Mei

Olo do hansit pangkilalaanta tingki dipasingot, alai humansit do molo ndang tajangkon sipasingot na sian Debata. (Heb. 12:11) Taparrohahon ma pengalaman ni si Kain. Tingki diida Jahowa si Kain marsogo ni roha tu anggina jala naeng bunuonna anggina i, dipasingot Jahowa do ibana, “Boasa muruk ho? Boasa murhing bohim? Molo diula ho na denggan, minar ma bohim; alai ala diula ho na jahat, mangonggop ma dosa i di pintu ni roham. Naeng rajaanna ma ho, alai taluhon ma i.” (1 Mus. 4:6, 7, Bibel siganup ari) Ndang olo si Kain manangihon sipasingot sian Jahowa. Dibunu ibana do anggina i. Ujungna, gabe ditaon ibana ma na hansit di ngoluna. Jadi ndang lomo roha ni Jahowa molo hita manaon na hansit. (Jes. 48:17, 18) Jadi, ingkon tatangihon do sipasingot asa marbisuk hita.​—Poda 8:33. w18.03 32 ¶18-20

Songon dia si Daniel boi mananda Jahowa? Tontu diajari natua-tuana do si Daniel asa mangkaholongi Jahowa dohot HataNa. Jadi, diulahon si Daniel do i saleleng ngoluna. Dung matua pe, marsitutu do ibana mamparsiajari hata ni Debata. Alani i, tangkas do ditanda ibana Jahowa. Diboto ibana do taringot aha naung dibahen Jahowa tu halak Israel. Boi do taida sian tangiangna na disurat di Daniel 9:3-19. Jaha jala rimangi ma tangiangna i. Tingki i ndang mura di halak Jahudi laho manomba Debata di kota Babel. Dipaboa Jahowa do tu nasida, “Usahahon hamu ma na denggan di angka kota na Hubahen inganan habuanganmuna.” (Jer. 29:7, Bibel Siganup ari) Hape, nunga diparentahon Ibana nasida asa mangulahon panombaon holan tu Ibana. (2 Mus. 34:14) Songon dia si Daniel boi mangulahon angka parenta i? Ala diurupi bisuk na sian Debata, gabe diboto si Daniel ma ingkon jumolo do unduk tu Debata. Marratus taon dungkon i, diajarhon Jesus do na sarupa.​—Luk. 20:25. w18.02 12 ¶11-12

Hea do dihilala hamu marungkil di sitaonon na borat songon manaon sahit na posi, susa di parhepengon, manang dipaburu-buru? Ra, i do na mambahen hamu gabe ndang marlas ni roha manomba Jahowa. Molo songon i do pangkilalaanmuna, rimangi ma sitiruon sian si Noak, si Daniel, dohot si Job. Boi do i patoguhon hamu. Taboto nasida pe jolma na mardosa do songon hita, jala sarupa do parungkilon na diadopi nasida songon na taadopi saonari. Di sada tingki hea do terancam ngolu ni nasida. Alai tongtong do nasida marsihohot tu Jahowa. Jala di adopan ni Jahowa, gabe sitiruon do nasida taringot marhaporseaon dohot unduk ni roha. (Hes. 14:12-14) Disurat si Hesekiel ma ayat on tingki di Babel taon 612 SM. (Hes. 1:1; 8:1) Tingki i baru dope Jerusalem ditaluhon taon 607 SM. Holan otik do halak di Jerusalem na marsihohot jala unduk songon si Noak, si Daniel, dohot si Job, jala boi do nasida martahan. (Hes. 9:1-5) Suang songon i ma di tingkinta saonari, holan halak na tigor songon nasida do na boi martahan di portibi na jahat on.​—Pgk. 7:9, 14. w18.02 3-4 ¶1-3

Hamu angka na poso sungkun ma dirimuna, ‘Alani natua-tuangku do gabe olo ahu dohot marpungu jala marbarita? Manang, tutu do togu parale-aleonku tu Debata?’ Tutu, sude do hita na poso nang na matua ingkon mambahen cita-cita di partondion. Cita-cita i boi mambahen hita lam jonok tu Debata. (Pjm. 12:13) Dung taboto aha na ingkon tapadenggan sian dirinta, pintor tapadenggan ma. Mansai ringkot do on, ala mangkorhon do on tu ngolunta. (Rom 8:6-8) Ndang dipangido Jahowa hita asa pas hian maniru Jesus. Alai, dilehon Ibana do tondi parbadia asa mangurupi hita mambahen hamubaon. Jadi, ingkon porlu do hita marsitutu. Ra, tabo do tahilala mamparsiajari Bibel, alai memang ndang hira na manjaha buku carita hita. Jadi, porlu do marsitutu hita mangalului arta na arga na adong di Bibel, asa boi mangurupi hita. w18.02 25 ¶10-11

