Agustus

Nang pe mangadopi godang sitaonon, boi do tongtong dame roha dohot pingkiran ni Jesus. Tingki susa pe, tongtong do unduk Jesus tu Amana. Ala holong rohana tu Amana, tongtong do diharingkothon ibana panombaon tu Jahowa di ngoluna. Andorang so tu tano on Jesus, nunga gabe “pande” ibana di lambung ni Debata. (Poda 8:30) Tingki di tano on pe, tongtong do Jesus marbarita paboahon goar ni Jahowa. (Mat. 6:9; Joh. 5:17) Tontu angka ulaon on mambahen las roha ni Jesus. (Joh. 4:34-36) Tatiru ma Jesus marhite unduk tu Jahowa jala ‘sai marsitutu ma mangulahon godang ulaon ni Tuhan i’. (1 Kor. 15:58) Molo talehon gumodang tingki di ulaon marbarita, gabe ndang sai tapingkiri be hasusaanta. (Ul. 18:5) Umpamana, jotjot do hita pajumpang dohot halak na lobi susa sian hita. Tingki marsiajar nasida mangkaholongi Jahowa jala mangulahon na diparsiajari, gabe lam denggan ma ngolu ni nasida jala marlas ni roha. Tingki mangida i, gabe lam pos do rohanta na disarihon Jahowa do hita. w19.04 10-11 ¶8-9

Marsitutu do nasida mangalo Sibolis dohot suru-suruanna. Nang pe arga, ditutung nasida do angka buku i. Sasintongna, boi do nasida mandapot godang hepeng sian i. Alai ndang dilehon manang digadis nasida buku i tu halak na asing. Alana mambahen las roha ni Jahowa do na rumingkot di nasida. Songon dia hita boi maniru halak Kristen di abad na parjolo? Denggan do molo tabolongkon angka barang na adong hubunganna tu ilmu gaib. Umpamana jimat manang angka barang na dipangke manang na disimpan laho manjaga sasahalak sian suru-suruan na jahat. (1 Kor. 10:21) Manat ma tingki mamillit hiburan. Sungkun ma dirimuna, ‘Adong do hubungan ni angka hiburan i tu spiritisme?’ Marsitutu ma pasidingkon aha na dihasogohon Jahowa. Jala, ‘sai marsitutu ma asa ias panggora ni rohanta’ di adopan ni Debata.​—Ul. 24:16. w19.04 22-23 ¶10-12

Tingki diboto angka sintua adong sasahalak di huria mangulahon dosa na balga, ingkon manat do nasida mambahen keputusan. Ingkon diingot nasida do songon dia asa tongtong pasangaphon goar ni Jahowa. (3 Mus. 22:31, 32; Mat. 6:9) Ingkon diurupi nasida do angka dongan di huria asa tongtong marale-ale tu Jahowa, jala mangapuli angka halak na gabe korban sian na mangulahon dosa na balga i. Asing ni i, molo na marsala i sasahalak di huria, ingkon marsitutu do angka sintua mangida, na marhamubaon do ibana manang na ndang. Molo marhamubaon, ingkon diurupi angka sintua do ibana asa boi marale-ale muse tu Jahowa. (Jak. 5:14, 15) Sahalak Kristen na mangulahon dosa na balga, dipatudos do i songon sahalak na marsahit. Lapatanna, ndang denggan be parale-aleonna tu Jahowa. Jala dipatudos do angka sintua songon sahalak dokter. Marsitutu do nasida asa “pamalum na marsahit i [manang na mangulahon dosa i]”. Dilehon nasida do poda sian Bibel laho mangurupi halak na mardosa i. Molo marsitutu ibana marhamubaon, boi ma ibana muse marale-ale tu Jahowa.​—Ul. 3:19; 2 Kor. 2:5-10. w19.05 10 ¶10-11

Boi do Jahowa mambahen hita rade mangulahon lomo ni rohana. Umpamana, adong taboto angka dongan na porlu diurupi di inganan na asing. Olo do didok rohanta, ‘Aha ma na boi huulahon?’ Manang, olo do dilehon tugas na hira maol tahilala jala ndang pos rohanta laho mangulahon i. Manang dung dijaha hamu piga-piga ayat di Bibel, gabe didok rohamu, ‘Songon dia do ahu mamangke ayat on laho mangurupi na asing?’ Tingki diida Jahowa hita mamingkirhon aha na boi taulahon, diurupi Ibana do hita asa lomo rohanta mangulahon i. Boi do dibahen Jahowa hita margogo laho mangulahon lomo ni rohana. (Jes. 40:29) Marhite tondi parbadiana, boi do dibahen Ibana asa lam denggan bakat naung adong di hita. (2 Mus. 35:30-35) Asing ni i, dipangke Jahowa do organisasina laho mangajari hita carana mangulahon angka tugas na ringkot. Molo ndang pos rohamu tingki mangulahon sada tugas, pangido ma asa diurupi. Tingki sadihari pe, boi do dipangido hamu ‘hagogoon na sumurung’ sian Jahowa.​—2 Kor. 4:7; Luk. 11:13. w19.10 20-21 ¶3-4

