April

Hea do hamu mengalami situasi na sulit? Adong do ra akka dongan di huria na mambahen haccit rohamuna. (Jak. 3:2) Olo do ra direhei dongan sakarejo manang dongan sasikkolamuna hamu ala Saksi Jahowa. (1 Ptr. 4:3, 4) Adong do ra anggota keluargamuna na mangorai hamu marpungu dohot marbarita na uli. (Mat. 10:35, 36) Alani haccit ni sitaonon i, olo do ra sappe didok rohamuna tumagon ma dang manomba Jahowa be. Alai pos ma rohamuna, urupan ni Jahowa do hamu mangatasi akka tantangan i. Patoguonna do hamu jala leanonna do bisuk asa sabar manaon hasusaan i. Taparsiajari ma pengalaman ni akka naposo ni Debata na disurat di Bibel. Nang pe dang sempurna, martahan do nasida manaon hasusaan. Disurat do i di Bibel asa boi hita marsiajar sian nasida, songon na didok si Paulus. Molo tajaha akka pengalaman i, gabe dipatogu ma hita. Alai dang cukkup holan manjaha, ikkon taupayahon do asa hona i tu rohatta jala boi manguba cara marpikkirta. w21.03 14 ¶1-2

Boha do pakkilalaanmuna mangida akka halak na dijuppangi hamu tikki marbarita? Diida hamu do nasida songon eme naung masak na boi panenon? Molo songon i, pasti on do na dihilala hamu: Na parjolo, gabe lam ringgas ma hamu marbarita. Ala diboto hamu terbatas do tikkina lao panen, gabe dang olo be hamu marlemba-lemba. Na paduahon, gabe las ma rohamuna tikki adong halak na olo manangihon barita na uli. Didok di Bibel, “Marlas ni roha nasida . . . songon las ni roha di gotilon.” (Jes. 9:3) Jala na patoluhon, diida hamu ma ganup halak gabe calon sisean ni Jesus. Jadi, disesuaihon hamu do caramuna marbarita asa menarik di nasida. Piga-piga halak na mangihutton Jesus marpikkir, dang boi halak Samaria gabe sisean ni Jesus. Alai Jesus dang marpikkir songon i. Dianggap Jesus do nasida gabe calon siseanna. Jadi hita pe, ikkon taida do akka halak na di luatta gabe calon sisean ni Jesus. Tatiru ma si Paulus. Si Paulus mamparsiajari aha na dihaporseai akka halak na dijuppangi ibana tikki marbarita, mangattusi aha do na menarik di nasida, jala mangida nasida gabe calon sisean ni Jesus. w20.04 8-9 ¶3-4

Unang pittor tauhumi halak holan sian aha naung diulahon ibana. Marsitutu ma hita lao mangattusi pakkilalaanna. Jahowa do na boi takkas mangattusi hita sude. Jadi, tapangido ma tu Jahowa asa diurupi hita maniru carana mangida akka dongan. Jala asa taattusi songon dia hita marasi ni roha tu nasida. Dang boi tatottuhon ise do dongan na tama manjalo asi ni rohatta. Sude do nasida mangadopi masalah, na deba ra masalahna sarupa songon na diadopi si Jona, si Elia, si Hagar, dohot si Lot. Sipata, nasida sandiri do na mambahen dirina gabe susa. Alai sasittongna, hita pe hea do songon i. I do umbahen dipangido Jahowa tu hita asa marroha sapakkilalaan tu na asing. (1 Ptr. 3:8) Molo taoloi Jahowa, gabe lam marsada ma hita tu akka dongan di liat portibi on. Jadi, toktong ma tatangihon akka dongan, taattusi ma pakkilalaanna, jala tapatudu ma asi ni roha tu nasida. w20.04 18-19 ¶15-17

