September

Nang pe dibahen Jahowa dohot Jesus sitiruon asa ringgas karejo, alai porlu do hita maradi. Ndang marnaloja Jahowa, alani i ndang porlu di Ibana laho maradi. Alai didok do di Bibel, dung sae ditompa Jahowa langit dohot tano on, ‘maradi ma Ibana jala dipasonang dirina’. (2 Mus. 31:17) Lapatanna, so do Jahowa sian karejona jala dilehon Ibana do tingkina laho marlas ni roha mangida angka tompaanna. Suang songon i ma Jesus tingki di tano on. Ringgas do ibana karejo, alai dilehon ibana do tingki laho maradi jala rap mangan dohot angka ale-alena. (Mat. 14:13; Luk. 7:34) Dijujui Bibel do angka naposo ni Debata asa ringgas karejo jala unang malas. (Poda 15:19) Tontu, ingkon karejo do hamu asa boi paradehon angka na porlu di keluargamuna. Jala, sude sisean ni Jesus martanggung jawab do laho marbarita na uli. Nang pe songon i, porlu do hamu maradi. Alai sipata, olo do ra maol dihilala hamu mangatur tingki laho karejo, marbarita dohot maradi. w19.12 2 ¶2; 3 ¶4-5

Unang ma sai tahatai taringot suru-suruan na jahat. Laho mangulahon on, tatiru ma Jesus. Ala hea do Jesus di surgo, tangkas do ditanda ibana Sibolis dohot angka suru-suruan na jahat. Alai tingki ro ibana tu tano on, ndang lomo rohana paboahon taringot angka ulaon ni Sibolis. Paboahon taringot Jahowa do na dihalomohon rohana. Jala ndang na laho paboa-boahon ulaon ni Sibolis ibana umbahen na ro tu tano on. Suang songon i ma hita, unang ma sai tahatai taringot suru-suruan na jahat. Alai angka “hata na denggan” manang hasintongan ma na sai tahatahon. (Ps. 45:2) Unang ma mabiar tu suru-suruan na jahat. Di tingkinta saonari on, ra masa do hasusaan tu hita. Songon kecelakaan, sahit, manang hamatean di na so panagaman. Alai unang ma tadok suru-suruan na jahat na mambahen i. Didok di Bibel, tingki dohot parsorion na so panagaman boi masa tu hita sude. (Pjm. 9:11) Taboto do, umgogo do Jahowa sian suru-suruan na jahat. w19.04 23-24 ¶13-14

Boi do angka sintua paboahon tu pamarenta taringot pelecehan seksual? Boi. Di piga-piga negara, adong dibahen hukum ingkon paboahon taringot pelecehan seksual tu pamarenta. Ingkon diihuthon angka sintua do i. Ndang maralo i tu patik ni Debata. (Ul. 5:28, 29) Alai andorang so dipaboa angka sintua i tu pamarenta, ingkon jolo dipaboa nasida do i tu kantor cabang laho mangido tudu-tudu. Boi do didok angka sintua tu korban, tu natua-tuana, manang tu halak na mamboto taringot pelecehan seksual i asa dipaboa nasida tu pamarenta. Alai boha do molo na mangulahon pelecehan seksual i sahalak donganta di huria jala godang halak na mamboto taringot i? Sala do halak na paboahon taringot i, ala dihilala ibana on mambahen roa goar ni Jahowa? Daong. Alana halak na mangulahon pelecehan seksual i do na mambahen roa goar ni Jahowa. w19.05 10 ¶13-14

Didok Bibel do tu angka na mardongan saripe, asa mangargai dongan saripena dohot janji taringot pardongan saripeon na dibahen nasida. Jala dipaboa Bibel do muse molo na mardongan saripe ingkon tongtong rap tading. Didok, “Tadingkonon ni baoa do amana dohot inana mandongani jolmana, jadi sada sibuk nasida.” (1 Mus. 2:24) Alai halak na mangihuthon bisuk ni portibi on mandok, molo na mardongan saripe ingkon mangkaringkothon dirina sandiri do. Sada buku taringot parsirangan mandok, “Di piga-piga acara perkawinan, janji taringot pardongan saripeon ingkon rap ‘saleleng hita mangolu’ diganti gabe ingkon rap ‘saleleng hita masihaholongan.’” On mambahen ndang togu be parsaripeon ni angka halak. Gabe godang ma keluarga na sursar jala godang na gabe mandele. Tangkas ma, haotoon do pandangan ni angka halak di portibi on. w19.05 23 ¶12

