Februari

Di Bibel, hata “hatigoran” dipangke laho paboahon aha na sintong na didok Debata jala ndang mardingkan. Parrohahon ma songon dia Jesus patuduhon hatigoran sian parniulaonna. Di tingki i, sogo do roha ni angka pamimpin ni agama Jahudi tu na so halak Jahudi, leas do roha ni nasida tu halak Jahudi na so diajari di singkola agama, jala ndang diargai nasida angka borua. Alai molo Jesus, tigor do jala ndang mardingkan tu sude halak. Dijangkon Jesus do halak na so Jahudi na porsea tu ibana. (Mat. 8:5-10, 13) Marbarita do Jesus tu sude halak, na mora manang na pogos. (Mat. 11:5; Luk. 19:2, 9) Ndang hea kasar Jesus maradophon angka borua. Alai lambok do ibana maradophon nasida, dohot ma i tu angka borua na so hasea. (Luk. 7:37-39, 44-50) Boi do tatiru Jesus, marhite marbarita tu sude halak na olo manangihon. Ndang soal na mora manang na pogos manang na asing agamana. Angka donganta baoa pe, boi do maniru Jesus marhite lambok maradophon angka borua. w19.05 2 ¶1; 5 ¶15-17

Saonari pe, ingkon lambok do angka sintua mangkatai tingki mangapuli angka dongan marhite angka ayat ni Bibel. Alai holan sintua do na boi mangapuli angka halak na hea gabe korban pelecehan seksual? Daong. Sude hita martanggung jawab do laho “masiapulan”. (1 Tes. 4:18) Angka borua di huria na togu parale-aleonna tu Jahowa, boi do mangapuli borua na hea gabe korban. Alana dipatudos Jahowa do dirina songon sahalak ina na mangapuli ianakhonna. (Jes. 66:13) Di Bibel pe, dipaboa do taringot angka borua na hea mangapuli halak na mandele. (Job 42:11) Tontu mansai las do roha ni Jahowa mangida angka borua na rade mangapuli angka borua na mandele! Alai di situasi na asing, olo do dipangido angka sintua sahalak borua na togu parale-aleonna tu Debata asa mangapuli borua na hea gabe korban pelecehan seksual. Tontu, tingki mangurupi donganta na hea gabe korban pelecehan, unang ma tasungkuni molo ndang olo nasida paboahon sude na dihilala nasida.​—1 Tes. 4:11. w19.05 16-17 ¶10-12

Andorang so dibahen angka sintua panitia pengadilan, boasa porlu adong hatorangan sian dua saksi laho patuduhon molo sasahalak nunga mangulahon dosa na balga? Alana on do tudu-tudu na dipaboa di Bibel, jala tigor do on. Tingki sasahalak ndang mangangku mangulahon dosa na balga, ingkon adong do hatorangan sian dua saksi asa boi angka sintua mambahen panitia pengadilan. (5 Mus. 19:15; 1 Tim. 5:19) Molo ndang mangangku ibana, ingkon dipangido angka sintua do hatorangan sian na mangida na masa i. Panitia pengadilan boi dibahen molo adong dua saksi, i ma halak na paboahon dohot halak na mangida na masa i. Alai nang pe holan halak na paboahon i do na mangida na masa i, ndang na gabe so boi dihaporseai hatana i. Nang pe ndang adong dua saksi na boi patuduhon na tutu do halak na ditudu i mangulahon pelecehan seksual, diboto angka sintua do molo na ditudu i nunga mangulahon dosa na balga. Alani i, ingkon diurupi jala diapuli angka sintua do angka halak na gabe korban, jala ingkon manat do nasida laho manjaga huria sian halak na mangulahon pelecehan seksual i.​—Ul. 20:28. w19.05 11 ¶15-16

