September
Selasa, 1 September
Nang pe ndang hea diida hamu ibana, dihaholongi hamu do ibana.—1 Ptr. 1:8.
Dipatudu Jesus do roha sapangkilalaan tu si Marta dohot tu si Maria. Tingki diida ibana mansai lungun roha ni nasida ala mate si Lasarus, “manetek ma ilu ni Jesus”. (Joh. 11:32-35) Tangis pe Jesus, ndang ala na mate ale-alena i. Alana diboto ibana do na laho paheheonna si Lasarus. Alai tangis pe Jesus, ala diantusi ibana do songon dia lungun ni roha ni angka donganna i. Godang do laba na tadapot molo taparsiajari taringot Jesus na patuduhon roha sapangkilalaan. Gabe lam holong ma rohanta tu ibana ala denggan ibana maradophon na asing. Jala dipatogu do rohanta ala taboto nunga gabe Raja ibana saonari di Harajaon ni Debata. Ndang sadia leleng nai, salpuhononna ma sude hasusaan. Ala hea ibana gabe jolma di tano on, tontu diantusi Jesus do songon dia carana padengganhon angka naung disegai Sibolis. Alai mansai las do rohanta ala “diantusi [Jesus] i do hagaleonta”.—Heb. 2:17, 18; 4:15, 16. w19.03 17 ¶12-13
Rabu, 2 September
Ndang adong manang ise na boi ro tu ahu, anggo so Ama na marsuru ahu i na manogu ibana.—Joh. 6:44.
Taurupi do angka halak laho marsiajar taringot Jahowa. Alai taingot ma, ndang hita na mambahen sasahalak gabe naposo ni Debata. (1 Kor. 3:6, 7) Jahowa do na manogu-nogu halak gabe naposona. Tontu, ganup halak boi do mamillit manjalo barita na tapasahat manang na ndang. (Mat. 13:4-8) Songon Jesus, ndang sude halak manjalo barita na dipasahat ibana. Hape, Guru na mansai burju do ibana. Alani i, unang ma metmet rohanta molo adong halak na so olo manjalo barita na tapasahat. Molo tapatudu roha sapangkilalaan tingki marbarita, godang do laba na tadapot. Gabe lam ringgas ma hita marbarita. Gabe lam las ma rohanta ala adong na boi talehon. Jala gabe lam mura ma angka halak na “tama mandapot hangoluan saleleng ni lelengna” manjalo barita na uli. (Ul. 13:48) Alani i, “binsan adong dope tingki, taulahon ma na denggan tu saluhut halak”. (Gal. 6:10) Jala tahilala ma las ni roha ala pasangaphon goar ni Ama na di surgo.—Mat. 5:16. w19.03 25 ¶18-19
Kamis, 3 September
Pujionku ma Ho di tongatonga ni huria, na marluhut i.—Ps. 22:23.
Didok Raja Daud, “Na sangap do Jahowa jala ingkon mansai sangap do pamujion tu Ibana.” (Ps. 145:3, Bibel siganup ari) Holong do rohana tu Jahowa. Alani i, dipuji ibana do Debata “di tongatonga ni huria”. (1 Kron. 29:10-13; Ps. 40:6) Saonari, sada cara laho mamuji Jahowa, i ma mangalehon komentar di parpunguan. Las do rohanta mambege marragam komentar di parpunguan. Songon komentar ni angka dakdanak nang pe jempek alai las do rohanta mambege i. Boi do muse lam togu rohanta tingki tabege komentar ni halak na baru marsiajar Bibel. Tingki adong halak parila olo mangalehon komentar, manang halak na baru marsiajar bahasanta, tapuji ma “habaranion” ni nasida. (1 Tes. 2:2) Molo dung sae marpungu, tadok ma mauliate tu nasida. Alai hita sandiri pe ingkon talehon do komentarta. Alana ndang holan hita na ingkon dipatogu, na asing pe porlu do tapatogu.—Rom 1:11, 12. w19.01 8 ¶1-2; 9 ¶6
Jumat, 4 September
Tongtong ma hamu mandok mauliate.—Kol. 3:15.
Adong ma sampulu baoa na mandele ala marsahit kusta. Sada tingki, diida nasida ma Jesus sian na dao. Dibege nasida do naung godang halak na dipamalum Jesus. Gogo ma didok nasida, “Jesus, Guru, asi ma roham tu hami!” Dipamalum Jesus ma na sampulu baoa i. Tontu, las do roha ni nasida ala nunga dipamalum. Alai adong ma sada sian nasida halak Samaria. Dung dipamalum, ndang holan mangkilala las ni roha ibana, alai diargai ibana do i marhite mandok mauliate tu Jesus. Alani las ni rohana, gabe dipagogo ma soarana mamuji Debata. (Luk. 17:12-19) Songon halak Samaria i, lomo do rohanta mandok mauliate tu halak na burju tu hita. Jahowa ma sitiruon na dumenggan taringot mandok mauliate. Sada cara ni Jahowa mandok mauliate tu angka halak na mambahen las rohana, i ma marhite mamasu-masu nasida. (2 Sam. 22:21; Ps. 13:6; Mat. 10:40, 41) Didok Bibel, “Ala angka anak na dihaholongi Debata do hamu, tiru hamu ma Ibana.” (Eps. 5:1) Ala lomo do rohanta maniru Jahowa, i do alana boasa ingkon tadok mauliate. w19.02 14 ¶1-2, 4
Sabtu, 5 September
Ndang tagamon sumurut sian ahu habontoronku.—Job 27:5.
