Oktober

Bisuk marharoroan sian Jahowa. Jala lomo do rohana mangalehon i tu na asing. Sada cara asa boi marbisuk hita, i ma manjangkon sipasingot sian Debata. Molo taulahon i, gabe diondingi ma hita sian ulaon na sala. Jala boi do i mambahen hita lam jonok tu Jahowa. (Poda 2:10-12) Asing ni i, gabe tadapot ma pangkirimon asa mangolu saleleng-lelengna. (Jud. 21) Ra, ala jolma na mardosa do hita manang ala ndang somal hita dipasingot di keluarganta, gabe maol ma hita manjangkon sipasingot. Alai, molo tahilala do laba ni sipasingot sian Debata, gabe boi ma tahilala holongNa tu hita. Poda 3:11, 12 mandok, “Ale anaha, sai unang toishon pangajaran ni Jahowa.” Dung i didok do muse, “Ai matua dipinsang Jahowa do na hinaholonganna.” Jadi, pos ma rohanta, lomo do roha ni Jahowa asa hita mandapot na dumenggan. (Heb. 12:5-11) Diboto Jahowa do sude na tahaporluhon di ngolunta. Jadi, sipasingot na dilehon Ibana, tontu parohon na denggan do i tu dirinta. w18.03 28 ¶1-2

Ditongoshon si Petrus do surat tu angka dongan na di huria Asia Kecil na marasing-asing haroroan dohot hasomalan ni nasida. Ingkon diadopi nasida do pangunjunan na borat dohot paraloan. Jadi, aha ma na boi mangurupi nasida mangadopi sitaonon i? (1 Ptr. 1:1; 4:4, 7, 12) Tingki didok si Petrus ingkon manamue tu dongan na asing, lapatanna i ndang diulahon holan tu angka halak na baru tinanda. Dohot do tu angka dongan naung leleng ditanda jala rap saulaon dohot nasida. Aha do laba na didapot ala lomo roha ni nasida manamue? On mambahen nasida gabe lam solhot. Songon dia molo hamu? Hea do hamu mangkilala las ni roha ala digokkon sasahalak tu jabu ni nasida? Molo taulahon na sarupa, on mambahen hita gabe lam solhot tu nasida. Gabe lam tatanda ma angka donganta molo lomo rohanta manamue nasida. Halak Kristen di tingki ni si Petrus, ingkon solhot do nasida tu donganna be. Alana, lam susa do parngoluon ni nasida. Hita pe saonari, porlu do mangulahon i ala mangolu di “tingki parpudi”.​—2 Tim. 3:1. w18.03 15 ¶1-3

Didok Jesus, marlas ni roha do halak na jonok tu Debata. Jala dipaboa do di Rom 8:6, adong pangkorhonna tu parngoluonta molo taihuthon pamingkirion ni Debata. Didok, “Ai hamatean do harohaon ni daging, alai hangoluan jala hadameon do anggo harohaon ni Tondi.” Jadi molo jonok hita tu Debata, gabe dame ma pangkilalaanta, marale-ale tu Debata, jala dapotta ma pangkirimon mangolu salelengna. Alai, saonari hita mangolu di portibi na jahat. Godang do halak saonari ndang mangihuthon pamingkirion ni Debata. Jadi porlu do hita manjaga pamingkirionta. Molo ndang taihuthon pamingkirion ni Jahowa, gabe pamingkirion ni portibi on ma na taihuthon. Si Judas mandok molo halak na mangkaholongi portibi on boi gabe ndang mandapot panogu-noguon sian Jahowa.​—Jud. 18, 19. w18.02 17 ¶5, 7; 18 ¶8

Jotjot do angka dokter dohot perawat jonok tu angka na marsahit. Sai rade do nasida laho mangubati angka na marsahit. Alai ingkon porlu do jagaon ni nasida dirina be, asa unang bali angka sahit i tu nasida. Dos songon i ma situasi ni Sitindangi Ni Jahowa saonari. Ganup ari, godang do sian hita na karejo dohot angka halak na patuduhon parange na roa, jala marimbar sian parange na dihalomohon Debata. Ndang mura laho mangadopi i. Di tingki parpudi saonari on, godang do angka halak na so mangkalomohon Debata, jala ndang olo mamboto uhumNa. Dipatorang apostel Paulus do angka parange ni nasida di bagasan suratna tu si Timoteus. (2 Tim. 3:1-5) Nang pe nunga taboto ndang denggan parange on, alai ingkon tajaga do dirinta asa unang taihuthon cara marpingkir, pangkataion dohot parniulaon ni nasida. (Poda 13:20) Alani i, ingkon talinggomi do dirinta asa unang mangihuthon parange i, nang pe ingkon taurupi angka halak laho mananda Jahowa. w18.01 27 ¶1-2