Jesus do sitiruon na dumenggan taringot mangoloi Jahowa. (Joh. 8:29) Asa boi toktong mangihutton hasittongan, ikkon pos do rohatta Jahowa do Debata na sittong, jala sittong do sude isi ni Bibel. Asing ni i, ikkon pos do rohatta Jesus do Messias na dijanjihon i. Godang do halak saonari na so porsea molo Jesus nungnga gabe Raja di Harajaon ni Debata. Nungnga dipasingot si Johannes hian, “godang angka panipu” na mangaliluhon akka halak na so pola togu haporseaonna tu Jahowa dohot Jesus. (2 Joh. 7-11) Didok si Johannes, “Ise do sipargabus i, ia so ibana na so mangakkui Jesus i Kristus?” (1 Joh. 2:22) Jadi taparsiajari ma Bibel alana holan marhite on do hita boi mananda Jahowa dohot Jesus. (Joh. 17:3) Jala holan on do carana paposson rohatta tu hasittongan. w20.07 21 ¶4-5

Asa unang tabahen halak gabe “tartuktuk” manang madabu, unang ma tapaksahon nasida mangihutton lomo ni rohatta. Alai tapaloas ma nasida mambahen keputusan di nasida sandiri. (Rom 14:19-21; 1 Kor. 8:9, 13) Molo di situasi on, dang sarupa hita songon akka pelari. Alana molo di parlumbaan, na marsaing do sude pelari. Marsitutu do sahalak pelari asa holan ibana sandiri na mandapot hadiah. Olo do dionjarhon ibana donganna, asa holan ibana na di jolo. Alai molo hita dang na lao marsaing dohot akka dongan. (Gal. 5:26; 6:4) Gariada tujuanta i ma mangurupi godang halak asa boi rap dohot hita di tano na imbaru. Jadi, marsitutu ma hita mangihutton poda ‘unang holan mamparrohahon na rikkot di hita, alai mamparrohahon na rikkot di na asing’. (Plp. 2:4) Marjanji do Jahowa lao mangalehon hadiah, i ma hangoluan salelengna di surgo manang di paradeiso na di tano on. w20.04 28 ¶10; 29 ¶12

Adong do marjuta halak Kristen na malua sian “hasusaan bolon”. Nasida ma saksi mata na mangida songon dia hamatean ditaluhon. Idaon ni nasida ma marmilliar halak dipahehe. Bayakkon ma las ni rohatta molo dung masa i sude! (Ul. 24:15) Sude ma halak na setia tu Jahowa manaluhon hamatean. Dung i, mangolu ma nasida saleleng ni lelengna. Pasti mandok mauliate do hita tu hatorangan ni si Paulus taringot haheheon on. Alani i, taoloi ma podana lao “mangulahon godang ulaon ni Tuhan i”. (1 Kor. 15:58) Molo torus hita setia tu Jahowa, pos ma rohatta dapotta do hangoluan na saleleng ni lelengna. Pasti las situtu do annon rohatta, lobi sian na boi tabayakkon. Dang sia-sia sude kerja kerasta mangulahon lomo ni roha ni Jahowa. w20.12 13 ¶16-17

Molo tasulikkiti surirang di Hesekiel 38:10-23; Daniel 2:43-45; 11:44–12:1; dohot Pangungkapon 16:13-16, 21, hira na sarupa do aha na digombarhon di ayat i. Molo tutu do sarupa i, ra akka on ma na lao masa haduan. Dung dimulai hasusaan bolon, sude ma akka raja di tano on mambahen sada punguan. (Pgk. 16:13, 14) Nasida ma na didok “Gog di tano Magog”. (Hes. 38:2) Punguan on ma lao menyerang jala mambunu sude naposo ni Debata. Taringot on, nungnga disurirakkon Apostel Johannes na ro do udan es na balga manipa akka musu ni Debata. On manggombarhon barita panguhuman na karas na dipasahat naposo ni Jahowa na mambahen Gog di tano Magog marsitutu lao menyerang nasida.—Pgk. 16:21. w20.05 14-15 ¶13-14