Sahalak donganta borua na marsingkola dope, denggan do mandok na so boi ibana dohot tu sada perayaan. Ala diboto ibana ndang lomo roha ni Jahowa tu perayaan i. Sahalak baoa na poso na parila, marbarita sian jabu tu jabu, jala manuktuk jabu ni dongan sasingkolana na jotjot mangarehei Sitindangi. Sahalak baoa disuru bosna asa mambahen laporan na so jujur. Jala didok bosna i molo ndang olo, dipakaluar ma ibana sian karejona i. Hape ingkon karejo do ibana laho manarihon keluargana. Alai denggan ma dipatorang tu bosna i, na ingkon jujur do ibana jala ingkon unduk tu hata ni Debata. (Rom 13:1-4; Heb. 13:18) Sian tolu halak Sitindangi i, taboto ma na barani do nasida jala jujur. Alai na rumingkot, setia do nasida tu Jahowa. Ndang olo nasida mangalo prinsip ni Debata. On mambahen las roha ni Jahowa. Tontu, hita pe lomo do rohanta mambahen las roha ni Jahowa. w19.02 2 ¶1-2
Minggu, 6 September
Sude na adong di Patik i, holan halinu ni angka na denggan na naeng ro do i.—Heb. 10:1.
Di Patik ni si Musa, ingkon dilinggomi do halak na susa. Umpamana, halak na so marama so marina, ina na mabalu, dohot halak panompang. Didok hakim ni halak Israel do, “Unang agohon hak ni halak na ro tu hutam dohot halak na so marama so marina, jala unang buat ulos ni na mabalu bahen borok ni utangna.” (5 Mus. 24:17, Bibel siganup ari) Marasi ni roha do Jahowa tarlumobi tu angka halak na susa. Jala uhumonna do angka halak na mambahen na so tigor tu nasida. (2 Mus. 22:22-24) Dipangido Jahowa do asa sude angka na manguluhon naposona tongtong mangkaholongi angka naposona i. Sogo do roha ni Jahowa mangida na mangulahon seks na so patut. Jala ingkon dilinggomi do naposona tarlumobi angka halak na susa. Jala ingkon dibahen do na tigor tu nasida. (3 Mus 18:6-30) Molo pos do rohanta laho bahenon ni Jahowa na tigor tu hita, gabe lam togu do holongta tu Ibana. Jala molo holong do rohanta tu Debata dohot tu uhumna, gabe taronjar do rohanta mangkaholongi na asing jala mambahen na tigor tu nasida. w19.02 24-25 ¶22-26
Senin, 7 September
Tapasiding pangalaho na so pasangaphon Debata dohot hisap-hisap ni portibi on.—Tit. 2:12.
Pingkirhon ma sada contoh songon dia asa boi tajaga rohanta sian angka pingkiran ni Sibolis. Didok Jahowa tu hita “unang ma hea dihatai hamu taringot tu seks na so patut, angka ulaon na ramun, dohot hahisapon”. (Eps. 5:3) Alai songon dia do molo angka dongan di parkarejoan manang di singkola mangkatai taringot seks na so patut? Ra, olo do tarela-ela rohanta asa mambege pangkataion ni nasida manang mangida gambar na rorang na dibagihon nasida. Songon sahalak panjaga, panggora ni rohanta pintor paingothon hita. (Rom 2:15) Alani i tingki masa sisongon i, pintor tapasiding ma i. Tahatai ma na asing manang tatadingkon ma nasida. Ingkon barani do hita pasidingkon pingkiran dohot ulaon ni angka dongan na sala. Molo marsitutu hita mangulahon i, pos ma rohanta diida Jahowa do i. Jala lehononna do gogo dohot bisuk asa boi tapasiding pingkiran sisongon i.—2 Kron. 16:9; Jes. 40:29; Jak. 1:5. w19.01 17-18 ¶12-13
Selasa, 8 September
Dung hubereng saluhut pambahenanku, angka na binahen ni tanganku . . . , ida ma laho salpu do saluhutna, . . . ndang adong hape na hot anggo di hasiangan on.—Pjm. 2:11.
