November

Molo tasomba Jahowa, lehononna ma tu hita sude na so boi didapot si Adam dohot si Hawa, dohot ma i hangoluan salelengna. Ala ndang marsitutu si Adam dohot si Hawa mangkaholongi Jahowa, gabe ndang dioloi nasida Debata. Nang pe songon i, diloas Jahowa dope nasida mangolu, marianakhon jala pagodang-godangkon ianakhonna. Ujungna, parohon hasusaan do keputusan na dibahen si Adam dohot si Hawa. Anak siangkangan ni nasida, mambunu anggina na so marsala. Jala gabe lam godang ma hajahaton di tano on. (1 Mus. 4:8; 6:11-13) Alai, marsangkap do Jahowa laho paluahon pinompar ni nasida na olo manomba Ibana. (Joh. 6:38-40, 57) Molo lam diparsiajari hamu songon dia holong dohot hasabaron ni Jahowa, gabe lam holong ma rohamuna tu Ibana. Jala ndang olo be hamu mangulahon songon na diulahon si Adam dohot si Hawa. Gabe taronjar ma rohamuna mangalehon diri tu Jahowa. w19.03 2-3 ¶3; 4 ¶9

Laho patuduhon roha sapangkilalaan, pingkirhon ma hasusaan na diadopi keluarganta dohot angka dongan di huria. Parrohahon ma angka na poso di huria, na marsahit, na matua, dohot angka dongan na mate sisolhotna. Boi do tasungkun kabar ni nasida. Denggan ma tatangihon tingki dipaboa nasida na di rohana. Papos ma roha ni nasida na parduli do hita tu nasida, jala taurupi ma nasida. Molo taulahon i, nunga tapatudu holong na sasintongna. (1 Joh. 3:18) Tingki mangurupi angka dongan, ingkon marbisuk do hita. Alana, marasing-asing do cara ni nasida mangadopi hasusaan. Ra, adong do donganta na olo paboahon hasusaanna. Alai na asing, ndang pola lomo rohana paboahon i. Nang pe lomo rohanta naeng mangurupi, alai unang ma sude tasungkuni na boi mambahen sogo roha ni nasida. (1 Tes. 4:11) Tingki adong donganta na olo paboahon sude na di rohana, olo do ra ndang satolop hita tu na didokna i. Alai taingot ma, i do na dihilala nasida. Alani i, hatop ma hita manangihon, alai manat ma mangkatai.​—Mat. 7:1; Jak. 1:19. w19.03 19 ¶18-19

Hea do hamu mabiar tingki mangkatai taringot hasintongan di jolo ni natorop? Ingot ma pengalaman ni si Nehemia. Pelayan do ibana di istana ni raja. Tingki dibege ibana nunga hancur tembok dohot gerbang ni Jerusalem, marsak ma ibana. (Neh. 1:1-4) Bayangkon ma, tingki disungkun raja boasa marsak ibana, tontu mabiar do ibana. Alai andorang so dialusi ibana dope raja, pintor martangiang do ibana. Alani i, gabe diurupi raja ma naposo ni Debata. (Neh. 2:1-8) Na asing, i ma pengalaman ni si Jona. Tingki disuru Jahowa ibana pasingothon halak Ninive, ndang dioloi ibana Jahowa. Mabiar do ibana tu halak Ninive. (Jona 1:1-3) Alai ala diurupi Jahowa, gabe olo ma si Jona pasingothon halak Ninive. Ujungna gabe muba do halak Ninive. (Jona 3:5-10) Sian pengalaman ni si Nehemia taboto ma, ringkot do martangiang andorang so mangalehon alus. Sian pengalaman ni si Jona taboto ma, diurupi Jahowa do hita asa unang mabiar tugas na dilehon Jahowa. w19.01 11 ¶12

Molo dung taulahon na taparsiajari, olo do ra gabe ndang solhot be hita tu dongan manang keluarganta. Dipaboa Jesus do tu hita boasa boi gabe songon i. Tingki ditangiangkon Jesus taringot siseanna didok ibana do, “Pabadia ma nasida marhite hasintongan. Hatami do hasintongan.” (Joh. 17:17) Hata “pabadia” boi do lapatanna “imbar”. Jadi molo dung taulahon na taparsiajari, gabe imbar do hita sian angka halak ala nunga taihuthon na didok Bibel. Jadi nang pe tapajonok dirinta tu angka dongan manang keluarganta, tong do sogo roha ni nasida tu hita. Manang diorai nasida do hita marsiajar Bibel. Alai, ndang tarsonggot be hita disi. Alana didok Jesus, “Sasintongna, musu ni sasahalak i ma donganna sajabu.” (Mat. 10:36) Molo olo hita berkorban, marjanji do Jesus laho lehononna do tu hita godang pasu-pasu!​—w18.11 6 ¶11