Portibi on manjujui halak asa mangkaringkothon dirina sandiri. Sada ensiklopedia mandok, saleleng taon 1970-an, “godang do angka buku na dibahen laho paboahon songon dia carana asa marhasil di parngoluan”. Didok muse di ensiklopedia i, adong do piga-piga buku na mandok “ndang porlu sasahalak paubahon dirina”. Sada sian buku i mandok, “Dirimuna do na dumenggan jala na ummarga sian angka na asing. Alani i, haholongi ma dirimuna sandiri.” Dipaboa muse di buku i, “boi do sasahalak manontuhon sandiri aha na ingkon ulahononna jala aha na sintong didok rohana”. Hea do dibege hamu hata songon i? Sarupa do i songon na didok Sibolis tu si Hawa. Didok Sibolis, boi do si Hawa ‘gabe doshon Debata umboto na denggan dohot na roa’. (1 Mus. 3:5) Saonari godang na marpingkir, laho manontuhon dia na denggan dohot na roa ndang porlu diurupi manang ise pe, dohot ma i Debata. Jala songon i do pandangan ni godang halak taringot parsaripeon. w19.05 23 ¶10-11

Sada tingki, hea do marsak situtu Raja Daud ala adong hasusaan na diadopi ibana. Jotjot do disalahon ibana dirina ala godang dosa na diulahon ibana. (Ps. 40:13) Anak haholonganna i ma si Absalom, marsitutu naeng gabe raja manggantihon ibana. Hape ujungna mate do anakna i. (2 Sam. 15:13, 14; 19:1) Jala dongan na dihaporseai ibana, ndang setia tu ibana. (2 Sam. 16:23–17:2; Ps. 55:13-15) Godang do ende na disurat si Daud di Psalmen paboahon arsak ni rohana. Alai dipaboa ibana do muse taringot haporseaonna na togu tu Jahowa. (Ps. 38:6-11; 94:17-19) Adong sahalak panurat psalmen na gabe mangiburu tu halak na so manomba Jahowa. Ra ibana sada sian pinompar ni si Asap halak Lepi jala ra marhobas di bagas joro ni Debata. Alani arsak ni rohana, gabe kecewa do ibana jala ndang marlas ni roha. Jala didok rohana hurang dope pasu-pasu na nilehon ni Jahowa i tu ibana.​—Ps. 73:2-5, 7, 12-14, 16, 17, 21. w19.06 17 ¶12-13

Lomo do rohanta manarihon sude na porlu di hita dohot di keluarganta. Jala lomo do rohanta mamparsiajari piga-piga keterampilan asa boi mangulahon i. (1 Tim. 5:8) Somalna, angka keterampilan i boi do tadapot molo ringgas hita marsiajar tingki singkola. Alai ingkon manat do hita. Di godang negara, angka singkola ndang holan mangajarhon keterampilan, alai diajarhon do muse ajaran ni jolma. Umpamana, dijujui do angka parsingkola asa unang porsea na tutu adong Debata jala asa unang mangihuthon prinsip ni Bibel. Didok do muse, molo sude halak na malo porsea do tu evolusi. (Rom 1:21-23) Maralo do ajaran sisongon i tu “bisuk ni Debata”. (1 Kor. 1:19-21; 3:18-20) Marsitutu ma asa unang dililuhon Sibolis marhite “ajaran ni jolma dohot angka hata na so marguna”. (Kol. 2:8) Unang ma dioto-otoi Sibolis hamu. (1 Kor. 3:18) Jala sai ulahon ma aha na dihalomohon roha ni Jahowa. Tongtong ma ihuthon prinsip na diajarhon Jahowa. Jala tangihon ma sude sipasingotna. w19.06 5 ¶13; 7 ¶17

Manang aha pe topik na diulas hamu, pingkirhon ma halak na manangihon hamu. Rimangi ma laba na boi dapot ni nasida ala marsiajar Bibel. Tingki mangkatai dohot nasida, ringkot do ditangihon jala diargai hamu pandapot ni nasida. Molo diulahon hamu i, gabe olo ma nasida manangihon hamu. Andorang so olo sasahalak marsiajar Bibel, ra ingkon jotjot do hamu manjumpangi ibana muse. Boasa? Alana tingki ro hita manjumpangi muse, olo do ra ndang di jabu ibana. Jala ingkon dijumpangi hamu do ibana manang piga-piga hali sahat tu na olo ibana marsiajar Bibel. Ingot ma, asa boi tubu suan-suanan, ingkon jotjot do i tasiram. Suang songon i ma, molo jotjot taulas Bibel dohot sasahalak, boi do gabe holong rohana tu Jahowa dohot tu Jesus. w19.07 14 ¶1; 15-16 ¶7-8

