Maret

Ra, dijujui angka keluarga manang sisolhot do hita mangulahon hasomalan na dihasogohon Debata taringot halak naung mate. Alai molo holong rohanta tu Debata dohot tu Hatana, gabe taronjar do rohanta asa unduk tu Ibana. Ra, dibahen nasida do hita maila, didok do ndang holong rohanta tu nasida. Jala didok nasida do muse, olo do gabe diganggu halak na mate i hita molo ndang taulahon hasomalan i. Di negara Karibia, godang do halak porsea dung mate sasahalak adong do “beguna” jala didok boi do begu i mambalos hajahaton na hea dibahen angka halak tu ibana. Didok muse, “begu” i boi mambahen susa piga-piga halak. Hasomalan na asing di Afrika, molo mate sasahalak, ingkon ditutup do angka kaca na adong di jabu i jala molo adong potona ingkon dipabalik do i tu dinding. Boasa? Didok nasida, asa unang diida halak na mate i be dirina! Tontu ndang porsea hita tu angka hasomalan i jala ndang dohot hita mangulahon i, alana gabus ni Sibolis do i!​—1 Kor. 10:21, 22. w19.04 16 ¶11-12

Diajarhon Jesus do angka prinsip na mangurupi angka siseanna asa mambahen na tigor tu na asing. Umpamana, songon Aturan Emas. Tontu lomo do rohanta molo dibahen na tigor tu hita. Alani i, ingkon taulahon do na sarupa tu nasida. Molo taulahon songon i, ra gabe taronjar do roha ni nasida laho mambahen na tigor tu hita. Alai songon dia do molo dibahen na so tigor tu hita? Diajarhon Jesus do tu angka siseanna asa pos roha ni nasida, na laho “bahenon ni Debata do na tigor tu halak na pinillitna na jou-jou tu Ibana arian dohot borngin”. (Luk. 18:6, 7) Hata on paboahon janji ni Debata, i ma na diparrohahon Ibana do hasusaan na taadopi di ari parpudi on. Ala tigor do Debata, laho uhumonna ma angka halak na parohon hasusaan tu hita. (2 Tes. 1:6) Molo taihuthon prinsip na diajarhon Jesus, tontu tabahen do na tigor tu na asing. Di portibi ni Sibolis on, susa do tahilala ala dibahen na so tigor tu hita. Alai boi do tarapul rohanta ala taboto laho patuduhonon ni Jahowa do hatigoranna tu hita. w19.05 5 ¶18-19

Molo singkola dope hamu, ra jotjot do donganmu mangarayahon ulang tahun. Ra, lomo do rohamu naeng paboahon hasintongan sian Bibel boasa ndang dohot hamu mangarayahon i. Alai didok rohamu ndang tolap hamu laho paboahon i. Alani i, porlu do hamu marsiajar! Adong dua alasan boasa porlu diulahon hamu i: (1) asa lam pos rohamuna molo ulang tahun i ndang dihalomohon Debata jala (2) asa lam denggan caramuna paboahon hasintongan i. (Mat. 14:6-11) Boi do disungkun hamu dirimuna, ‘Boasa dirayahon angka donganku ulang tahun?’ Dung i, bahen ma riset sian publikasinta. Sasintongna, ndang maol paboahon hasintongan. Godangan halak mangarayahon ulang tahun ala mangihuthon halak na asing. Alai molo boi dipaboa hamu sada manang dua hatorangan na sintong tu nasida, ra boi do diurupi hamu nasida marsiajar hasintongan.​—Kol. 4:6. w19.05 29 ¶13

Sada tingki, hea do panurirang Elia lari martabuni ala adong na naeng mambunu ibana. Gabe metmet do rohana jala didok tu Debata tumagon ibana mate. Alai disuru Jahowa ma sada suru-suruan laho manjumpangi si Elia. Dipatogu suru-suruan i do roha ni si Elia. Dilehon do sipanganon tu si Elia jala disuru asa mangan. (1 Raj. 19:5-8) Sian cerita on, adong na boi taparsiajari. Nang pe ndang godang na boi tabahen, alai molo tasarihon angka dongan, on boi mangapuli rohana. Ra, boi do talehon sipanganon, hadiah, manang surat na marisi angka hata na patoguhon roha. Molo taulahon i, on mambahen pos roha ni nasida na tahaholongi nasida. Molo maol tahilala mangkatai taringot aha na dihilala nasida, taulahon ma aha na boi patuduhon na parduli do hita tu nasida. Dipargogoi Jahowa do si Elia asa boi lari tu Dolok Horeb dao sian halak na naeng mambunu ibana. Aha ma na boi taparsiajari? Molo naeng mangapuli halak na hea gabe korban pelecehan seksual, parjolo sahali ingkon tabahen do dame pangkilalaanna tingki di jabuna manang di Bale Harajaon. w19.05 16 ¶11; 17 ¶13-14

