Desember

Sada parange ni Jesus na boi paposhon rohanta, i ma tangkas do diantusi ibana angka hasusaan na diadopi angka jolma. Tingki di tano on Jesus, “marlas ni roha [do ibana] dohot halak na marlas ni roha” jala ‘tangis dohot halak na tangis’. (Rom 12:15) Umpamana, tingki diida ibana marlas ni roha 70 siseanna ala marhasil di ulaon marbarita, “marlas ni roha ma Jesus”. (Luk. 10:17-21) Di tingki na asing, tingki diida ibana marlungun ni roha angka halak ala mate si Lasarus, “mansai lungun ma dihilala ibana”. (Joh. 11:33) Nang pe sempurna Jesus, boi do diantusi ibana hasusaan na diadopi jolma na so sempurna. Boasa boi songon i? Ala holong do roha ni Jesus tu angka jolma. Didok ‘hasudungan ni rohana do jolma manisia’. (Poda 8:31) Alani holongna tu jolma, gabe boi ma diantusi ibana pingkiran ni nasida. Apostel Johannes mandok, “Diboto ibana do na di bagasan roha ni jolma.”​—Joh. 2:25. w19.03 20 ¶1-2

Dibuat Sibolis do sude na adong di si Job. Dibuat artana, parkarejona, jala dibahen do ibana marlea. Dibahen do mate sampulu anakkonna. Dibahen muse bisul na mansai posi tu si Job sian uluna sahat tu patna. On mambahen marsak istri ni si Job. Didok istrina ma tu ibana asa dileai Debata jala mate. Ala songon i sitaononna, didok roha ni si Job ma tumagon ibana mate. Nang pe songon i, tongtong do ibana setia tu Jahowa. Alai dibahen Sibolis do muse cara na asing. Tingki ro tolu dongan ni si Job manjumpangi ibana, didok nasida ma angka hata na so tutu tu si Job. Ndang diapuli nasida si Job. Gariada didok nasida, ndang parduli Debata tu si Job jala na diuhum Debata do ibana. Didok nasida muse na adong do na sala dibahen si Job umbahen na masa i tu ibana!​—Job 1:13-22; 2:7-11; 15:4, 5; 22:3-6; 25:4-6. w19.02 4-5 ¶7-8

Ndang sala molo mabiar hita. Umpamana, ingkon mabiar do hita mambahen hansit roha ni Jahowa. Molo adong biar sisongon on di si Adam dohot si Hawa, tontu ndang dialo nasida Jahowa. Hape gabe dialo nasida do Jahowa. Alani i, gabe mardosa ma nasida tu Jahowa jala diboto nasida ma na dohot do pinomparna mardosa jala mate. Dung diboto nasida i, gabe maila ma nasida. (1 Mus. 3:7, 21) Tutu, porlu do adong di hita biar asa unang mambahen hansit roha ni Jahowa. Alai nang pe songon i, ndang porlu hita pabiarhu tu hamatean. Alana, boi do hita mangolu salelengna dibahen Jahowa. Nang pe mardosa hita, disalpuhon Jahowa do hasalaanta. Alani i, molo tapatudu haporseaon tu tobusan ni Jesus, disesa do dosanta. Alai sada cara na boi taulahon laho patuduhon haporseaon, i ma molo talehon dirinta tu Jahowa jala tardidi.​—1 Ptr. 3:21. w19.03 5-6 ¶12-13

Sasintongna, godang do alasan ni halak Israel laho mandok mauliate tu Jahowa. Tingki dibahen Jahowa Sampulu Tulah di Mesir, dipalua do nasida. Dipalua do muse nasida sian tentara ni Mesir tingki di Laut Merah. Tontu mandok mauliate do nasida alani i. I do alana diendehon nasida ende puji-pujian ala dipalua Jahowa nasida. Alai tongtong do nasida mandok mauliate? Tingki adong muse hasusaan na diadopi nasida, gabe lupa do nasida tu angka na denggan na binahen ni Jahowa. Ndang mandok mauliate be nasida. (Ps. 106:7) Aha buktina? Didok Bibel, “Marmungutmungut ma sandok luhutan ni halak Israel dompak si Musa dohot dompak si Aron.” Sasintongna, na marungut-ungut tu Jahowa do nasida. (2 Mus. 16:2, 8) Hansit do roha ni Jahowa ala ndang diargai nasida sude pambahenanna. Alani i gabe didok Jahowa ma, asing ni si Josua dohot si Kaleb, pasombuonna ma sude halak Israel mate di padang pasir.​—4 Mus. 14:22-24. w19.02 17 ¶12-13