Di taon 33 M dung dipahehe Jesus, mangkatai ma ibana tu lobi sian 500 baoa, borua, dohot angka dakdanak. Ra, di tingki i ma didok ibana ayat sadari on. (1 Kor. 15:6) Dijujui Jesus do angka na mangihuthon ibana asa mambahen angka halak gabe siseanna. Ingkon tardidi do manang ise na naeng gabe siseanna. (Mat. 11:29, 30) Molo manomba Debata ingkon tajangkon do Jesus na dipangke Jahowa laho mangulahon sangkapNa. Dung i, boi ma tardidi hita songon na dihalomohon Debata. Godang do bukti sian Bibel na patuduhon mansai ringkot do pandidion di angka sisean ni Jesus na parjolo. Ndang olo nasida manundati asa tardidi.​—Ul. 2:41; 9:18; 16:14, 15, 32, 33. w18.03 5 ¶8

Godang do na mangulahon angka na rorang, dohot agama na so sintong di portibi on. Diihuthon halak do Babel na Balga, i ma punguan agama na so sintong. Didok Bibel do i “inganan ni angka sibolis”. (Pgk. 18:2) Na manompang do hita di portibi saonari on. Alani i, diida halak do imbar hita sian nasida. Gabe direhei ma hita. (Mrk. 13:13) Alai songon si Daniel, tapajonok ma dirinta tu Jahowa. Molo serep rohanta, porsea, jala unduk tu Ibana, hita pe gabe mararga do di adopanNa. (Hag. 2:7) Boi do angka natua-tua marsiajar sian natua-tua ni si Daniel. Tading di Juda do si Daniel tingki dakdanak, jala godang do angka na jahat di humaliangna. Alai, boi do ibana gabe mangkaholongi Jahowa. Alana sian na metmet diajari natua-tuana do ibana taringot Jahowa. (Poda 22:6) Goar ni si Daniel lapatanna, “Jahowa do Panguhumi di ahu”. On patuduhon molo natua-tuana mangkaholongi Jahowa. (Dan. 1:6) Hamu angka natua-tua, ingkon sabar do mangajari ianakhonmuna taringot Jahowa. Unang ma marnaloja hamu. (Eps. 6:4) Martangiang ma raphon nasida, jala tangiangkon ma nasida. Marsitutu ma hamu mangajari nasida asa mangkaholongi Jahowa. Tontu pasu-pasuon ni Jahowa do naung diulahonmuna i.​—Ps. 37:5. w18.02 6 ¶12; 7 ¶14-15

Di sada parnidaan ni apostel Johannes, dibege ibana angka naposo ni Debata na di surgo mandok, “Ale Tuhan Debatanami, na tama do Ho manjalo hasangapon dohot hamuliaon dohot hagogoon, ai ditompa Ho do saluhutna; hinorhon ni lomo ni roham do, umbahen manjadi angka i jala tartompa!” (Pgk. 4:11) Tontu, tama do Jahowa mandapot hamuliaon dohot hasangapon. Alani i, lomo do rohanta mangalehon na dumenggan tu Ibana. On ma sada caranta laho manomba Ibana. Dos songon halak Israel, dipangido Jahowa do tu halak Israel asa mangulahon ulaon na ringkot tolu hali di bagasan sataon. Ingkon diboan nasida do silehon-lehon tu Jahowa tingki mangulahon i. (5 Mus. 16:16) Tangkas ma sian tudosan on, mansai ringkot do mangalehon tu Jahowa sian ias ni rohanta di panombaonta saonari. Molo taulahon on, na patuduhon pangargaionta jala pangurupionta do tu ulaon ni organisasi ni Jahowa. w18.01 16 ¶4-5