Ndang ingkon sude diboto sasahalak isi ni Bibel baru pe ibana boi tardidi. Alana angka sisean ni Jesus ingkon tongtong do marsiajar nang pe nunga tardidi. (Kol. 1:9, 10) Jadi, sadia bagas do parbinotoan ni halak asa boi tardidi? Di tingkinta saonari, boi do hita marsiajar sian pengalaman ni angka halak najolo. (Ul. 16:25-33) Umpamana songon pengalaman ni si Paulus tingki pardalananna na paduahon laho marbarita na uli tu Pilippi taon 50. Ditudu, ditangkup, jala dipamasuk do ibana dohot si Silas tu penjara. Alai, di borngin i ro ma gempa jala tarbungka ma sude pintu ni penjara. Dirimpu na manjaga penjara i nunga lari sude na di bagas penjara. Naeng bunu diri ma ibana, alai pintor diambati si Paulus do. Diajari si Paulus dohot si Silas ma penjaga penjara i dohot keluargana taringot Jesus. Porsea do nasida taringot Jesus. Jala diantusi nasida do na mansai ringkot do mangihuthon Jesus. Pintor tardidi ma nasida. w18.03 11 ¶7-8

Ala Debata na marlas ni roha do Jahowa, tontu naposoNa pe marlas ni roha do. Imbar do naposoNa sian halak na asing na holan mangkaringkothon diri. Jala las do roha ni nasida ala mangurupi na asing. (Ul. 20:35; 2 Tim. 3:2) Songon dia hita patuduhon, na umbalga do holongta tu Debata sian tu dirinta sandiri? Tarimangi ma poda on: “Unang ma mardingkandingkan manang marhasangapon na rumar; alai sian toruk ni rohamuna be ma rajumi hamu donganmuna sumurung sian dirimuna! Unang ma na ringkot di hamu be matahon hamu, dohot ma na di dongan!” (Plp. 2:3, 4) Alani i, tasungkun ma dirinta sandiri, ‘Huulahon do sipasingot on? Hulului do cara laho mangurupi angka dongan dohot angka halak tingki marbarita?’ Ndang mura mangalehon tingki dohot gogonta laho mangulahon i. Ra ingkon marsitutu do hita, manang ingkon olo do hita ala manadingkon aha na tahalomohon. Molo taulahon i, gabe las ma rohanta ala mamboto las do roha ni Debata mangida hita. w18.01 22-23 ¶6-7

Songon dia do hita mangulahon i? Tasungkun ma dirinta: ‘Porsea do ahu holan on do organisasi na dipillit Jahowa laho mangulahon lomo ni rohaNa? Huulahon do nasa gogongku laho marbarita na uli? Sian parniulaonku, tarida do na porsea ahu nunga mangolu di tingki na parpudi hita saonari? Tongtong do togu haporseaonku tu Jahowa dohot Jesus songon tingki parjolo sahali ahu manomba Jahowa?’ (Mat. 24:14; 2 Tim. 3:1; Heb. 3:14) Molo tarimangi sungkun-sungkun on, gabe diurupi ma hita laho ‘manulingkiti’ dirinta sandiri. Tajaha jala tarimangi ma angka parsiajaran taringot ulaon na mansai ringkot on. (Joh. 3:16; 17:3) Ingkon tatanda jala porsea do hita tu Jahowa dohot Jesus, asa boi dapotan ngolu saleleng-lelengna. Asa boi rade hita tu ulaon i, tapillit ma parsiajaran na boi mangurupi hita asa lam jonok tu nasida. w18.01 10 ¶5-6

Tingki dijaha hamu Bibel dohot angka publikasi jala ro tu parpunguan, botoonmuna ma songon dia Jahowa mangurupi angka dongan tongtong marsihohot. Asa lam togu parale-aleonmu tu Jahowa, ingkon ho sandiri do na mangkilala pangurupion ni Jahowa. Adong do pengalamanmu taringot cara ni Jahowa mangurupi ho? Sai adong do pengalamanta taringot pangurupion ni Jahowa. Ditogihon do hamu asa marale-ale tu Ibana dohot tu Jesus. Ra didok hamu do, ‘Ahu kan holan na mangihut-ihut do. Natua-tuangku do na jonok tu Jahowa.’ Ingot ma, tingki marjanji ho tu Jahowa jala tardidi, sasintongna nunga marale-ale ho tu Ibana. Didok di Bibel, “Alai anggo adong na mangkaholongi Debata, i do na tinanda ni Debata.” (1 Kor. 8:3) Hamauliatehon hamu ma angka naung dilehon Jahowa marhite organisasiNa. w17.12 24-25 ¶12-13