Ndang dipangido Jesus asa balga hian dibahen acara laho mangingot ari hamamatena. Gariada didok ibana do tu angka siseanna asa diulahon i holan sahali sataon jala sederhana. (Joh. 13:15; 1 Kor. 11:23-25) Sian i taboto ma, ndang ginjang roha ni Jesus. Tontu las do rohanta alana halak na serep roha do na gabe Rajanta di surgo. (Plp. 2:5-8) Songon dia hita boi maniru serep ni roha ni Jesus? Marhite manarihon angka na ringkot di donganta. (Plp. 2:3, 4) Ingot ma aha na diulahon Jesus di borngin andorang so mate ibana. Diboto Jesus do ndang sadia leleng nai laho mate nama ibana. Alai nang pe songon i, tongtong do dipingkirhon ibana angka siseanna na setia i. Alana lungun do roha ni nasida molo mate Jesus. Alani i, di borngin andorang so mate Jesus, diajari, dipatogu jala dipapos ibana do roha ni siseanna. (Joh. 14:25-31) Rumingkot do di Jesus mamparohahon na ringkot di halak na asing sian di ibana sandiri. On patuduhon na serep do rohana. Sitiruon na mansai denggan do on di hita! w19.01 21-22 ¶5-6

Hea do hamu taroktohon tingki naeng martudu? Sude do hita hea mangkilala sisongon i. Sasintongna denggan do molo dihilala hamu songon i. Alana didok rohamuna ummalo do na asing sian hamu. On patuduhon na serep do rohamuna. Las do roha ni Jahowa molo serep rohanta. (Ps. 138:6; Plp. 2:3) Alai lomo roha ni Jahowa asa tapuji Ibana jala tapatogu dongan di huria. (1 Tes. 5:11) Dihaholongi Jahowa do hamu jala diurupi Ibana do hamu asa barani. Adong piga-piga ayat na boi mangurupi hita. Didok, sude hita boi do sala mangkatai manang sala caranta pasahathon hata. (Jak. 3:2) Ndang dipangido Jahowa dohot angka dongan hita sude asa sempurna. (Ps. 103:12-14) Nunga gabe keluarganta be angka dongan jala dihaholongi nasida do hita. (Mrk. 10:29, 30; Joh. 13:35) Alani i, diantusi nasida do molo sipata ndang pas komentar na tapasahat. w19.01 8 ¶3; 10-11 ¶10-11

Diboto Jahowa do ndang mura mangulahon on. Alai molo diurupi Jahowa, boi do hamu tongtong marhasil saleleng ni ngolum. Umpamana, marsiajar ma hita sian pengalaman ni halak Israel songon dia nasida boi sahat tu Tano na Dijanjihon dohot pengalaman ni si Daud na manaluhon si Goliat. Andorang so sahat dope halak Israel tu Tano na Dijanjihon, ndang disuru Jahowa nasida marlatik marporang asa gabe tentara na jago. (5 Mus. 28:1, 2) Hira na so masuk akal do parenta on. Alai didok Jahowa, ingkon porsea do nasida tu Ibana jala mangoloi hatana. (Jos. 1:7-9) On ma parenta na dumenggan tu halak Israel. Alana, nunga jotjot diurupi Jahowa nasida manaluhon halak Kanaan. (Jos. 24:11-13) Asa boi taoloi Debata, ingkon porsea do hita tu Ibana. Alana, i do na mambahen hita asa tongtong marhasil. Sahat tu saonari, i do na dipangido Jahowa tu hita. w18.12 22 ¶3-4

Saonari on, adong do na gabe tartuktuk ala ndang setuju nasida tu pemahaman na terbaru. Na asing, adong na gabe mangihuthon ajaran ni halak na murtad. On ma na mambahen adong na gabe maninggalhon Jahowa dohot huria. (Heb. 3:12-14) Sasintongna, ndang masa songon i molo porsea nasida tu Jesus songon si Petrus! Na asing, adong do na so sadar nunga lam dao ibana sian Jahowa. Dipatudos ma i songon solu na di topi ni tao. Molo ndang diingkat solu i, lam leleng boi do i gabe dao sian topi ni tao i. Jala ujungna, boi gabe maup. Didok Bibel, ingkon manat do hita “asa unang maup”. (Heb. 2:1) Sasahalak na naeng maup, olo do ndang disadari na naeng maup ibana. Dos songon i ma, molo dipaloas sasahalak gale parale-aleonna tu Jahowa, lam leleng gabe lam dao ma ibana sian Jahowa. Ujungna, gabe ditinggalhon ma Jahowa. w18.11 10-11 ¶5-6

