Januari

Ndang halak na lambok roha ibana tingki gabe keluarga ni si Firaun saleleng 40 taon. Buktina, tingki diida ibana sahalak baoa ni halak Mesir mambahen na so denggan tu halak Israel, pintor muruk do ibana jala dibunu baoa i. Dirimpu si Musa lomo roha ni Jahowa tu na niulahonna i. Alani i, asa boi gabe pamimpin ni halak Israel, diurupi Jahowa ma si Musa asa gabe halak na barani jala lambok. Jala ingkon serep do rohana, unduk, jala burju. Gabe boi ma ibana pamimpin na denggan ala diihuthon do sude na didok ni Jahowa. (2 Mus. 2:11, 12; Ul. 7:21-30, 36) Ingkon ditiru kepala keluarga dohot angka sintua do si Musa. Tingki adong na so mangargai hamu, unang ma mura hansit rohamuna. Alana hamu pe hea do ra mambahen na sala, alani i serep ma rohamuna mangangkui i. (Pjm. 7:9, 20) Laho pasaehon parsoalan, ihuthon ma tudu-tudu ni Jahowa. Jala tongtong ma lambok mangalusi. (Poda 15:1) Molo diihuthon hamu tudu-tudu i, on mambahen las roha ni Jahowa, mambahen dame, jala gabe sitiruon ma hamu taringot lambok ni roha. w19.02 8 ¶1; 10 ¶9-10

Boasa boi Jesus patuduhon asi ni roha dohot roha sapangkilalaan tu natorop i? Didok ibana “songon biru-biru na so adong parmahanna” do nasida. Ra diida Jesus, adong do piga-piga sian nasida na pogos manang adong na ingkon manarihon keluargana. Na asing, adong na lungun rohana ala mate halak na hinaholonganna. Alai diantusi Jesus do pangkilalaan ni nasida i. Ra hea do dihilala Jesus songon na dihilala nasida. Asi do roha ni Jesus tu angka halak, gabe taronjar ma rohana laho marbarita tu nasida. (Jes 61:1, 2) Aha do na boi taparsiajari sian contoh na dibahen Jesus? Saonari, godang do di humaliangta angka halak na songon “biru-biru na so adong parmahanna”. Godang do hasusaan na diadopi nasida. Alai boi do taurupi nasida marhite paboahon barita na uli. (Pgk. 14:6) Ala ‘asi do rohanta tu angka na pogos dohot na gale’, marbarita ma hita tu nasida songon na diulahon Jesus. (Ps. 72:13, Bibel siganup ari) Asi do rohanta tu sude halak, jala lomo do rohanta mangurupi nasida. w19.03 21-22 ¶6-7

Godang do alasanta laho mangkaholongi Jahowa. Ndang holan ala na diparade Ibana na tahaporluhon ganup ari, alai diajari do muse hita taringot hasintongan. (Joh. 8:31, 32) Dilehon do muse tu hita huria Kristen na boi manogu-nogu jala mangurupi hita. Sai diurupi do hita tingki mangadopi hasusaan jala dilehon do tu hita pangkirimon laho mangolu salelengna jala tongtong marlas ni roha. (Pgk. 21:3, 4) Molo tarimangi do balga ni holong ni Jahowa tu hita, gabe lam holong ma rohanta tu Ibana. Molo holong do rohanta tu Jahowa, gabe adong ma di hita biar mida Ibana. Jala molo tahaholongi do Jahowa, tontu ndang olo hita mambahen hansit rohana. Molo tongtong diingot hamu godang do laba ni tudu-tudu na sian Jahowa, gabe lam holong ma rohamu tu Ibana dohot tu aturanna. Jala aha pe na dibahen Sibolis, ndang boi i mangambati hamu manomba Jahowa. Bayangkon ma ngolumuna dung marribu taon. Tingki i, las do rohamuna ala nunga mambahen keputusan asa tardidi, jala i ma keputusan na dumenggan di ngolumuna! w19.03 6 ¶14; 7 ¶19

