Oktober

Tontu, ndang boi taida aha na di bagas roha ni halak songon Jahowa dohot Jesus. Alai boi do taantusi pangkilalaan dohot aha na dihaporluhon angka halak. (2 Kor. 11:29) Saonari, godangan halak holan mangkaringkothon dirina sandiri. Alani i, “unang ma holan mamparrohahon na ringkot di [hita], alai parrohahon ma na ringkot di na asing”. (Plp. 2:4) Angka sintua di huria do na tarlumobi ingkon patuduhon roha sapangkilalaan. Alana martanggung jawab do nasida tu Jahowa laho manjaga angka biru-biruna di huria. (Heb. 13:17) Alani i, asa boi mangurupi angka dongan, ingkon dipatudu nasida do roha sapangkilalaan. Songon dia do nasida boi patuduhon i? Sahalak sintua na patuduhon roha sapangkilalaan, olo do mangalehon tingkina tu angka dongan. Tarlumobi tingki adong donganta na marsak jala naeng paboahon na di rohana, alai ndang diboto aha sidohononna. Lambok do sintua i manungkun jala sabar manangihon. (Poda 20:5) Molo rade angka sintua mangalehon tingkina, boi ma lam pos roha ni angka dongan, lam togu parale-aleon dohot holong ni nasida.​—Ul. 20:37. w19.03 17 ¶14-17

Mandok mauliate, dipatudos do i songon sipanganon na tabo jala lomo rohanta mambagi tu na asing. Suang songon i ma, tingki adong na mandok mauliate tu hita, tontu las do rohanta. Jala tingki tadok mauliate tu na asing, tontu las do roha ni nasida. Alana molo tadok mauliate, diboto nasida do na taargai pangurupion ni nasida tu hita. Jala ndang marisuang pambahenanna i. On boi mambahen lam solhot hita tu nasida. Tingki tadok mauliate tu halak, arga do i dihilala nasida, songon na didok di ayat na di ulas sadari on. Bayangkon ma songon dia bagak ni hiasan mas molo dilongkothon di perak. Tontu mansai arga do i! Songon dia do pangkilalaanmuna molo adong na mangalehon hadiah sisongon i tu hamu? Tontu didok hamu do mauliate jala mansai arga do hatamuna i di nasida. Songon hiasan mas na boi leleng martahan, dos songon i ma tingki tadok mauliate tu halak, boi do i sai diingot nasida saleleng ngoluna. w19.02 15 ¶5-6

Tingki diallang si Adam dohot si Hawa parbue ni hau na di porlak Eden, on patuduhon ndang porsea be nasida tu Jahowa dohot tu aturanna. Gabe nasida sandiri do na manontuhon dia na denggan dohot na roa. Aha ma hasilna? Gabe ndang marale-ale be nasida tu Jahowa. Ndang boi be nasida mangolu salelengna. Angka pinomparna pe gabe mardosa ma jala mate. (Rom 5:12) Imbar do si Adam dohot si Hawa tu sahalak Etiopia. Denggan do dijangkon halak Etiopia i tingki marbarita si Pilippus tu ibana. Mansai arga do di ibana aha naung diulahon Jahowa dohot Jesus. I do alana pintor taronjar rohana asa tardidi. (Ul. 8:34-38) Suang songon i ma nang hita, tingki tardidi jala talehon dirinta tu Jahowa, on patuduhon na taargai do aha naung diulahon Jahowa dohot Jesus tu hita. Jala on patuduhon, na porsea do hita tu Jahowa dohot aturanna taringot na denggan dohot na roa. w19.03 2 ¶1-2

Songon dia caranta patuduhon na setia hita tu Debata? Ingkon tahaholongi do Ibana sian nasa rohanta jala ingkon tabahen do na boi mambahen las rohana. Di Bibel lapatan ni hata “setia”, i ma ndang martihas manang ndang cacat. Umpamana, ndang boi dilehon binatang na cacat tingki mangalehon pelean tu Jahowa. (3 Mus. 22:21, 22) Ndang boi dilehon binatang na so adong patna, pinggolna, matana, manang na marsahit. Ingkon na sehat do na dilehon. (Mal. 1:6-9) Asa mura taantusi boasa dipangido Jahowa songon i, pingkirhon ma sada contoh. Molo tatuhor sada barang, tontu tapillit do barang na mansai denggan. Ndang olo hita manuhor barang i molo adong na sega apala saotik pe. Suang songon i ma pangkilalaan ni Jahowa. Molo holong rohanta jala setia hita tu Ibana, tontu ingkon talehon do na dumenggan tu Ibana. w19.02 3 ¶3

