Maret

Adong do sahalak dongan di huria na mambahen jut rohamuna? Ra, gabe ndang olo hamu manogihon ibana tu jabumuna ala ndang lomo rohamu mangida parangena. Bibel mandok, molo lomo rohanta manamue, boi do i mambahen hita lam solhot tu na asing, tarmasuk ma i tu musunta. (Poda 25:21, 22) Molo ditogihon hamu sasahalak tu jabumuna, gabe boi ma hamu pasidingkon angka pingkiran na so denggan taringot ibana. Jala boi ma hamu gabe lam marale-ale tu ibana. Ra, boi ma diida hamu parangena na denggan, songon Jahowa mangida parange na denggan sian ibana. (Joh. 6:44) Molo holong do na mangonjar rohanta laho manamue sasahalak, boi do i gabe dalan asa marale-ale hita. Songon dia carana mamboto alani holong do hita gabe taronjar mangulahon i? Carana, i ma mangulahon songon na disurat di ayat na taulas sadari on. Alani i, unang ma tapingkir hita na sumurung sian angka dongan. Boi ma tadapot parsiajaran sian haporseaon, habengeton, dohot parange ni nasida na denggan. On boi mambahen lam holong rohanta tu nasida, jala lam marlas ni roha manamue. w18.03 19 ¶18-19

Sada parsoalan na mansai borat na diadopi piga-piga natua-tua, i ma tingki ianakhonna dipecat. Adong sahalak donganta borua na boruna dipecat, jala nunga lao sian jabuna. Didok ibana, “Sai hulului do hatorangan sian publikasi atik na boi dope ahu manjumpangi borungku dohot pahompungku.” Alai diurupi tungganedolina ma ibana mangantusi molo nasida ndang be martanggung jawab tu boruna i, jala ingkon tongtong do nasida marsihohot tu Jahowa. Dung piga-piga taon, dijangkon ma muse boruna. Didok omakna ma, “Diargai ibana do tungganedolingku dohot ahu ala diihuthon hami do Debata.” Jadi molo adong ianakhonmuna na dipecat, olo do hamu “marhaposan tu Jahowa” sian nasa rohamuna? Manang ‘marpangunsandean tu pingkiranmuna sandiri’ do? (Poda 3:5, 6) Tongtong ma porsea na denggan do sipasingot sian Jahowa dohot tudu-tuduNa. Tangihon ma Debata jala unang ma mangalo, nang pe hansit tahilala tingki mangihuthon i. w18.03 30 ¶12-13

Ndang adong dipaboa di Bibel umur sadia do sasahalak asa boi tardidi. Hata na disurat di Mateus 28:19 i, lapatanna i ma mangajari halak asa boi gabe sisean. Lapatan ni sisean, i ma halak na mamparsiajari jala mangantusi aha na diajarhon Jesus jala mangihuthon ibana. Jadi, boi do natua-tua mangajari ianakhonna sian mulai tubu dope. Tontu, ndang maksudna boi tardidi molo poso-poso dope. Alai sian Bibel taboto, dakdanak pe boi do mangantusi jala mangkaholongi hasintongan na sian Bibel. Umpamana, sian mulai na poso dope, nunga gabe sisean ni Jesus si Timoteus. Togu ma haporseaonna. (2 Tim. 1:5; 3:14, 15, Bibel siganup ari) Jadi, tingki naeng marumur 20 taon, nunga mandapot tugas na ringkot ibana di huria.​—Ul. 16:1-3. w18.03 10 ¶4-5

Tingki tapillit laho manomba Debata jala tardidi, olo do hita mambahen hamubaon di ngolunta. Alai ndang sae sahat disi. Ala jolma na mardosa hita, porlu dope hita mambahen hamubaon. (Plp. 3:12, 13) Sude hita na poso nang na matua, tasungkun ma dirinta, ‘Lam jonok do ahu tu Debata? Nunga hutiru Jesus? Sian parniulaonku di parpunguan, tarida do nunga jonok ahu tu Debata? Sian pangkataionku ganup ari, tarida do Jahowa na rumingkot di ngolungku? Sian caraku marsiajar, caraku margaya jala marpangkean, dohot pangkilalaanku tingki dipasingot, tarida do na jonok ahu tu Debata? Aha do na huulahon molo diela-ela mangulahon na sala? Nunga gabe halak Kristen na denggan be ahu?’ (Eps. 4:13) Sungkun-sungkun on boi mangurupi hita mamboto sadia bagas do parale-aleonta tu Jahowa. w18.02 23 ¶4-5