Tingki tajaha bindu 12 surirang ni si Sakaria, dipaboa do taringot hamamate ni Messias. (Sak. 12:10) Di ayat 12 didok, mangandungi do “pinompar ni ompu ni si Natan” ala mate Messias. Unang ma holan tajaha sambing, alai boi ma tapingkirhon, ‘Aha do hubungan ni pinompar ni si Natan dohot Messias?’ Boi do talului godang hatorangan taringot i. Boi ma tajaha 2 Samuel 5:13, 14 na paboahon molo si Natan i, i ma sada sian anak ni Raja Daud. Na paduahon, boi ma tajaha Lukas 3:23, 31 na patuduhon molo Jesus pinompar ni si Natan sian si Maria. Songon na taboto, Jesus tubu sian pinompar ni si Daud. (Mat. 22:42) Alai adong lobi sian 20 anak ni si Daud. Tontu longang do rohanta ala tangkas dipaboa si Sakaria, na mangandungi do pinompar ni si Natan tingki mate Jesus. Cara songon on boi mambahen lomo rohanta marsiajar Bibel! w19.05 29 ¶17

Aha do na porlu taulahon? Molo ringgas hita marsiajar, gabe pos ma rohanta tu sude na diajarhon Bibel. Jala gabe porsea ma hita tu sude aturan na dibahen Jahowa. Songon hau na togu uratna, boi ma ‘togu dipajongjong haporseaonta’. (Kol. 2:6, 7) Ingkon hita sandiri do na patoguhon haporseaonta, ndang boi halak na asing. Alani i, tongtong ma tapauba roha dohot pingkiranta. Ringgas ma martangiang jala pangido ma tu Jahowa tondi parbadiana laho mangurupi hita. Rimangi ma aha na tajaha di Bibel, jala tapareso ma atik boha adong pingkiranta na sala. Sai lului ma dongan na burju na mangurupi hita paubahon pingkiranta. Molo taulahon songon i, boi ma tajaga dirinta sian pengaruh ni Sibolis. Jala marhasil ma hita mangarumpakkon “angka pingkiran na sala dohot angka na maralo tu parbinotoan taringot tu Debata”.​—2 Kor. 10:5. w19.06 13 ¶17-18

Songon si Rut na tongtong mandongani si Naomi, hita pe ingkon tongtong do mangurupi halak na marhabot ni roha. (Rut 1:16, 17) Si Paula mandok, “Tingki baru mate suamikku, godang do angka dongan na mangurupi ahu. Alai lam leleng, sibuk do sude angka donganta tu ulaonna be. Hape sasintongna, ndang boi dope pintor tarapul rohangku. Ringkot do diurupi halak na marhabot ni roha, ra saleleng marbulan-bulan manang martaon-taon.” Tontu ndang sai sarupa sude halak. Adong do na hatop boi tarapul rohana jala ndang sai marlungun ni roha. Alai na asing, olo do gabe lungun rohana muse tingki adong ulaon na mambahen ibana mangingot halak naung mate i. Ingot ma, dilehon Jahowa do tanggung jawab tu hita laho mangapuli halak na marhabot ni roha. w19.06 24 ¶16

Tingki diorai ulaonta, ingkon taboto do adong do ‘tingkina hohom’. (Pjm. 3:7, Bibel siganup ari) Ingkon manat do hita asa unang paboahon angka informasi songon goar ni angka donganta, didia hita marpungu, songon dia hita marbarita, jala songon dia hita mandapot angka na diparade organisasi. Unang ma tapaboa i tu pamarenta, tu dongan manang tu sisolhotta na adong di negaranta manang di negara na asing. Molo taulahon i, boi do i mambahen jea tu angka donganta. Unang ma tapaloas masalah na gelleng mambahen hita ndang marsada. Diboto Sibolis do, molo marbadai sada keluarga ndang boi hot keluarga i. (Mrk. 3:24, 25) Alani i, sai marsitutu do ibana asa unang marsada hita. Jala lomo rohana asa marbadai hita dohot angka donganta. Halak Kristen na togu parale-aleonna tu Jahowa pe, ingkon manat do taringot jorat on. Alani i, molo adong parsoalanta dohot donganta jala marsitutu hita pasaehon i, boi ma hita tongtong marsada.​—Kol. 3:13, 14. w19.07 11-12 ¶14-16

