Januari

Tubu do haporseaon ni si Timoteus ala pos do rohana tu ajaran ni Bibel, gabe lomo ma rohana marale-ale tu Jahowa. Jadi hamu pe ikkon diparsiajari hamu do Bibel, jala ikkon takkas do diboto hamu aha na diajarhon taringot Jahowa sian i. Pinomatna adong tolu ajaran ni Bibel na ikkon dihaporseai hamu. Na parjolo, ikkon pos do rohamu Jahowa do Debata na manoppa saluhutna. (2 Mus. 3:14, 15; Heb. 3:4; Pgk. 4:11) Na paduahon, ikkon pos do rohamu molo Bibel i, i ma surat na badia na dilehon Debata tu akka jolma. (2 Tim. 3:16, 17) Jala na patoluhon, ikkon pos do rohamu dibahen Jahowa do sada organisasi na diuluhon Jesus Kristus. Digoari ma nasida Saksi Jahowa. (Jes. 43:10-12; Joh. 14:6; Ul. 15:14) Dang ikkon diboto hamu sude isi ni Bibel. Na urrikkot, ikkon pos do rohamu tu hasittongan “sian nasa pingkiranmuna”.—Rom 12:1. w20.07 10 ¶8-9

Di surirang i, dipaboa do adong akka sihapor na bohina songon jolma, jala ‘adong di ulu ni nasida mahkota na sian mas’. (Pgk. 9:7) Dibahen nasida ma na haccit tu akka ‘halak [i ma musu ni Debata] na so adong dibahen materai di pardompahanna’. Diulahon nasida ma i saleleng lima bulan, sarupa songon umur ni sihapor. (Pgk. 9:4) Surirang on manggombarhon akka naposo ni Jahowa na miniahan. Barani do nasida paboahon barita panguhuman tu portibi on. Jala on mambahen akka halak na mangihutton portibi on gabe busisaon. Di Bibel, somal do dipakke sada tudosan alai boi do dang sarupa lapatanna. Misalna, di Pangungkapon 5:5 didok do Jesus i, “Singa na sian marga Juda”. Alai di 1 Petrus 5:8, digombarhon do Sibolis songon “singa na marauang”. Jadi asing do “sihapor” na digombarhon si Joel di Joel 2:7-9 dohot “sihapor” na disurat di bukku Pangungkapon. w20.04 3 ¶8; 5 ¶10

Si Hagar, hatoban ni si Sarai hea do mangulahon na sala dung gabe istri ni si Abram ibana. Hamil ma ibana, jala gabe lea ma rohana mangida si Sarai, ala dang adong ianakkonna. Gabe dang denggan be hubungan ni nasida na dua, jala gabe lao ma si Hagar ala disusai si Sarai. (1 Mus. 16:4-6) Olo do ra tapikkir, memang cocok do dibahen songon i tu si Hagar, alana dang denggan pangalahona. Alai dang holan i na diida Jahowa sian si Hagar. Disuru do suru-suruan lao manjuppangi ibana. Jala marhite suru-suruan i diurupi Jahowa ma si Hagar paubahon pangalahona, jala dipasu-pasu do ibana. Gabe diboto si Hagar ma na sai toktong do diparrohahon Jahowa ibana. Alani i, gabe didok si Hagar ma tu Jahowa, “Ho do Debata na manatap ahu.” (1 Mus. 16:7-13) Aha do na diida Jahowa sian si Hagar? Diingot Ibana do songon dia latar belakang ni si Hagar jala situasi aha do naung diadopi ibana. Memang, dang lomo roha ni Jahowa mangida si Hagar mangaleai si Sarai, alai diattusi Jahowa do situasi dohot latar belakang ni si Hagar. I do umbahen na burju Jahowa tu ibana. w20.04 16 ¶8-9

Didok Apostel Paulus, sude halak Kristen ikkon dohot do tu sada parlumbaan. (Heb. 12:1) Jadi sude hita, na matua nang na poso, na gogo nang na gale, ikkon toktong do marlojong sahat tu garis finis asa boi tadapot hadiah sian Jahowa. (Mat. 24:13) Dilehon si Paulus pe poda sisongon i, ala nungnga marhasil ibana ‘marlojong sahat tu ujungna’. (2 Tim. 4:7, 8) Alai, parlumbaan aha do na ditaringoti si Paulus dison? Sipata, dibahen si Paulus do tudosan taringot akka parlumbaan na adong di Junani lao paboahon parsiajaran na rikkot. (1 Kor. 9:25-27; 2 Tim. 2:5) Adong do piga-piga hali ibana mamakke tudosan taringot lomba lari lao manggombarhon parngoluon ni halak Kristen. (1 Kor. 9:24; Gal. 2:2; Plp. 2:16) Tikki dilehon sasahalak dirina tu Jahowa jala tardidi, disi ma ibana mulai dohot tu “parlumbaan” i. (1 Ptr. 3:21) Jala sahat ma ibana di ujungna tikki dilehon Jahowa hadiah tu ibana, i ma hangoluan saleleng-lelengna.—Mat. 25:31-34, 46; 2 Tim. 4:8. w20.04 26 ¶1-3

