September

Mangajari ianakhonmuna mangkaholongi Jahowa sada hasangapon na mansai balga do i. (Ps. 127:3) Songon di tingki ni halak Israel, sian na tubu ianakhon ni nasida nunga gabe ampuna ni Jahowa nasida. Alai di tingkinta saonari ndang songon i be. Boasa? Alana nang pe natua-tua mangkaholongi Jahowa dohot hasintongan ndang pintor olo ianakhonna mangihuthon i. Jadi sian na tubu ianakhonmuna, ingkon diurupi hamu do ibana asa gabe sisean ni Jesus, mangalehon diri tu Jahowa, jala tardidi. Boasa i ringkot? Alana, molo dilehon dirina tu Jahowa, tardidi, jala tongtong marsihohot manomba Jahowa, boi do i mangurupi ibana asa malua sian haporsuhon bolon. (Mat. 24:13) Hamu pe angka natua-tua, tontu hamu pe dohot do marlas ni roha tingki diida hamu ianakhonmuna mangalehon diri jala tardidi gabe naposo ni Jahowa. w18.03 14 ¶16-17

Tingki sintua mangalehon sipasingot sian Bibel tu keluarga manang tu angka dongan di huria, ingkon ditiru nasida do Kristus. Alana sian i tarida na olo do nasida mangihuthon tudu-tudu sian Debata dohot AnakNa. Molo tajalo sipasingot sian Debata, jala tatiru cara ni Jahowa dohot Jesus tingki mangalehon sipasingot, boi ma hita gabe dapot godang pasu-pasu! Gabe dame ma hita sude di keluarga dohot di huria. Gabe tahilala ma songon dia na dihaholongi, diargai, jala marpos ni roha. Gumodang do muse hadameon dohot las ni roha na boi tadapot di ari na naeng ro. (Ps. 72:7) Sipasingot sian Jahowa paradehon hita asa boi rap mangolu saleleng-lelengna di bagasan keluarga na dame, jala Jahowa ma na gabe Ama di hita. (Jes.11:9) Molo tongtong taingot on, gabe taantusi ma molo sipasingot i sada cara na denggan sian Debata laho patuduhon holongNa tu hita. w18.03 25 ¶15; 25-26 ¶17, 19

Boasa angka halak ro tu ibana laho tardidi? Laho patuduhon naung muba do nasida sian angka dosa ni nasida. Jala disolsoli nasida do hasalaanna ala ndang unduk tu Patik ni si Musa. (Mat. 3:1-6) Asing ni i, adong do na rumingkot muse sian pandidion ni si Johannes. Taboto, ibana do na mandidihon Jesus, Anak ni Debata. (Mat. 3:13-17) Alai, ndang hea Jesus mangulahon dosa. Alani i, ndang porlu ibana mambahen hamubaon. (1 Ptr. 2:22) Jadi, boasa ma ingkon tardidi Jesus? Ala naeng patuduhon na rade do ibana laho mangulahon sangkap ni Debata. (Heb. 10:7) Saleleng ulaon ni Jesus marbarita, dohot do angka siseanna mandidihon angka halak. (Joh. 3:22; 4:1, 2) Nasida tardidi laho patuduhon hamubaon ni nasida ala ndang mangoloi Patik ni si Musa. Alai dung mate Jesus jala dipahehe, asing do na tinuju ni angka siseanna asa tardidi. w18.03 5 ¶6-7

Molo halak na jonok tu Debata rumingkot do di ibana parale-aleon tu Debata. Diihuthon ibana do panogu-noguon ni tondi parbadia. Jala marsitutu do ibana asa maniru Jahowa. (Eps. 5:1) Sai diparsiajari ibana do songon dia pamingkirion ni Jahowa jala diihuthon ibana do i. Solhot do ibana tu Debata. Diargai ibana do uhum ni Debata, jala diulahon do i di parngoluonna. (Ps. 119:33; 143:10) Ndang olo ibana mangulahon “parulaon ni daging” alai sai diulahon ibana do “parbue ni Tondi”. (Gal. 5:22, 23) Sahalak na mangkaringkothon ulaon panombaon tu Debata, i ma halak na jonok tu Debata. w18.02 17 ¶3, 6

