Februari

Asi do roha ni Jesus tu sude jolma. Jala boi do dihilala angka halak holong ni Jesus. I do alana, olo angka halak manjangkon barita Harajaon na dipasahat ibana. Alani i, ingkon tatiru do asi ni roha ni Jesus i. On boi mambahen hita lam marhasil di ulaon marbarita. Tingki marbarita, aha do na boi mangurupi hita patuduhon roha sapangkilalaan? Ingkon taantusi do aha na dipingkirhon dohot na dihilala angka halak. Lomo do rohanta dibahen halak na denggan tu hita. Alani i, tingki marbarita ingkon tabahen ma songon i tu nasida. (Mat. 7:12) Pingkirhon ma aha na dihaporluhon ganup halak. Unang ma tapangke hata pamungka na sarupa tu sude halak na tajumpangi tingki marbarita. Alai ingkon jolo taboto do situasi dohot na jotjot dipingkirhon nasida. Asa taboto aha na di rohana, tabahen ma sungkun-sungkun. (Poda 20:5) Molo nunga taboto aha na di rohana, boi ma tapaboa barita na uli tu nasida. Songon Jesus, tapatudu ma roha sapangkilalaan jala taurupi hombar tu na dihaporluhon nasida.​—Bandingkon 1 Korint 9:19-23. w19.03 20 ¶2; 22 ¶8-9

Ndang diargai si Adam dohot si Hawa angka na denggan na dibahen Jahowa tu nasida. Sude hita, boi do patuduhon na unduk hita tu Jahowa jala mangargai sude naung diulahon Ibana tu hita. Marhite tardidi, tapatudu do tu Jahowa na pos rohanta holan Ibana do na marhak manontuhon aha na denggan dohot na so denggan tu hita. Jala tapatudu ma na holong do rohanta jala porsea tu Ibana. Dung tardidi, ingkon tongtong do taulahon na dihalomohon Jahowa, ndang na tahalomohon. Nunga marjuta naposo ni Debata naung mangulahon i. Hamu pe, boi do songon nasida. Alani i, tongtong ma parsiajari Bibel, mardongan tu angka halak di huria, jala ringgas marbarita. (Heb. 10:24, 25) Tingki naeng mambahen keputusan, tangihon ma poda sian Jahowa marhite Bibel dohot organisasina. (Jes. 30:21) Molo diulahon hamu i, boi ma hamu marhasil.​—Poda 16:20. w19.03 7 ¶17-18

Godang do na dilehon Jahowa laho mangurupi hita asa lam togu parale-aleonta tu Ibana. Umpamana, dapotta do angka tudu-tudu sian angka parpunguan, sijahaonta, dohot sian jw.org. Ra, hea do di bege hamu sada jamita, dijaha hamu di majalah manang ditonton hamu video broadcasting, gabe didok rohamuna, ‘Hira na tu ahu do on dibahen.’ Alani i, songon dia do caranta mandok mauliate tu Jahowa? (Kol. 3:15) Carana, tingki martangiang jotjot ma tadok mauliate tu Jahowa alani silehon-lehonna i. Na mandok mauliate do hita tu Jahowa molo tajaga asa tongtong ias jala rapi ingananta marpungu. Sude ma hita dohot paiashon jala mangurus Bale Harajaonta. Jala halak na martanggung jawab tu sound system, ingkon denggan do dijaga alat i asa unang hatop sega. Molo denggan dijaga, boi ma leleng tapangke i. Alani i, gabe boi ma dipangke hepeng sumbanganta laho mambangun dohot padengganhon angka Bale Harajaon di liat portibi on. w19.02 18 ¶17-18

Dipatudu si Job do i, marhite mangarimangi sude angka tompaan ni Jahowa. (Job 26:7, 8) Longang do rohana tingki mangarimangi taringot tano on, langit, ombun, dohot ronggur. Didok roha ni si Job do, holan saotik dope na diboto ibana taringot tompaan ni Jahowa. Jala diargai ibana do sude na didok Jahowa. I do alana didok ibana, “Tongtong do huulahon na pinarentahon ni Debata.” (Job 23:12, Bibel siganup ari) Holong do rohana tu Jahowa jala lomo rohana mambahen las roha ni Jahowa. Marsitutu do si Job asa tongtong setia tu Jahowa. Hita pe boi do songon si Job. Alana gumodang do na taboto taringot tompaan ni Jahowa sian angka halak na mangolu di tingki ni si Job. Jala adong do Bibel na boi mangurupi hita mamboto taringot Jahowa. Sude na taparsiajari, boi mangurupi hita asa mangulahon lomo ni rohana. Gabe taronjar ma rohanta mangkaholongi, unduk jala asa tongtong setia tu Jahowa.​—Job 28:28. w19.02 5 ¶12