Ndang hea dope adong jolma na ummora jala na umsangap songon si Salomo. Hea do didok ibana tu dirina sandiri, “Antong unjunanku ma ho marhite sian las ni roha, guru lomo ni roham idaonmu!” (Pjm. 2:1-10) Alani i, dibangun ibana do jabu dohot taman na mansai bagak. Dibahen ibana do sude aha na dihalomohon rohana. Alai ndang boi i mambahen ibana marlas ni roha. Olo do hamu marsiajar sian pengalaman ni si Salomo? Lomo roha ni Jahowa asa tatangihon jala taoloi hatana. Alana, ndang lomo roha ni Jahowa jolo tahilala na susa, baru pe taboto sala do na taulahon i. Molo porsea jala taoloi Ibana, ndang solsolanta keputusan na tabahen. Jala ndang lupahonon ni Jahowa “holong na pinatudumuna tu goarna”. (Heb. 6:10) Alani i, patogu ma haporseaonmuna asa boi hamu mambahen keputusan na denggan di ngolumuna. Alana lomo do roha ni Jahowa asa denggan ngolumuna.—Ps. 32:8. w18.12 19 ¶14-15
Rabu, 9 September
Mate do Kristus i humongkop hita tingki mardosa dope hita. Marhite i ma Debata patuduhon holongna tu hita.—Rom 5:8.
Halak na solhot parale-aleonna tu Jahowa, ditiru do pingkiran ni Jahowa. Unduk jala dioloi do Ibana. (1 Kor. 2:12, 13) Didok si Daud do di endena, “Ale Jahowa, holan Ho do parjambaranku.” (Ps. 16:5, Bibel siganup ari) Mandok mauliate do si Daud tu Jahowa ala boi ibana marale-ale jala marhaposan tu Jahowa. (Ps. 16:1) On ma na sai mambahen las roha ni si Daud. Alani i didok ibana ma, “Marolopolop” jala mandok mauliate do ahu tu Jahowa. (Ps. 16:9, 11) Songon pengalaman ni si Daud, ndang hepeng dohot hasonangan ni portibi on na mambahen las rohana. (1 Tim. 6:9, 10) Molo togu haporseaonmuna jala tongtong manomba Jahowa, on do na mambahen hamu marlas ni roha. Carana, lehon ma tingki laho manjaha Bibel, mangida jala mangarimangi angka tompaanna, parangena, dohot holong ni rohana tu hamu.—Rom 1:20. w18.12 22-23 ¶7-8
Kamis, 10 September
Ingkon sangap do pardongan saripeon bahenon ni sude halak.—Heb. 13:4.
Ndang na holan paboahon sambing si Paulus dison. Alai ayat on manjujui asa dipasangap jala diargai halak Kristen parsaripeonna. Alani i, hamu angka naung mardongan saripe, sangap do dibahen hamu parsaripeonmuna? Dipasangap Jesus do parsaripeon. Alani i, ingkon tatiru do ibana. Tingki disungkun halak Parise tu Jesus taringot parsirangan, dipaboa ibana do aha na didok Debata taringot parsaripeon na parjolo sahali. Didok Jesus, “Alani i, tadingkonon ni baoa ma amana dohot inana, jala gabe sada ma nasida na dua.’ Jadi, ndang dua be nasida alai sada nama.” Didok muse, “Naung pinadomu ni Debata, ndang jadi sirangon ni jolma.” (Mrk. 10:2-12; 1 Mus. 2:24) Diboto Jesus, Jahowa do na mambahen parsaripeon jala ingkon hot do parsaripeon i salelengna. Alani i, tingki dibahen Debata parsaripeon na parjolo, ndang didok Ibana tu si Adam dohot si Hawa boi nasida marsirang. Gariada, lomo do rohana asa rap “nasida nadua” salelengna. w18.12 9-10 ¶2-4
Jumat, 11 September
Muba ma hamu marhite paubahon pingkiranmuna.—Rom 12:2.
Dung marsiajar Bibel hita, taparsiajari do boasa ringkot unduk tu uhum ni Jahowa. Molo torus hita marsiajar, gabe taboto ma pingkiran ni Jahowa, aha na dihalomohon Ibana dohot na so dihalomohon. Jala taboto ma muse songon dia cara ni Jahowa mangida sada situasi. Molo taihuthon do cara ni Jahowa tingki mambahen keputusan dohot tingki mangulahon sada ulaon, on patuduhon na tatiru do pingkiranna. Lomo do rohanta maniru pingkiran ni Jahowa. Alai olo do sipata maol mangulahon i, ala jolma na mardosa dope hita. Umpamana, maol do taantusi boasa imbar cara ni Jahowa tu cara ni jolma tingki mangida ulaon na rorang, holongan di hepeng, ulaon marbarita, taringot mudar manang na asing. Alai songon dia carana asa boi maniru pingkiran ni Jahowa? Ingkon taparsiajari do Bibel asa taantusi pingkiran ni Jahowa. Dung i, tarimangi ma i jala marsitutu maniru pingkiran ni Debata. w18.11 27-28 ¶2-4
Sabtu, 12 September
Sadia leleng on, ale Jahowa, joujou ahu, matua so ditangihon ho?—Hab. 1:2.
