Februari

Porlu do asa lam tatanda akka donganta. Marsaor ma hita tu nasida di parpunguan. Tadongani ma nasida marbarita. Jala, boi do tatogihon nasida mangan di jabutta. Molo taulahon i, gabe taboto ma situasi ni nasida. Olo do ra adong dongan na dirippu hamu sombong, hape sasittongna na parila do ibana. Adong do dongan na dirippu hamu materialistis ala godang hepengna, hape sasittongna burju do ibana mangalehon jala mangurupi akka dongan. Manang adong sada keluarga na jotjot tarlambat marpungu, hape diboto hamu ma na adong do paraloan na diadopi nasida. (Job 6:29) Memang, dang boi hita ‘mangattoi na so urusanta’. (1 Tim. 5:13) Alai, denggan do molo tatanda akka donganta, jala taboto parange dohot situasi ni nasida. Olo do ra, jut rohatta mangida sahalak donganta. Alai molo taattusi latar belakangna, boi do gabe mura hita patuduhon asi ni roha tu ibana. Memang ikkon marsitutu do hita lao mananda akka donganta. Alai, molo taihutton do poda sian Bibel lao mambukka roha, on patuduhon na tatiru do Jahowa na makkaholongi “saluhut jolma”.—1 Tim. 2:3, 4; 2 Kor. 6:11-13. w20.04 16-17 ¶10-12

Di borngin andorang so mate Jesus, dipaingot ibana do akka siseanna asa masihaholongan. Diboto ibana do molo masihaholongan akka siseanna, gabe marsada jala martahan ma nasida tikki dihasogohon portibi on. Adong do contoh na disurat di Bibel, i ma huria Tessalonik. Mulai sian dibentuk huria i, nungnga dianiaya nasida. Alai toktong do nasida setia jala masihaholongan. Gabe sitiruon na denggan do on tu hita. (1 Tes. 1:3, 6, 7) Dijujui si Paulus do asa torus nasida masihaholongan jala ‘lam marsitutu mangulahon i’. (1 Tes. 4:9, 10) Molo masihaholongan nasida, gabe dipatogu ma akka na marsak, jala diurupi akka na gale. (1 Tes. 5:14) Diihutton nasida do poda ni si Paulus i, alani i dipuji si Paulus do nasida di suratna na paduahon. Didok, “Lam balga do holongmuna tu donganmuna na asing.” (2 Tes. 1:3-5) Jadi holong do na mangurupi nasida boi martahan tikki dianiaya. w21.03 22 ¶11

Asa tadapot hangoluan saleleng-lelengna, ikkon marlojong do hita di dalan hangoluan ni halak Kristen. (Ul. 20:24; 1 Ptr. 2:21) Alai dang lomo roha ni Sibolis dohot akka siihutton ibana molo taihutton dalan i. Lomo do rohana asa ‘taihuthon parngoluon ni nasida’. (1 Ptr. 4:4) Direhei nasida do hita molo taihutton dalan ni halak Kristen. Didok nasida, undenggan do dalan ni nasida, alana i do na parohon haluaon. Alai gabus do i sude. (2 Ptr. 2:19) Massai rikkot do lao mamillit jala mangihutton dalan na sittong. Lomo do roha ni Sibolis asa sude hita dang be mardalan di dalan na soppit na parohon “hangoluan”. Jala lomo do rohana asa taihutton dalan na bidang na diihutton godang halak di portibi on. Mura do mangihutton dalan i, alai “tu hamagoan” do ujungna. (Mat. 7:13, 14) Asa toktong hita di dalan na sittong jala dang pinda tu dalan na sala, ikkon porsea do hita tu Jahowa jala tatangihon ma Ibana. w20.04 26 ¶1; 27 ¶5, 7