Aha do lapatan ni hata ni Jesus i? Ndang didok Jesus na lomo roha ni siseanna dihasogohon halak. Alai ibana naeng paingothon aha na laho masa tu hita. Ndang sian portibi on hita. Taihuthon do ajaran ni Jesus di ngolunta jala marbarita do hita songon ibana. I do alana umbahen na dihasogohon portibi on hita. (Joh. 15:18-21) Alani i molo dihasogohon halak hita ala mangkaholongi Jahowa, unang ma metmet rohanta. Unang ma metmet rohanta molo ndang lomo roha ni angka halak tu hita. Ndang taboto andigan ro penganiayaan tu hita manang andigan diorai pamarenta ulaonta. Alai taboto do sian saonari boi do hita paradehon diri. Tapatogu ma parale-aleonta tu Jahowa, tongtong patuduhon habaranion, jala tongtong marlas ni roha nang pe dihasogohon halak. Molo taulahon i, boi ma hita tongtong manomba Jahowa. w19.07 6 ¶17-18; 7 ¶21

Tingki taurupi angka halak na so maragama marsiajar Bibel, ingkon jotjot do tapatogu haporseaon ni nasida na tutu adong Debata. Jala ingkon taurupi do nasida asa porsea tu Bibel. Alani i, ingkon marulak-ulak do taajarhon taringot i. Tingki marsiajar Bibel, porlu do taulas angka bukti na patuduhon Bibel i Hata ni Debata. Dohot ma i taringot surirang di Bibel naung masa, jala sadalan do Bibel tu ilmu pengetahuan dohot sejarah. Manang boi do tapaboa angka poda na boi tapangke ganup ari. Taurupi ma sude halak asa gabe sisean ni Jesus, ndang soal maragama nasida manang na ndang. Carana, tapatudu ma holong tu nasida. (1 Kor. 13:1) Tingki mangajari nasida, tapatudu ma na holong do roha ni Debata tu hita jala lomo do rohana asa tahaholongi Ibana. Ganup taon, marribu halak na so maragama tardidi ala dihaholongi nasida Debata. Alani i, pos ma rohamuna, jala patudu ma holong tu sude halak. Tangihon jala antusi ma pangkilalaan ni nasida. Jala gabe sitiruon ma hamu asa olo nasida gabe sisean ni Jesus. w19.07 24 ¶16-17

Marratus taon dungkon i, dipangke Jahowa do angka boru ni si Sallum laho padengganhon tembok ni Jerusalem. (Neh. 2:20; 3:12) Nang pe boru ni raja nasida, rade do angka boru ni si Sallum mangulahon karejo na borat jala na berbahaya. (Neh. 4:9-12) Saonari pe, las do roha ni angka donganta borua mangurupi angka ulaon di organisasi. Umpamana, pajongjongkon dohot mangarawat angka bangunan na dipangke laho manomba Jahowa. Ala tarlatik, semangat jala setia nasida, boi ma marhasil ulaon i. Dijujui Jahowa do si Tabita laho mangulahon ‘godang angka na denggan jala mangurupi angka na pogos’, tarlumobi tu angka na mabalu. (Ul. 9:36) Ala burju jala parasi roha, godang do na tangis tingki mate ibana. Alai, mansai las do roha ni nasida tingki dipahehe apostel Petrus ibana. (Ul. 9:39-41) Aha do na boi taparsiajari sian si Tabita? Na poso manang na matua, baoa manang borua, sude hita boi do mangulahon angka na denggan laho mangurupi angka donganta. w19.10 23 ¶11-12

Songon dia hita boi mambahen sasahalak tartuktuk? Bayangkon ma sada situasi. Marsitutu do sahalak parsiajar Bibel mangorom diri sian siinumon na maralkohol. Diboto ibana do na so boi be ibana manginum i. Godang do hamubaon na dibahen ibana jala ujungna boi tardidi. Dung i, adong ma sahalak donganta na mambahen acara ramah tamah di jabuna jala ditawarhon donganta on ma siinumon na maralkohol tu na baru tardidi i. Didok donganta i, “Molo boi ho mangorom diri, ndang pola boha molo diinum ho saotik.” Bayangkon ma na boi masa molo ditangihon na baru tardidi i poda na sala, jala mulak muse ibana tu hasomalanna najolo i! Di parpunguan, diurupi do hita asa mangulahon poda na didok di ayat sadari on. Tingki marpungu, taboto ma aha na rumingkot di Jahowa, jala songon dia mangulahon na taparsiajari asa ndang marcacat hita. Dung i, gabe lam martamba ma holongta tu Debata dohot tu akka dongan. Molo tahaholongi Debata dohot angka dongan sian nasa rohanta, gabe taulahon ma na dumenggan asa unang mambahen tartuktuk angka dongan. w19.08 10 ¶9; 11 ¶13-14