Olo do hamu mandapot pelatihan asa lam denggan mangulahon ulaon ni Jahowa? Ra, boi do hamu dohot Singkola tu Parbarita Harajaon. Dilatik do angka donganta na dohot tu singkola on, asa lam denggan di ulaon dinas sepenuh waktu. Na dohot tu singkola on, ingkon rade do ditugashon manang didia pe. Jadi, olo do hamu parsidohot tu singkola on? (1 Kor. 9:23) Ala hita naposo ni Jahowa, burju do hita mangalehon, denggan marpangalaho, jala marsihaholongan. Tasarihon do angka dongan ganup ari. Alana parohon las ni roha dohot hadameon do on tu hita. (Gal. 5:22, 23) Dapotta do las ni roha, molo sai tatiru do haburjuon ni Jahowa jala gabe dongan saulaonna, manang songon dia pe situasinta!​—Poda 3:9, 10. w18.08 26 ¶16-18

Adong do alasanna sahalak Kristen boi marsirang jala marhasohotan muse? Parrohahon ma aha na didok Jesus, “Manang ise na manirangkon tunggane boruna jala mangoli tu na asing, na mangalangkup do ibana disi jala mardosa maradophon tunggane boruna. Laos songon i, molo adong sahalak borua na manirangkon tunggane dolina jala muli tu na asing, na mangalangkup do ibana disi.” (Mrk. 10:11, 12; Luk. 16:18) Tangkas ma, diargai Jesus do parsaripeon jala lomo rohana asa tatiru ibana. Molo sahalak baoa manang borua manirangkon dongan saripena na setia jala marhasohotan muse, na mangalangkup do ibana disi. Boasa? Alana molo holan sada do sian nasida na manirangkon dongan saripena, “sada daging” dope nasida di adopan ni Debata. Didok Jesus, molo disirangkon sahalak baoa do istrina na so marsala, olo do gabe mangalangkup istrina i. Boasa? Ra, ala susa parhepengon ni istrina i, gabe muli ma ibana muse. Jadi sarupa na mangalangkup do nasida na dua disi. w18.12 11 ¶8-9

Pangkataion ni si Habakuk dohot Jahowa mambahen dame pingkiran dohot roha ni si Habakuk. On mambahen ibana tongtong sabar paimahon Jahowa mangurupi ibana. Dipatudu si Habakuk do i tingki didok, “Hohom do ahu paimaimahon tingki na naeng masa.” (Hab. 3:16, Bibel siganup ari) Aha do parsiajaran na boi tatiru sian si Habakuk? Na parjolo, tongtong ma hita martangiang nang pe godang sitaononta. Paduahon, tangihon ma na diajarhon Jahowa tu hita marhite Bibel dohot organisasina. Patoluhon, tongtong ma sabar paimahon Jahowa mangurupi hita. Jala pos ma rohanta na urupanna do hita di tingki na pas. Molo tatiru si Habakuk, boi ma dame pingkiran dohot rohanta jala boi ma hita martahan mangadopi sitaononta. Pangkirimon, mangurupi hita asa tongtong marlas ni roha jala sabar nang pe godang sitaonon. Pos ma rohanta, sai urupan ni Jahowa do hita.​—Rom 12:12. w18.11 18 ¶11-12

Songon dia do pangkilalaan ni Jahowa molo tabahen donganta gabe tartuktuk? Didok Jesus, “Manang ise na mambahen sahalak sian na metmet on gabe ndang porsea be tu ahu, tumagon ma digantungkon tu rungkungna batu gilingan na balga jala dilonongkon tu laut.” (Mrk. 9:42) Tangkas do dipaboa Jesus taringot i! Sarupa do pangkilalaan ni Jesus dohot Jahowa. Ndang lomo roha ni Jahowa mangida sasahalak na mambahen donganna gabe tartuktuk. (Joh. 14:9) Ditiru hamu do pangkilalaan ni Jahowa dohot Jesus? Songon dia do hamu patuduhon i? Umpamana, adong ma cara marpangkean dohot penampilan na tahalomohon. Alai ndang lomo roha ni angka dongan di huria tu cara marpangkean sisongon i. Ala boi do gabe marpingkiran na rorang nasida mangida penampilan sisongon i. Molo holong do rohamuna tu angka dongan, tongtong dope ulahononmuna songon i? w18.11 29 ¶9-10

