansuanan na mangkaporluhon aek”. Didok muse, ”Molo tapatogu ianakhon, marlas ni roha ma nasida.” Alai, ala mangolu hita di ”tingki parpudi”, godang do halak mangkaringkothon diri jala ndang ”marroha holong”. (2 Tim. 3:1-5) Diboto Sibolis, molo marmetmet ni roha hita, sega ma paralealeonta tu Jahowa. Dibahen Sibolis do marmetmet ni roha si Job marhite parohon angka hasusaan. Alai, ndang marhasil sangkap ni Sibolis. Marsihohot do si Job tu Jahowa. (Job 2:3; 22:3; 27:5) Hita pe boi do mangalo Sibolis asa unang marhasil sangkapna. Molo tapatogu keluarganta dohot dongan sahaporseaon di huria, na taurupi do nasida tongtong marlas ni roha jala solhot tu Jahowa. w16.11 1:4, 6

Hirahira taon 1500, adong ma na olo barani manerjemahon Bibel tu bahasa na jotjot dipangke. Tingki dijaha na serep roha Bibel di bahasa nasida, pintor disungkun ma: ’Didia do disurat di Bibel taringot api parpitapitaan? Didia do disurat di Bibel, ingkon tagaji imam molo marjamita tingki adong na mate? Didia do disurat di Bibel taringot paus dohot kardinal?’ Muruk do pemimpin ni gareja molo adong na mambahen sungkunsungkun tu nasida. Dipamate do halak na so satolop tu ajaran ni nasida. Lomo roha ni nasida asa unang dijaha halak be Bibel jala asa unang disungkuni be nasida. I ma na masa di tingki i. Alai, pigapiga halak na barani ndang olo dirajai Babel na Balga. Nunga didapot nasida hasintongan sian Bibel, jala lomo roha ni nasida mandapot gumodang hatorangan! w16.11 4:13

Molo naeng manomba Jahowa, ingkon jujur do hita. (Eps. 4:25) Unang ma tatiru Sibolis, ”ama ni gapgap”. Taingot ma si Ananias dohot tungganeboruna na mate ala margabus. Alani i, unang ma margabus hita. (Joh. 8:44; Ul. 5:1-11) Jujur, lapatanna ndang holan pasidingkon hata gabus. Molo tutu do tahamauliatehon asi ni roha ni Debata, ingkon jujur do hita di sude ulaonta. Boi do sasahalak ndang jujur nang pe ndang mangkatahon gabus. Umpamana, didok Jahowa tu halak Israel, ”Ndang jadi hamu manangko, jala ndang jadi hamu margabus, jala ndang jadi hamu masipaotootoan.” Boasa ingkon diulahon on? Didok Jahowa, ”Ingkon badia hamu, ai na badia do Ahu, Jahowa, Debatamuna i!” (3 Mus. 19:2, 11) Nang pe ndang tahatahon gabus, alai molo tabahen halak mangkaporseai na so sintong, na margabus do hita disi. w16.12 1:17, 18

Di Bibel, tajaha do taringot cara ni Jesus mangkatai. Lomo do roha ni halak manangihon Jesus ala hata ni Jesus mangalehon pangapulion dohot las ni roha, tarlumobi tu na gale manang na holsoan. (Mat. 11:28-30) Diparrohahon Jesus do songon dia pangkilalaan ni angka halak. (Mrk. 6:30-32) Dos songon janji ni Jesus laho mangurupi angka apostel, saonari pe diurupi ibana do hita. Ndang ala laho mandapot laba hita asa jonok tu Jesus. Ala nunga gabe Raja di surgo, tongtong do dipatudu ibana holongna tu hita. Tingki holsoan hita, pos ma rohanta na olo do Jesus mangurupi hita di tingki na pas. Dilehon Jesus do pangkirimon dohot habaranion asa unang paholsohu hita.​—Heb. 2:17, 18; 4:16. w16.12 3:4, 6