Diida si Paulus, adong piga-piga halak Kristen tingki i gabe mangihuthon pingkiran ni angka halak di portibi on. (Eps. 4:17-19) Tontu boi do on masa tu hita. Ala Sibolis do na mangarajai portibi on, dipangke ibana do marragam cara laho mambahen hita asa mangihuthon pingkiranna. Umpamana, molo hea hita marpingkir naeng gabe umsangap sian na asing, boi do dipangke Sibolis pingkiran sisongon i mambahen hita dao sian Jahowa. Jala boi do dibahen Sibolis asa taihuthon pingkiranna marhite pengalamanta, hasomalanta, dohot songon dia hita diajari. Boi do tapasiding angka “naung togu dipajongjong” di pingkiranta. (2 Kor. 10:4) Didok si Paulus, “Hurumpakkon hami do angka pingkiran na sala dohot angka na maralo tu parbinotoan taringot tu Debata. Hurajai hami do nasa pingkiran asa mangoloi Kristus.” (2 Kor. 10:5) Tutu, molo diurupi Jahowa, boi do hita pasidingkon angka pingkiran na sala na adong di dirinta. w19.06 8 ¶1-3

Nang pe marsak si Hanna, si Daud dohot angka panurat psalmen tongtong do nasida marhaposan tu Jahowa. Dipaboa nasida do sude arsak ni rohana di bagasan tangiang. Dipaboa do muse aha na mambahen nasida marsak. Jala tongtong do nasida ro tu bagas joro laho manomba Jahowa. (1 Sam. 1:9, 10; Ps. 55:23; 73:17; 122:1) Lambok do Jahowa maradophon angka naposona. Songon si Hanna, gabe dame do pangkilalaanna. (1 Sam. 1:18) Dipaboa si Daud do pangkilalaanna. Didok, “Godang do sitaonon ni halak na burju, alai dipalua Jahowa do ibana sian angka i.” (Ps. 34:20, Bibel siganup ari) Na manurat psalmen nangkin pe, dipaboa do pangkilalaanna tu Jahowa. Jala dihilala ibana do na ditiop Jahowa do tanganna siamun marhite poda na dilehon tu ibana. (Ps. 73:23, 24) Aha ma parsiajaranna tu hita? Di sada tingki, olo do adong hasusaan na boi mambahen hita gabe mandele. Alai molo tarimangi songon dia Jahowa mangurupi nasida, hita pe urupanna do. Ringgas ma martangiang jala ihuthon ma sude tudu-tudu na dilehon Jahowa.​—Ps. 143:1, 4-8. w19.06 17-18 ¶14-15

Aha pe na didok manang na diulahon halak, unang ma maila hamu ditanda gabe sahalak Sitindangi Ni Jahowa. (Mik. 4:5) Marsiajar ma sian angka apostel di Jerusalem. Diboto nasida do sogo hian roha ni pamimpin agama Jahudi tu nasida. (Ul. 5:17, 18, 27, 28) Nang pe songon i, marbarita do nasida ganup ari di bagas joro jala barani do nasida mangangku na sisean ni Jesus nasida. (Ul. 5:42) Ndang mabiar nasida. Hita pe boi do gabe barani molo tapatandahon dirinta sahalak Sitindangi Ni Jahowa tingki di parkarejoan, di singkola, dohot tu hombar jabunta. (Ul. 4:29; Rom 1:16) Diboto angka apostel do boasa dihasogohon nasida, i ma ala mangulahon lomo ni roha ni Jahowa. I do na mambahen nasida marlas ni roha. (Luk. 6:23; Ul. 5:41; 1 Ptr. 2:19-21) Tontu ndang tatadingkon Jahowa nang pe dihasogohon halak hita ala mangulahon na sintong. w19.07 7 ¶19-20

Ala mangihuthon Patik ni si Musa, diulahon Jesus dohot angka siseanna na halak Jahudi do ari Sabbat. Alai sian na dihatahon dohot na diulahon Jesus, dipatudu ibana do ndang sala mangulahon na denggan jala mangurupi na asing di ari Sabbat. (Mat. 12:9-11) Diboto Jesus do, ndang sala mangulahon na denggan jala mangurupi halak di ari Sabbat. Dipatudu ibana do aha na rumingkot sian ari Sabbat. Ala ndang karejo naposo ni Debata di ari i, gabe godang ma tingki ni nasida laho patoguhon parale-aleonna tu Debata. Jesus magodang di keluarga na mangulahon ari Sabbat. Jala dipangke nasida do ari i laho patoguhon parale-aleonna tu Debata. Tarida do on sian na diulahon Jesus tingki ibana di hutana di Nasaret. Didok Bibel, “Songon na somal diulahon [Jesus] di ari Sabbat, masuk ma ibana tu sinagoga jala jongjong laho manjaha.” (Luk. 4:15-19) Jala diihuthon angka sisean ni Jesus do patik taringot ari Sabbat. Ndang ditorushon nasida paradehon angka na porlu laho mangubur Jesus paima sae ari Sabbat.​—Luk. 23:55, 56. w19.12 4 ¶10