Tading di Babel do si Daniel. Di kota i, gok gana-ganaan dohot ulaon hadatuon. Jala angka halak disi, ndang marlomo ni roha mangida halak Jahudi. Sai direhei nasida do halak Jahudi dohot Debata Jahowa. (Ps. 137:1, 3) Tontu gabe sitaonon na borat do on tu si Daniel dohot halak Jahudi na asing! Alai, marsangkap do si Daniel “asa unang ramunanna dirina, marhite sian sipanganon ni rajai”. (Dan. 1:5-8, 14-17) Adong do muse ambat-ambat na asing na diadopi si Daniel. Ala malo si Daniel, dilehon raja ma pangkat na timbo tu ibana. (Dan. 1:19, 20) Alai, ndang na gabe ginjang rohana. Didok ibana do molo sude pasu-pasu na didapot na i, marharoroan sian Jahowa do. (Dan. 2:30) Ingot ma, dipatudos do si Daniel tu si Noak dohot si Job na gabe sitiruon na denggan. Hape poso dope ibana tingki i. (Hes. 14:14) Alai, pos do roha ni Jahowa tu ibana! Jala, tutu do ibana marsihohot jala unduk saleleng ngoluna. w18.02 5-6 ¶11-12

Ndang sala molo marsonang-sonang, songon na hea diulahon Jesus. Laho do ibana tu “Pesta kawin” dohot “pesta na balga”. (Joh. 2:1 -10) Tingki di pesta kawin i, ndang cukup anggurna. Jadi, dibahen Jesus ma tanda halongangan, i ma mambahen aek gabe anggur. Alai, ndang na didok Jesus hasonangan i do na rumingkot. Jahowa do na rumingkot di ngoluna, jala marsitutu do ibana mangurupi angka halak. Rade do ibana mangalehon ngoluna laho paluahon saluhut jolma. Dipaboa Jesus do tu angka halak na mangihuthon ibana, “Martua ma hamu, molo diinsahi halak hamu manang dipaburuburu manang dipatubutubu ragam ni hata na roa, na so tutu, dompak hamu ala ni Ahu! Las ma rohamuna jala marolopolop, ai godang do umpamuna di banua ginjang i.” (Mat. 5:11, 12) Angka na taboto sala, ingkon tapasiding ma. Songon i nang angka na tahilala ndang dihalomohon Debata. Molo taulahon i, na pasonangkon roha ni Jahowa do hita, jala tutu do na tahaholongi Ibana.​—Mat. 22:37, 38. w18.01 25-26 ¶16-18

Alani holongta jala mangargai Jahowa, gabe las ma rohanta mangalehon tu Ibana. Molo tarimangi sude naung dilehon Jahowa tu hita, gabe taronjar do rohanta laho mangargai Ibana. I do na dihilala Raja Daud. Ibana mandok, sude na adong di hita, na sian Jahowa do i. Alani i, sude na talehon tu Jahowa, sian Ibana do i sasintongna. (1 Kron. 29:11-14) Ingkon las do rohanta mangalehon, ndang holan manjalo. Jala i do na dumenggan. Rimangi ma molo adong sada dakdanak dilehon natua-tuana hepeng laho jajan. Dung i, dipangke ibana ma deba hepeng na i laho manuhor hadiah tu natua-tuana. Boi ma tabayangkon songon dia pangkilalaan ni natua-tuana. Manang, tarimangi ma muse molo adong sahalak perintis na poso na rap tading dohot natua-tuana. Diurupi ibana ma natua-tuana laho manuhor sipanganon manang manggarar sewa ni jabu. Sasintongna ndang na dipangido natua-tuana asa dibahen ibana songon i. Alai las do roha ni nasida manjalo pangurupionna. Boasa? Alana, diargai natua-tuana do sude na dibahen ibana tu nasida. Suang songon i ma hita. Diboto Jahowa do, denggan do molo sian ias ni rohanta mangalehon tu Ibana. w18.01 16 ¶4, 6