Molo tarimangi akka naung diulahon tondi parbadia, gabe lam taargai ma silehon-lehon sian Jahowa on. Andorang so nakkok Jesus tu surgo, didok ibana do tu akka siseanna, “Jaloonmuna ma huaso tingki songgop tondi parbadia tu hamu, jala paboaonmuna ma taringot tu ahu . . . sahat tu ujung ni tano on.” (Ul. 1:8) Alani tondi parbadia, adong ma hira-hira ualu satonga juta halak na manomba Jahowa. Jala boi do hita marsada ala diurupi tondi parbadia patuduhon holong, las ni roha, dame, sabar, haburjuon, pangalaho na denggan, haporseaon, lambok ni roha, dohot mangorom diri. (Gal. 5:22, 23) Takkas ma, mararga situtu do tondi parbadia i! w20.05 29 ¶10, 13

Boi do annon tatanda akka halak na tahaholongi tikki dipahehe. Misalna, sian cara ni Jahowa pahehehon halak naung mate di tikki najolo, taboto ma boi do dibahen Jahowa sarupa penampilan, soara dohot ingatan ni sasahalak dos songon andorang so mate ibana. Ingot ma, dipatudos Jesus do halak na mate i songon halak na modom. Jadi, pahehehon halak na mate i dos do songon mandungoi halak na modom. (Mat. 9:18, 24; Joh. 11:11-13) Tikki dungo sasahalak, tong do sarupa penampilan, soara dohot ingatanna songon andorang so modom ibana. Contohna si Lasarus. Nungnga opat ari ibana mate jala nga busuk be dagingna. Alai tikki dipahehe ibana, boi do pittor ditanda akka itona ibana. Jala si Lasarus pe, tong do diingot ibana nasida.—Joh. 11:38-44; 12:1, 2. w20.08 14 ¶3; 16 ¶8

Sude do naposo ni Jahowa arga di Ibana, dang soal tudia harapanna. Jala sarupa do arga ni tobusan na digarar Jahowa lao manobus nasida. Jadi nang pe dang sarupa harapan ni nasida, alai ikkon toktong do rap setia nasida tu Jahowa dohot tu Kristus. (Ps. 31:23) Jala sesuai tu kebutuhan ni naposona do dilehon Jahowa tondi parbadiana. Nungnga dilehon Jahowa tu akka naposona na setia janji na luar biasa. (Jer. 29:11) Jala di acara Parningotan Ari Hamamate ni Kristus adong ma kesempatanta patuduhon holong dohot pangargaionta tu Jahowa dohot tu Jesus. Ai nungnga ditobus hita jala boi mandapot hangoluan na saleleng ni lelengna. Alani i ganup taon, diulahon halak Kristen do ulaon na massai penting on. w21.01 18 ¶16; 19 ¶19

Godangan halak na ro tu acara Parningotan i harapanna mangolu salelengna di tano on. Attong boasa ikkon ro nasida tu Borngin Parningotan ni Tuan i? Dos do nasida songon halak na ro tu pesta perkawinan ni donganna. Ala holong rohana tu donganna i, ro do ibana tu pesta i. Suang songon i ma akka biru-biru na asing, ro do nasida tu acara Parningotan ala holong do roha ni nasida tu Kristus dohot tu akka halak na tarpillit tu surgo. Jala ro do nasida tu acara i lao patuduhon na tung massai diargai nasida do tobusan ni Jesus. Asing ni i, ala paretta ni Jesus do i. Tikki parjolo hian dibahen Jesus acara Parningotan on, didok ibana do tu akka apostelna, “Toktong ma ulahon on bahen parningotan di au.” (1 Kor. 11:23-26) Jadi saleleng adong dope di tano on akka halak na tarpillit tu surgo, ikkon torus do ro biru-biru na asing tu Borngin Parningotan ni Tuan. w21.01 17 ¶13-14