Ingkon dohot do sude Sitindangi mangurupi halak asa gabe sisean ni Jesus. Boi do tapatudos ulaon i songon na mangalului dakdanak na lilu. Pingkirhon ma contoh on. Adong sahalak dakdanak baoa na lilu na marumur tolu taon. Jala adong 500 halak na mangalului dakdanak i. Ujungna dung 20 jam, adong ma sahalak na mandapot dakdanak i di ladang jagung. Dung dapotna dakdanak i, ndang olo ibana dipuji. Didok ibana, “Rap do hami sude mangalului dakdanak i.” Saonari, godang do halak na lilu songon dakdanak i. Ndang adong pangkirimon ni nasida, alani i porlu do nasida diurupi. Lobi sian ualu juta Sitindangi na rap mangalului angka halak na lilu i. Ra, ndang adong jumpangmuna halak na olo marsiajar Bibel dohot hamu. Alai di huriamuna, ra adong do angka dongan na pajumpang dohot halak na olo marsiajar Bibel. Tingki pajumpang angka donganta dohot sasahalak na olo gabe sisean ni Jesus, sude do hita marlas ni roha. w19.07 16 ¶9-10

Dipaingot Apostel Paulus do halak Kristen na di Pilippi asa unang menyerah. Alana dung dibahen huria i, godang do hasusaan na dihilala angka dongan disi sian angka halak Pilippi. Masa ma hasusaan i tu nasida dungkon mandapot parnidaan si Paulus dohot si Silas jala disuru nasida asa ‘ro tu Makedonia’. Sahat ma nasida di Pilippi taon 50 M. (Ul. 16:9) Disi, pajumpang ma nasida dohot sahalak borua na margoar si Lidia. Ditangihon ibana do si Paulus dohot si Silas jala “dibungka Jahowa ma rohana” asa olo manjalo barita na uli. (Ul. 16:14) Ndang sadia leleng, tardidi ma ibana dohot sude donganna sajabu. Alai ndang lomo roha ni Sibolis disi. Disarat angka halak Pilippi ma si Paulus dohot si Silas tu jolo ni angka pejabat pengadilan. Ditudu do nasida manggunturi di kota i. Ujungna, dipungkuli ma nasida, dipenjarahon, dung i diusir sian kota i. (Ul. 16:16-40) Gabe menyerah do nasida? Daong! Aha do na diulahon angka dongan di huria na baru i? Tongtong do nasida setia, jala sitiruon na denggan do nasida di hita! Tontu, sitiruon sian si Paulus dohot si Silas do na mangurupi nasida asa tongtong martahan. w19.08 2 ¶1-2

Tontu, angka “ulaon na denggan”, dohot ma i holong tu Jahowa dohot tu angka dongan. Dohot ma i muse paboahon tu halak na asing taringot haporseaonta tu Jesus dohot pangkirimonta. Na mangulahon “ulaon na denggan” do hita molo marsitutu di ulaon na mansai ringkot on, i ma mambahen sisean. (Mat. 28:18-20) Aha pe situasina, boi do hita gabe siboan panondang tu portibi on. Ra, olo do adong ambat-ambat na mambahen hita maol marbarita. Alai sipata, boi do i gabe kesempatan di hita laho marbarita. Umpamana, tingki mambahen surat tu halak Pilippi, dipenjarahon do si Paulus di sada jabu di kota Rom. Alai nang pe dipenjarahon, tongtong do ibana marbarita tu angka pengawal dohot tu angka na ro mandapothon ibana. Ala ringgas do si Paulus marbarita, gabe lam pos ma roha ni angka dongan jala “lam barani do nasida paboahon hata ni Debata”.​—Plp. 1:12-14; 4:22. w19.08 12 ¶15-16