Hata “sipasingot”, ra mambahen hamu marpingkir na laho diuhum do molo adong sasahalak na dipasingot. Alai, sasintongna ndang holan i. Bibel mandok, parohon laba do sipasingot i. Jala, sipata dihaithon do i tu parbinotoan, bisuk, holong, dohot hangoluan. (Poda 1:2-7; 4:11-13) I do alana, molo dipasingot Debata hita, na patuduhon holongNa do i tu hita. Jala, lomo do rohaNa molo hita mangolu saleleng-lelengna. (Heb. 12:6) Sipata, dipasingot Debata do hita marhite dipinsang, alai ndang hea kejam manang gabe parohon jea i. Sasintongna, adong do na ringkot na boi taparsiajari sian hata “sipasingot”, i ma pangajarion. Dos do i songon natua-tua mangajari ianakhonna na hinaholonganna. Ala gabe sahalak Kristen, sude do hita gabe keluarga ni Debata. (1 Tim. 3:15) Jahowa ma na gabe Ama di hita. Jadi, ibana do na manontuhon dia na denggan jala dia na so denggan. Dipasingot do hita molo ndang unduk tu Ibana. Molo taulahon na sala jala mangkorhon na roa, sipasingot na mardonganhon holong sian Jahowa mangurupi hita asa tongtong mangingot boasa ringkot unduk tu Ibana.​—Gal. 6:7. w18.03 21 ¶1; 22 ¶3

Hamu angka na poso, ra didok rohamuna do ndang diantusi natua-tuamuna pangkilalaanmuna, jala pakarashu do nasida tu hamu. Gabe jut ma rohamuna. Ndang marlas ni roha be hamu manomba Jahowa. Alai, molo ditadingkon hamu Jahowa, idaonmuna ma ndang adong na mangkaholongi hamu dos songon natua-tuamuna, dohot angka dongan di huria. Pingkirhon ma: Molo ndang dipasingot natua-tuam ho, boi do pos roham na diparrohahon nasida ho? (Heb. 12:8) Natua-tuamuna pe jolma na mardosa do. Ra, cara ni nasida pasingothon ho mambahen jut roham. Alai unang ma holan i na diida ho. Pingkirhon ma boasa dipasingot ho. Unang ma pintor mangalus-alusi, alai tangihon ma. Marsitutu ma asa gabe halak na matoras. Dijalo halak na matoras do sipasingot ndang soal songon dia i dipasahat.​—Poda 1:8. w17.11 32 ¶16-17

Adong do piga-piga na poso naung tardidi na gabe gale parale-aleonna tu Jahowa. Adong muse do na manadingkon Jahowa. Ra, i do na dihabiari hamu masa tu ianakhonmuna. Biar rohamuna molo nasida ndang mangkaholongi Jahowa be. Ra, boi do gabe sarupa ianakhonmuna tu halak Kristen di Epesus tingki abad na parjolo. Didok Jesus tu nasida, “Naung tinadingkonmu holong ni roham na di mulana i!” Songon dia cara mangurupi ianakhonmu patoguhon holongna tu Jahowa, huhut mangida nasida mandapot “haluaon”? (1 Ptr. 2:2) Didok si Paulus ma tu si Timoteus, “Sai mian ma di bagasan angka na ginuruhon jala naung hinaporseaanmi, ai diboto ho do na mangajarhonsa tu ho. Huhut ala diboto ho, sian sietehetehonmi dope, surat na badia i, na margogo pabisukkon ho, asa taruli di haluaon marhite-hite haporseaon di Kristus Jesus.” (2 Tim. 3:14, 15) Parrohahon ma, didok si Paulus do si Timoteus i nunga (1) mananda buku na badia, (2) marpos ni roha jala porsea tu na diparsiajari, jala (3) marbisuk laho mandapot haluaon ala porsea tu Jesus Kristus. w17.12 15-16 ¶2-3