Diargai si Paulus do sude angka dongan. Jala tarida do i sian na didok ibana taringot nasida. Di tangiangna sai didok si Paulus do mauliate tu Debata alani nasida. Di suratna didok si Paulus do muse na mansai arga nasida di ibana. Di Rom 16:1-15, adong 27 halak angka dongan na didok si Paulus disi jala didok ibana do goar ni nasida sada-sada. Didok si Paulus muse, rade do mate si Priska dohot si Akuila alani ibana. Didok muse nunga “godang angka dongan diurupi” si Poibe dohot ma i ibana sandiri. Dipuji si Paulus do sude angka dongan na dihaholongi ibana di sude naung diulahon nasida. Diboto si Paulus do ndang sempurna angka dongan na di Rom. Alai dipaboa ibana do angka parange na denggan sian nasida. Bayangkon ma songon dia pangkilalaan ni angka dongan tingki gogo dijahahon surat ni si Paulus i di huria. Dung dibege nasida, gabe lam togu do nasida. Ujungna gabe lam solhot ma parale-aleon ni nasida dohot si Paulus. Tingki adong dongan di huria na mandok manang na mangulahon na denggan, didok hamu do mauliate? w19.02 16 ¶8-9

Ganup ari, sai adong do hasalaan na tabahen. Alani i, unang ma didok rohanta ingkon sempurna hita asa boi setia. Boasa? Alana ndang hasalaanta na sai diida Jahowa. Didok Bibel, “Molo dibilangi Ho angka dosanami, ise ma na boi malua sian uhum?” (Ps. 130:3, Bibel siganup ari) Diboto Jahowa do molo hita jolma na so sempurna. Jala rade do Jahowa manalpuhon hasalaanta. (Ps. 86:5) Jala ndang dipangido Jahowa tu hita na so tolap taulahon. (Ps. 103:12-14) Holong do na mangonjar rohanta umbahen na tongtong setia tu Jahowa. Alani i, talehon ma na dumenggan tu Jahowa jala tapatudu ma holongta sian nasa roha. Molo holong rohanta tu Jahowa, boi do hita tongtong setia nang pe adong na mengela-ela hita. (1 Kron. 28:9; Mat. 22:37) Taboto do prinsip ni Jahowa. Jala rumingkot do di hita mambahen las roha ni Jahowa. Ala holong do rohanta tu Jahowa umbahen tabahen keputusan na mambahen las rohana. On patuduhon na setia do hita tu Jahowa. w19.02 3 ¶4-5

Gabe lam togu do haporseaonta, molo tahilala laba ni mangulahon na denggan. (Jak. 1:2, 3) Las do rohanta ala tabahen las roha ni Jahowa. Gabe didok Ibana ma hita anakna. Jala lam marsitutu do hita mambahen las rohana. (Poda 27:11) Alani i tingki diela-ela hita, i ma tingkina tapatudu na tasomba do Jahowa sian nasa rohanta. (Ps. 119:113) Unduk ma hita tu parentana jala taulahon ma lomo ni rohana, laho patuduhon holongta tu Jahowa. (1 Raj. 8:61) Ala ndang sempurna, jotjot do tabahen na sala. Molo taulahon na sala, aha do na ingkon taingot? Ingot ma pengalaman ni Raja Hiskia. Nang pe hea diulahon ibana na sala, alai muba do ibana jala disalpuhon Jahowa do hasalaanna i. Tongtong do disomba ibana Jahowa ‘sian nasa roha’. (Jes. 38:3-6, Bibel siganup ari; 2 Kron. 29:1, 2; 32:25, 26) Alani i, tapasiding ma angka na boi mambahen sega rohanta. Martangiang ma hita asa dilehon “habisuhon” jala tongtong setia tu Jahowa.​—1 Raj. 3:9, Bibel siganup ari; Ps. 139:23, 24. w19.01 18-19 ¶17-18