Mansai susa do parngoluan di tingki ni si Habakuk ala godang parjahat. Diida ibana kejam do halak Israel jala olo do nasida mangoto-otoi angka donganna. Gabe marsak ma rohana alani i. Gabe sungkun-sungkun ma rohana, ‘Andigan do salpu on sude? Jala boasa leleng dipasombu Jahowa on?’ Mandele ma ibana alani i. Dipangido ma tu Jahowa asa disalpuhon sude angka hajahaton i. Ra ninna rohana, boasa dipasombu Jahowa na masa on jala boasa ndang dipardulihon Jahowa be angka naposona. Hea do dihilala hamu songon i? Na so porsea be si Habakuk tu Jahowa dohot tu janjina? Sasintongna ndang songon i! Didok pe songon i, na porsea do si Habakuk tu Jahowa na boi Jahowa patoguhon ibana. Ndang diboto si Habakuk boasa masa i. Alani i gabe mabiar do ibana. Ndang diantusi ibana boasa leleng dipasombu Jahowa masa i. Jala boasa dipaloas Jahowa susa ibana. w18.11 16 ¶4-5
Minggu, 13 September
Unang be papungu-pungu arta di tano on.—Mat. 6:19.
Songon si Petrus dohot si Andreas, ditadingkon nasida do karejona manjala dengke asa gabe sisean ni Jesus. (Mat. 4:18-20) Alai lapatan ni hata on, ndang na gabe so karejo hita. Gariada, ingkon karejo do hita laho manarihon keluarganta. (1 Tim. 5:8) Alai dung taboto hasintongan, ndang mangalului arta be na rumingkot di hita. On ma na diulahon si Maria. Lomo do rohana asa gabe par-golf na jago jala mamora. Ndang sadia leleng, marsiajar Bibel ma ibana. Lomo do rohana marsiajar Bibel jala diulahon ibana do aha naung diparsiajari. Diantusi si Maria do ingkon sada do na dipillit ibana, parale-aleonna tu Jahowa manang gabe par-golf na jago. (Mat. 6:24) Alani i, ndang marcita-cita be si Maria gabe par-golf na jago. Saonari, nunga gabe perintis si Maria. Didok ibana do, “On ma tujuan ni ngolunta na sasintongna na mambahen las roha.” w18.11 5-6 ¶9-10
Senin, 14 September
Nda tukang hau i do ibana, anak ni si Maria?—Mrk. 6:3.
Dung marumur 30 taon Jesus, ndang martukang be ibana. Gabe parbarita na uli nama. Ala diboto ibana ulaon marbarita do na rumingkot. Laho paboahon taringot Harajaon ni Debata do umbahen na disuru Debata ibana tu tano on. (Mat. 20:28; Luk. 3:23; 4:43) Ulaon marbarita na uli do na rumingkot di ngolu ni Jesus, jala lomo do rohana asa na asing pe mangulahon songon i. (Mat. 9:35-38) Ra ndang tukang hau hita, alai sude do hita parbarita na uli. Dohot do Debata di ulaon marbarita on. Alani i do hita didok, “dongan saulaon ni Debata”. (1 Kor. 3:9; 2 Kor. 6:4) Tutu do na didok panurat psalmen, “Hasintongan do pangarimpunan ni hatam.” (Ps. 119:159, 160) Jadi, hasintongan do hata ni Jahowa. I do alana lomo do rohanta asa “denggan mangajarhon jala patorangkon hasintongan i” tingki marbarita na uli. (2 Tim. 2:15) Alani i, tongtong ma hita marsiajar asa lam malo mamangke Bibel dohot angka alat na diparade organisasi laho mangajari halak taringot Jahowa, Jesus, dohot taringot Harajaon ni Debata. w18.10 9-10 ¶1-2
Selasa, 15 September
Ingkon urupanmuna do na gale. . . . Ingot hamu ma hata ni Tuan Jesus.—Ul. 20:35.
Molo angka suami maniru Jesus laho patuduhon holong tu keluargana, gabe mura ma istrina patuduhon “sangap” tu ibana. (Eps. 5:22-25, 33) Jala diantusi istrina do pangkilalaan ni suamina. Tingki natua-tua mangargai jala burju tu dongan na asing, boi do i gabe ditiru ianakhonna. Porlu do angka natua-tua mangajari angka ianakhonna burju jala mangargai na asing. Umpamana, paboa ma tu ianakhonmuna asa unang ma marlojongi di Bale Harajaon. Tingki adong acara ramah tamah, paboa ma tu nasida asa manjumolohon natua-tua tingki mambuat sipanganon. Boi do tapuji angka dakdanak ala patuduhon asi ni roha. Umpamana, tingki dibungkahon pintu tu hita. On boi mambahen las roha ni nasida, jala gabe diantusi nasida ma lapatan ni, “Umlas do roha ni halak na mangalehon sian na manjalo.” w18.09 28 ¶5-6
Rabu, 16 September
Holan sada do Pamimpinmuna, i ma Kristus i.—Mat. 23:10.