Dipapungu Jahowa do saonari godang halak “sian nasa bangso, marga dohot houm dohot hata”. Alai, ndang holan i na dipaboa Bibel. Nasida gabe “bangso na bolon” jala lobi sian ualu juta halak na marlas ni roha na “mangoloi Ibana arian dohot borngin”. (Pgk. 7:9, 15; Jes. 60:22) Mansai godang do na mangkaholongi Debata dohot mangkaholongi angka donganna. Jala on ma na mambahen ngolunta saonari imbar sian tingki najolo. Dipaboa Bibel do songon dia parngoluonta saonari. Angka halak na so mangkaholongi Jahowa, patuduhon holong na so denggan, i ma na holan mangkaringkothon diri ni nasida. Jala dipaboa apostel Paulus do, molo nasida “mangkaholongi dirina, impolan di perak” dohot “holongan di hisap ni daging asa di Debata”. (2 Tim. 3:1-4) On ma holong na mangkaringkothon diri sandiri, jala na so dihalomohon Debata. Gariada gabe lam susa do parngoluon di portibi on alani i. w18.01 21 ¶1-2

Ala diparsiajari si Noak taringot Jahowa, gabe togu ma haporseaonna jala dapotna ma bisuk na sian Debata. I do na mangurupi ibana tarlumobi asa unang mangulahon na dihasogohon Debata. Lomo do roha ni si Noak marale-ale tu Debata, jadi ndang olo ibana marale-ale tu na so olo manomba Jahowa. Angka halak di tingki i, nunga dioto-otoi angka begu. Lomo do roha ni nasida mangida huaso ni angka begu, jala manomba sisongon i. (1 Mus. 6:1-4, 9) Asing ni i, diboto si Noak do, holan jolma do na dipangido Debata asa marpinompari jala manggohi tano on. (1 Mus. 1:27, 28) Jadi, diboto si Noak ma sala do angka begu ala mambuat angka borua jala marianakhon. Ianakhon ni nasida pe umgogo jala umbalga sian anak ni jolma. Alani i, dipaboa Jahowa ma tu si Noak, bahenonNa ma aek na sumar laho mangaripashon angka parjahat. Ala togu do haporseaon ni si Noak, dibahen ibana ma parau jala malua ma ibana dohot keluargana.​—Heb. 11:7. w18.02 11 ¶8

Molo hea do hamu mangulahon dosa na balga, rade do Jahowa manalpuhon hasalaanmuna. Lomo do rohana mangurupi hita asa boi muse marale-ale tu Ibana. Alai, ingkon tajangkon do pangurupionNa marhite angka sintua. (Poda 24:16; Jak. 5:13-15) Mangkorhon do i tu pangkirimonmuna taringot hangoluan saleleng-lelengna. Alani i, pintor taulahon ma i! Alai, songon dia ma molo tong dope marsak hita nang pe nunga leleng dosanta i disalpuhon? Hea do apostel Paulus marmetmet ni roha alani hasalaanna di tingki naung salpu. Didok ibana ma, “Ai ahu do na ummetmet sian angka apostel; na so tama do ahu nian goaron apostel, ala naung hulele huria ni Debata.” (1 Kor. 15:9) Tangkas do diboto Jahowa, jolma na mardosa do si Paulus. Alai dijangkon Jahowa do si Paulus nang pe songon i ibana. Jala lomo do rohaNa asa pos roha ni si Paulus taringot i. Molo tutu do disolsoli hamu dosamuna i jala diangkui hamu di adopan ni Jahowa manang tu sintua, tontu salpuhonon ni Jahowa do i. Pos ma rohamuna nunga disalpuhon Jahowa hasalaanmuna i!​—Jes. 55:6, 7. w18.01 7-8 ¶17-18