Ingkon tapatudu do serep ni roha, alana boi do i mambahen las roha ni Jahowa. Tangkas do disurat si Petrus taringot on songon na dipaboa di ayat sadari on. Hombar tu na didok si Petrus, buku “Mari Jadilah Pengikutku” pasal 3, paragraf 23 mandok, “Ginjang ni roha dipatudos do songon racun. Mansai berbahaya do i. Nang pe malo manang jago sasahalak, molo ndang serep rohana ndang marguna ibana di Jahowa. Alai halak na lea di adopan ni jolma, marguna situtu do di adopan ni Jahowa molo serep rohana. . . . Las do roha ni [Debata] . . . jala pasu-pasuonna do hamu molo serep rohamuna.” Tutu, mambahen las roha ni Jahowa, i ma sada ulaon na dumenggan! (Poda 23:15) Asing ni mambahen las roha ni Jahowa, tadapot ma godang laba molo tapatudu serep ni roha. Molo serep rohanta, gabe olo do halak na asing marale-ale dohot hita. Boasa songon i? Pingkirhon ma, halak na songon dia do na dihalomohon rohamu gabe ale-ale.​—Mat. 7:12. w19.09 4 ¶8-9

Marsitutu do angka sintua mangurupi angka dongan di huria. Jala ndang didok roha ni nasida, umsangap do nasida sian na asing alani tanggung jawab ni nasida. Lambok do nasida maradophon angka dongan. (1 Tes. 2:7, 8) Sian cara ni nasida mangkatai, tarida do holong dohot serep ni roha ni nasida. Si Andrew naung leleng gabe sintua mandok, “Gabe huboto ma las do roha ni angka dongan molo burju jala lambok angka sintua mangkatai tu nasida. On mambahen nasida gabe mura mangihuthon tudu-tudu na dibahen angka sintua.” Sintua na asing, i ma si Tony mandok, “Marsitutu do ahu mangulahon poda di Pilippi 2:3 jala sai tongtong didok rohangku dumenggan do dongan na asing sian ahu. On mangurupi ahu asa unang mamaksa nasida ingkon mangoloi na hudok.” Ingkon serep do roha ni angka sintua, ala Jahowa pe serep do rohana. Nang pe Ibana Parhuaso Natumimbul, olo do “dipaserep dirina” laho pahehehon “na metmet sian orbuk”. (Ps. 18:36; 113:6, 7) Jala didok Bibel, sogo do roha ni Jahowa tu angka halak na ginjang roha. w19.09 16-17 ¶11-12

Asa boi tongtong dipatogu ala manuhuk auga ni Jesus, ingkon taulahon ma tugasta hombar tu na dihalomohon Jahowa. Ala sian Jahowa do tugasta, ingkon hombar do caranta mangulahon i tu na dihalomohon rohana. Hatoban ni Jahowa do hita, jala Ibana do Tuanta. (Luk. 17:10) Molo taulahon tugasta hombar tu lomo ni rohanta sandiri, gabe susa do hita. Alai molo taihuthon tudu-tudu ni Jahowa, boi do hita marhasil mangulahon tugas na didok rohanta ndang boi taulahon. Jala boi do taadopi angka ambat-ambat na didok rohanta ndang boi taadopi. Ingot ma, ndang adong manang ise pe na boi mangambati saut sangkap ni Jahowa. (Rom 8:31; 1 Joh. 4:4) Lomo do rohanta mamuji Jahowa, i ma Ama parholong. Di abad na parjolo, adong do angka halak na mangihuthon Jesus alai ndang alani holong. Ujungna, gabe ndang marlas ni roha nasida jala ndang be manuhuk auga ni Jesus. (Joh. 6:25-27, 51, 60, 66; Plp. 3:18, 19) Alai adong do angka na mangihuthon Jesus ala holong do roha ni nasida tu Jahowa dohot tu na asing. Tongtong do marlas ni roha nasida manuhuk auga ni Jesus saleleng mangolu di tano on huhut paimahon pangkirimon ni nasida rap dohot Jesus di surgo. Songon nasida, boi do hita tongtong marlas ni roha manuhuk auga ni Jesus molo taulahon i di bagasan holong. w19.09 20 ¶1; 24-25 ¶19-20

Pingkirhon ma pasu-pasu na dapotmuna ala dipalua sian angka ajaran na so sintong. Tontu las hian do rohanta alani haluaon i! Boi do hamu marpos ni roha tu haluaon i. Satongkin nai, laho dihancurhon Jesus ma angka agama na so sintong dohot pamarentaon ni jolma na jahat. Jagaon ni Debata ma “punguan bolon” sahat tu paradeiso. Jala dapot ni nasida ma godang pasu-pasu disi. (Pgk. 7:9, 14) Mansai godang do angka halak na laho dipahehe jala dipalua ma nasida sian dosa ni si Adam. (Ul. 24:15) Saleleng Pamarentaon Saribu Taon, diurupi Jesus dohot angka na miniahan ma sude jolma asa gabe sempurna jala marale-ale tu Debata. Haluaon na masa di tingki i dos songon taon Yobel di tingki ni halak Israel. Ujungna, sude jolma na setia manomba Jahowa gabe sempurna jala ndang mardosa. w19.12 12-13 ¶14-16