Piga-piga taon na parpudi on, Rusia dohot sekutuna pe tong do masuk tu “tano bagabaga na marmulia” i. (Dan. 11:41) Taon 2017, diorai pamaretta Rusia ma ulaon ni Sitindangi Ni Jahowa jala adong piga-piga donganta na dipenjarahon. Diorai nasida do akka sijahaonta, tarmasuk Bibel Terjemahan Dunia Baru. Jala disita do kantor cabang di Rusia, tarmasuk ma akka Bale Harajaon dohot Bale Kebaktian. Dung masa i, di taon 2018, dipaboa Punguan na Mangaradoti Organisasi ma, Rusia dohot sekutuna i do na gabe raja utara di tikki saonari. Alai, nang pe dianiaya naposo ni Jahowa, dang olo nasida mangalo pamarettaon i manang marsitutu asa digatti halak na mamaretta di luat i. Toktong do nasida mangihutton poda ni Bibel asa manangiakkon “angka na marhuaso”, tarlumobi molo naeng dibahen keputusan taringot ulaon ni Sitindangi Ni Jahowa. w20.05 13 ¶9

Akka natua-tua, asa pos roha ni ianakkonmuna tu hasittongan, ikkon marale-ale do nasida tu Debata, jala ikkon pos do roha ni nasida tu hasittongan. Asa boi diajarhon hamu hasittongan taringot Debata tu ianakkonmuna, hamu pe ikkon ringgas do mamparsiajari Bibel, asa boi gabe sitiruon di nasida. Ikkon dilehon hamu do tikki lao mangarimangi aha na diparsiajari. Dung i, boi ma diajari hamu ianakkonmuna lao mangulahon na sarupa. Ikkon diajari hamu do ianakkonmuna lao mamakke akka alat lao mangariset, songon tikki hamu mangajari parsiajar Bibelmuna. Hasilna, gabe boi ma nasida makkaholongi Jahowa. Jala gabe porsea ma nasida na dipakke Jahowa do “naposo haposan jala na marbisuk” lao mangajari akka naposona. (Mat. 24:45-47) Unang ma holan ajaran dasar sian Bibel na diajarhon hamu tu ianakkonmuna. Urupi hamu ma nasida patoguhon haporseaonna. Ajari ma nasida taringot “angka na buni di bagasan diri ni Debata”. Jala sesuaihon ma caramuna hombar tu umur dohot kemampuan ni nasida.—1 Kor. 2:10. w20.07 11 ¶10, 12-13

Saonari on, adong marjuta halak na marale-ale tu Jahowa, nang pe dang sempurna nasida. Asa boi gabe ale-ale ni Jahowa, ikkon porsea do hita tu tobusan ni Jesus. Alani tobusan i, gabe boi ma hita mangalehon diri tu Jahowa jala tardidi. Tikki taulahon i, gabe rap ma hita dohot marjuta donganta na asing, na marale-ale tu Debata Natumimbul! Songon dia carana mangargai parale-aleotta tu Jahowa? Tatiru ma si Abraham dohot si Job, na toktong setia tu Debata saleleng marratus taon. Manang sadia leleng pe hita manomba Jahowa, toktong ma hita setia. Jala songon si Daniel, ikkon ummarga do parale-aleotta tu Jahowa sian ngolutta sandiri. (Dan. 6:7, 10, 16, 22) Ala diurupi Jahowa, boi do taadopi sude tantangan jala toktong do hita marale-ale tu Ibana.—Plp. 4:13. w20.05 27 ¶5-6

Raja Daud mangida istri ni halak maridi. Diboto ibana do uhum ni Jahowa na mandok, “Ndang jadi haliangan ni roham dongan saripe ni donganmu.” (2 Mus. 20:17, Bibel siganup ari) Alai, sai dibereng-bereng ibana do borua i. Gabe tarbagi ma rohana. Sasittongna, lomo do rohana mambahen las roha ni Jahowa. Alai gabe tubu ma giot-giot na sala tu si Batseba. Ujungna, gabe diulahon si Daud ma dosa na balga. Gabe roa ma goar ni Jahowa dibahen ibana. Jala dohot do susa halak na so marsala alani ibana, tarmasuk ma keluargana sandiri. (2 Sam. 11:1-5, 14-17; 12:7-12) Dipissang Jahowa do si Daud, jala ujungna gabe denggan ma muse parale-aleonna tu Jahowa. (2 Sam. 12:13; Ps. 51:2-4, 17) Diingot si Daud do akka hasusaan na dihilala ibana ala dipaloas ibana tarbagi rohana. Alai diurupi Jahowa do si Daud asa unang tarbagi be rohana? I do, alana di pudian ni ari, didok do di Bibel taringot si Daud, “Sian nasa rohana dioloi ibana Jahowa Debatana.”—1 Raj. 11:4; 15:3, Bibel siganup ari. w20.06 11 ¶12-13