Godang do agama na mangajarhon taringot api naroko, na mamaksa halak mangalehon hepeng, manang na parsidohot tu politik. Jadi, ndang pola longang rohanta ala lam godang halak mandok, boi do denggan ngolunta nang pe ndang maragama! Boi do martua ngolunta molo ndang taihuthon agama na palsu. Alai ndang adong halak na martua molo ndang marale-ale tu Jahowa, Debata na martua. (1 Tim. 1:11) Godang do na diulahon Jahowa laho mangurupi angka halak. Hita pe, angka naposoNa, lomo do rohanta mangurupi na asing. (Ul. 20:35) Umpamana, rimangi ma songon dia agama na sintong mangurupi angka keluarga asa martua. Diurupi do hita mangargai jala mangkaholongi dongan saripe, pagodang-godangkon ianakhon, jala mangkaholongi sude anggota keluarga. Panombaon na sintong mangurupi naposo ni Jahowa asa dame di huria jala marsihaholongan. w17.11 22-23 ¶6-7

Saonari pe, godang do naposo ni Debata songon si Paulus, marmetmet ni roha jala marsak. Boasa? Ala jolma na mardosa do hita, jala jotjot mangulahon na sala. Songon i do pangkilalaan ni piga-piga donganta na hea mangulahon dosa na balga. Didok roha ni nasida, ndang na laho salpuhonon ni Jahowa be dosa ni nasida. Bibel mandok, “Ditobus Jahowa do hosa ni angka naposoNa, jala ndang uhumonNa be halak na marhaposan tu Ibana.” (Ps. 34:22) Dung didok si Paulus “dangol” ni pangkilalaanna ala ndang boi mangulahon sude hata ni Jahowa, didok do muse, “Mauliate ma hudok tu Debata marhite-hite Jesus Kristus Tuhanta i.” (Rom 7:25) Aha do lapatan ni i? Hea do si Paulus mangulahon hasalaan, alai muba do ibana. Pos do rohana, marhite tobusan ni Jesus, nunga disalpuhon Jahowa be hasalaanna. Hita pe, taingot ma nunga ditobus Jesus be hita. Boi ma ias panggora ni rohanta jala dame ma pangkilalaanta. (Heb. 9:13, 14) Ala Sintua ni Malim do Jesus, “tarbahen ibana do paluahon sandok angka na manjonohi Debata marhite-hite ibana; ai na mangolu do ibana tongtong, laho mangondihon nasida.”​—Heb. 7:24, 25. w17.11 9 ¶1-2; 14 ¶15

Songon dia do hita mangulahon songon na tajanjihon tu Jahowa? Tapatudu ma na togu do parale-aleonta tu Ibana, tatepati ma janjinta na balga nang na gelleng “ganup ari”. (Ps. 61:9) Umpamana tingki adong donganmu sasingkola manang saparkarejoan mangela-ela hamu laho marhamlet, aha do na laho ulahononmu? Ala mangoloi Jahowa, olo do hamu manundalhon i? (Poda 23:26) Manang, molo holan sahalakmuna do na manomba Jahowa di keluargamuna, dipangido hamu do pangurupion ni Jahowa asa tongtong mangulahon prinsip ni Bibel? Manang aha pe na masa tu hamu, olo do hamu ganup ari mandok mauliate tu Jahowa alani holong dohot panogu-noguonNa? Diparade hamu do tingkimuna laho manjaha Bibel ganup ari? Sasintongna, tingki talehon dirinta tu Jahowa, nunga marjanji hita laho mangulahon sudena i. Molo taoloi ibana jala talehon na dumenggan tu Ibana, tarida ma na holong do rohanta tu Ibana, jala Ibana do nampunasa hita. Ingkon taulahon do sude na taparsiajari di saluhut parngoluonta. w17.10 18 ¶11-12

Sahalak pangarang lagu na tarbarita mandok, “Hata-hata mangkorhon tu pingkiranta. Musik, mangkorhon tu pangkilalaanta. Alai ende, mangkorhon tu pingkiran dohot tu pangkilalaanta.” Jadi, molo marende hita mamuji Jahowa, on patuduhon holongta jala mambahen hita lam jonok tu Ibana. I do alana, mansai ringkot do marende laho mamuji Jahowa, tingki sahalakta manang tingki rap dohot angka dongan. Songon dia do pangkilalaanmuna tingki marende di parpunguan? Maila do hamu? Di piga-piga inganan, maila do angka baoa marende di jolo ni na torop. Boi do on mangkorhon na roa di huria. Tarlumobi, molo maila angka sintua, manang diulahon nasida ulaon na asing tingki marende di parpunguan. (Ps. 30:13) Mansai ringkot do marende mamuji Jahowa. Alani i, unang be mardalani hita molo dung dipungka marende di parpunguan. w17.11 3 ¶1-3