Boasa ingkon setia hita tu Jahowa? Alana Sibolis mangalo tu Jahowa, jala dohot do hita dialo ibana. Didok suru-suruan on do molo Jahowa, i ma Debata na jahat, ndang parduli, jala Parhuaso na so jujur. Alani i, gabe dohot ma si Adam dohot si Hawa mangalo tu Jahowa. I do alana, ingkon tongtong ma hita setia tu Jahowa. (1 Mus. 3:1-6) Sasintongna tingki di Porlak Eden, i ma kesempatan ni si Adam dohot si Hawa patoguhon holong ni nasida tu Jahowa. Alai tingki diela-ela Sibolis, tarida ma na so sian nasa roha nasida mangkaholongi Jahowa. Ra, gabe sungkun-sungkun do roha: Adong jolma na boi tongtong setia tu Jahowa jala mangkaholongi Ibana? Sungkun-sungkun on ma na hea disungkun Sibolis tu Jahowa taringot si Job. (Job 1:8-11) Dos songon hita, jolma na so sempurna do si Job jala boi mambahen na sala. Ala tongtong setia, gabe holong ma roha ni Jahowa tu si Job. w19.02 3-4 ¶6-7

Dibahen Jesus do tudosan laho paboahon na mansai arga do hasintongan i. Dipatudos ma i songon sahalak partiga-tiga na mangalului mutiara na arga. Digadis ibana do sude artana asa boi manuhor mutiara i. Mutiara i, manggombarhon Harajaon ni Debata. Suang songon i ma hasintongan i di angka halak na mangalului. (Mat. 13:45, 46) Hasintongan, i ma Harajaon ni Debata dohot parbinotoan na mansai arga na sian Bibel. Dung tadapot hasintongan i, tontu olo do hita mambahen pengorbanan. Molo ringkot do i di hita, tontu ndang olo hita maninggalhon i. (Poda 23:23) Alai, adong do naposo ni Debata na olo maninggalhon hasintongan. Unang ma olo hita songon nasida! Ingkon taihuthon do tudu-tudu ni Bibel na mandok, ‘Ihuthon ma hasintongan i.’ (3 Joh. 2-4) Lapatanna, ingkon taharingkothon do hasintongan i di ngolunta. w18.11 10 ¶3

Dipaboa suru-suruan i do tu si Josua asa unang mamorangi halak Jeriko. Gariada, ingkon marbaris do nasida sahali sadari laho mangkaliangi huta i sahat tu ari na paonomhon. Dung i, di ari na papituhon ingkon pitu hali ma nasida mangkaliangi huta i. Ra didok roha ni nasida, ‘Ndang adong lapatan ni on!’ Alai diboto Jahowa do aha na dumenggan tu nasida! Ala mangihuthon tudu-tuduna gabe lam togu ma haporseaon ni halak Israel. Jala, ndang ingkon marporang nasida mangalo tentara ni halak Jeriko. (Jos. 6:2-5) Aha do na boi taparsiajari sian carita on? Sipata dipangke organisasi ni Jahowa do cara na baru jala ndang sai taantusi boasa songon i dibahen. Umpamana, ra olo do didok rohanta ndang tabo mamangke perangkat elektronik tingki pelajaran pribadi, tingki marbarita, dohot tingki marpungu. Alai saonari nunga tahilala labana tingki mamangke angka alat i. Jadi, molo taingot do laba ni tudu-tudu na dilehon, gabe lam togu ma haporseaonta jala gabe lam solhot ma hita dohot angka dongan. w18.10 17-18 ¶8-9