Di Bibel, dipatudos do holong ni Jahowa tu naposona songon tali. Aha do lapatanna? Bayakkon ma molo naeng lonong hamu di tonga ni laut. Dung i adong ma sasahalak sian kapal, dilemparhon ibana ma pelampung tu hamu. Ala dilehon pelampung, gabe boi ma hamu mumbang. Tottu diargai hamu do pangurupionna i. Alai dang sae holan i. Ngali do aek ni laut i. Olo do gabe mate hamu molo dang pittor dipanaek tu kapal. Jadi dilemparhon ibana ma tali tu hamu jala ditarik ma hamu asa naek tu kapal. Songon didok Jahowa di ayat sadari on taringot halak Israel na mandao sian Ibana, ‘Au manogu nasida marhite-hite tali haholongon.’ Saonari pe, dang muba pakkilalaan ni Jahowa tu akka dongan na so aktif. Lomo do roha ni Jahowa asa diboto nasida na holong do rohana tu nasida jala asa mulak nasida tu Ibana. Jala, boi do dipakke Jahowa hamu lao patuduhon holongna tu nasida. Rikkot do molo jotjot tadok tu akka dongan na so aktif i, na tahaholongi do nasida, jala holong do roha ni Jahowa tu nasida. w20.06 27 ¶12-13

Tikki mate dibunu si Stepanus, godang do halak Kristen na lari sian kota i. “Gabe marserak ma sude sisean i tu sude huta na di Judea dohot Samaria.” Alai dang holan i, adong do na lari sahat tu Siprus dohot Antiokia. (Ul. 7:58–8:1; 11:19) Boi ma tabayakkon songon dia haccitna dihilala nasida tikki i. Nang pe songon i, torus do nasida marbarita na uli manang tudia pe nasida lari. Alani i gabe tamba ma huria Kristen di godang inganan. (1 Ptr. 1:1) Jala torus dope masa penganiayaan tu nasida. Misalna hira-hira taon 50 M, disuru Kesar Klaudius ma asa sude halak Jahudi maninggalhon Rom. Jadi halak Jahudi naung gabe halak Kristen pe, ikkon dohot do pinda ikkon tinggalhononna do jabuna. (Ul. 18:1-3) Hira-hira taon 61 M, disurat si Paulus do muse taringot halak Kristen di abad na parjolo, na dileai di jolo ni natorop, dipenjarahon, jala dirampok. (Heb. 10:32-34) Gabe godang do sian nasida na marpogos jala marsahit.—Rom 15:26; Plp. 2:25-27. w21.02 26-27 ¶2-4

Molo marsitutu hita patoguhon haporseaotta, dang boi Sibolis dohot akka halak di portibi on mambahen hita dang be mangihutton hasittongan. (2 Joh. 8, 9) Dang songgot be rohatta molo dihasogohon portibi on hita. (1 Joh. 3:13) Didok si Johannes, “Di bagasan huaso ni Sibolis do saluhut portibi on.” (1 Joh. 5:19) Jala ala nungnga lam jonok ujung ni portibi on, muruk situtu do Sibolis. Lomo do rohana asa taulahon seks na so patut, jala marsitutu do ibana mangaliluhon hita marhite ajaran ni halak na murtad. Asing ni i, marsitutu do ibana lao menganiaya hita jala mangorai ulaotta marbarita manang lao mambahen gale haporseaotta. Jadi dang songgot be rohatta molo diorai ulaotta marbarita di piga-piga negara. Nang pe songon i, toktong do setia akka donganta di luat i. On patuduhon manang aha pe cara na dibahen Sibolis, boi do hita toktong setia tu Jahowa! w20.07 24 ¶12-13

