November

Mangarajai diri lapatanna, i ma pasingothon dirinta asa lam denggan di parniulaon dohot di pingkiranta. Disi tubu hita, ndang pintor boi hita mangarajai diri, ingkon taparsiajari do i. Molo sabar natua-tua mangalatik ianakhonna “di bagasan ajar dohot poda ni Tuhan i”, on mangurupi ianakhonna asa boi mangarajai diri jala marbisuk. (Eps. 6:4) Suang songon i ma halak na mananda Jahowa tingki dung magodang. Ra, nang pe nasida nunga mangarajai dirina, alai ndang dope nasida gabe halak Kristen na marbisuk. Alai, molo dung disolukkon nasida “jolma na imbaru” jala marsitutu laho maniru Kristus, boi ma nasida gabe halak Kristen na marbisuk. (Eps 4:23, 24) Mangarajai diri ma na umringkot taulahon asa boi gabe jolma na imbaru. w18.03 28 ¶3-4

Digokkon Jahowa do sude hita asa ro tu parpunguan. Lomo do rohanta molo angka na ro tu parpunguan boi marlas ni roha ala tajangkon, tarlumobi angka halak na parjolo sahali ro. (Rom 15:7) Sasintongna Jahowa do na manamue nasida, jadi denggan ma tajangkon nasida, ndang soal manang songon dia cara ni nasida marpangkean. (Jak. 2:1-4) Molo diida hamu sahalak na baru ro hundul sahalakna, olo do hamu rap hundul di lambungna? Tontu, gabe las do rohana molo taurupi nasida mangihuthon acara di parpunguan i, dohot mangurupi mangalului ayat na dijahahon. On ma cara na dumenggan laho manamue. Ra, adong do donganta sian huria na asing, manang pengawas wilayah, manang wakil ni kantor cabang na marjamita tu hurianta. Songon dia do caranta manamue angka donganta on? (3 Joh. 5-8) Carana, tatogihon ma nasida asa rap mangan di jabunta. w18.03 16 ¶5, 7

Rimangi ma taringot si Saul. Halak Jahudi do ibana. Di tingki i ndang olo be Jahowa manjangkon halak Jahudi ala ndang unduk nasida tu Ibana. Alai porsea do si Saul na tongtong halak Jahudi boi manomba Debata. Asing ni i, ndang lomo rohana mangida halak Kristen jala diorai ibana do nasida. Di sada tingki, mangkatai ma Jesus sian surgo tu si Saul. Aha do na diulahon si Saul? Las do rohana manjangkon pangurupion sian halak Kristen na margoar si Ananias. Bibel mandok, “Dung i hehe ma ibana gabe tardidi.” (Ul. 9:17, 18; Gal. 1:14) Di pudian ni ari gabe ditanda ma ibana sahalak Apostel na margoar si Paulus. Taingot ma tingki diboto ibana na dipangke Debata do Jesus laho mangulahon sangkapNa, pintor olo do ibana tardidi. (Ul. 22:12-16) Dos songon i ma pangkilalaan ni angka parsiajar Bibel saonari, na poso nang na matua. w18.03 5-6 ¶9-11

Dos songon hita, godang do parsoalan na diadopi si Jakkob. Si Esau abangna sandiri naeng mambunu ibana. Jala dioto-otoi simatua dolina do ibana. Alai, tongtong do ibana marhaporseaon tu janji ni Jahowa na dipaboa tu ompungna si Abraham. Diboto ibana do dipangke Jahowa do keluargana laho manggohi janjiNa. Alani i, denggan do diurus ibana sude keluargana. (1 Mus. 28:10-15) Jala, ndang olo ibana mangihuthon pangalaho ni angka halak di humaliangna. (1 Kor. 2:14-16) Tongtong do diingot ibana janji ni Jahowa. Umpamana, tingki marsangkap si Esau laho mambunu ibana, martangiang do ibana tu Jahowa. Didok ma, “Ingot ma padanMu tu ahu, na bahenonmu na denggan tu ahu, na lehononmu di ahu pinompar na so habilangan toropna, songon torop ni pasir na di topi laut.” (1 Mus. 32:6-12, Bibel Siganup ari) Jadi togu do haporseaon ni si Jakkob tu Jahowa. Tarida do i sian parngoluonna. w18.02 18-19 ¶9-10

