Desember

Lomo do roha ni angka halak na disurathon di Bibel manogihon angka halak asa mangan di jabuna. On patuduhon na lomo do roha ni nasida asa lam solhot dohot dongan na asing. (1 Mus. 18:1-8; Pangh. 13:15; Luk. 24:28-30) Ise do na tarlumobi tatamue? I ma angka dongan sahaporseaon. Di tingkinta saonari, ingkon masiurupan do hita dohot angka donganta. Tingki ro pengawas wilayah tu hurianta, dihaporluhon nasida do inganan asa manginap. Manang porlu do penginapan tu angka na mangihuthon singkola ni organisasi manang angka relawan pajongjongkon Bale Harajaon. Alai songon dia taringot angka dongan na so adong be jabuna alani hona mara? Tontu, porlu do inganan di nasida andorang so dipajongjong jabuna. Unang ma tapingkir holan angka na mora na boi mangurupi. Ra, nasida pe nunga jotjot mangurupi. Jadi, olo do hamu manjalo sasahalak laho manginap, nang pe ndang balga jabumuna? w18.03 16 ¶6; 17 ¶9

Aha do na boi mangurupi sasahalak naung tinggang asa “hehe” muse? Ndang boi alani hagogoon, alai ingkon diurupi tondi parbadia ni Debata do ibana. (Plp. 4:13) Parbue ni tondi tarmasuk ma pangarajaion diri. Molo martangiang hita, marsiajar jala mangarimangi isi ni Bibel, boi do i mangurupi hita asa lam mangarajai diri. Alai, songon dia molo maol tahilala marsiajar manang ndang pola lomo rohanta marsiajar? Unang gabe metmet rohanta. Diurupi Jahowa do hita asa “mauas” di hataNa. (1 Ptr. 2:2, Bibel siganup ari) Pangido ma pangurupion sian Jahowa, asa boi hamu mangarajai diri jala mangatur tingki laho marsiajar Bibel. Mulana, boi do hamu marsiajar Bibel holan satongkin. Lam leleng, lam mura ma jala lomo ma rohamu marsiajar. Gabe las ma rohamuna mangarimangi hata ni Debata.​—Ps. 77:13. w18.03 28 ¶5-6

Andorang so tardidi, porlu do parsiajar Bibel mangantusi hasintongan taringot Debata, sangkapNa tu jolma dohot tano on, jala aha do na diulahon Ibana laho paluahon jolma. (1 Tim. 2:3-6) Dung i, porlu ma nasida patoguhon haporseaonna, alana i do na mangurupi nasida asa mangoloi Debata jala ndang be mangulahon na sala. (Ul. 3:19) Ringkot do on, ala ndang olo Jahowa manjangkon panombaon ni sasahalak na tongtong mangulahon na dihasogohon rohaNa. (1 Kor. 6:9, 10) Alai, adong do muse na ringkot. Molo naeng talehon dirinta tu Jahowa, ingkon tongtong do hita ro tu parpunguan jala marbarita na uli dohot mangajari halak. (Ul. 1:8) I ma na ingkon parjolo diulahon sahalak parsiajar Bibel. Dung pe i, baru ma boi ibana mangalehon diri tu Jahowa marhite tangiang jala tardidi. w18.03 6-7 ¶12

Ala jonok do si Maria tu Debata, dipillit ma ibana gabe omak ni Jesus. Tajaha ma taringot aha na didok si Maria tu si Sakaria dohot si Elisabet. (Luk. 1:46-55) Sian hatana i, tarida do dihaholongi ibana Hata ni Debata jala tangkas do diantusi. (1 Mus. 30:13; 1 Sam. 2:1-10; Mal. 3:12) Alani i, nang pe nunga marhasohotan ibana dohot si Josep ndang mangulahon seks nasida sahat tu tubu Jesus. Alana, rumingkot do di nasida mangulahon sangkap ni Debata, sian apala giotgiot ni nasida sandiri. (Mat. 1:25) Jala diparrohahon ibana do aha na masa tu Jesus sahat tu na magodang. Jala ditangihon ibana do na dihatahon Jesus. Tangkas ma lomo do rohana mamboto janji ni Debata taringot Messias. Olo do hamu maniru si Maria? Jala olo do hamu mangulahon na dipangido Debata tu hamu? w18.02 19-20 ¶11