Asa boi tajaga rohanta ndang sae holan pasidingkon angka na roa. Alai ingkon tapamasuk do angka na denggan tu rohanta. Songon tembok kota di tingki najolo, molo ro musu ingkon ditutup do gerbang ni kota i. Alai molo adong na ro mamboan sipanganon, ingkon dibungka do gerbang i. Alana molo sai ditutup do gerbang i boi do gabe kelaparan angka halak disi. Suang songon i ma hita, ingkon tabungka do rohanta ganup ari laho mangihuthon pingkiran ni Debata. Bibel marisi pingkiran ni Jahowa. Alani i molo jotjot tajaha Bibel, na tapaloas do Jahowa manogu-nogu rohanta, pingkiran dohot parniulaonta. Alai songon dia carana asa tadapot godang laba sian panjahaion Bibel? Parjolo sahali ingkon martangiang do hita asa diurupi ‘mangida halongangan’ sian Hata ni Debata. (Ps. 119:18) Ingkon tarimangi do aha na tajaha. Molo martangiang, tajaha Hatana jala tarimangi, gabe boi ma Hata ni Debata adong ‘di tongatonga ni rohanta’. Jala gabe lomo ma rohanta mangihuthon pingkiran ni Jahowa.​—Poda 4:20-22. w19.01 18 ¶14-15

Diboto Jahowa do, ndang sai boi sarupa na talehon tu Ibana. Alai, diargai Ibana do aha pe na talehon. Songon halak Israel, adong do na tolap mangalehon biru-biru manang hambing. Molo pogos, boi do holan dilehon “dua anduhur tabu manang dua anak ni darapati”. Alai molo i pe ndang tolap dilehon nasida, diloas Jahowa do nasida mangalehon “saparsampulu sian saepa itak na lamot”. (3 Mus. 5:7, 11) Nang pe mura “itak”, alai arga do i di Jahowa molo dilehon itak na dumenggan. Sahat tu saonari, sarupa dope pangkilalaan ni Jahowa. Alani i, tingki mangalehon komentar, ndang dipangido Jahowa ingkon malo hita songon si Apollos manang songon si Paulus. (Ul. 18:24; 26:28) Lomo do rohana asa talehon komentar sian nasa tolapta. Taingot ma sahalak ina na mabalu na mangalehon dua hepeng logam na otik argana. Nang pe otik, arga do ibana di Jahowa ala dilehon ibana na dumenggan sian nasa tolapna.​—Luk. 21:1-4. w19.01 8-9 ¶3-5

Ala gabe sisean ni Jesus, ingkon dihasogohon angka halak do hita. Jala nunga didok Jesus hian, na laho susa do dibahen muse angka siseanna di ari parpudi. (Mat. 24:9; Joh. 15:20) Di surirang ni si Jesaya pe nunga dipaboa, ndang holan dihasogohon musu hita. Alai dibahen nasida do muse godang cara laho mangalo hita. Umpamana, didok nasida do angka hata na so tutu taringot hita manang gabe disiksa hita. (Mat. 5:11) Dipaloas Jahowa do on masa tu hita. (Eps. 6:12; Pgk. 12:17) Nang pe songon i, ndang pola mabiar hita. Didok Jahowa, “tung so adong sinjata na mampan” manang marhasil mangalo hita. (Jes. 54:17) Songon tembok na mangalinggomi hita sian udan haba-haba, songon i ma Jahowa mangalinggomi hita (Jes. 25:4, 5) Aha pe na dibahen musu laho mangalo hita, ndang laho boi nasida marhasil. (Jes. 65:17) Songon dia pe cara ni nasida manang sinjata aha pe na dipangke mangalo hita, ndang boi nasida marhasil. Alani i, angka na mangalo naposo ni Debata ingkon talu jala dipaila.​—Jes. 41:11, 12. w19.01 6-7 ¶13-16

