April

Songon dia hita boi mandapot laba sian ulaon ni angka sintua? Tatiru ma haporseaon dohot parange ni nasida na denggan, jala ihuthon ma poda na dilehon nasida na sian Bibel. (Heb. 13:7, 17) Holong do roha ni angka sintua tu hita, jala lomo rohana asa lam jonok hita tu Debata. Molo diparrohahon nasida ndang ro hita tu parpunguan, manang ndang ringgas be hita marbarita, pintor hatop do nasida mangurupi hita. Rade do nasida manangihon hita, jala dipatogu do hita marhite poda sian Bibel. Dihilala hamu do holong ni Jahowa marhite pangurupion ni nasida? Ingot ma ndang sai mura angka sintua laho mangalehon poda tu hita. Aha do na ingkon taulahon asa mura nasida mangalehon poda tu hita? Serep ma rohamuna, burju, jala mura ma hamu tingki ditogihon mangkatai. Pos ma rohamuna holong ni Debata do na dihilala hamu sian pangurupion ni nasida. Dapotmuna ma labana, jala las ma roha ni sintua mangulahon ulaon ni nasida. w18.03 31 ¶15-16

Ganup dakdanak ndang matoras di umur na sarupa. Adong do naung mangantusi hasintongan jala tardidi tingki poso dope. Na asing, tardidi dung magodang saotik nai. Tontu, ndang boi dipaksa natua-tua ianakhonna asa tardidi. Alai, ingkon tongtong do diurupi nasida ianakhonna asa taronjar mangalehon ngoluna tu Jahowa. Tontu, las do roha ni natua-tua molo ianakhonna marbisuk mambahen haputusan songon na didok di ayat sadari on. Alani i, ingkon tongtong ma diingot angka natua-tua: na tinuju ni nasida mangurupi ianakhonna, i ma asa boi gabe sisean ni Jesus. Jadi, sungkun ma rohamuna, ‘Nunga cukup be parbinotoan ni ianakhonku asa boi tardidi?’ w18.03 10 ¶6

Molo adong dongan na manamue hita jala nunga tajangkon hian, unang ma gabe tasundati. Ra nunga diparade ibana sude andorang so ro hita. Jadi molo tasundati, boi do gabe marisuang sude naung diparade ibana i. (Mat. 5:37) Adong do na so jadi ro tingki digokkon ala dihilala ibana adong ulaon na dumenggan sian i. Na parholong do molo songon i hita? Ingkon taargai do molo adong halak na manamue hita. (Luk. 10:7) Jadi nang pe tasundati ala na tutu do adong na rumingkot, ingkon tibu ma tapaboa tu donganta i. Ingkon taargai do hasomalan di piga-piga inganan. Di sada inganan, boi do ro martamu nang pe ndang ingkon digokkon. Na asing, ingkon mambahen janji do andorang so ro martamu. Di piga-piga hasomalan ndang pola boha molo tasundati gokkon na parjolo sahali. Alai molo di hasomalan na asing ndang suman molo songon i. Jadi ingkon tabahen do na denggan asa las roha ni dongan na manamue hita. w18.03 20 ¶20-21

Ndang cukup holan mamboto isi ni Bibel asa boi jonok tu Debata. (1 Raj. 5:9, 10; 11:4-6) Jadi, aha do muse na tahaporluhon asing ni mangantusi isi ni Bibel? Ingkon tongtong do tapatogu haporseaonta. (Kol. 2:6, 7) Sada cara na ringkot, i ma mamparsiajari buku Tongtong ma di Bagasan Holong ni Roha ni Debata. On boi mangurupi hita asa mangulahon prinsip ni Bibel ganup ari. Molo nunga diparsiajari hamu buku on, parsiajari ma muse angka sijahaon na asing na boi patoguhon haporseaonmuna. (Kol. 1:23) Jala tarimangi ma angka na taparsiajari, dung i pangido ma tu Jahowa asa diurupi hita mangulahon i. Aha do na tinujunta tingki mamparsiajari jala mangarimangi hata ni Debata? I ma asa taronjar rohanta laho unduk jala palashon roha ni Jahowa. (Ps. 40:9; 119:97) Jala, porlu do hita pasidingkon sude na boi mangambati hita pajonokkon diri tu Debata.​—Tit. 2:11, 12. w18.02 24 ¶7-9