Tadapot do laba sian komentar na talehon di parpunguan. (Jes. 48:17) Boasa? Na parjolo, tontu ingkon persiapan do hita molo naeng mangalehon komentar. Molo denggan hita persiapan, gabe lam bagas ma taantusi Hata ni Debata. Jala gabe lam denggan ma hita mangulahon na taparsiajari i. Na paduahon, tamba do las ni rohanta molo dohot hita mangalehon komentar. Na patoluhon, molo marsitutu hita mangalehon komentar, tontu taingot do na takomentari. Asing ni i, las do roha ni Jahowa tingki talehon komentar. Pos ma rohanta ditangihon jala diargai Jahowa do molo marsitutu hita mangalehon komentar. (Mal. 3:16) Pasu-pasuon ni Jahowa do hita molo marsitutu pasonangkon rohana. (Mal. 3:10) Tangkas ma, godang do laba na tadapot molo mangalehon komentar di parpunguan. w19.01 8 ¶3; 9-10 ¶7-9

Tingki mangalehon aturan tu jolma, marbisuk do Jahowa. Ndang dilehon Ibana tu hita godang aturan. Alai sabar do Jahowa mangajari hita asa boi taulahon uhumna. Diajari do hita asa mangihuthon podana jala pasidingkon angka na so denggan. Marhite jamita ni Jesus di Dolok, diajari do hita asa mangantusi boasa adong halak mangulahon na so denggan. (Mat. 5:27, 28) Molo dung Raja Jesus di tano na imbaru, ajaranna dope hita laho mamboto aha na denggan dohot na so denggan. (Heb. 1:9) Bahenon ni Jesus ma hita gabe sempurna. Boi ma tabayangkon, ndang tarela-ela be hita mangulahon na so denggan jala manaon hasusaan. Las ma rohanta ala mangkilala “haluaon hasangapon” songon na dijanjihon Jahowa tu hita. (Rom 8:21) Nang pe bebas hita, alai adong do aturanna. Sude na taulahon, ingkon tapatudu do holan marhite holongta tu Debata.​—1 Joh. 4:7, 8. w18.12 20 ¶19-20

Di Patik, dipaloas do sahalak baoa ni halak Israel manirangkon istrina molo “adong jumpangsa di nasida manang aha tau tihasna [manang parniulaon na roa]”. Alai ndang dipaboa di patik i, angka aha do parniulaon na roa i. Tontu dosa na balga do na didok disi. (5 Mus. 23:15) Alai di tingki ni Jesus, godang do halak Jahudi manirangkon istrina hombar tu lomo ni rohana. (Mat. 19:3) Tontu ndang olo hita maniru i. Di tingki ni si Maleaki, godang angka baoa na manirangkon istrina na parjolo. Ra asa boi do muse mangoli tu borua na umposo nang pe na so sisomba Jahowa. Alai tangkas do dipaboa Jahowa tu nasida taringot parsirangan. Didok, “Huhagigihon do parsirangan.” (Mal. 2:14-16) Ndang muba dope pangkilalaan ni Jahowa taringot parsaripeon sahat tu saonari. Jala didok Ibana, sahalak baoa ingkon tongtong “mandongani jolmana, jadi sada sibuk nasida”. (1 Mus. 2:24) Sarupa do pangkilalaan ni Jesus dohot Jahowa taringot parsaripeon. Didok Jesus do, “Naung pinadomu ni Debata, ndang jadi sirangon ni jolma.”​—Mat. 19:6. w18.12 11 ¶7-8

Adong do piga-piga donganta na pinda tu inganan na mangkaporluhon parbarita. Nasida maniru panurirang Jesaya. Tingki disungkun Jahowa si Jesaya, “Ise do suruhononku, jala ise pardalannami?” Dialusi si Jesaya do, “Dison do ahu, suru ma ahu!” (Jes. 6:8) Jadi, rade jala boi do hamu mangurupi organisasi ni Jahowa? Taringot ulaon marbarita didok Jesus do, “Alani i, pangido ma tu Nampuna sisabion i asa disuru angka panabi tu sisabionna i.” (Mat. 9:38) Jadi, olo do hamu merintis di inganan na mangkaporluhon parbarita? Manang, olo do hamu mangurupi sasahalak asa pinda tu inganan na mangkaporluhon parbarita? Angka dongan na mangulahon on, mandok on ma cara patuduhon holong tu Debata dohot tu angka jolma. Jadi, boi do dilului hamu cara na asing asa lam denggan di ulaon ni Debata? Molo diulahon hamu do on, lam marlas ni roha ma hamu. w18.08 26 ¶14-15