Si Noak mangolu di portibi na ”gok hajahaton” dohot parmainanon. (1 Mus. 6:4, 9-12) Marsitutu do si Noak pasahathon sipasingot sian Jahowa, alai ndang dipaksa ibana angka halak manangihon barita i. Ndang dihirim rohana asa hatop ro Aek na Sumar i. Pos do roha ni si Noak diingot Jahowa do janjiNa laho mangaripashon parjahat, jala porsea do ibana nunga ditontuhon Debata tingkina. (1 Mus. 6:17) Saonari, hita mangolu di portibi na gok hajahaton, na laho ripashonon ni Jahowa. (1 Joh. 2:17) Alai, ndang boi tapaksa angka halak manjangkon ”barita na uli on na taringot tu Harajaon”. Jala ndang boi tapaksahon asa hatop ro hasusaan bolon i. (Mat. 24:14, 21) Songon si Noak, ingkon togu do haporseaonta. Pos rohanta ripashonon ni Debata nama hajahaton. (Ps. 37:10, 11) Pos do rohanta ndang olo Jahowa paloashon hajahaton tongtong di portibi on.​—Hab. 2:3. w17.01 1:5-7

Saonari, godang halak mamangke hak laho mamillit tu ulaon na so denggan. Bibel paboahon, ”di angka tingki parpudi”, ndang diboto halak mandok mauliate. (2 Tim. 3:1, 2) Songon dia do hita patuduhon hamauliateon tu Jahowa alani silehonlehon on? Songon dia do hita asa tongtong denggan mamangke i? Dilehon do hak tu hita laho mamillit dongan, pangkean, dohot hiburan. Alai, boi do on mambahen hita marsidalian laho mangulahon na so dihalomohon Debata manang mangihuthon portibi on. (1 Ptr. 2:16) Alani i, asa unang tu na so denggan tapangke hak laho mamillit, denggan ma molo tapangke ”saluhutna i, pasangaphon Debata”.​—1 Kor. 10:31; Gal. 5:13. w17.01 2:12-14

Songon si Nehemia, molo tadapot hak na sumurung, tongtong ma unduk rohanta. Nang pe godang pengalamanta, unang ma marhaposan tu diri sandiri. Songon dia do sasahalak gabe marhaposan tu diri sandiri? Ra, sahalak sintua ndang jolo martangiang tingki laho pasaehon parsoalan di huria. Manang, olo do ra adong donganta jolo mamillit sipilliton, baru pe martangiang asa dipasupasu Jahowa na pinillitna i. Halak na unduk, ndang olo marhaposan tu diri sandiri nang pe nunga jotjot ibana mangulahon sadasada ulaon. Diingot ibana, ndang dos ibana songon Jahowa. (Poda 3:5, 6) Saonari, godang do halak mangkaringkothon diri sandiri jala lomo rohana asa dumenggan sian na asing. Alai, naposo ni Jahowa ndang songon i. Ndang didok rohanta dumenggan hita sian na asing, di keluarganta manang di huria. Taingot ma na ingkon taulahon, jala rap saulaon ma dohot dongan sahaporseaonta.​—1 Tim. 3:15. w17.01 4:7, 8

Sangkap ni Jahowa tu jolma, i ma asa mangolu salelengna di tano on. (1 Mus. 1:28; Ps. 37:29) Burju do Debata, jala dilehon do silehonlehon na mansai arga tu si Adam dohot si Hawa. (Jak. 1:17) Dilehon do hak laho mamillit, marpingkir, mangkaholongi, dohot maraleale. Mangkatai ma Debata tu si Adam jala dipaboa do tu ibana songon dia cara mangulahon na denggan. Diparsiajari si Adam do muse songon dia mangaradoti dirina, binatang, dohot tano on. (1 Mus. 2:15-17, 19, 20) Dibahen Jahowa do si Adam dohot si Hawa boi mandai, maniop, marnida, marbinege, dohot manganggo angka na tinompa ni Debata tu nasida. Marlas ni roha ma nasida mangolu di tano on. Godang do ulaon ni nasida jala tongtong marsiajar taringot tu angka na baru salelengna. Dibahen Jahowa do si Adam dohot si Hawa boi marpinompar. Dilehon do tano on dohot sude nasa isina tu nasida jala maringanan salelengna disi. w17.02 1:6, 7