Porlu do angka natua-tua mangajari ianakhonna carana marsiajar. Umpamana, ingkon diparsiajari nasida do carana mambahen persiapan tu parpunguan, manang mambahen riset taringot tu parsoalan na diadopi nasida di singkola. (Heb. 5:14) Molo somal nasida marsiajar Bibel di jabu, gabe mura ma nasida mangantusi aha na diparsiajari di parpunguan dohot di kebaktian. Tontu ingkon ditontuhon natua-tua do sadia leleng nasida marsiajar hombar tu umur dohot kemampuan ni ianakhonna. Angka parsiajar Bibelta pe porlu do diurupi carana marsiajar. Tingki parjolo sahali nasida marsiajar Bibel, las do rohanta molo dibahen nasida persiapan tingki laho marsiajar Bibel manang di parpunguan. Alai porlu do taajari nasida carana mambahen riset dohot marsiajar Bibel sahalakna. Hasilna, tingki adong parsoalan, boi do dilului nasida sandiri poda na denggan marhite mambahen riset sian publikasinta. w19.05 26 ¶2; 28 ¶10-11

Marsitutu do Sibolis laho manegai pingkiranta. Dipangke ibana do marragam cara laho mambahen hita asa unang mangihuthon hasintongan. Jotjot do dibahen Sibolis sungkun-sungkun songon na dibahen ibana tu si Hawa tingki di porlak Eden. Didok, “Tutu do didok Debata . . . ?” (1 Mus. 3:1, Bibel siganup ari) Saonari pe, jotjot do tabege sungkun-sungkun songon, ‘Tutu do ndang lomo roha ni Debata molo marhasohotan baoa tu baoa, borua tu borua? Tutu do ndang lomo roha ni Debata molo dirayahon hamu Natal dohot ulang tahun? Tutu do diorai Debata hamu transfusi darah? Tutu do diorai Debata hamu marsaor tu sisolhot naung dipecat?’ Molo adong sungkun-sungkun di rohanta na so taralusi, boi do i mambahen ganggu haporseaonta. Jala lam leleng, boi do gabe sega pingkiranta jala mago haporseaonta. w19.06 12-13 ¶15-17

Mansai holong do roha ni Jahowa tu hita. (Joh. 3:16) Lomo do rohanta maniru Ibana. Alani i, marsitutu ma hita asa “sapangkilalaan, masihaholongan, [jala] marasi ni roha” tu sude halak, tarlumobi tu “dongan sahaporseaon”. (Gal. 6:10) Tingki susa dongan sahaporseaonta, lomo do rohanta mangurupi nasida. Songon dia hita boi mangapuli donganta na mate dongan saripena? Na rumingkot taulahon, ingkon mangkatai do hita tu ibana nang pe ndang taboto aha na laho tadok manang mabiar hita sala mandok hata. Si Paula na tompu mate suamina mandok, “Huboto do, molo hamatean i mambahen halak susa. Alani i, olo do gabe mabiar halak na laho mangapuli mandok hatana, atik boha hatana i mambahen jut roha ni na diapuli i. Alai tumagon do i sian apala ndang adong mandok manang aha.” Ndang porlu godang tadok hata tu halak na marhabot ni roha. Didok si Paula muse, “Huargai do tingki adong dongan na mandok, ‘Dohot do ahu marlungun ni roha.’” w19.06 20 ¶1; 23 ¶14

Molo diorai ulaonta, bahenon ni angka sintua do pengaturan asa boi marpungu jala ndang mambahen halak curiga. Ra, bahenon ni angka sintua do parpunguan i gabe piga-piga kelompok na gelleng, jala paubaon tingki dohot ingananna. Ndang sai sarupa situasi di sude inganan taringot ulaon marbarita. Alai ala holong rohanta tu Jahowa jala las rohanta paboahon taringot Harajaonna, sai adong do cara laho marbarita. (Luk. 8:1) Sahalak sejarawan di Rusia na margoar si Emily B. Baran paboahon taringot angka Sitindangi di Rusia. Didok ibana, “Tingki diorai pamarenta ulaon marbarita, tongtong do angka Sitindangi marbarita tu tetangga, dongan sakarejo, dohot tu halak na asing. Tingki dipenjarahon nasida alani i, tongtong do nasida marbarita tu angka halak na adong di penjara.” Nang pe diorai ulaon marbarita, tongtong do marbarita angka donganta na tinggal disi. Tiru hamu ma nasida! w19.07 11 ¶12-13