Songon dia hita boi maniru haporseaon dohot unduk ni roha ni si Job? Manang songon dia pe situasinta, tongtong ma Jahowa tajumolohon di ngolunta. Porsea jala unduk ma hita tu Ibana sian nasa rohanta. Alana, gumodang do na boi paposhon rohanta sian si Job. Saonari godang do taboto taringot Sibolis dohot cara na dipangke Ibana. (2 Kor. 2:11) Di Bibel, tarlumobi di buku Job, boi taboto boasa dipaloas Debata hita marsitaonon. Sian surirang ni si Daniel, gabe taboto ma taringot Harajaon ni Debata na diparenta Jesus Kristus. (Dan. 7:13, 14) Jala taboto do Harajaon i ma na laho mamarenta di tano on, jala salpuhononNa ma sude sitaononta. Sian pengalaman ni si Job, taboto ma ingkon burju do hita tu angka donganta na mangadopi sitaonon. Songon si Job, hea do ra nasida mandok hata oto. (Pjm. 7:7) Alai, unang ma tauhumi nasida manang tadok nasida marsala. Gariada, ingkon taantusi do pangkilalaan ni nasida. Molo taulahon i, na maniru holong dohot asi ni roha ni Debata do hita.​—Ps. 103:8. w18.02 7 ¶16; 8 ¶19-20

Piga-piga halak boi do gabe ginjang rohana ala uli manang bagak, ditanda godang halak, jago marmusik, gogo, manang ala dipuji angka halak. Sudena i adong do di diri ni si Daud, alai tongtong do ibana marserep ni roha. Sian dia taboto i? Tingki dibunu ibana si Goliat, dipangido Raja Saul ma asa gabe helana ibana. Alai didok si Daud, “Tung ise ma ahu . . . , umbahen ingkon gabe hela ni rajai ahu?” (1 Sam. 18:18) Hita pe boi do marserep ni roha songon si Daud. Porlu taboto, molo Jahowa sandiri serep do rohaNa nang pe Ibana Natumimbul sian sasudena. Boi do taulahon songon na didok ayat on, “Solukkon hamu ma parasirohaon situtu, habasaron, haserepon, lambok dohot lambas ni roha!” (Kol. 3:12) Ala taboto do, molo holong i mambahen sasahalak ndang gabe ginjang roha. (1 Kor. 13:4) Molo serep rohanta, gabe taronjar do roha ni halak laho mananda Jahowa. w18.01 28-29 ¶6-7

Ingkon talehon do sumbangan tu marragam ulaon. (Ul. 4:34, 35; 1 Kor. 16:2) Ra, hurianta laho pajongjongkon Bale na baru. Jala boi do hita mangurupi angka biaya tu ulaon kebaktian. Sumbanganta pe boi do mangurupi angka misionaris, perintis istimewa, sintua kaliling, dohot na di kantor pusat manang kantor cabang di liat portibi on. Manang, mangurupi angka donganta di inganan na hona mara. Di tingki parpudi on, sude do hita boi mangalehon sumbangan tu ulaon organisasi ni Jahowa. Angka na mangalehon sumbangan i, godang do na so dipaboa goarna. Ndang olo tapaboa tu na asing sadia godang hepeng na tapamasuk tu kotak sumbangan manang na talehon marhite jw.org. Alai olo do tahilala paotikhu na talehon. Sasintongna, umgodang do na mangalehon sumbangan na otik sian na mangalehon sumbangan na balga. w18.01 17-18 ¶10-11

Ingkon tardidi do ganup halak Kristen asa boi mandapot haluaon jala mangolu salelengna. (Mat. 28:19, 20) Marjanji do hamu mangkaholongi jala mangkaringkothon lomo ni rohaNa. Alana, sasahalak na so olo ditogu-togu Jahowa, i ma na gabe bagian sian portibi na nirajaan ni Sibolis. Lomo do roha ni Sibolis asa maup hamu. Sasintongna, las situtu do roha ni Sibolis molo mago pangkirimonmuna ala mangihuthon ibana jala mangalo tu Jahowa. Pingkirhon ma songon dia Jahowa naung mamasu-masu ho ala marjanji tu Ibana jala tardidi. Ala dipillit ho manomba Jahowa, pos do roham mandok, “Jahowa do donganku, ndang mabiar ahu, tung aha ma tagamon bahenon ni jolma tu ahu?” (Ps. 118:6) Ala didongani Jahowa do hita jala las rohaNa mangida hita, tontu hasangapon na umbalga do i. w17.12 21-22 ¶1-3