Didok Jesus do tu angka siseanna, “Jangkon hamu ma augangku.” Jala didok do muse, “Asa dapotan hasonangan tondimuna. Ai lambok do augangku jala neang do dohot na hupaporsanhon.” (Mat. 11:29, 30) Toho do i! Sipata, olo do nunga loja manang marsak hita tingki naeng laho marpungu manang marbarita na uli. Alai dung mulak hita sian i, gabe marlas ni roha jala boi ma hita lam gogo mangadopi angka sitaononta. Tontu, on patuduhon na lambok do auga na sian Jesus. Adong sahalak donganta borua na marungkil manaon sahitna na posi. Sipata, maol do ibana mangihuthon acara na di parpunguan. Sada tingki, ro ma ibana tu parpunguan nang pe maol do i di ibana. Didok ibana, “Jamita di tingki i mangulas taringot tu angka na marmetmet ni roha. Mansai lambok do i dipasahat jala boi mangapuli rohangku, gabe ro ma ilungku tingki i. On pasingothon ahu na mansai ringkot do parpunguan di ahu.” Las do rohana nang pe ndang mura di ibana asa ro tu parpunguan! w18.01 5 ¶6-7

Dungkon tardidi, olo do ra gabe gale parale-aleon ni ianakhonmu tu Jahowa. Umpamana, olo do ra gabe lomo roha ni nasida mangulahon giot-giot ni portibi on. Manang didok rohana, ndang adong labana mangihuthon prinsip ni Bibel. (Ps. 73:1-3, 12, 13) Aha do na boi ulahononmu? Ndang soal dakdanak dope manang naung remaja ianakhonmu, unang ma pintor muruhi. Alana, olo do gabe metmet rohana jala ndang olo be manomba Jahowa. Alani i, ingkon sian roha do hamu mangurupi nasida. Sahalak na poso naung tardidi nunga marjanji asa mangkaholongi jala tongtong rade manomba Jahowa. (Mrk. 12:30) Ingkon tagohi do janji laho manomba Jahowa, ala ringkot do i di adopan ni Jahowa.​—Pjm. 5:3, 4. w17.12 19-20 ¶16-17

Songon si Marta, porsea do naposo ni Debata na laho masa haheheon di ari na naeng ro. Rimangi ma pangidoan ni Jahowa tu si Abraham. Nunga leleng si Abraham paimahon asa adong anakna. Alai didok Jahowa ma tu ibana, “Buat ma anakmu na sasada i, haholongan ni roham, si Isak i, jala togihon ibana tu tano Moria, jala pelehon ibana disi bahen pelean situtungon tu sada dolok, sipaboaonku tu ho.” (1 Mus. 22:2) Songon dia do pangkilalaan ni si Abraham mambege i? Nunga marjanji Jahowa tu ibana, marhite pinomparna do pasu-pasuonNa sude bangso. (1 Mus. 13:14-16; 18:18; Rom 4:17, 18) Jala, didok do muse “marhite-hite si Isak” do pasu-pasu i. (1 Mus. 21:12) Alai, songon dia do i saut molo dipelehon do si Isak? Ditogu-togu tondi parbadia do si Paulus manurat taringot pos ni roha ni si Abraham, tolap do Debata pahehehon si Isak. (Heb. 11:17-19) Ndang diboto ibana andigan si Isak laho dipahehe. Alai pos do rohana na laho paheheon ni Jahowa do si Isak, anakna i. w17.12 6-7 ¶12-14

Songon si Paulus, ingkon tatiru ma Jahowa. Lomo do roha ni Jahowa asa marhamubaon angka halak jala mangolu saleleng ni lelengna. (2 Ptr. 3:9) Hita pe songon i ma, tahaholongi ma angka halak. Molo asi rohanta tu nasida, ringgas ma hita marbarita. Dapotan las ni roha do hita molo taulahon i. Arga do hangoluan di Jahowa. Asa boi tatiru Ibana, tapasiding ma angka na boi parohon hamatean. Manat-manat ma hita tingki manupir, karejo, martungkang, manang tingki laho tu inganan parpunguan. Olo do halak mangulahon ulaon na boi parohon jea tu dirina, ala naeng hatop manang ala ndang olo rugi. Alai molo hita, tatiru ma Jahowa, na sai mangulahon na denggan. Tarlumobi angka sintua, ingkon dipasiding nasida do angka na boi parohon jea tu nasida manang tu angka dongan. (Poda 22:3) Molo dipasingot angka sintua hamu, tangihon ma. (Gal. 6:1) Tiru ma Jahowa, asa unang gabe mardosa hamu ala mangulahon ulaon na parohon hamatean.​—5 Mus. 19:10. w17.11 18 ¶11-12