Songon dia caranta mangurupi halak na so maragama asa mangkaholongi Debata jala gabe sisean ni Jesus? Ingkon taantusi do pandapot ni sasahalak tu barita na tapasahat hombar tu ingananna magodang. Umpamana, ndang sarupa pandapot ni halak Eropa tu halak Asia Boasa? Molo di Eropa, godang do halak na mamboto taringot Bibel, jala somal do dibege nasida Debata do na manompa saluhutna. Alai molo di Asia, godangan do halak na so mamboto taringot Bibel jala ra ndang porsea nasida adong na manompa saluhutna. Pos ma rohanta. Ganup taon, adong do halak na so maragama na gabe Sitindangi Ni Jahowa. Godang do sian nasida na denggan pangalahona jala sogo rohana mangida angka agama na munafik. Alai na asing adong do na roa pangalahona jala adong hasomalanna na ingkon dipauba. Pos ma rohanta, urupan ni Jahowa do hita asa boi tadapot angka halak na “tama mandapot hangoluan saleleng ni lelengna”.​—Ul. 13:48; 1 Tim. 2:3, 4. w19.07 20-21 ¶3-4

Marpangkirimon di surgo manang di paradeiso pe hita, ingkon marsitutu do hita asa tongtong setia. Manang aha pe situasinta, unang ma sai taingot angka naung salpu na boi mambahen hita gabe ndang manomba Jahowa. (Plp. 3:16) Ra, ndang saut dope na tahirim, manang nunga matua hita jala ndang margogo. Adong muse na leleng mangadopi hasusaan jala dianiaya. Alai aha pe situasina, “unang ma holsohon hamu manang aha”. Pasahat ma pangidoan dohot elek-elekmuna tu Debata jala lehononna ma hadameon lobi sian na tabayangkon. (Plp. 4:6, 7) Songon pelari, ingkon marsitutu do ibana asa boi monang, tarlumobi molo nunga lam jonok tu garis finis. Suang songon i ma nang hita. Naeng saut nama sude janji ni Jahowa jala nunga jonok be aha na tahirim saleleng on. Alani i, marsitutu ma hita asa tongtong setia. w19.08 7 ¶16-17

Ra, ndang taboto aha na laho tadok tu halak na marhabot ni roha. Alai molo diida nasida dohot hita tangis, diboto nasida ma na parduli do hita tu nasida. Tingki mate ale-ale ni Jesus, i ma si Lasarus, tangis do si Maria, si Marta, dohot na asing. Dung opat ari ro ma Jesus, jala dohot do ibana tangis, nang pe diboto ibana na laho paheheonna do si Lasarus. (Joh. 11:17, 33-35) Tingki tangis Jesus, on patuduhon songon dia pangkilalaan ni Jahowa tu hamatean ni si Lasarus. Jala, tingki diida nasida Jesus tangis, gabe tarapul ma roha ni si Maria dohot si Marta, ala diboto na holong do roha ni Jesus tu nasida. Suang songon i ma, tingki diboto angka donganta na holong do rohanta tu nasida, gabe tarapul do roha ni nasida ala adong angka dongan na parduli jala rade mangurupi. Asing ni i, porlu do tatangihon nasida. Loas ma donganmuna i paboahon sude na di rohana jala unang ma jut rohamuna molo adong ‘hata na oto’ na didok nasida. (Job 6:2, 3) Ra marsak situtu do rohana ala dipaksa keluargana na so sisomba Jahowa. Alani i, togihon ma ibana rap martangiang. Pangido ma tu “Sitangihon tangiang” asa dilehon gogo dohot bisuk tu ibana.​—Ps. 65:3. w19.04 18-19 ¶18-19

Manang aha pe tugasta, di Betel manang di lapangan, tontu tahaholongi do angka dongan dohot inganan penugasanta. Alai tingki muba situasi di ngolunta, tontu lungun do rohanta molo ingkon manadingkon penugasan i. Olo do gabe masihol hita tu angka dongan na tatadingkon, manang gabe mamingkirhon nasida tarlumobi ala adong penganiayaan di inganan i. (Mat. 10:23; 2 Kor. 11:28, 29) Maol do mangihuthon hasomalan di inganan na baru, nang pe i di negaranta sandiri. Ra, adong piga-piga donganta gabe suda godang hepengna tingki mandapot tugas na baru. Boi do i mambahen nasida gabe marsak jala marmetmet ni roha. Aha do na boi mangurupi nasida? Tongtong ma togu parale-aleonta tu Jahowa. (Jak. 4:8) Songon dia carana? Pos ma rohanta tu Debata, i ma “sitangihon tangiang”. (Ps. 65:3) Boi do bahenon ni Jahowa “gumodang sian na tapangido dohot na tapingkiri”. (Eps. 3:20) Ndang holan na tapangido di tangiangta na dilehon Jahowa tu hita. Alai boi do Ibana mangurupi hita pasaehon parsoalan na taadopi marhite cara na so hea tapingkirhon hian. w19.08 21 ¶5-6