Adong do halak na barani paboahon na adong di rohana. Alai on ndang patuduhon na ginjang rohana. (Joh. 1:46, 47) Nang pe songon i, ingkon marsitutu do hita sude asa tongtong marserep ni roha. Pingkirhon ma contoh sian apostel Paulus. Dipangke Jahowa do ibana laho mambahen angka huria na baru di godang kota. Ra, gumodang do naung diulahon ibana di ulaon marbarita sian angka apostel na asing. Alai ndang hea didok roha ni si Paulus na umsangap ibana sian nasida. Ndang ala na ummalo ibana manang ala gumodang na diulahon umbahen na boi ibana marale-ale tu Jahowa. Alai, alani asi ni roha ni Debata na mansai balga i do. (1 Kor. 15:10) Sitiruon na denggan do si Paulus taringot patuduhon serep ni roha. Tingki mambahen surat tu halak Kristen di Korint, adong do piga-piga halak di huria na so marlomo ni roha tu si Paulus. Alai ndang dibahen ibana umsangap dirina sian nasida!​—2 Kor. 10:10. w19.09 3 ¶5-6

Sada alasan boasa maol hita unduk tu Jahowa, i ma ala mardosa hita jala ndang sempurna. Alani i, ndang sai mura mangoloi Debata. Tingki dipangan si Adam dohot si Hawa parbue ni hau na diorai Debata, gabe dibahen nasida do aturan di nasida sandiri. (1 Mus. 3:22) Saonari, godang do halak na so mangoloi Jahowa jala gabe nasida sandiri na manontuhon dia na denggan dohot na roa. Nang pe nunga tatanda jala tahaholongi Jahowa, alai maol dope tahilala unduk tu Ibana. Songon i ma na dihilala si Paulus. (Rom 7:21-23) Songon si Paulus, lomo do rohanta mangulahon na hombar tu na dihalomohon Jahowa. Alai, ingkon marsitutu do hita mangalo sangkap na roa na adong di dirinta. Alasan na asing na mambahen hita maol unduk tu Jahowa, i ma ala adong pengaruh sian hasomalan dohot cara marpingkir ni godang halak di ingananta tading. Godang sian nasida na mandok angka na maralo tu lomo ni roha ni Jahowa. Alani i, ingkon marsitutu do hita asa unang marpingkir songon nasida. w19.09 15 ¶4-6

Ingkon taboto do, ndang sai sude boi taulahon. Alani i, ingkon manat do hita mamingkirhon aha na laho taulahon. Umpamana, molo ndang manat hita, boi do gabe suda gogonta ala mangalului godang arta. Parrohahon ma na didok Jesus tingki disungkun sahalak baoa na mora ibana. Didok baoa i, “Aha do na ingkon huulahon asa dapothu hangoluan na salelengna?” Halak na burju do baoa i, i do alana tangkas do disurat di Buku Markus na holong do roha ni Jesus tu ibana. Dilehon Jesus do gokkon tu baoa i songon na didok di ayat sadari on. Lomo do roha ni baoa i mangihuthon Jesus, alai ndang olo ibana ala “godang do artana”. (Mrk. 10:17-22) Ujungna, ndang olo ibana manuhuk auga ni Jesus. Jala tongtong do ibana gabe hatoban “ni Hamoraon”. (Mat. 6:24) Molo hamu, aha do na laho pillitonmu? Sian tingki tu tingki, denggan do molo sai tarimangi aha na taharingkothon di ngolunta. Boasa? Asa boi taboto naung marbisuk do hita mamangke gogonta manang na ndang. w19.09 24 ¶17-18

Tongtong ma hita marbarita sahat tu na didok Jahowa nunga sae ulaon i. Sadia leleng nai do tingki na adong di angka halak laho mananda Debata Jahowa dohot Jesus Kristus? (Joh. 17:3) Ndang taboto. Alai taboto do, andorang so dimulai hasusaan bolon, adong dope tingki tu angka halak na “tama mandapot hangoluan saleleng ni lelengna” laho manjangkon barita na uli jala mamillit laho manomba Jahowa. (Ul. 13:48) Ala adong dope tingki, songon dia hita boi mangurupi nasida? Marhite organisasina, diparade Jahowa do sude na tahaporluhon laho mangajarhon hasintongan tu angka halak. Umpamana, dilatik do hita ganup minggu di parpunguan parsitongaan ni minggu. Di parpunguan i, diurupi do hita mamboto carana marbarita, manjumpangi muse, dohot manguluhon parsiajaran Bibel. Jala, dung sae hamu mangkatai dohot sasahalak na olo manangihon, dilehon hamu ma risalah manang majalah tu ibana. Boi ma dijaha-jaha ibana i paima ro hamu muse. Martanggung jawab do hita sude asa tongtong ringgas marbarita ganup bulan. w19.10 9 ¶7; 10 ¶9-10