Lomo do rohanta asa dame ngolunta, jala tapasiding do angka na mambahen hita holsoan. Alani i, mandok mauliate do hita ala dilehon Jahowa do tu hita “dame ni Debata”. On boi mangurupi hita asa unang holsoan manang marsak. (Plp. 4:6, 7) Ala nunga talehon ngolunta tu Jahowa, gabe “mardame ma hita dohot Debata”. Lapatanna, boi marale-ale tu Ibana. (Rom 5:1) Alai, ndang tingkina dope Debata parohon dame di tano on. Ala mangolu di tingki parpudi, godang do hasusaan na mambahen hita holsoan. Godang do parjahat di humaliangta. (2 Tim. 3:1-4) Ingkon marsitutu do hita muse mangalo Sibolis dohot ajaranna. (2 Kor. 10:4, 5) Alai adong dope na mambahen hita holsoan, i ma paraloan sian keluarganta na so manomba Jahowa. Olo do ra direhei nasida hita alani haporseaonta, manang didok ma hita mamola-mola keluarga. Asing ni i, olo do gabe ndang dietong be hita keluarga ni nasida. w17.10 9 ¶1-2

Ala muba bahasa ingkon muba do terjemahan ni Bibel. Mura do Bibel diantusi tingki baru diterjemahon dope. Alai dung marpulu-pulu taon, maol ma antusan. Umpamana songon Bibel Batak Toba, parjolo sahali diterjemahon hira-hira taon 1800an. Godang do halak Batak Toba na mamangke Bibel on. Jala jotjot do dihatahon halak Batak Toba piga-piga hata na adong di Bibel tingki nasida mangkata-hatai. Alai dung marpulu-pulu taon gabe maol ma antusan Bibel i. Ala hata najolo do na dipangke. Jala songon i ma na masa tu Bibel terjemahan na asing. Alai las do rohanta mamboto Bibel Terjemahan Dunia Baru marsitutu mamangke hata na mura antusan, hata na dipangke halak sisaonari. Dibahen do terjemahan on di lobi sian 150 bahasa dohot ma i di bahasa Indonesia. Alani i, godang ma halak na boi mangantusi isi ni Bibel. Ala tangkas jala mura antusan, boi ma Hata ni Debata hona tu rohanta. w17.09 16-17 ¶5-6

Angka na poso ni halak Kristen, ingkon mambahen keputusan na ringkot. Ingkon barani do nasida asa tongtong marparange na ias, mamillit dongan, mamillit hiburan, jala manontuhon andigan laho tardidi. Ingkon barani do nasida mangulahon i, alana ndang lomo roha ni Sibolis mangida nasida mambahen haputusan na denggan. Sada haputusan na ringkot na ingkon bahenon ni na poso, i ma mambahen cita-cita. Di piga-piga negara, dijujui do angka na poso asa marsingkola satimbo-timbona, asa boi parohon godang hepeng. Di negara na pogos, dijujui do angka na poso mangalului godang hepeng laho mangurupi natua-tuana. Molo olo angka na poso marcita-cita laho marhobas tu Jahowa, jala manjumolohon HarajaonNa, pasu-pasuon ni Jahowa do nasida. Urupan ni Jahowa do nasida laho paradehon angka na porlu tu keluargana. Di abad na parjolo adong do na poso na songon i, i ma si Timoteus. Dijumolohon ibana do marhobas tu Debata di parngoluonna. Hamu pe boi do songon i.​—Plp. 2:19-22. w17.09 29 ¶10-12

Molo jotjot jala ringgas sasahalak marsiajar Bibel, boi do ibana tongtong mangorom diri. Nunga taparsiajari sian Bibel taringot aha do laba ni mangorom diri jala aha do na masa molo ndang taorom dirinta. I do alana boasa disuru Jahowa disurat angka sitiruon i. (Rom 15:4) Denggan do molo tajaha, taparsiajari, jala tarimangi taringot nasida. Rimangi ma songon dia do hamu dohot keluargamuna boi maniru nasida. Pangido ma pangurupion ni Jahowa asa boi hamu mangulahon poda na sian Bibel. Tingki dihilala rohamuna maol mangorom diri, martangiang ma hamu jala marsitutu ma asa boi mangulahon i. (Jak. 1:5) Lului ma angka poda na boi mangurupi hamu di publikasinta. w17.09 7-8 ¶15-16