Hea do muba parngoluon ni si Job. Mulana, “sumangap do ibana tahe sian saluhut halak na di habinsaran”. (Job 1:3) Mamora hian do ibana. Ditanda jala diargai angka halak do ibana. (Job 29:7-16) Nang pe songon i, ndang gabe ginjang rohana manang gabe ndang mangkaporluhon pangurupion sian Debata. I do alana dijou Jahowa do ibana “naposongku”. Lam borat do sitaonon ni si Job dibahen Sibolis. Jala marsitutu do ibana asa dirimpu si Job sian Debata do pangunjunan i. (Job 1:13-21) Dung i, ro ma muse tolu dongan ni si Job jala mandok angka na so denggan taringot ibana. Didok do na diuhumi Debata do ibana alani hajahatonna. (Job 2:11; 22:1, 5-10) Alai nang pe songon i, tongtong do ibana marsihohot tu Jahowa. Dung salpu hasusaanna dilehon Jahowa do pasu-pasu umgodang sian na parjolo. Jala mangolu dope ibana 140 taon nai. (Jak. 5:11) Tongtong do si Job marsihohot saleleng ngoluna. w18.02 7 ¶16; 7-8 ¶18

Adong do piga-piga halak ndang puas molo holan dipuji. Songon pandapot ni sahalak pakar, “di bagas roha ni halak sisongon i lomo do nasida asa disomba”. Jala piga-piga halak na ginjang roha pe, ndang lomo rohana mangida halak na tong ginjang roha. Sogo do roha ni Jahowa mangida na ginjang roha. Didok do di Bibel, halak na “mata haginjangon” do na songon i. (Poda 6:16, 17) Sasintongna, ginjang ni roha boi mambahen sasahalak gabe dao sian Debata. (Ps. 10:4) Parange ni Sibolis do on. (1 Tim. 3:6) Alai, naposo ni Jahowa pe boi do gabe ginjang roha. Umpamana, saleleng martaon-taon burju do Raja Usia. Alai didok Bibel, “Dung marhuaso rajai, dipaginjang ma rohana mambahen hamagoanna; ai mardosa ibana dompak Jahowa.” Ditutung si Usia do daupa, hape sasintongna ndang tugasna i. Asing ni i, Raja Hiskia pe hea do gabe ginjang rohana.​—2 Kron. 26:16; 32:25, 26. w18.01 28 ¶4-5

Sian Bibel boi do taparsiajari songon dia naposo ni Jahowa mangalehon sumbangan laho mangurupi ulaonNa. (2 Mus. 35:5; 2 Raj. 12:5, 6; 1 Kron. 29:5-9) Asing ni i, tingki masa haraparon di Judea di abad na parjolo, diurupi halak Kristen do angka dongan na tading disi. (Ul. 11:27-30) Marragam do haroroan ni sumbangan. Asing ni i, piga-piga halak Kristen di abad na parjolo, manggadis angka hauma dohot jabu ni nasida. Jala hepeng na didapot dilehon tu angka apostel laho mangurupi angka dongan na mangkaporluhon. (Ul. 4:34, 35) Adong do muse halak Kristen na asing, na papulikkon hepengna laho mangalehon sumbangan tu ulaon na disuru ni Debata. Boi do na mora nang na pogos mangalehon sumbangan.​—Luk. 21:1-4. w18.01 17 ¶7, 9