Hita boi marhaporseaon songon si Noak. Ringkot do molo marsitutu hita mamparsiajari Bibel, jala tahalomohon ma aha na taparsiajari i. Dung i, ingkon taulahon ma na dumenggan di ngolunta, hombar tu naung taparsiajari. (1 Ptr. 1:13-15) Alani i, boi ma haporseaonta dohot bisuk na sian Debata mangondingi hita sian Sibolis dohot portibi on. (2 Kor. 2:11) Alana, nunga godang halak saonari mangkalomohon na jahat dohot na rorang. (1 Joh. 2:15, 16) Ndang parduli be nasida naung jonok nama ajal ni portibi on. Alani i, molo ndang togu haporseaonta boi do gabe dohot hita marpingkir songon i. Ingot ma hea do dipatudos Jesus tingkinta songon tingki ni si Noak. Dipasingot ibana do asa unang hita gabe manimbil jala manadingkon Debata. (Mat. 24:36-39) Rimangi ma sungkun-sungkun on: ‘Tarida do sian parngoluonku na hutanda Jahowa? Huulahon do na diajarhon Jahowa, jala hujujui do na asing asa mangulahon i?’ Alusmuna sian sungkun-sungkun on mangurupi hamu mamboto, na tutu do hamu mangihuthon Debata, songon na diulahon si Noak.​—1 Mus. 6:9. w18.02 11-12 ¶8-10

Tutu, ndang boi tongtong tapasiding sude angka halak na marparange na roa. Ra, adong do dongan sakarejonta na songon i, manang donganta di singkola, manang keluarganta. Alai, unang ma taihuthon cara marpingkir dohot parniulaon ni nasida. Aha do na boi mangurupi hita? Tapatogu ma parale-aleonta tu Jahowa marhite marsiajar Bibel. Jala marale-ale ma tu halak na mangkaholongi Debata. Las do rohanta mangurupi halak laho mananda Jahowa. Marsitutu ma hita laho marbarita, huhut tatangiangkon ma asa boi hita denggan pasahathon i. Ingkon diboto halak do molo hita sahalak Sitindangi Ni Jahowa. Jadi, angka parangenta na denggan i pe gabe parohon sangap ma tu Jahowa. Dijujui Jahowa do hita asa “tasoadahon roha na so daulat ro di angka hisaphisap tano on, asa taparangehon hatomanon, hatigoran dohot hadaulaton, tagan di hasiangan on”. (Tit. 2:11-14) Molo tatiru Jahowa jala taulahon na dihalomohon rohaNa, gabe panindangion ma on tu na asing. Gabe adong ma halak na mandok, “Rap hita sauduran, ai nunga hubege hami: Debata do donganmuna.”​—Sak. 8:23. w18.01 32 ¶17-18

Aha ma lapatan ni i? Na gabe sala do mangkaholongi dirinta? Ndang sala i. Ala songon i do hita ditompa Jahowa. Didok Jesus do, “Haholonganmu do donganmi songon dirim!” (Mrk. 12:31) Buktina, ndang boi tahaholongi donganta molo ndang tahaholongi parjolo dirinta sandiri. Dipaboa Bibel do muse, “Haholongan ni angka baoa pardihutana be, songon dagingna sandiri. Na mangkaholongi pardihutana, dirina do hinaholonganna disi. Ndang dung dihosomi jolma dagingna, diparmudumudu do jala dipainuinu.” (Eps. 5:28, 29) Tangkas ma, on patuduhon na ingkon tahaholongi do dirinta sandiri. Holong na so denggan do na dipaboa di 2 Timoteus 3:2. I ma holong na mangkaringkothon diri. Halak na paholonghu tu dirina sandiri, holan dirina sandiri do na dipingkiri ibana. (Rom 12:3) Ndang parduli be ibana tu halak na asing. Molo adong na sala, pintor halak na asing do na ditudu ibana mangulahonsa. Sasintongna, ndang marlas ni roha nasida disi. w18.01 22 ¶4-5