Sian opat buku Injil, taboto ma songon dia pingkiran ni Jahowa taringot hamoraon. Ndang ala na mora si Josep dohot si Maria umbahen na dipillit Jahowa nasida gabe natua-tua ni Jesus. (3 Mus. 12:8; Luk. 2:24) Tingki tubu Jesus, dipeakhon si Maria ma ibana “tu bagasan panggagatan, ai ndang adong dapot ni nasida inganan laho marborngin”. (Luk. 2:7, surat na di toru.) Sasintongna boi do bahenon ni Jahowa asa tubu Jesus di inganan na sangap. Alai, ndang i na rumingkot di Ibana. Lomo rohana asa Jesus dipagodang-godang di keluarga na mangkaringkothon parale-aleon tu Debata. Sian on taantusi ma songon dia Jahowa mangida hamoraon. Adong do natua-tua na lomo rohana asa mamora ianakhonna, nang pe sasintongna boi do on manegai parale-aleon ni anakhonna i tu Debata. Alai di Jahowa, parale-aleon tu Ibana do na rumingkot. Jadi, ditiru hamu do pingkiran ni Jahowa? Songon dia do hamu patuduhon i? w18.11 28-29 ¶7-8

Holan Jahowa do na boi parohon las ni roha. Lomo do rohana asa las rohanta. Alani i, godang do cara na dibahen Ibana asa marlas ni roha hita. (5 Mus. 12:7; Pjm. 3:12, 13) Alai ra, adong do na mambahen hita gabe ndang marlas ni roha. Angka aha ma i? Umpamana, marujung ngolu na tahaholongi, adong keluarganta na dipecat, marsirang, di PHK, jotjot adong parbadaan di jabu, jotjot direhei dongan sakarejo manang dongan sasingkola. Dibahen na so denggan tu hita manang dipenjara alani haporseaonta. Asing ni i, mura-mura hita marsahit manang posa sahitta. Ra marsahit stres hita. On ma na mambahen hita ndang marlas ni roha. Alai ingot ma, ‘Parhuaso na gok las ni roha’ do Jesus. Lomo rohana mangapuli angka halak, asa marlas ni roha nasida. (1 Tim. 6:15; Mat. 11:28-30) Tingki marjamita Jesus di Dolok, dipaboa Jesus do angka halak na songon dia na boi marlas ni roha, nang pe godang hasusaan ala Sibolis dope na mangarajai portibi on. w18.09 15-16 ¶1-3

Na boi mambahen hita maol muba, i ma molo tongtong dope taihuthon adat dohot hasomalan na dihasogohon Debata, nang pe nunga taboto sala i. (Poda 23:23) Alai, adong do na maol maninggalhon i ala mabiar tu keluarga, dongan sakarejo manang dongan na asing. Jala adong dope na maol maninggalhon i, ala nunga sada hasomalan di nasida. Umpamana, songon mambahen adat tu halak naung mate. Alani i, aha do na boi mangurupi hita asa boi muba? Somal do mardatu angka halak Kristen na di Epesus. Jadi, aha ma na diulahon nasida dung gabe halak Kristen? Didok Bibel, “[Dipapungu] jala ditutung nasida ma [angka buku naung pinapungu ni nasida] i di jolo ni natorop. Dung dietong nasida argana, adong hira-hira 50.000 hepeng perak.” (Ul. 19:19, 20) Dipasu-pasu Jahowa do pengorbanan ni nasida. Nang pe mansai arga buku ni nasida i, alai olo do nasida mambolongkon i. w18.11 7-8 ¶15-16