Sian najolo, dibahen angka pamarenta do angka na so denggan tu naposo ni Jahowa. Ra, ditudu nasida do hita mambahen “na jahat”, hape sasintongna na tapillit do “mangoloi Debata gabe parhuaso unang apala jolma”. (Ul. 5:29) Alani i, olo do hita gabe direhei, dipenjarahon, manang dipungkuli. Alai ala diurupi Jahowa, ndang tabalos i tu nasida jala ndang balas dendam. Alai tongtong do hita lambok tu nasida. Rimangi ma contoh taringot tolu halak Heber na ditaban di Babel, i ma si Hanania, si Misael, dohot si Azaria. Alai lambok do dipatorang nasida, boasa ndang olo nasida manomba patung na dibahen raja. Nang pe gabe ditutung, rade do nasida manjalo i. (Dan. 3:1, 8-28) Tingki diuji haporseaonta, songon dia do hita boi maniru tolu halak Heber i? Serep ma rohanta jala porsea ma tu Jahowa sai urupanna do hita. (Ps. 118:7) Tingki adong mandok ndang taulahon na denggan, burju jala denggan ma taalusi nasida. (1 Ptr. 3:15) Jala tapasiding ma na boi mambahen hita ndang marale-ale tu Jahowa. w19.02 10-11 ¶11-13

Asa lam barani hita, tarimangi ma pangkirimon na tadapot alani tobusan ni Jesus. (Joh. 3:16; Eps. 1:7) Di minggu-minggu andorang so ari parningotan i, lam tapatogu ma pangargaionta tu tobusan i. Carana, tajaha ma Bibel jala tarimangi ma angka na masa tu Jesus andorang so mate ibana. Tingki ro hita tu Borngin Parningotan i lam taantusi ma aha do lapatan ni angka lambang na diparade di acara i. Molo dung taboto aha laba ni na dibahen Jesus dohot Jahowa tu hita sude, gabe lam togu pangkirimonta. Jala gabe barani ma hita. (Heb. 12:3) Tontu mandok mauliate do hita ala tongtong dipatudu Jesus angka parangena i jala na rade mate humongkop hita! (Heb. 7:24, 25) Laho patuduhon pangargaionta, tongtong ma taulahon Borngin Parningotan i songon na diparentahon Jesus.​—Luk. 22:19, 20. w19.01 22 ¶8; 23-24 ¶10-11

Sada hasangapon do di hita mamuji Jahowa. Sada “pujian tu Debata” do molo talehon komentar di parpunguan. Jala ingkon hita sandiri do na mangalehon pujian i tu Jahowa. (Heb. 13:15) Alai, ndang dipangido Jahowa ingkon sarupa denggan ni komentarta dohot halak na asing. Tingki ro tu parpunguan, dos songon na mambagi sipanganon do hita dohot angka dongan. Umpamana, molo adong dongan sian huria mambahen acara di jabuna. Alai, dipangido asa diboan hamu sipanganon na asing. Ra, bingung do hamu, hira-hira sipanganon aha do na laho boanonmuna. Alai nang pe songon i, diboan hamu do sipanganon na dihalomohon angka dongan. Suang songon i ma Jahowa, nunga diparade Ibana gok sipanganon di parpunguan. (Ps. 23:5; Mat. 24:45) Alai lomo do rohana, adong na taboan tingki ro tu parpunguan. Alani i, denggan ma hamu persiapan asa boi mangalehon godang komentar. Alana ndang sae holan na diparade Jahowa i na tadapot. Alai ingkon adong na boi tabagi dohot angka dongan. w19.01 8 ¶3; 13 ¶20