Asa boi ianakhonmu marhaporseaon, ndang sae holan mandok dia na sintong dohot na sala. Ingkon diurupi hamu do nasida asa boi mangalusi sungkun-sungkun: ‘Boasa ma diorai Bibel hita mangulahon ulaon na didok rohanta songon na denggan? Boasa tadok aturan sian Bibel mangkorhon na denggan tu dirinta?’ (Jes. 48:17, 18) Molo marsangkap ianakhonmuna naeng tardidi, ingkon botoonna do adong tanggung jawab na ingkon ulahononna dungkon tardidi. Sungkun ma ibana: ‘Pasu-pasu aha do na didapot molo unduk? Ambat-ambat na songon dia do na boi masa? Aha do na boi masa molo mangalo?’ Paboa ma, godang do pasu-pasu na didapot nang pe adong ambat-ambat. (Mrk. 10:29, 30) Ringkot do mamingkirhon i andorang so tardidi. Molo diulahon songon i, pos ma rohana, sai mangkorhon na denggan do molo mangihuthon aturan sian Bibel. w17.12 18-19 ¶14-15

Godang do angka donganta na marungkil alani sahit na posi manang nunga matua. Na asing na naung matua ingkon mangurus keluarga na marsahit. Adong dope na marungkil mansari ngolu-ngolu. Sipata ndang holan sada sitaononta. Gari bintang diparrohahon Jahowa do, tarlumobi ma hita! Alani holongta do, umbahen na lomo rohanta mangulahon na dipangido Ibana. (Ps. 19:2, 4, 15) Diboto Jahowa do sude taringot hita. Didok Bibel, “Gari obuk saluhutna na di ulumuna i nunga dibilang.” (Mat. 10:30) Taingot ma, na “diboto Jahowa do angka ari ni parlidang [manang halak na tigor] i”. (Ps. 37:18) Tangkas ma, diboto Jahowa do sude angka sitaononta. Jala, boi do lehononNa gogo tu angka na tongtong marsihohot. w18.01 3 ¶1; 4 ¶4

Dung hehe si Tabita dibahen si Petrus, torop ma halak di huta i “gabe porsea di Tuhan i”. Dipaboa angka sisean na baru i ma barita na uli on tu angka halak, i ma taringot Jesus dohot Jahowa na margogo pahehehon halak naung mate. (Ul. 9:36-42) Adong do na mangida haheheon na asing. Di Troas di dompak utara ni Turki, marpungu ma si Paulus dohot angka dongan. Marjamita ma ibana sahat tu tonga borngin. Adong ma sada doli-doli na margoar si Eutikus manangihon jamita ni si Paulus. Hundul ma ibana di jandela. Alai ala mondok-ondok, madabu ma ibana sian lante tolu di inganan i. Ra, si Lukas do na parjolo sahali mandapothon ibana. Ala sahalak dokter do si Lukas, tangkas do diboto ibana nunga mate doli-doli i. Dohot do si Paulus mandapothon si Eutikus tu toru. Dihaol si Paulus ma ibana. Dung i, didok ma, “Mangolu do ibana.” Gabe longang ma roha ni angka halak disi. Ala diida nasida naung mulak mangolu doli-doli i, ‘mansai las ma rohanasida’.​—Ul. 20:7-12, Bibel siganup ari. w17.12 5-6 ¶10-11

Ndang pola songgot rohanta disi. Alana, halak na mangkaringkothon diri do na mangatur politik dohot ekonomi saonari. Ndang tolap nasida pasohon porang, hajahaton, sahit, dohot hapogoson. Holan Harajaon ni Debata do na boi padengganhon portibi on. Pingkiri ma taringot aha na laho bahenon ni Jahowa. Marhite HarajaonNa salpu nama angka na mambahen halak marporang. Salpu nama korupsi, agama palsu, Sibolis, parange mangkaringkothon diri, dohot mangkaholongi negara. (Ps. 46:10) SalpuhononNa ma hajahaton. Gariada, saonari pe diajari do angka halak asa masihaholongan. Ndang adong pamarentaon na tolap mangulahon on, asing ni Harajaon ni Debata. (Jes. 11:9) Salpuhonon ni Jahowa ma angka sahit. Boi ma sude jolma tongtong sehat. (Jes. 35:5, 6) SalpuhononNa ma hapogoson, boi ma hita marlas ni roha, jala marale-ale tu Ibana.​—Ps. 72:12, 13. w17.11 25-26 ¶14-16