Lomo do roha ni Jahowa asa sude jolma mangolu salelengna di tano on. Alai tikki mardosa si Adam dohot si Hawa tu Jahowa, dang boi be nasida mangolu salelengna. Ujungna, mate ma nasida dohot sude pinopparna. (Rom 5:12) Alai aha do na diulahon Jahowa? Pittor dibahen Jahowa do cara lao paluahon akka jolma. (1 Mus. 3:15) Dilehon Jahowa ma Anakna gabe tobusan asa boi pinoppar ni si Adam dohot si Hawa malua sian dosa dohot hamatean. Dung i, dilehon Jahowa ma hangoluan salelengna tu akka halak na olo manomba Ibana. (Joh. 3:16; 1 Kor. 15:21, 22) Tikki dipahehe Jesus haduan halak na mate, boi ma tadok dang dipahehe ibana nasida sude di tikki na sarupa. Boasa? Alana boi do gabe gaor situasina molo toppu gok jolma di tano on. Hape lomo do roha ni Jahowa asa taratur sudena, dang gabe gaor. Diboto Jahowa, ikkon taratur do sudena asa boi toktong mardame akka halak di tano on.—1 Kor. 14:33. w20.08 14 ¶3; 15 ¶5

Porlu do diattusi parsiajar Bibelta tujuanna marsiajar, i ma asa boi gabe sahalak Sitindangi Ni Jahowa. Adong do piga-piga na ikkon diulahon parsiajar Bibel asa boi tardidi. Na parjolo ikkon ditanda, dihaholongi, jala ikkon porsea do ibana tu Jahowa. (Joh. 3:16; 17:3) Dung i marale-ale ma ibana tu Jahowa, dohot tu akka dongan di huria. (Heb. 10:24, 25; Jak. 4:8) Lam leleng dang diulahon ibana be akka ulaon na sala, jala dibahen ibana hamubaon. (Ul. 3:19) Dipaboa ibana do muse tu akka halak aha na dihaporseai ibana. (2 Kor. 4:13) Dung i dilehon ibana ma dirina tu Jahowa jala tardidi. (1 Ptr. 3:21; 4:2) Pasti las situtu do rohatta di tikki i! Jadi tikki dibahen parsiajar Bibelta hamajuon asa boi tardidi, denggan ma tapuji jala tajujui ibana asa torus mangulahon i. w20.10 18 ¶12-13

Molo torus do dibanding-bandingkon hamu dirimuna tu akka dongan na asing, boi do gabe didok rohamu dang marguna hamu di huria. Adong do ra akka donganta di huria na malo mangajari, malo mangatur tikki, manang burju mangapuli dohot patoguhon akka donganta na asing. Olo do ra didok rohamu dang boi diulahon hamu i songon nasida. Molo songon i do na dihilala hamu berarti na serep do rohamu. (Plp. 2:3) Alai manat ma hamu. Molo sai torus do dibanding-bandingkon hamu dirimuna tu akka dongan na asing, boi do gabe metmet rohamuna. Jala gabe dihilala hamu dang marguna hamu di huria. Marhite tondi parbadia, dilehon Jahowa do kemampuan tu akka halak Kristen di abad na parjolo. Alai dang sude mandapot kemampuan na sarupa. (1 Kor. 12:4-11) Alai mararga do nasida sude di Jahowa. Suang songon i ma tong hita saonari. Nang pe dang sarupa sude kemampuanta, mararga do hita sude di Jahowa. w20.08 22-23 ¶13-15

Tikki martangiang hamu mangido habaranion, dialusi Jahowa do tangiangmuna, jala dang na lao tadikkononna hamu. (Ul. 4:29, 31) Sai rade do Ibana mangurupi hamu. Diurupi Jahowa do halak Israel menyeberangi Laut Merah. (2 Mus. 14:13) Jadi pasti urupan ni Jahowa do tong hamu asa boi gabe sisean ni Kristus. Rimangi ma muse songon dia Jahowa mangurupi hamu mangadopi masalahmuna. Jala dilehon do tu hamu gogo asa boi marhamubaon. Boi ma hamu marhaporseaon tu Jahowa songon haporseaon ni panurat Psalmen na mandok di ayat sadari on. Boi do muse Jahowa mangurupi halak na baru gabe parbarita na uli asa barani. Parrohahon ma pengalaman ni sahalak donganta borua na margoar si Tomoyo. Tikki baru marbarita dope ibana sian jabu tu jabu, pittor disonggak sahalak parjabu ma ibana, “Dang lomo rohakku makkatai dohot Sitindangi Ni Jahowa!” Jala gogo ma ditutuppon pintuna i. Alai dang mabiar si Tomoyo. Didok ibana ma tu donganna marbarita i, “Dibereng ho do. Dang hudok dope manang aha, nungnga ditanda ibana hita Sitindangi Ni Jahowa. Las hian do rohakku!” Saonari si Tomoyo nungnga gabe perintis biasa. w20.09 6 ¶13-14