Didok Bibel, “Boi do tahaporseai Tuan i, bahenonna do hamu margogo jala jagaonna do hamu sian Sibolis.” (2 Tes. 3:3) Songon dia do dibahen Jahowa manjaga hita? Dilean Jahowa do tu hita perlengkapan porang, asa boi taalo serangan ni Sibolis. (Eps. 6:13-17) Massai kuat do perlengkapan porang on! Alai asa marguna i, ikkon sude do perlengkapan i torus tapakke. Ikat pinggang manggombarhon hasittongan na sian Bibel. Boasa ikkon tapakke on? Asa unang dililuhon Sibolis “ama ni gabus” i hita. (Joh. 8:44) Nungnga marribu taon Sibolis margabus lao “mangaliluhon sude portibi on”! (Pgk. 12:9) Jadi taparsiajari ma hasittongan taringot Jahowa, tasomba ma Ibana marhite “panogu-noguon ni tondi parbadia dohot hasittongan”, jala jujur ma hita di saluhutna.—Joh. 4:24; Eps. 4:25; Heb. 13:18. w21.03 26-27 ¶3-5

Aha do na mambahen undenggan luat i sian luat na asing, ala disi do adong ulaon panombaon tu Jahowa. Mulai sian Pentakosta 33 M, “tano” i dang be manggombarhon sada inganan. Alana saonari, nungnga tarsar be akka naposo ni Jahowa di liat portibi on. Jadi saonari, “tano bagabaga na marmulia” i manggombarhon akka ulaon ni Sitindangi Ni Jahowa, i ma marpungu dohot marbarita na uli. Saleleng ari parpudi, marulak-ulak do raja utara masuk tu “tano bagabaga na marmulia” i. Misalna, tikki masa Porang Dunia II, Nazi Jerman do na gabe raja utara. Marsitutu do ibana menganiaya jala mambunu akka naposo ni Debata. Jala dung sae Porang Dunia II, Uni Soviet ma na gabe raja utara. Ibana pe dohot do menganiaya akka naposo ni Debata, jala diboan do nasida tu pengasingan. w20.05 13 ¶7-8

Pikkirhon ma akka ale-ale ni Debata na mangolu andorang so ro Jesus tu tano on. Misalna si Abraham. Togu do haporseaonna tu Jahowa. Lobi sian 1.000 taon dung mate si Abraham, didok Jahowa do ibana “hasudunganku”. (Jes. 41:8) Sian on taboto, nang pe nungnga mate sasahalak, alai toktong do gabe ale-ale ni Jahowa ibana. Dang dihalupahon Jahowa si Abraham. (Luk. 20:37, 38) Contoh na asing, i ma si Job. Tikki marpungu akka suru-suruan na di surgo, las do roha ni Jahowa makkatai taringot si Job. Didok Jahowa do si Job i sahalak na ‘daulat, tigor, biar mida Debata, jala dipadao rohana sian hajahaton’. (Job 1:6-8) Asing ni i, setia do si Daniel tu Jahowa nang pe tinggal di luat ni akka halak na so manomba Jahowa hira-hira 80 taon. Boha do pakkilalaan ni Jahowa tu ibana? Tolu hali do didok suru-suruan molo si Daniel i “baoa hasudungan ni roha” ni Debata. (Dan. 9:23; 10:11, 19) Pos do rohatta, tarpaima-ima do Jahowa lao pahehehon sude ale-alena naung mate.—Job 14:15. w20.05 27 ¶3-4

Olo do ra lomo roha ni parsiajar Bibel tu uhum ni Debata. Alai, alani holongna tu Jahowa do umbahen gabe taronjar rohana lao mangulahon uhum i? Ingot ma, si Hawa pe diboto ibana do uhum ni Debata. Alai dang dihaholongi ibana Debata, songon i nang si Adam. (1 Mus. 3:1-6) Jadi, dang sae holan mangajarhon uhum dohot paretta ni Debata. Denggan do uhum dohot sude paretta ni Jahowa. (Ps. 119:97, 111, 112) Alai dang songon i ra pakkilalaan ni parsiajar Bibelta. Jadi, tasukkun ma parsiajar Bibelta, “Menurutmu, boasa dipangido Jahowa naposona mangulahon on? Boasa diorai Jahowa hita mangulahon on? Aha do na diparsiajari hamu sian on taringot Jahowa?” Molo taurupi parsiajar Bibelta asa mangarimangi taringot Jahowa jala makkaholongi goarna, gabe boi ma i hona tu roha ni nasida. Gabe dang holan uhum i na dihaholongi nasida, alai dohot do Jahowa na mangalehon uhum i. Gabe lam togu ma haporseaon ni nasida, jala boi ma nasida martahan nang pe adong hasusaan.—1 Kor. 3:12-15. w20.06 10 ¶10-11