Dungkon menyeberang halak Israel sian sunge Jordan, jumpang ni si Josua ma sahalak baoa na mamboan podang. Sahalak “partogi ni parangan [manang, “panglima tentara”] ni Jahowa” do ibana na laho mangurupi naposo ni Debata. (Jos. 5:13-15) Dipaboa suru-suruan i do tu si Josua aha na ingkon diulahon asa boi manaluhon kota Jeriko. Mulana, hira na so masuk angkal do tudu-tudu na dilehon i. Umpamana, didok suru-suruan i do tu si Josua asa disunat sude tentara ni Israel. Molo songon i do situasina, tontu saleleng piga-piga ari ndang boi nasida marporang. (1 Mus. 34:24, 25; Jos. 5:2) Ra, gabe sungkun-sungkun do roha ni tentara ni Israel, ‘Songon dia ma hami manjaga keluarganami molo ro musu mangaroro inganannami?’ Alai, di na so panagaman ni nasida masa do i! Ndang ro halak Jeriko mangaroro, gariada mabiar do nasida tu halak Israel. Didok di Bibel, “Tarhinsu situtu do [harbangan] ni huta Jeriko didapot halak Israel, ndang tarbahen ruar manang bongot manang ise.” (Jos. 6:1) Alani i, gabe lam pos ma roha ni halak Israel tu tudu-tudu ni Debata! w18.10 17 ¶5-7

Songon si Paulus, unang ma tarimpu gabe sumurung hita sian na asing ala marbarita manang mangulahon sude ulaon na dilehon Jahowa. Jadi, on ma sada cara patuduhon serep ni roha. Alani i tarimangi ma, ‘songon dia do pangkilalaanku taringot halak na hujumpangi tingki marbarita? Olo dope ahu paimbar-imbarhon halak na hujumpangi, manang olo dope ahu pintor curiga tu halak tingki marbarita’? Sude Sitindangi Ni Jahowa marsitutu do manjumpangi halak na olo manangihon barita na uli. Gariada adong do donganta na marsitutu marsiajar bahasa na asing manang hasomalan sian bangso dohot suku na so apala dihalomohon halak. Alai, ndang na dirimpu angka donganta on nasida do na umdenggan sian angka halak na dijumpangi nasida. Gariada marsitutu do nasida mangurupi angka halak na olo manangihon. w18.09 5 ¶9, 11

Diuhum mate pamarenta ni Rom ma si Judas. Ibana sahalak bagian sian partai Zealot na mangkirim tu haroro ni Messias. Dirimpu nasida, Messias i do na paluahon nasida sian halak Rom. Jala bahenonna ma halak Israel gabe bangso na balga songon najolo. (Luk. 2:38; 3:15) Ra, dirimpu nasida Messias i laho pajongjongkon sada harajaon di Israel. Jadi, angka halak Jahudi na di luat na asing pe gabe naeng mulak muse tu Israel. Si Johannes pandidi pe, disungkun ibana do Jesus, “Ho do na laho ro i, manang paimaonnami dope na asing?” (Mat. 11:2, 3) Ra dirimpu si Johannes, adong halak na asing muse na ro laho paluahon halak Jahudi sian halak Rom. Dung dipahehe Jesus, mangkatai do ibana tu dua siseanna na naeng laho tu Emmaus. Mangkirim do nasida asa dipalua sian pamarentaon ni Rom. (Luk. 24:21) Dung i, disungkun angka apostel ma Jesus, “Pajongjongonmu do muse saonari pamarentaon ni Debata di Israel?”​—Ul. 1:6. w18.06 4 ¶3-4

Didok do Sibolis “na manudu angka donganta”. (Pgk. 12:10) Alani i, ingkon manat ma hita tarlumobi tingki adong tabege hatorangan na so denggan taringot naposo ni Jahowa. Jala, Jesus pe pasingothon na laho dipatubu-tubu angka na marsogo ni roha ma “hata na so tutu” taringot hita. (Mat. 5:11) Jadi, molo tongtong taingot sipasingot i, gabe ndang songgot be rohanta tingki adong tabege hatorangan na so denggan taringot naposo ni Jahowa. Lomo do rohamuna mangirim e-mail manang SMS tu angka dongan? Tingki dibege hamu adong cerita na menarik manang na terbaru, pintor hatop do hamu paboahon i tu halak? Alai, andorang so diulahon hamu i, sungkun ma dirimuna, ‘Tutu do cerita on? Nga hupastihon na sasintongna?’ Molo ndang pos rohamuna tu cerita i boi do gabe pararathon gabus hamu. Jadi molo ndang diboto hamu cerita na sasintongna, unang ma paboa tu na asing, pintor hapus ma! w18.08 3-5 ¶3, 6-7