Tingki marsiajar Bibel, na manangihon Jahowa do hita. Alai tingki martangiang, hita mangkatai tu Ibana. Mansai ringkot do martangiang. Alai, unang ma didok roham tangiang i holan hasomalan sambing manang songon jimat na mambahen ho sukses. Tangiang, i ma sada cara mangkatai tu Sitompa hita. Ingot ma, lomo do roha ni Jahowa manangihon tangiangmu! (Plp. 4:6) Alani i, tingki adong na borat dipingkiri ho, didok Bibel do, “Sai tu Jahowa ma pasahat parsorionmi.” (Ps. 55:23) Diurupi do marjuta donganta ala mangihuthon poda on. Ho pe boi do urupanNa! Unang ma didok roham, martangiang pe ahu holan asa diurupi Jahowa. Sipata, susa do hita alani godang ni sitaonon, hape ndang taparrohahon angka na denggan na tadapot. Alani i, ganup ari, lului ma tolu na palashon roham, jala hamauliatehon ma i tu Jahowa. w17.12 24 ¶10-11

Saonari, marribu halak rade manomba Jahowa jala tardidi. Angka na poso do godangan sian nasida, naung mamboto hasintongan sian na metmet, jala mamillit laho marhobas tu Jahowa. (Ps. 1:1-3) Molo hamu natua-tua naung gabe Sitindangi, tontu tarpaima do hamu asa tardidi ianakhonmu. (Bandingkon 3 Johannes 4.) Tontu, lomo do rohamu asa diantusi ianakhonmu sude isi ni Bibel. Nang pe gelleng dope, boi do diantusi dakdanak taringot angka halak dohot angka na masa na disurat di Bibel. Diparade organisasi ni Jahowa do godang buku, brosur, dohot video na boi dipangke natua-tua laho mangurupi ianakhonna. Na dia do na adong di bahasamuna? Porlu do ianakhonmu mangantusi isi ni Bibel asa boi togu parale-aleonna tu Jahowa. w17.12 15 ¶1; 16 ¶4

Songon dia do molo ndang Sitindangi ni Jahowa tungganedolimuna, jala ndang burju ibana tu hamu? Gabe muruk do hamu jala marbadai dohot ibana? Ingot ma, ndang na lam denggan situasina molo marbada hamu. Boi do ra dialo hamu ibana. Alai, molo sai dialo hamu ibana, gabe taronjar do annon rohana laho manomba Jahowa? Daong! Molo unduk hamu tu tungganedolimuna, gabe dame ma keluargamuna, jala on parohon sangap tu Jahowa. Olo do ra gabe taronjar roha ni tungganedolimuna laho manomba Jahowa. Boi ma hamu padua rap mandapot upa na sian Debata. (1 Ptr. 3:1, 2) Molo ndang manomba Jahowa tungganeborumuna, jala ndang unduk tu hamu, aha do na boi ulahononmu? Molo disonggahi hamu ibana, gabe diargai do hamu? Tontu ndang. Dijujui Debata do hamu asa gabe tungganedoli na parholong, na maniru Jesus. Sai sabar jala parholong do Jesus tingki manguluhon huria. (Luk. 9:46-48) Molo ditiru hamu Jesus, olo do gabe taronjar roha ni tungganeborumuna laho manomba Jahowa. w17.11 30-31 ¶13-14

Halak na mangihuthon pamingkirion ni portibi on, ndang mangihuthon poda ni Jahowa. Molo ndang manat, boi do i mambahen gale haporseaonta tu Debata. Jotjot do pamingkirion i taida di TV, di internet, di parkarejoan, manang di parsingkolaan. Di piga-piga negara, godang do halak na mandok, ndang pola porlu taboto taringot Debata. Jala, holan lomo ni roha ni nasida ma na diulahon nasida. (Ps. 14:1) Asing ni i, adong do na mandok songon i asa songon na malo idaon. Didok nasida, “Huboto do dia na denggan nang pe ndang marhaporseaon tu Debata.” Boi do dapot rohamuna molo adong na mandok, “ndang adong Panompa”? Piga-piga halak mangalului alusna sian ilmu pengetahuan. Alai, gabe maol do dapot roha ni nasida. Sasintongna, mura do alus ni i. Rimangi ma, boi do jongjong sada jabu molo ndang adong na pajongjongkon? Ndang boi, ndang i? w17.11 22 ¶2-4