Songon dia do Hata ni Debata manogunogu baoa na manguluhon naposo ni Debata? Pingkirhon ma taringot tu Raja Josia. Tingki jumpang ni malim Hilkia buku patik ni si Musa, dijahahon si Sapan ma i tu si Josia. Gabe taronjar ma roha ni si Josia manutung sude ganaganaan di Israel jala dibahen ma ari Paska na umbalga. (2 Raj. 22:11; 23:1-23) Ala si Josia dohot pamimpin na asing mangihuthon Hata ni Debata, olo do nasida manguba tudutuduna hombar tu Hata ni Debata. On mangurupi naposo ni Debata gabe unduk. Ndang sude raja na manguluhon naposo ni Debata mangihuthon tudutuduNa na dilehonNa. Sipata, dipasingot Jahowa do nasida manang dilului panggantina. (1 Sam. 13:13, 14) Alai, adong do sahalak na dipillit Jahowa gabe pamimpin na dumenggan. w17.02 3:11, 12, 14

Ditompa do jolma tudos tu rupa ni Debata. (1 Mus. 1:27) Lapatanna, sude jolma boi maniru parange ni Debata. Umpamana, boi do tapatudu holong, haburjuon, dohot asi ni roha. Dilehon do muse panggora ni roha tu hita, i ma parbinotoan asa taboto dia na denggan dohot na roa, na tama dohot na so tama. (Rom 2:14, 15) Lomo do roha ni godangan halak mangida angka na denggan jala mardame dohot na asing. Ndang songgot rohanta alani on, alana Jahowa i ma Debata na taratur dohot silehon dame. Tangkas ma, sude jolma boi maniru parange ni Jahowa. Alani i, tama do nasida dipasangap jala diargai. Taboto, ingkon tapasangap do halak na asing. Alai, olo do maol mamboto songon dia cara na denggan laho pasangaphon nasida. w17.03 1:5, 6

Serep do roha ni Jahowa jala marasi ni roha. Ndang songon jolma, diboto Jahowa do mamillit na dumenggan nang pe tingki muruk. Tingki marhamubaon halak Ninive jala ndang diulahon nasida be angka hajahaton, diuba Jahowa do na pinillitNa. On patuduhon serep ni rohaNa dohot asi ni rohaNa. Sipata, denggan do molo tarimangi angka naung tapillit, umpamana tingki muba situasi di ngolunta. Ingot ma, Jahowa pe olo do manguba naung ditontuhon Ibana hian. (1 Raj. 21:20, 21, 27-29; 2 Raj. 20:1-5) Tingki adong tudutudu na baru, hita pe boi do manguba angka naung tapillit. Taparrohahon ma na binahen ni Raja Daud. Pintor disalahon ibana do si Mepiboset alani barita na binegena. Alai dung diboto ibana songon dia sasintongna na masa, gabe diuba ibana ma naung pinillitna.​—2 Sam. 16:3, 4; 19:25-30. w17.03 2:14, 15

Tingki manontuhon sipilliton, ingkon jolo tarimangi do prinsip sian Bibel na boi mangurupi hita jala songon dia hita mangulahon i. Tarimangi ma situasi on: Adong donganta borua na tungganedolina ndang Sitindangi Ni Jahowa. Sada tingki, naeng marbarita na uli ma ibana. (Ul. 4:20) Tingki i, didok tungganedolina ma asa unang laho ibana marbarita, ala nunga leleng nasida ndang paduadua. Naeng ditogihon tungganedolina ibana tu sada inganan. Dirimangi donganta on ma pigapiga ayat asa marbisuk ibana manontuhon sipilliton. Diboto ibana, ingkon unduk do tu Debata jala nunga diparentahon Jesus sude siseanna asa marbarita. (Mat. 28:19, 20; Ul. 5:29) Alai diingot ibana, ingkon unduk do tungganeboru tu tungganedolina, jala ingkon dilehon do tingki asa rap dohot tungganedolina. (Eps. 5:22-24) Ingkon dipingkirhon ibana: Na sai diorai tungganedolina do ibana marbarita, manang asa rap do nasida na dua di tingki i umbahen na dipangido asa unang marbarita? Tatontuhon ma sipilliton na denggan jala palashon roha ni Debata. w17.03 4:17