Asa boi gabe ale-ale ni Jahowa, ingkon tatangihon jala mangkatai do hita tu Ibana. Cara laho manangihon Jahowa, i ma marhite mamparsiajari Bibel. Tajaha jala tarimangi ma Hata ni Debata manang angka sijahaon na diparade organisasi. Alai, marsiajar Bibel ndang dos songon mangapil parsiajaran tingki naeng ujian ho di singkola. Marsiajar Bibel boi do dipatudos songon mardalani tu inganan na so hea dope didalani ho. Di pardalanan i, dapotmu ma pengalaman na baru. Suang songon i ma tingki marsiajar Bibel, dapotmu ma gumodang hatorangan taringot Jahowa. Lam jonok ma ho tu Debata jala jonok ma Ibana tu ho. Godang do angka alat na diparade organisasi ni Jahowa na boi mangurupi ho marsiajar Bibel sahalakmu. Umpamana, di situs jw.org adong do panduan belajar “Apa yang Sebenarnya Alkitab Ajarkan?” On boi mangurupi hamu patoguhon haporseaonmuna jala paboahon i tu na asing.​—Ps. 119:105. w17.12 23 ¶8-9

Didok panurirang i, “Ai gok parbinotoan di Jahowa tano on sogot.” Molo binatang ndang boi mananda Jahowa. Jadi sasintongna, surirang on manggombarhon angka jolma na boi paubahon parange ni nasida. (Jes. 11:6, 7) Godang do pengalaman ni angka donganta naung mambahen hamubaon. Boi ma i taida di jw.org, di bagian “Bibel Mambahen Denggan Ngolungku”. Diulahon nasida do ayat na mandok, “Solukkon hamu ma jolma na imbaru, na tinompa suman tu Debata, di bagasan hatigoran dohot hapolinon na marhasintongan!” (Eps. 4:23, 24) Dung marsiajar Bibel diantusi nasida ma, ingkon ihuthonon ni nasida do uhum ni Debata. On ma na mangurupi nasida mambahen hamubaon tu cara marpingkir, parniulaon dohot haporseaon nasida. Ndang mura laho mangulahon on. Alai tondi parbadia ni Debata boi do mangurupi nasida laho pasonangkon roha ni Debata. w18.01 31 ¶15-16

Bibel mandok, angka halak na dipahehe laho tu banua ginjang, “ganup ma mangihuthon parjojorna”. Alani i, boi do hita marpos ni roha, taratur do bahenonNa haheheon na masa di portibi on annon. Ra, gabe tasungkun do di bagas rohanta, ‘Ise do na parjolo dipahehe tingki dipungka Harajaon Saribu Taon i? Angka halak na baru mate do, asa boi pajumpang dohot angka halak na ditanda nasida? Manang, angka halak na boi gabe pemimpin di portibi na imbaru do? Dipahehe do angka halak na so hea mananda Jahowa? Andigan jala didia do dipahehe nasida?’ Godang do na laho tasungkun. Alai, ndang pola tapingkiri i saonari. Tapaima jala taida ma annon songon dia Jahowa mangulahon i sude. Huhut paimahon i, tapatogu ma haporseaonta tu Jahowa. Marjanji do Ibana marhite Jesus, sai diingot ibana do angka halak naung mate asa boi dipahehe muse.​—Joh. 5:28, 29; 11:23. w17.12 14 ¶20-21

Didok Jahowa do tu angka tungganedoli, ‘Hamu angka baoa, haholongi hamu ma tungganeborumuna be, jala unang ma tarrimas hamu tu nasida!’ Tangihon ma tungganeborumuna tingki mangkatai. Patudu ma na diargai hamu do pandapotna. (1 Ptr. 3:7) Nang pe ndang sai boi diulahon hamu pangidoanna, alai molo ditangihon hamu ibana, gabe boi ma hamu mambahen haputusan na dumenggan. (Poda 15:22) Tungganedoli na parholong, ndang holan manuntut asa diargai. Alai, marsitutu do ibana asa diargai. Molo holong do tungganedoli tu tungganeboru dohot ianakhonna, gabe marlas ni roha ma nasida manomba Jahowa. Boi ma dapotnasida upa na dijanjihon Debata. w17.11 30 ¶12; 31-32 ¶15

Hira-hira taon 60-61 M, dipenjara ma si Paulus di Rom. Ditongos ibana ma surat tu angka dongan di Kolosse. Disi, dipatorang ibana ma tu nasida porlu do “habisuhon partondion” di nasida. Boasa? Asa boi ditiru nasida pamingkirion ni Jahowa. (Kol. 1:9) Didok disi, “Hupaboa do on tu hamu, asa unang adong na paoto-otohon hamu marhite angka hata na denggan begeon. Parrohahon hamu ma asa unang adong na mamparhatoban hamu marhite hata sipaotooto na sian habisuhon ni jolma, na ro sian poda ni jolma marsundutsundut dohot sian angka tondi na mangarajai portibi on, angka na so sian Kristus.” (Kol. 2:4, 8, Bibel siganup ari) Dung i, dipatorang si Paulus ma angka pamingkirion na dihalomohon godang halak. Alani pamingkirion sisongon i, gabe didok roha ni angka halak ma ummalo nasida sian na asing. Jadi, ditongos si Paulus pe surat on, asa boi do angka dongan pasidingkon ulaon, dohot pingkiran na sala.​—Kol. 2:16, 17, 23. w17.11 21 ¶1