Mangkirim do halak Jahudi tu haroro ni Messias asa disalpuhon sude hasusaan ni nasida, jala angka sisean ni Jesus pe porsea taringot i. I do alana, lomo roha ni halak Galilea asa Jesus gabe raja di nasida. Didok rohanasida, Jesus do na boi gabe pamimpin na denggan. Ra, ala diida nasida do Jesus malo marjamita, boi pamalumhon na marsahit, jala boi mangalehon mangan 5.000 halak. Diboto Jesus do na di roha ni nasida i. Didok di Bibel, “Diboto Jesus ma na naeng paksaon ni nasida ibana gabe raja, alani i laho ma ibana muse tu dolok sahalakna.” (Joh. 6:10-15) Marsogotna i tingki ndang gaor be angka halak, dipatorang Jesus ma, ibana ro tu tano on ndang na laho paradehon sipanganon ni nasida ganup ari. Alai naeng mangajarhon taringot Harajaon ni Debata do ibana. Didok do tu nasida, “Unang ma karejo hamu tu sipanganon na olo busuk. Alai karejo ma hamu tu sipanganon na so olo busuk na parohon hangoluan saleleng ni lelengna.”​—Joh. 6:25-27. w18.06 4 ¶4-5

Diantusi Jesus do pangkilalaan na marmetmet ni roha jala na loja songon “arung naung marosahi” manang ‘sumbu na marnehet-nehet’. Alani i, burju jala sabar do ibana maradophon nasida. (Mrk. 10:14) Tontu, hita ndang songon denggan ni Jesus mangajari angka halak jala mangantusi pangkilalaan ni nasida! Alai marbisuk ma hita mamingkirhon caranta mangkatai, andigan hita mangkatai jala sadia leleng hita mangkatai dohot nasida. Saonari on, marjuta halak ‘disusai jala ndang disarihon’ angka pejabat na korupsi, angka pengusaha, parpolitik dohot angka pemimpin agama di portibi on. (Mat. 9:36) Alani i, godang do na so porsea tu manang ise pe jala ndang marpangkirimon. Molo songon i, ingkon burju jala taantusi ma pangkilalaan ni nasida marhite mamillit hata na denggan jala lambok ma mangkatai tu nasida! Godang halak na olo manangihon barita na tapasahat ndang alani malonta patorangkon isi ni Bibel. Alai, ala tapatudu holong jala taargai nasida. w18.09 31 ¶13-14

Molo sai taharingkothon do parale-aleonta tu Debata, na patuduhon lomo do rohanta mananda Debata. Tahaporluhon do pangurupion dohot tudu-tuduna. Songon dia do hita mangido i? Taparsiajari ma Bibel, oloi ma Debata, jala tabahen ma ulaon manomba Jahowa gabe na rumingkot di ngolunta. Molo taulahon i, las ma rohanta. Gabe lam pos ma rohanta tu janji ni Debata na laho saut satongkin nai. (Tit. 2:13) Ringkot do tongtong togu parale-aleonta tu Jahowa. Jadi manang aha pe na masa di ngolunta, boi ma hita tongtong marlas ni roha. I do alana didok si Paulus, “Sai marlas ni roha ma hamu alani Tuhan. Hudok ma muse: Marlas ni roha ma hamu!” (Plp. 4:4) Asa jonok tu Jahowa, tapangido ma bisuk sian Ibana. (Poda 3:13, 18) Asa torus tahilala las ni roha, ingkon tongtong do taulahon naung taparsiajari sian Bibel. I do alana didok Jesus, “Nunga diboto hamu angka i, alai marlas ni roha ma hamu molo diulahon hamu i.” (Joh. 13:17; Jak. 1:25) Ringkot do on taulahon laho patuduhon na tutu do holong rohanta tu Jahowa jala asa tongtong marlas ni roha. w18.09 16 ¶4-6

Didok si Paulus do si Epapras, “donganku na tarhurung”. (Plm. 23) Nang pe si Epapras tarhurung songon si Paulus, alai sai diingot ibana do angka dongan di huria. Tangkas do ditanda si Epapras angka donganna. Tarida do i sian tangiangna. Didok ibana do goar ni angka dongan sahuria di tangiangna. Jadi, hita pe boi do manangiangkon angka dongan. Jala marlaba do tangiangta i tu angka dongan. (2 Kor. 1:11; Jak. 5:16) Ise do na laho ditangiangkon hamu? Ra, angka donganta di huria na marungkil mangadopi hasusaan. Manang angka dongan na mangadopi ela-ela. Jala boi do muse ditangiangkon hamu angka dongan na marhabot ni roha ala baru ditadingkon na dihaholongi nasida. Tangiangkon ma muse angka dongan na susa ala mara dohot porang na baru masa di inganan ni nasida, dohot na susa di parhepengon. Jadi, godang do donganta na porlu tatangiangkon. w18.09 5-6 ¶12-13