Ikkon sabar do hita mangurupi akka dongan na so aktif. Alana porlu do tikki di nasida lao padenggatton parale-aleonna tu Jahowa. Godang akka donganta na so aktif mandok, sai torus do akka sintua dohot akka dongan di huria ro manjuppangi nasida. I do alana gabe olo nasida mulak tu Jahowa. Sahalak donganta borua sian Asia na margoar si Nancy mandok, “Adong do ale-alekku di huria na mangurupi au. Holong do rohana tu au jala nga songon kakakku ibana. Ditaringoti ibana do muse akka na denggan na hea dihilala hami najolo. Sabar do ibana manangihon au tikki hupaboa pakkilalaakku, jala barani do ibana paingotton au. Ale-ale na burju do ibana. Rade do ibana mangurupi tikki sadihari pe.” Tikki jut roha ni sasahalak, gabe haccit do pakkilalaanna. Alai molo tapatudu roha sapakkilalaan, boi do i mangubati lukkana i. Piga-piga donganta gabe dang aktif be, ala adong sasahalak di huria na mambahen haccit rohana. Jala nang pe nungnga martaon-taon, tong dope jut rohana. Alani i, gabe dang olo nasida mulak tu Jahowa. Adong do ra sian nasida na mandok, dang adil na dibahen donganna i tu nasida. Di tikki sisongon i, dihaporluhon nasida do dongan na olo manangihon jala na mangattusi pakkilalaan ni nasida. w20.06 26 ¶10-11

Molo marhasil hamu menolak godaan lao mangulahon na sala, di joloan ni ari pe, tikki digoda muse hamu gabe ummura ma hamu mangulahon na sittong. Jala ingot ma, Sibolis do na mangajarhon pandapot na sala taringot seks. Jadi molo dang diihutton hamu pandapot ni halak na di portibi on, marhasil do hamu ‘manaluhon Sibolis’. Taboto do holan Jahowa do na marhak manottuhon aha na so boi taulahon. Jala marsitutu do hita asa unang mangulahon dosa. Alai molo nungnga taulahon dosa, ikkon martangiang do hita mangakku sala tu Jahowa. (1 Joh. 1:9) Jala molo taulahon dosa na balga, tapangido ma pangurupion sian akka sintua, alana nasida do na dilantik Jahowa lao mangurupi hita. (Jak. 5:14-16) Alai unang ma hita sai torus manolsoli dosa na hea taulahon di tikki naung salpu. Boasa? Ala nungnga dilehon Jahowa tobusan ni Jesus lao manesa dosatta. Molo nungnga marhamubaon hita, ikkon pos do rohatta nungnga disalpuhon Jahowa hasalaatta i. Jadi bahenon ni Jahowa do ias panggora ni rohatta lao manomba Ibana.—1 Joh. 2:1, 2, 12; 3:19, 20. w20.07 22-23 ¶9-10

Andorang so ditoppa Jahowa dope manang aha, holan Ibana dope na adong. Alai dang hea kesepian Ibana. Sasittongna, dang porlu adong na mandongani Ibana asa boi las rohana. Alai, lomo do roha ni Jahowa asa na asing pe boi mangolu jala marlas ni roha. Jadi alani holongna, mulai ma Jahowa manoppa saluhutna. (1 Joh. 4:19) Na parjolo, ditoppa Jahowa ma Anakna, i ma Jesus. Dung i, marhite Jesus ‘ditoppa Jahowa ma saluhutna’, termasuk ma marjuta suru-suruan. (Kol. 1:16) Massai las do roha ni Jesus boi rap saulaon dohot Bapakna. (Poda 8:30) Akka suru-suruan pe, tong do marlas ni roha ala diida nasida songon dia Jahowa dohot Jesus manoppa surgo dohot tano on. Aha do buktina? Tikki ditoppa Jahowa tano on, “marolopolop” do nasida. Jala toktong do dipuji nasida Jahowa tikki ditoppa Ibana akka toppaan na asing, tarlumobi ma tikki ditoppa jolma. (Job 38:7; Poda 8:31) Sian sude toppaan i, boi ma tarida bisuk dohot holong ni Jahowa.—Ps. 104:24; Rom 1:20. w20.08 14 ¶1-2