Najolo, mangulahon seks na so patut, sada bagian sian panombaon tu gana-ganaan. (Hos. 4:13, 14) I do alana godang halak na lomo rohana manomba gana-ganaan. Alai boi do nasida marlas ni roha tingki mangulahon i? Daong! Alana ingkon dipelehon nasida do muse ianakhonna. Didok si Daud, gabe susa do halak na manomba gana-ganaan. (Jes. 57:5) Dihagigihon Jahowa do ulaon sisongon i. (Jer. 7:31) Saonari, godang do agama na paloashon halak mangulahon seks na so patut. Umpamana, boi do baoa mangulahon seks dohot baoa, manang borua dohot borua. I do alana godang halak bebas mangulahon lomo ni rohana. Ra, godang do diida hamu na songon i. Alai gabe susa do nasida. (1 Kor. 6:18, 19) Alani i hamu angka na poso, oloi hamu ma Debata. Buktihon hamu ma, molo unduk tu Debata, hilalaonmuna ma las ni roha. Pingkirhon ma aha akibatna molo diulahon hamu seks na so patut. Alana gabe lam susa do hamu molo mangulahon i.​—Gal. 6:8. w18.12 25 ¶16-18

Didok Jesus molo adong sahalak Kristen na dongan saripena mangulahon seks na so patut, boi do dipillit ibana marsirang jala marhasohotan muse. (Mat. 19:9) Alai, ndang sala molo olo ibana manalpuhon hasalaan ni dongan saripena i. Songon si Hosea, olo do ibana manalpuhon hasalaan ni si Gomer. Didok si Hosea ma tu istrina, asa unang mangulahon seks be dohot baoa na asing. Jala ibana pe ndang pintor mangulahon seks dohot si Gomer di tingki i. (Hos. 3:1-3) Nang pe ujungna ingkon mangulahon seks do nasida muse. On manggombarhon, na olo do Jahowa manalpuhon hasalaan ni halak Israel jala boi muse nasida marale-ale tu Ibana. (Hos. 2:2; 3:4-5) Sian cerita on, aha do parsiajaranna taringot parsaripeon? Molo olo do suami manang istri mangulahon seks muse dohot dongan saripena na marsala i, on patuduhon naung disalpuhon ibana do hasalaan ni dongan saripena i. (1 Kor. 7:3, 5) Jadi, ndang adong be alasan ni nasida laho marsirang. Ingkon dipadenggan nasida do muse parsaripeon ni nasida i, songon na dihalomohon Debata. w18.12 12-13 ¶13

Tingki marsiajar, ingkon tarimangi do songon dia Jahowa mangida sada situasi. Alana on boi mangurupi hita tingki mambahen keputusan na denggan. Gabe rade ma hita mambahen keputusan di sude situasi. Jala taboto ma aha na laho taulahon. Tingki istri ni si Potipar manogihon si Josep asa rap modom dohot ibana, pintor lari do si Josep. Tontu nunga dirimangi si Josep hian songon dia pangkilalaan ni Jahowa taringot na mardongan saripe. (1 Mus. 39:8, 9) Tangkas do i tarida sian alus ni si Josep tu istri ni si Potipar. Didok ibana, “Tung olo ma ahu mambahen jea na sai godang, asa mardosa ahu maradophon Debata?” Sian on taboto, na ditiru si Josep do pingkiran ni Jahowa. Songon dia molo hamu? Aha do na ingkon ulahononmuna molo adong dongan sakarejo na mangela-ela hamu? Manang, aha do na ingkon ulahononmuna molo adong na mangirim SMS manang gombar na porno? Molo nunga taparsiajari songon dia cara ni Jahowa jala maniru pingkiranna, gabe boi ma hita marsihohot tu Ibana. Gabe taboto ma keputusan aha na ingkon tabahen. w18.11 30 ¶13-14