Boasa ringkot Borngin Parningotan on tu hita? Alana, on ma sada caranta laho manomba Jahowa. Pos do rohanta diparrohahon Jahowa dohot Jesus do angka ise na marsitutu tu ulaon i. Lomo do roha ni Jahowa dohot Jesus mangida hita ro tu Borngin Parningotan i, nang pe sipata ndang mura asa boi ro tu ulaon i. Molo ro hita tu ulaon na ringkot on, pos ma roha ni Jahowa laho manurathon goarta di “buku parningotan” i, jala digoari do muse buku on “buku hangoluan”. Disurat do disi angka goar ni halak na dihalomohon Jahowa asa boi mangolu saleleng-lelengna. (Pgk. 20:15) Piga-piga minggu andorang so Borngin Parningotan, talehon do gumodang tingkinta laho martangiang dohot mangarimangi parale-aleonta tu Jahowa.​—2 Kor. 13:5. w18.01 10 ¶4-5

Molo dung di huta parlinggoman halak na so sangaja mambunu, ndang adong be na boi pamatehon ibana. Songon na nidok ni Jahowa, “angka huta i bahen haporusan” manang parlinggoman. (Jos. 20:2, 3) Di joloan ni ari ndang diuhumi be ibana alani hasalaan i. Jala, ndang diloas be sisolhot ni na mate i masuk tu huta i laho mambunu ibana. Molo tongtong do ibana tading disi, tarlinggom ma ibana. Alai ndang songon na di penjara disi. Alana, boi do ibana karejo, mangurupi na asing, huhut manomba Jahowa. Boi do ibana marlas ni roha disi! Alai, adong dope naposo ni Debata na tongtong marsak nang pe nunga marhamubaon. Didok rohanasida ndang na tutu naung disalpuhon Jahowa hasalaanna. Molo songon i pangkilalaanmuna, pos ma rohamuna nunga disalpuhon Jahowa be hasalaanmuna i. Unang pola marsak be hamu. w17.11 11 ¶6; 12-13 ¶13-14

Rimangi ma aha do lapatan na sasintongna taringot roti na so marragi dohot anggur i. Taulahon ma i andorang so Borngin Parningotan dohot di bornginna i. (1 Kor. 11:23-25) Roti na so marragi manggombarhon pamatang ni Jesus na so mardosa. Jala anggur i manggombarhon mudarna. Ingkon taingot ma, sian tobusan i, tarida ma holong ni Jahowa na mangalehon anakNa. Jala tarida ma holong ni Jesus na mangalehon ngoluna tu hita. Molo tarimangi i, gabe taronjar ma rohanta asa mangkaholongi nasida. Jala holongta tu Jahowa boi mambahen hita lam solhot jala marsada. w18.01 13 ¶11

Mansai dihaholongi Jahowa do sude jolma. Ala arga hita di Ibana, dilehon do anakNa mate humongkop hita asa boi hita mangolu salelengna. (Joh. 3:16) Molo ndang diingot Jahowa janjiNa taringot ari na naeng ro, tontu sintong do hata ni Sibolis dohot na mangihuthon ibana. Didok Sibolis, margabus do Jahowa jala ditabunihon do angka na denggan sian jolma. Direhei angka parjahat do janji ni Jahowa marhite mandok, “Didia do harorona, na pinarbaga-baga i? Ai dung monding angka amanta, hot do saluhutna songon i, sian mula ni hasiangan on!” (2 Ptr. 3:3, 4) Tongtong do diingot Jahowa janjiNa. Molo nunga saut hak ni Jahowa laho mamarenta, paluaonNa do na unduk tu Ibana. (Jes. 55:10, 11) Marojahan tu holong do hak ni Jahowa mamarenta. Pos ma rohanta, sai dihaholongi jala arga do naposoNa na marsihohot.​—2 Mus. 34:6. w17.06 16-17 ¶7