Sude keluarga boi do mandapot laba molo olo sude anggota keluarga mandok mauliate. Molo sai dipatudu na mardongan saripe do pangargaion tu dongan saripena, gabe lam solhot ma nasida. Gabe mura ma nasida manalpuhon hasalaan ni dongan saripena. Sahalak suami na mangargai istrina ndang holan na denggan na dibahen istrina i na diida ibana, alai ingkon dipuji do istrina i. (Poda 31:28) Jala molo istri na marbisuk, diargai do na diulahon suamina. Hamu natua-tua, songon dia do caramuna mangajari ianakhonmuna asa mangargai na asing? Ingot ma, ditiru ianakhonmuna do pangkataion dohot parniulaonmuna. Alani i, bahen ma sitiruon na denggan. Carana, dokkon ma mauliate molo adong na denggan na dibahen nasida. Jala ajari ma nasida asa mandok mauliate sian ias ni roha tingki adong na mambahen na denggan tu nasida. Jala paboa ma songon dia cara na denggan mandok mauliate. w19.02 17 ¶14-15

Hata ni si Job on patuduhon, na tongtong do setia ibana tu Jahowa. Hita pe, boi do maniru si Job. Saonari pe, didok Sibolis do na so tutu tahaholongi Jahowa. Didok muse, molo susa hita ndang laho sombaonta be Jahowa jala ndang setia be hita tu Ibana. (Job 2:4, 5; Pgk. 12:10) Songon dia pangkilalaanta tu na didok Sibolis i? Tontu ndang lomo rohanta didok songon i. Alai taingot ma, pos do roha ni Jahowa tu hita jala dilehon do tingki tu hita laho patuduhon, molo Sibolis i pargabus. Jala marjanji do Ibana, na urupanna do hita asa boi tongtong setia. (Heb. 13:6) Las do rohanta ala porsea Jahowa tu hita! Alani i, tongtong ma hita setia. Molo setia hita, boi ma tabuktihon molo Sibolis i pargabus. Jala tama do Jahowa laho mamarenta jolma. w19.02 5 ¶9-10

Dipaboa Jesus do angka hasusaan na laho masa tu angka siseanna. Alai, dipatogu Jesus do nasida jala didok “unang ma mabiar!” (Joh. 16:1-4a, 33) Dung martaon-taon, tongtong do ditiru nasida Jesus laho manarihon donganna jala tongtong barani. Nang pe mangadopi hasusaan, tongtong do nasida masiurupan. (Heb. 10:33, 34) Tatiru ma habaranion ni Jesus. Umpamana, ingkon barani do hita mangurupi angka dongan na dianiaya manang na dipenjara alani haporseaon ni nasida. Tingki masa sisongon i, ingkon barani do hita mambela nasida. (Plp. 1:14; Heb. 13:19) Cara na asing patuduhon habaranion, i ma tongtong ma barani marbarita na uli. (Ul. 14:3) Songon Jesus, ingkon tongtong ma barani hita marbarita nang pe adong na marsogo ni roha dohot na mangorai hita. w19.01 22-23 ¶8-9

Aha na ingkon taulahon asa boi lam ringgas mangalehon komentar di parpunguan? Na rumingkot, bahen ma persiapan tu ganup parpunguan. Molo denggan hita persiapan tu parpunguan, gabe barani do hita mangalehon komentar. (Poda 21:5) Songon dia cara na denggan laho persiapan? Andorang so persiapan, martangiang ma hamu asa dilehon tondi parbadia. (Luk. 11:13; 1 Joh. 5:14) Denggan ma parrohahon na laho diparsiajari i, mulai sian judul, subjudul, gambar, dohot kotak tinjauan. Jaha ma angka ayat na adong di paragraf. Dung i, rimangi ma jala bahen hian ma aha na laho dikomentari hamu. Lam denggan hamu persiapan, lam godang ma laba na dapotmuna. Jala lam mura ma hamu mangalehon komentar.​—2 Kor. 9:6. w19.01 9 ¶6; 11-12 ¶13-15

Diurupi Jahowa do si Habakuk asa manurat pangkataion ni nasida i, laho paboahon parsiajaran na ringkot tu hita. Alani i, unang ma mabiar hita pasahathon holso ni rohanta tu Jahowa. Dijujui Ibana do hita asa martangiang laho paboahon na di bagas rohanta. (Ps. 50:15; 62:9) Porsea do si Habakuk tu Jahowa, i ma na gabe Ale-ale dohot Bapakna. Dipajonok do dirina tu Jahowa. Ndang holan holso ni rohana na sai dipingkiri ibana. Jala ndang marpos ni roha ibana tu dirina. Gariada, martangiang do ibana paboahon holso ni rohana. Sitiruon na denggan do on tu hita. Alana, Jahowa do sitangihon tangiang. Dijujui do hita asa paboahon holso ni rohanta marhite tangiang. (Ps. 65:3) Molo taulahon on, boi ma taida songon dia Jahowa mangalusi tangiangta. Tahilala ma songon na dihaol Jahowa hita tingki diapuli jala ditogu-togu Ibana. (Ps. 73:23, 24) Diurupi Ibana do hita asa taboto songon dia Ibana mangalusi tangiangta. Martangiang ma cara na dumenggan patuduhon na porsea hita tu Jahowa. w18.11 15 ¶2; 16 ¶5-6