Lomo do rohatta dihaholongi jala makkaholongi, ala songon i do hita ditoppa. I do alana haccit rohatta manang mabiar molo adong na marsogo ni roha tu hita. Sahalak donganta paboahon, “Tikki dipukkuli, dihina, jala diancam tentara au ala Saksi Jahowa, gabe mabiar jala maila do au.” Pasti haccit do rohatta molo adong na marsogo ni roha tu hita. Alai dang heran hita disi. Alana nungnga dipaboa Jesus hian, na lao dihasogohon do hita. Boasa sogo roha ni portibi on tu hita? Songon na didok Jesus, ala “dang sian portibi on” hita. (Joh. 15:17-19) Memang unduk do hita tu pamaretta alai dang olo hita terlibat tu politik, salut bendera, manang mangendehon lagu kebangsaan. Alana holan Jahowa do na tasomba. Taakkui do holan Debata na marhak mamaretta jolma. Alai molo Sibolis dohot akka “pinopparna”, dang diakkui i. (1 Mus. 3:1-5, 15) Tabaritahon do holan Harajaon ni Debata na boi pasaehon sude masalah di portibi on. Tabaritahon do muse na lao dihancurhon Harajaon ni Debata do sude pamarettaon na di portibi on. (Dan. 2:44; Pgk. 19:19-21) Las do roha ni akka halak na lambok roha mambege barita on, alai halak na jahat sogo do rohana. w21.03 20 ¶1-2

Diargai Jahowa do akka donganta borua di huria ala dilehon Ibana tugas na penting tu nasida. Dipuji do nasida ala patuduhon bisuk, haporseaon, habaranion, semangat, ala burju mangalehon, jala marpangalaho na denggan. (Luk. 8:2, 3; Ul. 16:14, 15; Rom 16:3, 6; Plp. 4:3; Heb. 11:11, 31, 35) Taargai do muse akka donganta naung matua di huria. Godang do ra sian nasida na marsahit-sahit ala nungnga lam matua. Alai marbarita do nasida sian nasa tolap ni nasida. Jala berupaya do nasida lao patoguhon dohot mangalatik na asing. Pasti godang do na boi tatiru sian pengalaman ni nasida. Massai arga do nasida di hita dohot di Jahowa. (Poda 16:31) Pikkirhon ma muse akka donganta na poso di huria. Godang do tantangan na diadopi nasida ala mangolu di portibi na dirajai Sibolis. Jala godang do akka ajaran na sala na dibahen Sibolis di portibi on. Alai, dipatogu do rohatta tikki mambege komentar ni nasida di parpunguan, taida nasida ringgas marbarita, jala barani membela haporseaon ni nasida. Takkas ma mararga do hamu akka na poso di huria!—Ps. 8:2. w20.08 21-22 ¶9-11

Tikki marbarita na uli hita jala tapatandahon diritta sahalak Sitindangi Ni Jahowa, taadopi do tong na songon “badai”. Misalna, olo do ra hita ditentang keluarga, direhei akka dongan, manang olo do dang dijalo halak barita na tapasahat. Aha do na boi ulahononmuna asa lam barani hamu? Na parjolo, papos ma rohamuna Jesus do na manguluhon ulaon on sian surgo. (Joh. 16:33; Pgk. 14:14-16) Dung i, patogu ma haporseaonmuna tu janji ni Jahowa na lao jagaonna do hamu. (Mat. 6:32-34) Lam togu haporseaonmuna, lam barani ma hamu. Dipatudu hamu do haporseaon na togu molo dipaboa hamu tu keluarga dohot donganmuna, naung marsiajar Bibel hamu dohot Sitindangi Ni Jahowa jala ro tu parpunguan ni nasida. Pasti nungnga godang dibahen hamu hamubaon di ngolumuna asa boi mangolu hombar tu prinsip ni Jahowa. Diulahon hamu pe i, alana barani do hamu jala porsea. Molo lam barani hamu, lam pos ma rohamuna molo ‘Jahowa Debatam mandongani hamu, manang tudia pe hamu mangalakka’.—Jos. 1:7-9. w20.09 5 ¶11-12

Sitiruon na denggan do Raja Asa ala marbisuk jala marhaposan tu Jahowa. Toktong do disomba ibana Jahowa di tikki susa nang di tikki na dame. Saleleng ngoluna ‘marsihohot do roha ni si Asa tu Jahowa’. (1 Raj. 15:14) Tarida do i tikki dihancurhon ibana panombaon na so sittong di Juda. Didok di Bibel, “Dipadao ibana do angka langgatan na asing dohot angka pamelean ni sipelebegu, dipuntari do angka tugu pamelean jala dipangarumpakhon do angka tiang parsombaon.” (2 Kron. 14:3, 5, Bibel siganup ari) Jala barani do ibana mamecat si Maaka oppung boruna sian pangkatna na timbo di istana. Boasa diulahon ibana i? Ala dijujui oppungna i do akka halak manomba gana-ganaan. (1 Raj. 15:11-13) Dang holan manghancurhon gana-ganaan Raja Asa. Alai diurupi ibana do muse halak Juda asa manomba Jahowa. Dipasu-pasu Jahowa do Raja Asa dohot halak Juda. Saleleng sappulu taon pamarettaon ni si Asa gabe dame ma luat i.—2 Kron. 14:1, 4, 6. w20.09 14 ¶2-3