Sipata, boi do hansit rohanta alani hata manang pambahenan ni donganta. Manang hita pe boi do mambahen hansit roha ni dongan. Nang pe maol mangadopi parsoalan sisongon i, boi do tongtong tapatudu na marsihohot hita tu Jahowa. Songon dia carana? Tongtong ma hita rap saulaon dohot angka dongan. Jala tatiru ma Jahowa, na mangkaholongi nasida nang pe mardosa. Dipaloas Jahowa do angka sitaonon na masa tu naposoNa. Taingot ma si Josep. Ala mangiburu hahana tu ibana, digadis ma ibana laho gabe hatoban. Laos diboan ma ibana tu Misir. (1 Mus. 37:28) Tangkas do diboto Jahowa aha na diadopi si Josep. Jala lungun do rohaNa mangida sitaonon ni ale-aleNa on. Alai, dipaloas Jahowa dope i masa tu ibana. Dung i, ditudu muse ibana laho memperkosa tungganeboru ni si Potifar. Ujungna, gabe dipamasuk ma ibana tu penjara. Nang pe dipaloas Jahowa masa i sude, alai ndang na hea ditadingkon Jahowa ibana. Sian dia taboto i? Didok Bibel, “Didongani Jahowa ibana, jala ditumpak manjadi na niulana i.”​—1 Mus. 39:21-23. w18.01 6-7 ¶12-14

Aha do na dihaporseai hamu? Tontu, dipaboa hamu do taringot Jahowa, i ma na manompa jala na mangalehon hangoluan tu hita. Dipaboa hamu do muse taringot Jesus, na mate jala manobus hita. Manang, dipaboa hamu do taringot Paradeiso, jala disi ma naposo ni Debata mangolu saleleng-lelengna. Alai, olo do hamu paboahon taringot haheheon, na mambahen las rohamuna? Nang pe hirim rohanta boi malua sian haporsuhon bolon jala boi mangolu saleleng-lelengna, ringkot do molo taingot ari haheheon. Mansai ringkot ari haheheon i. Molo ndang dipahehe Jesus, ndang boi ma ibana gabe Raja di surgo, jala ndang adong lapatanna barita na uli na tapasahat. (1 Kor. 15:12-19) Alai, porsea do hita molo Jesus nunga dipahehe. Tongtong do hita porsea molo Debata boi pahehehon angka halak naung mate.​—Mrk. 12:18; Ul. 4:2, 3; 17:32; 23:6-8. w17.12 9-10 ¶1-2

Ndang marasi ni roha halak Parise tingki manguhumi. Holan hasalaan ni sasahalak do na diida nasida. Ndang dipartimbangkon nasida pangalaho ni sasahalak tingki manguhumi. Umpamana, tingki ro Jesus tu jabu ni si Mateus, disungkun halak Parise ma siseanna, ‘Boasa rap mangan Gurumuna i dohot angka sijalo pajak dohot angka halak pardosa?’ Dialusi Jesus ma, “Ndang halak na [sehat] mangalului dokter, alai halak na marsahit do. Mulak ma hamu, parsiajari hamu ma hata ni buku na badia i, na mandok: ‘Asi ni roha do na Huhalomohon, ndang pelean. Ai ndang na laho manjou halak partigor ahu umbahen na ro, alai na laho manjou halak pardosa do.’” (Mat. 9:9-13, Bibel siganup ari) Na gabe diparsoada Jesus do hasalaan ni angka pardosa i? Ndang. Dipangido roha ni Jesus do asa marhamubaon nasida. Jala i do na sai dibaritahon ibana. (Mat. 4:17) Didok roha ni Jesus, adong do ‘sijalo pajak dohot angka halak pardosa’ na olo muba. Ndang holan na laho mangan sambing nasida ro tu jabu ni si Mateus, alai ala mangihuthon Jesus do. (Mrk. 2:15) Imbar do halak Parise sian Jesus. w17.11 15 ¶2; 19 ¶15