Jesus pe lomo do rohana molo marlas ni roha hita. Molo burju hita, gabe burju ma godang halak tu hita. Alai molo burju pe hita, ra ndang sude halak gabe marlomo ni roha tu hita. Nang pe songon i, tongtong ma hita burju mangalehon. Alana, godang do labana molo taulahon i. Halak na sian ias ni rohana mangalehon, ndang mangkirim ibana asa dibalos na binahenna i. Didok Jesus do, “Molo naeng mambahen pesta ho, gokkon ma na pogos, na pangpang, na lumpu dohot na mapitung. Marlas ni roha ma hamu, ai ndang adong lehonon ni nasida laho mambalos i tu hamu.” (Luk. 14:13, 14) Didok Bibel do muse, “Halak na lambok marpanaili, dapotan pasupasu.” Didok ayat na asing do muse, “Martua ma halak na mangalehon rohana tu na pogos.” (Poda 22:9; Ps. 41:2, Bibel siganup ari) Jadi ala lomo do rohanta mangurupi halak umbahen na burju hita tu nasida. w18.08 19-20 ¶15-16

Saonari, maol do mandapot jala mamastihon hatorangan na sintong. Ala somalna ndang sude hatorangan na tabege i tutu. Jadi aha ma na boi mangurupi hita? Prinsip na adong di Bibel! Umpamana, molo adong halak na pintor mangalusi hape ndang dibege dope na sasintongna, didok do i halak na oto. (Poda 18:13) Asing ni i, dijujui do hita asa mamastihon sude hatorangan na tabege. (Poda 14:15) Jala nang pe nunga leleng hita gabe sisomba Jahowa, unang ma paposhu hita tu diri sandiri. Molo taingot angka prinsip i, boi ma hita mandapot hatorangan na sintong. Boi ma sintong kesimpulanta jala denggan ma hita mambahen keputusan. w18.08 8 ¶19

Tingki tardidi hita, gabe diboto na asing ma, molo hita dipillit Jahowa jala rade mangoloi Ibana. Suang songon i ma tingki tardidi Jesus. Hira na didok ibana do, “Dipangido rohangku do patupahon lomo ni roham.” (Ps. 40:8, 9) Songon dia do pangkilalaan ni Jahowa tingki Jesus tardidi? Didok di Bibel, “Dung tardidi, kaluar ma Jesus sian aek, bungka ma langit jala diida si Johannes ma tondi parbadia ni Debata na songon darapati ro tu ginjang ni Jesus. Dung i tarbege ma soara sian langit na mandok, ‘On do Anakku, haholonganki, halomoan ni rohangku do ibana.’” (Mat. 3:16, 17) Mansai las hian do roha ni Jahowa. Alana, nang pe Jesus anakNa, alai rade do Jesus mangulahon lomo ni roha ni Jahowa saleleng ngoluna. Suang songon i ma las ni roha ni Jahowa tingki tardidi hita. Jala dipasu-pasu Ibana ma hita.​—Ps. 149:4. w18.07 22 ¶4-5

Tingki didok si Musa “nami” manang “hami”, ra hatana i patuduhon taringot dirina dohot si Aron. Jadi hata ni si Musa i patuduhon, ndang dipasangap ibana Jahowa na mambahen tanda halongangan i. Didok di Psalmen, “Dibahen bangsoNa do muruk Jahowa di matamual Meriba, gabe hona ma hasusaan tu si Musa ala ni pambahenannasida. Mansai paet do dibahen nasida tu si Musa, gabe didok hata na so sidohononna.” (Ps. 106:32, 33, Bibel siganup ari; 4 Mus. 27:14) Ala ndang dipasangap si Musa Jahowa, didok Jahowa ma tu si Musa dohot si Aron, “Naung dialo hamu nadua parentangKu.” (4 Mus. 20:24, Bibel siganup ari) Jadi, dosa na mansai balga do i! Najolo, hea do bangso Israel mangalo tu Jahowa. Gabe ndang diloas Jahowa nasida masuk tu Tano na Dijanjihon. (4 Mus. 14:26-30, 34) Sintong do cara ni Jahowa manguhum si Musa, ala mangalo do ibana. Ndang diloas Jahowa ibana masuk tu Tano na Dijanjihon. w18.07 11-12 ¶9, 12