Ndang holan tu na satorbangna si Daud marale-ale. Diboto hamu do ise na dipillit si Daud gabe ale-alena? I ma si Jonatan. Molo tajaha di Bibel, mansai solhot do parale-aleon ni nasida, nang pe umtua si Jonatan 30 taon sian si Daud. Diargai si Jonatan do habaranion ni si Daud. Suang songon i do si Daud tu si Jonatan. Barani do nasida mangadopi musu ni Debata. Boasa boi solhot parale-aleon ni nasida? Ala rap mangkaholongi Jahowa do nasida. (1 Sam. 13:3; 14:13; 17:48-50; 18:1) Molo marale-ale hita tu halak na mangkaholongi jala mangoloi Jahowa, boi do tadapot las ni roha songon na dihilala si Daud dohot si Jonatan. Songon na didok donganta si Kiera, “Godang do ale-alengku di liat portibi on, nang pe marasing-asing suku dohot kebudayaan ni nasida.” Molo ditiru hamu songon i, botoonmuna ma songon dia Bibel dohot tondi parbadia boi mambahen hita sude gabe sada keluarga. w18.12 23-24 ¶11-13

Na didok “seks na so patut”, i ma mangalangkup, melacur, mangulahon seks tu na so dongan saripena, borua tu borua, baoa tu baoa, dohot tu binatang. Jadi, molo sahalak baoa naung marhasohotan mangulahon seks na so patut, boi do dipillit istrina laho manirangkon ibana manang na ndang. Ndang hea didok Jesus, molo adong suami manang istri na mangulahon seks na so patut, ingkon sirangkonon ni dongan saripena ibana. Umpamana, adong do sahalak istri na olo tongtong rap dohot suamina nang pe naung mangulahon seks na so patut suamina i. Boasa? Ra, ala holong dope rohana jala rade manalpuhon hasalaan ni suamina i. Olo do nasida rap padengganhon parsaripeon ni nasida. Asing ni i, molo marsirang nasida jala ndang marhasohotan muse, boi do gabe susa parngoluonna. Songon dia taringot parhepengon dohot kebutuhan seksna? Songon dia molo gabe lungun-lungunan ibana? Aha do pangkorhonna tu ianakhonna? (1 Kor. 7:14) Alani i, molo dipillit dongan saripe na so marsala i do asa marsirang, tontu godang do hasusaan na diadopi. w18.12 11-12 ¶10-11

Dihagigihon Jahowa do angka ulaon na so sintong. (Jes. 61:8) Diboto Jahowa do, ndang mura hita mangulahon on ala jolma na mardosa dope hita. Alai lomo do rohana asa tahagigihon na dihagigihon Jahowa. Molo tarimangi boasa dihagigihon Jahowa angka na so denggan, gabe boi ma tatiru pingkiranna. Jala ndang olo be hita mangulahon i. Molo dung taboto angka na dihagigihon Jahowa, gabe taantusi ma dia na sala. Nang pe ndang pola tangkas i disurat di Bibel. Umpamana sada sian ulaon na rorang, i ma lap dance manang marjoget di abingan ni sasahalak. Nunga somal ulaon on di angka halak. Didok piga-piga halak do, ulaon on ndang sarupa songon na mangulahon seks. Ala ndang sala didok roha ni nasida, gabe diulahon ma i. Alai songon dia do sasintongna pangkilalaan ni Jahowa mangida i? Ingot ma, dihagigihon Jahowa do sude angka ulaon na rorang. Alani i, tapadao ma dirinta sian angka ulaon na rorang. Carana, taorom ma dirinta jala tahagigihon ma angka na dihagigihon Jahowa.​—Rom 12:9. w18.11 29-30 ¶11-12