“Jolma na imbaru”, i ma parange ‘na ditompa suman tu Debata’. (Eps. 4:24) Boi do hita patuduhon parange on? Boi. Suman tu Debata do jolma ditompa, alani i boi do tatiru parange ni Debata. (1 Mus. 1:26, 27; Eps. 5:1) Si Paulus patorangkon, sada sian pangalaho na imbaru i ma ndang paimbar-imbarhon. Ibana mandok, “Ndang mardiaimbar disi Junani manang Jahudi, na marsunat manang na so marsunat, bangso na leban manang bangso na so maju dope, hatoban manang anak mata.” Unang ma didok roha ni sasahalak na dumenggan dirina sian na asing alani suku, marga, bangso manang alani tanggung jawabna di huria. Boasa? Ala ‘sada do hita saluhutna di bagasan Kristus’. (Kol. 3:11; Gal. 3:28) Molo nunga tasolukkon parange na imbaru, tapasangap jala taargai do na asing, ndang soal sian dia haroroanna, suku, manang margana.​—Rom 2:11. w17.08 21 ¶1; 22 ¶3-4

Ndang disuru Jahowa hita mangulahon ulaon na so diulahon Ibana. Sitiruon na dumenggan do Ibana tingki patuduhon haradeon taringot tu na paimahon. (2 Ptr. 3:9) Umpamana, marribu taon naung salpu di porlak Eden, didok Sibolis do na so tigor Jahowa. ‘Sai maima-ima do Jahowa’ tu sada tingki laho pabadiahon goarNa. Alani i, dapotan pasu-pasu ma angka halak na sabar paimahon Ibana. (Jes. 30:18) Jesus pe rade do paimahon. Tingki di tano on, marsihohot do ibana sahat tu na mate. Taon 33 M do dipelehon ibana arga ni tobusan i tu Jahowa, alai ingkon maima-ima do ibana sahat tu taon 1914 asa boi gabe Raja. (Ul. 2:33-35; Heb. 10:12, 13) Jala, ingkon dipaima Jesus do muse ujung ni Pamarentaon Saribu Taon. Dung pe i, diripashon ma sude angka musuna. (1 Kor. 15:25) Alai dapotna ma pasu-pasu molo sabar ibana paimahon. w17.08 7 ¶16-17

Didok si Susi, “Nunga laho sataon dung mate ianakhonnami, alai sai lungun dope rohanami.” Sahalak baoa paboahon, dung marujung ngolu tungganeboruna ndang tarhatahon songon dia hansitna dihilala ibana. Godang do halak na mangkilala sisongon on. Ndang lomo rohanta molo marujung ngolu halak na tahaholongi andorang so ro dope Armagedon. Ra, adong do halak na tahaholongi naung marujung ngolu, manang adong do ra taboto halak na marhabot ni roha. Olo do ra sungkun-sungkun rohamuna, ‘Songon dia do asa tarapul halak na marhabot ni roha?’ Angka halak mandok, ndang boi hatop malum hansit na dihilala nasida. Tutu do songon i? Sahalak ina na mabalu mandok, “Na boi pamalumhon lungun ni roha ni sasahalak i ma carana mamparhaseang tingki.” Songon sada luka, ndang boi pintor hatop malum alai porlu do diubati. Suang songon i ma, ndang boi pintor hatop malum lungun ni roha, adong do na ingkon taulahon. w17.07 9-10 ¶1-3

Aha do na ingkon ulahononmu asa marlas ni roha? Ingkon ditanda hamu do Jahowa jala ulahon lomo ni rohaNa. Alana, i do na tinuju ni Jahowa tingki manompa jolma. (Ps. 128:1; Mat. 5:3) Molo binatang holan mangan, minum, dohot maranak. Alai, lomo do roha ni Jahowa asa marlas ni roha jala martujuan ngolunta. “Debata Parholongroha”, Debata na Martua, do Jahowa jala “tumiru rupana” do jolma ditompa. (2 Kor. 13:11; 1 Tim. 1:11; 1 Mus. 1:27) Dapotmu ma las ni roha molo ditiru hamu holong ni Debata. Bibel mandok, “Martuaan do na mangalehon sian na manjalo!” (Ul. 20:35) Hea do dihilala hamu songon i? Ringkot do i taulahon. Lomo do roha ni Jahowa molo dipatudu hamu holong tu dongan jolma dohot tu Ibana.​—Mat. 22:36-39. w17.07 22 ¶3