Ringkot do taingot, nang pe malo hita, ndang godang na boi taulahon. Taboto, malo do apostel Paulus. Alai ndang boi ulahononna sude na dihalomohon rohana. Sada tingki martangiang ma ibana taringot pangkilalaanna. Dialusi Jahowa ma, “Ai di hagaleon do sun timbul hagogoon.” Diantusi ibana do boasa didok Jahowa songon i. Jala didok ibana ma, “Ai jumpa gale ahu, disi do ahu margogo.” (2 Kor. 12:7-10) Aha do lapatan ni i? Diboto si Paulus do, ndang boi sude diulahon ibana. Dihaporluhon ibana do pangurupion na mansai balga sian na asing. Tondi parbadia ni Debata boi mangalehon gogo tingki gale ibana. Gabe boi ma ibana mangulahon angka na so tolap hian diulahon ibana. Songon i ma nang hita. Tingki dilehon Jahowa tu hita tondi parbadia, gabe togu ma hita! w18.01 5 ¶8-9

Tingki didok ianakhonmuna naeng tardidi ibana, tangkas ma paboa tu ianakhonmuna, ingkon sai diingot nasida do janji naung dibahen nasida laho manomba Jahowa. Alai, lambok ma paboa jala di tingki na pas. Angka natua-tua, hamu do na martanggung jawab mangurupi ianakhonmuna “di bagasan ajar dohot poda ni Tuhan i”, alana i do na mambahen las roha ni Jahowa. (Eps. 6:4) Ingkon diajari hamu do ianakhonmuna mangantusi isi ni Bibel jala mangurupi nasida porsea tu parsiajaranna. Molo nunga togu haporseaon ni nasida, rade ma nasida manomba Jahowa jala mangalehon na dumenggan tu Ibana. Sai anggiat ma diurupi Jahowa hamu mangajari ianakhonmuna marhite Bibel dohot tondi parbadia, asa boi nasida marbisuk laho mandapot haluaon. w17.12 20 ¶17, 19

Tingki naeng marumur 100 taon jala naeng marujung ngolu, tontu hirim do roha ni si Daniel na laho dipahehe muse ibana. Sian dia do i taboto? Molo tajaha panutup ni buku Daniel marjanji do Debata tu ibana, didok do, “Laho ma ho, marroha pangkirimon di ujung, jala maradian ma ho.” Diboto si Daniel, na maradian do halak na mate. Jala ndang adong be “sibahenon, sipingkiran, parbinotoan dohot habisuhon di inganan ni na mate”, i ma inganan sitopotonna i. (Pjm. 9:10, Bibel siganup ari) Alai, ndang sahat disi ujungna. Dilehon Jahowa do tu ibana pangkirimon na sun denggan di ari na naeng ro. Marjanji do Debata tu si Daniel songon na didok di ayat sadari on. Ndang diboto si Daniel andigan i masa. Na diboto ibana laho mate nama ibana jala maradian. Alai tingki dibege ibana janji na mandok, “Asa hehe ho muse manjalo [upam],” diboto ibana ma, laho hehe do ibana di ari na naeng ro. Alai, leleng nai dope i masa. Songon na didok, “di ujung ni angka ari!” w17.12 8 ¶17-18

Ingkon ditiru sintua ni halak Israel do hatigoran ni Jahowa. Parjolo, ingkon dipareso nasida do sude hatorangan. Ingkon disulingkiti nasida do aha na mambahen sasahalak mambunu, jala songon dia pangalahona najolo. Jala ingkon botoon ni nasida do, alani sogo ni rohana do umbahen na marsangkap ibana laho mambunu manang ndang. Dung i, dibahen nasida ma haputusan. (4 Mus. 35:20-24) Molo adong dua saksi manang lobi na mangida na masa i, boi do diuhum na mambunu i. Dung tangkas diboto nasida sude hatorangan, ingkon diingot nasida do pangalaho ni na mambunu i. Ndang holan hasalaanna i na dipingkiri nasida. Porlu do panimbangion tingki mangida bukti. Alai na rumingkot, dihaporluhon nasida do tondi parbadia ni Jahowa, asa boi ditiru nasida bisuk ni Jahowa, asi ni rohaNa, dohot hatigoranNa.​—2 Mus. 34:6, 7. w17.11 18-19 ¶13-14