Jotjotan do halak olo manangihon barita na tapasahat ndang alani barita i, alai sian caranta pasahathon barita i do. Lomo do roha ni nasida molo burju hita, marbisuk jala lambok mangkatai tu nasida. Unang ma tapaksahon pandapotta tu nasida. Gariada, ingkon taantusi do pandapot ni nasida taringot agama jala ingkon taantusi do pangkilalaanna nasida. Misalna, tingki mangkatai si Paulus dohot halak Jahudi, dipangke ibana do ayat sian na tarsurat. Alai tingki mangkatai ibana dohot halak Junani di Areopagus, ndang pintor dienet ibana ayat sian na tarsurat. (Ul. 17:2, 3, 22-31) Tatiru ma si Paulus. Molo na jumpangmuna i ndang porsea tu Bibel, unang ma pintor tapaboa ayat na sian Bibel. Molo dihilala hamu ndang lomo rohana diida halak manjaha Bibel, pangke ma cara na asing. Umpamana, jahahon ma ayat sian HP manang tablet. w19.07 21 ¶5-6

Malo do Sibolis mangela-ela halak Israel asa manomba gana-ganaan. Diboto Sibolis do na dihaporluhon nasida sipanganon. Alani i, dipangke ibana ma cara i laho mangela-ela nasida. Dung masuk nasida tu Tano na Dijanjihon, ingkon diuba nasida do carana laho mangula. Tingki di Mesir, sian sunge Nil do aek na dipangke nasida tu ladang ni nasida. Alai di Tano na Dijanjihon, ndang adong sunge na balga. Ingkon aek udan do na dipangke nasida. (5 Mus. 11:10-15; Jes. 18:4, 5) Alani i, ingkon diparsiajari halak Israel do muse cara na baru laho mangula. Boasa dilehon Jahowa sipasingot taringot manomba gana-ganaan, hape taringot tu cara mangula dope na baru dihatai Ibana? Diboto Jahowa do boi do gabe tarela-ela halak Israel laho mamparsiajari cara mangula sian halak na so sisomba Jahowa. Alai berbahaya do on tu halak Israel. Alana manomba Baal do angka pangula na di Kanaan.​—4 Mus. 25:3, 5; Pangh. 2:13; 1 Raj. 18:18. w19.06 3 ¶4-6

Tingki ro apostel Paulus, si Silas, si Lukas, dohot si Timoteus tu kota Pilippi, pajumpang ma nasida dohot godang halak na lomo rohana tu barita na uli. Opat donganta on, marsitutu do mangurupi laho pajongjongkon huria na baru. Sude angka dongan na baru tardidi, nunga ro marpungu. Jala ra, di jabu ni sahalak borua na porsea na margoar si Lidia do dibahen parpunguan i. (Ul. 16:40) Alai ndang sadia leleng, adong ma ambat-ambat na diadopi huria na baru on. Dibahen Sibolis do halak na sogo rohana tu hasintongan asa mangorai ulaon ni si Paulus dohot angka donganna. Gabe ditangkup ma si Paulus dohot si Silas, didangguri dohot batu, jala dipenjarahon. Dung kaluar nasida sian penjara, dijumpangi jala dipatogu nasida do muse angka dongan di kota i. Dung i, laho ma si Paulus, si Silas, dohot si Timoteus sian kota i. Alai tongtong do si Lukas tinggal disi. Dung laho nasida, aha do na diulahon angka donganta na baru tardidi i? Marhite tondi parbadia, diurupi Jahowa do nasida asa tongtong ringgas marbarita. (Plp. 2:12) Tontu, las do roha ni si Paulus tu nasida! w19.08 8 ¶1-2

Hea do hamu pinda tu inganan na baru? Olo do ra suda godang hepengta ala pinda. On boi mambahen hita gabe marutang. Alani i, manat ma asa unang sampe marutang hamu laho manuhor angka barang na so porlu. (Poda 22:3) Ra maol do tahilala manontuhon sadia godang hepeng na tapinjam tingki masa situasi na maol, songon mangurus keluarga na marsahit. Molo masa i, ingot ma “tangiang dohot elek-elek” boi mangurupi hamu mambahen keputusan na denggan. Dialusi Jahowa do tangiangmuna marhite mangalehon hadameon na boi “manjaga roha dohot pingkiranmuna” asa boi dibahen hamu keputusan na denggan. (Plp. 4:6, 7; 1 Ptr. 5:7) Tongtong ma marale-ale dohot dongan na burju. Paboa ma pangkilalaan dohot pengalamanmuna tu angka dongan, tarlumobi tu na hea mangadopi situasi na sarupa. Molo diulahon hamu i, boi ma dame pangkilalaanmuna. (Pjm. 4:9, 10) Tongtong ma marale-ale dohot angka donganmuna di inganamuna najolo. w19.08 22 ¶9-10