Angka naposo, dilehon Jahowa do tu hamu kebebasan laho mamillit. Alani i, tingki mambahen keputusan ingkon marbisuk do hita. Ra adong do diida hamu piga-piga donganmuna na mangida pornografi, mangulahon seks na so patut, mangihuthon olahraga na berbahaya dohot kecanduan narkoba manang alkohol. Hira na las do roha ni nasida mangulahon i. Alai angka ulaon i, boi do mambahen nasida gabe marsahit, kecanduan jala boi gabe mate. (Gal. 6:7, 8) Dirimpu nasida, molo diulahon i nunga dapot ni nasida las ni roha. Alai sasintongna, ndang songon i. (Tit. 3:3) Molo dioloi hamu Jahowa jala diargai hamu kebebasan na dilehonna, marlaba do i tu hamu. Boi ma hamu tongtong sehat jala ndang susa be ngolumuna. (Ps. 19:8-12) Gabe halak na martanggung jawab ma hamu di adopan ni Jahowa dohot natua-tuamuna, molo marbisuk hamu jala dioloi hamu Hata ni Debata. Gabe pos ma roha ni natua-tuamuna tu hamu.​—Rom 8:21. w18.12 19-20 ¶16-17

Dung mardosa si Adam, gabe godang do na muba. Umpamana, gabe mate ma jolma, jala on mambahen muba parsaripeon. I do alana didok si Paulus tu halak Kristen, molo mate dongan saripe ni sasahalak, boi do muse ibana marhasohotan. (Rom 7:1-3) Tangkas do di paboa Debata di Patik na dilehon tu halak Israel taringot parsaripeon. Umpamana, di tingki i boi do sahalak baoa Israel mambuat istri lobi sian sada. Nunga somal on diulahon andorang so dilehon Debata dope Patik tu nasida. Alai di Patik i, dipaboa ma aha na ingkon ulahonon ni nasida. Umpamana, molo dibuat sahalak baoa sahalak hatoban gabe istrina dung i mangoli muse tu borua na asing, ingkon tongtong do sarihononna istrina na parjolo i dohot ianakhonna. (2 Mus. 21:9, 10) Saonari, ndang Patik ni si Musa be na taihuthon. Alai gabe taboto do, na mansai arga do parsaripeon i di adopan ni Debata. On mangurupi hita asa tongtong pasangaphon parsaripeon. w18.12 9-10 ¶3; 10 ¶5-6

Dung dipaboa si Habakuk holso ni rohana, sungkun-sungkun do rohana songon dia do cara ni Jahowa mangalusi i. Ala Debata parholong do Jahowa, diantusi do songon dia pangkilalaan ni si Habakuk. Diboto do na susa si Habakuk jala porlu diurupi. Ndang muruk Jahowa tu si Habakuk ala dipaboa holso ni rohana. Gariada, dipaboa Jahowa do tu si Habakuk aha na laho bahenonna tu halak Jahudi na so setia. Jadi, tu si Habakuk do parjolo sahali dipaboa Jahowa na laho ripashononna parjahat. Dipaboa Jahowa do tu si Habakuk laho uhumonna do angka halak na jahat di Juda. Didok Jahowa, laho masa do i “di angka arimuna”. Tutu do masa panguhuman i di tingki ni si Habakuk. Dialusi Jahowa do tangiang ni si Habakuk i, alai ndang songon na di rohana. w18.11 17 ¶7-8

Songon dia do pangkilalaanmuna tu halak na so mananda hasintongan dope? Songon si Paulus, marbarita na uli do ibana tu angka halak naung mamboto taringot Jahowa i ma halak Jahudi. Alai, tong do ibana marbarita tu angka halak sisomba gana-ganaan. Tingki baru dope si Paulus gabe misionaris, laho ma ibana tu kota Listra dohot si Barnabas. Alai gabe dibahen halak Likaonia do si Paulus dohot si Barnabas, songon angka debata ni nasida. Jala dijou do si Paulus dohot si Barnabas debata Zeus dohot Hermes. Alai, gabe ginjang do roha ni si Paulus dohot si Barnabas ala dibahen songon i? Gabe didok roha ni nasida do, on ma tingkina marlas ni roha dung ditaon nasida hasusaan di dua luat na parpudi na dijumpangi nasida? Dirimpu nasida do gabe dalan do on asa lam godang halak mambege barita na uli? Ndang songon i! Gariada, sogo do roha ni nasida. Jala gogo do didok nasida, “Boasa bahenonmu songon on? Jolma na gale do hami songon hamu.”​—Ul. 14:8-15. w18.09 4-5 ¶8-9