Marjanji do Jahowa tu si Simeon, sahalak naposona naung matua di Jerusalem. Laho idaonna do Messias andorang so mate ibana. Tontu janji on patoguhon roha ni si Simeon, alana nunga martaon-taon ibana paimahon Messias. Ala tongtong ibana martahan jala porsea tu Debata, dapotna ma pasu-pasu. Sada tingki, “marhite panogu-noguon ni tondi parbadia” laho ma ibana tu bagas joro. Disi, diida ibana ma Jesus tingki poso-poso dope. Jala dipangke Jahowa do ibana laho paboahon surirang, na laho gabe Kristus do poso-poso i. (Luk. 2:25-35) Nang pe nunga mate si Simeon andorang so mulai dope Jesus marbarita, mandok mauliate do ibana ala nunga dipangke Jahowa. Jala godang do pasu-pasu na dapotna di ari na naeng ro! Di tano na imbaru, idaonna ma songon dia pamarentaon ni Jesus parohon pasu-pasu tu sude jolma di tano on. (1 Mus. 22:18) Hita pe, mandok mauliate do tu Jahowa alani hak istimewa na dilehon tu hita. w19.10 22 ¶7; 23 ¶12

Otik manang godang hepengta, ingkon tajaga do rohanta. Songon dia carana? Unang ma holongan di hepeng, jala unang ma gabe parkarejoan na rumingkot di ngolumuna sian manomba Jahowa. Sian dia boi diboto hamu na masa i tu hamu? Sungkun ma dirimuna: ‘Jotjot do hupingkirhon taringot parkarejoan tingki marpungu ahu manang marbarita? Sai marsak do ahu taringot parhepengon? Gabe susa do parsaripeonku alani hepeng? Asa boi mangalehon gumodang tingki tu Jahowa, olo do ahu mamillit karejo na leas di adopan ni godang halak?’ (1 Tim. 6:9-12) Tingki mamingkirhon angka sungkun-sungkun on ingot ma, holong do roha ni Jahowa tu hita. Jala marjanji do Ibana tu angka halak na setia, “Ndang tadingkononku ho jala ndang pasombuonku ho.” I do alana didok si Paulus, “Unang ma holongan di hepeng hamu.”​—Heb. 13:5, 6. w19.10 29 ¶10

Dos songon na masa tu si Jeremia dohot tu si Baruk, tingki rap saulaon hita dohot dongan sahaporseaon, boi ma taida parange ni nasida na denggan. Jala lam solhot ma hita tu nasida. Umpamana, boha do pangkilalaanmuna tingki marbarita jala diida hamu donganmuna barani patorangkon haporseaonna, manang paboahon taringot Jahowa dohot sangkapna? Tontu gabe lam holong do rohamu tu ibana. Donganta si Adeline na marumur 23 taon manogihon donganna si Candice laho tu inganan na mangkaporluhon parbarita. Didok ibana, “Lomo do rohanami asa lam ringgas marbarita jala marlas ni roha. Porlu do hami dipatogu laho mangalehon na dumenggan tu Jahowa.” Aha ma laba na dapot ni nasida? Didok ibana muse, “Dung sae marbarita, dihatai hami ma songon dia pangkilalaannami, aha na patoguhon rohanami, jala songon dia Jahowa mangurupi hami di ulaon marbarita. Lomo do rohanami mangkata-hatai songon i. Jala gabe lam solhot ma parale-aleonnami.” w19.11 5 ¶10-11

Di tingki najolo, gabe maila do sahalak tentara molo mulak ndang adong be perisaina. Sejarawan Rom na margoar si Tacitus mandok, “Sada hailaon na balga do molo ditadingkon sahalak tentara perisaina.” On ma sada alasan boasa ingkon gomos ditiop angka tentara i perisai ni nasida. Boi do tatiop gomos perisai, i ma haporseaonta marhite tongtong ro tu parpunguan, jala mamaritahon taringot goar ni Jahowa dohot Harajaonna. (Heb. 10:23-25) Tajaha ma Hata ni Debata ganup ari jala martangiang ma asa diurupi Jahowa hita mangulahon lomo ni rohana. (2 Tim. 3:16, 17) Molo taulahon i, ndang adong sinjata ni Sibolis na boi mangalo hita. (Jes. 54:17) Ala adong “perisai, i ma haporseaon”, gabe dilinggomi ma hita. Togu ma hita jala tongtong rap saulaon dohot angka dongan. Jala boi do hita marhasil molo tongtong tajaga haporseaonta. Alai na rumingkot, sada hak istimewa do di hita ala marpihak tu Jesus tingki monang ibana mangalo Sibolis dohot angka na mangihuthon ibana.​—Pgk. 17:14; 20:10. w19.11 19 ¶18-19