Jadi nang pe ndang sala manginum alkohol, ingkon taargai do panggora ni roha ni donganta. Ra, adong do donganta na parminum hinan tingki ndang marsiajar Bibel dope. Alai dung marsiajar Bibel, gabe muba do ibana jala ndang olo be ibana manginum i apala saotik pe. Tontu, ndang olo hita mambahen ibana mulak muse gabe parminum. (1 Kor. 6:9, 10) Jadi molo tatogihon nasida tu jabunta, unang ma sai tapaksa nasida asa manginum i! Asa boi si Timoteus marbarita tu halak Jahudi, olo do ibana disunat nang pe hansit. Alana diboto ibana porlu do sunat di halak Jahudi. Songon si Paulus, ndang olo ibana mambahen tartuktuk roha ni na asing. (Ul. 16:3; 1 Kor. 9:19-23) Jadi songon si Timoteus, ingkon marsitutu do hita mangargai panggora ni roha ni halak na asing. w18.06 18 ¶12-13

Tingki parjolo sahali hamu marsitandaan dohot na so Sitindangi, ra gabe diboto hamu ma goarna, jala songon dia rupana. Alai ndang godang dope na diboto hamu taringot ibana. Alai tingki parjolo sahali hamu marsitandaan dohot donganta Sitindangi, pintor diboto hamu do na dihaholongi ibana Jahowa. Jala diboto hamu do adong na denggan na diida Jahowa sian ibana. I do alana gabe naposo ni Jahowa ibana. (Joh. 6:44) Ndang soal sian dia haroroanna, ise keluargana, alai nunga godang na diboto hamu taringot ibana. Jala ibana pe songon i do tu hamu! Tingki pajumpang hamu dohot Sitindangi na asing, pintor diboto hamu do na sarupa haporseaonmuna dohot nasida. Nang pe marasing-asing bahasanta, alai adong do bahasanta na sarupa, i ma hasintongan. On lapatanna, sarupa do Debatanta, sarupa do aturan na taihuthon, jala sarupa do pangkirimonta. On do na mambahen hita marpos ni roha tu angka donganta jala boi marale-ale dohot nasida salelengna. w18.12 18 ¶9-10

Diarahon Kristus do punguan na mangaradoti laho patangkashon molo halak Kristen na so Jahudi ndang pola disunat. (Ul. 15:19, 20) Alai, saleleng martaon-taon godang dope halak Jahudi Kristen na tongtong pasunathon ianakhonna. Alani i, ra gabe sungkun-sungkun do rohanta, boasa sampe leleng dipaloas Jesus masa parsoalan i? (Kol. 2:13, 14) Porlu do tingki asa boi mangihuthon tudu-tudu na baru. Piga-piga halak Jahudi Kristen ndang pintor mangantusi molo nasida ndang porlu be mangihuthon Patik i. (Joh. 16:12) Didok roha ni nasida do sunat i gabe tanda parale-aleon tu Debata. (1 Mus. 17:9-12) Jala, adong muse na mabiar molo imbar sian halak Jahudi na asing gabe direhei do annon. (Gal. 6:12) Alai tingki i, adong ma muse tudu-tudu na dipaboa Kristus marhite surat na dibahen si Paulus.​—Rom 2:28, 29; Gal. 3:23-25. w18.10 18-19 ¶10-12

Dung borngin, disuru si Kayapas ma angka tentara laho manangkup Jesus. Diboto Jesus do na laho dibunu ibana. Jadi, tingki borngin na parpudi, disuru Jesus ma angka siseanna asa mambuat podang. Dipangke ibana ma i laho mangalehon parsiajaran na ringkot tu nasida. (Luk. 22:36-38) Dung i, ro ma piga-piga halak manangkup Jesus. Gabe muruk ma si Petrus jala disintak ibana ma podangna laho mangalo nasida. (Joh. 18:10) Alai didok Jesus do, “Pasarung ma podangmi, ai manang ise manintak podang, mate do bahenon ni podang.” (Mat. 26:52, 53) Aha do parsiajaran na ringkot na dipaboa Jesus disi? Ndang boi nasida gabe bagian ni portibi on. On do na ditangiangkon Jesus di bornginna i. (Joh. 17:16) Holan Debata do na marhak manguhum angka na jahat. Alai molo hita, tongtong do dame jala marsada. Nang pe diida Jahowa tarbagi angka halak saonari, alai las hian do rohaNa ala tongtong marsada angka naposoNa.​—Sep. 3:17. w18.06 7-8 ¶13-14, 16