Aha do na ingkon ulahonon ni halak Kristen asa tongtong mandapot asi ni roha ni Jahowa? Pasiding ma angka ulaon na tahalomohon najolo, na boi mambahen hita mardosa. (Mat. 18:9) Umpamana, molo adong dongan na mangela-ela hita mangulahon na sala, olo dope hita mardongan dohot ibana? Molo ndang boi taorom dirinta minum alkohol, olo do hita mandao sian angka na boi mangela-ela? Molo ndang boi taorom giot-giot ni dagingta, olo do hita pasidingkon video, situs internet, manang na mambahen hita mamingkirhon angka na rorang? Molo ndang marsitutu hita, boi do gabe didok rohanta naung ditadingkon Jahowa hita. Alai, molo marsitutu hita tahilala ma “denggan basa [ni Jahowa] salelenglelengna.” I ma na palashon roha.​—Jes. 54:7, 8. w17.11 12 ¶12

Di Sakaria 5:4 dipaboa, ro toru-toru manang bura tu “bagas ni halak panangko”, jala ‘laos marborngin do i di tongatonga ni jabuna, jala siaphononna’. Aha do lapatan ni i? Lapatanna, boi do patuduhonon ni Jahowa jala uhumonNa naposoNa na mangulahon na sala. Nang pe sasahalak na manangko boi margabus tu polisi, bosna, sintua, manang natua-tuana, alai ndang boi gabusanna Jahowa. Di ari na naeng ro, patuduhonon ni Debata do i. (Heb. 4:13) Las do rohanta ala boi rap dohot angka dongan na so margabus “di na saluhut”! (Heb. 13:18) Ndang lomo roha ni Jahowa mangida panangko. Sada hasangapon do di hita mamboto jala mangoloi uhum ni Jahowa. Taboto ma dia na sintong jala dia na sala. Jala las do rohanta marpangalaho na denggan asa unang marlea goarNa. Molo taulahon on, malua ma hita sian panguhuman ni Jahowa. w17.10 16-17 ¶6-7

Ringkot do mardame dohot angka dongan di huria. Tingki adong na marsala tu hita, ingkon marsitutu do hita mardame dohot nasida. (Rom 12:17, 18) Molo tabahen hansit roha ni sasahalak, mangangku sala ma hita. Asing ni i, mansai ringkot do hadameon di rumah tangga. Sala do molo na mardongan saripe masihaholongan holan tingki diida halak, hape marbadai jala “lalu tangan” di na buni. Ingkon rade ma hita manalpuhon hasalaan. Molo adong na mambahen hansit rohanta, unang ma sai tapaingot-ingot be. Alai tasalpuhon ma i nang pe ndang mangangku sala ibana. Asa boi manalpuhon hasalaan ni dongan unang be sai tapingkiri pambahenan ni nasida tu hita. Alana, molo adong holong di hita, ‘ndang tapaingot-ingot [be] hasalaan ni halak’. (1 Kor. 13:4, 5, Bibel siganup ari) Jala molo sai sogo rohanta mangida donganta, boi do gabe sega parale-aleonta tu nasida dohot tu Jahowa.​—Mat. 6:14, 15. w17.10 7 ¶14-15

Aha do pangkorhon ni hata ni si Sakaria tu halak Jahudi di tingki i? Gabe togu do roha ni nasida. Nunga marjanji Jahowa, sai na linggomanNa jala urupanNa do nasida pasaehon joro i. Alai ra sungkun-sungkun do roha ni nasida, songon dia do bahenon ni nasida pasaehon ulaon na balga i, hape holan saotik do nasida. Didok Jahowa ma, “Ro do huhut halak sian tano na dao naeng parsidohot pauli bagas joro ni Jahowa sogot” dos songon si Helda, si Tobia dohot si Jedaia. Gabe pos ma roha ni halak Jahudi. Olo do nasida pajongjongkon bagas joro i muse nang pe diorai raja Persia. Dos do on songon dolok na mangambati nasida, alai dipasiding Jahowa do dolok i. Ujungna, taon 515 SM sae ma bagas joro i. (Esr. 6:22; Sak. 4:6, 7) Alai, adong do pangkorhon ni hata i tu hita saonari. w17.10 26 ¶17

