Maret

Tottu dang lomo rohatta molo sogo roha ni halak tu hita. Jala dang lomo rohatta dianiaya hita sappe mate. Alai boasa marlas ni roha hita nang pe dibahen halak na haccit tu hita? Adong tolu alasanna. Na parjolo, molo martahan hita manaon na haccit gabe tabahen ma las roha ni Debata. (1 Ptr. 4:13, 14) Na paduahon, lam togu ma hita ala nungnga taruji haporseaotta. (1 Ptr. 1:7) Na patoluhon, molo martahan hita dapotta ma hangoluan saleleng ni lelengna. (Rom 2:6, 7) Dang leleng dukkon dipahehe Jesus, diorai ma akka apostel marbarita na uli jala dipukkuli do nasida. Alai toktong do akka apostel i marlas ni roha. Boasa? “Ai didok roha ni nasida, na patut do nasida manaon na haccit alani goar ni Jesus i.” (Ul. 5:40-42) Saonari pe godang do akka donganta na setia nang pe manaon na haccit. Ala diboto nasida, dang lupa Jahowa tu kerja keras dohot holong na dipatudu nasida tu goarna. w21.03 24-25 ¶18-19

Dang mulai sian tubu sasahalak tarpillit lao mangolu tu surgo. Debata do na mangalehon harapan i tu nasida. Alani i dipikkiri nasida do harapanna i, ditangiakkon, jala berupaya do nasida mandapot i, nang pe dang boi dope dibayakkon nasida mardaging na songon dia nasida di surgo. (Plp. 3:20, 21; 1 Joh. 3:2) Alai sai tarpaima-ima do nasida boi rap mamaretta di Harajaon i. Las do roha ni biru-biru na asing paimahon ngolu na salelengna di tano on. Tarpaima-ima do nasida boi paubahon saluhut tano on gabe Paradeiso. Dung i boi ma nasida mambangun jabuna sandiri, mambahen ladang, jala gelleng ni nasida pe sempurna. (Jes. 65:21-23) Boi ma didalani saluhut tano on, mulai sian akka dolok sahat tu topi ni laut. Jala boi ma diparsiajari nasida akka toppaan ni Jahowa. Massai sonang do haduan ngolu ni nasida. Alai na paling mambahen nasida marlas ni roha, i ma parale-aleon na lam togu tu Jahowa. w21.01 18 ¶17-18

Dung diserang halak Babel luat i, gabe didok halak ma, “Halongonan do on na so marisi jolma manang pinahan, naung sahat tu tangan ni halak Kasdim.” (Jer. 32:43) Hira-hira 200 taon dung dipaboa si Joel surirang i, dipakke Jahowa ma muse si Jeremia lao paboahon taringot serangan i. Didok ibana, ro ma akka tentara i mangalului manang ise halak Israel na mangulahon na jahat, dung i ditakkup ma nasida sude. Didok Jahowa, ‘Ida ma, suruonku ma torop angka panjala lao manjala nasida. Dung i suruhononku ma torop parburu, angka na mamburu nasida sian saluhut dolok dohot sian saluhut robean dohot sian saluhut barungbung ni angka dolok batu. . . . Jolo balosonku do silompit dua hajahaton nasida dohot dosanasida.’ Lapatanna, tudia pe nasida lao, dang boi nasida malua sian serangan ni halak Babel i.—Jer. 16:16, 18. w20.04 5 ¶12-13

Tikki dilehon Jahowa tudu-tudu na massai rikkot tu si Lot, dang pittor hatop ibana mangihutton i. Olo do ra gabe tadok di rohatta, na so olo do si Lot on manangihon hata ni Jahowa. Alai marsitutu do Jahowa lao paluahon ibana. Ala ‘asi do roha ni Jahowa di ibana’, ditarik akka suru-suruan i ma tangan ni nasida sekeluarga, jala diboan ma nasida kaluar sian kota i. (1 Mus. 19:15, 16) Adong piga-piga alasan boasa Jahowa marasi ni roha tu si Lot. Ra, na mabiar do si Lot tu akka halak na adong di luar ni kota i. Adong do muse bahaya na asing. Ra, diboto si Lot do taringot dua raja na madabu tu lombang na marisi aspal, jala jonok do lombang i sian inganan i. (1 Mus. 14:8-12) Tottu mabiar do si Lot gabe susa annon istrina dohot boruna. Godang do arta ni si Lot. Ra, bagak do jabuna na di Sodom. (1 Mus. 13:5, 6) Memang dang boi sudena i gabe alasan ni si Lot asa dang mangoloi paretta ni Jahowa. Alai, dang holan hasalaan ni si Lot na diida Jahowa. Diida Ibana do si Lot “halak na mangulahon lomo ni rohana”.—2 Ptr. 2:7, 8. w20.04 18 ¶13-14