Godang do halak porsea na laho hancur do tano on alani porang nuklir manang bencana alam. Alai ndang songon i na diajarhon Bibel. Gariada, dipaboa do di Bibel laho masa ma sada porang na parohon laba na denggan tu hita. Porang i, i ma Armagedon, jala dipaboa do di Bibel molo porang i sada barita na uli na boi mambahen hita marlas ni roha. (Pgk. 1:3) Porang Armagedon i ndang laho mangaripashon jolma, alai paluahon nasida do! Songon dia carana? Dipasiding ma pamarentaon na di portibi on. Di porang i, diripashon ma angka parjahat, alai mangolu do angka partigor. Jala dijaga do tano on asa unang hancur asa boi angka partigor tongtong mangolu disi. (Pgk. 11:18) Hata “Armagedon” holan sahali do dipaboa di Bibel, jala hata i dibuat sian hata Heber na lapatanna “Dolok Megido”. (Pgk. 16:16; surat na di toru.) Megido, i ma sada kota di Israel najolo. (Jos. 17:11) Alai, Armagedon na didok dison ndang sada inganan na adong di tano on. Armagedon, i ma sada situasi tingki sude raja di portibi on dohot angka pasukanna mamorangi naposo ni Debata.​—Pgk. 16:14. w19.09 8 ¶1-3

Adong sahalak borua naung 12 taon marsahit na posi. Hirim do rohana asa boi malum. Alai gabe marsak do rohana ala ndang adong pangubati na boi pamalumhon sahitna i. Jala hombar tu Patik, ramun do ibana. (3 Mus. 15:25) Tingki dibege ibana na boi Jesus pamalumhon na marsahit, lomo rohana asa pajumpang dohot Jesus. Didapothon ibana ma Jesus jala dijama ma rambu ni abit luarna. Dung i, pintor malum ma sahitna i! Alai ndang holan sahitna i na dipamalum Jesus. Sian cara ni Jesus maradophon borua i, boi do dihilala na dihaholongi jala diargai Jesus do ibana. Umpamana tingki mangkatai, didok Jesus do tu borua i, “ale borungku”. Tontu mansai dipatogu do roha ni borua i alani i! (Luk. 8:44-48) Parrohahon ma na diulahon borua i. Marsitutu do ibana asa boi pajumpang dohot Jesus. Suang songon i ma, ingkon marsitutu do hita asa boi ro tu Jesus. Saonari, ndang dibahen Jesus be mukjizat laho pamalumhon sahit ni angka halak na ro tu ibana. Alai tongtong do dilehon ibana gokkon tu hita. Didok ibana, “Ro ma hamu tu ahu, . . . asa hupargogoi hamu.”​—Mat. 11:28. w19.09 20 ¶2-3

Hea do tong panurirang Sakaria paboahon taringot on. Didok ibana, “Di angka ari i, marroan ma sasampulu halak bangso na asing mandapothon sahalak Jahudi mandok: ‘Naeng ihuthononnami do ho, ai nunga hubege hami na didongani Debata do hamu.’” (Sak. 8:23, Bibel siganup ari) Diboto Sitindangi Ni Jahowa do, asa boi angka halak sian sude bahasa dipapungu, ingkon dibaritahon do barita na uli di godang bahasa. Nunga taterjemahon be publikasi tu marratus bahasa. Ndang hea dope songon on godangna. Tangkas ma, dibahen Jahowa do mukjizat di tingkinta saonari, i ma papunguhon punguan bolon sian sude bangso. Ala nunga diterjemahon Bibel dohot publikasi di godang bahasa, gabe marsada ma punguan bolon i laho manomba Jahowa, nang pe nasida ro sian marragam bangso. Jala ditanda do Sitindangi Ni Jahowa ala ringgas marbarita jala marsihaholongan. On mambahen lam togu haporseaonta!​—Mat. 24:14; Joh. 13:35. w19.09 30 ¶16-17