Dipaboa si Asa do tu halak Juda, Jahowa do na mambahen nasida “sonang” jala mambahen dame luat i. (2 Kron. 14:6, 7) Alai, dang marsonang-sonang Raja Asa di tikki masa hadameon i. Gariada dibangun ibana do akka kota, akka tembok, akka menara, dohot akka gerbang ni kota. Didok ibana ma tu akka halak Juda, “Ai hita dope nampuna tano i.” Aha do maksud ni si Asa disi? Maksudna disi, ala dang adong be akka musu di luat i, dang adong be na boi mangabbati nasida mambangun akka kota i. Dijujui ibana do halak Juda asa marbisuk saleleng masa hadameon i. Di tikki i, ditambai Raja Asa do muse akka tentarana. (2 Kron. 14:8) Dang ala so porsea ibana tu Jahowa umbahen na diulahon ibana songon i. Diboto si Asa do, tugas ni raja do mangurupi rakyatna asa boi mangadopi aha na lao masa. Diboto si Asa do dang sai torus dame situasi di luat i, jala tutu do i na masa. w20.09 15 ¶4-5

Olo do adong sintua na mambahen peraturan di huria ala merasa bertanggung jawab do ibana manjaga akka dongan sahaporseaon. Alai adong do wewenang ni sintua na beda hian tu wewewang ni kepala keluarga. Misalna sintua do na dipillit Jahowa gabe hakim di huria, jala dilehon do tu nasida wewenang pakaluarhon halak na so bertobat sian huria. (1 Kor. 5:11-13) Alai adong do wewenang ni kepala keluarga na so dilehon Jahowa tu sintua. Misalna, marhak do kepala keluarga mambahen peraturan jala mangido keluargana mandalatton i. (Rom 7:2) Contohna, marhak do kepala keluarga mambahen aturan tu gellengna jam piga ikkon mulak tu jabu. Molo dang didalatton gellengna aturanna i marhak do ibana menghukum nasida. (Eps. 6:1) Tottu denggan do jolo diskusi kepala keluarga tu istrina andorang so mambahen peraturan, ala “sada daging” do nasida.—Mat. 19:6, surat na di toru. w21.02 16-18 ¶10-13

Sada alasan boasa massai arga hasittongan ni Bibel, ala holan tu halak na serep roha “na marpangalaho na denggan” do i dilehon Jahowa. (Ul. 13:48) Porsea do nasida molo naposo haposan jala na marbisuk do na mangajarhon hasittongan tu hita saonari. (Mat. 11:25; 24:45) Dang boi taattusi Bibel molo dang adong na mangurupi, jala dang adong na ummarga sian mangattusi hasittongan ni Bibel. (Poda 3:13) Dilehon Jahowa do tugas na massai arga tu hita lao mangajarhon hasittongan taringot Ibana dohot lomo ni rohana tu akka halak. (Mat. 24:14) Massai arga do barita na tapaboa i, alana boi do i mangurupi halak gabe bagian sian keluarga ni Jahowa. Jala boi ma nasida mandapot hangoluan salelengna. (1 Tim. 4:16) Dang soal sadia godang na taulahon di ulaon marbarita, sude do hita mendukung ulaon na rikkot on. (1 Tim. 2:3, 4) Sada hasangapon do di hita ala boi rap saulaon dohot Debata!—1 Kor. 3:9. w20.09 26-27 ¶4-5