Disurat si Paulus do on muse sampe tolu hali. (Rom 1:17; Gal. 3:11; Heb. 10:38) Nang pe gok sitaononta, pos ma rohanta na boi do idaonta saut janji ni Jahowa i molo porsea hita tu Ibana. Jadi, lomo do roha ni Jahowa asa tongtong taingot janjina i. Di tingkinta saonari on, godang do na boi taparsiajari sian buku Habakuk. Marjanji do Jahowa laho lehononna hangoluan na salelengna tu sude halak na tigor jala na porsea tu Ibana. Alani i, nang pe godang hasusaanta, tongtong ma tapatogu haporseaonta tu Debata. Hata ni Jahowa tu si Habakuk paposhon rohanta, na urupan ni Jahowa do hita jala paluaonna. Dijujui Jahowa do hita asa tongtong porsea jala sabar paimahon Harajaonna saut di tano on. Ujungna, sude halak na manomba Jahowa mangkilala hadameon jala marlas ni roha.​—Mat. 5:5; Heb. 10:36-39. w18.11 19-20 ¶15-17

Di tingki ni Jesus, adong do na olo manjalo hasintongan. Alai di pudian ni ari, ditinggalhon nasida do hasintongan i. Dung dibahen Jesus mukjizat mangalehon torop halak mangan, diihuthon nasida do Jesus sahat tu bariba ni Laut Galilea. Alai songgot do roha ni nasida tingki didok Jesus, “Molo ndang dipangan hamu daging ni Anak ni jolma i jala ndang diinum hamu mudarna, ndang dapotmuna hangoluan.” Ndang disungkun nasida Jesus aha do lapatan ni hatana i. Didok nasida do, “Ndang tarjalo hatana i. Ise ma na olo manangihon i?” Ujungna, “godang ma sian angka sisean ni Jesus na mulak tu ulaon ni nasida hian jala ndang diihuthon nasida be ibana.” (Joh. 6:53-66) Saonari on, adong do na gabe maninggalhon hasintongan. Boasa? Ra, ala adong parniulaon dohot pangkataion ni donganta na mambahen hansit rohana. Asing ni i, ndang lomo rohana tu donganta na mangalehon sipasingot sian Bibel. Manang ala marsoal d hot dongan di huria. w18.11 10 ¶3-5

Kristus dope Pamimpin ni sude huria Kristen sahat tu saonari. Jadi, molo adong tudu-tudu na baru jala ndang apala taantusi i, taingot ma songon dia Kristus manguluhon naposona di tingki najolo. Umpamana, di jaman ni si Josua manang di jaman ni angka apostel, tongtong do dilehon Kristus tudu-tudu na dumenggan laho manjaga naposo ni Debata. Tujuanna laho patoguhon haporseaon jala mangurupi nasida asa tongtong marsada. (Heb. 13:8) Saonari, “naposo haposan jala na marbisuk” do na mangalehon tudu-tudu na tahaporluhon. (Mat. 24:45) Jala, tudu-tudu i gabe bukti na disarihon Jesus do hita. Dung taboto songon dia Kristus mamimpin hita, tontu gabe taantusi ma lomo do roha ni Kristus patoguhon haporseaonta. Diurupi Kristus do hita asa tongtong mangkaringkothon ulaon marbarita. On ma ulaon na mansai ringkot di tingkinta saonari.​—Mrk. 13:10. w18.10 19-20 ¶13-16

Serep ni roha mangurupi hita mangorom diri tingki dibahen na so denggan tu hita. Boi do tajaha taringot sitiruon i di 2 Samuel 16:5-13. Dipaboa disi molo si Simei, i ma tondong ni Raja Saul na mangarehei jala mandangguri si Daud dohot naposona. Sasintongna, boi do si Daud mangalo si Simei. Alai, sabar do si Daud mangadopi i. Jadi, boasa ma si Daud boi mangorom dirina? Tingki si Daud manurat Psalmen pasal tolu, mangadopi hasusaan do ibana. Alana anakna si Absalom marsangkap mambunu ibana. Jala di tingki i do muse si Simei mandangguri ibana. Alai, boi do tongtong sabar ibana mangadopi i sude. Songon dia carana? Didok si Daud do di Psalmen 3:5, “Joujou do soarangku tu Jahowa, jadi dialusi Ibana ahu jalojalo sian dolok habadiaonna.” Songon si Daud, martangiang ma hita tingki adong na mambahen na so denggan tu hita. Jala lehonon ni Jahowa do tondi parbadiana asa boi hita martahan. Alani i, boi do hamu mangorom dirimuna jala manalpuhon hasalaan ni halak na mambahen na so denggan tu hamu? Jala pos do rohamuna tu Jahowa na laho urupanna jala pasu-pasuonna hamu tingki manaon i? w18.09 7 ¶16-17