Mangkirim do halak Kristen na miniahan asa mangolu di banua ginjang. Didok si Paulus do i “upa hamonangan na sian panjouon ni Debata sian ginjang”. (Plp. 3:14) Di Harajaon ni Debata, rap mamarenta ma nasida dohot Jesus Kristus. Urupan ni nasida ma angka jolma asa malua sian dosa. (Pgk. 20:6) Las do rohanasida alani i! Alai, adong do muse pangkirimon tu biru-biru na asing. Mangkirim do nasida laho mangolu di Paradeiso di tano on. On pe parohon las ni roha do! (2 Ptr. 3:13) Diurupi si Paulus do halak Kristen na miniahan asa tongtong marsihohot jala mandapot upa i. Si Paulus mandok, “Angka na di ginjang i ma parrohahon hamu.” (Kol. 3:2) Lapatanna, ingkon sai dipingkiri nasida do pangkirimon i. (Kol. 1:4, 5) Pingkiri ma taringot pasu-pasu ni Jahowa. On boi mangurupi naposo ni Debata asa tongtong mangingot upa i.​—1 Kor. 9:24. w17.11 27 ¶1-2

Songon tangiang do godangan angka ende di buku Marlas ni Roha Marende tu Jahowa. On mangurupi hita paboahon pangkilalaanta tu Jahowa. Asing ni i, adong do ende na mangurupi hita asa “masipajujuan tu haholongon dohot tu angka ulaon na denggan”. (Heb. 10:24) Alani i, lomo do rohanta mamboto nadana, ketukanna, dohot lirikna. Carana, tangihon ma rekaman ni angka donganta na mangendehon angka ende di jw.org. Molo dung marlatik hita di jabu, boi ma hita marende sian nasa roha jala ndang maila. Taingot ma, mansai ringkot do marende di panombaonta. On ma caranta patuduhon holong dohot hamauliateonta tu Jahowa di sude basa-basaNa. (Jes. 12:5) Molo marlas ni roha hita marende, gabe dohot do donganta marlas ni roha. Sude hita na di huria, na poso, na matua, dohot na baru di hasintongan boi marlas ni roha marende. Alani i, sian nasa roha ma hita marende jala unang ma maila. Alani i, marlas ni roha ma marende! w17.11 8 ¶18-19

Godang do pangungsi na ro sian negara na mangorai ulaon marbarita na uli. Alai ala hiras ni roha ni Sitindangi marbarita, marribu pangungsi gabe boi manangihon “hata Harajaon”. (Mat. 13:19, 23) Godang do “na sorat” na mandapot pangapulion dohot pangurupion tingki ro tu parpunguan. Jala didok nasida, “Tutu do Debata di tonga-tongamuna.” (Mat. 11:28-30; 1 Kor. 14:25) Porlu do marbisuk jala ‘pantas marroha’ tingki marbarita tu pangungsi. (Poda 22:3) Sabar ma hamu manangihon nasida. Alai, unang ma ulas taringot politik. Taihuthon ma tudu-tudu sian kantor cabang dohot sian pamarenta asa unang parohon jea tu hita dohot tu na asing. Ala marragam do agama dohot hasomalan ni pangungsi, porlu do taparsiajari songon dia pangkilalaan dohot pamingkirion ni nasida. Umpamana, adong do na mamboan hasomalan sian negarana taringot songon dia sahalak borua marpangkean. Alani i, tingki marbarita na uli tu nasida, ringkot taparrohahon caranta marpangkean asa unang ganggu roha ni nasida. w17.05 8 ¶17-18

Boi do tapangido tondi parbadia ni Jahowa, asa boi hita lambok jala burju tu keluarga na so manomba Jahowa. Unang ma gabe marsoal hita dohot nasida laho patorangkon angka na sala di haporseaon ni nasida. Tingki hansit rohanta alani hata dohot parniulaon ni nasida, tatiru ma angka apostel. Si Paulus mandok, ‘[Tingki] diinsahi hami, mamasu-masu hami; dilelei hami, sabar do hami; diparoaroa hami, mangelekelek do hami.’ (1 Kor. 4:12, 13) Boi do dame keluarganta molo lambok hita mangkatai. Alai umbalga do pangkorhonna molo burju hita. (1 Ptr. 3:1, 2, 16) Patudu ma tu keluarganta, marlas ni roha do hita ala manomba Jahowa. Denggan ma ajari ianakhonmuna, jala ihuthon ma prinsip ni Bibel di parngoluonmuna. Nang pe ndang taronjar roha ni nasida laho mamboto hasintongan, alai boi do hita marlas ni roha. Alana, las do roha ni Jahowa mangida hita molo denggan pangalahonta. w17.10 13 ¶13-14