Tingki marsiajar Bibel, tadapot do piga-piga hasintongan na mansai arga. Mulana, taparsiajari do molo Jahowa i Sipanompa, jala marsangkap na denggan tu jolma. Taparsiajari do taringot Debata na manuru anakNa tu portibi on asa mate laho paluahon hita sian dosa dohot hamatean. Taparsiajari do muse taringot Harajaon ni Debata na laho manalpuhon sude sitaonon, asa marlas ni roha hita mangolu salelengna di tano on. (Joh. 3:16; Pgk. 4:11; 21:3, 4) Sipata, olo do adong na muba sian pangantusion taringot tu sada surirang manang ayat di Bibel. Molo masa sisongon i, ringkot do talehon tingki laho mamparsiajari jala mangarimangi i. (Ul. 17:11) Na porlu taboto, ndang holan imbar ni pangantusion na leleng dohot na imbaru, alai ingkon manat do tasulingkiti taringot tu pangantusion na imbaru. Molo taulahon songon i, nunga tabahen be pangantusion na imbaru tu panimpananta taringot hasintongan. w17.06 13 ¶15-16

Pasiding ma angka na boi mambahen hita ndang mangoloi Jahowa. Umpamana, tingki marhamlet, sian mulana ma hatai taringot dia na boi diulahon dohot na so boi diulahon, songon marsihaolan, masiummaan, manang padua-dua. (Poda 22:3) Asing ni i, marbisuk ma hamu tingki karejo tu luat na asing, manang karejo dohot na so dongan saripemuna. (Poda 2:10-12, 16) Tingki lungun rohamuna, pintor pangido ma pangurupion sian Jahowa dohot angka dongan sahaporseaon. Alana, di tingki sisongon i gabe sihol do rohanta asa diparrohahon. Jala, olo ma hita mardongan dohot manang ise pe. Parohon jea do on! Pasiding ma angka na boi mangambati hamu mandapot upa sian Jahowa.​—Ps. 34:19; Poda 13:20 w17.11 28 ¶4-5

Asi do roha ni Jahowa mida halak na mate tarbunu. Molo adong halak Israel na mambunu, diloas do ‘sisolhot ni na tarbunu’ i mambunu ibana. (4 Mus. 35:19) Alana, ingkon ngoluna sandiri do na gabe ganti ni na mate i. Ai diparentahon Jahowa do, “Unang tung ramuni hamu tano na niingananmuna i.” Molo ndang pintor dipamate na mambunu i, gabe ramun ma Tano Na Dijanjihon i. (4 Mus. 35:33, 34) Alai boha do molo adong halak Israel na so sengaja mambahen sasahalak mate? Nang pe ndang disengaja, ingkon martanggung jawab do ibana. (1 Mus. 9:5) Alai, boi do ibana dapotan asi ni roha ni Jahowa. Ingkon lari ma ibana tu huta parlinggoman, asa unang dipamate sisolhot ni na tarbunu i ibana. Molo diloas do ibana tading di huta i, ndang adong be na boi mambunu ibana. Alai, ingkon disi ma ibana sahat tu na mate sintua ni malim.​—4 Mus. 35:15, 28. w17.11 10 ¶3-5

Parrohahon ma na diulahon donganta borua di Australia. Alani hasintongan, sogo do roha ni simatuana doli tu nasida. Olo do simatuana muruk-muruk. Andorang so dijumpangi nasida simatuana, martangiang ma ibana dohot tungganedolina asa lambok mangalusi hata ni simatuana. Alai sogo do roha ni simatuana mangkata-hatai taringot agama. Alani i, diatur nasida ma sadia leleng nasida mangkata-hatai dohot simatuana. Olo do gabe manolsoli hita ala ndang boi pasonangkon roha ni nasida. Alai ingot ma, ingkon umbalga do holongta tu Jahowa sian tu keluarga. Tingki diida keluargamuna na marsihohot do hamu, diantusi nasida ma ringkot ni manomba Jahowa. Ndang boi tapaksa manang ise pe laho manjangkon hasintongan. Alai sian parniulaonta, diida nasida ma, mangoloi Jahowa parohon laba tu hita. Sasintongna, dilehon Jahowa dope tingki tu nasida asa mamillit manomba Ibana songon naung taulahon.​—Jes. 48:17, 18. w17.10 13 ¶15-16