Tingki dihatahon Jahowa janji taringot tobusan, songon na disurat di 1 Musa 3:15, dos do i songon naung mangalehon tobusan i. Nang pe sasintongna, 4.000 taon nai do dilehon Jahowa AnakNa na sasada i gabe tobusan. (Joh. 3:16) Mauliate ma tadok tu Jahowa na patuduhon holong tu hita! Boi do jolma na mardosa patuduhon holong? Boi. Tumiru Debata do hita ditompa. Lapatanna, boi do hita maniru parange ni Debata. Dipatudu si Abel do holong tu Debata marhite mangalehon pelean na dumenggan. (1 Mus. 4:3, 4) Dipatudu si Noak do holong marhite mamaritahon parenta ni Debata saleleng martaon-taon, nang pe ndang adong na manangihon. (2 Ptr. 2:5) Songon i nang si Abraham. Umbalga do holongna tu Jahowa sian tu manang aha pe. Rade do ibana mamelehon anak haholonganna, i ma si Isak. (Jak. 2:21) Songon nasida, lomo do rohanta patuduhon holong nang pe ndang mura. w17.10 4 ¶3-4

Marhite tobusan ni Jesus, gabe boi ma disalpuhon dosanta jala “asa dapot asi ni roha hita bahen pangurupion, di tingki halehetanna.” (Heb. 4:16) Alani i, ingkon marhaposan do hita tu tobusan ni Jesus. Tu hita sandiri pe marlangku do i. (Gal. 2:20, 21) Pos ma rohanta, marhite tobusan disesa Jahowa do dosanta. Gabe marpangkirimon ma hita laho mangolu saleleng-lelengna. Sada silehon-lehon ni Jahowa do tobusan i tu hita sandiri! Jadi ala rade do Jahowa manesa dosanta, pos ma rohanta ndang sai diingot-ingot Ibana be hasalaanta. (Ps. 103:8-12) Pos ma rohanta, rade do Jahowa manesa dosanta. w17.11 13-14 ¶14-17

Di Borngin Parningotan ni Tuan, martangiang ma Jesus. Tangiangna, i ma taringot ibana dohot Amana na marsada. Dung i, ditangiangkon ibana do angka siseanna asa marsada songon ibana dohot Amana. Dialusi Jahowa do tangiangna i. Saonari, di Borngin Parningotan on, marsada do Sitindangi Ni Jahowa. Jala porsea do nasida na disuru Jahowa do Jesus. Di piga-piga inganan, ndang somal molo angka halak marpungu raphon halak sian suku na asing. Jala godang do na so mangkalomohon i. Alai ndang songon i Jahowa dohot Jesus. Mansai uli do di nasida molo boi hita sude marsada. Ndang pola longang rohanta na marsada hita gabe naposo ni Debata. Nunga disurirangkon Jahowa taringot on tu si Hesekiel.​—Hes. 37:15-17; Sak. 8:23. w18.01 11-12 ¶7-9

“Angka tukang” na so manjangkon Messias, i ma angka pemimpin ni halak Jahudi. Ndang dijangkon nasida Jesus jala ndang dijalo ibana gabe Kristus. Alai ndang holan i. Godang do halak Jahudi na mangido tu si Pilatus asa dipamate ibana. (Luk. 23:18-23) Tontu, martanggung jawab do nasida tu hamatean ni Jesus. Molo ndang dijangkon jala dipamate Jesus, songon dia ma ibana gabe “batu ojahan”? Ingkon dipahehe do ibana sian hamatean asa boi gabe batu ojahan. Didok apostel Petrus do taringot Jesus Kristus na sian Nasaret naung dibunu nasida di sada tiang, alai “naung mulak mangolu dibahen Debata sian na mate”. (Ul. 3:15; 4:5-11, Bibel siganup ari; 1 Ptr. 2:5-7) Dung dipahehe Jesus sian hamatean, gabe holan goarna ma sasadasa “na manjalo huaso sian Debata laho paluahon hita”.​—Ul. 4:12, Bibel siganup ari; Eps. 1:20. w17.12 10-11 ¶6-9