Las do rohanta rap dohot angka dongan di huria. Rap marsiajar Bibel, jala masipatoguan di parpunguan. On boi mangurupi hita asa tongtong mangingot upa i. Alai sipata, olo do ra marsalisi hita dohot angka dongan. Molo ndang pintor mardame, boi do gabe jut rohanta alani i. (1 Ptr. 3:8, 9) Unang ma alani jut ni rohanta, gabe ndang dapotta upa i. Dipaboa si Paulus do aha na porlu ulahonon ni halak Kristen. Ibana mandok, ‘Hamu angka naung pinillit ni Debata, angka na badia jala hinaholongan, solukkon hamu ma parasirohaon situtu, haburjuon, haserepon, lambok dohot lambas ni roha. Masipauneunean jala masisesaan dosa ma hamu, jumpa marpangkurangi na sada dompak donganna; songon panesa ni [Jahowa] di hamu, songon i ma nang hamu.’​—Kol. 3:12, 13. w17.11 29 ¶7-8

Molo adong halak Israel na so sengaja mambahen sasahalak mate, ingkon lari do ibana tu huta parlinggoman. Jala ingkon ‘mangalualu’ ibana tu angka sintua di harbangan ni huta i. Jangkonon ni angka sintua do ibana. Dung i, boanon ni angka sintua i ma ibana tu angka sintua ni huta i. (4 Mus. 35:24, 25) Molo didok nasida, tutu na so sian sangkapna do ibana mambahen sasahalak mate, dipaulak ma ibana tu huta parlinggoman. Boasa ingkon mangalualu na mambunu i tu angka sintua? Alana, ingkon jagaon ni angka sintua do asa badia bangso i. Jala ingkon urupan ni angka sintua do asa dapotan asi ni roha na mambunu i. Sahalak pakar Alkitab paboahon, molo ndang mangalualu na mambunu i tu angka sintua, boi do ibana dipamate. . . . Ai ibana do na so mangulahon parenta ni Debata. Molo ndang laho ibana tu huta parlinggoman, marhak do sisolhot ni na tarbunu i mambunu ibana. w17.11 11 ¶6-7

Saonari pe, dipangke Jahowa do suru-suruanNa laho mangalinggomi jala patoguhon naposoNa. (Mal. 3:6; Heb. 1:7) Di taon 1919, dipalua ma naposo ni Jahowa sian pangkorhon ni Babel na Balga. Marsitutu do angka musu laho mangambati organisasi ni Jahowa asa unang lam balga. (Pgk. 18:4) Alai ndang marhasil nasida. Dilinggomi suru-suruan do organisasi ni Jahowa. Alani i, unang ma mabiar hita, ndang laho tabanon ni agama palsu be hita. (Ps. 34:8) Las ma rohanta jala ringgas ma hita mangulahon panombaonta tu Jahowa. Linggoman ni tentara ni Jahowa do hita. Di haporsuhon bolon, linggoman ni angka suru-suruan ma naposo ni Jahowa jala ropuhanNa ma angka na mangalo tu pamarentaon ni Jahowa. (2 Tes. 1:7, 8) I ma ari na palongang roha! w17.10 23-24 ¶10-11

Hansit do tahilala molo adong keluarganta na dipecat manang papulikkon diri sian huria. Olo do hira na ditiham hansitna. Songon dia do hita asa boi sabar manaon i? Ringkot do asa tongtong marhobas tu Jahowa. Tingki masa sisongon i, ringkot do tapatogu haporseaonta. Jaha ma Bibel ganup ari, parade ma angka na hombar tu parpunguan, tongtong ma marbarita na uli, jala pangido ma gogo sian Jahowa. (Jud. 21) Alai songon dia do molo nunga diulahon hamu sudena i, alai tong dope marsak hamu? Unang ma mandele! Tongtong ma marhobas tu Jahowa asa moru arsakmuna. Boi do annon salpu arsakmuna i. Ingot ma na masa tu panurat Psalmen 73. Hea do marsak ibana ala ndang boi mangarajai pingkiranna. Alai ala tongtong manomba Jahowa, boi ma salpu arsakna i. (Ps. 73:16, 17) Hita pe boi do songon i. w17.10 14 ¶17-18