Piga-piga peneliti mandok, hatana i boi do lapatanna, “Sampe naeng marinjaki jala naeng marjogeti do ahu alani las ni rohangku tu hata ni Debata.” Aha do parsiajaranna tu hita? Pos ma rohanta, ndang sadia leleng nai, pasauton ni Jahowa do janjina i. Alana, godang do naung dibahen Ibana sahat tu saonari laho pasauthon janjina i. Buku Habakuk mangajari hita taringot ringkot ni porsea tu Jahowa. (Hab. 2:4) Asa boi tongtong porsea tu Jahowa, ingkon tapatogu do parale-aleonta tu Ibana. Songon dia carana? (1) Tongtong martangiang, jala pasahat ma sude na adong di bagas roha. (2) Parrohahon ma aha na didok Bibel jala ihuthon ma tudu-tudu sian organisasina tu hita. (3) Porsea jala sabar ma paimahon saut janji ni Jahowa i. Songon i ma na diulahon si Habakuk. Nang pe mulana marsak ibana, alai ujungna gabe dipatogu jala marlas ni roha do ibana. Molo tatiru si Habakuk, boi do tarapul rohanta jala songon na dihaol Debata Jahowa ma hita. Tontu, tarapul do rohanta nang pe mangolu di portibi na jahat on! w18.11 20 ¶18-19

Didok Bibel do muse songon dia Jahowa patuduhon holongna tu hita, “Ai songon on do balga ni holong ni roha ni Debata di portibi on, pola do Anakna na sasada i dilehon, asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna.” (Joh. 3:16) Jesus pe holong do rohana tu hita. Dilehon ibana do dirina gabe tobusan. Holongna i ma na boi mambahen hita togu. Jala dipaboa Bibel do nang pe gok “hasusaan” manang “arsak ni roha”, alai “ndang adong na boi manirang hita sian holong ni Debata, na tangkas tarida marhite Kristus Jesus Tuanta.” (Rom 8:35, 38, 39) Ala gok ni sitaononta boi do mambahen loja pingkiranta, manang gabe ndang be las rohanta manomba Jahowa. Alai molo sai taingot balga ni holong ni Jesus tu hita, gabe boi do hita tongtong martahan mangadopi sitaonon. (2 Kor. 5:14) Gabe las ma rohanta ala nunga talehon ngolunta laho manomba Jahowa. Jala alani holong ni Jesus, gabe ndang mandele be hita nang pe hita susa alani mara, parsoalan, metmet ni roha, manang holso ni roha. w18.09 10-11 ¶8-9

Asa tongtong hita marale-ale tu Jahowa, ingkon tajangkon jala taoloi ma sude hatana. Ingkon hasintongan i do na rumingkot di ngolunta. Songon si Daud, ingkon tongtong do taihuthon Hata ni Debata. Alana molo ndang taharingkothon be Hata ni Debata, olo do gabe sai taingot-ingot angka naung tatinggalhon hian. Alani i, ingkon taulahon do sude Hata ni Debata. (Joh. 16:13) Asa unang tatinggalhon hasintongan, ingkon marbisuk do hita mamangke tingki. Alana molo ndang marbisuk hita, boi do gabe suda tingkinta rekreasi, marinternet, manonton TV dohot mangulahon hobitta. Sasintongna, ndang sala mangulahon i. Alai boi do tapangke tingkinta i laho marsiajar dohot marbarita. w18.11 11 ¶7-8

Olo do muba situasinta jala masa na so tarduga di ngolunta. Boi do i mambahen hita marsak jala holsoan. (Poda 12:25) Jadi molo muba situasi di ngolunta jala gabe susa hita, songon dia do carana asa boi paradehon diri? (Ps. 131:1-3) Nang pe mansai susa situasi na taadopi, alai “hadameon na so boi diantusi jolma” boi manjaga ‘pingkiranta’ jala tongtong mangkilala hadameon. (Plp. 4:6, 7) Tingki marsak jala holsoan, “hadameon na so boi diantusi jolma” boi mangurupi hita asa ndang marnaloja jala lam togu manomba Jahowa. Jala, diurupi tondi parbadia do hita asa mangingot ayat-ayat Bibel na boi mangurupi asa tongtong taharingkothon parale-aleon tu Debata.​—Joh. 14:26, 27. w18.10 22 ¶2; 23-24 ¶5, 8