Saleleng hasusaan bolon, tarsonggot ma angka halak ala masa na so hea tarpingkir ni nasida. Gabe “marsak situtu” ma nasida jala mabiar alana boi do gabe mate nasida di tingki i. (Sep. 1:14, 15) Di tingki i, lam susa ma parngoluon ni angka halak, dohot ma i angka naposo ni Jahowa. Ala ndang bagian sian portibi on hita, gabe taadopi do piga-piga hasusaan. Olo do ra, ndang tadapot angka na tahaporluhon. Nunga diparade “naposo haposan jala na marbisuk” hita asa boi tongtong setia saleleng hasusaan bolon. (Mat. 24:45) Godang do na dibahen nasida laho mangurupi hita, umpamana, marhite acara kebaktian sian taon 2016-2018. Di acara kebaktian i, dijujui do hita asa tongtong patuduhon angka parange na boi mangurupi hita huhut paimahon ari ni Jahowa. w19.10 14 ¶2; 16 ¶10; 17 ¶12

Tingki tabondut sipanganon, ndang boi tatontuhon aha pengaruh ni sipanganon i tu dagingta. Sipanganon na denggan, boi mambahen hita sehat. Alai sipanganon na so denggan, boi mambahen hita marsahit. Ra, ndang pintor tahilala pengaruh ni sipanganon i tu dagingta, alai tarida do i dung piga-piga leleng. Suang songon i ma, tingki mamillit hiburan boi do tapillit aha na laho tapamasuk tu pingkiranta. Alai dungkon i, adong do pengaruh ni hiburan na tapillit i tu pingkiran dohot rohanta. Hiburan na denggan boi mambahen hita marlas ni roha, alai hiburan na so denggan boi manegai dirinta. (Jak. 1:14, 15) Ra, ndang pintor tahilala pengaruh ni hiburan i tu dirinta, alai tarida do i dung piga-piga leleng. I do alana didok Bibel tu hita, “Manang aha na disuan sasahalak, i do tapuonna. Manang ise na manuan hombar tu giot-giot ni dagingna na mardosa, tapuonna do hamatean sian dagingna na mardosa i.” (Gal. 6:7, 8) Alani i, mansai ringkot do di hita asa pasidingkon sude hiburan na patuduhon angka na dihasogohon Jahowa!​—Ps. 97:10. w19.10 29-30 ¶12-14

Dipatudu Jahowa do muse holongna tu hita marhite mangalehon Anakna gabe tobusan laho humongkop hita. (Joh. 3:16) Songon dia hita boi maniru holong ni Jahowa? Ingkon taargai do angka donganta ganup marsada-sada jala rade manjangkon “birubiru na mago” na mulak muse tu Jahowa. (Ps. 119:176; Luk. 15:7, 10) Hita pe, boi do patuduhon holong tu angka donganta marhite rade mangalehon tingki dohot gogo laho mangurupi nasida, tarlumobi tingki dihaporluhon. (1 Joh. 3:17) Diparentahon Jesus do angka siseanna asa patuduhon holong na so mangkaringkothon diri. (Joh. 13:34, 35) Boi do didok parenta ni Jesus on parenta na imbaru, alana ndang adong parenta on dipaboa di Patik na dilehon Debata tu bangso Israel. Ingkon tahaholongi do Debata songon Jesus na mangkaholongi hita. Laho mangulahon i, porlu do tapatudu holong na so mangkaringkothon diri. Ingkon tahaholongi donganta lobi sian dirinta sandiri. Lapatanna, ingkon tahaholongi do nasida jala rade mate songon naung diulahon Jesus tu hita. w19.05 4 ¶11-13

Ingkon sai tajugulhon do martangiang mangido tondi parbadia. (Luk. 11:13) Sian tudosan ni Jesus di Lukas 11:5-9, taboto do boasa dilehon Jahowa tondi parbadia. Di tudosan i, lomo do roha ni baoa i laho manarihon tamuna. Didok rohana, ingkon lehononna do sipanganon tu tamuna i nang pe ndang adong manang aha di ibana jala nunga tonga borngin. Didok Jesus, ala na sai dijugulhon baoa i do mangido roti sian tetanggana i umbahen na dilehon. Aha do na diajarhon Jesus? Molo jolma na so sempurna pe olo mangurupi tetanggana na marsitutu mangido asa diurupi, tarlumobi ma Debata na parasi roha. Tontu lehononna do tondi parbadiana tu halak na sai jugul mangido i! Alani i, pos ma rohanta alusan ni Jahowa do tangiangta tingki tapangido tondi parbadiana. (Ps. 10:17; 66:19) Pos ma rohanta, boi do hita tongtong martahan nang pe Sibolis sai manusai hita. w19.11 13 ¶17-19