Molo taparrohahon hata ni Sibolis tu si Hawa di porlak Eden, hira na holong do rohana tu nasida, alai gabus do i. (1 Mus. 3:4, 5) Tingki gabe raja si Daud, marale-ale do ibana tu si Ahitopel. Alai, ala mangkaringkothon diri, diulahon si Ahitopel do na jahat tu ibana. On patuduhon ndang ale-ale na sasintongna si Ahitopel. (2 Sam. 15:31) Saonari, dipangke halak na murtad do ‘hata na uli jala tabo di pinggol’ laho mamola-mola angka dongan di huria. (Rom 16:17, 18) Songon na dihaholongi nasida do angka dongan, hape na marpambuat do holongna. Jahat do halak molo ndang sian ias ni roha holongna. Alana dos do i songon panipu. Ra, boi do hita mangoto-otoi jolma, alai ndang boi taoto-otoi Jahowa. Jesus mandok, na laho diuhum do angka pangansi manang halak na munafik. (Mat. 24:51) Alani i, tasungkun ma dirinta, ‘Sian ias ni roha do holongku? Manang marpambuat do holongku? Jujur do ahu?’ w17.10 4-5 ¶6-8

Tingki tajahahon Bibel tu sasahalak, dos do i songon Jahowa na mangkatai tu nasida. Molo denggan tapillit ayat, umbalga do pangkorhon ni i tu halak na tajumpangi sian hatanta sandiri. (1 Tes. 2:13) Tingki marbarita, olo do hita jotjot manjahahon Bibel tu angka halak? Unang ma holan tajahahon sambing. Songon na masa di abad na parjolo, ndang godang halak mangantusi na tarsurat i. Alani i, tingki tajahahon Bibel, unang ma didok rohanta nunga diantusi parjabu na tajaha i. Alai taurupi ma nasida asa boi mangantusi. Carana? Jahahon ma muse hata manang kalimat na ringkot di ayat i. Dung i, patorang ma tu nasida. Molo taulahon on, boi ma Hata ni Debata hona tu roha dohot pingkiran ni nasida.​—Luk. 24:32. w17.09 23 ¶7-8

Dipangido Jahowa do asa marasi ni roha naposoNa tu sude halak. (Joh. 13:34, 35) Sada sian lapatan ni marasi ni roha, i ma “sapartinaonan”. Halak na marasi ni roha marsitutu laho mangurupi halak na mangadopi hasusaan. Alani i, sai taparrohahon ma angka halak jala rade ma hita mangurupi nasida. Boi do ra taurupi nasida mangulahon ulaon di jabu manang manuhor na porlu di nasida. Asi do rohanta tu halak na hona mara. Jala ditanda do Sitindangi Ni Jahowa ala rade mangurupi halak na hona mara. (1 Ptr. 2:17) Umpamana, songon na masa di Jepang taon 2011. Ro ma gempa bumi dohot tsunami disi. Gabe sega ma angka jabu dohot Bale Harajaon. Ro ma angka dongan sian kota dohot negara na asing, laho paulihon angka jabu dohot Bale Harajaon. Dipatogu do haporseaon ni donganta borua mangida i. Jala didok ibana ma, “Gabe huboto ma na disarihon Jahowa do hami. Masiurupan do sude angka dongan. Jala ditangiangkon angka dongan di liat portibi on do hami.” w17.09 12-13 ¶12-13

Boasa ingkon taorom dirinta? Adong dua alana. Na parjolo, ala godang do labana. Halak na boi mangorom diri, ummotik do parsoalanna, mura mardongan tu na asing, jala mura pasidingkon rimas dohot holso ni roha. Na paduahon, asa boi tongtong marale-ale tu Debata ingkon boi do taorom giot-giot na sala jala tatundalhon ela-ela. On ma na so diulahon si Adam dohot si Hawa. (1 Mus. 3:6) Songon nasida, godang do parsoalan ni halak na so boi mangorom diri. Diboto Jahowa do hita jolma na mardosa jala maol do hita mangorom diri. Alai lomo do rohaNa mangurupi hita asa boi mangorom diri sian giotgiot na sala.​—1 Raj. 8:46-50. w17.09 4 ¶3-4