Dipakke Jahowa do dongan sahaporseaon mangurupi Apostel Paulus. Contohna, adong dua dongan ni si Paulus na setia, i ma si Aristarkus dohot si Lukas. Didongani nasida do si Paulus saleleng di pardalanan sian Kaesarea tu Rom. Dang adong dipaboa di Bibel na hea Jesus marjanji tu si Aristarkus dohot tu si Lukas asa selamat nasida sahat tu Rom. Alai rade do nasida mandongani si Paulus nang pe berbahaya pardalanan i. Tikki di pardalanan i pe baru diboto nasida na lao selamat do nasida sahat tu Rom. Tikki marlabu kapalna di Sidon dipaloas si Julius do si Paulus “mandapothon angka donganna” asa boi “diurupi nasida si Paulus”. (Ul. 27:1-3) Jala tikki di kota Potioli, pajuppang ma si Paulus dohot akka dongan sahaporseaon. ‘Dijujui nasida do si Paulus asa tading disi saleleng pitu ari.’ Diparade nasida ma aha na porlu tu si Paulus dohot akka donganna. Jala pasti dipatogu do nasida tikki dipaboa si Paulus akka pengalamanna na denggan.—Bandingkon Ulaon ni Apostel 15:2, 3. w20.11 16 ¶15-17

Tikki mangajari ianakkonmuna, patudu ma sian pakkataion dohot parniulaonmuna na holong do rohamuna tu Jahowa. Silehon-lehon na massai arga na boi lehononmuna tu ianakkonmuna, i ma mangurupi nasida asa makkaholongi Jahowa. Rikkot do muse mangajari ianakkonmuna asa taratur marsiajar Bibel, martangiang, ro tu parpunguan, jala dohot marbarita na uli. (1 Tim. 6:6) Memang, ikkon dilehon hamu do aha na porlu di ianakkonmuna. (1 Tim. 5:8) Alai ingot ma, dang arta na boi paluahon ianakkonmuna. Parale-aleon ni nasida tu Jahowa do na boi mamboan nasida masuk tu tano na imbaru. (Hes. 7:19) Las do rohatta mangida natua-tua Kristen na marsitutu mangurupi ianakkonna asa marale-ale tu Jahowa. Jadi dakdanak na dipagodang-godang di keluarga sisongon i, boi ma torus mangulahon na denggan songon na diparsiajari ibana. Pasti mandok mauliate do nasida tu natua-tuana!—Poda 10:22. w20.10 28-29 ¶10-11

Hea do manolsoli Apostel Petrus ala pahatoppu makkatai jala bertindak, dang jolo dipikkiri. Tikki dipaboa Jesus tu akka siseanna na ikkon marsitaonon do ibana jala mate, pittor hatop do didok si Petrus songon ayat sadari on. (Mat. 16:21-23) Gabe dipissang Jesus ma ibana. Tikki ro rombongan na naeng manakkup Jesus, pittor hatop do si Petrus mambuat podangna jala ditallik ma pinggol ni sahalak hatoban ni sintua ni malim. (Joh. 18:10, 11) Dipissang Jesus ma muse ibana. Asing ni i, hea do didok si Petrus na so tinggalhononna Jesus nang pe sude apostel maninggalhon Jesus. (Mat. 26:33) Alai mabiar do ibana tu jolma. Gariada, didok ibana do na so ditanda ibana Jesus sappe tolu hali. Gabe metmet ma roha ni si Petrus alani i. “Laho ma ibana tu luar jala tumatangis situtu.” (Mat. 26:69-75) Sukkun-sukkun ma rohana, olo dope nuaeng Jesus manalpuhon hasalaanna i manang na dang. Alai dang sai marmetmet ni roha si Petrus. Torus do ibana manomba Jahowa rap dohot akka apostel na asing.—Joh. 21:1-3; Ul. 1:15, 16. w20.12 20-21 ¶17-18

Tarida do na serep roha ni sahalak kepala keluarga sian pambahenanna. Misalna, dang diharappon ibana istri dohot gellengna makkarejohon tugas na so sanggup diulahon nasida. Olo do ibana manangihon dohot mamparrohahon pandapot ni anggota keluargana. Olo do ibana makkarejohon karejo di jabu, nang pe godang halak mandok karejo ni boru-boru do i. Sada tantangan na borat do on. Boasa? Si Rachel, sahalak donganta borua mandok, “Di hutakku, molo olo sahalak suami manussi piring dohot karejo di jabu, didok do ibana ‘dang bawa’. Alana bawa sisongon i didok do bawa na so boi mangatur istrina.” Molo songon i do pandangan ni halak di ingananmuna, ingot ma disussi Jesus do pat ni akka siseanna. Hape didok halak karejo ni hatoban do i. Molo kepala keluarga na burju, dang pandangan ni halak na uppetting di ibana, alai las ni roha ni istri dohot gellengna do. w21.02 2 ¶3; 4 ¶11