Boasa dipatudos Jahowa porangna dohot Megiddo? Najolo, jotjot do masa porang di Megiddo dohot di Rura Jisreel. Jala jotjot do diurupi Jahowa naposona monang tingki marporang disi. Umpamana, “di topi ni batangaek Megiddo”, diurupi Debata do Hakim ni halak Israel si Barak manaluhon tentara Kanaan na dipimpin si Sisera. Mandok mauliate do si Barak dohot panurirang borua si Debora tu Jahowa ala monang nasida. Diendehon nasida ma, “Marporang ma bintang sian langit . . . diporangi bintang i ma si Sisera. . . . Ingkon songon i ma nian hamamago ni saluhut angka musum, ale Jahowa! Alai anggo jolma, angka na mangkaholongi Ho, ingkon marsinondang do songon habibinsar ni mata ni ari di hagogoanna.” (Pangh. 5:19-21, 31) Di Armagedon, ripashonon ni Debata ma sude musuna jala paluaonna do naposona. Alai adong do imbar ni porang na masa di tingki ni si Barak dohot porang Armagedon. Di Armagedon, ndang laho marporang naposo ni Debata. Jala ndang laho adong sinjata ni nasida! Nang pe songon i, pos do roha ni nasida tu Jahowa dohot tu angka tentarana na di surgo.​—Jes. 30:15; Pgk. 19:11-15. w19.09 9 ¶4-5

Sada cara hita ro tu Jesus, i ma mangulahon na dumenggan laho mamparsiajari sude na didok dohot na diulahon Jesus. (Luk. 1:1-4) Hita sandiri do na martanggung jawab laho mamparsiajari na didok Bibel taringot Jesus. Ndang boi halak na asing mangulahon i tu hita. Asing ni i, ro hita tu Jesus tingki tabahen keputusan laho tardidi jala gabe siseanna. Cara na asing hita ro tu Jesus, i ma mangido angka sintua di huria asa mangurupi hita. Nasida do ‘silehon-lehon’ sian Jesus laho mangurus angka biru-biruna. (Eps. 4:7, 8, 11; Joh. 21:16; 1 Ptr. 5:1-3) Alai unang ma didok rohanta na boi do diboto angka sintua aha na tapingkirhon dohot aha na tahaporluhon. Ingkon hita do na mangido tu nasida asa diurupi hita. Pingkirhon ma contoh ni donganta baoa na margoar si Julian. Didok ibana, “Hupangido ma angka sintua laho patoguhon ahu. Huhilala ma sada silehon-lehon na mansai arga do kunjungan penggembalaan sian nasida i.” Songon angka sintua na mangurupi si Julian, sude sintua boi do mangurupi hita asa mamboto “pingkiran ni Kristus”, i ma mangantusi jala maniru cara marpingkir dohot parange ni Jesus. (1 Kor. 2:16; 1 Ptr. 2:21) On ma silehon-lehon na mansai arga di hita. w19.09 21 ¶4-5

Di Bibel, tajaha do taringot angka baoa dohot borua na setia jala ditogu-togu tondi parbadia nang pe nasida ndang bagian sian 144.000. Umpamana, si Johannes Pandidi. (Mat. 11:11) Contoh na asing, i ma si Daud. (Ul. 2:34) Laho dipahehe do nasida dohot na asing jala mangolu di paradeiso di tano on. Nasida rap dohot punguan bolon boi patuduhon na unduk do nasida tu Jahowa dohot tu pamarentaonna. On ma parjolo sahali dipapungu Jahowa marjuta halak sian sude bangso laho manomba Ibana. Manang didia pe pangkirimonta, ingkon taurupi do godang halak asa boi gabe bagian sian ‘biru-biru na asing’. Ndang sadia leleng nai, laho masa do hasusaan bolon. Jala ripashonon ni Jahowa ma sude pamarentaon dohot agama na mambahen susa angka jolma. Sada hak istimewa na mansai balga do di punguan bolon laho manomba Jahowa di tano on salelengna!​—Pgk. 7:14. w19.09 31 ¶18-19