Molo na tutu do holong rohatta tu akka donganta, ikkon tarida do i sian parniulaon. (Bandingkon tu Jakobus 2:17, 26.) Misalna dihaholongi Jahowa do hita sude. (1 Joh. 4:19) Dihatahon Ibana do holongna i. (Ps. 25:10; Rom 8:38, 39) Alai dipatuduhon Ibana do i sian pambahenanna. Dilehon Jahowa do Jesus mate humokkop hita. (Joh. 3:16) Sudena on paposson rohatta na tutu do Jahowa makkaholongi hita. Molo na tutu holong rohatta tu Jahowa dohot tu Jesus, ikkon taoloi do paretta ni nasida. (Joh. 14:15; 1 Joh. 5:3) Diparettahon Jesus do tu hita asa marsihaholongan. (Joh. 13:34, 35) Denggan do molo tahatahon na holong rohatta tu akka dongan jala tapatudu i marhite pambahenatta.—1 Joh. 3:18. w21.01 9 ¶6; 10 ¶8

Haduan, rap dohot Jesus ma akka na miniahan i saleleng-lelengna. Jala nasida ma na lao mamaretta di Harajaon ni Debata. (Joh. 14:2, 3) Akka na di tano on pe boi makkilala holong ni Jesus. Nang pe dang hea nasida mangida Jesus, alai boi do lam balga holong ni nasida ala dilehon Jahowa dohot Jesus hangoluan na sonang tu nasida. (Jes. 9:6, 7) Molo olo hita gabe ale-ale ni Jesus, godang ma pasu-pasu na boi tadapot. Misalna, saonari on boi do tahilala holongna jala toktong do diurupi hita. Dilehon do tu hita kesempatan asa boi mangolu saleleng ni lelengna haduan. Jala na urrikkot, boi do tong hita marale-ale tu Jahowa. Sada hasangapon na massai balga do marale-ale dohot Jesus! w20.04 24-25 ¶15-16

Surat ni Apostel Paulus on, dibahen tu halak Kristen di Korint na dipillit lao mangolu tu surgo. Nasida ma akka halak “naung dipabadia asa marsada dohot Kristus Jesus”. Didok si Paulus do muse nasida “halak naung mate na mangihuthon Kristus i”. (1 Kor. 1:2; 15:18; 2 Kor. 5:17) Jala didok si Paulus do muse di suratna na asing, ‘mate do nasida songon [Jesus]’ jala ‘dipahehe songon ibana’. (Rom 6:3-5) Songon Jesus naung dipahehe lao mangolu di surgo, songon i ma na lao masa tu akka halak na “marsada dohot [Kristus]”, i ma sude halak Kristen na dipillit lao tu surgo. Didok si Paulus do molo Kristus i “na parjolo dipahehe sian sude halak na mate”. (1 Kor. 15:20) Jesus do na parjolo dipahehe tu surgo. w20.12 5-6 ¶15-16

Molo mate halak na dipillit lao mangolu tu surgo, langsung nama nasida dipahehe tu surgo, songon na didok di 1 Korint 15:51, 52. Dung dipahehe nasida, marlas ni roha situtu ma nasida. Didok Jesus do, “Manang ise na monang jala na mangoloi parentangku sahat tu ujungna, lehononku ma tu ibana huaso laho mangarajai angka bangso, songon huaso na hujalo sian Damang i. Parmahanonna ma angka bangso marhite tungkot bosi asa ropuhanna nasida songon gunsi na sian tano liat.”—Pgk. 2:26, 27. w20.12 12-13 ¶14-15