Molo dung taparsiajari jala taulahon poda ni Bibel, ingkon muba do parniulaon dohot pingkiranta. Didok apostel Petrus, “Songon dakdanak pangoloi ma hamu, unang be olo hamu dirajai sangkap ni rohamuna najolo tingki ndang ditanda hamu dope Debata.” Jala didok ibana do muse, “Badia ma hamu di sude parniulaonmuna”. (1 Ptr. 1:14, 15) Di kota Korint najolo, godangan do halak mangulahon na roa. Alai, muba do nasida dung mamboto hasintongan. Suang songon i ma di tingki saonari, godang do halak na mambahen hamubaon dung mamboto hasintongan. Didok si Petrus do, “Nunga godang dipangke hamu tingkimuna najolo mangihuthon lomo ni roha ni angka bangso. Diulahon hamu do ulaon ni halak na so umboto ila, hisap-hisap ni daging, mabuk, marpestai sahat tu na mabuk, martaru minum, jala manomba angka gana-ganaan.”​—1 Ptr. 4:3. w18.11 7 ¶13

Songon dia do laho mamboto sasahalak na “tama mandapot hangoluan saleleng ni lelengna”? Halak Kristen di abad na parjolo boi pajumpang dohot halak sisongon i holan tingki marbarita na uli. Didok Jesus do tu angka siseanna, “Tu kota manang tu huta na dia pe hamu laho, lului ma na olo manjalo baritamuna”. (Mat. 10:11) Suang songon i do di tingkinta saonari. Angka halak na so ias roha, na ginjang roha manang na so mangkaringkothon parbinotoan taringot Debata, ndang na laho olo manangihon barita na uli. Holan halak na ias roha, na serep roha jala na lomo rohana mamboto hasintongan do na talului. Mangalului halak sisongon i, dipatudos do songon ulaon ni Jesus tingki gabe tukang hau. Ingkon dilului ibana do hau na denggan andorang so mambahen lamari, kursi, meja, podoman, pintu, auga, manang na asing. Dung i, ingkon dipangke ibana ma angka alatna dohot parbinotoanna asa boi mambahen i. Saonari pe, ingkon talului do halak na ias rohana. Dung i, boi ma tapangke angka alat dohot parbinotoanta laho mangurupi nasida asa gabe sisean.​—Mat. 28:19, 20. w18.10 10 ¶3-4

Parbarita na uli na gabe sitiruon na mansai denggan, i ma si Pilippus. Diharingkothon ibana do ulaon marbarita nang pe muba situasi di ngoluna. Las do rohana tingki ditugashon tu Jerusalem. (Ul. 6:1-6) Dung dibunu si Stepanus, gabe muba ma situasina di Jerusalem. Adong ma paraloan na mansai borat na diadopi halak Kristen disi. Ala songon i do situasina, lari ma halak Kristen sian Jerusalem. Alai, tongtong do ringgas si Pilippus di ulaon marbarita. Jadi laho ma ibana tu kota Samaria. Godang do disi halak na so hea mambege barita na uli. (Mat. 10:5; Ul. 8:1) Rade do si Pilippus ditogihon marhite tondi parbadia manang tudia pe. Jadi ditugashon Jahowa ma ibana tu inganan na so hea dope angka halak mambege barita na uli. Godang halak Jahudi na leas jala kasar tu halak Samaria. Alai ndang imbar dibahen si Pilippus angka halak. Pintor ringgas do ibana paboahon barita na uli tu nasida. Jala denggan do diparrohahon halak Samaria barita na uli i! (Ul. 8:6-8) Nang pe songon i situasi ni si Pilippus, tongtong do ringgas ibana di ulaon marbarita. Jala tongtong do Jahowa mamasu-masu ibana dohot keluargana.​—Ul. 21:8, 9. w18.10 25 ¶14-16

Tingki di Dekapolis Jesus, ro ma angka halak jala “diboan ma tu ibana sahalak na nengel jala na ngungu.” (Mrk. 7:31-35) Dipamalum Jesus do na marsahit i. Alai ndang di jolo ni na torop. Boasa? Diboto Jesus do olo do gabe maila halak na ngungu i di jolo ni torop halak. Alani i, diboan Jesus ma ibana “pulik sian natorop i” jala disi ma ibana dipamalum. Tontu ndang boi hita mambahen tanda halongangan. Alai, ingkon tapingkirhon do aha na porlu dohot songon dia pangkilalaan ni angka donganta jala burju ma tu nasida. Jadi tangkas do diantusi Jesus pangkilalaan ni na ngungu i jala asi do rohana tu na ngungu i. Suang songon i ma hita. Ingkon tapatudu ma asi ni roha tu naung matua dohot tu na cacat. Holong do na gabe tanda ni halak Kristen, ndang holan mangulahon na sintong. (Joh. 13:34, 35) Holong do na manjujui hita gabe olo mangurupi angka donganta na matua manang na cacat, asa boi ro tu parpunguan jala asa boi dohot marbarita na uli. Taurupi do nasida nang pe i maol taulahon manang gabe umgodang na tabahen.​—Mat. 13:23. w18.09 29 ¶7-8