Ala nunga jonok hasusaan bolon, lam godang ma ambat-ambat na mambahen hita ndang setia tu Debata dohot tu Harajaonna. Gabe direhei angka halak do hita. Tarlumobi ala tongtong do hita netral di portibi on. Alani i, sian saonari ingkon tapatogu do parale-aleonta tu Jahowa asa boi tongtong setia tingki hasusaan bolon. Saleleng hasusaan bolon, adong ma na muba sian angka donganta na mangaradoti organisasi. Tingki i, sude halak Kristen na miniahan na adong dope di tano on nunga diboan tu surgo jala rap dohot Jesus laho marporang di Armagedon. (Mat. 24:31; Pgk. 2:26, 27) Lapatanna, dung dimulai hasusaan bolon, ndang rap be Punguan na Mangaradoti Organisasi dohot hita di tano on. Alai adong do angka donganta sian biru-biru na asing na togu parale-aleonna tu Debata na tongtong mangaradoti punguan bolon. Alani i, ingkon tongtong do hita setia marhite mangurupi jala mangihuthon tudu-tudu na dilehon Debata marhite nasida. Molo taulahon i, boi ma hita martahan! w19.10 17 ¶13-14

Sahalak borua na setia do si Naomi. Alai dung mate suami dohot dua anakna, gabe naeng diganti si Naomi ma goarna gabe “si Mara” lapatanna “si Paet”. (Rut 1:3, 5, 20, 21) Alai parumaenna si Rut, tongtong do rap dohot ibana. Diparade si Rut do angka na porlu di si Naomi jala lambok do ibana mangkatai tu si Naomi. Dipatudu si Rut do holongna tu si Naomi marhite hata na patoguhon roha. Tingki adong donganta na mate dongan saripena, porlu do ibana diurupi. Halak na mardongan saripe, dos do songon dua hau na rap tubu. Dung martaon-taon, marsijalinan do angka uratna. Molo mate sada hau i, tontu balga do pengaruhna tu hau na sada nai. Suang songon i ma, molo mate dongan saripe ni sasahalak, balga do pengaruhna i tu ibana. Jala leleng do mago lungun ni rohana i. w19.06 23 ¶12-13

Asing ni manontuhon hiburan aha na tapillit, ingkon manat do hita mangatur sadia godang tingki na tapangke tu hiburan i. Molo ndang manat hita, boi do gabe gumodang tingki na tapangke tu hiburan sian ulaonta manomba Jahowa. Parjolo, pareso ma sadia godang tingki na dipangke hamu tu hiburan. Boi do dibahen hamu catatan saleleng saminggu. Surat ma di kalender sadia godang tingki na dipangke hamu laho manonton TV, marinternet, dohot mar-game di HPmuna. Molo dihilala hamu gabe gumodang tingkimuna suda tusi, bahen ma jadwal. Bahen ma rencana laho manjumolohon ulaon na rumingkot, dung pe i asa tu hiburan. Dung i, pangido ma tu Jahowa asa diurupi hamu mangulahon rencanamuna i. Molo diulahon hamu i, gabe adong ma tingki dohot gogomuna tu pelajaran pribadi, ibadat keluarga, parpunguan dohot ulaon marbarita. Jala gabe las ma rohamuna mamangke tingki tu hiburan ala nunga dijumolohon hamu Jahowa. w19.10 30 ¶14, 16; 31 ¶17

Hira-hira taon 55 M, dibahen halak Korint do keputusan na ringkot. Diboto nasida do na susa parhepengon ni angka dongan di Jerusalem dohot di Judea jala nunga dibahen nasida keputusan laho papunguhon hepeng. (1 Kor. 16:1; 2 Kor. 8:6) Alai dung piga-piga bulan, diboto Apostel Paulus ma, ndang saut dilehon halak Korint sumbangan i. Ujungna, gabe ndang boi be diboan sumbangan i tu Jerusalem rap dohot sumbangan sian huria na asing. (2 Kor. 9:4, 5) Dibahen halak Korint do keputusan na denggan, jala dipuji si Paulus do nasida alani haporseaon ni nasida na togu jala rade mangurupi. Alai dijujui si Paulus do nasida asa mangulahon keputusan naung binahen ni nasida i. (2 Kor. 8:7, 10, 11) Sian contoh on gabe taboto ma, olo do maol dihilala angka halak Kristen na setia laho mangulahon keputusan na denggan. Boasa? Ala ndang sempurna, olo do ndang pintor taulahon ulaonta. Manang boi do masa hasusaan na so panagaman tu hita.​—Pjm. 9:11. w19.11 26-27 ¶3-5