Sada silehon-lehon ni Jahowa do ala boi taingot akka na denggan di tikki naung salpu. Alai undenggan dope ngolutta haduan di tano na imbaru. Sipata olo do haccit rohatta dibahen dongan na asing. Alai molo tasalpuhon hasalaanna i, gabe fokus ma hita manomba Jahowa saonari. Molo torus tauhumi diritta, gabe dang boi be las rohatta manomba Jahowa. Jadi songon si Paulus ma hita, ikkon pos do rohatta naung disesa Jahowa dosatta. (1 Tim. 1:12-15) Adong do harapanta lao mangolu salelengna di tano na imbaru. Dang ingototta be akka na mambahen hita marsak di tikki naung salpu. Didok Bibel do, “Ndang be ingoton angka na parjolo i manang tarsunggul tu roha.” (Jes. 65:17) Pikkirhon ma on: Saleleng tasomba Jahowa saonari, lam leleng lam matua do hita. Alai molo di tano na imbaru, mulak poso do hita muse. (Job 33:25) Unang be sai taingot-ingot akka naung salpu i. Alai fokus ma hita tu tano na imbaru, jala marsitutu ma hita mulai saonari asa boi hita mangolu disi! w20.11 24 ¶4; 29 ¶18-19

Satokkin nai masa ma hasusaan bolon. Taida ma songon dia Jahowa paluahon hita. Na parjolo, dijaga Jahowa do hita tikki dihancurhon akka raja na di portibi on agama palsu manang Babel na Balga. (Pgk. 17:16-18; 18:2, 4) Na paduahon, dijaga Jahowa do hita muse tikki dihancurhon portibi ni Sibolis on di Armagedon. (Pgk. 16:14, 16) Molo torus hita jonok tu Jahowa, dang boi Sibolis mangaripasson hita. Gariada, Sibolis do na lao diripasson saleleng ni lelengna. (Rom 16:20) Jadi, torus ma pakke sude perlengkapan porang i! Jala unang ma marporang sahalakta mangalo Sibolis. Masiurupan ma hita dohot akka dongan. Torus ma taihutton petunjuk ni Jahowa. Pos ma rohatta, molo taulahon i bahenon ni Bapakta na di surgo i do hita margogo jala jagaonna do hita.—Jes. 41:10. w21.03 30 ¶16-17

Songon dia tapatudu haporseaotta tu Jahowa? Molo taulahon parettana. Disurat do di Bibel pengalaman ni akka naposo ni Debata na toktong porsea tu Jahowa jala tetap tenang tikki mangadopi tantangan. Saonari taparsiajari ma songon dia cara ni Jahowa mangurupi nasida. Misalna, diboan do akka apostel tu pengadilan ni halak Jahudi na untimbo lao mangorai nasida asa unang marbarita na uli be. Alai barani do nasida mandok, “Urrikkot do di hami mangoloi [Debata] sian jolma.” (Ul. 5:29) Nang pe dilissingi akka apostel i tetap do tenang nasida. Ala diboto nasida do na toktong dihaholongi jala didongani Jahowa nasida. Alani i gabe boi ma torus nasida marbarita na uli. (Ul. 5:40-42) Songon i nang si Stepanus, tikki naeng dipamate, tetap do ibana tenang “jala songon bohi ni suru-suruan do bohina”. (Ul. 6:12-15) Boasa boi songon i? Ala pos do rohana las do roha ni Jahowa tu ibana. w21.01 4 ¶10-11