Dung mananda hasintongan, godang do halak na mambahen hamubaon na balga. Songon na masa tu angka donganta di abad na parjolo na marpangkirimon tu surgo. (1 Kor. 6:9-11) Tingki dipajojor si Paulus taringot pangalaho ni halak na so dohot manean Harajaon ni Debata, didok ibana do, “Angka sisongon i do hamu deba najolo.” Aha do na mambahen nasida marhamubaon? Hata ni Debata dohot tondi parbadia. Alai, nang pe nunga gabe halak Kristen, adong do sian nasida na mangulahon dosa na balga na manegai parale-aleonna tu Jahowa. Songon na masa tu donganta baoa na miniahan. Mangulahon dosa do ibana jala ingkon dipabali manang dipecat sian huria. Dung piga-piga leleng, marhamubaon do ibana jala dijalo ma muse di huria. (1 Kor. 5:1-5; 2 Kor. 2:5-8) Godang do angka donganta boi marhamubaon alani Hata ni Debata. Tontu dipatogu do haporseaonta mamboto on. Alani i, denggan ma i tapangke. w17.09 21-22 ¶2-3

Sian Jahowa do Haroroan ni holong. (1 Joh. 4:7) Di Bibel, holong na umbalga, i ma holong na dipatudu ala mangihuthon prinsip na sintong. Di bahasa Junani, holong sisongon on digoari agape. Na didok dison, i ma pangkilalaan na mangonjar roha ni sasahalak, laho mangulahon na denggan tu na asing. Holong sisongon on ndang mangkaringkothon diri. Jala parohon las ni roha na sasintongna do i. Nunga dipatudu Jahowa holongNa tu jolma andorang so ditompa dope si Adam dohot si Hawa. Jumolo do ditompa Jahowa tano on. Uli do i dibahen asa boi jolma marlas ni roha disi. Ndang na tu Ibana sandiri umbahen na ditompa sudena i, alai tu hita do. Dung rade sudena i, ditompa Jahowa ma jolma jala dilehon ma pangkirimon mangolu salelengna di Paradeiso di tano on. w17.10 7 ¶1-2

Didok si Jakobus ma muse, “Molo siida bohi hamu, na mangulahon dosa do hamu disi.” (Jak. 2:9) Molo tahaholongi do dongan na asing, ndang olo hita paimbar-imbarhon nasida alani singkolana, suku, marga, manang alani hamoraonna. Alani i, unang ma holan asa diida jolma tapatudu holong, alai patudu ma holong na sian roha. Holong i “sabar jala burju” jala “ndang ginjang rohana”. (1 Kor. 13:4, Bibel siganup ari) Ingkon sabar, burju, jala serep do rohanta asa boi marbarita na uli tu na asing. (Mat. 28:19) Molo tapatudu sude parange on, boi ma hita tongtong marale-ale tu sude donganta di huria. Molo tapatudu holong sisongon i, marsada ma huria. Boi do i parohon sangap tu Jahowa. Alana, idaon ni halak na asing ma i, jala gabe taronjar ma rohanasida laho mananda hasintongan. I do alana Bibel mandok, “Na sumurung sian sasudena i, masihaholongan ma hamu, ai i do rahutrahut na dumenggan.”​—Kol. 3:14, Bibel siganup ari. w17.08 26 ¶18-19

Suang songon i ma hita saonari. Boi do tapaboa taringot asi ni roha ni Debata tu halak na so mananda Jahowa dope. Olo do ra nasida muba jala marale-ale tu Ibana. Alana ndang lomo roha ni Jahowa mangaripashon manang ise pe. (2 Ptr. 3:9) Alani i, tabahen ma nasa gogonta mangurupi sude halak, asa boi mandapot asi ni roha ni Debata. Tabaritahon ma i andorang so ro dope ari rimas ni Debata. Sitiruon na denggan do Jesus laho patuduhon asi ni roha. Asi do rohana mida angka halak. ‘Ai maheu jala marhinamago do nasida songon birubiru na so marparmahan.’ Aha do na diulahon Jesus na patuduhon asi ni rohana? “Gabe godang ma dipodahon tu nasida.” (Mat. 9:36; Mrk. 6:34) Alai molo halak Parise ndang songon i. Ndang olo nasida mangurupi angka halak. (Mat. 12:9-14; 23:4; Joh. 7:49) Olo do hamu maniru Jesus jala mangurupi angka halak asa mananda Jahowa? w17.09 11 ¶6; 12 ¶9