Dipaboa Jesus do taringot haporsuhon bolon na naeng ro, “Idaonnasida ma Anak ni jolma i ro di atas ombun ni langit, mantat hagogoon dohot hasangapon godang. Jadi suruonna ma angka surusuruan na marsarune mansai gogo, jadi sian desa na ualu i ma papunguonnasida angka na pinillitna.” (Mat. 24:29-31) Dipapungu Jesus ma “angka na pinillitna” i, i ma tingki diboan ibana sude tu surgo angka na miniahan na adong dope di tano on. On masa dung dipungka haporsuhon bolon, i ma andorang so ro dope Armagedon. Jesus dohot 144.000 laho manaluhon angka raja ni portibi on di Armagedon. (Pgk. 17:12-14) On ma Borngin Parningotan na parpudi, andorang so “ro” Jesus papunguhon na miniahan. w18.01 14 ¶15

Mangolu “salelenglelengna” do Jesus di surgo. (Pgk. 1:5, 18; Rom 6:9; Kol. 1:18; 1 Ptr. 3:18) Marjanji do Jesus tu angka apostelna, asa boi rap dohot ibana mamarenta di surgo. (Luk. 22:28-30) Disurat si Paulus do taringot on na mandok, “Nunga hehe Kristus i sian na mate, Ibana do parjolo ni angka na monding i.” Jala didok si Paulus, adong do muse na asing na laho dipahehe tu surgo. Didok ibana, “Ganup ma mangihuthon parjojorna: Parjolo i Kristus, dung i angka na di Kristus i, di harorona i.” (1 Kor. 15:20, 23) Sian taon 1914 sahat tu saonari, hita mangolu di ari haroro ni Kristus, jala nunga lam jonok nama ajal ni portibi na jahat on. w17.12 12 ¶11; 13 ¶14-16

Hea do lungun roha ni Jahowa ala mate halak na hinaholonganNa, songon si Abraham, si Isak, si Jakkob, si Musa dohot Raja Daud. (4 Mus. 12:6-8; Mat. 22:31, 32; Ul. 13:22) Bibel paboahon, sihol do roha ni Jahowa pahehehon naposoNa na marsihohot. (Job 14:14, 15) Dung dipahehe, marlas ni roha jala sehat ma sude halak. Lungun do muse roha ni Jahowa tingki mate AnakNa na sasada i. Dipaboa do di Bibel molo Jesus “anak hasian” ni Debata. (Poda 8:22, 30, Bibel siganup ari) Ndang tarhatahon songon dia lungun ni roha ni Jahowa mangida hansit ni parmate ni AnakNa i. (Joh. 5:20; 10:17) Pos ma rohanta na urupan ni Jahowa do hita. Sadihari pe, boi do hita martangiang tu Ibana paboahon arsak dohot lungun ni rohanta. Tarapul do roha mamboto na diantusi Jahowa do pangkilalaanta jala diapuli do hita!​—2 Kor. 1:3, 4. w17.07 10 ¶3-5

Saonari, marjuta halak mangalehon “hamoraon” ni nasida, songon tingki, gogo, dohot arta tu Jahowa. On patuduhon na parsidohot do nasida pajongjongkon joro na digombarhon di parnidaan ni si Sakaria. (Poda 3:9) On patuduhon ndang lupahonon ni Jahowa sude na tabahen dohot holongta tu Ibana. Di tingki parpudi on, godang do na diulahon naposo ni Jahowa. Ndang boi nasida mangulahon i molo ndang alani pasu-pasu ni Jahowa dohot panogu-noguon ni Kristus. Las do rohanta parsidohot tu organisasi na dame jala na manongtong. Alani i, manang aha pe tanggung jawabta di organisasi ni Jahowa, ringgas ma hita mangulahon i. ‘Tangihon hamu ma suara ni Jahowa Debatamuna’. (Sak. 6:15) Molo taulahon on, tadapot ma parlinggoman sian Rajanta na gabe Sintua ni Malim. Taulahon ma nasa na boi taulahon di panombaon na sintong. Sai na linggoman ni Jahowa do hita sahat tu na ro ajal ni hasiangan on, ro di saleleng ni lelengna! w17.10 26 ¶18-19