Tingki marbarita, ingkon sai burju jala taargai angka halak di ingananta marbarita. Alani i, porlu do tatanda jala taantusi nasida. Ingot ma, tingki marbarita hita sian jabu tu jabu, olo do gabe tarsonggot nasida ala ndang hea dope pajumpang dohot hita. Alani i, porlu do marbisuk hita mangalului tingki na pas asa boi mangkatai dohot nasida. (Mat. 7:12) Umpamana, molo diingananmuna marbarita umleleng halak dungo di ari Sabtu, jolo marbarita ma hamu di dalan, di inganan na ribur manang tu kunjungan na boi dijumpangi. Molo gok do karejo ni nasida taida, unang ma palelenghu hamu mangkata-hatai dohot nasida, tarlumobi molo parjolo sahali dope hamu pajumpang dohot nasida. (1 Kor. 9:20-23) Molo taantusi do situasi ni nasida ra gabe las do roha ni nasida tingki ro muse hita. Molo marbisuk hita, gabe “dongan saulaon ni Debata” ma hita. Ra marhite hita do Jahowa mangurupi nasida mananda hasintongan!​—1 Kor. 3:6, 7. w18.09 31-32 ¶15-17

Boasa hita boi marlas ni roha molo lambok rohanta? Alana molo halak na kasar jala garang, boi do jotjot parohon parsoalan. Alai dung marsiajar Bibel, dipatudu nasida ma “pangalaho na imbaru”. Gabe adong ma di nasida “holong ni roha, haburjuon, toruk ni roha, lambok ni roha, jala sabar”. (Kol. 3:9-12) Ujungna gabe dame ma dihilala nasida, boi marale-ale tu na asing, jala las ma roha ni nasida. Jala didok do di Bibel, nasida ma na laho “manean tano on”. (Ps. 37:8-10, 29) Aha do maksud ni Jesus tingki mandok na lambok roha laho “manean tano on”? Angka na dipillit Debata na laho mangolu di surgo, dohot do manggohi hata on dung mamarenta nasida gabe raja dohot malim sian surgo tu tano on. (Pgk. 20:6) Asing ni i muse, adong do marjuta halak na so marpangkirimon tu surgo laho manean tano on. Mangolu salelengna, gabe sempurna, jala mangkilala hadameon dohot las ni roha ma annon nasida. w18.09 17 ¶8-9

Jahowa ma na gabe sitiruon taringot rade manangihon. (1 Mus. 18:32; Jos. 10:14) Umpamana, rimangi ma pangkataion ni si Musa dohot Jahowa na disurat di 2 Musa 32:11-14. Sasintongna, ndang ingkon dipaboa si Musa aha na di rohana, alai dipaloas Jahowa do si Musa paboahon songon dia pangkilalaanna. Jadi, olo jala sabar do hamu manangihon poda ni donganta, nang pe hea ibana mangulahon na sala di tingki naung salpu? Gari Jahowa, ditangihon do tangiang ni angka halak na marhaporseaon. Serep do roha ni Jahowa tingki manangihon naposona songon si Abraham, si Rahel, si Musa, si Josua, si Manoa, si Elia, dohot si Hiskia. Alani i, tasungkun ma dirinta, ‘Olo do ahu maniru Jahowa asa mangulahon na sarupa? Molo adong sipaingot na denggan sian angka dongan, olo do ahu mangargai nasida? Olo do ahu manangihon jala mangulahon sipaingot na i? Adong do piga-piga angka dongan di huria dohot keluargangku na mangkaporluhon pangurupionku? Molo songon i, aha ma na laho ulahononku?’​—1 Mus. 30:6; Pangh. 13:9; 1 Raj. 17:22; 2 Kron. 30:20. w18.09 6-7 ¶14-15