Tudu-tudu na tadapot sian Jesus Kristus naung gabe Raja, boi mangurupi hita di tingkinta saonari dohot di ari na naeng ro. Jadi, sai ingot ma labana molo diihuthon hamu tudu-tudu na baru. Tingki di ibadat keluarga ulas ma laba ni tudu-tudu na baru di parpunguan manang di ulaon marbarita di keluargamuna. Molo taingot laba ni mangihuthon tudu-tudu sian organisasi ni Jahowa, gabe mura ma hita mangihuthon tudu-tudu i jala marlas ni roha ma hita. Umpamana, gabe hemat do parhepengon ni organisasi ala ndang songon najolo be godang ni sijahaon dicetak. Organisasi boi pasahathon barita na uli tu gumodang halak, alana dipangke do alat na canggih. Jadi, tapangke do sijahaon elektronik, audio, manang video tingki marbarita? On sada cara mangihuthon tudu-tudu sian Kristus na marlomo ni roha asa marbisuk hita mamangke angka na adong di organisasi. Molo taihuthon tudu-tudu sian Kristus, tapatogu do haporseaon ni donganta jala hita pe lam marsada. w18.10 20-21 ¶17-19
Kamis, 17 September
Alani holong ni rohanami tu hamu, ndang holan barita na uli na sian Debata na hulehon hami tu hamu, alai dohot do ngolunami sandiri.—1 Tes. 2:8.
Molo tatiru asi ni roha ni Jahowa, boi do hita gabe dipangke laho mangalusi tangiang ni donganta na marmetmet ni roha! (2 Kor. 1:3-6) Unang ma sai tatuntut angka donganta asa sempurna. Alai masuk angkal ma hita. Molo sai tatuntut do angka donganta asa sempurna, boi do gabe jut rohanta tu angka dongan. (Pjm. 7:21, 22) Alani i, taingot ma Jahowa. Nang pe gok na hurang na tabahen, alai olo do Ibana manjangkon hita. Jadi, hita pe ingkon sabar do mangadopi angka dongan. (Eps. 4:2, 32) Unang ma tatuntut angka donganta sai mangulahon na denggan. Manang gabe tabanding-bandingkon donganta na sada tu donganta na asing. Gariada, tapatogu ma nasida jala tapuji ma molo adong na denggan na diulahon nasida. Molo taulahon i, boi do gabe marlas ni roha nasida manomba Jahowa.—Gal. 6:4. w18.09 13 ¶16-17
Jumat, 18 September
Sipanganonku i ma mangulahon lomo ni roha ni na marsuru ahu jala pasaehon ulaonna.—Joh. 4:34.
Dipatudos Jesus do mangulahon lomo ni roha ni Debata i songon mangallang sipanganon. Molo taallang sipanganon na marvitamin gabe sehat ma hita. Suang songon i ma, lam togu do haporseaonta tingki mangulahon lomo ni roha ni Debata. Molo taulahon na dipangido Jahowa, didok do hita marbisuk. (Ps. 107:43) Jala angka halak na marbisuk mandapot godang pasu-pasu. Didok Bibel, “Ndang tarpatudos tusi. . . . Hau hangoluan do Ibana di angka na mandahopi, jala manang ise na marsitiopan tusi martua do.” (Poda 3:13-18) Jala didok Jesus do, “Marlas ni roha ma hamu molo diulahon hamu i.” (Joh. 13:17) Jadi, marlas ni roha do angka sisean ni Jesus molo tongtong diihuthon nasida na niajarhonna dohot sitiruon na binahenna. Jala, i ma gabe na umringkot di ngolu ni nasida. w18.09 4 ¶4-5
Sabtu, 19 September
Ditompa Debata ma jolma i tumiru rupana.—1 Mus. 1:27.
Nang pe tingki i holan si Adam dohot si Hawa dope na adong di porlak Eden, alai ingkon dipingkirhon nasida do songon dia pinomparna haduan. Alana, didok Jahowa tu nasida asa marpinompari jala mambahen sude tano on gabe paradeiso. (1 Mus. 1:28) Jadi, ingkon marlas ni roha do dibahen nasida angka pinomparna. Jala, on do sasintongna na dihalomohon Jahowa, asa boi si Adam dohot angka pinomparna marlas ni roha. Boi ma nasida rap saulaon mambahen portibi on gabe paradeiso. Jadi, ulaon na mansai balga do on! Aut sugari si Adam dohot si Hawa ndang mardosa, boi ma sude tano on digohi angka halak na sempurna. Jala, boi ma nasida rap saulaon dohot Jahowa mambahen sude portibi on gabe paradeiso. Jala, masuk ma nasida tu ari paradianan ni Debata. (Heb. 4:11) Tontu lomo do roha ni nasida mangulahon ulaon i jala marlas ni roha! Aut sugari si Adam dohot si Hawa ndang mangkaringkothon diri, gok do pasu-pasu na dapot ni nasida dohot angka pinomparna. w18.08 15 ¶2; 17 ¶8-9
Minggu, 20 September
Margabus do ibana tu raja i taringot tu ahu.—2 Sam. 19:27, Bibel siganup ari.