Dipillit Jahowa do si Salomo laho mangulahon sada tanggung jawab na mansai ringkot. I ma ulaon pajongjongkon bagas joro di Jerusalem. Rumingkot do ulaon on sian ulaon na asing! Alana ingkon “balga situtu [do i] bahenon” jala ingkon tarbarita do i tu sude halak. Alai na rumingkot, ala gabe “hajongjongan ni joro ni Debata Jahowa” do i. (1 Kron. 22:1, 5, 9-11) Pos do roha ni si Daud sai na urupan ni Debata do si Salomo. Alai, poso dope si Salomo jala ndang marpengalaman. Olo do si Salomo manjalo tanggung jawab pajongjongkon bagas joro? Manang haduk do rohana ala poso dope ibana jala ndang marpengalaman? Asa boi marhasil, ingkon barani do si Salomo jala olo mangulahon i. Alana, molo mabiar do si Salomo ndang pungkaonna be ulaon i. Tumagon do ndang sae ulaon i dibahen, sian apala ndang olo mangulahon i ala mabiar. Songon si Salomo, tahaporluhon do pangurupion ni Jahowa. w17.09 27 ¶1-2; 28 ¶4-5

Songon dia do molo ndang adong Bibel? Ndang adong be tudu-tudu na manogu-nogu hita. Ndang taboto hasintongan taringot Debata, hangoluan, dohot ari na naeng ro. Asing ni i, ndang taboto aha naung diulahon Jahowa tu naposoNa najolo. Alani i mandok mauliate do hita ala dilehon Jahowa do Bibel tu hita. Jala marjanji do Ibana sai na hot do hataNa i saleleng ni lelengna. Dienet apostel Petrus do hata na tarsurat di Jesaya 40:8. Ndang apala tangkas didok, na Bibel do na dipaboa di ayat i. Alai, tontu marlangku do na tarsurat di ayat i tu Hata ni Debata. (1 Ptr. 1:24, 25) Gumodang do laba na tadapot molo tajaha Bibel di bahasa na taantusi. Jala diboto angka halak na mangkaholongi Hata ni Debata do i. Alani i ma, saleleng maratus taon godang halak na marsitutu manerjemahon Bibel, nang pe mangadopi paraloan. Alana, dihalomohon Debata do asa sude halak “malua jala sahat mananda hasintongan i”.​—1 Tim. 2:3, 4. w17.09 15 ¶1-2

Godang do angka donganta na poso mangadopi ela-ela songon na masa tu si Josep. (1 Mus. 39:7) Umpamana, songon si Kim. Jotjot do dongan sakalasna mangkata-hatai taringot mangulahon seks. Alai ndang olo si Kim dohot disi. Ibana mandok, sipata olo do gabe lungun rohana ala asing sian angka donganna. Jala olo do didok donganna na oto do ibana ala ndang olo marhamlet. Alai sasintongna, na marbisuk do si Kim disi. Diboto ibana do na maol pasidingkon ela-ela laho mangulahon seks di haposoon. (2 Tim. 2:22) Jotjot do donganna manungkun, atik na hea do ibana mangulahon seks manang na ndang. Gabe dalan do on di ibana laho patorangkon boasa ndang olo ibana mangulahon i. Las do rohanami tu hamu angka na poso, ala marsitutu do hamu manundalhon ela-ela. Jala las do roha ni Jahowa mangida hamu! w17.09 5 ¶8; 5-6 ¶10