Boasa dibahen huta parlinggoman? Asa unang gabe mardosa halak Israel ala mate halak na so marsala. Arga do hangoluan di Jahowa, jala sogo do rohaNa tu pambunu. (Poda 6:16, 17) Alani i, ndang disoadahon Ibana hasalaan ni halak na mambunu, nang pe ndang sangaja. Halak Parise dohot siboto surat ndang maniru Jahowa. Ndang arga di nasida ngolu ni angka halak. Didok Jesus do tu nasida, “Dirampas hamu do [kunci] parbinotoan; hamu sandiri ndang bongot, jala angka na naeng bongot, diambati hamu.” (Luk. 11:52) Aha do lapatan ni i? Sasintongna, ingkon nasida do na patorangkon Hata ni Debata. Ingkon urupan ni nasida do angka halak mandapot ngolu na salelengna. Alai, diambati nasida do halak laho mangihuthon Jesus, “Partogi tu Hangoluan.” (Ul. 3:15) Dos do i songon na manogu-nogu halak tu hamatean. Ginjang do roha ni siboto surat dohot halak Parise, dirinasida sandiri do na diharingkothon nasida, jala ndang arga ngolu ni halak di nasida. Kejam do nasida! w17.11 17-18 ¶9-10

Ra tingki baru marsiajar hita, ndang tapaboa tu keluarganta. Alai dung tamba haporseaonta, taboto ma ringkot do paboahon tu nasida na laho manomba Jahowa do hita. Molo marsihohot hita tu Debata, boi do gabe tubu parsoalan di keluarganta. Antusi ma pangkilalaan ni keluarganta na so sisomba Jahowa. Las do rohanta mananda hasintongan. Alai olo do dirimpu keluarganta na dioto-otoi do hita. Manang olo do ra didok rohanasida na mangihuthon ajaran na so sintong do hita. Ala ndang dohot be hita marari raya, olo do didok rohanasida na so holong be rohanta tu nasida. Jala didok rohanasida, uhumon ni Debata do hita molo dung mate. Alani i, denggan ma tangihon nasida asa boi taantusi pangkilalaan ni nasida. (Poda 20:5) Songon apostel Paulus, marsitutu do ibana mangantusi pangkilalaan ni “sasude” jolma. Gabe boi ma ibana marbarita na uli tu nasida. Molo taulahon songon i, boi ma taboto cara na dumenggan laho mangurupi nasida mananda hasintongan.​—1 Kor. 9:19-23. w17.10 18 ¶11-12

Olo do maila hita marende ala ndang taboto carana. Taparrohahon ma piga-piga cara na boi mangurupi hita asa denggan marende. Boi do gabe denggan soaramuna tingki marende, molo diparsiajari hamu cara marhosa tingki marende. Songon arus listrik na mambahen lampu galak, songon i ma hosanta boi mambahen gogo soaranta tingki marende. Ingkon songon na mangkatai ma gogo ni soaranta tingki marende, manang boi do umgogo sian i. Songon na didok di Bibel, “marolopolop” manang gogo do soara ni naposo ni Jahowa tingki mangendehon puji-pujian. (Ps. 33:1-3) Boi do hamu marlatik marende. Pillit ma ende na dihalomohon hamu sian buku endenta. Gogo ma jaha lirikna. Jaha ma muse sakalimat sahali marhosa. Dungkon i, gogo ma endehon. (Jes. 24:14) Gabe lam denggan jala lam gogo ma soaramuna marende. Denggan do i. Unang pola maila alani i! w17.11 6 ¶11-13