Aha do na boi diulahon hamu molo sasahalak pararathon gabus taringot hamu? Parrohahon ma na masa tu Jesus dohot Johannes Pandidi. (Mat. 11:18, 19) Ndang olo Jesus pasudahon tingki dohot gogona holan laho patorangkon na sintong do ibana. Aha ma na diulahon ibana? Dijujui ibana do angka halak asa mangalului hatorangan na sintong. Lomo do rohana asa diparrohahon nasida ulaonna dohot ajaranna. Didok, “tarida do bisuk sian parniulaonna.” (Mat. 11:19) Adong na boi taparsiajari sian pengalaman ni Jesus. Sipata adong do ra halak na paroa-roahon hita. Jala gabe marsak ma hita alani i. Alai, molo tongtong taulahon na denggan, botoon ni nasida ma na sasintongna. Sian contoh ni Jesus i taboto ma, pangalahonta na denggan, boi do patuduhon sala do hata ni halak na paroa-roahon hita. w18.08 6-7 ¶11-13
Senin, 21 September
Habiari ma Jahowa Debatam jala holan Ibana ma somba. Satia ma hamu tu Ibana.—5 Mus. 10:20, Bibel siganup ari.
Dipaboa do di Bibel taringot si Kain, si Salomo, dohot halak Israel di Dolok Sinai na so mangoloi Debata. Dilehon do tingki tu nasida asa marhamubaon jala mulak tu Debata. (Ul. 3:19) Tangkas ma, ndang pintor ditadingkon Jahowa naposoNa molo mangulahon na sala. Ingot ma si Aron. Disalpuhon do hasalaanna. Saonari pe, asa unang taulahon na sala, dilehon Jahowa do sipasingot tu hita. Dilehon do i marhite Bibel, angka sijahaonta, dohot angka dongan di huria. Jadi, gabe asi do rohaNa tu hita molo taihuthon sipasingotNa. Tingki patuduhon asi ni rohana Jahowa, adong do na tinujuNa. (2 Kor. 6:1) Jadi, ala nunga marasi ni roha Ibana, ‘tapasiding ma pangalaho na so pasangaphon Debata dohot hisap-hisap ni portibi on’. (Tit. 2:11-14) Di tingkinta saonari, sai adong do na mangela-ela hita asa unang marpihak tu Jahowa. Alai marsitutu ma hita asa marpihak tu Jahowa! w18.07 20 ¶20-21
Selasa, 22 September
Ditanda Jahowa do angka na di Ibana.—2 Tim. 2:19.
Songon dia do carana asa lam ditanda Jahowa hita? Na parjolo, ingot ma, tongtong do Jahowa mananda angka halak na marsihohot tu Ibana. (Heb. 6:10; 11:6) Mararga do nasida di Jahowa. Jala na so tigor do Ibana disi molo ndang disarihon angka naposoNa. “Ditanda Jahowa do dalan ni angka na tigor roha i”. Jala diboto Ibana do paluahon naposoNa sian parjahat. (Ps. 1:6; 2 Ptr. 2:9) Na paduahon, ra dipasu-pasu Jahowa do hita marhite cara di na so panagaman. Molo mangulahon na denggan sasahalak asa dipuji donganna, ndang be diupai Jahowa ibana. Boasa? Alana didok Jesus, tingki dipuji sasahalak gabe i do upana. (Mat. 6:1-5) Alai, “mangida di na buni” do Jahowa tu halak na mangulahon na denggan, nang pe ndang adong halak na mamboto. Diparrohahon do nasida jala diupai. Sipata, Jahowa mangupai naposoNa di na so panagaman. w18.07 5 ¶8, 10
Rabu, 23 September
Unang be dok ramun naung ias di Debata.—Ul. 10:15.
Sungkun-sungkun ma roha ni si Petrus, aha do na lapatan ni hata i. Ndang sadia leleng sahat ma suruan ni si Kornelius. Jadi marhite tondi parbadia disuru ma si Petrus asa laho tu jabu ni si Kornelius, dohot angka suruan i. Molo olo dope si Petrus paimbar-imbarhon ‘sian na tarida’, tontu ndang na olo ibana ro tu jabu ni si Kornelius. Alana, ndang hea halak Jahudi ro tu jabu ni halak na so Jahudi. Jadi, boasa olo ro si Petrus? Ala marhite parnidaan i dohot tudu-tudu sian tondi parbadia gabe muba ma pandapotna taringot halak na so Jahudi. Dung ditangihon si Petrus hata ni si Kornelius didok ibana ma, “Nunga tangkas be huboto saonari, na so marimbar jolma di jolo ni Debata. Alai dihalomohon Debata do ganup halak na mangkabiari Ibana jala na mangulahon na sintong, sian bangso na dia pe nasida.” (Ul. 10:34, 35) Las do roha ni si Petrus dung mamboto i. w18.08 10 ¶3-4
Kamis, 24 September
Hasogohon ma na jahat.—Am. 5:15, Bibel siganup ari.