Di abad na parjolo, adong sahalak baoa na burju na margoar si Josep manang digoari do ibana si Barnabas. Rade do ibana dipangke Jahowa. (Ul. 4:36, 37) Dung gabe halak Kristen si Saul, godang do angka dongan na mabiar manjonoki ibana. Ala najolo, jotjot do dianiaya si Saul angka sisean ni Jesus. Alai, olo do si Barnabas mangapuli jala mangurupi si Saul. (Ul. 9:21, 26-28) Dungkon i, diida angka sintua di Jerusalem do, porlu do dipatogu angka dongan na dao tading di Antiokia Siria. Ise do na disuru nasida? Si Barnabas! Keputusan na denggan do i. Alana, marhite si Barnabas, “dipatogu ma roha ni nasida sude, asa marsihohot nasida tu Tuan i sian nasa roha”. (Ul. 11:22-24) Saonari pe, boi do diurupi Jahowa hita laho mangapuli angka donganta. Umpamana, dipangke Jahowa do hita laho mangapuli dongan na marhabot ni roha. Manang dipangke Ibana do hita laho manjumpangi manang manelepon donganta na marsahit manang na marsak. Jala patoguhon nasida marhite hata na denggan. Olo do hamu dipangke Jahowa songon si Barnabas?​—1 Tes. 5:14. w19.10 22 ¶8

Sipata, ala jotjot rap saulaon hita dohot angka dongan, ndang holan angka na denggan na taida sian nasida. Alai, dohot do hahurangan ni nasida. Aha do na mangurupi hita asa boi tongtong marale-ale nang pe adong hahurangan ni nasida? Tontu, ndang boi tapangido angka donganta asa sempurna. Molo marale-ale hita tu sasahalak, ingkon tajaga do parale-aleonta i asa tongtong togu. Molo diulahon nasida na sala, denggan ma talehon sipasingot sian Bibel. (Ps. 141:5) Molo jut rohanta dibahen nasida, tasalpuhon ma i. Jala unang be tataringoti hasalaanna i tu ibana manang tu halak na asing. Sian apala mamparrohahon hahurangan ni angka dongan, tumagon ma tapatogu parale-aleonta dohot nasida di ari parpudi on! Molo taulahon i, gabe lam togu ma parale-aleonta dohot nasida. Ringkot do i taulahon sian saonari, ala tahaporluhon do dongan na burju saleleng hasusaan bolon. w19.11 6 ¶13, 16

Tingki hita manguluhon parsiajaran Bibel, na marsitutu do hita mangulahon parenta i. Porlu do taurupi angka halak mamboto ringkot ni manomba Jahowa jala unduk tu Harajaonna. Alani i, taurupi do nasida manjangkon hasintongan marhite mangulahon na diparsiajari, mangalehon diri tu Jahowa, jala tardidi. On ma carana asa boi nasida martahan sian ari ni Jahowa. (1 Ptr. 3:21) Nunga mansai jonok ajal ni hasiangan on. Alani i, unang ma tapasuda tingki mangurupi parsiajar Bibel na so olo mambahen hamubaon laho gabe naposo ni Jahowa. (1 Kor. 9:26) Saotik nai nama tingkinta! Godang nai dope angka halak na porlu mambege barita Harajaon andorang so ro ari i. w19.10 12 ¶14-15

Ganup taon di Ari Pardamean, marpungu ma halak Israel jala dipelehon malim bolon ma pelean binatang. Angka pelean i paingothon halak Israel, na porlu do disesa dosa ni nasida! Parjolo, masuk ma malim bolon mangusehon daupa tu inganan na marisi gara ni api gabe angur ma Inganan na Mansai Badia i. Aha do na boi taparsiajari sian on? Didok do di Bibel, dos songon daupa na angur do tangiang ni naposo ni Jahowa na dijangkon Ibana. (Ps. 141:2; Pgk. 5:8) Ingkon sian serep ni roha do malim bolon mamboan daupa i tu jolo ni Jahowa. Suang songon i ma, sian serep ni roha do hita martangiang tu Jahowa. Mandok mauliate do hita ala boi solhot tu Sitompa hita, songon sahalak dakdanak na solhot tu amana. (Jak. 4:8) Boi do hita marale-ale tu Ibana! (Ps. 25:14) Sada hak istimewa do on di hita jala ndang olo hita mambahen hansit rohana. w19.11 20-21 ¶3-5