Unang ma holan tadok, “Holong do rohangku tu ho.” Alai tapatudu ma i marhite pambahenanta. Umpamana, molo adong donganta na mangkaporluhon sipanganon manang pangkean, ndang sae molo holan tadok hata laho patoguhon nasida. Ingkon taurupi do nasida. (Jak. 2:15, 16) Suang songon i ma, molo holong rohanta tu Jahowa, ndang sae molo holan martangiang hita asa lam godang parbarita. Ingkon ringgas do hita marbarita. (Mat. 9:38) Apostel Johannes paboahon, “marhite-hite pambahenan dohot hasintongan” ma hita patuduhon holong. Lapatanna, “unang ma marpangansi” manang marpambuat holongta. (Rom 12:9; 2 Kor. 6:6) Adong do holong na dipatudu holan asa diida halak. Alai, songon i do holong na sasintongna? Sian ias ni rohana do i? Holong na sasintongna ndang dibahen-bahen. Ndang marlapatan holong sisongon i. w17.10 4 ¶5-6

Asa boi mangkorhon Hata ni Debata di parngoluonta, ingkon tajaha do Bibel ganup ari. Tutu, godang do ulaonta alai ingkon taharingkothon do manjaha Bibel. Unang ma alani tanggung jawab manang ulaon na asing, gabe sundat hita manjaha Bibel. (Eps. 5:15, 16) Boi do tajaha Bibel tingki manogot, arian, manang tingki borngin. Gabe dos ma pangkilalaanta songon panurat psalmen na mandok, “Mansai huhaholongi do patikmi, sai i do hupingkir-pingkiri manipat ari.” (Ps. 119:97) Alai, ndang boi molo holan manjaha Bibel sambing. Ingkon bagas do tapingkiri jala tarimangi aha naung tajaha. (Ps. 1:1-3) Dung i, boi ma taulahon angka poda ni Bibel di parngoluonta. Lomo do rohanta asa boi Bibel paubahon ngolunta lam tu dengganna. Dos do pangkorhon ni na manjaha Bibel tercetak manang manjaha Bibel elektronik. w17.09 22 ¶4-5

Ndang ingkon sai tapatudu asi ni roha ganup tingki. Umpamana songon na masa tu Raja Saul. Disuru Debata do si Saul asa mambunu sude halak Amalek, pahan-pahananna, dohot rajana i ma si Agag. Alana musu ni bangso ni Debata do nasida. Alai ndang dibunu si Saul Raja Agag ala asi rohana. Gabe sogo ma roha ni Jahowa mida ibana. (1 Sam. 15:3, 9, 15) Panguhum na tigor do Jahowa. Boi do diboto Ibana aha na di bagasan roha ni halak. Jadi Ibana do na umboto andigan ingkon patuduhon asi ni roha. (And. 2:17; Hes. 5:11) Satongkin nai, ripashonon ni Jahowa ma angka na so mangoloi Ibana. (2 Tes. 1:6-10) I ma tingkina ndang marasi ni roha be Ibana tu angka parjahat. Alai, patuduhononNa ma asi ni roha tu halak na tigor di tingki i. Tutu, ndang disuru hita gabe panguhum ni angka halak. Alai boi do taurupi nasida, asa boi mandapot hangoluan. w17.09 12 ¶10-12