Dihaholongi jala diargai Debata do hita. Dumenggan do caraNa mamparrohahon hita sian dirinta sandiri. Dihaholongi Jahowa do sude jolma. Alai, diparrohahon Ibana do jolma ganup marsada-sada. Rimangi ma na masa di tingki naung salpu. Saleleng tolu ratus taon, marhite angka panguhum do Jahowa manogu-nogu jala mangurupi bangsoNa asa monang mangalo musu. Nang pe songon i, tongtong do Jahowa mamparrohahon jolma ganup marsada-sada. Umpamana si Rut. Ndang halak Israel ibana. Alai, ala marsitutu gabe sisomba Jahowa, dapotan pasu-pasu ma ibana marhite mandapot tungganedoli dohot ianakhon. Asing ni i, sian pinompar ni si Rut do haroro ni Messias. Dung i, dibahen Jahowa do asa disurat taringot ngolu ni si Rut di Bibel. Boi do dirimangi hamu songon dia pangkilalaan ni si Rut dung hehe jala mamboto na tarsurat taringot dirina?​—Rut 4:13; Mat. 1:5, 16. w17.06 23 ¶8-9

Taon 1970 donganta si Peter marumur 19 taon dope ibana, nunga mangurupi di Betel Inggris. Tingki marbarita sian jabu tu jabu, pajumpang ma ibana tu sahalak baoa na marjanggut. Disungkun ma atik na lomo do roha ni baoa i marsiajar Bibel. Baoa i sahalak guru ni halak Jahudi. Songgot ma rohana tingki didok si Peter na laho ajaranna ibana taringot Bibel. Laho manguji si Peter, disungkun baoa i ma, “Molo husungkun ho, mamangke bahasa aha do buku Daniel disurat?” Didok si Peter ma, “Mamangke bahasa Aram.” Didok si Peter muse, “Songgot do roha ni baoa i ala huboto alusna! Boasa boi huboto alusna? Nunga hujaha hian Joujou Paboahon dohot Sadarlah! na dipabinsar piga-piga bulan naung salpu, jala dipaboa do disi taringot buku Daniel na disurat mamangke bahasa Aram.” (Dan. 2:4) Tangkas ma, boi do tondi parbadia mangurupi hita mangingot hatorangan naung hea tajaha.​—Luk. 12:11, 12; 21:13-15. w17.06 13 ¶17

Rimangi ma molo diboto na mardongan saripe na laho adong ianakhon ni nasida. Nang pe las situtu rohanasida, olo do marsak nihilala. Ra, sai dipingkirhon tungganedoli do taringot tungganeboruna na mardenggan pamatang, jala mamingkirhon taringot hatutubu ni ianakhon nasida. Dipingkirhon ma muse taringot godang ni hepeng na dihaporluhon. Dung tubu ianakhonna i, adong do na muba di parngoluon ni nasida. Ra, gabe gumodang ma tingki na ingkon lehonon ni tungganeboru tu poso-posona. Gabe humurang ma tingki ni nasida mamparrohahon dongan saripena. Jala lam tamba do tanggung jawab ni tungganedoli. Ingkon lehononna do na porlu di tungganeboru dohot ianakhonna. Piga-piga na mardongan saripe mangadopi hasusaan na asing. Ra lomo do roha ni nasida marianakhon, alai ndang boi. Lungun do ra roha ni tungganeboru ala ndang boi ibana marianakhon. w17.06 3 ¶1; 4 ¶5-6

Tontu tahaholongi do hasintongan, jala di Bibel do tadapot hasintongan. Didok Jesus tu Jahowa, “Hatami do hasintongan.” (Joh. 17:17) Asa holong rohanta tu hasintongan na sian Bibel, ingkon taboto do isi ni Bibel. (Kol. 1:10) Alai adong dope na porlu taulahon. Parrohahon ma na didok panurat ni Psalmen 119 asa taboto na porlu taulahon. (Ps. 119:97-100) Ganup ari, ingkon tarimangi jala tapingkirhon do na tajaha sian Bibel. Lam holong ma rohanta tu hasintongan na sian Bibel molo tarimangi laba na tadapot. Jala publikasi na diparade organisasi ni Debata dipatudos songon sipanganon na tabo. Molo adong sipanganon na tahalomohon, tontu talehon do tingki laho mangallang i. Suang songon i ma, tontu talehon do tingki laho marsiajar. Dung i, las ma rohanta marsiajar hata hasintongan. Mura ma taingot na taparsiajari jala mamangke i mangurupi na asing.​—Pjm 12:10. w17.05 18 ¶11-12