Sering do tapangido halak manjaga barangta na arga. Misalna, tasippan do hepengta di bank. Dipasingot Apostel Paulus do si Timoteus taringot tu silehon-lehon na massai arga naung dijalo ibana, i ma hasittongan taringot tu lomo ni roha ni Debata. Dilehon do tong tugas tu si Timoteus lao ‘mambaritahon hata ni Debata’. (2 Tim. 4:2, 5) Dijujui si Paulus do si Timoteus asa manjaga aha naung dijalo ibana. Songon si Timoteus, dilehon Jahowa do tong silehon-lehon na massai arga tu hita, i ma hasittongan na adong di Bibel. Massai arga do hasittongan on ala diurupi do hita asa boi marale-ale tu Jahowa jala asa boi hita marlas ni roha. Molo pos rohatta tu hasittongan jala taihutton i, boi ma tapasiding ajaran na sala dohot ulaon na so dihalomohon Debata.—1 Kor. 6:9-11. w20.09 26 ¶1-3

Ikkon boi do diida parsiajar Bibelmuna pos ni roha dohot semangatmuna tikki pasahatton hasittongan na sian Bibel. Molo semangat hamu, nasida pe gabe semangat do. Paboa hamu ma tu ibana songon dia do prinsip ni Bibel mangurupi hamu. Molo diulahon hamu i, gabe diida parsiajar Bibelmuna ma songon dia prinsip ni Bibel boi mangurupi ibana. Tikki marsiajar Bibel, paboa ma pengalaman ni akka donganta naung marhasil mangadopi tantangan na sarupa. Boi do ditogihon hamu sahalak donganta di huria na sarupa pengalamanna tu pengalaman ni parsiajar Bibelmuna i, asa boi diboto ibana songon dia cara mangulahon prinsip ni Bibel. Molo naung berkeluarga do parsiajar Bibelmuna, dohot do pasanganna i marsiajar? Molo dang dope, togihon ma asa rap nasida marsiajar. Jujui ma parsiajar Bibelmuna asa paboahon aha na diparsiajari ibana tu keluarga dohot tu akka donganna.—Joh. 1:40-45. w20.10 16 ¶7-9

Diurupi si Josep dohot si Maria do Jesus mangulahon lomo ni roha ni Debata, ala diihutton nasida do tudu-tudu ni Jahowa tu akka natua-tua. (5 Mus. 6:6, 7) Massai balga do holong ni si Josep dohot si Maria tu Jahowa. Jadi lomo do roha ni nasida asa balga holong ni ianakkonna tu Jahowa. Taratur do si Josep dohot si Maria manomba Jahowa rap dohot ianakkonna. Lao do nasida tu sinagoga di Nasaret ganup minggu, dohot tu perayaan Paska di Jerusalem ganup taon. (Luk. 2:41; 4:16) Tikki di pardalanan tu Jerusalem i do ra diajari nasida Jesus dohot akka anggina aha na masa tu halak Israel najolo. Dikunjungi nasida do ra akka inganan na disurat di Gulungan. Pasti dang mura di nasida boi taratur manomba Jahowa ala martamba do ianakkon ni nasida. Alai dipasu-pasu Jahowa do upaya ni nasida i. Ala dibahen keluarga i do Jahowa na urrikkot, gabe boi ma nasida lam jonok tu Jahowa. w20.10 28 ¶8-9

Molo ditogihon hamu gabe patner, denggan do jolo persiapan hamu. Donganta si Daniel, sahalak perintis istimewa mandok songon on, “Las do rohakku molo persiapan patnerhu. Gabe boi ma ibana mambahen komentar tambahan na pas.” Asing ni i molo dibereng parsiajar Bibel persiapan guru studina dohot patnerna, gabe ditiru ibana ma i. Jala, pikkirhon ma pokok penting sian parsiajaran i na boi ditandasson hamu. Ala bagian na penting do tangiang tikki marsiajar Bibel, denggan do molo tapikkirhon aha na porlu tatangiakkon, asa hona tu roha ni parsiajar Bibel i. (Ps. 141:2) Contohna pengalaman ni donganta si Hana na tinggal di Jepang. Diingot ibana dope tangiang ni patner ni guru studina. Didok ibana, “Sian tangiangna i, boi do huhilala na jonok hian ibana tu Jahowa. Jala lomo do rohakku asa songon ibana au. Tikki didok ibana goarhu di tangiangna i, gabe boi ma hurasahon na holong do rohana tu au.” w21.03 9-10 ¶7-8