Adong do ra akka dongan na mananda hamu sian na gelleng sai manganggap hamu dakdanak dope. Jadi porlu do tikki asa boi disadari nasida nungnga lam dewasa be hamu. Pos ma rohamuna ditanda Jahowa do hamu. Diboto Ibana do aha na boi diulahon hamu, ala dang songon jolma cara ni Jahowa mangida hamu. (1 Sam. 16:7) Berupaya ma hamu torus akrab tu Jahowa, songon si Daud. Akrab do ibana tu Jahowa ala jotjot mamparrohahon akka toppaan. Gabe lam takkas ma ditanda si Daud Jahowa sian akka toppaan i. (Ps. 8:3, 4; 139:14; Rom 1:20) Asing ni i, boi do muse lam akrab hamu tu Jahowa molo diida hamu dialusi Jahowa tangiangmuna. Misalna, tikki direhei di sikkola ala Saksi Jahowa hamu, martangiang ma hamu asa diurupi Jahowa. Dung i ihutton ma akka petunjuk sian Bibel dohot akka saran na adong di publikasi dohot di videotta. Molo diida hamu diurupi Jahowa hamu tikki adong tantangan, gabe lam pos ma rohamuna tu Ibana. Asing ni i, molo diida akka dongan diandalhon hamu Jahowa gabe porsea ma nasida na boi do hamu martanggung jawab. w21.03 4 ¶7

Molo marale-ale hita tu sasahalak, tottu las do rohatta paboahon sude pakkilalaatta tu ibana. Ibana pe songon i do. Songon i ma parale-aleotta tu Jahowa. Marhite Bibel, dipaboa Jahowa do pikkiran dohot pakkilalaanna tu hita. Jala hita pe boi do makkatai tu Ibana marhite tangiang. Boi do tapaboa sude pakkilalaatta. Lomo do tong rohana mangalusi tangiangta. Adong do tangiang na hatop dialusi. Alai olo do sipata dang pittor dialusi Jahowa tangiangta. Jadi ikkon toktong do tatangiakkon i. Pos ma rohatta, alusan ni Jahowa do tangiangta di tikki na pas jala marhite cara na dumenggan. Olo do ra dialusi Jahowa tangiangta marhite cara na so hea tabayakkon. Misalna, olo do dang disalpuhon Jahowa hasusaan na taadopi. Alai dilehon Ibana do tu hita bisuk dohot gogo asa sabar hita manaon i. (1 Kor. 10:13) Songon dia hita patuduhon pangargaion ala boi martangiang? Sada cara, i ma mangoloi paretta ni Jahowa asa “sai martangiang”.—1 Tes. 5:17. w20.05 27-28 ¶7-8

Sahalak pelari ikkon toktong do mangida dalan na di jolona asa unang tartuktuk. Molo madabu pe, pittor hehe do ibana, jala marlojong muse. Dang sai dipikkiri ibana aha na mambahen ibana madabu, alai toktong do ibana mamikkirhon garis finis, dohot hadiah na lao dapotna. Di parngoluon on, olo do piga-piga hali hita madabu alani pakkataion manang parniulaotta. Manang, adong do ra dongan sahaporseaotta na mambahen haccit rohatta. Dang pola songgot rohatta disi. Jolma na so sempurna do hita sude, jala rap do hita mardalan di dalan na soppit i. Jadi sipata olo do gabe “marsitomboman” hita di dalan i. Manang, hita pe olo do mambahen haccit roha ni halak. (Kol. 3:13) Molo madabu pe, pittor hehe ma hita, jala toktong marlojong. Molo sai jut dope rohatta jala dang olo hehe, gabe dang sahat be hita tu garis finis jala dang dapotta be hadiah i. Asing ni i, unang ma gabe hita na mambahen akka dongan gabe madabu. w20.04 26 ¶1; 28 ¶8-9