Ndang na lapatanna holan taringot mangalehon hepeng. Boi do tapatogu angka halak, talehon poda sian Bibel, jala taurupi na asing tingki susa. (Ul. 20:31-35) Jadi, sian na didok si Paulus dohot na diulahon ibana, taboto ma mansai ringkot do mangalehon tingkinta, gogonta, holongta, jala tasarihon na asing. Angka panulingkit na mamparsiajari taringot parange ni jolma mandok, parohon las ni roha do molo burju mangalehon. Disurat do muse di sada sijahaon, godang halak mandok lam marlas ni roha do nasida dung mangurupi na asing. Didok angka panulingkit i do muse molo olo hita mangurupi na asing gabe marlapatan do ngolunta. Piga-piga halak na pistar pe mandok, sasahalak na rade mangurupi na asing gabe lam sehat do jala marlas ni roha. Tontu, nunga taboto on, ala nunga dipaboa Jahowa tu hita, sai las do roha ni halak na mangalehon.​—2 Tim. 3:16, 17. w18.08 20 ¶17-18

Paposhon roha do surirang na dipaboa si Jesaya taringot Jesus Kristus. Surirangna i mandok molo Jesus ‘ndang manguhum marguru tu parnida ni matana, jala ndang manguhum marguru tu na binege ni pinggolna. Marhite-hite hatigoran tahe uhumonna angka na pogos’. (Jes. 11:3, 4) Boasa on boi paposhon rohanta? Alana, jotjot do angka halak saonari on paimbar-imbarhon halak. Jadi, tahaporluhon do sahalak Panguhum na tigor, i ma Jesus. Ala, ndang olo Jesus manguhumi hita sian na niidana! Ganup ari sai adong do pandapotta taringot angka halak. Ala jolma na mardosa dope hita, ndang boi dope hita songon Jesus. Sipata olo do hita marpandapot na so denggan taringot sasahalak. Jala mura do hita porsea tu na taida. Jadi didok Jesus do unang uhumi halak “mangihuthon na tarida, alai tigor ma hamu manguhumi.” Jadi lomo do roha ni Jesus asa tatiru ibana. Jala ndang manguhumi halak sian na taida. w18.08 9-10 ¶1-2

Saonari pe, mangkatai do Jahowa tu hita. Tutu, ndang hea tabege soara ni Jahowa sian surgo. Alai dilehon Ibana do tu hita Hatana na tarsurat, i ma Bibel na boi manogu-nogu hita. Asing ni i, marhite tondi parbadiana, diparade “naposo haposan” do angka na tahaporluhon laho patoguhon hita. (Luk. 12:42) Mansai godang do na diparade nasida, songon publikasi tercetak manang elektronik, video, dohot rekaman ni sijahaonta na boi patoguhon haporseaonta! Songon na dipaboa di Bibel, pos do rohanta na Jahowa do parhuaso. Jala laho padengganonna do muse angka naung sega na dibahen Sibolis dohot portibi na jahat on. Alani i, tongtong ma tatangihon soara ni Jahowa. Molo taulahon i, boi ma hita mangadopi angka hasusaan saonari dohot di ari na naeng ro. Bibel mandok, “Ingkon sabar do hamu, asa molo dung diulahon hamu lomo ni roha ni Debata, dapotmuna ma na dijanjihonna i.”​—Heb. 10:36. w19.03 13 ¶17-18

Nunga leleng si Musa manguluhon bangso Israel, alai saonari si Josua ma na manguluhon nasida. Ra sungkun-sungkun do rohana, olo do bangso Israel manjangkon ibana gabe pamimpin ni nasida? (5 Mus. 34:8, 10-12) Taringot Josua 1:1, 2, sada buku referensi ni Bibel mandok, molo sian najolo sahat tu saonari maol jala parohon jea do di sada bangso molo marganti pamimpinna. Tontu on mambahen si Josua gabe holsoan. Alai, porsea do ibana tu Jahowa jala pintor diihuthon ibana do tudu-tuduna. (Jos. 1:9-11) Dipasu-pasu do si Josua ala porsea tu Jahowa jala disuru ma sada suru-suruan laho manogu-nogu si Josua dohot bangso Israel. Ra, suru-suruan on ma na didok Hata, i ma Anak buhabaju ni Debata. (2 Mus. 23:20-23; Joh. 1:1) Diurupi Jahowa do bangso Israel asa mura mangihuthon tudu-tudu sian pamimpin ni nasida na baru, i ma si Josua. w18.10 16-17 ¶1-4