Dipapos Jesus do roha ni si Paulus na boi do ibana selamat sahat tu Rom. Alai piga-piga halak Jahudi di Jerusalem berencana lao pamatehon si Paulus. Tikki diboto komandan militer ni Rom si Klaudius Lisias rencana i, pittor diurupi ibana do si Paulus. Pittor diparettahon ibana ma asa diboan si Paulus tu Kaesarea. Jala disuru ibana do akka tentarana manjaga si Paulus saleleng di pardalanan i. Disan, diparettahon Gubernur Feliks ma asa ditahan si Paulus di istana ni si Herodes. Gabe selamat ma si Paulus sian akka halak Jahudi na naeng mambunu ibana. (Ul. 23:12-35) Tikki i si Festus ma gubernur ni Kaesarea manggattihon si Feliks. Ala naeng mambuat roha ni halak Jahudi, disukkun si Festus ma tu si Paulus, “Olo do ho laho tu Jerusalem, asa disi ho diadili di jolongku taringot tu parsoalan on?” Alai diboto si Paulus do molo lao ibana tu Jerusalem dibunu halak Jahudi ma ibana disi. Jadi naik banding ma ibana tu Kesar. Ninna si Festus ma muse, “Ala dipangido ho naik banding tu Kesar, borhat ma ho tu Kesar.” Alani keputusan i gabe selamat ma si Paulus. Ujungna borhat ma si Paulus tu Rom.—Ul. 25:6-12. w20.11 13 ¶4; 14 ¶8-10

Sipata olo do tauhumi diritta sandiri. Misalna olo do diuhumi sasahalak dirina, ala diingot ibana hasalaan na hea diulahon ibana andorang so diboto hasittongan. Na asing muse manguhumi dirina ala diulahon ibana hasalaan dung tardidi ibana. (Rom 3:23) Pasti lomo do rohatta mangulahon na sittong. Alai jotjot do hita sala. (Jak. 3:2; Rom 7:21-23) Nang pe dang lomo rohatta manguhumi diritta sandiri, alai adong do manfaat ni i. Aha ma i? Asa boi tapauba pangalahotta na so denggan jala asa unang taulahon be hasalaan na sarupa. (Heb. 12:12, 13) Alai olo do gabe torus tauhumi diritta nang pe nungnga muba hita jala nungnga disalpuhon Jahowa hasalaatta. Boi do gabe marjea hita molo sai songon i torus pakkilalaatta. (Ps. 31:10; 38:3, 4) Jadi ikkon manat do hita, asa unang sai torus tauhumi diritta. Boasa? Alana boi do gabe dang tasomba be Jahowa, hape nungnga disesa Jahowa hasalaatta i jala las ma roha ni Sibolis!—Bandingkon 2 Korint 2:5-7, 11. w20.11 27 ¶12-13

Cemburu do sahalak bawa marga Lepi na manurat Psalmen 73 mangida halak na jahat, hira na so adong do na hurang di nasida. (Ps. 73:2-9, 11-14) Mamora do nasida, sonang ngoluna, jala dang adong na dipikkiri. Asa unang sai cemburu be ibana mangida akka parjahat, ikkon tiruonna do cara marpikkir ni Jahowa. Ala diulahon ibana i, gabe las ma rohana jala dang metmet be rohana. Didok ibana ma, “Dungkon ni [Jahowa] ndang adong dihalomohon rohangku di tano on.” (Ps. 73:25) Unang ma cemburu hita mangida halak parjahat na sonang ngoluna. Hasonangan parsatokkinan do i. (Pjm. 8:12, 13) Molo cemburu hita tu nasida, boi do gabe metmet rohatta jala gabe sega parale-aleotta tu Jahowa. Molo hea tahilala songon na dihilala halak Lepi on, tatiru ma cara ni ibana mangatasi masalah i. Oloi ma poda ni Jahowa jala torus ma marale-ale tu akka halak na mangulahon lomo ni roha ni Jahowa. Molo umholong do rohatta tu Jahowa sian manang aha pe, dapotta ma las ni roha na sasittongna. Dung i, boi ma dapotta “hangoluan na saleleng ni lelengna”.—1 Tim. 6:19. w20.12 19-20 ¶14-16

Tikki martangiang hita paboahon arsak ni rohatta tu Jahowa, unang ma lupa hita mandok mauliate tu Ibana. Nang pe godang masalahta, denggan do molo taingot akka pasu-pasu naung tajalo sian Ibana. Jala tikki dang taboto manang aha sidohonotta di tangiangta i taingot ma boi do alusan ni Jahowa i nang pe na boi tadok holan, ‘Tolong, urupi au.’ (2 Kron. 18:31) Taasahon ma Jahowa, unang diritta sandiri. Di jaman ni si Jesaya, hea do ro halak Asiria menyerang halak Juda. Asa unang ditaluhon halak Asiria halak Juda dipangido nasida ma bantuan ni Mesir. (Jes. 30:1, 2) Gabe dipissang Jahowa ma nasida jala dipaboa Jahowa ma akibatna. (Jes. 30:7, 12, 13) Jadi marhite si Jesaya dipaboa Jahowa ma aha na ikkon sibahenon ni nasida asa unang mabiar nasida. Didok si Jesaya, “Molo torus do hamu porsea jala dang busisaon, lam margogo ma hamu.”—Jes. 30:15b. w21.01 3-4 ¶8-9