Songon perisai na balga na boi manjaga sude pamatangta, haporseaon boi do manjaga hamu sian angka pengaruh na so denggan sian portibi on. Songon angka na rorang, kekerasan, dohot manang aha pe na maralo tu aturan ni Debata. Ingkon marporang do sude halak Kristen mangalo suru-suruan na jahat. (Eps. 6:10-12) Sian dia do diboto hamu naung togu haporseaonmuna tingki diuji? Ingkon martangiang do hamu asa diurupi Debata. Dung i, pangke ma Bibel asa boi diboto hamu aha na dihalomohon Debata laho ulahononmuna. (Heb. 4:12) Bibel mandok, “Marhaposan tu Jahowa ma ho sian nasa roham, jala unang marpangunsandean ho tu pingkiranmu sandiri.” (Poda 3:5, 6) Pingkirhon ma piga-piga situasi na diadopi hamu jala songon dia hamu mangadopi i. Umpamana, hea do hamu mangkilala susa di parhepengon? Tingki naeng mambahen keputusan, pos do rohamu tu janji ni Jahowa na disurat di Heber 13:5 na mandok, “Ndang tadingkononku ho jala ndang pasombuonku ho”? Pos do rohamu na laho urupan ni Jahowa hamu? Molo pos rohamuna, on patuduhon na denggan do dijaga hamu haporseaonmuna. w19.11 14 ¶1, 4

Ingkon dilehon natua-tua do godang tingki dohot gogona laho manarihon ianakhonna. Alai molo jonok-jonok umur ni angka ianakhonna, olo do ra gabe maol natua-tua manarihon ganup ianakhonna. Piga-piga natua-tua mandok, gabe palojahu do nasida alani i. Ra, ala sai loja dihilala sahalak ina, olo do gabe ndang adong be gogona laho marsiajar, martangiang, dohot marbarita na uli. Asing ni i, olo do gabe maol dihilala ibana manangihon acara di parpunguan. Gabe ndang dapotan laba ibana sian i. Tontu, diurupi suami na parholong do istrina laho manjaga ianakhonna tingki di parpunguan dohot di jabu. Umpamana, diurupi ibana do istrina mangkarejohon ulaon di jabu. Marsitutu do ibana asa sude mandapot laba sian Ibadat Keluarga. Jala ringgas do ibana mangurupi keluargana di ulaon marbarita. w19.12 24 ¶8

Songon dia do halak Israel mandapot laba di taon Yobel? Umpamana, bayangkon ma adong sahalak Israel na godang utangna. Ingkon digadis ibana do tanona asa boi digarar utangna i. Alai tingki taon Yobel, ingkon mulak do muse tanona i tu ibana. Gabe adong ma warisan na boi dilehon tu ianakhonna. Suang songon i ma, bayangkon ma molo adong sahalak baoa na gabe hatoban manang manggadis anakna gabe hatoban laho manggarar utang. Tingki taon Yobel, ingkon mulak do muse ibana manang anakna i tu keluargana. (3 Mus. 25:10) Alani i, ndang boi adong halak na gabe hatoban saleleng ngoluna. Didok Jahowa, “Na so tupa adong di tongatongamuna halak na pogos, ai buas do pasupasuon ni Jahowa ho di tano silehonon ni Jahowa, Debatam tu ho soluhonmu bahen partalianmu.” (5 Mus. 15:4) Imbar situtu do on tu na masa di tingkinta saonari. Taida do halak na mora gabe lam mamora jala halak na pogos gabe lam pogos! w19.12 8-9 ¶3-4

Tingki mangadopi hasusaan, martangiang do Jesus “marhite angguk-angguk dohot ilu-ilu tu Debata”. (Heb. 5:7) Tangiangna na sian ias ni roha patuduhon, na setia do ibana tu Jahowa jala mangurupi ibana asa tongtong unduk. Tangiang ni Jesus i dos do songon daupa na angur di Jahowa. Saleleng ngoluna, dibahen Jesus do las roha ni Jahowa jala unduk do ibana tu pamarentaonna. Boi do tatiru Jesus molo taulahon nasa tolapta asa tongtong unduk jala setia tu Jahowa. Ringkot do di hita mambahen las roha ni Jahowa. Alani i, tingki mangadopi hasusaan, martangiang ma hita asa diurupi. Molo taulahon i, on patuduhon na lomo do rohanta tu cara ni Jahowa mamarenta. Taboto do, ndang dijalo Jahowa tangiangta molo taulahon na dihasogohon rohana. Alai, molo taulahon aha na dihalomohon rohana, pos ma rohanta songon daupa na angur do tangiangta di Jahowa. Jala pos ma rohanta, las do roha ni Jahowa molo tongtong hita setia jala unduk tu Ibana. w19.11 21-22 ¶7-8