Didokkon si Paulus do Jesus i na parjolo dipahehe. Berarti adong dope na asing na lao dipahehe tu surgo, i ma akka apostel dohot akka halak na asing na marsada dohot Kristus. (1 Kor. 15:18) Tikki disurat si Paulus surat on, dang mulai dope haheheon lao tu surgo tu akka halak na “marsada dohot [Kristus]”. Didok si Paulus, di ari na naeng ro do masa i. Didok ibana, “Dipahehe do ganup halak mangihuthon urutanna: Kristus ma na parjolo, dung i saleleng ari harorona i, dipahehe ma angka na di ibana.” (1 Kor. 15:23; 1 Tes. 4:15, 16) Saonari do tikki ‘haroro’ ni Kristus. Jadi akka apostel dohot akka halak na naeng mangolu tu surgo, ikkon jolo paimahon sappe haroro ni Kristus, dung i pe asa mandapot upa nasida lao tu surgo.—Rom 6:5. w20.12 5 ¶12; 6 ¶16-17

Maksud ni si Paulus dison, i ma akka halak na dipahehe lao mardaging songon suru-suruan jala mandapot “hangoluan di banua ginjang”. (1 Kor. 15:43, 44) Tikki di tano on Jesus, mardaging sibuk do ibana. Alai dung dipahehe, “gabe suru-suruan na mansai gogo na mangalehon hangoluan” ma ibana. Songon i do tong akka halak Kristen na lao dipahehe tu surgo. Dipahehe do nasida mardaging songon suru-suruan, asa boi mangolu di surgo. Didok si Paulus do, “Ala sarupa do hita songon jolma na ditompa sian orbuk i, songon  i ma nang hita haduan, sarupa ma hita songon ibana na ro sian banua ginjang i.” (1 Kor. 15:45-49) Taingot ma tikki dipahehe Jesus, dang mardaging sibuk ibana songon jolma. Alana didok si Paulus do, “ndang adong parbagianan ni sibuk dohot mudar di Harajaon ni Debata”. (1 Kor. 15:50) Jadi tikki dipahehe akka apostel dohot akka halak na dipillit lao tu surgo, dang pakkeon ni nasida be mudar dohot sibuk na boi busuk. w20.12 11 ¶10-12

Diurupi Debata do piga-piga sisean ni Jesus di abad na parjolo lao manuratton taringot haheheon na tu surgo. Didok Apostel Johannes do, “Anak ni Debata do hita saonari. Alai, ndang tangkas dope taboto manang na songon dia hita sogot. Na taboto, tingki dipataridahon Debata dirina, gabe songon Ibana ma hita.” (1 Joh. 3:2) Akka halak Kristen na dipillit lao tu surgo, dang mamboto songon dia nasida sogot molo dung dipahehe. Alai molo dung dipahehe nasida tu surgo, boi ma langsung diida nasida Debata. Dipaboa do di Bibel hatorangan taringot i. Misalna, rap do annon akka halak na miniahan i dohot Kristus manghancurhon “sude pamarentaon, na marhuaso, dohot na marhagogoon”. Dohot ma muse “musu na parpudi”, i ma hamatean. Dung i, rap ma Jesus dohot na miniahan patundukkon dirina tu Jahowa jala pasahatton sasudena tu Ibana. (1 Kor. 15:24-28) Luar biasa do annon na masa on! w20.12 8 ¶2

Bibel mandok, Apostel Paulus dohot akka halak na asing na lao tu surgo “mandapot haheheon na parjolo sian angka na mate”. (Plp. 3:11) Jadi adong dope haheheon na asing. Sarupa do on tu haheheon na dipaima-ima si Job di ari na naeng ro. (Job 14:15) “Saleleng ari harorona i, dipahehe ma angka na di [Kristus]” tu surgo. Dung i, rap ma nasida dohot Jesus manghancurhon sude pamarettaon dohot akka parhuaso. Jala dang na lao adong be hamatean, i ma “musu na parpudi”. Sude na lao dipahehe tu surgo dang na lao mate be. (1 Kor. 15:23-26) Akka halak na naeng mangolu di tano on makkirim songon na didok di ayat sadari on. Dang adong halak na jahat dipahehe tu surgo, berarti tu akka halak na naeng mangolu di tano on do marlakku hata on. w20.12 6-7 ¶18-19