Saleleng di pardalanan, godang do na boi dipingkiri jala dihatai nasida taringot inganan nasida haduan. Dipaboa angka na matua ma songon dia uli ni Jerusalem dohot bagas joro najolo. (Esr. 3:12) Molo rap hamu dohot nasida tingki i, songon dia do pangkilalaanmuna mangida Jerusalem? Nunga tarulang huta i, gok ramba jala angka tembokna pe nunga marumpak. Malengleng do ate-atemuna mangida i? Ra gabe dipatudos hamu ma i tu tembok ni Babel na togu. Alai nang pe songon i, ndang marmetmet ni roha halak Jahudi. Boasa? Ala diurupi jala dilinggomi Jahowa do nasida saleleng di pardalanan. Dung sahat di Jerusalem, pintor dibahen nasida do langgatan di bagas joro najolo. Jala ganup ari ma nasida mangalehon pelean tu Jahowa.​—Esr. 3:1, 2. w17.10 21-22 ¶2-3

Godang do na diparsiajari si Salomo sian bapakna taringot habaranion. Barani do ibana mangalo musu na balga songon raksasa. Ala diurupi Jahowa jala holan mamangke batu na gelleng, boi do si Daud manaluhon si Goliat. (1 Sam. 17:45, 49, 50) Alani i, boi ma dipatogu si Daud roha ni si Salomo tingki naeng pajongjongkon bagas joro. Debata Jahowa ma mandongani ibana sahat tu na jongjong bagas joro i. Tontu, dirimangi si Salomo do hata ni bapakna on. Gabe barani ma ibana pajongjongkon bagas joro i nang pe poso dope jala ndang marpengalaman. Marhite pangurupion ni Jahowa, sae ma bagas joro na balga i di bagasan pitu satonga taon. Diurupi Jahowa do si Salomo, jala boi do ibana mangurupi hita asa barani mangulahon ulaonta di keluarga nang di huria. (Jes. 41:10, 13) Molo tapatudu habaranion di na marhobas tu Jahowa, pos ma rohanta lehononNa do pasu-pasu tu hita. w17.09 27-28 ¶3-4; 32 ¶20-21

Pos do roha ni naposo ni Jahowa ‘na marngolu jala na marpangkorhon’ do hataNa. Tahilala do i di parngoluonta. Andorang so gabe Sitindangi Ni Jahowa adong do na hea gabe panangko, parnarkoba, manang mangulahon seks na so patut. Adong do muse na hea gabe halak na mamora jala sangap, alai tongtong dope ndang martujuan ngoluna. (Pjm. 2:3-11) Las do rohanta ala ujungna martujuan do ngolu ni nasida jala marpangkirimon. Di Joujou Paboahon, nunga tajaha angka pengalaman sisongon i di artikel “Bibel Mambahen Denggan Ngolungku”. Alai nang pe nunga tardidi, ingkon tongtong do tapatogu parale-aleonta tu Jahowa marhite Bibel. w17.09 21 ¶1

Tangkas do diantusi Jahowa aha na masa tu si Lot. Alani i, pos ma rohanta diboto Jahowa do aha na masa tu hita. (Jes. 63:7-9; Jak. 5:11; 2 Ptr. 2:9) Diajari Jahowa do muse naposoNa asa marasi ni roha. Dibahen do uhum tu halak Israel najolo, na mangurupi nasida asa marasi ni roha. Umpamana, diloas do sahalak parutangan mambuat ulos ni na marutang gabe borot. (2 Mus. 22:26, 27) Alai andorang so bot mataniari ingkon dipaulak do ulos i, asa unang ngali-ngalian na marutang i di tingki modom. Aha do na boi taparsiajari sian uhum on? Tongtong ma patudu asi ni roha. Tingki adong donganta sahaporseaon na marsitaonon, pintor rade ma hita mangurupi nasida.​—Kol. 3:12; Jak. 2:15, 16; 1 Joh. 3:17. w17.09 10 ¶4-5