Sasahalak na mura-mura muruk, jotjot do mandok hata na mambahen hansit roha. Parange sisongon i ndang mambahen marlas ni roha di keluarga. Dipasingot Bibel do hita asa pasidingkon rimas, hata na mambahen hansit ni roha ni dongan, dohot songgak-songgak. (Eps. 4:31) Sudena i boi mambahen hita gabe “lalu tangan”. Saonari, nunga somal be masa di portibi on rimas dohot hajahaton. Alai sasintongna, pangalaho sisongon on ndang pasangaphon Debata Sipanompa hita. Alani i, godang do angka donganta mambahen hamubaon jala mamangke parange na imbaru. (Kol. 3:8-10) Sada sian pangalaho na buruk, i ma margabus. Umpamana, godang do jolma margabus asa unang manggarar pajak manang asa unang disalahon. Alai “Debata ni hasintongan” do Jahowa. (Ps. 31:5) Dipangido do tu na manomba Ibana asa ‘mangkatahon na sintong’ jala “unang ma masigabusan”. (Eps. 4:25; Kol. 3:9) Tangkas ma taboto, ingkon tahatahon do na sintong nang pe di situasi na maol.​—Poda 6:16-19. w17.08 16 ¶3, 5; 18-19 ¶12-13; 20 ¶15

Saonari, ditogu-togu Jahowa do hita marhite Bibel. Panurat psalmen paboahon ‘doras marlojong hataNa’ laho mangurupi hita. Dipatogu Jahowa do hita di dalan dohot di tingki na pas. Rimangi ma laba na tadapot sian Bibel, sian sijahaon na diparade “naposo haposan jala na marroha”, JW Broadcasting, jw.org, angka sintua, dohot angka dongan sahaporseaon. (Mat. 24:45) Hea do dihilala hamu pangurupion ni Jahowa di ngolumuna? Diboto panurat psalmen do naung dipillit Jahowa bangso Israel na parjolo gabe bangso na tarpillit sian angka bangso na asing. Holan tu bangso Israel do dilehon Debata “hatana” dohot “patikna”. (Ps. 147:19, 20) Saonari, mandapot hasangapon do hita ala boi dohot pabadiahon goarNa. Mandok mauliate do hita ala tatanda Ibana. HataNa boi manogu-nogu hita jala mangurupi hita asa marale-ale tu Ibana. Songon na disurat di Psalmen 147, godang do na mangonjar rohanta laho mamuji Jahowa jala manjujui na asing mandok, “Puji ma Jahowa”! w17.07 20 ¶15-16, 18

Angka sisean ni Jesus dohot angka dongan na mangalehon sude tingkina tu Jahowa, marsitutu do mangulahon poda i. Ndang tarela-ela nasida alani iklan di portibi na ahut on. Diingot nasida do prinsip on, “Ingkon mangadop [do] parutang tu baoa parutangan.” (Poda 22:7) Lomo do roha ni Sibolis asa suda tingkinta mangalului arta. Adong do na marutang asa boi marjabu, manuhor mobil, marsingkola, manang marhasohotan. Molo ndang manat, boi do gabe tarutang hita saleleng martaon-taon. Na marbisuk do hita molo ndang pagodanghu barang na tatuhor, ndang marutang jala ndang pasudahon godang hepeng. Molo taulahon on, gumodang ma tingkinta marhobas tu Debata jala ndang gabe hatoban ni sistem partiga-tigaan ni portibi on be hita.​—1 Tim. 6:10. w17.07 6 ¶13

Pingkirhon ma muse boasa marhak Jahowa mamarenta sude na tinompaNa. Marhite hatigoran do Ibana mamangke huasoNa. Didok tu hita, “Ahu do Jahowa, parasi roha na mangkajongjongkon uhum dohot hatigoran di tano on, ai angka ido lomo ni rohangku.” (Jer. 9:23) Ndang dihaporluhon Jahowa patik ni jolma laho mangurupi Ibana manontuhon na denggan. Ibana sandiri do na manontuhon taringot tu na denggan. Marhite hatigoranNa, dilehon do patikNa tu jolma. Panurat ni psalmen mandok, “Hatigoran dohot uhum do ojahan ni habangsami.” Alani i, denggan do sude patik, prinsip, dohot aturan na sian Jahowa. (Ps. 89:15) Didok Sibolis, ndang tigor pamarentaon ni Jahowa. Hape, Sibolis pe ndang boi mambahen hatigoran tu portibi on. w17.06 22 ¶5