Olo do ra sukkun-sukkun rohatta, ‘Sian dia ma huboto naung disesa Jahowa hasalaakki?’ Molo adong sukkun-sukkun sisongon i di rohamuna, sabotulna i patuduhon na manolsoli do hamu. Jala boi ma sesaon ni Jahowa hasalaanmuna i. Sada artikel The Watchtower hea do paboahon songon on, “Targanggu do panggora ni rohatta molo taulahon muse hasomalan na roa naung tatinggalhon. . . . Unang ma didok rohamuna dang sesaon ni Jahowa be dosamuna i. Pikkiran sisongon i do na dihalomohon Sibolis. Serep ma rohamuna, jala martangiang ma hamu tu Debata. Pangido ma tu Ibana asa disesa dosamuna, asa ias panggora ni rohamuna, jala asa diurupi hamu unang mangulangi hasalaan na sarupa.” Godang do dosa na balga na diulahon Apostel Paulus andorang so gabe halak Kristen ibana. Diingot ibana do akka hasalaanna i. (1 Tim. 1:12-15) Alai porsea do ibana molo tobusan ni Jesus i, sada silehon-lehon ni Debata na boi manesa dosana. Jadi, gabe dang sai diuhumi si Paulus be dirina. w20.11 27 ¶14; 29 ¶17

Akka gambar na rorang, boi dipakke Sibolis lao mangela-ela hita. Ra didok rohatta, dang pola berbahaya i. Misalna, olo do ra gabe tadok, ‘Kan dang na gabe dipecat au molo huulahon i, jadi dang pola serius i.’ Sala do cara marpikkir songon i. Porlu do tarimangi sukkun-sukkun on, ‘Na dipakke Sibolis do ela-ela on asa tarbagi rohakku? Molo huulahon giot-giot na sala, boi do on mambahen roa goar ni Jahowa? Molo huulahon on, gabe lam jonok do au tu Debata manang gabe lam dao?’ Martangiang ma hita tu Jahowa mangido bisuk asa boi jujur hita mangalusi sukkun-sukkun i. Molo taulahon i, boi do i manjaga rohatta. Diurupi ma hita lao pasidikkon ela-ela jala mandok songon hata ni Jesus, “Laho ma ho Bolis!”—Mat. 4:10. w20.06 12 ¶16-17

Unduk do hita tu paretta ni Jahowa, alana Ibana do na umboto aha na dumenggan di hita. (Eps. 4:22-24) Molo serep rohatta, gabe urrikkot do di hita lao mangulahon lomo ni roha ni Jahowa. Jala tabahen do halak na asing urrikkot sian diritta. Gabe denggan ma parale-aleotta tu Jahowa dohot tu akka dongan. (Plp. 2:3) Alai, molo dang manat hita, olo do gabe tarihut-ihut hita tu akka halak di portibi on. Diharikkotton nasida do dirina sandiri. Ra, on ma na masa tu piga-piga halak Kristen di abad na parjolo. Alani i, didok Apostel Paulus do, “Hupaboa ma tu hamu sude: Unang ma didok rohamuna tumimbo dirimuna. Alai marbisuk ma hamu.” Diboto si Paulus do, porlu do hita mangargai diritta sandiri. Alai molo serep rohatta, boi do i mangurupi hita asa toktong seimbang. w20.07 2 ¶1-2

Di tikki ni Raja Asa, ujungna salpu do masa hadameon i. Ro ma lobi sian sajuta tentara ni Etiopia. Pos hian do roha ni si Jara, na lao taluhononna do halak Juda. Alai pos do roha ni Raja Asa tu Debata Jahowa. Di tangiangna didok si Asa, “Urupi ma hami ale Jahowa Debatanami. Ai Ho do na hupangasahon hami, jala ala ni goarMu do umbahen na ro hami mangalo musu na godang on.” (2 Kron. 14:11, Bibel siganup ari) Nang pe dua hali lipat unggodang tentara ni Etiopia sian tentara ni si Asa, alai porsea do ibana pasti diurupi Jahowa do nasida. Boi do ditaluhon nasida tentara ni Etiopia. (2 Kron. 14:8-13) Memang dang taboto aha na lao masa tu hita. Alai taboto, dang sai torus hita boi bebas manomba Jahowa. Nungnga didok Jesus tu akka siseanna, di akka ari parpudi “sogo ma roha ni sude jolma” tu nasida.—Mat. 24:9. w20.09 18 ¶14-16