Dipangido Jesus do tu Amana asa disalpuhon dosa ni halak na pamatehon ibana. Nang pe marsitaonon jala marsak, alai tongtong do Jesus lambok jala sabar. (1 Ptr. 2:21-23) Dipaboa si Paulus do sada cara laho patuduhon lambok ni roha dohot hasabaron. Ibana mandok, “Marsabar ni roha ma hamu sama hamu, masiampunan ma hamu, molo adong na marsogo ni roha na sada tu na sada nai. Ingkon masisesaan dosa do hamu sama hamu songon Tuhan i na manesa dosamuna.” (Kol. 3:13, Bibel siganup ari) Asa boi manalpuhon hasalaan ni dongan, ingkon lambok do rohanta jala sabar. Molo taulahon i, gabe marsada ma huria. Dipangido Jahowa do hita asa lambok jala sabar maradophon na asing. Ringkot do parange on molo lomo rohanta mangolu di tano na imbaru. (Mat. 5:5; Jak. 1:21) Na pasangaphon Jahowa do molo lambok rohanta jala sabar hita. Jala molo taulahon i boi ma taurupi angka dongan asa sabar jala lambok.​—Gal. 6:1; 2 Tim. 2:24, 25. w17.08 25 ¶15-17

Godang do disurat di Bibel songon dia cara ni Jahowa mangurupi di na so panagaman. Umpamana, di tingki ni Raja Hiskia ro ma si Sanherib raja ni Assur manaluhon angka kota di Juda, asing ni Jerusalem. (2 Raj. 18:1-3, 13) Dung i ro ma si Sanherib mangondam halak Jerusalem. Aha do na diulahon Raja Hiskia? Parjolo, martangiang ma ibana tu Jahowa mangido pangurupion dohot manjalo tudu-tudu marhite panurirang Jesaya. (2 Raj. 19:5, 15-20) Dung i, dilehon ibana ma guguan na pinangido ni si Sanherib. (2 Raj. 18:14, 15) Tingki dihaliangi tentara Assur kota i, diparade si Hiskia do angka na porlu. (2 Kron. 32:2-4) Songon dia do ujungna? Disuru Jahowa ma sada suru-suruan laho mangaripashon 185.000 tentara ni si Sanherib di bagasan saborngin. Pangurupion on ro di na so panagaman ni si Hiskia!​—2 Raj. 19:35. w17.08 11 ¶7; 12 ¶12

Songon dia do hamu asa boi paradehon diri? Asa boi mangalehon na dumenggan tu Jahowa, ingkon tapatudu do parange na denggan. Taratur ma marsiajar jala mangarimangi Bibel, jala patudu ma haporseaonmu di parpunguan. Saleleng marsingkola, marlatik ma hamu asa lam malo marbarita. Parrohahon ma na asing, jala marbisuk ma manungkun jala manangihon alus ni nasida. Rade ma mangurupi di huria, songon paiashon jala paturehon Bale Harajaon. Las do roha ni Jahowa tu halak na serep marroha jala rade mangurupi. (Ps.110:3; Ul. 6:1-3) Ditogihon si Paulus do si Timoteus gabe misionaris, ala “denggan do baritana dihatindangkon angka dongan”.​—Ul. 16:1-5. w17.07 23 ¶7; 26 ¶14

Saleleng adong dope parsoalan taringot hak ni Jahowa mamarenta di pingkiran ni jolma dohot suru-suruan, ndang tarpatupa dame dohot sada ni roha. Alai, molo nunga diparhatutu hak ni Jahowa mamarenta, marlas ni roha jala dame ma dihilala na mangihuthon pamarentaonNa. (Eps. 1:9, 10) Diparhatutu nama hak ni Debata mamarenta, jala diripashon ma pamarentaon ni Sibolis dohot jolma. Marhasil ma pamarentaon ni Debata marhite Harajaon ni Messias. Angka halak na tongtong marsihohot patuduhon, boi do jolma marsihohot jala marpihak tu pamarentaon ni Debata. (Jes. 45:24) Lomo do rohanta tongtong marsihohot. Alani i, porlu taantusi boasa ringkot parsoalan on. w17.06 16 ¶4-5