Di surirang ni si Daniel on, digombarhon do adong sada patung na balga. Dibahen do i sian marragam jenis logam. Ganup bagian i manggombarhon akka pamarettaon na hea mangarajai luat na diingani akka naposo ni Debata. Ganup pamarettaon i dang mamaretta di tikki na sarupa. Pat ni patung i, dibahen sian bosi dohot tano liat. On manggombarhon pamarettaon Inggris-Amerika. On patuduhon toktong do marhuaso nasida tikki ro Harajaon ni Debata. Apostel Johannes pe hea do manggombarhon taringot kuasa dunia na mangarajai luat na diingani naposo ni Debata. Digombarhon do nasida songon binatang buas na pitu uluna. Ulu na papituhon manggombarhon kuasa dunia Inggris-Amerika. Rikkot do taboto on, alana dang adong ulu na tamba asing ni na pitu ulu i. Jadi, toktong dope ulu na papituhon i na mamaretta di tikki ro Jesus Kristus dohot pasukanna lao mangaripasson ibana dohot binatang buas i.—Pgk. 13:1, 2; 17:13, 14. w20.05 14 ¶11-12

Hata on paingotton hita, Debata do mual ni hangoluan dohot holong. Holong ni Debata boi mambahen hita merasa aman jala marlas ni roha. Adong do paretta na ikkon diulahon halak Kristen jala dang pilihan i. (Mat. 22:37-40) Ala parholong do Jahowa gabe ummura do di hita mangulahon paretta na parjolo. Alana sempurna do Jahowa, burju, jala parduli tu hita. Alai ummaol do mangulahon paretta na paduahon. Boasa? Ala dang sempurna donganta sahaporseaon. Olo do sipata nasida mambahen haccit rohatta. Diboto Jahowa do sipata maol mangulahon paretta na paduahon on. Alani i do dipakke Ibana piga-piga halak manuratton di Bibel, boasa ikkon tapatudu holong jala songon dia cara patuduhon i. Misalna dipakke Jahowa ma Apostel Johannes manurat taringot i.—1 Joh. 3:11, 12. w21.01 8 ¶1-2

Manang sadia leleng pe hita nungnga manomba Jahowa, atik na baru dope manang nungnga martaon-taon, porlu do tarimangi, ‘Hujaga do rohakku asa unang tarbagi dibahen Sibolis?’ Misalna, molo diida hamu gambar di TV manang Internet na boi mambahen hamu marpikkiran na rorang, aha do ulahononmuna? Olo do ra didok rohamu, dang pornografi i. Alai boi i dipakke Sibolis lao mambahen tarbagi rohamuna. Boi do akka gambar i dipatudos songon kampak na dipakke sasahalak lao mambola hau na balga. Di mulana, diattukkon ibana do kampak i tu hau. Memang dang pittor tarbola hau i. Alai lam leleng, molo lam bagas diattukkon kampak i, gabe tarbola ma hau i. Suang songon i ma gambar i, di mulana tahilala dang pola berbahaya i. Alai lam leleng, boi do i mambahen sasahalak gabe mangulahon dosa na balga. Alani i, pasiding hamu ma manang aha pe na boi mambahen tarbagi rohamuna! Toktong ma hamu makkabiari goar ni Jahowa! w20.06 11 ¶14-15

Ikkon torus do taurupi akka dongan na so aktif. Songon anak na mago na dipaboa di tudosan ni Jesus, ra nungnga leleng haccit roha ni akka donganta on, jala dang boi pittor malum i. (Luk. 15:17-24) Asing ni i, ala unggodang tikki na dipakke nasida tu ulaon ni portibi on, gabe dang togu be parale-aleonna tu Jahowa songon najolo. Jadi, ikkon taurupi do nasida asa padenggatton parale-aleonna tu Jahowa. Di tudosan taringot biru-biru na mago, dipaboa Jesus do aha na diulahon parmahan na burju i. Dung dapotna biru-biru na mago i, dibahen ma i tu abarana jala diboan mulak tu handang. Tottu, nungnga godang tikki dohot gogona dipakke lao mangalului biru-biru i. Alai diboto ibana, ala gale dope biru-biru i, dioppa ibana ma biru-biru i jala boanonna muse mulak tu handang. (Luk. 15:4, 5) Memang, porlu do godang tikki dohot gogo lao mangurupi akka donganta na so aktif. Alai dilehon Jahowa do tu hita tondi parbadiana, Bibel dohot akka publikasi. Jadi, molo dipangido akka sintua hamu lao manguluhon parsiajaran Bibel dohot donganta na so aktif, las do rohamuna mangulahon i? w20.06 28 ¶14-15