Mansai arga do hita di Jahowa dohot Jesus. (Gal. 2:20) Ingkon asi do rohanta tu angka dongan ala holong hian do rohanta tu nasida. Alani i didok Bibel, “Marsitutu ma hamu mangulahon manang aha pe asa mambahen dame jala masipatoguan ma hamu.” (Rom 14:19) Tapaima ma tano na imbaru. Alana, disi ndang adong be annon halak na marmetmet ni roha! Ndang adong be na marsahit jala na marporang. Mangolu ma angka halak salelengna. Ndang adong be hasusaan, parsoalan di keluarga, manang jut ni roha. Gabe sempurna ma sude halak di ujung ni saribu taon. Jala angka halak na marsihohot sahat tu ujian na parpudi gabe dipillit Jahowa ma nasida gabe anakna di tano on. “Jala dapot ni nasida ma hasangapon na mansai balga songon na dilehon tu angka anak ni Debata.” (Rom 8:21) Jadi, tongtong ma tapatudu holong laho patoguhon angka dongan jala masiurupan ma hita sahat tu tano na imbaru. w18.09 11 ¶10; 13 ¶18

Molo didok marsiajar, ndang sae holan manjaha sambing jala mangalusi sungkun-sungkun na adong di parsiajaran i. Alai ingkon tarimangi do na taparsiajari i. Tarimangi aha na dipaboa taringot Jahowa, aha do na diulahon Ibana, jala songon dia pingkiranna. Marsitutu ma hita mangantusi boasa disuru Jahowa hita mangulahon sada ulaon. Jala boasa ingkon tapasiding na so dihalomohon rohana. Tarimangi ma muse aha na ingkon tapauba di pangalaho dohot pingkiranta. Tontu, ndang sude boi tarimangi na taparsiajari i. Alai, ingkon gumodang do tingkinta mangarimangi sian manjaha. (1 Tim. 4:15) Tingki mangarimangi Hata ni Debata, gabe ‘taboto ma’ jala pos ma rohanta, na umbisuk do Jahowa sian pingkiranta sandiri. Boi ma taantusi sada situasi dos songon cara ni Jahowa mangida situasi i. Dung i, gabe rade ma hita mangulahon i jala olo ma hita paubahon pingkiranta. (Rom 12:2) Lam leleng, gabe boi ma tatiru pingkiran ni Jahowa. w18.11 28 ¶5-6

Didok si Paulus, “dongan saulaon ni Debata” do ibana dohot halak Kristen di abad na parjolo. Alana, marbarita do nasida jala mangajari angka halak taringot hata ni Debata. (1 Kor. 3:6) Jadi, hita pe saonari gabe “dongan saulaon ni Debata”. Alana, las do rohanta mangalehon tingki, gogo, dohot artanta asa boi mangulahon ulaon marbarita na uli. Jadi, on sada hasangapon do di hita! Parohon las ni roha do molo talehon gogonta dohot tingkinta ala marbarita na uli jala mangurupi halak marsiajar Bibel. Songon i do na dihilala godangan donganta na mangurupi halak marsiajar Bibel. Hita pe, las do rohanta tingki mangida parsiajar Bibelta lam porsea tu na diparsiajari ibana jala mambahen hamubaon di ngoluna. Jala olo do ibana paboahon naung diparsiajari i tu na asing. Suang songon i ma las ni roha ni Jesus. Disuru ibana do 70 halak marbarita, jala mulak di bagasan las ni roha do nasida ala mandapot pengalaman na mansai denggan.​—Luk. 10:17-21. w18.08 18 ¶11-12

Molo paposhu hita tu dirinta sandiri, gabe didok rohanta ma sai sintong do pandapotta. Tabahen ma kesimpulan hape ndang taboto dope na sasintongna. Ra maol do hita marpingkiran positif tu sahalak donganta ala adong na so tahalomohon sian ibana. Alai, molo songon i do hita gabe mura ma hita curiga. Jala, molo tabege adong hatorangan na so denggan taringot ibana, olo do gabe tahaporseai i nang pe ndang adong buktina. Aha ma parsiajaranna tu hita? Molo tapaloas pingkiran na negatif masuk tu rohanta, boi do gabe manguhumi hita hape ndang taboto na sasintongna. (1 Tim. 6:4, 5) Unang ma adong pingkiran na negatif songon late ni roha dohot sogo ni roha di rohanta. Taingot ma, lomo do roha ni Jahowa asa tahaholongi angka donganta jala tasalpuhon hasalaan ni nasida.​—Kol. 3:12-14. w18.08 7 ¶15; 8 ¶18