Taon 1919, dilantik Jesus ma piga-piga halak Kristen naung dimiahi gabe “naposo haposan jala na marbisuk”. Nasida ma na manguluhon ulaon marbarita dohot na mangalehon angka naposo ni Jahowa “mangan di tingkina”. Sian dia do taboto na dihalomohon Debata do naposo haposan jala na marbisuk? Marsitutu do Sibolis dohot portibi on mangambati ulaon ni naposo haposan. Alai ala diurupi Jahowa, boi do nasida marhasil mangulahon ulaon i. Ala dua hali masa porang dunia, gabe susa ma parhepengon di tingki i. Jotjot do dibahen na so tigor jala dianiaya do naposo ni Debata. Nang pe songon i, tongtong do naposo haposan paradehon angka na ringkot laho patoguhon naposo ni Debata. Pingkirhon ma godang ni publikasinta saonari. Boi do i tadapot gratis jala adong lobi sian 900 bahasa! On patuduhon na sai diurupi Jahowa do naposo haposan. Asing ni i, tarida do pasu-pasu ni Jahowa sian ulaonta marbarita. Alana nunga dibaritahon barita na uli “di liat portibi on”.​—Mat. 24:14. w19.11 24 ¶15-16

Di Ari Pardamean, ingkon jolo ditutung malim bolon do daupa andorang so mangalehon pelean. On paposhon rohana, na lomo do roha ni Jahowa tu ibana tingki mangalehon pelean. Aha do na boi taparsiajari? Tingki di tano on Jesus, adong do na mansai ringkot na diulahon ibana. Jala rumingkot do i sian na paluahon angka jolma. Diulahon ibana do i andorang so mangalehon ngoluna gabe pelean. Aha ma i? Saleleng di tano on, tongtong do ibana setia jala unduk tu Jahowa. I do alana dijalo Jahowa do peleanna. Naeng dipatudu Jesus do, na denggan do ngolu ni sasahalak molo mangihuthon parenta ni Jahowa. Jala dipatudu do muse, dumenggan do cara ni Jahowa mamarenta. Saleleng mangolu di tano on, tongtong do Jesus unduk tu Jahowa. Nang pe mangadopi angka hasusaan dohot sitaonon jala diboto ibana do na laho hansit parmatena, marsitutu do Jesus patuduhon na dumenggan do cara ni Jahowa mamarenta.​—Plp. 2:8. w19.11 21 ¶6-7

Godang do hasusaan na diadopi Jesus. Alai tongtong do rap angka apostelna dohot ibana. Nasida songon na dipaboa di buku poda na mandok, “Adong do dongan na umburju sian hahaanggi.” (Poda 18:24, Bibel siganup ari) Arga do di Jesus angka dongan sisongon i. Tingki di tano on, ndang adong adek ni Jesus na manomba Jahowa. (Joh. 7:3-5) Gariada, didok nasida do Jesus i na rintik. (Mrk. 3:21) Alai di borngin andorang so mate, didok Jesus do tu angka apostelna songon na didok di ayat sadari on. Hea do angka apostel ni Jesus mangulahon na sala. Nang pe songon i, ndang hasalaan ni nasida i na sai diingot Jesus. Alana diida Jesus porsea do nasida tu ibana. (Mat. 26:40; Mrk. 10:13, 14; Joh. 6:66-69) Di borngin na parpudi andorang so diuhum mate, didok Jesus do tu angka apostelna na setia i, “Dohononku ma hamu donganku, ai nunga hupaboa tu hamu sude naung hubege sian Damang i.” (Joh. 15:15) Tongtong do dipatogu angka donganna i roha ni Jesus. w19.04 11 ¶11-12

Songon dia sahalak Kristen mamboto molo ibana dipillit lao mangolu di surgo? Taboto ma alusna sian hata ni Apostel Paulus tu halak Rom “na tarjou gabe akka halak na badia”. Didok ibana do muse, “Ndang bahenon ni tondi parbadia hita gabe hatoban manang gabe mabiar. Alai marhite tondi parbadia, bahenonna do hita gabe anak ni Debata. Jala marhite tondi parbadia, taronjar ma rohatta mandok, ‘Abba, Ale Amang!’” (Rom 1:7; 8:15) Marhite tondi parbadia takkas do dipaboa Debata tu halak Kristen na miniahan, na dijou do nasida lao mangolu tu surgo. (1 Tes. 2:12) Dipapos Jahowa do roha ni akka na miniahan molo nasida dijou lao mangolu tu surgo. (1 Joh. 2:20, 27) Alai dang porlu halak na asing na paposhon roha ni nasida molo nasida dimiahi tondi parbadia. Dipakke Jahowa do huaso na massai gogo, i ma tondi parbadiana lao paposson roha ni nasida! w20.01 22 ¶7-8