Molo disurat hamu rencanamuna, gabe lam mura ma hamu mangulahon i. (1 Kor. 14:40) Umpamana, ditugashon punguan ni angka sintua do sahalak sintua laho manurat keputusan na dibahen nasida. Dohot ma i, ise na ditugashon mangulahon i jala andigan ingkon dipasae nasida tugas i. Molo dibahen angka sintua daftar sisongon i, gabe lam mura ma diulahon keputusan i. Boi do bahenonmu songon i di parngoluonmuna siganup ari. Umpamana, boi do dibahen hamu daftar ni angka na laho ulahononmuna ganup ari. Jala surat ma parjolo sahali tugas na rumingkot. Molo diulahon hamu i, gabe lam mura ma dipasae hamu tugas i. Jala gabe adong ma tingkimuna laho mangulahon na asing. Ingkon marsitutu jala ringgas ma hamu mangulahon keputusan naung dibahen hamu. (Rom 12:11) Dipaingot Apostel Paulus do si Timoteus asa “marsitutu” mangalatik dirina asa gabe guru na lam denggan. Sipaingot sian si Paulus on, boi do mangurupi hita di sude ulaonta manomba Jahowa.​—1 Tim. 4:13, 16. w19.11 29-30 ¶15-16

Tingki disuru Debata ibana laho manguluhon halak Israel kaluar sian Mesir, ndang pos roha ni si Musa tu dirina. Jala sai didok ibana do tu Jahowa ndang tama ibana mangulahon tugas i. Alai dipatudu Debata do asi ni rohana tu ibana. Diantusi Jahowa do pangkilalaan ni si Musa jala diurupi do ibana. (2 Mus. 4:10-16) Hasilna, gabe boi ma si Musa paboahon barita panguhuman tu si Firaun. Diida si Musa do huaso ni Jahowa tingki dipalua Ibana halak Israel. Dung i, dilonongkon ma si Firaun dohot angka tentarana di Laut Merah. (2 Mus. 14:26-31; Ps. 136:15) Dung diboan si Musa halak Israel kaluar sian Mesir, sai marungut-ungut do nasida. Hape nunga dipalua Jahowa nasida sian parhatobanan. Alai, boi do diida si Musa songon dia Jahowa patuduhon hasabaron. (Ps. 78:40-43) Jala diida si Musa do muse songon dia Jahowa patuduhon serep ni roha tingki dioloi Debata pangidoanna asa unang diripashon halak Israel. (2 Mus. 32:9-14) Dung kaluar halak Israel sian Mesir, lam togu do parale-aleon ni si Musa tu Jahowa. Jala didok do, alani solhotna hira na boi do si Musa mangida Debata.​—Heb. 11:27. w19.12 17 ¶7-8; 19 ¶9

Halak Galilea do godangan sisean ni Jesus. Alani i gabe mura do Jesus marpungu dohot godang halak di dolok di Galilea, sian apala marpungu di sada jabu di Jerusalem. Asing ni i, dung dipahehe, nungnga pajuppang Jesus dohot 11 apostelna di sada jabu di Jerusalem. Molo holan tu 11 apostelna i diparettahon lao marbarita dohot mambahen sisean, tontu paboaon ni Jesus do i tikki di Jerusalem. Dang porlu suruonna akka apostelna, akka borua na di kuburan i, dohot sisean na asing asa manjuppangi ibana di Galilea. (Luk. 24:33, 36) Paretta lao mambahen sisean dang holan ditugashon Jesus tu halak Kristen di abad na parjolo. Sian dia taboto? Dung dipaboa Jesus paretta i, didok ibana tu akka siseanna, “Sai na dongananku do hamu sahat tu panutup ni jaman on.” (Mat. 28:19, 20) Saonari godang do halak na mambahen sisean. Buktina, ganup taon adong hira-hira 300.000 halak na gabe sisean ni Jesus jala tardidi gabe Sitindangi Ni Jahowa! w20.01 2 ¶1; 3 ¶5-6

Hea do diadopi hamu situasi songon on? Poso dope hamu alai marsahit na posi. Manang, dipecat ma hamu sian karejo jala maol dapot karejo na baru. Manang nungnga matua hamu jala dang boi be dilehon hamu godang tikki dohot gogomuna tu Jahowa. Molo songon i situasi na diadopi hamu, olo do gabe didok rohamu dang mararga be dirimuna. Jala boi do i mambahen hamu dang be marlas ni roha, dang mararga, jala olo do gabe sega parale-aleonmuna dohot na asing. Portibi on manggombarhon pikkiran ni Sibolis taringot hangoluan ni jolma. Jotjot do dibahen ibana halak marpikkir dang mararga be ngolu ni nasida. Didok Sibolis tu si Hawa, bebas do ibana mamillit lomo ni rohana molo dang mangoloi Debata. Hape takkas do diboto Sibolis, mate do si Hawa molo dang mangoloi Debata. Sibolis do na mangarajai portibi on. I do alana, godang akka pamimpin dang mangargai ngolu ni akka jolma jala dang parduli tu pakkilalaan ni halak na asing. Alai lomo do roha ni Jahowa asa taargai dirinta sandiri, jala diurupi Ibana do hita tikki mangadopi hasusaan na boi mambahen hita marmetmet ni roha.​—Rom 12:3. w20.01 14-15 ¶1-4