Jahowa do nampuna hita, ala Ibana do na manompa hita. (Ps. 100:3; Pgk. 4:11) Alai ndang sude jolma dipillit Ibana gabe naposoNa. Umpamana di Psalmen 135 didok do, “Ibana nampunasa” halak Israel najolo. (Ps. 135:4) Jala, songon na disurirangkon si Hosea adong do piga-piga na so halak Israel gabe naposo ni Jahowa. (Hos. 2:25) Masa ma i tingki mulai dipillit Jahowa angka na so halak Israel laho mamarenta raphon Kristus. (Ul. 10:45; Rom 9:23-26) Marhite tondi parbadia do nasida dipillit. Jala dijou ma nasida “bangso na badia” manang “bangso ni Debata”. (1 Ptr. 2:9, 10) Alai songon dia do angka na marpangkirimon di paradeiso? Nasida pe dijou Jahowa do “bangsongku” dohot “halak na hupillit”.​—Jes. 65:22. w18.07 21 ¶1-2

Ditiru halak Kristen do Kristus. Jala godang do sitiruon na dibahen ibana laho mangurupi hita asa patuduhon asi ni roha. (Mat. 20:28) Jadi tasungkun ma dirinta, ‘Marsitutu do ahu maniru Jesus?’ (1 Ptr. 2:21) Las do roha ni Jahowa molo tatiru Ibana dohot Jesus. Caranta laho maniru nasida, i ma manarihon na asing. Jala, marsitutu ma laho mangurupi nasida. Laho mangajarhon ringkot ni mangurupi na asing, dipaboa Jesus do sada cerita taringot sahalak Samaria na burju. (Luk. 10:29-37) Didok ibana ingkon taurupi do angka halak, ndang soal manang ise jala sian dia haroroanna. Dipaboa Jesus do cerita on ala disungkun sahalak Jahudi ibana, “Ise do sasintongna donganku jolma?” Sian alus ni Jesus, taboto ma asa boi pasonangkon Jahowa, ingkon taurupi do na asing songon sitiruon sian halak Samaria i. w18.08 16 ¶5-6

Sai dipasu-pasu Jahowa do si Maria ala rade ibana pagodang-godangkon dohot manjaga Jesus. Sian dia do i taboto? Dibahen Debata do asa disurat taringot si Maria di Bibel. Ra, ndang dohot ibana raphon Jesus tingki marbarita saleleng tolu satonga taon di tano on. Asing ni i, ala nunga mabalu, ra ingkon tading di Nasaret do ibana. Jadi ndang dapotna angka pengalaman na denggan songon na dihilala angka sisean na asing. Alai, diida si Maria do Jesus tingki mate. (Joh. 19:26) Dung i, tingki dilehon Debata tondi parbadia tu angka sisean di ari Pentakosta, dohot do si Maria disi. (Ul. 1:13, 14) Ra, sahalak na miniahan do si Maria. Molo songon i, tontu dohot do ibana mamarenta raphon Jesus salelengna di surgo. Pasu-pasu na sumurung do on di si Maria ala marsihohot ibana! w18.07 5-6 ¶11; 7 ¶14

Dipangke Jesus do prinsip on laho mangajari siseanna, asa dipingkiri hian pangkorhon ni ulaon ni nasida. Umpamana, molo mura-mura muruk, boi do gabe mangulahon na jahat. Jala molo sai na rorang do na dipingkiri, boi do gabe i na diulahon. (Mat. 5:21, 22, 27, 28) Jadi molo taihuthon prinsip ni Debata, boi do on paingothon hita. Gabe tarlatik ma panggora ni rohanta. Jala boi ma tabahen haputusan na pasangaphon Debata. Sude do hita mamangke Bibel laho mangalatik panggora ni rohanta. Alai, sipata ndang sarupa sude panggora ni rohanta di piga-piga situasi. Umpamana, ndang adong disurat di Bibel molo hita ndang boi manginum siinumon na maralkohol. Alai, diorai do hita molo pagodanghu minum manang mabuk. (Poda 20:1; 1 Tim. 3:8) Alai, nang pe ndang ganggu panggora ni rohanta jala ndang pagodanghu hita minum, porlu do tapingkirhon panggora ni roha ni na asing. w18.06 18 ¶10-11