Ala toktong do nasida setia, gabe raja dohot malim ma nasida rap dohot Jesus di surgo. (Pgk. 20:6) Pasti massai las do roha ni Jahowa, Jesus, dohot akka suru-suruan mangida 144.000 halak na tarpillit manjalo upa ni nasida di surgo. Di parnidaan ni si Johannes diida ibana ma raja dohot malim na 144.000 i. Diida ibana do muse “sada punguan bolon” na malua sian Armagedon. (Pgk. 7:9, 10) Dipakke nasida do “jubah na bottar”. Lapatanna toktong do nasida ias jala setia tu Jahowa dohot Kristus, nang pe mangolu di portibi ni Sibolis. (Jak. 1:27) Sai didok nasida do, sian Jahowa dohot Jesus Anak ni Biru-Biru ni Debata do ro haluaon. Ditiop nasida do muse dakka ni hau palem. Lapatanna marlas ni roha do nasida ala nungnga dipillit Jesus gabe Raja.—Bandingkon tu Johannes 12:12, 13. w21.01 15-16 ¶6-7

Boi do marsiajar sahalak bawa gabe kepala keluarga na denggan sian cara ni Jahowa dohot Jesus mamakke wewenang. Pikkirhon ma serep roha ni Jahowa. Jahowa do na umbisuk sian sasudena. Nang pe songon i olo do Ibana manangihon pandapot ni naposona. (1 Mus. 18:23, 24, 32) Nang pe sempurna Jahowa, alai dang dipangido Ibana hita asa sempurna. Gariada diurupi Ibana do hita asa marhasil. (Ps. 113:6, 7) Didok di Bibel olo do Jahowa “mangurupi” hita. (Ps. 27:9; Heb. 13:6) Disadari Raja Daud do boi pe ibana marhasil mangulahon akka ulaonna, ala na serep do roha ni Jahowa na olo mangurupi ibana. Taparrohahon ma muse sitiruon sian Jesus. Olo do ibana manussi pat ni akka siseanna nang pe Tuan dohot Guru ibana. Didok Jesus do, “Nungnga hupatuduhon sitiruon tu hamu, alani i ikkon diulahon hamu do songon na hubahen i tu hamu.” (Joh. 13:12-17) Sasittongna Tuan do Jesus, alai dang sai naeng mangaturi ibana manang ikkon sihobasan. Gariada olo do ibana mangulahon tugas ni hatoban.—Mat. 20:28. w21.02 3-4 ¶8-10

Hamu akka dongan bawa na poso, godang do tugas di huria na boi diulahon hamu ala gogo dope hamu. Jadi godang do na boi diulahon hamu lao mangurupi akka dongan di huria. Boi do hamu mandapot tugas gabe parhobas. Alai olo do ra merasa hamu dang tolap dope mandapot tugas i, ala paposohu dope hamu. Sasittongna nang pe poso dope, adong do na boi diulahon hamu asa direspek akka dongan hamu jala dihaporseai. Adong do keterampilanmuna na boi dipakke hamu mangurupi akka dongan di huria? Pasti adong. Misalna boi do diurupi hamu akka donganta na matua mamakke tablet dohot perangkat elektronik ni nasida, asa boi dipakke marsiajar pribadi manang tikki marpungu. Molo dipakke hamu keterampilanmuna i lao mangurupi, pasti godang do manfaatna tu akka dongan na matua. Aha pe na diulahon hamu, bahen ma las roha ni Jahowa. w21.03 2 ¶1, 3; 7 ¶18

Tottu nang pe ummalo istri sian suami, alai tanggung jawab ni suami do mangurupi keluargana asa torus marale-ale tu Jahowa, termasuk ma i mangatur ibadat keluarga. (Eps. 6:4) Nang pe suami na bertanggung jawab mangurupi keluargana asa marale-ale tu Jahowa, alai porlu do tong istri marale-ale secara pribadi tu Jahowa. Ikkon dibahen ibana do tikkina lao pelajaran pribadi jala mangarimangi asa lam balga holongna tu Jahowa. Gabe torus ma ibana mangargai pengaturan na dibahen Jahowa jala ummura ma ibana unduk tu suamina. Molo alani holongna tu Jahowa do istri unduk tu suamina, pasti unggodang las ni rohana sian akka halak na so olo mangihutton pengaturan ni Jahowa. Gabe teladan do nasida tu akka bawa dohot borua na poso jala boi mambahen dame huria. (Tit. 2:3-5) Saonari, akka donganta borua do godangan naposo ni Jahowa.—Ps. 68:11. w21.02 12-13 ¶21-23