Hea do ndang diloas rap marpungu halak kulit putih dohot kulit hitam di Afrika Selatan, jala marlangku do i tu Sitindangi Ni Jahowa disi. Alai di ari Minggu tanggal 18 Desember 2011, marpungu do lobi sian 78.000 Sitindangi Ni Jahowa laho manangihon acara na sumurung di stadion na umbalga di Johannesburg. Sian marragam suku di Afrika Selatan do nasida, na kulit hitam dohot kulit putih. Sada sian pengurus ni stadion i mandok, “On ma punguan na tung denggan na hea huida di stadion on. Rapi-rapi do nasida. Jala ias do dibahen nasida stadion on. Alai na dumenggan, marsada do hamu nang pe sian marragam bangso.” Tangkas do di ida angka halak, na sumurung do parsadaan ni angka dongan di liat portibi on. (1 Ptr. 5:9) Boasa hita imbar sian organisasi na asing? Ala marhite pangurupion sian Bibel dohot tondi parbadia, gabe boi ma hita paubahon diri sian angka ulaon na dihasogohon ni Jahowa. ‘Tatanggalhon jolma na buruk’ jala ‘tasolukhon na imbaru’.​—Kol. 3:9. w17.08 15-16 ¶2-3

Bibel paboahon, parbue ni tondi do lambas ni roha manang hasabaron. Ala jolma na mardosa do hita, maol do patuduhon hasabaron tingki masa sitaonon. Ingkon sian pangurupion ni Debata do asa boi hita patuduhon hasabaron. Molo sabar hita, na patuduhon holong tu Jahowa dohot tu angka dongan do hita. Alai, molo ndang sabar hita, lam ngali ma holongta tu angka dongan. (1 Kor. 13:4; Gal. 5:22) Aha do lapatan ni sabar? Sabar lapatanna, martahan di tingki masa sitaonon huhut patuduhon pangalaho na denggan. (Kol. 1:11; Jak. 1:3, 4) Sabar mangurupi hita marsihohot tu Jahowa, ndang soal aha pe na masa tu hita. Asing ni i, hasabaron mangurupi hita asa unang mambaloshon pambahenan ni halak na jungkat tu hita. Bibel paboahon, ingkon rade do hita patuduhon hasabaron. I ma parsiajaran na ringkot na tadapot sian Jakobus 5:7, 8. w17.08 4 ¶4

Satolop do ra hamu angka na poso mandok, andorang so mardalani, ingkon ditontuhon do dalan na dia na laho didalani. Suang songon i ma di hangoluan on, tingki poso ingkon dipillit do dia na laho diulahon. Alai unang mabiar hamu. Ingot ma na didok di ayat sadari on. Dijujui Jahowa do hamu asa marbisuk mamillit na laho ulahononmu di ari na naeng ro. (Pjm. 12:1; Mat. 6:20) Disarihon do hamu jala lomo do rohaNa asa marlas ni roha hamu. Tangkas do on taida, tabege jala tahilala sian angka tompaanNa. Diajari do hamu asa denggan parngoluonmu. Jadi, tingki adong na so manangihon podaNa, ndang lomo rohaNa. Jahowa mandok, “Na so huhalomohon dipillit hamu . . . ida ma, marlas ni roha do sogot anggo angka naposongku, alai anggo hamu ingkon tarurak [manang, maila] do. Ida ma, marolopolop sogot anggo angka naposongku sian sonang ni rohana.” (Jes. 65:12-14) Parohon sangap tu Jahowa do molo marbisuk hita mamillit na denggan di ngolunta.​—Poda 27:11. w17.07 21-22 ¶1-2

Ala diboto Jahowa do taringot angka bintang, tontu hamu pe ditanda Ibana do. Sai na diboto Ibana do manang didia pe hamu, pangkilalaanmu, dohot na porlu di hamu! Diboto Jahowa do aha na laho masa, jala boi do urupanNa hamu tingki marsitaonon. (Ps. 147:5) Ra didok rohamu borat do sitaonon na diadopi hamu jala ndang tolap hamu manaon i. Diboto Debata do sadia godang na boi tataon ai “diingot do orbuk hita”. (Ps. 103:14) Ala jolma na mardosa dope hita, olo do jotjot mulak-ulak taulahon sada hasalaan, gabe marmetmet ni roha ma hita alani i. Olo do manolsoli hita alani pangkataion, giot-giot na sala, manang roha na mangiburu. Ndang hea dihilala Jahowa sisongon i. Alai, boi do diantusi Ibana pangkilalaanta. (Jes. 40:28) Hea do dihilala hamu pangurupion ni Jahowa tingki ro pangunjunan?​—Jes. 41:10, 13. w17.07 16-17 ¶6-8