Di ari na naeng ro, salpu nama sistem politik, agama, dohot ekonomi di pamarentaon ni Sibolis. Si Hesekiel dohot si Sepania manurat, ndang mararga be angka mas dohot perak di tingki i. (Hes. 7:19; Sep. 1:18) Rimangi ma, tingki laho mate hita taboto ma nunga mago hape hamoraonta na sasintongna i ala mangalului hamoraon na geduk di portibi on. Songon dia do pangkilalaanmu molo masa songon i? Ra sarupa do pangkilalaanta songon baoa na marsitutu karejo asa godang hepengna, alai di pudian ni ari diboto ma ndang mararga be hepengna i. (Poda 18:11) Na laho suda do hamoraon di portibi on. Alani i, tapangke ma artanta laho marale-ale tu na di surgo. Alana, na taulahon tu Jahowa dohot tu HarajaonNa do na parohon las ni roha na sasintongna. w17.07 8 ¶16

Piga-piga halak Kristen ndang olo mangangkui dosa na balga na diulahon nasida. Ra, ala maila manang ala ndang olo manusai pingkiran ni na asing. (Poda 28:13) Alai, ndang patuduhon holong molo tatabunihon dosanta. Boasa? Alana, boi do gabe ndang dilehon Jahowa be pasu-pasu dohot tondi parbadiaNa tu huria. Alani i, gabe ndang adong be hadameon di huria. (Eps. 4:30) Molo taulahon dosa na balga, tapaboa ma i tu angka sintua asa boi hita diurupi. Na patuduhon holong do molo taulahon i. (Jak. 5:14, 15) Holong ma parange na umbalga. (1 Kor. 13:13) Boi do taboto sasahalak mangihuthon Jesus manang na ndang, maniru Jahowa manang na ndang, sian carana mangkaholongi. Ai Debata Parholong do Jahowa. Si Paulus mandok, doshon na soada do ibana molo ndang adong holong di ibana. (1 Kor. 13:2) Alani i, ganup ma hita patuduhon holong, unang ma holan ‘hata’ alai marhite “pambahenan dohot hasintongan” ma.​—1 Joh. 3:18. w17.10 8 ¶17-18

Hea do tungganeboru ni si Potifar mangela-ela si Josep laho mangulahon seks. Alai barani do si Josep manundalhon i. Tontu diboto ibana do boi do tarancam ngoluna, molo ndang dioloi ibana tungganeboru ni si Potifar. Alai ndang mabiar jala pintor lari do ibana manadingkon tungganeboru ni si Potifar. (1 Mus. 39:10, 12) Sitiruon na asing, i ma si Rahab na tading di kota Jeriko. Ndang mabiar ibana manabunihon dua mata-mata ni Israel di jabuna. (Jos. 2:4, 5, 9, 12-16) Tingki diorai halak Saduse angka sisean ni Jesus mangajarhon taringot Jesus, ndang mabiar nasida. Tongtong do nasida marbarita. (Ul. 5:17, 18, 27-29) Boi pe si Josep, si Rahab, Jesus dohot angka apostel patuduhon habaranion, ndang alani na mangasahon dirina sandiri. Alai, ala Jahowa do na dipangasahon nasida. Suang songon i ma nang hita. Tingki tahaporluhon habaranion, Jahowa ma na tapangasahon, unang ma dirinta sandiri.​—2 Tim. 1:7. w17.09 28-29 ¶6-9