Aha do pandangan ni angka halak di humaliangmuna taringot karejo? Di piga-piga negara, godang do halak na pagodanghu manang palelenghu di parkarejoan. Alani i, ndang adong be tingki ni nasida laho maradi, rap dohot keluarga, manang marsiajar taringot Debata. (Pjm. 2:23) Na asing, adong do piga-piga halak na so lomo rohana karejo jala mambahen sidalian asa unang karejo. (Poda 26:13, 14) Godang halak di portibi on na pagodanghu karejo. Na asing, adong do na so olo karejo. Alai, pingkirhon ma songon dia pangkilalaan ni Jahowa dohot Jesus taringot karejo. Taboto, lomo do roha ni Jahowa karejo. Didok Jesus, “Tongtong do karejo Damang sahat tu saonari, jala ahu pe tongtong do songon i.” (Joh. 5:17) Pingkirhon ma tingki ditompa Debata angka suru-suruan, angka bintang dohot planet. Taida do muse angka tompaan na uli na adong di tano on. w19.12 2 ¶1-2

Songon dia si Daud boi solhot tu Jahowa? Marsiajar do si Daud taringot Jahowa sian angka tompaan. Tingki poso, gabe parmahan ni biru-biru ni bapakna do si Daud. Tingki di adaran, ra jotjot do dirimangi ibana angka tompaan ni Jahowa. Umpamana tingki borngin, diida si Daud do marribu angka bintang di langit. Alai ndang holan diida ibana. Huhut do dipingkirhon ibana parange ni Debata na manompa i sude. (Ps. 19:2, 3) Tingki dirimangi si Daud songon dia angka jolma ditompa, diida ibana ma songon dia bisuk ni Jahowa. (Ps. 139:14) Tingki dirimangi si Daud sude tompaan ni Jahowa, gabe diantusi si Daud ma na mansai metmet do ibana marimbangkon Debata. (Ps. 139:6) Aha do parsiajaranna tu hita? Ganup ari, rimangi ma songon dia angka tompaan na adong di humaliangmuna. Umpamana suan-suanan, binatang, dohot jolma, na mangajarhon tu hamu taringot Jahowa. Hasilna, ganup ari lam godang ma parsiajaran na dapotmuna taringot Ibana. (Rom 1:20) Jala boi ma lam bagas holongmuna tu Debata. w19.12 20 ¶15-17

Dipillit si Musa do laho manomba Debata. Tingki marumur 40 taon, dipillit si Musa ma asa rap ibana dohot naposo ni Debata, i ma halak Israel sian apala gabe “anak ni boru ni si Firaun”. Ditadingkon si Musa do hasangaponna i. Tingki i, si Firaun do raja na marhuaso di Mesir, jala didok halak Mesir, dos do ibana songon debata. Tingki marpihak tu halak Israel, diboto si Musa do na laho muruk situtu si Firaun tu ibana. Alai pos do roha ni si Musa tu Jahowa. On patuduhon na mansai togu do haporseaon ni si Musa! Alani haporseaonna ma umbahen boi togu parale-aleonna tu Debata saleleng ni ngoluna. (Poda 3:5) Aha ma parsiajaranna tu hita? Songon si Musa, sude hita ingkon mambahen keputusan: Tapillit do laho manomba Jahowa jala marsaor dohot angka naposona? Ra ingkon tabahen do pengorbanan laho manomba Jahowa. Manang olo do gabe diorai angka halak na so sisomba Jahowa hita. Alai, molo porsea hita tu Jahowa, ndang tadingkononna hita! w19.12 17 ¶5-6

Nang pe sian orbuk hita ditoppa, alai dao do hita ummarga sian sajopput tano. Pikkirhon ma piga-piga alasanna boasa arga hita di Jahowa. Ditoppa Ibana do hita asa boi maniru akka parangena. (1 Mus. 1:27) Jala dibahen Jahowa do ummarga jolma sian sude toppaanna na adong di tano on. Jala boi do jolma mangarajai binatang na di tano on. (Ps. 8:5-9) Nang pe mardosa si Adam, toktong do mararga akka jolma di Jahowa. I do alana dilehon Jahowa anakna, i ma Jesus lao manobus hita sian dosa. (1 Joh. 4:9, 10) Alani tobusan do umbahen dipahehe Jahowa akka “halak na burju dohot halak na jahat” na mate alani dosa ni si Adam. (Ul. 24:15) Bibel paboahon, arga do hita di Jahowa nang pe marsahit, pogos manang matua.​—Ul. 10:34, 35. w20.01 15 ¶5-6