Boi do Jahowa mangurupi hita asa mangorom diri. Alana tongtong do Jahowa boi mangorom diri. Alai ala jolma na mardosa do hita, ndang sai boi taorom dirinta. Godang do parsoalan na boi masa tu sasahalak molo ndang mangorom diri. Gabe sundat ma ibana mangulahon na ringkot manang gabe ndang ringgas be di parkarejoan manang di singkola. Gabe mangaleai donganna ma ibana, mabuk, mangulahon na jahat, marsirang, marutang, hatagian narkoba, masuk penjara, stres, marsahit ala mangulahon seks na so patut, jala mardenggan pamatang di na so dihalomohon. (Ps. 34:12-15) Saonari on, godang do halak na so mangorom diri. Ndang longang rohanta disi. Alana nunga disurirangkon di Bibel na laho masa do i di “angka tingki parpudi”.​—2 Tim. 3:1-3. w17.09 3 ¶1-2

Molo adong “dame ni Debata” di hita, ndang mabiar jala ndang holsoan be hita. Diramoti Jahowa do hita jala lomo do rohaNa asa marhasil hita. (1 Ptr. 5:10) Gabe ndang marsak be hita jala ndang marmetmet ni roha. Masa nama haporsuhon bolon. (Mat. 24:21, 22) Ndang tangkas taboto aha na masa tu hita ganup marsada-sada. Alai, unang ma pola paholsohu hita. Nang pe ndang taboto aha na laho ulahonon ni Jahowa, alai tatanda do Debatanta. Taboto do aha naung diulahon Ibana tu angka naposoNa najolo. Aha pe na laho masa, na laho pasauton ni Jahowa do sangkapNa. Jala boi do pasautonNa i marhite cara na so panagamanta! Alani i, tingki adong na diulahon Jahowa tu hita, boi ma tahilala “dame ni Debata na sumurung sian saluhut roha” marhite cara na baru. w17.08 14 ¶16-17

Hea do panurirang Jesaya dohot Habakuk mandok, “Sadia leleng?” (Jes. 6:11; Hab. 1:2) Jala tingki diida Jesus angka halak na so marhaporseaon, disungkun ibana do muse, “Sadia leleng?” (Mat. 17:17) Ra hita pe olo do songon i. Ra ala masa tu hita hajahaton, sahit manang ala lam matua hita. Jala marsak do hita ala mangolu di “ari hasusaan, di angka tingki parpudi”. (2 Tim. 3:1) Olo do alani pangalaho ni halak gabe loja pingkiranta jala marmetmet ni roha hita. Alai manang aha pe na mambahen hita marsak, dipatogu do rohanta mamboto molo Jahowa ndang muruk tu naposoNa najolo na mandok, “Sadia leleng?” Songon dia do carana asa boi hita martahan tingki masa sitaonon? Dialusi si Jakobus do i marhite ayat na diulas sadari on. w17.08 3-4 ¶1-3

Lomo do roha ni Jesus asa taantusi, caranta mamangke hamoraon na geduk boi patuduhon na marsihohot do hita tu Debata manang na ndang. Sada cara laho patuduhon na marsihohot hita mamangke hamoraon, i ma molo talehon sumbangan tu ulaon marbarita di liat portibi on songon na disurirangkon Jesus. (Mat. 24:14) Sahalak dakdanak di India ringgas pamasukkon hepeng logam tu celenganna. Ndang dituhor ibana be meam-meamna. Dung gok celenganna i, disumbangkon ma hepeng i tu ulaon marbarita. Adong do muse donganta baoa di India nampunasa kobun kalapa. Dilehon ibana do godang kalapa tu kantor penerjemahan bahasa Malayalam. Ala dihaporluhon angka dongan disi do kalapa i, didok rohana dumenggan do mangalehon kalapa sian hepeng. On ma na didok marbisuk. Angka donganta na di Junani pe mangalehon miak jetun, keju, dohot sipanganon na asing tu keluarga Betel. w17.07 4-5 ¶7-8