Diboto Jesus, adong do tingkina ingkon maradi ibana dohot angka siseanna. Alai sian najolo sahat tu saonari, godangan halak sarupa do songon baoa na mora di tudosan ni Jesus. Didok ibana tu dirina sandiri, “Marsonang-sonang ma ho, mangan, minum, jala marlas ni roha.” (Luk. 12:19; 2 Tim. 3:4) Didok rohana, maradi dohot marsonang-sonang do na rumingkot di parngoluon on. Alai ndang songon i Jesus dohot angka apostelna. Ndang hasonangan na gabe na rumingkot di nasida. Saonari pe, boi do tatiru Jesus. Tingki libur karejo, unang ma tapangke tingkinta holan laho maradi. Alai dohot ma hita tu ulaon marbarita jala ro tu parpunguan. Mansai ringkot do di hita mambahen sisean jala ro tu parpunguan. Alani i, tongtong ma taulahon i sian nasa tolapta. (Heb. 10:24, 25) Tingki laho pe hita liburan, tongtong ma marpungu jala marsitutu ma marbarita tu manang ise pe na tajumpangi.​—2 Tim. 4:2. w19.12 7 ¶16-17

Dipaloas Jahowa do hita laho mambahen keputusan di ngolunta. Diajari Ibana do hita songon dia mambahen keputusan na denggan. Jala diurupi do hita asa marhasil tingki mambahen keputusan na mambahen las roha ni Jahowa. (Ps. 119:173) Molo taulahon aha naung taparsiajari di Bibel, gabe boi ma tabahen keputusan na denggan. (Heb. 5:14) Nang pe nunga tabahen keputusan na denggan, ra maol do tahilala mangulahon i. Pingkirhon ma piga-piga contoh on: Sahalak donganta baoa na poso mambahen keputusan laho manjaha sude isi ni Bibel. Diulahon ibana do i saleleng piga-piga minggu. Alai dungkon i, ndang diulahon be i. Sahalak donganta borua mambahen keputusan laho gabe perintis biasa, alai ndang marna saut i diulahon. Punguan ni angka sintua mambahen keputusan asa lam jotjot mangulahon kunjungan penggembalaan tu angka dongan di huria. Alai dung marbulan-bulan, ndang marna saut i diulahon. Imbar do situasi ni nasida, alai sarupa do na diadopi. Dibahen nasida do keputusan, alai ndang diulahon i. w19.11 26 ¶1-2

Dipatudos Jesus do tingkinta saonari songon “tingki ni si Noak”, jala taboto do hita mangolu di “tingki hasusaan di ari parpudi”. (Mat. 24:37; 2 Tim. 3:1) Alani i, piga-piga donganta naung mardongan saripe, mamillit asa ndang pintor marianakhon asa boi mangalehon gumodang tingki di ulaon marbarita. Tingki na mardongan saripe mambahen keputusan taringot marianakhon, ingkon ‘dietong nasida do sipalaoonna’. (Luk. 14:28, 29) Angka natua-tua naung marianakhon mandok, asing ni biaya na godang, ingkon dipangke nasida do godang tingki dohot gogo laho pagodang-godangkon ianakhonna. Alani i, ringkot do dipingkirhon na mardongan saripe sungkun-sungkun on, ‘Ingkon karejo do hami na dua laho paradehon angka na porlu di keluarga? Satolop do hami tu “angka na porlu” di keluarga? Molo karejo hami na dua, ise ma na manjaga ianakhonnami? Ise do na gabe ditiru ibana?’ Tingki diulas na mardongan saripe sungkun-sungkun i, nunga diihuthon nasida ayat sadarion. w19.12 23-24 ¶6-7