Olo do gabe metmet rohatta molo adong musu na mangaleai hita. (Poda 24:10) Jadi boha do molo adong musu na mangaleai hita? Songon si Paulus boi do hita marlas ni roha “tingki dileai”. Alana on patuduhon na tutu do hita sisean ni Jesus. (1 Ptr. 4:14) Jesus pe mandok na lao dianiaya do akka siseanna. (Joh. 15:18-20) Di abad na parjolo, godang do halak Junani na marpikkir molo halak Kristen i dang hea sikkola jala gale. Jala didok halak Jahudi, halak “na so parsingkola” do halak Kristen i, songon Apostel Petrus dohot Johannes. (Ul. 4:13) Memang hira na gale do idaon halak Kristen di tikki i, alana dang dohot nasida tu sada partai politik jala dang dohot nasida gabe tentara. Gabe metmet do roha ni halak di abad na parjolo ala dileai halak nasida? Daong. w20.07 15 ¶3-4

Massai holong do roha ni si Johannes tu akka donganna. Jala lomo do rohana asa togu haporseaon ni nasida. Songon si Johannes, akka donganta na miniahan pe holong do rohana tu hita. Massai las do rohatta ala nasida na dipillit Jahowa lao mamaretta rap dohot Jesus! (1 Joh. 2:27) Marsitutu ma hita asa toktong mangihutton hasittongan jala mangoloi Jahowa di parngoluotta. Ringgas ma hita marsiajar Bibel, jala pos ma rohatta tu aha na diajarhon di Bibel. Pos ma rohatta tu Jesus. Unang ma porsea tu ajaran ni jolma dohot ajaran ni halak na murtad. Unang ma hita manomba Jahowa huhut mangulahon dosa. Molo digoda hita lao mangulahon na sala, toktong ma taihutton prinsip ni Bibel. Tapatogu do akka donganta molo rade hita manalpuhon hasalaan ni nasida jala rade mangurupi nasida. Hasilna manang aha pe hasusaan na taadopi, boi ma hita toktong mangihutton hasittongan. w20.07 24-25 ¶15-17

Holong do roha ni Jahowa tu sude naposona. Nang pe marasing-asing tugasta di huria, alai sude do hita mararga jala porlu do hita marsiurupan. Dipaboa Apostel Paulus do, dang adong naposo ni Jahowa na boi mandok tu donganna, “Ndang porlu ho di ahu!” (1 Kor. 12:21) Asa boi mardame huria, ikkon taargai do akka donganta jala ikkon kerja sama do hita. (Eps. 4:16) Molo marsada hita, gabe lam togu ma huria. Sude do akka sintua di huria dilantik marhite tondi parbadia ni Jahowa. Alai marasing-asing do kemampuan ni nasida. (1 Kor. 12:17) Adong do na baru dilantik gabe sintua. Jadi molo dibandingkon tu sintua na asing dang pola godang dope ra pengalamanna. Manang adong do ra sintua naung matua manang na marsahit. Jadi dang pola godang be na boi diulahon ibana. Alai dang boi sahalak sintua mandok tu sintua na asing, “Dang porlu ho di au.” Ikkon diihutton akka sintua do poda na di Rom 12:10. w20.08 26 ¶1-2; 27 ¶4