Lobi sian 40 taon, tading ma si Jeremia rap dohot angka halak na so setia, termasuk ma i angka tetangga dohot piga-piga sisolhotna na sian hutana, i ma Anatot. (Jer. 12:6) Alai, ndang na gabe ndang olo ibana mardongan tu halak na asing. Gariada, dipaboa ibana do pangkilalaanna tu sekretarisna, i ma si Baruk. Jala sian na disurat si Baruk, gabe taboto ma songon dia pangkilalaan ni si Jeremia. (Jer. 8:21; 8:23; 20:14-18; 45:1) Boi ma tabayangkon, saleleng disurat si Baruk sude na masa tu si Jeremia, gabe masihaholongan jala gabe lam togu ma parale-aleon ni nasida. (Jer. 20:1, 2; 26:7-11) Saleleng martaon-taon, barani do si Jeremia paboahon tu halak Israel aha na laho masa tu Jerusalem. (Jer. 25:3) Andorang so ro panguhuman i, disuru Jahowa ma si Jeremia manurathon sipasingotna di sada gulungan laho manjujui angka halak asa marhamubaon. (Jer. 36:1-4) Saleleng marbulan-bulan ma si Jeremia dohot si Baruk rap mangulahon tugas i. Tontu, ala jotjot mangkata-hatai, gabe lam togu ma haporseaon ni nasida. w19.11 2-3 ¶3-4

Ikkon songon dia do hita maradoppon akka dongatta na miniahan? Sala do molo pasangaphu tabahen sasahalak, nang pe ibana sahalak na miniahan na gabe haha-anggi ni Kristus. (Mat. 23:8-11) Tikki mangulas taringot akka sintua, dijujui Bibel do hita asa maniru “haporseaon ni nasida”. Alai dang dijujui hita mambahen jolma gabe pamimpin di hita. (Heb. 13:7) Tutu do didok Bibel, piga-piga dongatta ikkon “tapasangap do dua hali lompit”. Alai taulahon pe i ala ‘denggan do nasida manarihon’ dohot ‘paboahon jala mangajarhon hata ni Debata sian nasa gogona’, dang ala halak na miniahan nasida. (1 Tim. 5:17) Molo pasangaphu tabahen dongatta na miniahan, olo do gabe maila nasida. Manang olo do gabe tabahen ginjang roha ni nasida. (Rom 12:3) Tontu, dang adong sian hita na olo mambahen sahalak na miniahan na gabe haha-anggi ni Kristus, gabe mangulahon dosa na balga!​—Luk. 17:2. w20.01 28 ¶8

Godang do na boi mambahen marsak roha ni Apostel Paulus. Marsak do rohana molo mamikkirhon sitaonon ni akka dongan. (2 Kor. 2:4) Dipukkuli jala dipenjarahon do ibana ala sogo roha ni akka halak tu ibana. Jala tikki “marhahurangan”, olo do gabe marsak rohana. (Plp. 4:12) Asing ni i, hea do tolu hali naeng lonong kapal na ditoppang si Paulus. Boi ma tabayakkon marsak do rohana tikki markapal. (2 Kor. 11:23-27) Aha do na mangurupi si Paulus tikki marsak rohana? Marsak do roha ni si Paulus tikki akka dongan mangadopi hasusaan. Alai dang olo ibana pasaehon sude hasusaan ni nasida i sahalakna. Serep do roha ni si Paulus. Diboto ibana dang boi ulahononna i molo holan mangasahon gogona sandiri. Alani i, dipangido ibana akka dongan na asing na boi dihaporseai asa dohot manarihon huria songon si Timoteus dohot si Titus. Tikki akka dongan i mangulahon tugasna, on mambahen moru arsak ni roha ni si Paulus.​—Plp. 2:19, 20; Tit. 1:1, 4, 5. w20.02 22-23 ¶11-12