Dipaingot Jesus do angka siseanna asa pasidingkon “ragi”, manang ajaran ni halak Parise, Saduse, dohot partai ni si Herodes. (Mat. 16:6, 12) Alai na porlu taingot, dipaboa Jesus do on ndang sadia leleng dungkon dipangido halak ibana gabe raja. Molo dohot do angka agama marpolitik, boi do gabe tubu hajahaton. Alani i, diajarhon Jesus do tu angka siseanna asa unang dohot marpolitik. I do alana, sintua ni malim dohot halak Parise naeng mambunu Jesus. Alana, mabiar do nasida molo lam godang halak na mangihuthon Jesus. Gabe ndang adong be annon na mangihuthon nasida. Gabe ndang adong be agama dohot politik. Jadi didok nasida ma, “Molo tapasombu ibana songon i, sude ma halak porsea tu ibana, gabe ro ma halak Rom mangarampas bagas joronta on dohot bangsonta.” (Joh. 11:48) Jadi, diatur si Kayapas ma asa dibunu Jesus.​—Joh. 11:49-53; 18:14. w18.06 7 ¶12-13

Sada umpan na dipangke Sibolis, i ma taringot hadatuon. Saonari on, dibahen ibana do angka halak asa mangkalomohon angka begubegu marhite agama palsu dohot hiburan. Dipangke ibana do film, video game, dohot hiburan na asing, asa las roha ni angka halak tu hadatuon. Songon dia asa umpanna i ndang hona tu hita? Ndang boi tapangido asa disurat organisasi angka hiburan dia do na so boi tapillit. Ingkon talatik do panggora ni rohanta asa boi tapillit na denggan hombar tu prinsip ni Jahowa. (Heb. 5:14) Boi do tabahen keputusan na denggan molo taulahon poda na disurat apostel Paulus di ayat sadari on. Tasungkun ma dirinta, ‘Huihuthon do prinsip ni Bibel songon na hupaboa tu na asing? Songon dia pangkilalaan ni parsiajar Bibelhu molo diida ibana hupillit hiburan on?’ Molo taihuthon prinsip ni Bibel, gabe mura ma hita pasidingkon umpan na sian Sibolis.​—1 Joh. 3:18. w18.05 18-19 ¶13

Songon dia hita boi maniru si Paulus? Na parjolo, marsitutu ma hita mangalului halak na sihol rohana tu “hangoluan salelenglelengna”. Na paduahon, tapangido ma tu Jahowa asa diurupi halak na serep roha laho manangihon barita na tapasahat. (Ul. 13:48; 16:14) I do na diulahon si Silvana naung merintis lobi sian 30 taon. Didok ibana, “Andorang so laho ahu marbarita, martangiang do ahu tu Jahowa asa pos rohangku tingki marbarita.” Boi do muse tatangiangkon asa diurupi surusuruan hita laho manjumpangi halak na olo manangihon. (Mat. 10:11-13; Pgk. 14:6) Si Robert, naung merintis lobi sian 30 taon mandok, “Las do rohangku boi rap saulaon dohot surusuruan. Alana diboto surusuruan do songon dia situasi ni ganup halak na di jabu.” Na patoluhon, tongtong ma taingot angka na denggan sian halak, jala tabayangkon ma molo nasida boi gabe naposo ni Jahowa. Sahalak sintua na margoar si Carl mandok, “Sai huida do ias ni roha ni sasahalak sian carana manjangkon, engkelna, pambahenanna, manang sungkunsungkunna.” Molo taulahon i, gabe boi ma hita “marparbue di bagasan habengeton” songon si Paulus. w18.05 6-8 ¶13, 15

Las do rohanta molo mambege sasahalak na hea taurupi marsiajar Bibel boi tongtong marsihohot tu Jahowa. Apostel Johannes manurathon, “On do las ni rohangku na umbolon: Molo hubege, diparangehon angka anakkonku hasintongan i.” (3 Joh. 4) Godang do perintis na mansai las rohana ala mangida sasahalak na diurupi marsiajar Bibel boi tongtong manomba Jahowa, manang gabe perintis. Jadi, molo adong perintis na marmetmet ni roha, boi do tapaboa angka na denggan naung diulahon nasida. Godang pengawas wilayah dipatogu tingki dapotna surat sian angka dongan na marisi hata mandok “mauliate”. Boi do on tabahen tu angka sintua, misionaris, perintis, dohot anggota Betel, ala tongtong nasida marhobas tu Jahowa. Molo tadok mauliate, balga do pangkorhonna i laho patoguhon nasida, nang pe ndang tasadari i. w18.04 24-25 ¶14-15