Ndang taboto sadia leleng sasahalak marhabot ni roha. Tingki baru marujung ngolu halak na dihaholongi, godang do angka dongan dohot sisolhot na ro mangapuli. Alai ndang sadia leleng dungkon i, mangulahon ulaonna be ma nasida. Sasintongna porlu dope halak na marhabot ni roha i diapuli. Rade ma hamu mangurupi. Ingkon taapuli do nasida saleleng na dihaporluhon. (1 Tes. 3:7) Ingot ma olo do tompu sasahalak marlungun ni roha. Olo do alani tanggal parbogason, musik, poto, ulaon, suara manang manganggo angur ni manang aha. Olo do na mabalu marlungun ni roha tingki parjolo sahali mangulahon sada ulaon sahalakna, umpamana songon tingki ro tu kebaktian manang tu Borngin Parningotan. Alai, ndang holan di tingki sisongon i halak na marhabot ni roha porlu dipatogu. w17.07 13-14 ¶17-19

Molo jotjot taurupi na asing, boi do gabe lupa hita di sitaononta. Umpamana, godang do donganta borua na marhasohotan manang na ndang, marlas ni roha tingki marbarita na uli. Diboto nasida, na rap saulaon do nasida dohot Jahowa jala mangulahon lomo ni rohaNa. Sasintongna, boi do hita sude mangurupi na asing marhite pasahathon barita na uli. Molo taurupi dongan sahaporseaon, lam solhot ma hita tu nasida. On ma na diulahon apostel Paulus. Diparrohahon ibana do na asing “songon inaina na pauliuli gellengna”. Diapuli jala dipatogu do dongan sahaporseaonna “songon pangapoi ni amaama di anakkonna”. (1 Tes. 2:7, 11, 12) Angka ianakhon naung marsiajar taringot tu Jahowa, boi do mangapuli jala patoguhon keluargana. Songon dia carana? Marhite patuduhon pangargaion tu natua-tuana jala marsitutu mangurupi nasida di pardagingon dohot di partondion. Molo marsihohot do ianakhon i tu Jahowa, on boi patoguhon keluarga. w17.06 6 ¶13; 7 ¶14; 8 ¶17

Tangkas ma, mansai godang do hepeng ni piga-piga halak, alai marmilliar halak mansai pogos do. Diboto Jesus do holan Harajaon ni Debata do na boi paubahon sistem ekonomi di portibi on. Didok di Bibel Sibolis do na mangarajai “partigatiga” manang sistem ekonomi, sistem politik, dohot agama na adong di portibi on. (Pgk. 18:3) Boi do naposo ni Debata papulikkon diri sian politik dohot agama na so sintong. Alai, godang do naposo ni Debata na so boi papulikkon diri sian sistem ekonomi na dirajai Sibolis. Porlu do tapareso pamingkirionta maradophon sistem ekonomi. Laho mangulahon i, tasungkun ma dirinta: ‘Songon dia do ahu mamangke arta na patuduhon na marsihohot ahu tu Debata? Songon dia do asa unang pagodangku tingkingku mangalului hamoraon di portibi on? Pengalaman aha do na patuduhon molo naposo ni Debata tongtong mangasahon Ibana?’ w17.07 3-4 ¶1-3

Di tudosanna taringot panabur, didok Jesus do adong piga-piga halak na manjalo “hata Harajaon i” jala mulana songon na marhiras ni roha. Alai, “pangkolsohonna di angka na di hasiangan on dohot hamoraon sipangansi i do mamisati hata i”, na mambahen mago hiras ni rohanasida. (Mat. 13:19-22; Mrk. 4:19) Molo ndang manat hita, arsak ni roha siganup ari boi mambahen ndang marhiras ni roha be di ulaon partondion. Tapatudu ma holongta tu Kristus marhite mangkaringkothon ulaon marbarita. Songon dia do carana asa taboto na tongtong hita mangulahon i? Tasungkun ma dirinta, ‘Tu ulaon aha do humolong rohangku? Manomba Jahowa do na mambahen ahu sonang manang ulaon na asing?’ w17.05 22 ¶3-4