Dipaporsukporsuk jala dipabiarbiar Sibolis do hita asa manadingkon Jahowa. Umpamana, dipangke ibana do angka pamarenta laho mangorai ulaonta marbarita. Manang dipangke ibana do muse angka donganta sakarejo dohot donganta di singkola laho pasogosogohon hita ala marsiajar Bibel. (1 Ptr. 4:4) Dipangke do keluarganta laho mangambati hita asa unang be ro marpungu. (Mat. 10:36) Aha do na boi taulahon laho mangadopi situasi songon i? Unang pola longang rohanta tu sisongon i, alana saonari na marporang do hita tu Sibolis. (Pgk. 2:10) Jala taingot ma: na tinuju ni Sibolis disi, i ma asa songon na tutu hatana na mandok molo hita manomba Jahowa holan di tingki sonang do. Didok ibana molo susa ngolunta, gabe tatadingkon do Debata. (Job 1:9-11; 2:4, 5) Jadi, ingkon tapangido do gogo sian Jahowa. Taingot ma, ndang tadingkonon ni Jahowa hita.​—Heb. 13:5. w18.05 19 ¶14

Ingot ma, ndang marisuang molo marbarita hita, nang pe hira na so adong na manangihon. Diparrohahon godang halak do hita. Diida do na denggan pangkeanta, pantun, jala saor tu nasida. Alani i, ra adong do na sogo hian rohana mangida hita, ujungna gabe burju tu hita. Songon i ma pengalaman ni si Sergio dohot si Olinda na gabe perintis. Didok nasida, “Hea do hami ndang boi lao marbarita di inganan na godang halak alani marsahit. Alai dung marbarita muse hami tusi, adong ma na mandok, ‘Nga leleng ndang huida hamu. Masihol do hami bah.’” Alani i, ‘unang ma patait tanganmuna’. Molo tongtong hita marbarita na uli, on patuduhon na taulahon do tugas na ringkot, i ma “mangkatindangkonsa tu saluhutna bangso”. (Mat. 24:14) Na porlu taingot, gabe las ma rohanta, ala taboto las do roha ni Jahowa mangida hita. Dihaholongi Ibana do halak na “marparbue di bagasan habengeton”!​—Luk. 8:15. w18.05 8 ¶16-18

Sian mulai mardosa jolma na parjolo, Jahowa nunga gabe Debata na patoguhon roha. Dibahen Ibana do sada surirang na boi patoguhon jala gabe pangkirimon tu hita. Surirang i disurat di 1 Musa 3:15 na paboahon laho diripashon nama Sibolis dohot angka ulaonna na jahat. (1 Joh. 3:8; Pgk. 12:9) Taparrohahon ma songon dia Jahowa patoguhon roha ni si Noak. Angka halak na mangolu di tingki ni si Noak, jotjot mangulahon na rorang. Holan ibana dohot keluargana do na manomba Jahowa. Boi do on mambahen ibana marmetmet ni roha. (1 Mus. 6:4, 5, 9, 11; Jud. 6) Alai, dipaboa Jahowa do tu si Noak na laho ripashononNa ma portibi na jahat i. Jala dipaboa do carana asa boi malua si Noak dohot keluargana. (1 Mus. 6:13-18) Jadi tutu do dipatogu Jahowa roha ni si Noak. w18.04 15 ¶1-2

Songon dia do molo maol mandok hata na denggan tu donganta? Sasintongna, ndang maol laho patoguhon angka donganta. Boi do hita holan mengkel suping tu sasahalak. Alai molo ndang dibalos ibana, ra na adong do parsoalanna. Jadi porlu do adong donganna mangkatai. Tangihon ma ibana asa tarapul rohana. (Jak. 1:19) Sude hita boi mangapuli jala patoguhon angka donganta. Raja Salomo mandok, “Mansai denggan do hata na toho di tingkina. Mata na marsinondang mambahen las roha jala barita na denggan pahipashon daging.” (Poda 15:23, 30, Bibel siganup ari) Si Paulus mangajarhon tu hita, boi do marlas ni roha hita molo rap mangendehon pujipujian. (Ul. 16:25; Kol. 3:16) Ala nunga jonok ari ni Jahowa, ringkot do molo hita masipatoguan dohot angka dongan.​—Heb. 10:25. w18.04 25 ¶16; 26 ¶18-19