Ditanda Jahowa do manang ise na rade mangulahon lomo ni rohaNa, jala disurat do goar ni nasida di “buku parningotan”. Songon dia carana asa tongtong goarta tarsurat di “buku parningotan” i? Si Maleaki mandok, ingkon tongtong ma tapasangap goar ni Jahowa. Alana molo ndang taoloi jala tapasangap Ibana, gabe disesa ma goarta sian buku i! (2 Mus. 32:33; Ps. 69:29) Ndang sae holan marjanji tu Jahowa jala tardidi. Alai ingkon taulahon do lomo ni rohaNa saleleng ngolunta. Alani i, ingkon tarida do sian parniulaonta ganup ari, na unduk do hita tu Jahowa.​—1 Ptr. 4:1, 2. w18.07 22-23 ¶7-9

Ndang jaminan pintor gabe matoras hita molo nunga martaon-taon gabe halak Kristen. Porlu do marsitutu hita asa matoras. Ingkon tatambai do parbinotoanta. Jadi, tajaha ma Bibel ganup ari. (Ps. 1:1-3) Lam jotjot tajaha Bibel ganup ari, lam taantusi ma uhum dohot prinsip ni Jahowa. Aha do uhum na rumingkot tu halak Kristen? I ma holong. Didok Jesus do tu angka siseanna, “Molo masihaholongan hamu, botoon ni sude jolma ma na siseanku hamu.” (Joh. 13:35) Didok do holong i “patik na umbalga”, jala “sasahalak na mangkaholongi donganna nunga diulahon ibana patik i”. (Jak. 2:8; Rom 13:10) Mansai ringkot do holong i, alana didok di Bibel “holong do Debata”.​—1 Joh. 4:8. w18.06 19 ¶14-15

Sasintongna, nang pe halak Israel na mangalo tu Jahowa, alai si Musa do na gabe tarrimas. Ala ndang diorom ibana dirina, gabe didok ma hata na so sidohononna. Hape, tingki parjolo sahali bangso i marungut-ungut ala ndang adong aek, denggan do na diulahon si Musa. Alai, gabe ndang mangasahon Jahowa be si Musa ala sai marungut-ungut bangso i. (2 Mus. 7:6) Ra, gabe loja jala marsak do si Musa mangida bangso i. Jadi, holan pangkilalaanna i do na dipingkirhon si Musa. Gabe lupa ma ibana pasangaphon Jahowa. Gari si Musa sahalak panurirang, boi gabe ndang mangasahon Jahowa. Tarlumobi ma hita. Tingki i, naeng sahat ma si Musa tu Tano na Dijanjihon. Hita pe naeng sahat nama tu tano na imbaru. (2 Ptr. 3:13) Alai, asa boi masuk tu tano na imbaru, ingkon mangasahon Jahowa do hita jala tongtong mangoloi hataNa.​—1 Joh. 2:17. w18.07 12 ¶14-16

Ndang boi dipaksa Sibolis hita asa mangulahon na so tahalomohon. (Jak. 1:14) Godang do halak na so mamboto nunga mangihuthon Sibolis nasida saleleng on. Alai, tingki nasida marsiajar Bibel, ingkon pillitonna do mangoloi ise, Jahowa do manang Sibolis. (Ul. 3:17; 17:30) Molo marsitutu hita asa unduk tu Debata, ndang boi Sibolis mambahen hita dao sian Debata. (Job 2:3; 27:5) Adong do muse na so boi diulahon Sibolis dohot angka surusuruan na jahat. Umpamana, di Bibel ndang hea didok molo nasida boi mamboto pingkiran dohot rohanta. Holan Jahowa dohot Jesus do na boi. (1 Sam. 16:7; Mrk. 2:8) Molo marsitutu hita mangkatahon na sintong jala mangulahon na dihalomohon Debata, pos ma rohanta ndang dipasombu Jahowa hita digugai Sibolis. (Ps. 34:8) Porlu do taboto songon dia musunta, alai ndang porlu hita mabiar tu ibana. Nang pe jolma na mardosa dope hita, alai diurupi Jahowa do hita asa boi monang mangadopi Sibolis! Molo taalo Sibolis, maporus do ibana sian hita.​—Jak. 4:7; 1 Ptr. 5:9. w18.05 20 ¶15-17