Dilehon donganta na asing do tano dohot bangunanna di Sri Lanka gabe inganan parpunguan dohot kebaktian, jala gabe inganan ni angka dongan na dohot tu dinas sepenuh waktu. Sasintongna, rugi do ibana di parhepengon. Alai, gabe pangurupion na balga do on di angka parbarita na disi, tarlumobi angka dongan na pogos. Di inganan na mangorai ulaonta marbarita, dilehon angka donganta do jabuna gabe Bale Harajaon. On mambahen angka perintis dohot dongan na so marhepeng boi mandapot inganan parpunguan na so margarar. Sahalak donganta borua na ringgas mangalehon sumbangan tu ulaon Harajaon paboahon, gabe adong do na muba sian parangena. Ibana mandok, “Lam marbasa ni roha ahu, lam burju ma ahu maradophon halak na asing. Gabe lam sabar, rade manalpuhon hasalaan, rade manjalo poda, jala ndang mura muruk.” w17.07 5 ¶9-10

Autsugari pe diboto si Job boasa marsitaonon ibana, tontu sungkun-sungkun do rohana boasa dipaloas Debata sitaonon i masa tu dirina. Molo ganggu roha ni si Job, ingotonna ma na nidok ni Jahowa. On ma na mangapuli rohana jala mangurupi ibana marpangantusion na sintong. (Ps. 94:19) Molo tarimangi na masa tu si Job, on mangurupi hita paubahon pamingkirionta jala mangapuli rohanta. Buku Job, i ma hata ni Jahowa “bahen poda di hita . . . asa marpangkirimon hita binahen ni habengeton dohot pangapulon na di bagasan Surat i”. (Rom 15:4) On mangajari hita asa unang paholsohu alani sitaononta. Alana, holso ni roha boi mambahen hita ndang mamingkirhon taringot hak ni Jahowa laho mamarenta. Songon si Job, marpihak ma hita tu Jahowa marhite marsihohot tu Ibana nang pe susa di parngoluon. w17.06 17 ¶9; 18-19 ¶13-14

Diboto Jesus, ringkot do siseanna asa maradi. Umpamana ala nunga loja marbarita na uli, didok Jesus do tu nasida hata songon na didok di ayat sadari on. Rekreasi dohot hiburan mangurupi hita laho pasonang roha. Alai, ingkon manat do asa unang rumingkot di hita laho pasonangkon dirinta. Di abad na parjolo, godang do na marpingkir songon on, “Mangan minum ma hita, ai mate do hita marsogot.” (1 Kor. 15:32) Pamingkirion sisongon on pe adong do saonari. Alani i, sadia godang do tingki na boi talehon tu hiburan? Sada cara na boi taulahon, i ma mangalehon tingkinta saleleng saminggu jala manurat piga jom do taulahon ulaon partondion. Dung i, tasurat ma muse piga jom do talehon tingkinta di saminggu i tu hiburan, songon marolahraga, manonton TV, manang margame. Porlu do tapadenggan caranta mamangke tingki?​—Eps. 5:15, 16. w17.05 24-25 ¶11-13

Di tudosan ni Jesus, sahalak partiga-tiga i mandapot mutiha na arga. Digadis ibana ma sude barangna asa boi manuhor i. Boi do dapot rohamu sadia arga mutiha i di ibana? Hasintongan taringot Harajaon ni Debata dos songon mutiha na arga. Molo tahaholongi Harajaon ni Debata songon baoa na mangkalomohon mutiha i, tontu taulahon do manang aha pe asa boi gabe rayat ni Harajaon i. (Mrk. 10:28-30) Umpamana si Sakeus, na mamora ala mangkorus hepeng ni halak. (Luk. 19:1-9) Sada tingki, dibege si Sakeus ma Jesus paboahon taringot Harajaon ni Debata. Las hian rohana mambege i jala lomo rohana marhamubaon. Didok ibana, “Tuhan, satonga ni angka artangki ma hulehon tu angka na pogos; jala ia adong na huangati, siopat lompit ma hupaulak.” Dipaulak si Sakeus ma sude hepeng na dihorus ibana jala ndang diulahon be i. w17.06 10 ¶3-5