Ra, maol do asa tongtong burju ala godang dope halak di humaliangta na holan mangkaringkothon diri. Alai, tongtong ma taingot dua parenta ni Jesus na rumingkot, i ma mangkaholongi Jahowa sian nasa roha, gogo, pingkiran, dohot ngolunta. Jala mangkaholongi angka dongan songon mangkaholongi dirinta sandiri. (Mrk. 12:28-31) Taboto do Jahowa dohot Jesus gabe sitiruon taringot burju mangalehon. Diboto nasida do molo taihuthon sitiruon i, boi do hita marlas ni roha. Jala ala holong do rohanta tu Jahowa umbahen tatiru Ibana. Jadi na pasangaphon Jahowa do molo burju hita mangalehon tu Ibana dohot tu sude halak. Jala hita pe dohot na asing boi mandapot laba ala mangulahon i. Tontu nunga dibahen hamu na denggan laho mangurupi halak, tarlumobi tu angka donganmuna. (Gal. 6:10) Molo tongtong do hamu mangulahon i, gabe las do roha ni halak jala dihaholongi do hamu. w18.08 20 ¶19-20

Di Jahowa sarupa do sude halak, nang pe marasing-asing suku, marga, bangso, manang bahasana. Molo taoloi Debata jala taulahon na sintong gabe dihaholongi Jahowa do hita. (Gal. 3:26-28; Pgk. 7:9, 10) Tutu, sian najolo nunga taboto taringot on. Alai songon dia molo hamu tading di inganan manang keluarga na jotjot pintor curiga tu halak? Molo sai curiga dope hamu tu halak, tontu olo dope hamu paimbar-imbarhon. Nang pe si Petrus na paboahon tu halak molo Debata ndang paimbar-imbarhon, alai ibana sandiri olo dope paimbar-imbarhon. (Gal. 2:11-14) Jadi songon dia do hita asa unang paimbar-imbarhon halak? Tapangke ma Bibel laho mamareso rohanta. Atik boha olo dope hita curiga tu halak. Tapahombar ma pangalahonta tu na taparsiajari. (Ps. 119:105) Boi ma tasungkun donganta atik songon i dope hita, alana ndang boi tanilai dirinta sandiri. (Gal. 2:11, 14) Ra ala nunga somal, gabe ndang tasadari na songon i dope rohanta. w18.08 10-11 ¶5-6

Sungkun ma dirimuna, ‘Tarida do sian parniulaonku na mangoloi Jahowa do ahu? Las do rohangku paboahon tu halak na Sitindangi Ni Jahowa do ahu?’ Tontu mansai hansit do roha ni Jahowa, molo maila hita paboahon na Sitindangi Ni Jahowa do hita. (Ps. 119:46; Mrk. 8:38) Adong do piga-piga Sitindangi na tongtong mangihuthon “pingkiran ni halak na di portibi on”. Gabe songon na sarupa ma nasida tu angka na so sisomba Jahowa. (1 Kor. 2:12) Somalna “pingkiran ni halak na di portibi on”, holan mangkaringkothon dirina sandiri do. (Eps. 2:3) Umpamana, nunga dipaboa tu hita taringot pangkean na tama. Hape, adong dope na mamangke pangkean na paketathu manang patipishu. Gariada dipangke do pangkean sisongon i tu parpunguan. Manang asing-asing do dibahen gaya ni obukna. (1 Tim. 2:9, 10) Gabe songon na so Sitindangi Ni Jahowa do nasida.​—Jak. 4:4. w18.07 23-24 ¶11-12

Ala pinompar ni si Adam do hita sude, jadi marhaha maranggi do hita. (Ul. 17:26) Jala, didok Jesus do molo sude siseanna marhaha maranggi, ala sude do nasida nunga mananda Jahowa. (Mat. 12:50) Alani holong dohot haporseaon, gabe marsada ma nasida jala gabe anggota keluarga ni Debata. I do alana, tingki ditongos angka apostel surat tu huria, dijou do nasida ‘angka dongan’. (Rom 1:13; 1 Ptr. 2:17; 1 Joh. 3:13) Dung dipaboa Jesus na marhaha maranggi do sude siseanna, dipaingot ibana do nasida asa marserep ni roha. (Mat. 23:11, 12) Songon naung taulas, najolo gabe tarbagi do angka apostel ala adong dope ginjang ni roha di nasida. Jala di tingki ni Jesus pe, godang halak Jahudi na marpingkir umjago do suku ni nasida, manang ala pinompar ni si Abraham nasida. Alai, didok si Johannes Pandidi tu nasida, “Angka batu on pe boi do bahenon ni Debata gabe pinompar ni si Abraham.”​—Luk. 3:8. w18.06 11 ¶8-9