Jotjot do si Paulus mangadopi situasi na berbahaya. (2 Kor. 11:23-28) Ikkon martahan do ibana nang pe adong ‘suga di bagasan dagingna’. Ra, sahit do na didokna disi. (2 Kor. 12:7) Jala hea do ibana marmetmet ni roha alani si Demas. Rap saulaon hian do si Demas dohot si Paulus. Alai “ala dihaholongi ibana do portibi on”, gabe ditadikkon ma si Paulus. (2 Tim. 4:10) Halak Kristen na miniahan jala na barani do si Paulus. Alai sipata, porlu do ibana dipatogu akka dongan na asing. Alana, olo do sipata ibana marmetmet ni roha. (Rom 9:1, 2) Songon dia do si Paulus dipatogu jala diurupi? Dipakke Jahowa do tondi parbadiana lao patoguhon si Paulus. (2 Kor. 4:7; Plp. 4:13) Asing ni i, dipatogu Jahowa do si Paulus marhite akka dongan sahaporseaon. Didok si Paulus do molo akka donganna na rap saulaon i sai ‘patoguhon rohana’. (Kol. 4:11) Dipaboa si Paulus do piga-piga goar ni nasida, songon si Aristarkus, si Tikikus, dohot si Markus. Dipatogu nasida do si Paulus jala diurupi asa boi toktong martahan. w20.01 8 ¶2-3

Didok Jesus, dang boi diattusi halak na so hea dimiahi tondi parbadia taringot pakkilalaan ni halak na ‘ditubuhon muse’ manang “tubu sian tondi parbadia”. (Joh. 3:3-8) Aha do na muba dung dimiahi tondi parbadia sasahalak? Andorang so dimiahi, marpakkirimon do nasida lao mangolu salelengna di tano on. Jala tarpaima do nasida lao bahenon ni Jahowa saluhut tano on gabe paradeiso jala pasidingonna sude hajahaton. Ra nungnga dibayakkon nasida lao pajumpang muse dohot keluarga manang dongan naung mate. Alai, dung dimiahi tondi parbadia, gabe muba ma cara marpikkir ni nasida. Boasa songon i? Ala na massai borat do hasusaan na diadopi nasida umbahen na so lomo be rohana mangolu di tano on? Manang didok roha ni nasida bosan do mangolu salelengna di tano on? Dang songon i. Alai, ala na dipauba Jahowa do cara marpikkir dohot pakkirimon ni nasida marhite tondi parbadiana. w20.01 22 ¶9-11

Di Patik ni si Musa, angka sintua ndang holan mangaradoti taringot ibadat tu Jahowa, alai dohot do muse parsoalan songon pelanggaran hukum dohot na asing. Alai angka sintua saonari holan mangaradoti parsoalan taringot ibadat tu Jahowa do. (Gal. 6:2) Diboto nasida do na diloas Debata do angka pamarenta laho pasaehon parsoalan, songon pelanggaran hukum dohot na asing. Jala boi do angka pamarenta mambahen hukuman songon denda manang dipenjara. (Rom 13:2-4) Songon dia do angka sintua pasaehon parsoalan molo adong na mangulahon dosa na balga? Ingkon dipangke nasida do prinsip ni Bibel laho pasaehon parsoalan i jala mambahen keputusan. Ingkon tongtong do diingot, holong do fondasi patik ni Kristus. Alani i, ingkon dipingkirhon nasida do: Aha do na ingkon diulahon laho mangurupi sahalak dongan di huria na gabe korban dosa na balga? Taringot halak na mangulahon dosa na balga i, ingkon dipingkirhon angka sintua do, olo do ibana marhamubaon? Boi do hami mangurupi ibana laho padengganhon parale-aleonna tu Jahowa? w19.05 7 ¶23-24