Pakkirimon tu surgo i dang warisan sian keluarga. Sian Debata do i didapot ibana. (1 Tes. 2:12) Alani i, unang ma tabahen sukkun-sukkun na boi mambahen haccit roha ni keluargana. Umpamana, unang ma tasukkun istrina songon dia pakkilalaanna haduan mangolu salelengna di tano on, hape dang rap dohot suamina. Di tano na imbaru, pasombuon ni Jahowa do sude “lomo ni roha ni nasa na mangolu”. (Ps. 145:16) Molo dang pasangaphu tabahen halak na miniahan, boi do i manjaga diritta. Songon dia carana? Didok di Bibel, adong do piga-piga halak na miniahan na so setia tu Debata. (Mat. 25:10-12; 2 Ptr. 2:20, 21) Alani i unang ma pasangaphu tabahen sasahalak. Molo taulahon i, on patuduhon dang jolma na taihuthon. Nang pe ibana sahalak na miniahan, nga leleng manomba Jahowa, manang godang na mananda ibana. (Jud. 16) Molo dang setia nasida jala manadikkon huria, dang gabe mago haporseaotta manang gabe dang be manomba Jahowa. w20.01 29 ¶9-10

Ala “angka anak na dihaholongi” Jahowa do hita, marsitutu ma hita lao maniru Ibana. Boi do i taulahon marhite patuduhon holong, haburjuon, jala rade manalpuhon hasalaan. Molo diida halak na so mananda Jahowa pangalahotta na denggan, on boi mangonjar roha ni nasida mananda Debata. (1 Ptr. 2:12) Ikkon ditiru natua-tua do Jahowa tikki mangajari ianakkonna. Molo diulahon nasida i, on boi mangurupi akka ianakkon asa marale-ale tu Debata. Bangga do hita tu Jahowa. Las do rohatta paboahon taringot Ibana tu na asing. Ra, sarupa do pakkilalaanta songon Raja Daud na mandok, “Ingkon pujionku ma [Jahowa].” (Ps. 34:3, Bibel siganup ari) Alai songon dia molo parila hita? Songon dia carana asa boi hita barani? Pikkirhon ma las ni roha ni Jahowa dung tapaboa taringot Ibana tu na asing. Jala rimangi ma laba na didapot halak na asing molo marsiajar taringot Jahowa. Molo taulahon i, boi do i mambahen hita gabe barani. Diurupi Jahowa do halak Kristen di abad na parjolo asa toktong barani. Hita pe, urupanna do asa toktong barani.​—1 Tes. 2:2. w20.02 11 ¶12-13

Godang do halak na marsiajar Bibel mambahen hamubaon jala ujungna tardidi. Alai adong piga-piga parsiajar Bibel na mabiar gabe sisean ni Jesus. Lomo do roha ni nasida marsiajar Bibel, alai dang olo nasida tardidi. Tontu lomo do rohatta sude mangurupi parsiajar Bibelta asa mangulahon na diparsiajari jala gabe sisean ni Jesus. Lomo do roha ni Jahowa asa tasomba Ibana alani holong. Alani i, ikkon taurupi do parsiajar Bibelta asa mangattusi na disarihon Jahowa do nasida ganup marsada-sada. Jala na massai holong do roha ni Debata tu nasida. Asing ni i, taurupi ma nasida asa makkilala molo Jahowa i songon ama “na mangaramoti angka na so marama so marina dohot mangondihon angka na mabalu”. (Ps. 68:6, Bibel siganup ari) Tikki diboto parsiajar Bibelmuna holong ni Jahowa, gabe lam holong ma roha ni nasida tu Ibana. Alani i, urupi ma parsiajar Bibelmuna mangattusi na lomo do roha ni Debata asa dapot ni nasida hangoluan salelengna, jala rade do Ibana mangurupi nasida. w20.01 3 ¶7-8

Serep do roha ni Apostel Paulus. Diboto ibana, na porlu do ibana dipatogu akka dongan. Dang mabiar ibana molo akka halak marpikkir na gale do ibana umbahen porlu dipatogu akka dongan. (Kol. 4:7-11) Molo serep rohatta, jala taakkui na porlu do hita dipatogu, gabe las ma roha ni akka dongan lao mangurupi hita. Diboto si Paulus do Hata ni Debata boi patoguhon rohana. (Rom 15:4) Jala boi do i mambahen ibana marbisuk tikki mangadopi ambat-ambat. (2 Tim. 3:15, 16) Tikki dipenjarahon si Paulus na paduahalihon di Rom, diboto si Paulus naeng dipamate nama ibana. Dipangido ibana do si Timoteus asa hatop ro manjumpangi ibana jala mamboan “angka gulungan.” (2 Tim. 4:6, 7, 9, 13) Boasa? Alana akka gulungan i, marisi Akka Bukku Heber na dipakke si Paulus tikki pelajaran pribadi. Molo ringgas hita marsiajar songon si Paulus, boi do dipakke Jahowa akka ayat ni Bibel lao patoguhon hita, nang pe di situasi na massai susa. w20.02 23-24 ¶14-15