Molo adong halak na jotjot mambahen jut rohanta, taorom do dirinta asa unang muruk? Tapingkirhon hian do na laho tadokkon? (Poda 10:19; Mat. 5:22) Molo adong na mambahen jut rohanta, “pasombu ma Debata patuduhon rimasna”. (Rom 12:17-21) Aha do lapatan ni hata i? Unang ma pintor muruk. Tapaima ma Jahowa mangurupi hita pasaehon parsoalanta di tingkina. Alana molo muruk hita jala ndang mangasahon Jahowa, na so pasangaphon Jahowa do hita disi. Unang ma caranta naung leleng na sai taihuthon, holan ala nunga somal i taulahon. Jadi, olo do hita mangihuthon tudu-tudu na baru sian organisasi? (Heb. 13:17) Ingkon manat do hita asa ‘unang taulahon lobi sian na tarsurat i’. (1 Kor. 4:6) Jadi, molo tongtong taihuthon tudu-tudu na dilehon Jahowa, na mangasahon Jahowa do hita disi. w18.07 13 ¶17-18

Molo nunga gabe halak Kristen na matoras hita, gabe lam taargai do angka prinsip sian Bibel. Molo uhum holan marlangku di sada situasi, alai molo prinsip boi marlangku di godang situasi. Umpamana, ndang diantusi dakdanak, marjea do molo mardongan tu halak na jugul. Jadi, ingkon dibahen natua-tuana ma aturan laho manjaga ibana. (1 Kor. 15:33) Alai molo dung matoras dakdanak i, gabe diantusi ibana ma alasanna sian prinsip ni Bibel. Angka prinsip i do na boi mangurupi ibana mamillit dongan na burju. (1 Kor. 13:11; 14:20) Lam taboto alasanna sian Bibel, gabe lam tarlatik ma panggora ni rohanta. Lam taantusi ma na dihalomohon Debata asa taulahon. Godang do na diparade asa boi tabahen haputusan na palashon roha ni Jahowa. Di Bibel, godang do uhum dohot prinsip na mangurupi hita “asa denggan situtu” jala “gabe rade mangulahon angka ulaon na denggan.”​—2 Tim. 3:16, 17. w18.06 19-20 ¶14, 16-17

Jesus paboahon songon dia do lapatanna mangkaholongi sude halak. (Luk. 10:25-37) Andorang so tu surgo Jesus, disuru ibana do angka siseanna asa marbarita “di saluhut luat di Judea, di Samaria, sahat tu ujung ni tano on”. (Ul. 1:8) Disuru Jesus pe diulahon on, asa unang ginjang do roha ni nasida jala paimbar-imbarhon. Jotjot do Jesus paboahon parange na denggan sian na so halak Jahudi, asa rade nasida laho marbarita tu saluhut bangso. Dipuji ibana do sahalak perwira tentara ni Rom na togu haporseaonna. (Mat. 8:5-10) Di Nasaret, dipaboa Jesus do songon dia Jahowa mangurupi angka na so halak Jahudi. Umpamana, sahalak ina na mabalu sian Sarpat dohot si Naaman, halak Siria na hona kusta. (Luk. 4:25-27) Jala marbarita do Jesus tu sahalak borua Samaria. Gariada, marborngin do ibana dua ari di Samaria, ala lomo roha ni angka halak disi manangihon ibana.​—Joh. 4:21-24, 40. w18.06 11 ¶10-11

Dipatudos apostel Paulus do halak Kristen songon sahalak tentara. Alana, na marporang do hita mangalo Sibolis dohot angka surusuruanna. Jala nunga marpengalaman nasida marporang saleleng marribu taon. Ra, hira na so boi do hita monang mangalo nasida, tarlumobi angka na poso. Alai, boi do angka na poso monang mangalo musu sisongon i? Boi do. Alana, dapot nasida do gogo sian Jahowa. Songon tentara na tarlatik, porlu do nasida mamangke “perlengkapan porang na sian Debata” asa boi rade marporang (Eps. 6:10-12) Dibahen si Paulus tudosan on, ra ala dibayangkon ibana do pangkean ni tentara Rom.​—Ul. 28:16. w18.05 21 ¶1-2