Sada cara na mambahen halak mangulahon na so denggan, i ma gabus. Margabus, i ma paboahon na so sasintongna laho mangoto-otoi sasahalak. Ise do na parjolo sahali margabus? Sibolis! Jala didok Jesus do ibana, “ama ni gabus”. (Joh. 8:44) Andigan do i masa? Masa ma i tingki di porlak Eden hira-hira marribu taon naung salpu. Tingki di Paradeiso, las do roha ni si Adam dohot si Hawa. Alai dipaboa Debata do tu nasida, molo diallang parbue ni “hau parbinotoan ni na denggan dohot na roa”, mate ma nasida. Diboto Sibolis do taringot i, alai dipangke ibana do ulok laho mandok tu si Hawa, “Ndang na tutu hamu mate.” I ma gabus na parjolo sahali. Didok Sibolis do muse, “Diboto Debata do, sadari dipangan hamu sian i, tonggor ma matamuna, gabe doshon Debata hamu umboto na denggan dohot na roa.”​—1 Mus. 2:15-17; 3:1-5. w18.10 3 ¶1-2

Asa ias rohanta, ingkon tongtong do tajaga pingkiran dohot sangkap ni rohanta. Ringkot do on taulahon, asa boi hita dijangkon Jahowa. (2 Kor. 4:2; 1 Tim. 1:5) Didok Jahowa, “Ndang tarbahen manang ise jolma hian marnida Ahu, laos mangolu ibana.” (2 Mus. 33:20) Songon dia do halak na ias roha boi ‘marnida Debata’? Lapatan ni “marnida” di hata Junani i ma, laho mambayangkon, mangantusi, manang laho mananda. Jadi ‘marnida Debata’ lapatanna, tangkas mananda songon dia Debata. Jala, lomo rohanta laho maniru parangena. (Eps. 1:18) Asing ni i, hita boi ‘marnida Debata’ tingki tahilala sandiri songon dia Ibana mangurupi hita. (Job 42:5) Jala, taida do Debata molo tongtong taingot janji ni Jahowa tu angka na marsihohot jala na ias roha. w18.09 18-19 ¶13, 15-16

Nang pe ringkot adong parbinotoan asa boi marbisuk, alai ndang cukup holan mamboto jala mangantusi na sasintongna. Alai, ingkon boi do hita mambahen haputusan. Gari porngis ndang diboto aha na laho masa, alai dipapungu do sipanganonna tu ari marsogot. On patuduhon, marbisuk do porngis. (Poda 30:24, 25) Didok do Jesus “habisuhon ni Debata”, ala tongtong do ibana palashon roha ni Amana. (1 Kor. 1:24; Joh. 8:29) Jadi, pasu-pasuon ni Debata do hita molo marbisuk laho mangulahon na denggan jala tongtong marserep ni roha. (Mat. 7:21-23) Jadi, molo tongtong hamu marserep ni roha, boi do on patoguhon angka dongan di huria asa taronjar marserep ni roha. Sabar jala tongtong ma mangulahon na denggan. Molo tongtong hamu marserep ni roha, boi ma hamu marlas ni roha saleleng ni lelengna. w18.09 7 ¶18

Tingki Jahowa manompa jolma, lomo do rohana asa rap saulaon nasida dohot Ibana. Jadi nang pe saonari hita ndang sempurna, alai molo tongtong marsihohot tu Debata, boi do hita rap saulaon dohot Ibana. Umpamana, gabe “dongan saulaon ni Debata” do hita tingki marbarita na uli jala mambahen sisean. (1 Kor. 3:5-9) Sada hasangapon do di hita ala dipillit Debata mangulahon ulaon on! Alai, ndang holan tingki marbarita na uli hita rap saulaon dohot Debata. Adong cara na asing asa rap saulaon dohot Debata. Na parjolo, i ma mangurupi keluarga jala mangurupi angka dongan di huria. Dung i ringgas manamue, mangurupi di angka ulaon ni organisasi di liat portibi on jala laho tu inganan na mangkaporluhon parbarita na uli. (Kol. 3:23) Ingot ma imbar do ganup halak. Umpamana, ndang sai sarupa umur, kesehatan, situasi, dohot bakat ni angka halak. Alani i, unang ma tabandingkon na boi taulahon dohot na boi diulahon angka dongan tu Jahowa. w18.08 21-22 ¶1-2