Ala ditaban di Babel, ndang lomo be roha ni halak Jahudi marende. Porlu do nasida diapuli. Songon na disurirangkon, urupan ni Jahowa do bangsoNa marhite Raja Sirus sian Persia na manaluhon Babel. Didok si Sirus do, “Ibana [Debata] marsuru ahu pajongjong di Ibana sada joro di Jerusalem. . . . Manang ise nuaeng sian hamu, sian bangsona, sai didongani Jahowa, Debatana, ma ibana asa nangkok!” (2 Kron. 36:23) Tontu tarapul do halak Israel na di Babel alani hata on! Diapuli Jahowa do bangso Israel. Diparrohahon do nasida ganup marsada-sada. Suang songon i ma tu hita saonari. Debata “pasabam angka parroha bojok, jala dililiti angka bugangnasida [manang, lukanasida] i”. (Ps. 147:3) Tingki marsahit manang marsak, pos ma rohanta na sarihononna do hita. Sihol do rohaNa laho mangapuli jala pamalumhon hansit ni rohanta. (Ps. 34:19; Jes. 57:15) Dilehon do tu hita bisuk dohot gogo asa boi manaon hasusaan.​—Jak. 1:5. w17.07 16 ¶4-5

Jahowa do na ummora di hasiangan on, ala Ibana do nampuna sasude. (1 Kron. 29:11, 12) Nang pe songon i, burju do Jahowa tu sude. Mandok mauliate do hita ala dilehon Jahowa arta di partondion tu hita, i ma (1) Harajaon ni Debata, (2) pangkobasionta, dohot (3) hasintongan na sian Bibel. Alai molo ndang manat hita, boi do gabe ndang taargai be arta na dilehon Debata. Ingkon tongtong do taargai jala tahaholongi arta on. Asa boi gabe rayat ni Harajaon ni Debata, ingkon marhamubaon do hita asa lam denggan marparange. (Rom 12:2) Alai, ingkon marsitutu do hita asa unang humurang holongta tu Harajaon ni Debata. Unang gabe humurang holongta alani arta dohot giot-giot ni daging na sala.​—Poda 4:23; Mat. 5:27-29. w17.06 9 ¶1; 10-11 ¶7

Ndang dipatorang Jahowa boasa marsitaonon si Job. Alai, lomo rohaNa mangurupi si Job mangantusi na metmet situtu do jolma martimbangkon Debata. Didok Jahowa tu si Job, adong parsoalan na rumingkot sian sitaonon ni si Job sandiri. (Job 38:18-20) Hata ni Jahowa paubahon pangantusion ni si Job. Na so pardenggan basa do Jahowa tingki mangkatai tu si Job di sitaononna? Ndang songon i. Diantusi jala diargai si Job do poda ni Jahowa. Didok si Job, “Jora ma ahu jala husolsoli dagingku hundul di bagasan orbuk dohot sirabun.” (Job 42:1-6) Dung ditangihon si Job poda na sian Jahowa jala dipauba pangantusionna, dipaloas Jahowa do na asing mamboto na las rohaNa mangida si Job.​—Job 42:7, 8. w17.06 17-18 ¶11-12

Sian dia do taboto molo karejonta ndang gabe rumingkot di hita? Tasungkun ma dirinta, ‘Umlomo do rohangku mangulahon karejongku sian ulaon partondion?’ Molo tarimangi sungkun-sungkun on, boi ma taboto aha do sasintongna na tahalomohon. Diajarhon Jesus do na ingkon tajumolohon di ngolunta. Sada tingki, ro ma ibana tu jabu ni si Maria dohot si Marta. Pintor diparade si Marta do sipanganon. Alai si Maria, hundul di jonok ni Jesus jala manangihon pangajarionna. Marungut-ungut ma si Marta ala ndang diurupi si Maria. Didok Jesus ma tu si Marta hata songon na disurat di ayat na diulas sadari on. (Luk. 10:38-42) On ma parsiajaran na ringkot na diajarhon Jesus: Unang ma lomo ni rohanta na taharingkothon, asa tongtong togu holongta tu Kristus, ingkon tapillit do “tohap na uli i”. Lapatanna, ingkon rumingkot do parale-aleonta tu Jahowa. w17.05 23-24 ¶9-10