Tutu, ndang taulahon be angka na dihasogohon Debata. Alai, ndang sude dipaboa di Bibel taringot ulaon na boi manang na so boi taulahon. Jadi aha ma na ingkon taulahon? Songon dia ma hita mamboto na dia na dihalomohon Debata? Molo tapangke Bibel laho mangalatik panggora ni rohanta, gabe boi ma hita mambahen haputusan na denggan. Ala dihaholongi Jahowa do hita, dilehon Ibana ma tudu-tudu asa boi mangalatik panggora ni rohanta. Didok Ibana, “Ahu do Jahowa Debatam, na mangajarhon tu ho bahen hatuaonmu, na manogu ho di dalan sidalananmu.” (Jes. 48:17, 18) Jadi molo tarimangi prinsip na adong di Bibel jala tapamasuk tu rohanta, boi ma i mambahen lam denggan panggora ni rohanta. Hasilna, gabe lam marbisuk ma hita mambahen haputusan. Prinsip boi mangurupi hita mambahen haputusan na denggan. Jadi molo taboto prinsip ni Jahowa, gabe taantusi ma pingkiranNa. Jala, gabe taantusi ma boasa dibahen uhumNa i. w18.06 16 ¶5; 17 ¶8-10
Jumat, 25 September
Mangihuthon patik, boi do gararon pajak tu Kesar manang na ndang?—Mat. 22:17.
Angka naposo ni si Herodes manang na mangihuthon si Herodes, martujuan laho mangalului hasalaan ni Jesus. Molo didok Jesus ndang pola manggarar pajak, gabe didok ma ibana musu ni pamarenta Rom. Alai molo didok ibana ingkon digarar i, gabe ndang adong be na mangihuthon ibana. Jadi aha ma na diulahon Jesus? Marbisuk do Jesus di situasi sisongon i. Didok ibana do, “Lehon ma tu Kesar ampuna ni Kesar jala tu Debata ampuna ni Debata.” Diboto ibana do godang sijalo pajak na korupsi, alai ndang gabe i na sai diida ibana. Harajaon ni Debata i do na rumingkot di Jesus, alana holan i do na boi manalpuhon hasusaan ni jolma. Gabe sitiruon do Jesus di hita. Unang ma hita marpihak tu partai politik, nang pe taida hira na adong sada partai na denggan. Jadi halak Kristen tongtong ma mangingot holan Harajaon ni Debata do na sintong. Alani i, unang ma hita mangomentari manang paroa-roahon nasida. (Mat. 6:33) Godang do donganta na hea marhasil di politik tingki ndang Sitindangi dope nasida. w18.06 6-7 ¶9-11
Sabtu, 26 September
Diririt angka anak ni Debata ma boru ni jolma, ala na uli do nasida.—1 Mus. 6:2.
Ra, dijanjihon Sibolis do asa dilehon huaso tu angka suru-suruan laho mangarajai halak. Alai sasintongna, na tinuju ni Sibolis, i ma laho mangambati surirang ni Jahowa taringot ‘pinompar ni boruboru i’. (1 Mus. 3:15) Alai, dibahen Jahowa do asa ndang marhasil sangkapna i. Dibahen Ibana ma Aek na Sumar, asa ndang saut rencana ni Sibolis dohot angka surusuruan na jahat i. Parmainanon dohot hasangapon do umjotjot dipangke Sibolis gabe umpan. Sasintongna, angka surusuruan na jahat i nunga leleng rap dohot Debata di surgo! Alai, sai dipingkiri nasida do sangkap na roa, jala marurat ma i di roha ni nasida. Alani i, tongtong ma taingot, nang pe nunga leleng hita manomba Jahowa, boi do tubu sangkap na roa di bagasan rohanta. (1 Kor. 10:12) Jadi, ingkon jotjot do tapareso rohanta jala pasiding ma molo adong pingkiran na roa dohot ginjang ni roha!—Gal. 5:26; Kol. 3:5 w18.05 18 ¶11-12
Minggu, 27 September
Marsak jala mansai lungun do rohangku.—Rom 9:2.