Dipapos Jahowa do roha ni si Habakuk, na laho alusan ni Jahowa do sungkun-sungkunna i. Alani i, gabe ndang holsoan be si Habakuk. Didok Jahowa do tu ibana, “Sabar ma ho jala porsea ma tu ahu. Nang pe songon na leleng, alai alusanku do tangiangmi.” Dipaboa Jahowa do tu si Habakuk, nunga ditontuhon Jahowa tingki na pas laho pasauthon janjina i. Alani i, dipatogu do roha ni si Habakuk asa sabar paimahon. Jala ndang ditadingkon Jahowa ibana. Saonari pe, ingkon porsea jala sabar ma hita paimahon Jahowa laho mangurupi hita. Molo tatangihon hatana, boi ma dame pingkiranta nang pe godang sitaononta. Ndang dipaboa Debata tu hita taringot “tingki manang masa” naung ditontuhon i. Alani i, dipaingot Jesus ma hita asa unang sai mamingkiri i. (Ul. 1:7) Pos ma rohanta, diboto Jahowa do tingki na pas laho mangurupi hita. Alani i, marserep ni roha ma hita, sabar, jala porsea ma tu Debata. Andorang so ro dope tingkina, marbisuk ma hita mamangke tingkinta. Jala ulahon ma na dumenggan tu Jahowa sian nasa gogonta.​—Mrk. 13:35-37; Gal. 6:9. w18.11 18-19 ¶13-14

Sasintongna sian dakdanak diajari do si Petrus, ramun do halak na so Jahudi. Alai adong ma piga-piga situasi na masa tu si Petrus na mambahen ibana gabe pasidingkon naung diajarhon i tu ibana. Umpamana, diida ibana ma sada parnidaan sian Debata. (Ul. 10:9-16) Songon si Petrus, ingkon tapareso ma dirinta jala olo manjalo sipasingot, atik boha olo dope hita paimbar-imbarhon. Asing ni i, aha do muse na ingkon taulahon? Molo holong do rohanta tu sude halak, ndang sai curiga be hita. (2 Kor. 6:11-13) Umlomo do rohamuna mardongan tu na sarupa suku, marga, bangso dohot bahasana? Molo songon i dope hamu, marsaor ma tu na asing. Togihon ma angka donganta na sian suku na asing asa rap marbarita dohot hamu. Manang togihon ma nasida asa rap mangan manang marsaor di jabumuna. (Ul. 16:14, 15) Molo diulahon hamu songon i, gabe dihaholongi hamu ma nasida, jala ndang be sai curiga tu nasida. w18.08 10 ¶3; 11 ¶6-7

Piga-piga Sitindangi adong na mambahen gabe ndang imbar sian angka na so sisomba Jahowa. Umpamana, tingki adong acara, piga-piga Sitindangi marjoget na so tama di halak Kristen. Adong do muse na mambahen poto manang komentar na so denggan tu media sosial. Alai tingki mangida nasida, gabe ganggu do roha ni angka dongan na marsitutu ndang mangihuthon pingkiran ni halak di portibi on. (1 Ptr. 2:11, 12) Sude na adong di portibi on mambahen hita gabe mangkaringkothon, “hisap-hisap ni daging, hisap-hisap ni mata dohot manganggarhon” hamoraon. (1 Joh. 2:16) Ala hita nunga dipillit Jahowa, tontu ingkon imbar do hita. Ingkon “tapasiding pangalaho na so pasangaphon Debata dohot hisap-hisap ni portibi on. Alani i, boi ma torang pingkiranta, boi ma taulahon na sintong dohot lomo ni roha ni Debata di tingki on”. (Tit. 2:12) Manang aha pe na taulahon, ingkon tangkas do idaon ni halak molo hita dipillit Jahowa. w18.07 24 ¶13-14