Tingki dihurung si Josep di Misir, ra ndang adong tubu di rohana gabe parhuaso paduahon di Misir, manang dipangke Jahowa ibana paluahon keluargana sian haraparon. (1 Mus. 40:15; 41:39-43; 50:20) Tangkas ma, pangurupion ni Jahowa lobi sian na dihirim ni si Josep. Songon si Sarah, hirim do rohana asa adong tubuna di hatuaonna? Hatutubu ni si Isak, lobi sian na dihirim ni si Sarah. (1 Mus. 21:1-3, 6, 7) Tutu, saonari ndang boi be tahirim asa bahenon ni Jahowa tanda halongangan laho mangurupi hita andorang so ro tano na imbaru. Jala ndang tapangido tu Jahowa asa mambahen tanda halongangan di ngolunta. Alai, longang do rohanta mangida cara ni Jahowa mangurupi naposoNa najolo, jala ndang muba dope Ibana! (Jes. 43:10-12) Pos ma rohanta lehononNa do gogo na tahaporluhon hombar tu na di halomohon rohaNa. (2 Kor. 4:7-9) Boi do Jahowa mangurupi hita nang pe maol situasi manang sitaononta, molo tongtong hita marsihohot tu Ibana. w17.08 13-14 ¶13-14

Mangalehon sude tingkinta tu Jahowa mangurupi hita gabe halak na matoras di partondion. Jala godang do na mandok, molo merintis di tingki haposoon, boi ma marhasil di parsaripeon ni nasida. Jotjot do halak na merintis andorang so marhasohotan gabe rap merintis dohot dongan saripena. (Rom 16:3, 4) Psalmen 20:5 mandok, “Sai dilehon [Jahowa] ma tu ho [na pinangido ni] roham, jala dipasaut nasa sangkapmi.” Huhut dirimangi hamu na laho sipillitonmu, pingkiri ma aha do lomo ni roham. Rimangi ma, aha do na diulahon Jahowa saonari jala aha do na boi ulahononmu asa boi dohot disi. Dung i, pillit ma na palashon rohaNa. Molo dilehon hamu ngolumu laho marhobas di Jahowa, dapotmu ma las ni roha, jala gabe ‘dihalomohon Jahowa, jadi lehononna ma tu hamu na pinangido ni roham’.​—Ps. 37:4. w17.07 26 ¶15-18

Jotjot do tapuji sasahalak ala denggan hata manang ulaonna. Tarlumobi ma tu Debata Jahowa, taronjar do rohanta laho mamuji Ibana! Tingki taida tompaanNa, tarida ma Ibana pargogo na so hatudosan. Dilehon do anakNa laho manobus hita, na patuduhon holongNa na mansai balga. Tingki tajaha Psalmen 147, taboto ma na lomo do roha ni panurat psalmen mamuji Jahowa. Jala dijujui do na asing asa mamuji Debata raphon ibana. (Ps. 147:7, 12) Ndang taboto ise do na manurat Psalmen 147. Alai di tingki hamumulak ni bangso Israel tu Jerusalem do ra ibana mangolu, dungkon dipalua Jahowa nasida sian Babel. (Ps. 147:2) Jala dipuji panurat psalmen do Jahowa ala diloas muse nasida manomba Ibana di hutanasida. Boasa hita boi dohot mandok “Halleluya!” manang puji ma Jahowa?​—Ps. 147:1. w17.07 15-16 ¶1-3

Diboto Jesus, godang do siseanna mangadopi hasusaan dos songon na masa tu siramoti arta i. Nang pe ndang dipatorang Jesus boasa didok ibana hamoraon i “na geduk”, tangkas do dipaboa di Bibel ndang sangkap ni Debata sistem partiga-tigaan sisaonari on. Umpamana, tingki di porlak Eden ndang martuhor jala buas do Jahowa mangalehon lobi sian na dihaporluhon si Adam dohot si Hawa. (1 Mus. 2:15, 16) Dung i, tingki dilehon Debata tondi parbadia tu angka na miniahan, “rap nampunasa do nasida di sude angka arta na adong”. (Ul. 4:32, Bibel siganup ari) Didok panurirang Jesaya, ro nama tingkina sude jolma mangkilala las ni roha ala dapotan na denggan sian tano on. (Jes. 25:6-9; 65:21, 22) Alai andorang so ro dope ari i, ingkon marbisuk do sisean ni Jesus. Ingkon mansari do nasida, alai huhut palashon roha ni Debata.​—Luk. 16:8. w17.07 4 ¶4-6