Dipangido Jahowa do akka dakdanak asa unduk tu natua-tuana. Jala hita pe dipangido Jahowa asa unduk tu Ibana. Tama do hita sude mangoloi Jahowa ala Ibana do Sipanompa, Silehon hangoluan, jala Ibana do na umbisuk sian sude akka natua-tua. Alai na rumikkot, taoloi Jahowa ala holong do rohatta tu Ibana. (1 Joh. 5: 3) Nang pe godang na mambahen hita ikkon mangoloi Jahowa, alai dang hea dipaksa asa unduk hita tu Ibana. Dipaloas Jahowa do hita bebas mamillit. I do alana massai las do rohana molo taoloi Ibana alani holong ni rohatta. Lomo do roha ni natua-tua asa denggan ngolu ni ianakkonna. I do alana dibahen nasida do aturan taringot pangalaho na denggan. Molo diihuthon ianakkon aturan na dibahen natua-tuana, on patuduhon molo nasida porsea jala mangargai natua-tuana. Alani i, massai rikkot do taboto jala taihutton aturan na dibahen Jahowa. Molo taulahon i, on patuduhon na holong do rohatta tu Jahowa jala tapasangap Ibana. Marlaba do i tu hita. (Jes. 48:17, 18) Alai halak na so mangoloi Jahowa dohot aturanna, mambahen susa dirina sandiri.​—Gal. 6:7, 8. w20.02 9-10 ¶8-9

Songon si Abigail, porlu do hita barani makkatai tikki adong halak na mangulahon ulaon na sala manang na boi parohon jea. (Ps. 141:5) Toktong ma sangap tabahen ibana, alai ikkon barani do hita. Alana molo olo hita mangalehon sipasingot tu sasahalak, on patuduhon ale-ale na denggan do hita. (Poda 27:17) Akka sintua do na tarlumobi ikkon barani makkatai tikki adong dongan di huria na mangulahon na sala. (Gal. 6:1) Memang, diingot nasida do jolma na so sempurna nasida. Jala sipata nasida pe porlu do tong dipodai. Alai unang ma gabe i na mambahen nasida gabe mabiar lao pasingotton halak na porlu dipasingot. (2 Tim. 4:2; Tit. 1:9) Tikki mangalehon poda, marsitutu do nasida asa sabar jala denggan pasahatton i. Holong do roha ni sintua tu akka dongan. I do na mangonjar roha ni nasida lao mangalehon sipasingot. (Poda 13:24) Alai tujuan na urrikkot di nasida, i ma asa mangargai Jahowa dohot prinsipna. Jala manjaga huria asa toktong denggan.​—Ul. 20:28. w20.03 20 ¶8-9

Dipangke Jahowa do si Musa laho paluahon halak Israel. Alai nandigan do dipangke Jahowa ibana? Ndang tingki dihilala si Musa naung rade ala nunga diajarhon “sude habisuhon ni Mesir” tu ibana. (Ul. 7:22-25) Alai dipangke Jahowa do ibana dung diurupi asa gabe halak na serep roha jala na lambok roha. (Ul. 7:30, 34-36) Dibahen Jahowa do si Musa barani laho manjumpangi raja Mesir. (2 Mus. 9:13-19) Sian on taparsiajari ma, holan halak na patuduhon angka parange na denggan jala na sai marhaposan tu Ibana do na dipangke Jahowa. Sian najolo, sai diurupi Jahowa do angka naposona laho mangulahon marragam tugas. Boi do dipangke Jahowa hamu laho mangulahon sada tugas molo rade hamu dipangke Ibana. (Kol. 1:29) Molo rade hamu, boi ma dipangke Jahowa hamu gabe parbarita na ringgas, guru na denggan, pangapuli di angka dongan, parkarejo na tarlatik, dongan na burju. Manang boi do hamu mangulahon tugas aha pe na dihaporluhon laho pasauthon lomo ni rohana. w19.10 21 ¶5; 25 ¶14

Dongan na burju mangurupi hita asa tongtong setia tu Jahowa. Asa tadapot dongan na burju, ingkon gabe dongan na burju do hita. (Mat. 7:12) Umpamana, didok di Bibel asa taparrohahon angka dongan na porlu diurupi. (Eps. 4:28) Molo ringgas hita mangurupi na asing, gabe tamba do las ni rohanta. (Ul. 20:35) Dongan na burju, rade do mangurupi hita tingki susa. Jala mangurupi hita asa tongtong dame roha dohot pingkiranta. Dongan na burju, sabar do manangihon tingki tapaboa na di bagasan rohanta. Songon si Elihu na sabar manangihon arsak ni roha ni si Job. (Job 32:4) Ndang boi tapangido nasida na mambahen keputusan di hita. Alai, tangihon ma poda sian Bibel na dipaboa nasida. (Poda 15:22) Serep do roha ni Raja Daud tingki diurupi angka donganna ibana. Hita pe, olo ma diurupi tingki adong dongan na rade laho mangurupi. (2 Sam. 17:27-29) Tutu, silehon-lehon sian Jahowa do angka dongan sisongon i.​—Jak. 1:17. w19.04 11 ¶12; 12-13 ¶14-15