Metmet do roha ni si Paulus ala godang halak Jahudi na so olo manjangkon barita na uli. Alai nang pe songon i, tongtong do marbarita si Paulus tu nasida. Disurat ibana do songon dia pangkilalaanna tu halak Jahudi, “Sai huparsinta jala hutangiangkon do asa malua bangsongku. Boi do huhatindangkon tu hamu, tung marsitutu do nasida manomba Debata, alai ndang marojahan tu parbinotoan na sintong parsombaonnasida i.” (Rom 10:1, 2, Bibel siganup ari) Na mambahen tongtong si Paulus marbarita tu halak Jahudi, i ma ala ‘diparsinta’ rohana do i. Lomo do rohana asa boi malua nasida. (Rom 11:13, 14) Dipangido si Paulus do tu Jahowa, asa diurupi ganup halak Jahudi manjangkon barita Harajaon i. Didok si Paulus, “Marsitutu do nasida manomba Debata”. Diida si Paulus, adong do sangkap di roha ni nasida laho manomba Jahowa. Diboto si Paulus, adong do halak Jahudi na boi gabe sisean ni Kristus songon ibana. w18.05 4 ¶4; 6-7 ¶13-14
Senin, 28 September
Hatahon ma na denggan laho patoguhon na asing, asa marlaba tu angka na manangihon.—Eps. 4:29.
Ingkon tapingkirhon do songon dia carana asa boi mangurupi angka donganta. Disurat si Paulus do tu angka halak Heber na gabe Kristen, “Pargogoi ma tangan na gale dohot dugul na telluktelluk! Patigor ma dalan sidalananmu, asa unang tarsulandit pat na mengkatengkat, alai asa malum.” (Heb. 12:12, 13, Bibel siganup ari) Sude hita boi patoguhon angka dongan marhite pangkataionta, tarmasuk ma angka na poso. Alani i, disurat si Paulus do poda na mandok, “Molo tung adong apoapo marhite-hite Kristus, dohot sosososo holong ni roha dohot parsaoran ni tondi, nang talup dohot asi ni roha, gohi hamu ma halalas ni rohangkon: Sada ma parrohahon hamu; sada ma haholonganmuna; saroha, sapingkiran ma hamu! Unang ma mardingkandingkan manang marhasangapon na rumar; alai sian toruk ni rohamuna be ma rajumi hamu donganmuna sumurung sian dirimuna! Unang ma na ringkot di hamu be matahon hamu, dohot ma na di dongan!”—Plp. 2:1-4. w18.04 23 ¶10; 24 ¶12
Selasa, 29 September
Angka halak na merdeka do hamu, . . . gabe angka hatoban ni Debata ma hamu.—1 Ptr. 2:16.
Nunga dilehon Jahowa anakNa laho paluahon hita sian dosa dohot hamatean. Alani i, gabe boi ma hita mangalehon nasa ngolunta laho manomba Ibana. Cara na dumenggan patuduhon pangargaion tu haluaon i, i ma mangalehon gumodang tingki dohot gogo laho manomba Jahowa. Molo taulahon on, gabe boi ma tapasiding ela-ela dohot hisap-hisap ni daging na adong di portibi on. (Gal. 5:16) Rimangi ma pengalaman ni si Noak dohot keluargana. Di tingki i, godang halak na jahat jala mangulahon na rorang. Alai ndang olo si Noak raphon keluargana mangihuthon i, jala ndang adong ro tu pingkiranna laho mangihuthon nasida. Marsitutu do nasida mangulahon na diparentahon Jahowa, i ma paulihon sada parau, papunguhon sipanganon dohot angka binatang, jala paingothon godang halak taringot Aek na Sumar. “Dibahen si Noak ma sude, songon na tinonahon ni Debata tu ibana, songon i dibahen”. (1 Mus. 6:22) Ujungna, malua do si Noak dohot keluargana di tingki ro Aek na Sumar i.—Heb. 11:7. w18.04 11-12 ¶8, 11-12
Rabu, 30 September
Lehononku ma tu ho huaso dohot hasangapon ni sude harajaon on, ai nunga dipasahat i tu ahu jala lehononku ma i tu manang ise lomo ni rohangku.—Luk. 4:6.
Dipangke Sibolis dohot angka surusuruan na jahat i do agama palsu dohot bisnis laho “paotootohon liat portibi on”, manang saluhut jolma. (Pgk. 12:9) Dipangke Sibolis do agama palsu laho mansarhon angka gabus taringot Jahowa, jala marsitutu do ibana mambahen asa ndang diboto halak goar ni Debata. (Jer. 23:26, 27) Alani i, dirimpu pigapiga halak nunga manomba Debata nasida saleleng on. Hape sasintongna, surusuruan na jahat i do na disomba nasida. (1 Kor. 10:20; 2 Kor. 11:13-15) Dipangke Sibolis do muse angka bisnis laho paotootohon jolma. Lomo rohana asa dirimpu halak, hepeng do na boi mambahen martua ngolunta. (Poda 18:11) Godang do halak na porsea tu gabusna on, jala gabe suda ma tingki nasida holan laho mangalului “hepeng”. Ndang ringkot be Debata di nasida. (Mat. 6:24, Bibel siganup ari) Gabe ndang adong be holong ni nasida tu Debata, ala hepeng do na rumingkot di nasida.—Mat. 13:22; 1 Joh. 2:15, 16. w18.05 16-17 ¶6-7