Ndang diihuthon si Salomo patik on. Adong 700 istrina jala 300 gundikna! (1 Raj. 11:3) Sian bangso na asing do godangan istrina i, alani i gabe dohot ma si Salomo manomba gana-ganaan. Dialo si Salomo do patik ni Debata ala mangoli tu angka borua sian bangso na asing. (5 Mus. 7:3, 4) Lam leleng ndang diihuthon si Salomo be patik ni Jahowa. Gabe diulahon ibana do na sala. Dipajongjong ibana do inganan pamelean tu gana-ganaan, i ma Astarte dohot Kamos. Jala, rap dohot angka istrina do ibana manomba angka gana-ganaan i. Asing ni i, dipajongjong ibana do inganan pamelean i di dolok na di jolo ni Jerusalem. Hape, nunga dibahen ibana bagas joro ni Jahowa disi! (1 Raj. 11:5-8; 2 Raj. 23:13) Ra dirimpu si Salomo, saleleng dilehon ibana pelean di bagas joro, ndang sala angka ulaonna i di adopan ni Jahowa. Sian on taboto, ndang lomo roha ni Jahowa mangida na mardosa. w18.07 16-17 ¶7-9

“Sumbia api” na ditembakhon Sibolis tu hita, i ma gabus taringot Jahowa. Didok ibana do molo Jahowa ndang mangkaholongi hita, jala ndang parduli tu hita. Si Ida, na marumur 19 taon mandok, “Jotjot do huhilala hira na ndang jonok Jahowa tu ahu jala ndang olo Ibana gabe Alealengku.” Aha ma na diulahon ibana molo songon i pangkilalaanna? “Balga do pengaruh ni parpunguan tu haporseaonku. Najolo, holan hundul do ahu tingki marpungu, ndang hea mangalehon komentar. Hurimpu ndang olo halak manangihon komentarhu. Alai saonari, huparade hian do bahan tu parpunguan asa boi ahu markomentar dua manang tolu hali.” Molo perisai ndang mubauba ungkuranna. Alai molo haporseaon ndang songon i. I do na boi taida sian pengalaman ni si Ida. Boi do haporseaonta lam togu manang lam gale. Hita do na manontuhon i. (Mat. 14:31; 2 Tes. 1:3) Jadi, asa boi “lombulombu haporseaon” i mangondingi hita, ingkon tabahen do i asa lam balga jala lam togu! w18.05 24-25 ¶12-14

Dung masa gempa i, gabe muba do parange ni panjaga penjara i jala pintor dipangido ibana do pangurupion. (Ul. 16:25-34) Suang songon i ma, adong do piga-piga halak na so manjangkon barita na uli di mulana. Alai, gabe muba do nasida dung masa hasusaan di ngolu ni nasida. Ra, di-PHK do nasida. Adong muse na lungun rohana ala marsahit, manang ala marujung ngolu halak na hinaholonganna. Olo do gabe sungkunsungkun roha ni nasida taringot ngolu on. Olo do gabe disungkun nasida, ‘Aha ma bahenonku, asa malua ahu?’ Dung i, boi do gabe olo nasida manangihon barita pangkirimon na tapasahat. Alani i, marsitutu ma hita asa tongtong marbarita. Di sada tingki, molo nunga olo nasida manjangkon barita na uli, sai rade do hita laho mangurupi nasida.​—Jes. 61:1. w18.05 12 ¶10-12

Saonari, dibahen Sibolis do godang jolma gabe lilu jala diparhatoban agama na so sintong, arta, dohot pamarentaon ni portibi on. (2 Kor. 4:4) Songon Jesus, boi do hita mangurupi godang halak asa mananda jala manomba Jahowa. Sada tugas na mansai ringkot do i. (Mat. 28:19, 20) Taboto do, ndang sai mura mangulahon i. Di piga-piga inganan, adong do halak na so olo mananda Debata, jala adong do na muruk tingki tapaboa barita na uli on. Alai porlu taingot, parenta ni Jahowa do i. Alani i, tasungkun ma dirinta, ‘Songon dia ahu mangalehon gumodang tingki dohot gogo tu Jahowa?’ Di tingki parpudi on, las do rohanta mambege godang angka donganta na so mangkaringkothon arta, jala gabe perintis. (1 Kor. 9:19, 23) Adong na merintis di huta ni nasida sandiri, alai adong do na pinda laho mangurupi huria na asing. Tapujihon do nasida!​—Ps. 110:3. w18.04 13 ¶13-14