Jahowa do Mual ni hasintongan. (Ps. 31:6) Ala songon Ama na burju, lomo do rohaNa mangalehon hasintongan on tu hita. Nunga godang hasintongan na tadapot marhite manjaha Bibel dohot publikasi, jala ro tu kebaktian dohot parpunguan. Molo lam godang hasintongan na tadapot, adong ma di hita panimpanan ni arta, i ma hasintongan “na imbaru dohot naung leleng”. (Mat. 13:52) Diurupi Jahowa ma hita mangisi panimpanan ni artanta molo talului hasintongan i dos songon na mangalului arta na buni. (Poda 2:4-7) Songon dia do hita mangulahon i? Ingkon ringgas do hita mamparsiajari Bibel dohot publikasinta. On mangurupi hita mangantusi hasintongan na “imbaru”, na so hea dope taboto. (Jos. 1:8, 9; Ps. 1:2, 3) Ingkon marhiras ni roha ma hita mangalului godang hasintongan. w17.06 12-13 ¶13-14

Sahalak donganta doli-doli mamingkirhon ayat di 1 Korint 7:28 na mandok, “marniae di daging” do na mardongan saripe. Disungkun ma tu sintua na matoras di partondion naung mardongan saripe, “Aha do lapatan ni ‘marniae’, jala songon dia do ahu mangadopi i molo dung marhasohotan?” Andorang so dialusi, dipangido sintua i ma ibana mamingkirhon surat ni si Paulus na mandok, Jahowa i ma ‘Debata, Sipangapul na sumurung! Ai diapul do hita di bagasan saluhut haporsuhonta’ manang sitaononta. (2 Kor. 1:3, 4) Taboto, dihaholongi Jahowa do hita jala lomo rohaNa mangapuli hita tingki mangadopi hasusaan. Ra, diingot hamu do tingki diurupi jala ditogu-togu Jahowa hamu marhite Bibel. Dos songon na binahenNa tu naposoNa najolo, pos rohanta na dumenggan do bahenon ni Jahowa tu hita.​—Jer. 29:11. w17.06 3 ¶1-2

Ndang holan sipanganon dohot pangkean na dihaporluhon angka donganta na mangungsi. Dihaporluhon nasida do pangapulion marhite Hata ni Debata. (Mat. 4:4) Angka sintua boi mangurupi pangungsi marhite mangalehon publikasi di bahasa ni nasida, jala mangido pangurupion sian donganta na mamboto bahasa ni nasida. Mansai ringkot do on, alana ditadingkon pangungsi do sude na adong di nasida. Masihol do nasida tu keluarga, ale-ale, dohot huria. Dihaporluhon nasida do holong ni Jahowa dohot haburjuon sian dongan sahaporseaon. Molo ndang pintor taurupi, olo do donganta pangungsi gabe manjalo pangurupion sian halak na so manomba Jahowa. (1 Kor. 15:33) Molo tabahen nasida gabe donganta di huria, na rap saulaon do hita dohot Jahowa mangalinggomi “panompang”. Ra, ndang boi be mulak nasida tu hutana ala mamarenta dope na paburu-buru nasida. Jala, godang do na gabe mabiar ala mangkilala sisongon i. Sungkun ma dirimu, ‘Molo ahu na mangkilala i, aha do na huhalomohon bahenon ni halak tu ahu?’​—Mat. 7:12. w17.05 7 ¶15-16

Ala mangolu di portibi na nirajaan ni Sibolis dope hita, godang do situasi na mambahen metmet rohanta. (1 Joh. 5:19) Alai molo tapaloas metmet ni roha i adong di hita, gabe gale ma haporseaonta jala lam ngali ma holong ni rohanta tu Debata. Umpamana, olo do gabe metmet rohanta ala lam matua, marsahit, manang humurang di parhepengon. Asing ni i, olo do lungun rohanta ala ndang boi mangulahon ulaon songon na tahirim. Olo do jut rohanta ala ndang songon na tahirim na masa di parngoluonta. Aha pe na taadopi, unang ma tadok na ditadingkon Jahowa hita. Rimangi ma hata na disurat di Psalmen 136:23, “Ibana marningot hita di hajimputonta i, ai ro di salelenglelengna do asi ni rohana.” Pos ma rohanta, tangihonon ni Jahowa do tangiangta jala dialusi Ibana do i.​—Ps. 116:1; 136:24-26. w17.05 17 ¶8