Lapatan ni parnidaan on, ias do panggora ni roha ni nasida, jala halak na tigor marroha do nasida di jolo ni Jahowa. (Jes. 1:18) Halak Kristen naung tardidi do nasida, na porsea tu tobusan ni Jesus, jala togu parale-aleonna tu Jahowa. (Joh. 3:36; 1 Ptr. 3:21) Alani i do haduan boi nasida jongjong di jolo ni tahta ni Debata jala marhobas tu Ibana “arian nang borngin” di tano on. (Pgk. 7:15) Alai saonari pe, ikkon semangat do nasida marbarita na uli dohot mambahen sisean. Ala diboto nasida Harajaon ni Debata do na uppetting di ngolu ni nasida. (Mat. 6:33; 24:14; 28:19, 20) Pos do roha ni punguan bolon naung malua sian hasusaan bolon, na sai didongani Jahowa do nasida. Alana “Ibana na hundul di tahta i do na manjaga nasida”. Di ari na naeng ro saut do janji na dipaima-ima biru-biru na asing i. “Apusan ni Debata ma nasa ilu-ilu sian mata ni nasida.”—Pgk. 21:3, 4. w21.01 16 ¶9-10

Las do rohatta gabe bagian sian keluarga ni Jahowa. Dilehon Jahowa do wewenang tu piga-piga donganta di organisasina jala berupaya do hita mangihutton i. Rap arga do borua dohot bawa di Jahowa. Misalna di abad na parjolo dilehon Jahowa do tondi parbadiana tu bawa dohot tu borua asa boi makkatai di bahasa na asing. (Ul. 2:1-4, 15-18) Jala dang holan bawa na dipillit lao mamaretta di surgo rap dohot Jesus, dohot do tong borua. (Gal. 3:26-29) Rap mandapot hangoluan salelengna di tano on do bawa dohot borua. (Pgk. 7:9, 10, 13-15) Jala rap mandapot tugas do nasida lao marbarita na uli dohot mambahen sisean. (Mat. 28:19, 20) Najolo pe dohot do si Priskila mandongani suamina si Akuila mangajari si Apollos bawa na berpendidikan asa lam takkas mangattusi hasittongan.—Ul. 18:24-26. w21.02 14 ¶1; 15 ¶4

Martanggung jawab do akka sintua mangalatik akka penyiar asa lam malo mardinas, termasuk ma i mangajari. Molo diida hamu songon na so percaya diri ibana ala dohot hamu, tawarhon ma asa hamu na mamandu. Godang do na boi dibahen akka sintua lao mangurupi akka penyiar na adong studina. (1 Tes. 5:11) Molo tung pe dang adong parsiajar Bibelta saonari, alai boi do hita mangurupi parsiajar Bibel asa maju. Gabe patner na denggan ma hita, unang ma pagodangku hita makkatai. Tapersiappon hian ma komentar tambahan, asa boi hita mendukung guru studi i. Molo ro parsiajar Bibel i marpungu, tadongani ma ibana, jala tabahen ma sitiruon na denggan. Akka sintua pe, boi do mangalean tikki makkata-hatai tu parsiajar Bibel lao patoguhon ibana. Asing ni i, boi do muse akka sintua patoguhon guru studina, puji jala latik hamu ma ibana. Pasti las do rohatta molo boi taurupi sasahalak makkaholongi jala manomba Jahowa. w21.03 13 ¶18-19

Halak na martanggung jawab do si Daud. Nang pe poso dope, alai ringgas do ibana mangurus dohot manjaga biru-biru ni bapakna. Sabotulna tugas na berbahaya do i. Hea do dipaboa ibana tu Raja Saul, “Ale tuan, au do na marmahan akka biru-biru ni bapakku. Hea do ro singa mambuat sada biru-biru i. Jala hea do ro beruang mambuat sada biru-biru i. Pittor hulele ma i, hupamate, jala hupalua ma biru-biru i sian babana.” (1 Sam. 17:34, 35) Bertanggung jawab do si Daud manjaga biru-biruna. Hamu akka na poso, tiru hamu ma si Daud. Ringgas ma hamu mangulahon tugas na dilean tu hamu. Akrab do hubungan ni si Daud tu Jahowa nang pe poso dope ibana. Uppetting do hubunganna i sian habaranionna dohot keterampilanna na marmusik i. Dang holan Debatana dibahen ibana Jahowa, alai gabe dongan akrabna. Hamu pe akka dongan bawa na poso, bahen hamu ma Jahowa i gabe dongan akrabmuna. w21.03 3 ¶4-5