Molo tongtong do hita mangasahon Jahowa, ndang taloas hasalaan ni halak mambahen muruk hita manang gabe sega parale-aleonta tu Ibana. Ringkot do on taboto, tarlumobi molo adong tanggung jawabta di organisasi, dos songon si Musa. Jadi ingkon marsitutu do hita mangasahon jala mangoloi Jahowa asa boi dipalua. (Plp. 2:12) Alai molo lam godang tanggung jawabta, lam godang do na dipangido Jahowa sian hita. (Luk. 12:48) Jadi, molo holong do rohanta tu Jahowa, ndang adong na boi mambahen hita dao sian holongNa. (Ps. 119:165; Rom 8:37-39) Mansai ringkot do mangasahon Jahowa na “marhabangsa di banua ginjang”. (Ps. 123:1) Boasa? Alana gok do hasusaan na taadopi. Jadi, ingkon mangasahon Jahowa do hita asa taboto na dihalomohon rohaNa laho taulahon. Unang ma gabe sega parale-aleonta tu Jahowa holan alani hasalaan ni halak. w18.07 14 ¶19-20

Las do rohanta ala saonari naposo ni Debata lam marsinondang! Di taon 2017, angka naposo ni Jahowa mangurupi lobi sian 10 juta halak marsiajar Bibel. Asing ni i, marjuta halak ro tu borngin parningotan jala marsiajar ma nasida taringot holong ni Debata marhite tobusan. (1 Joh. 4:9) Di liat portibi on, marragam do bahasa ni Sitindangi Ni Jahowa. Alai nang pe songon i, marsada do hita laho mamuji Jahowa. (Pgk. 7:9) Manang aha pe bahasanta, manang didia pe hita tading, boi do hita gabe “panondang tu portibi on.” (Plp. 2:15) Molo marbarita hita, marsada, jala tongtong jaga, boi ma hita gabe parohon pujian tu Jahowa. w18.06 21 ¶1-3

Umringkot do di Jesus mangkatai dohot borua Samaria. Alana, lomo do roha ni Amana asa marbarita ibana, tarmasuk ma tu borua Samaria on. (Joh. 4:32-34) Ndang diantusi si Jakobus dohot si Johannes parsiajaran na ringkot i. Tingki ro angka sisean dohot Jesus tu Samaria, dilului nasida ma inganan laho marborngin. Alai ndang diloas halak Samaria nasida marborngin disi. Pintor muruk situtu ma si Jakobus dohot si Johannes. Jala dijujui nasida do asa dibahen Jesus ro api sian surgo laho manutung huta i. Alai dipasingot Jesus do nasida. (Luk. 9:51-56) Ra, molo di huta ni nasida di Galilea dibahen songon i, ndang sampe songon i muruk ni nasida. Jadi, ala olo dope nasida paimbar-imbarhon umbahen na muruk nasida. Alai di tingki na asing, marbarita ma si Johannes tu halak Samaria, jala godang do na manangihon ibana. Gabe maila do ibana ala hea muruk ibana najolo.​—Ul. 8:14, 25. w18.06 12 ¶12-13

Mansai ringkot do Hata ni Debata di hita. Alani i, ingkon taihuthon do parenta di Bibel laho mangkatahon na sintong ganup tingki. Alana, gabus do sinjata na jotjot dipangke Sibolis. Molo margabus sasahalak, boi do gabe hansit rohana sandiri, tarlumobi halak na digabusi. (Joh. 8:44) Nang pe mardosa hita, marsitutu ma hita asa unang margabus. (Eps. 4:25) Memang, ndang mura mangulahon i. Si Abigail, na marumur 18 taon mandok, “Ndang sai mura mangkatahon na sintong, tarlumobi di tingki adong parsoalan.” Jadi boasa ingkon tongtong jujur? Si Victoria, na marumur 23 taon mandok, “Molo tahatahon na sintong jala marsihohot, olo do gabe dilesengi hita. Alai godang do labana: gabe pos ma rohanta, lam jonok tu Jahowa, jala lam diargai halak ma hita.” I ma boasa ringkot hita tongtong “marhohoshon hasintongan”! w18.05 22 ¶3, 5