Halak na dipillit natua-tua mangurupi ianakhonna, ingkon boi patoguhon ianakhonna jala mangurupi patuduhon pangargaion tu natua-tuana. Ingkon angka na denggan do na dipaboa taringot natua-tuana, jala unang gabe nasida na martanggung jawab pagodang-godangkon ianakhon i. Asing ni i, ingkon dipasiding do ulaon na boi mambahen sala pamingkirion ni dongan di huria dohot halak na asing. (1 Ptr. 2:12) Nang pe dipangido natua-tua pangurupion sian na asing, alai tanggung jawab ni nasida do mangajarhon hasintongan tu ianakhon. Ingkon diparrohahon do songon dia pangurupion na dilehon tu ianakhonna. Hamu angka natua-tua, martangiang ma mangido pangurupion tu Jahowa, jala ulahon na dumenggan. (2 Kron. 15:7) Haringkothon ma parale-aleon ni ianakhonmu tu Jahowa, unang mangkaringkothon diri sandiri. Pos ma rohamu, boi do nasida gabe sisomba Jahowa. w17.05 14 ¶19-20

Adong dua baoa na patubu-tubu hata na so tutu taringot sahalak baoa. Alai, margabus do baoa na dua i. Gabe disalahon ma sahalak baoa i jala naeng dipamate. Rimangi ma songon dia pangkilalaan ni halak na mangkaholongi hatigoran tingki mangida baoa i dohot anakna didangguri sampe mate! On ma na masa tu si Nabot, naposo ni Jahowa di tingki ni Raja Ahab mamarenta di Israel. (1 Raj. 21:11-13; 2 Raj. 9:26) Didok si Ahab ma asa digadis si Nabot porlak anggurna i. Lehononna do muse porlak anggur na dumenggan tu si Nabot. Alai, ndang olo si Nabot. Boasa? Alana, di Patik ni Jahowa, ndang boi halak Israel manggadis tano tading-tadingan. (3 Mus. 25:23; 4 Mus. 36:7) Taboto ma, unduk do si Nabot tu Jahowa. w17.04 21 ¶1; 22 ¶4

Ise do na tongtong mangolu dung diripashon angka parjahat? Marjanji do Jahowa, “Sai na teanon ni angka parlambohi do sogot tano i, jala hahilashononna hinadeak ni hadameon.” Di psalmen i, tajaha muse, “Teanon ni angka partigor i do sogot tano i, jala tongtong do nasida maringanan disi.” (Ps. 37:11, 29) Ise do “parlambohi” dohot “partigor” i? Parlambohi, i ma halak na unduk jala marsiajar tu Jahowa. Partigor i, i ma na sai mangulahon na nidok ni Debata. Saonari, gumodang do parjahat sian partigor. Alai, holan partigor dohot na lambok roha do na tading di tano na imbaru, jala dibahen nasida ma tano on gabe paradeiso! w17.04 11-12 ¶5-6

“Holong ni roha ni Debata” mangonjar rohanta asa mangkaholongi donganta, tarlumobi dongan na susa. (1 Joh. 3:17, 18) Umpamana, tingki halak Kristen abad na parjolo na tading di Judea mangkaporluhon sipanganon ala masa haraparon, adong do pangurupion sian huria. (Ul. 11:28, 29) Dijujui si Paulus dohot si Petrus do halak Kristen asa rade manamue na asing. (Rom 12:13; 1 Ptr. 4:9) Dijujui do halak Kristen asa manjangkon dongan na ro sian luat na asing. Hita pe, ingkon burju do tu donganta na susa parngoluonna manang na dianiaya alani haporseaon! Baru-baru on, marribu Sitindangi Ni Jahowa ingkon manadingkon huta ni nasida alani porang dohot penganiayaan di Ukraina timur. Adong do sian nasida na tarbunu. Alai, godang donganta i dijangkon di jabu ni dongan sahaporseaon di inganan na asing di Ukraina dohot di Rusia. Di dua inganan i, ndang olo donganta parsidohot tu politik, alana “ndang sian portibi on” nasida jala tongtong marhiras ni roha “mamaritahon hata i”.​—Joh. 15:19; Ul. 8:4. w17.05 4-5 ¶6-7