Buku Job, i ma sada sian angka buku di Bibel na parjolo disurat. Didok Sibolis, molo borat sitaonon ni si Job, tontu ndang jangkononna be Debata. Dipangido Sibolis do asa Debata na mangunjuni si Job. Alai, ndang olo Jahowa mangulahon i. Dipaloas do Sibolis mangunjuni si Job. Dung i, agoan arta dohot angka naposona ma si Job. Mate ma sampulu ianakhonna. Dibahen Sibolis ma hira na Debata na mangulahon on. (Job 1:13-19) Dung i, dibahen Sibolis ma si Job marsahit na posi na dihagigihon halak. (Job 2:7) Na mambahen si Job lam susa, i ma hata ni tungganeboru dohot tolu donganna na mambahen hansit rohana jala marmetmet ni roha. (Job 2:9; 3:11; 16:2) Tutu do hata ni Sibolis i? Ndang. Nang pe borat sitaonon ni si Job, marhaposan tu Jahowa do ibana.​—Job 27:5. w17.06 17 ¶9-10

Saonari, dilehon Jahowa do tanggung jawab tu tungganedoli asa mangalehon mangan keluargana. Marsitutu do nasida mangulahon on. Alai, boi do karejo mambahen hita marsak. Gumodang do na mangalului karejo sian godang ni parkarejoan na adong. Marlumba do halak asa mandapot karejo. Godang na mandok ingkon karejo lembur do nasida, nang pe otik gajina. Saonari, godang do perusahaan naeng mambahen barang na denggan alai otik parkarejona. Alani i, piga-piga parkarejo gabe marsak, gale, jala marsahit. Ala godang na mabiar dipakaluar sian karejona, gabe olo ma nasida mangulahon manang aha pe na dipangido tongkena. Ala halak Kristen hita, ingkon tu Jahowa do tongtong marsihohot, ndang tu tongke manang tu ise pe. (Luk. 10:27) Tutu, karejonta boi manggohi na tahaporluhon jala mangurupi hita di ulaon marbarita. Alai molo ndang manat hita, boi do i manegai parale-aleonta tu Jahowa. w17.05 22-23 ¶5-7

Sipata, adong do na mangido tu hita asa mangurupi nasida mangajari ianakhonna. Molo adong na mangido asa hita na mangurupi ianakhonna marsiajar Bibel, taingot ma ndang dos tanggung jawabta songon natua-tuana. (Eps. 6:1-4) Sipata, olo do dipangido hita mangajari sahalak ianakhon na natua-tuana ndang Sitindangi. Molo dipangido hita mangulahon i, denggan do molo marsiajar hita di jabu ni nasida tingki disi natua-tuana manang tingki disi Sitindangi na matoras di partondion. Boi do muse hita marsiajar di inganan na ribur. Molo taulahon on, ndang gabe sala pamingkirion ni halak tu hita. Asing ni i, olo do ra dipangido natua-tuana asa nasida sandiri na mangajari ianakhonna. w17.06 8 ¶15-16

Adong do na so olo marsiajar bahasa dohot agama ni natua-tuana, ala didok rohana, ndang sarupa hasomalanna dohot natua-tuana. Rumingkot do di natua-tua manggohi na porlu di ianakhonna sian di nasida sandiri. (1 Kor. 10:24) Donganta na margoar si Samuel mandok, “Ahu dohot tungganeborungku mamingkirhon di bahasa dia ma ianakhonnami boi maju di partondion, jala martangiang do hami asa dilehon bisuk. . . . Tingki diida hami ndang adong laba na didapot nasida di huria na mamangke bahasanami, pintor pinda ma hami tu huria na mamangke bahasa na diantusi nasida. Rap do hami tu parpunguan jala rap marbarita. Ditogihon hami do muse dongan na disi asa rap mangan jala rap rekreasi. On mangurupi ianakhonnami lam mananda dongan sahaporseaon dohot Jahowa, na songon Ama jala Ale-ale di nasida. Didok rohanami, rumingkot do mangulahon sisongon on sian apala nasida na marsiajar bahasanami.” w17.05 12 ¶11-13