Diattusi Jesus do, Amana i do na mangalehon ngolu jala paradehon akka na porlu di ibana. Pos do roha ni Jesus tu Amana. Jala sai dilehon Jahowa do na dihaporluhon ibana asa toktong mangolu. Na rumikkot, diurupi Jahowa do Jesus asa boi toktong setia tu Ibana. (Mat. 4:4) Diparade Jahowa do aha na tahaporluhon lao patoguhon parale-aleotta tu Ibana. Marhite Bibel, dipaboa Ibana hasittongan taringot dirina, sakkapna, tujuan ni ngolu dohot na lao masa di ari na naeng ro. Diparrohahon Ibana do hita tikki parjolo sahali mananda hasittongan marhite natua-tuatta manang sasahalak na mangurupi hita marsiajar Bibel. Jala toktong do hita diurupi angka sintua di huria dohot dongan na togu parale-aleonna tu Debata. Adong muse tudu-tudu na dilehon Ibana marhite parpunguan. Rap marsiajar do hita dohot akka dongan sahaporseaon. Marhite akka cara on, dipatudu Jahowa do na disarihon hita.​—Ps. 32:8. w20.02 3 ¶8; 5 ¶13

Molo sai mangiburu hita, dang boi hita mardame dohot halak na asing. Ikkon tabolokkon do roha mangiburu sian diritta. Jala pasiding ma akka na boi mambahen hita mangiburu tu na asing. Aha do na boi taulahon lao mangurupi na asing asa pasidikkon roha mangiburu jala gabe siboan dame? Balga do pengaruh ni na tahatahon dohot na taulahon tu na asing. Dijujui portibi on do hita asa “manganggarhon” akka na adong di hita. (1 Joh. 2:16) Alai pangalaho sisongon i, boi mambahen halak gabe mangiburu. Boi do hita mangurupi akka halak asa unang mangiburu molo dang sai tahatahon taringot akka na adong di hita manang akka na lao tatuhor. Asing ni i, ikkon serep do rohatta taringot hak istimewa na taulahon di huria. Unang ma sai tahatahon akka tugas na taulahon di huria. Alana boi do i mambahen halak na asing gabe mangiburu. Alai, sai parrohahon ma aha na rikkot di na asing dohot akka parange ni nasida na denggan. On boi mangurupi nasida marlas ni roha di akka na adong. Gabe marsada ma hita jala mardame di huria. w20.02 18 ¶15-16

Hita boi marsiajar taringot Jahowa marhite akka toppaanna. (Pgk. 4:11) Rimangi ma bisuk ni Debata na tarida sian akka suan-suanan dohot akka binatang. Parsiajari ma songon dia Debata manoppa pamatangta. (Ps. 139:14) Rimangi ma, massai balga do energi na dibahen Jahowa tu mataniari. Hape sasittongna adong do marmiliar akka bintang. (Jes. 40:26) Molo diulahon hamu i, lam bagas ma pangargaionmuna tu Jahowa. Alai, dang cukkup holan mamboto bisuk dohot huaso ni Jahowa asa boi marale-ale tu Ibana. Unggodang do muse na ikkon taboto taringot Jahowa asa lam bagas holongta tu Ibana. Ingot hamu ma, na disarihon Jahowa do hamu. “Molo dilului ho Ibana, sai jumpang ho do Ibana.” (1 Kron. 28:9) Marjanji do Jahowa, ‘Hutogu-togu do ho.’ (Jer. 31:3) Lam diargai hamu akka naung binahen ni Jahowa i, lam bagas ma holongmuna tu Ibana. w20.03 4 ¶6-7

Dibahen si Paulus do contoh na denggan taringot mangkaringkothon ulaon marbarita. Saleleng di Korint di pardalananna gabe misionaris na paduahalihon, ingkon karejo do si Paulus mambahen tenda ala naeng suda hepengna. Diulahon ibana pe i, asa boi do ibana tongtong marbarita tu halak Korint. Alana ndang olo ibana manjalo hepeng sian nasida. (2 Kor. 11:7) Nang pe ingkon karejo si Paulus, alai ulaon marbarita do na rumingkot di ibana. Di ari Sabbat pe, tongtong do ibana marbarita. Dung lam denggan muse situasina, lam jotjot do si Paulus marbarita. ‘Dipangke ibana do sude tingkina laho mamaritahon Hata ni Debata. Dipaboa jala dipatuduhon ibana do tu halak Jahudi na tutu Jesus i Kristus.’ (Ul. 18:3-5; 2 Kor. 11:9) Dungkon i, tingki dipenjarahon ibana di Rom saleleng dua taon, marbarita do ibana tu angka halak na manjumpangi ibana jala dibahen do surat. (Ul. 28:16, 30, 31) Ndang dipaloas si Paulus manang aha pe mangambati ibana laho marbarita. w19.04 4 ¶9