Ditogu-togu Jahowa do hita di dalan tu hangoluan. Tikki dilehon organisasi pangattusion na baru sian Bibel, mura do tajalo i. Alai, boha do molo penyesuaian i berpengaruh tu ngolutta. Uppamana, tikki Bale Harajaon na biasa tapakke digadis, toktong ma hita marlas ni roha. Taingot ma aha pe na taulahon tu Jahowa do i, jala Ibana do na mangatur organisasina. (Kol. 3:23, 24) Dibahen Raja Daud do sitiruon na denggan tikki mangalehon sumbangan lao mambangun bagas joro. Didok ibana, “Ai ise nian ahu pola, jala ise pola ia bangsongki, tung pola tuk gogonami mangaringgas margugu songon on? Ai marharoroan sian Ho do saluhutna i, jala sian tanganmi do i na hulehon hami tu Ho.” (1 Kron. 29:14) Memang sian Jahowa do sumbangan na talehon i. Alai las do roha ni Jahowa molo talehon tikki, gogo, dohot hepengta tu ulaon ni organisasi.—2 Kor. 9:7. w20.11 22-23 ¶14-16

Boi do hita marhasil dang soal sadia godang na taurupi gabe Sitindangi Ni Jahowa. (Luk. 8:11-15) Marhasil do hita di jolo ni Jahowa molo toktong hita marbarita. Alana toktong do taulahon aha na dipangido Jahowa dohot Jesus. (Mrk. 13:10; Ul. 5:28, 29) Ringgas ma hita marbarita ala otik nai nama tikkitta mangulahon i. Jadi unang ma dipaima hamu jolo denggan situasimuna, baru pe diulahon hamu ulaon na rikkot on. Ikkon lam semangat jala barani ma hamu saonari. Rap saulaon ma hamu dohot lobi sian ualu juta halak na marbarita na uli di liat portibi on. Hasilna, las ma rohamuna. (Neh. 8:10; Luk. 5:10) Toktong ma hamu marbarita sappe didok Jahowa nungnga sae be ulaon i. w20.09 7 ¶18-20

Fokus ma hita tu ulaon marbarita, dang tu hamoraon manang tu ulaon na asing. Molo “holongan tu hamoraon” do hita dang tahaholongi be Jahowa, dang taargai be Hata ni Debata, jala dang marbarita na uli be hita. (Mat. 13:22) Ikkon hatop do hita bertindak tikki adong bahaya, misalna molo toppu taida adegan na rorang, adegan kekerasan, manang informasi na dibahen halak na murtad di Internet, film, dohot acara TV. Hasilna, boi ma toktong tajaga parale-alaeotta tu Jahowa jala toktong ias di jolona. (Ps. 101:3; 1 Tim. 4:12) Tajaga ma hasittongan na arga na adong di Bibel dohot tugas lao mangajarhon i tu na asing. Gabe ias ma panggora ni rohatta, adong ma tujuan ni ngolutta, jala dapotta ma las ni roha. w20.09 30 ¶16-19

Tikki tardidi hamu, dipatuduhon hamu ma tu akka halak na porsea do hamu tu Jahowa jala lomo do rohamu manomba Ibana. Sian cara ni Jahowa mangatur organisasina boi ma taboto songon dia parangena, aha na dihalomohon rohana, dohot standarna. Pikkirhon ma tolu parange ni Jahowa na tarida sian organisasina. Na parjolo, ‘dang marimbar jolma di jolo ni Debata’. (Ul. 10:34) Alani holong ni Jahowa, dilehon Ibana do Anakna gabe “tobusan tu saluhut jolma”. (1 Tim. 2:6; Joh. 3:16) Dipakke Jahowa do naposona lao pasahatton barita na uli tu akka jolma. Gabe boi ma dapot ni nasida laba sian tobusan ni Jesus. Na paduahon, Debata na taratur do Jahowa jala dame. (1 Kor. 14:33, 40) Alani i, taratur jala dame do akka halak na manomba Ibana. Na patoluhon, lomo do roha ni Jahowa mangajari. (Jes. 30:21) Alani i, marsitutu do organisasina mangajarhon Hata ni Debata di huria dohot di ulaon marbarita. w20.10 20 ¶1-3