Satongkin nai, holan pamarentaon ni Jahowa ma na dihalomohon sude halak. Mansai las rohanta paimahon i! Sarupa ma pangkilalaanta tu si Debora dohot si Barak, na mandok, “Ingkon songon i ma nian hamamago ni saluhut angka musum, ale Jahowa! Alai anggo jolma, angka na mangkaholongi Ho, ingkon marsinondang do songon habibinsar ni mata ni ari di hagogoanna.” (Pangh. 5:31) Masa ma on tingki diripashon Jahowa portibi na jahat on. Di Armagedon, ndang dihaporluhon Jahowa pangurupion ni jolma laho manaluhon musu. Alai, tongtong do hita “jongjong disi, huhut paida-idahon tua sibahenon ni Jahowa”. (2 Kron. 20:17) Andorang so i, barani jala marlas ni roha ma mangihuthon pamarentaon ni Jahowa. Jahowa do na dipuji si Debora dohot si Barak tingki didok nasida, “Pinuji ma Jahowa, ala girgir roha ni bangso i sumeahon dirina.” (Pangh. 5:1, 2) Suang songon i, molo girgir rohanta mangulahon manang aha pe laho manomba Jahowa, gabe taronjar do roha ni na asing laho mamuji Jahowa! w17.04 32 ¶17-18

Adong do parsiajaran na asing sian si Josep. Nang pe 13 taon mangkilala pangkorhon ni parniulaon na so tigor, tongtong do si Josep marhaposan tu Jahowa. (1 Mus. 45:5-8) Ndang hea disalahon ibana Jahowa. Tutu do, ndang dihalupahon si Josep sitaononna i, alai ndang gabe jut rohana. Na rumingkot, ndang dipaloas ibana hahurangan dohot hasalaan ni na asing mambahen ibana dao sian Jahowa. Ala marsihohot tu Jahowa, boi ma diida si Josep songon dia Jahowa patuduhon hatigoranNa jala mamasu-masu ibana dohot keluargana. Tongtong ma taingot jala tajaga parale-aleonta tu Jahowa. Unang ma tapaloas hasalaan dohot hahurangan ni donganta mambahen hita dao sian Jahowa dohot huria. (Rom 8:38, 39) Molo adong mambahen na so tigor tu hita di huria, tatiru ma si Josep jala sai jonok ma tu Jahowa. Tiru ma songon dia pangkilalaan ni Jahowa taringot on. Molo nunga marsitutu hita pasaehon parsoalan i mangihuthon prinsip ni Bibel, tapasahat ma i tu Jahowa. Pos ma rohanta, padengganonNa do angka parsoalan di tingki naung ditontuhon. w17.04 18 ¶12; 19-20 ¶15-16

Diboan ma si Samuel tu Sintua ni Malim Eli di tabernakel di Silo, jala didok, “Dakdanak on do na hupangido uju i, gabe dibasa-basahon Jahowa tu ahu na pinangido ni rohangku sian Ibana. Dibahen i ahu pe pasahatonku ma ibana tu Jahowa saleleng mangolu ibana; ai na pinangido di Jahowa do ibana.” (1 Sam. 1:24-28) Dungkon i, di tabernakel ma si Samuel tading. Didok di Bibel, “magodang di adopan ni Jahowa do ianggo si Samuel”. (1 Sam. 2:21) Tontu ndang mura dihilala si Hanna manggohi janjina i. Alana, ndang boi ibana rap dohot anakna ganup ari, jala ndang boi diida ibana si Samuel magodang. Nang pe songon i, digohi si Hanna do janjina tu Jahowa. Rade do ibana mangulahon manang aha pe laho manggohi janjina tu Debata.​—1 Sam. 2:1, 2; Ps. 61:2, 6, 9. w17.04 5 ¶7-8

Didok si Paulus, ro ma “hasusaan di angka tingki parpudi”. Didok muse, “Lam tu jahatna ma angka parjahat dohot panipu.” (2 Tim. 3:2-5, 13, Bibel siganup ari) Tutu do on masa saonari? Godang do na mangkilala pangkorhon ni hajahaton, umpamana dileai, dipasiding, jala dipungkuli. Piga-piga halak tangkas do patuduhon hajahaton na niulahonna. Adong do songon na burju idaon, hape sasintongna jahat do nasida. Nang pe hajahaton i ndang pintor tu hita dibahen, alai marpangkorhon do i tu hita. Lungun do roha tingki mamboto taringot parjahat na kejam tu dakdanak, tu na matua, dohot tu halak na gale. Ulaon ni parjahat on mambahen nasida songon binatang manang Sibolis. (Jak. 3:15) Alai, las do rohanta ala adong pangkirimon sian Jahowa. w17.04 10 ¶4