Ndang boi hita marhasil mananggalhon pangalaho na buruk molo holan mangasahon gogonta. Na mangurupi nasida i ma huaso ni Hata ni Debata dohot tondi parbadiaNa. (Luk. 11:13; Heb. 4:12) Asa tahilala huaso ni Debata, ingkon tajaha do Bibel ganup ari, tarimangi, jala tongtong martangiang mangido bisuk dohot gogo asa boi mangulahon na taparsiajari. (Jos. 1:8; Ps. 119:97; 1 Tes. 5:17) Boi do muse dapotta laba sian Hata ni Debata dohot tondi parbadiaNa molo ro tu parpunguan jala denggan taparade na hombar tusi. (Heb. 10:24, 25) Lomo do rohanta mamangke godang alat na diparade organisasi ni Jahowa, songon majalah, JW Broadcasting, JW Library, dohot jw.org. (Luk. 12:42) Jadi ringkot do mananggalhon pangalaho na buruk. Alai, asa las roha ni Debata muse, ingkon tapatudu do tong pangalaho na imbaru.​—Kol. 3:10. w17.08 20 ¶16-17

Godang do hajahaton na masa tu Raja Daud. Tingki poso, nunga dipillit Jahowa ibana gabe raja ni Israel. Alai, ingkon dipaima ibana do saleleng 15 taon asa boi gabe raja ni Juda. (2 Sam. 2:3, 4) Saleleng piga-piga taon, ingkon martabuni do ibana sian Raja Saul na laho mamunu ibana. Marpinda-pinda ma ibana sian sada luat tu luat na asing, martabuni di halongonan, di liang manang di goa. Ujungna, mate di parporangan ma si Saul. Alai nang pe songon i, ingkon dipaima si Daud dope lobi sian pitu taon asa gabe raja ibana di Israel. (2 Sam. 5:4, 5) Boasa si Daud rade jala sabar paimahon? Pos do rohana, na holong do Jahowa tu ibana jala sai na urupan ni Debata do ibana. Diingot ibana do songon dia Jahowa mangurupi ibana di tingki naung salpu, jala dipaima ibana do Jahowa manalpuhon sitaononna. (Ps. 13:6) Diboto si Daud do na parohon pasu-pasu do molo sabar paimahon Jahowa. w17.08 7 ¶14-15

Lam leleng, muba do bahasa. Rimangi ma songon na masa di bahasamuna. Suang songon i ma na masa di hata Heber manang hata Junani na dipangke laho manurat Bibel najolo. Ndang sarupa be hata Junani manang hata Heber najolo tu saonari. Godangan halak ndang be mangantusi hata na dipangke laho manurat Bibel najolo. Adong do piga-piga halak mandok asa boi mangantusi Bibel, denggan do molo niparsiajaran hata Heber dohot hata Junani najolo. Alai sasintongna ndang godang laba ni i. Las ma rohanta ala Bibel manang piga-piga bagianna nunga diterjemahon, hira-hira di bagasan 3.000 bahasa. Alana, lomo do roha ni Jahowa asa “saluhut bangso dohot marga dohot hata dohot houm” mangantusi HataNa. (Pgk. 14:6) Tontu gabe las ma rohanta mamboto na so siida bohi jala parholong do Debatanta. w17.09 16 ¶4

Adong do ra keluargamuna na dipabali sian huria. Taorom ma dirinta asa unang mamangkulingi ibana. Olo do sipata maol mangulahon on. Alai, ingot ma na maniru Jahowa jala na mangulahon parentaNa do hita molo taulahon on. Tatiru ma Raja Daud. Hea do jut rohana dibahen si Saul dohot si Simei. Alai ndang tarrimas ibana jala ndang dipangke ibana huasona laho mangulahon na sala. (1 Sam. 26:9-11; 2 Sam. 16:5-10) Alai, hea do ibana ndang mangorom diri, i ma tingki mangalangkup dohot si Batseba. Jala tarrimas do ibana alani si Nabal. (1 Sam. 25:10-13; 2 Sam. 11:2-4) Aha do na boi taparsiajari sian si Daud? Na parjolo, ringkot do hita mangorom diri, tarlumobi di angka sintua. Unang ma ala adong tanggung jawabta, gabe lomo lomonta tu dongan na asing. Na paduahon, ingkon sai manat do hita asa unang tarela-ela.​—1 Kor. 10:12. w17.09 6 ¶12-13