Songon na dipaboa di Galatia 2:11-14, gabe mabiar do si Petrus tu jolma. (Poda 29:25) Diboto si Petrus do naung dijangkon Jahowa halak na so Jahudi. Alai, mabiar do ibana ala mamingkirhon songon dia pangantusion ni halak Kristen Jahudi tu ibana molo marsaor ibana tu halak Kristen na so Jahudi. Didok si Paulus ma tu si Petrus molo ibana munafik. Boasa? Alana, dibege si Paulus do hata na nidok ni si Petrus taringot tu halak na so Jahudi, tingki marrapot nasida di Jerusalem. (Ul. 15:12; Gal. 2:13) Serep do roha ni si Petrus jala dijalo do sipasingot ni si Paulus. Ndang dipaboa di Bibel molo si Petrus ndang be mandapot hak na sumurung alani i. Alana di pudian ni ari, disurat ibana do dua surat di Bibel. Tongtong do dilehon Jesus hak na sumurung tu ibana. (Eps. 1:22) On ma tingkina di nasida asa maniru Jahowa dohot Jesus, na rade manalpuhon hasalaan ni si Petrus. Sai anggiat ma ndang gale partondionta ala mamboto hasalaan ni sasahalak. w17.04 25-26 ¶16-18

Diripashon Jahowa ma inganan i, asa unang adong be hajahaton disi. Panguhuman ni Jahowa di tingki i, gabe sipasingot do tu parjahat saonari. Dos songon tingki Jahowa mangaripashon ulaon hajahaton di tingki naung salpu, laho ripashononNa ma hajahaton na adong saonari. Aha do na laho manggantihon ulaon na jahat? Di tano na imbaru, godang do ulaon na mambahen las rohanta. Umpamana, bahenonta ma tano on gabe paradeiso jala paulionta ma jabunta dohot tu keluarganta. Tajangkon ma marjuta halak na dipahehe, jala taajari ma nasida taringot tu Jahowa dohot sude pasu-pasu naung nilehonNa tu jolma. (Jes. 65:21, 22; Ul. 24:15) Tingki i, godang ma ulaonta na mambahen las roha jala parohon sangap tu Jahowa! w17.04 13 ¶11-12

Ra, diboto si Jepta do boruna na parjolo ro manomu-nomu ibana. Alai, nang pe diboto ibana manang na ndang, maol do di ibana dohot di boruna manggohi janjina i. Tingki diida si Jepta boruna i, malala ma ate-atena. Dung i, laho ma boruna i mangandungi habajuonna ala ndang boi marhamulian. Boasa? Holan boruna i do ianakhon ni si Jepta, jala gabe ndang boi be boruna i marhasohotan dohot marianakhon. On mambahen ndang adong be na gabe pinompar ni si Jepta. Alai diboto si Jepta dohot boruna, adong do na rumingkot sian pangkilalaan ni nasida. Didok si Jepta, “Nunga huungkap pamanganku marbaga-baga tu Jahowa, jala ndang tartait ahu be.” Jala didok boruna, “Bahen ma tu ahu marguru tu hata na ruar sian pamanganmu.” (Pangh. 11:35-39) Nang pe mansai maol, marsihohot do nasida na dua jala ndang olo mangose janjina tu Debata.​—5 Mus. 23:22, 24; Ps. 15:4. w17.04 4 ¶5-6

Godang do hajahaton na diadopi si Josep. Na parjolo, digadis angka hahana do ibana gabe hatoban tingki marumur 17 taon. Dung i, ditudu do ibana laho manegai tungganeboru ni tuanna gabe dihurung do ibana alani i. (1 Mus. 39:11-20; Ps. 105:17, 18) Hira na so dipasu-pasu do ibana di tingki i nang pe marsihohot tu Debata. Alai dungkon 13 taon, muba ma parngoluonna. Dipalua ma ibana sian hurungan, jala gabe parhuaso na paduahon ma ibana di Misir. (1 Mus. 41:14, 37-43; Ul. 7:9, 10) Gabe mandele do si Josep alani sude sitaononna i? Didok rohana do naung ditadingkon Jahowa ibana? Ndang. Sabar do ibana paimahon. Aha do na mangurupi ibana asa boi songon i? Haporseaonna tu Jahowa. Boi do diida ibana pangurupion ni Jahowa. Boi do taboto i sian hatana tu angka hahana, “Na jat do nian tutu tahi ni rohamuna dompak ahu, alai na denggan do hapatean ni dibahen Debata, patupahon songon na niidamuna sadari on, laho pangoluhon bangso na bolon.” (1 Mus. 50:19, 20) Diboto ibana ma sai na dapotna do pasu-pasu molo sabar paimahon Jahowa. w17.08 4 ¶6; 6-7 ¶12-13