Lomo do rohanta mangurupi halak na marsitaonon nang pe nasida ndang manomba Jahowa. (Luk. 10:33-37) Cara na dumenggan laho mangurupi halak, i ma mangajarhon barita na uli tu nasida. Sahalak sintua naung mangurupi piga-piga pangungsi patorangkon, pintor tapaboa ma molo hita Sitindangi Ni Jahowa. Ingkon botoon ni nasida, umlomo do rohanta mangurupi nasida mangantusi pangkirimon na dipaboa di Bibel sian na mangurupi nasida di parhepengon. Molo tapatudu holong tu pangungsi, parohon pasu-pasu do i. (Ps. 146:9) Sahalak donganta borua paboahon, ingkon mangungsi do keluargana ala adong penganiayaan di Eritrea. Opat ianakhonna ingkon mamolus padang pasir saleleng ualu ari. Ujungna, sahat ma nasida di Sudan. Didok ibana, “Dibahen donganta na disi do nasida songon keluargana sandiri, dilehon do sipanganon, pangkean, inganan, dohot transportasi.” Didok muse, “Ise ma na olo manjangkon halak na so ditanda tu jabuna holan ala na manomba Debata na sarupa? Holan Sitindangi Ni Jahowa do na songon i.”​—Joh 13:35. w17.05 8 ¶17, 19-20

“Tung tarbahen baoa ma manumpak Debata? Ndada manumpak tu dirina sambing do halak na marroha i. Tung adong ma tagamon gunana di Debata Nasunhinagogo, molo dipintori ho dirim? Manang tung adong ma untungna sian i molo dipadaulat ho pangalahom?” (Job 22:1-3) Didok si Elipas, ndang marguna jolma i di adopan ni Debata. Baoa na asing, i ma si Bildad na sian Sua, na mandok ndang boi jolma gabe sintong di adopan ni Debata. (Job 25:4) Marsitutu do si Elipas dohot si Bildad asa diboto si Job marisuang do ulaonna manomba Jahowa. Lomo roha ni nasida asa porsea si Job na sarupa do jolma tu ngitngit, gilok-gilok, manang gea di adopan ni Debata. (Job 4:19; 25:6) Didok Jahowa do na margabus si Elipas, si Bildad, dohot si Sopar. Dung i didok Debata, las do rohaNa mangida si Job jala didok do si Job “naposongku”. (Job 42:7) Pos ma rohanta, marguna do jolma na mardosa di adopan ni Debata. w17.04 27 ¶1-2

Ala nunga leleng taida situasi na jahat, gabe somal ma hita tu situasi i. Tudosanna, halak naung leleng tading di jonok ni stasiun ni kareta api, gabe somal mambege soara na guntur. Halak naung leleng tading di jonok ni inganan ni sampah, gabe ndang bau be dihilala ibana tading disi. Alai, tingki disalpuhon Jahowa sude situasi na jahat, lumbang ma pangkilalaanta! Aha do na laho manggantihon situasi na lam jahat saonari? Pingkirhon ma janji na disurat di ayat na diulas sadari on. Las rohanta ala on do sangkap ni Jahowa tu hita! Saonari, ulahon ma angka ulaon na mambahen hita tongtong jonok tu Jahowa dohot tu organisasiNa. Mansai arga do pangkirimonta i. Rimangi ma i, bahen ma i tongtong adong di roha dohot di pingkiranmuna, jala paboa ma i tu na asing. (1 Tim. 4:15, 16; 1 Ptr. 3:15) Molo diulahon hamu i, pos ma rohamu na boi do hamu tongtong mangolu jala marlas ni roha salelengna tingki salpu portibi na jahat on! w17.04 14 ¶16-17

Mura do mangingot on. Alai, songon dia do molo hita sandiri na mangadopi hahurangan ni dongan sahaporseaon? Olo do hita maniru hatigoran ni Jahowa? Umpamana, molo adong sintua na mandok hata na so haru sintong taringot hita, songon dia do hita maradophon i? Gabe gale do partondionmu ala didok sintua i hata na mambahen hansit rohamu? Unang ma pintor didok hamu ndang tama ibana gabe sintua. Alai, olo do hamu paimahon Jesus na gabe ulu ni huria padengganhon situasina? Unang ma holan hasalaanna i na dipingkiri hamu. Olo do hamu mangingot angka na denggan na diulahon ibana? Molo adong donganta mambahen hasalaan tu hamu, alai tongtong ibana gabe sintua jala mandapot gumodang tanggung jawab, las do rohamu mangida ibana? Molo rade hamu manalpuhon hasalaan, on patuduhon nunga ditiru hamu hatigoran ni Jahowa.​—Mat. 6:14, 15. w17.04 26 ¶18