Dang dipakke si Elipas, si Bildad dohot si Sopar tikki na hohom lao mamikkirhon songon dia ma nasida boi mangurupi si Job. Gariada, gabe dipikkirhon nasida do cara lao patuduhon adong do na sala na diulahon si Job. Tarida do i sian akka hatana tu si Job. Memang tutu do deba na nidokna i, alai unggodang do na so tutu na didok nasida taringot Jahowa dohot taringot tu si Job. Gabe ditudu do si Job on jolma na so denggan. (Job 32:1-3) Songon dia do pakkilalaan ni Jahowa mangida on? Gabe muruk do Jahowa tu tolu baoa i. Didok Jahowa do halak i na oto. Jala gabe disuru Jahowa ma asa dipangido nasida si Job manangiakkon nasida. (Job 42:7-9) Adong piga-piga parsiajaran na boi tadapot sian si Elipas, si Bildad dohot si Sopar. Na parjolo, unang ma hita manguhumi akka donganta. (Mat. 7:2-5) Alai, ikkon manat do tatangihon nasida andorang so makkatai hita. Molo denggan tatangihon nasida, boi ma taattusi songon dia do situasi ni nasida. (1 Ptr. 3:8) Na paduahon, ikkon lambok do hita, jala sittong ma nian hata na tapaboa. (Eps. 4:25) Jala na patoluhon, taingot ma sai diparrohahon Jahowa do aha na tadok tu akka dongan. w20.03 22-23 ¶15-16

Molo jotjot taajarhon taringot Jahowa tu angka halak, boi do i mambahen hita gabe lam solhot tu Ibana. Umpamana, taida do asi ni roha ni Jahowa tingki ditogu-togu Ibana hita mangalului halak na olo gabe ale-alena. (Joh. 6:44; Ul. 13:48) Taida do huaso ni Debata marhite Bibel na mangurupi parsiajar Bibelta manadingkon hasomalan na roa jala patuduhon pangalaho na imbaru. (Kol. 3:9, 10) Boi do muse taida hasabaron ni Jahowa ala dilehon Ibana tingki tu angka halak di luatta asa marsiajar taringot Ibana jala dipalua. (Rom 10:13-15) Manang sadia leleng pe hita manomba Jahowa, ingkon tongtong do taargai parale-aleonta tu Ibana. Sada cara laho patuduhon i, ingkon tongtong do hita martangiang. Asa boi lam jonok tu sasahalak, ingkon jotjot do hamu mangkatai tu ibana. Suang songon i ma, asa boi lam solhot tu Jahowa, ingkon jotjot do jala unang mabiar paboahon aha na di bagas roha dohot pingkiranmuna marhite tangiang. w19.12 19 ¶11, 13-14

Tarapul do rohanta ala mamboto i! Saonari, nunga gabe Raja Jesus di Harajaon ni Debata. Laho padengganonna do portibi naung disegai Sibolis on. (Jes. 65:17; 1 Joh. 3:8; Pgk. 21:3, 4) Pangkirimon na mansai denggan do on! Dilehon Jesus do tugas tu hita laho marbarita. Taboto, ndang mura mangulahon on. Alai marjanji do Jesus sai urupanna do hita sahat tu ujung ni hasiangan on. (Mat. 28:19, 20) On mambahen hita gabe barani! Pos ni roha, pangkirimon, dohot habaranion mambahen tongtong dame roha dohot pingkiranta. Songon dia carana asa tongtong dame nang pe mangadopi hasusaan? Tiru ma Jesus. Na parjolo, tongtong ma martangiang aha pe na masa. Na paduahon, unduk ma tu Jahowa jala ringgas ma marbarita, nang pe sipata maol mangulahon i. Na patoluhon, unang ma maila mangido asa diurupi angka dongan. Hasilna, hadameon ni Debata boi manjaga roha dohot pingkiranta. (Plp. 4:6, 7) Songon Jesus, boi ma taadopi angka hasusaan i.​—Joh. 16:33. w19.04 13 ¶16-17