Dilehon Jahowa do tanggung jawab tu natua-tua asa mangajarhon hasintongan tu ianakhonna. Ndang tu ompung manang tu na asing. (Poda 31:10, 27, 28) Natua-tua na so mangantusi bahasa ni ianakhonna porlu mangido pangurupion asa boi mandodo roha ni ianakhon. Ndang na so martanggung jawab nasida laho pagodang-godangkon ianakhonna molo mangido pangurupion. Sasintongna, pangurupion sian na asing mambahen nasida boi pagodang-godangkon ianakhon “di bagasan ajar dohot poda ni Tuhan i”. (Eps. 6:4) Umpamana, boi do dipangido natua-tua pangurupion sian sintua taringot panombaon na sasaripe dohot patuduhon dongan na burju tu ianakhonna. Laho mangurupi ianakhonna, olo do ditogihon natua-tua dongan na asing dohot tu panombaon na sasaripe na binahen ni nasida. Asing ni i, marsiajar do angka na poso sian halak Kristen na asing tingki rap marbarita dohot mangulahon ulaon na asing.​—Poda 27:17. w17.05 13 ¶17-18

Dung dipaboa suru-suruan tu si Josep na laho bunuon ni Raja Herodes nama Jesus, mangungsi ma nasida tu Misir sahat tu na mate si Herodes. (Mat. 2:14, 19-21) Dung martaon-taon, sisean ni Jesus pe “gabe marserak . . . so padohot angka apostel, tu luat Judea dohot Samaria” alani penganiayaan. (Ul. 8:1) Diboto Jesus, godang do siseanna na laho gabe pangungsi. Didok ma, “Ia dilele nasida hamu sian huta na sada, maporus ma hamu tu huta na asing.” (Mat. 10:23) Hea do on dihilala marribu Sitindangi Ni Jahowa. Adong do keluarga ni nasida na mate jala agoan arta. Tingki laho pangungsi sian hutana asa tading di pangungsian, godang hasusaan na diadopi nasida. Godang na mabuk, marjuji, manangko, jala mangulahon ulaon na rorang. Alai diingot nasida do, ndang salelengna nasida di pangungsian i songon halak Israel na so salelengna di halongonan. On mangurupi nasida tongtong marpamingkirion na denggan.​—2 Kor. 4:18. w17.05 3-4 ¶2-5

Ala di portibi na jahat on dope hita mangolu, ingkon taadopi do angka na so tigor. Sipata, olo do hita manang donganta mangkilala sisongon i di huria. Alai, unang ma gabe gale partondionmuna. Alani i, tongtong ma marsihohot tu Debata, martangiang, jala marhaposan tu Ibana. Ingot ma, alani hahuranganta, olo do ra ndang taantusi aha na masa. Unang ma tapaboa angka hatorangan na so denggan na mambahen maol pasaehon parsoalan i. Tongtong ma marhaposan tu Jahowa, unang tu diri sandiri. Paima ma Ibana pasaehon parsoalan i. Dung i, dipasu-pasu Jahowa ma hamu. Pos ma rohamu tu Jahowa, “siuhumi liat portibi on”, na tongtong mangulahon na sintong, jala “na tigor do luhut dalanna”.​—1 Mus. 18:25; 5 Mus. 32:4. w17.04 20 ¶17

Tingki ro hasusaan bolon, aha do na laho masa tu halak na so olo marhamubaon dohot na satolop tu hajahaton? Marjanji do Jahowa laho mangaripashon parjahat sian tano on. (Ps. 37:10) Saonari, godang do na manabunihon hajahaton na binahenna asa unang diuhum. (Job 21:7, 9) Alai didok di Bibel, “Tongtong do diranapi matana angka dalan ni ganup jolma, jala nasa langkalangkana diida Ibana do. Ndang adong haholomon manang linggoman ni hamatean tau partabunian ni halak siula hajahaton.” (Job 34:21, 22) Ndang adong na buni di adopan ni Jahowa. Diboto Ibana do sude ulaon ni parjahat. Dungkon Armagedon, molo talului parjahat i, ndang adong be nasida di tano on!​—Ps. 37:12-15. w17.04 11 ¶5