Bayangkon ma molo naeng lao hamu tu sada luat na dao. Ingkon marbus do tu inganan i. Dung sahat hamu di terminal, godang do hape bus disi. Alai, ingkon pillithonmu ma bus dia na naeng laho tu tujuanmuna. Ndang pillitonmu bus na asing tujuanna. Sipata olo do hamu lilu alani godang ni sipilliton. Alai molo nunga ditontuhon hamu tudia tujuanmuna, gabe mura ma hamu mambahen haputusan. Jadi, dibahen hamu do tujuan asa tongtong mambahen las roha ni Jahowa? Molo songon i, ingkon mangihuthon poda sian Jahowa ma hamu tingki naeng mamillit singkola, karejo, marhasohotan, manang marianakhon. Jala asa marsitutu mangihuthon tujuanmuna na boi mambahen hamu lam jonok tu Jahowa. Molo tongtong hamu manomba Jahowa, dapotmuna ma pasupasu jala diurupi do hamu asa marhasil. w18.04 27-28 ¶1-3

Diingot si Jepta do janjina jala dilehon do boruna asa marhobas di Tabernakel saleleng ngoluna. (Pangh. 11:30-35) Borat do on di si Jepta, alai umborat do on di boruna. Alai, rade do ibana mandalanhon janji ni amana i. (Pangh. 11:36, 37) Alani janji i, gabe ndang boi ibana marhasohotan jala marianakkon. Alani i, porlu do ibana diapuli jala dipatogu. Bibel mandok, “Laho do ganup taon angka boru ni Israel papujipuji boru ni si Jepta, halak Gilead i opatopat ari lelengna.” (Pangh. 11:39, 40) Molo tajaha pengalaman ni boru ni si Jepta on, gabe taingot ma angka dongan na so marhasohotan ala naeng mangalehon gumodang tu Jahowa. Porlu do tapuji jala tapatogu nasida.​—1 Kor. 7:32-35. w18.04 17 ¶10-11

Godang do angka surusuruan na mangihuthon Sibolis jala mangalo tu Debata. Alana, andorang so ro Aek na Sumar, dielaela Sibolis do pigapiga surusuruan asa mangulahon parmainanon tu angka anak boru. Di Bibel, digombarhon do Sibolis i songon naga na didabuhon sian surgo. Alai disarat ibana do sapartolu angka bintang di langit, na manggombarhon angka surusuruan i. (1 Mus. 6:1-4; Pgk. 12:3, 4) Ndang olo be nasida gabe keluarga ni Debata. Jala olo do nasida gabe diatur Sibolis. Taingot ma, adong do na mangatur nasida. Dibahen Sibolis do sada pamarentaon na maniruniru Harajaon ni Debata. Ibana ma na gabe raja, diuluhon ibana ma angka surusuruan na jahat i. Dilehon Ibana ma huaso dohot portibi on tu angka surusuruan i asa dirajai nasida. (Eps. 6:12) Dipangke Sibolis ma pamarentaonna i laho mangatur pamarentaon ni jolma. w18.05 16 ¶5-6

Songon ama parholong, sipata dipasingot Debata do hita. Olo do si Daud manangihon sipasingot ni Debata. Dirimangi jala ditiru si Daud do pingkiran ni Debata. Diihuthon ibana do poda sian Debata na mambahen ibana asa marpangalaho na denggan. Molo ditiru hamu si Daud, gabe lam holong ma rohamu tu Debata, dibahen hamu ma las rohana jala lam solhot ma parale-aleonmuna tu Ibana. Songon na didok donganta si Christin, tingki mangariset jala dirimangi ibana na dijaha, didok rohana laho tu ahu do on disurat! Lomo do roha ni Debata asa diboto hamu dia na rumingkot di ngolumuna, songon dia mambahen keputusan na denggan, jala asa unang mabiar tu aha na laho masa!​—Jes. 26:3. w18.12 23 ¶9-10