Tingki adong halak panompang na dao ingananna sian Sitindangi na mamangke bahasana, porlu do ibana marpungu di huria na mamangke bahasa di inganan i. (Ps. 146:9) Alai molo adong huria na jonok disi na mamangke bahasa ni nasida, ingkon ditontuhon tungganedoli do tu huria na dia nasida marpungu. Andorang so ditontuhon, ingkon manat do dipingkirhon jala manangiangkon i. Ingkon disungkun do tungganeboru dohot ianakhonna. (1 Kor. 11:3) Ingkon dipingkirhon natua-tua do na ringkot di ianakhonna. Asa diantusi ianakhonmuna hasintongan sian Bibel, ndang sae holan manangihon na diulas di parpunguan ganup minggu. Alai molo bahasa na diantusi ianakhonmuna do na dipangke di parpunguan, mura ma nasida mangantusi na dipaboa jala mandapot godang parsiajaran. Asing muse do situasina molo ndang apala diantusi ianakhonmuna bahasa i.​—1 Kor. 14:11. w17.05 11-12 ¶10-11

Tasungkun ma dirinta: ‘Halak na asing do na huloas mangulahon godang ulaon? Rumingkot do hamoraon di ahu sian apala marhobas tu Jahowa? Manang, hutiru do si Barak, si Debora, si Jael, dohot 10.000 halak na marsitutu mangulahon manang aha pe laho marhobas tu Jahowa? Adong do sangkaphu laho pinda asa mandapot gumodang hepeng, asa lam denggan ngolungku? Hutangiangkon do taringot pangkorhon ni on tu keluarga dohot tu huria?’ Dilehon Jahowa do hak na sumurung tu hita laho mangihuthon pamarentaonNa. Mulai sian tingki ni si Adam dohot si Hawa, lomo roha ni Sibolis asa mangalo jolma tu Jahowa. Alai, molo taihuthon pamarentaon ni Jahowa, on patuduhon tu Sibolis ise na tapillit. Ala marhaporseaon jala marsihohot, gabe girgir ma rohanta mangulahon ulaon na dihalomohon Jahowa jala on mambahen las rohaNa. (Poda 23:15, 16) Molo marsihohot jala unduk hita, boi ma dialusi Debata gabus ni Sibolis. (Poda 27:11) Na boi talehon tu Jahowa, i ma tongtong mangoloi Ibana. Mansai arga do on di Ibana jala mambahen las rohaNa. w17.04 32 ¶15-16

Di Patik ni si Musa, molo adong na marjanji tu Jahowa, “na so tupa ubaonna hatana, ingkon hombar tu saluhut na ruar sian pamanganna bahenonna”. (4 Mus. 30:3) Di pudian ni ari, disurat si Salomo ma hata songon na di ayat na diulas sadari on. Jesus mandok, ringkot do manggohi janji tu Debata. Didok ibana, “Hata na tu angka ompu na robi: ‘Ndang jadi tolononmu na tutu! Naung saut diuarihon ho tu Debata, ingkon gararonmu do!’” (Mat. 5:33) Mansai ringkot do manggohi janjinta tu Jahowa. Molo tagohi janjinta, togu ma parale-aleonta tu Jahowa. Dipatangkas si Daud do on muse tingki didok, “Ise ma patut nangkok tu dolok ni Jahowa? Ise ma na boi masuk tu joroNa na badia i?” Didok ibana, i ma halak “na so olo marjanji palsu”.​—Ps. 24:3, 4, Bibel siganup ari. w17.04 4 ¶3-4

Molo didok rohanta adong mambahen na so tigor tu hita di huria, ingkon manat do hita asa unang paboahon i tu na asing. Alai, molo adong donganta mangulahon dosa na balga, ingkon tapangido pangurupion sian sintua jala tapaboa tu nasida. (3 Mus. 5:1) Alai molo situasi i ndang dosa na balga, boi do hita mardame dohot donganta i jala unang tapaboa taringot i tu ise pe. (Mat. 5:23, 24; 18:15) Molo masa sisongon i, sai marsihohot jala ihuthon ma prinsip ni Bibel. Olo do ra ndang taantusi situasi na masa, jala sasintongna ndang tu hita parniulaon na so tigor i dibahen. Ingot ma, ndang soal hita na sintong manang na ndang, mandok hata na pahansithon roha mambahen lam maol pasaehon parsoalan i. Tahilala ma las ni roha ala ndang tadok angka na so denggan taringot tu dongan sahaporseaonta! Molo marsihohot tu Jahowa dohot tu dongan sahaporseaon, boi ma tapasiding hasalaan sisongon i. w17.04 19 ¶14