Ala barani do si Paulus jala martahan ibana manaon hasusaan gabe teladan ma ibana di hita. Nang pe sipata gale ibana, alai boi do ibana martahan ala dipangido ibana gogo sian Jahowa. (2 Kor. 12:8-10; Plp. 4:13) Molo serep rohatta mangido Jahowa mangurupi hita, boi ma hita barani jala margogo songon si Paulus. (Jak. 4:10) Molo masa sitaonon tu hita unang ma tadok na diuji Debata hita. Alana takkas do didok Apostel Jakobus, “Molo masa sitaonon tu sasahalak, unang ma didok ibana, ‘Debata do na manguji au.’ Ai dang boi ujion Debata marhite na jahat jala dang diuji Ibana manang ise pe.” (Jak. 1:13) Molo porsea do hita tu hata i, boi ma lam jonok hita tu Bapakta na di surgo i. ‘Dang olo muba’ Jahowa. (Jak. 1:17) Molo najolo diurupi Ibana do halak Kristen asa martahan manaon hasusaan, saonari pe pasti urupanna do hita. Tapangido ma tu Jahowa asa dilehon tu hita bisuk, haporseaon, dohot habaranion. Ai lehononna do pangidoatta i. w21.02 30-31 ¶19-21

Molo nungnga taratur parsiajar Bibelta ro marpungu, torus ma tapatudu na parduli hita tu ibana. (Plp. 2:4) Makkata-hatai ma hita tu ibana asa lam takkas tatanda ibana. Tapuji ma ibana ala nungnga lam maju. Boi do muse tasukkun nga sahat tudia halak i marsiajar Bibel, baru tasukkun ma muse keluargana, manang parkarejoanna. Molo taulahon i, boi ma hita lam jonok tu ibana. Molo olo hita gabe donganna, boi do i mangurupi ibana maju jala ujungna tardidi. Molo nungnga taratur parsiajar Bibel ro marpungu, taurupi ma ibana asa merasa keluargana do sude dongan di huria. Burju ma hita tu ibana. (Heb. 13:2) Molo nungnga gabe penyiar parsiajar Bibel, tatogihon ma ibana mardinas. Donganta si Diego na tinggal di Brasil mandok, “Dung gabe penyiar au, godang do donganta na manogihon au mardinas. Alani i, lam takkas ma hutanda nasida. Godang do na boi huparsiajari sian nasida, na mambahen au lam jonok tu Jahowa dohot tu Jesus.” w21.03 12 ¶15-16

Didok Jesus do tu siseanna, “Toktong ma haholongi musum.” (Mat. 5:44, 45) Mura do i? Daong. Alai boi do taulahon i molo diurupi tondi parbadia ni Debata. Alani tondi parbadia, boi ma tapatudu holong, hasabaron, haburjuon, lambok ni roha, jala boi ma hita mangarajai diri. (Gal. 5:22, 23) Akka sifat on ma na mangurupi hita martahan manaon na haccit. Sian pengalaman ni akka dongan, boi do muba halak na menentang molo dipatudu akka sifat on. Gariada adong do na tertarik gabe Saksi. Molo maol tahilala patuduhon holong tu halak na marsogo ni roha tu hita, martangiang ma hita asa diurupi tondi parbadia. (Luk. 11:13) Sai taihutton ma cara ni Jahowa, ai i do na undenggan. (Poda 3:5-7) Memang haccit hian do molo dihasogohon hita. Alai talu do sogo ni roha dibahen holong. Alana molo tapatudu holong, boi do gabe muba pandangan ni sasahalak tu hita dohot tu Jahowa. Jala tabahen ma las roha ni Jahowa. Nang pe sai torus hita dihasogohon, boi do hita toktong marlas ni roha. w21.03 23 ¶13; 24 ¶15, 17

Molo tapareksa muse akka ayat na asing taringot surirang ni si Joel i, gabe taboto ma molo surirang i manggombarhon serangan militer. (Joel 2:1, 8, 11) Didok Jahowa, lao dipakke Ibana ma ‘paranganna na godang’ (tentara ni Babel) lao manguhum halak Israel na so unduk tu Ibana. (Joel 2:25) Didok do akka tentara i ro “sian utara”, alana sian utara do halak Babel ro menyerang Israel. (Joel 2:20) Dipatudos do nasida songon punguan ni sihapor. Didok si Joel do taringot nasida, “Marrombongan ma nasida manombus partahanan. . . . Masuk ma nasida tu kota i. . . . Dijangkiti nasida ma angka jabu, masuk ma nasida sian janjela songon panangko.” (Joel 2:8, 9, Bibel siganup ari) Boi do dibayakkon hamu situasina? Gok situtu do akka tentara. Dang adong be na boi martabuni manang lari sian tentara ni Babel i. Ro ma halak Babel (halak Kasdim) menyerang Jerusalem taon 607 SM. Dos do nasida songon sihapor. Didok di Bibel, “Raja ni halak Kasdim . . . ndang maralangalang rohana mida dolidoli manang namarbaju, nang mida halak na matua dohot na ubanon.”—2 Kron. 36:17. w20.04 5 ¶11-12