Alasan na rumingkot boasa hita ingkon tongtong marbarita, i ma laho pasangaphon Jahowa jala pabadiahon goarNa. (Joh. 15:1, 8) Ndang boi be tatambai habadiaon ni goar ni Debata. Alana, nunga badia situtu goarNa i sian mulana. Alai, didok panurirang Jesaya do, “Tagonan Jahowa Zebaot parbadiai hamu.” (Jes. 8:13) Jadi, songon dia hita pabadiahon goar ni Debata tingki marbarita? Tapabadiahon do goar Jahowa, molo taharingkothon goarNa di ngolunta, jala taurupi angka halak asa mangantusi na badia do goarNa i. Umpamana, boi do taajari halak laho mamboto angka parange ni Jahowa, dohot sangkapNa tu jolma asa mangolu di Paradeiso. Molo taulahon i, on patuduhon hita mangurupi halak asa mangantusi na margabus do Sibolis taringot Jahowa. (1 Mus. 3:1-5) Jala, taurupi ma angka halak asa mamboto holan Jahowa do na tama “manjalo hasangapon dohot hamuliaon dohot hagogoon”.​—Pgk. 4:11. w18.05 10 ¶3-4

Sada alasan na ringkot, i ma ala hita laho patuduhon hamauliateonta tu Jahowa ala holongNa dohot sude pambahenanNa. Pingkirhon ma sude na dilehon Jahowa tu hamu, songon ngolumuna, parale-aleonmuna tu Ibana, Bibel, angka dongan di huria, dohot pangkirimon asa mangolu salelengna di Paradeiso. Tingki ditontuhon hamu tujuanmuna, na patuduhon hamauliateon do hamu tu Jahowa. Jala i boi mambahen hamu lam jonok tu Ibana. Molo nunga ditontuhon hamu tujuanmuna gabe lam jonok ma hamu tu Jahowa. Apostel Paulus mandok, “Ai ndang na geduk Debata: Tung halupahononna ma na niulamuna dohot holong ni roha na pinatuduhonmuna tu Goarna?” (Heb. 6:10) Ndang dibatasi umur sadia asa boi manontuhon tujuan. Molo hamu, aha do cita-citamuna?​—Plp. 1:10, 11. w18.04 28 ¶5-6

Di abad na parjolo lomo do roha ni halak tu pamarentaon ni halak Rom, ala jago nasida mamarenta jala bebas do rayatna dibahen. Alai, pamarentaon i boi maju ala godang do hatobanna. Hira-hira 30 persen halak disi hatoban do. Alani i, jotjot do angka halak tingki i mamingkirhon taringot parhatobanan dohot haluaon, tarmasuk ma halak Kristen. Jotjot do si Paulus manurathon taringot haluaon. Alai, ibana ndang na laho paturehon portibi on. Gariada, ibana dohot godang halak Kristen tingki i marsitutu marbarita na uli jala mangurupi angka halak asa mangargai tobusan ni Jesus Kristus. w18.04 9 ¶1-2

Di borngin andorang so mate Jesus, didok ibana do tu Apostel Petrus ayat on. Si Petrus ma sada sian na manguluhon huria Kristen di abad na parjolo. (Gal. 2:9) Dipatogu ibana do roha ni angka dongan marhite habaranionna di tingki Pentakoste dohot di tingki na asing. Dung martaontaon ibana gabe apostel, disurat ibana ma tu angka dongan, “Husurat do surat na jempek on . . . Na pasingothon do ahu tu hamu jala pasahathon panindangionku, paboa na on do asi ni roha ni Debata na tutu. Togu ma hamu jongjong disi.” (1 Ptr. 5:12, Bibel siganup ari) Surat ni si Petrus on boi patoguhon halak Kristen di tingki i. Jala hita pe saonari dipatogu do, huhut paimahon saut janji ni Jahowa!​—2 Ptr. 3:13. w18.04 18 ¶12-13

Sude do halak naeng bebas. I do alana godang do halak na demon manang mangalo tu pamarenta. Alai, tutu do boi gabe bebas nasida? Ndang. Gariada, lam susa do nasida jala adong do na gabe mate alani i. Tutu do na didok di Parjamita 8:9, “Jolma mangarajai donganna jolma mambahen ibana marhinamago.” Di ayat na diulas sadari on, dipaboa Apostel Jakobus do songon dia carana asa boi marlas ni roha situtu. Jadi sian Jahowa do uhum na sun denggan i. Diboto Ibana do aha na tahaporluhon asa boi hita marlas ni roha. Asa marlas ni roha, bebas do si Adam dohot si Hawa dibahen Jahowa. w18.04 3 ¶1-3