Ingkon lam jaga do hita. Alana portibi on nunga lam sursar. Alai taboto do nunga jonok be ari na ditontuhon Jahowa i. (Mat. 24:42-44) Ingkon sabar do hita paimahon jala tongtong ma taingot pangkirimonta. Tajaha ma Bibel ganup ari, jala tongtong ma martangiang tu Jahowa. (1 Ptr. 4:7) Tatiru ma angka donganta naung martaon-taon marsihohot tu Jahowa. Carana, tajaha ma pengalaman ni nasida. Tapangke ma godang tingki laho manomba Jahowa. Taurupi ma halak na asing, jala marsaor ma hita tu angka dongan. Gabe las ma rohanta, jala hira na hatop ma salpu tingki. (Eps. 5:16) Nang pe hita jolma na mardosa, olo do Jahowa manjangkon hita. Dilehon Ibana do tu hita “silehon-lehonna”, i ma angka sintua di huria. (Eps. 4:8, 11, 12.) Jadi molo dijumpangi sintua hamu, disi ma tingkina boi tatiru bisuk ni nasida jala manjalo podana. w18.06 25-26 ¶15-18

Dipaboa Jesus do tu angka siseanna molo nasida ingkon ‘mian di bagasan rohana’. Boasa didok Jesus songon i? Ala diboto Jesus na porlu do angka siseanna martahan asa tongtong gabe halak Kristen na denggan. Jala, di Johannes 15:4-10, dipangke Jesus do hata “mian” piga-piga hali, asa diantusi angka siseanna na porlu do nasida martahan. Songon dia hita patuduhon na lomo do rohanta mian di bagasan holong ni Kristus? Unduk ma hita tu ibana. Dipangido Jesus do asa taulahon songon naung dibahen ibana. Didok Jesus, “Songon Ahu pe na mangaradoti angka patik ni Damang, gabe mian di bagasan holong ni rohana.” Gabe sitiruon do Jesus di hita. (Joh. 13:15) Sian Amana do parenta ni Jesus i. Jadi, molo taoloi parentana laho marbarita, na patuduhon holong tu Jahowa do hita disi. (Mat. 17:5; Joh. 8:28) Jadi, molo tapatudu holong tu nasida, gabe mian ma hita di bagasan holong ni nasida. w18.05 11 ¶5-7

Tingki poso, godang do na boi pillitonmuna. Umpamana, mamillit singkola, karejo manang na asing. Dipatudos do on songon tingki hamu di persimpangan ni dalan. Molo nunga ditontuhon hamu tujuanmuna, gabe mura ma hamu mambahen haputusan na denggan. Lam tibu hamu manontuhon tujuanmuna, lam hatop ma hamu marhasil. Tapujihon do marribu angka na poso di liat portibi on, ala nunga ditontuhon nasida tujuan na denggan. Diharingkothon nasida do parale-aleonna tu Jahowa dohot tujuan ni nasida i. Marlas ni roha do nasida huhut tongtong marsiajar laho mangihuthon tudutudu sian Jahowa tingki mamutushon laho markeluarga. Didok si Salomo, “Marhaposan tu Jahowa ma ho sian nasa roham. . . . Sai Ibana ma tanda di nasa dalanmu, asa Ibana patigor angka dalanmu.” (Poda 3:5, 6) Holong do roha ni Jahowa tu hamu angka na poso! Arga do hamu di Ibana. Tontu linggomanNa, togutoguonNa, jala pasupasuonNa do hamu. w18.04 28-29 ¶7, 9

Apostel Johannes manguluhon huria Kristen abad parjolo. Disurat ibana do injil taringot ulaon ni Jesus tingki di tano on. Buku on patoguhon halak Kristen saleleng maratus taon sahat tu tingkinta saonari. Umpamana, holan di buku Johannes do tajaha hata ni Jesus na mandok molo tanda ni angka siseanna i ma holong. (Joh. 13:35) Tolu surat na dibahen si Johannes pe marisi hasintongan na mansai arga. Molo metmet rohanta alani hea mangulahon na sala, tarapul do rohanta tingki tajaha molo tobusan ni Jesus ‘paiashon hita sian nasa dosa’. (1 Joh. 1:7) Alai, molo tong dope ndang boi tahalupahon hasalaanta i, tarapul do rohanta tingki taboto na “umbalga do Debata sian rohanta”. (1 Joh. 3:20) Holan si Johannes do na hea manurat “haholongon do Debata”. (1 Joh. 4:8, 16) Jala di suratna na paduahon dohot patoluhon, dipuji ibana do halak Kristen na tongtong marsihohot “di bagasan hasintongan”.​—2 Joh. 4; 3 Joh. 3, 4. w18.04 18-19 ¶14-15