“Patik ni Kristus” dibahen di fondasi na mansai denggan, i ma holong. (Gal. 6:2) Sude na diulahon Jesus alani holong. Asi ni roha, i ma sada tanda ni holong. Ala marasi ni roha, olo do Jesus mangajari godang halak, pamalumhon na marsahit, mangalehon mangan torop halak, dohot pahehehon halak naung mate. (Mat. 14:14; 15:32-38; Mrk. 6:34; Luk. 7:11-15) Nang pe gabe suda tingki dohot gogona, alai rade do Jesus mangkaringkothon na dihaporluhon halak na asing. Jala holong na balga na hea dipatudu ibana, i ma mangalehon dirina gabe tobusan laho humongkop sude jolma. Boi do tatiru Jesus marhite mangkaringkothon angka na dihaporluhon dongan na asing. Asing ni i, lam tapatudu ma asi ni roha di ulaon marbarita. Tingki laho hita marbarita alani asi ni roha, on patuduhon hita unduk tu patik ni Kristus. w19.05 4 ¶8-10

Diurupi Jesus do angka halak asa mandapot haluaon marhite dua cara. Na parjolo, dipalua Jesus do angka halak asa malua sian ajaran na so sintong na diajarhon angka pamimpin agama. Di tingki i, godang do halak Jahudi na dipaksa asa mangihuthon adat dohot angka ajaran na so sintong. (Mat. 5:31-37; 15:1-11) Alani i, gabe songon halak na mapitung do nasida. Ala ndang dijangkon nasida Messias dohot ajaranna, gabe tongtong ma nasida mapitung jala ndang boi disesa dosa ni nasida. (Joh. 9:1, 14-16, 35-41) Ala diajarhon Jesus na sintong jala mangalehon sitiruon na denggan, boi ma angka halak na serep roha malua sian ajaran na so sintong. (Mrk. 1:22; 2:23–3:5) Na paduahon, dipalua Jesus do angka halak sian parhatobanan ni dosa. Ala dilehon Jesus ngoluna gabe tobusan, gabe boi ma disalpuhon Debata dosa ni sude halak na patuduhon haporseaon tu tobusan i marhite parniulaonna.​—Heb. 10:12-18. w19.12 10 ¶8; 11 ¶10-11

Dipakke Jahowa do tondi parbadiana lao paposson roha ni halak Kristen na miniahan, naung dipillit Ibana do nasida. Marhite cara on, tondi parbadia gabe “jaminan [manang janji]” na paposhon roha ni nasida, na lao mangolu di surgo do nasida, dang di tano on. (2 Kor. 1:21, 22) Tikki dimiahi tondi parbadia sahalak Kristen, naung pasti do ibana lao mangolu di surgo? Daong. Diboto ibana do, naung dipillit ibana lao mangolu di surgo. Alai, ikkon diingot ibana do sipaingot on, “Ala nunga dijou jala dipillit Debata hamu, marsitutu ma hamu mampartahanhon i. Molo diulahon hamu i, dang mago haporseaonmuna i.” (2 Ptr. 1:10) Alani i, nang pe halak Kristen na miniahan nungnga dipillit lao mangolu di surgo, ikkon toktong do ibana setia asa mandapot upa i.​—Plp. 3:12-14; Heb. 3:1; Pgk. 2:10. w20.01 21 ¶5-6

Sada alasan boasa ndang dipatudu tolu dongan ni si Job asi ni roha tu ibana, i ma ala ndang diantusi nasida boasa masa i tu si Job. Didok roha ni nasida, na adong do dibahen si Job na sala umbahen masa i tu ibana. Unang ma tatiru nasida. Ingkon taboto do, holan Jahowa do na tangkas mamboto taringot situasi ni sasahalak. Alani i, manat ma tatangihon donganta na susa tingki paboahon na di rohana. Molo diulahon hamu i, na patuduhon roha sapangkilalaan do hamu tu angka donganmuna. Molo marasi ni roha, tontu ndang olo hita manggosip taringot hasusaan ni donganta. Halak na lomo rohana manggosip, ndang mambahen dame huria, alai mambahen sega do. (Poda 20:19; Rom 14:19) Jala hatana i, boi mambahen lam hansit pangkilalaan ni donganta na susa. (Eps. 4:31, 32) Alani i, angka na denggan ma na taida sian donganta jala tapingkirhon ma songon dia hita boi mangurupi ibana! w19.06 21-22 ¶8-9