Ikkon tapatudu do holong, alana i do tanda ni halak Kristen. Alai porlu do muse tadapot ‘parbinotoan dohot pangattusion na bagas’. (Plp. 1:9) Molo dang taulahon i, boi do gabe taihutton “ajaran ni angka halak na manipu marhite mangoto-otoi”, tarmasuk ma halak na murtad. (Eps. 4:14) Nang pe godang akka sisean di abad na parjolo na so olo be mangihutton Jesus, alai toktong do Apostel Petrus setia. Pos do rohana, “hata hangoluan na saleleng ni lelengna” do sude na diajarhon Jesus. (Joh. 6:67, 68) Nang pe dang diattusi si Petrus sude na dihatahon Jesus, alai toktong do ibana setia. Jadi hamu pe, boi do dipatogu hamu haporseaonmuna tu akka na diajarhon Bibel. Hasilna, gabe togu ma haporseaonmuna manang aha pe na masa. Jala boi ma diurupi hamu halak na asing lao patoguhon haporseaon ni nasida.—2 Joh. 1, 2. w20.07 8 ¶2; 13 ¶18

Molo tapatudu asi ni roha tu akka dongan, na taurupi do nasida asa toktong di hasittongan. (1 Joh. 3:10, 11, 16, 17) Ikkon masihaholongan do hita, dang holan tikki denggan situasina, alai dohot do tikki adong hasusaan. Contohna, adong do ra dongan na porlu diapuli manang diurupi ala mate halak na dihaholongi ibana. Manang, adong do ra akka dongan na habis artana alani bencana alam jala porlu diurupi pajongjokkon jabu manang Bale Harajaon ni nasida. Molo holong rohatta jala marasi ni roha hita tu akka dongan, tarida do i dang holan sian hata, alai dohot do sian parniulaotta. Na tatiru do Jahowa molo masihaholongan hita dohot akka dongan. (1 Joh. 4:7, 8) Sada cara hita patuduhon holong, i ma rade manalpuhon hasalaan ni akka donganta. Contohna, adong do ra sahalak dongan na mambahen haccit rohamu alai ujungna mangakku sala. Rade ma hita manalpuhon hasalaanna jala unang be taingot-ingot.—Kol. 3:13. w20.07 24 ¶14-15

Adong do annon guru studi ni ganup halak songon caratta manguluhon parsiajaran Bibel saonari? Adong do annon dibahen akka huria songon saonari? Ikkon margabung do akka halak naung dipahehe i tu sada huria naung ditottuhon? Adong do annon na mangalatik nasida carana mangajari halak naung dipahehe dukkon nasida? Tapaima ma aha na lao masa. Alai na pasti, di ujung ni pamarettaon saribu taon, ‘gok do parbinotoan taringot Jahowa di tano on’. (Jes. 11:9) Pasti las do rohatta mangulahon i saleleng pamarettaon saribu taon! Sude naposo ni Jahowa ikkon torus do mambahen hamubaon asa boi pasonakkon roha ni Jahowa. Jadi ikkon dipatudu nasida do roha sapakkilalaan asa boi mangurupi akka halak naung dipahehe pasidikkon pikkiran na sala jala mangihutton paretta ni Jahowa. (1 Ptr. 3:8) Hasilna gabe taronjar ma roha ni akka halak na dipahehe i lao manomba Jahowa, ala diida nasida serep do roha ni naposo ni Jahowa jala ‘marsitutu asa malua’.—Plp. 2:12. w20.08 16 ¶6-7

Molo taihutton poda ni Apostel Paulus, gabe boi ma taida kemampuan na adong di hita na so adong di halak na asing. Misalna, adong do ra sahalak sintua na so pola malo marjamita, alai malo do ibana marbarita. Manang dang pola malo ibana mangatur tikki, alai burju do ibana jala lambok. Lomo do roha ni akka dongan jonok tu ibana jala mangido poda ni Bibel sian ibana. Manang rade do ibana manamue. (Heb. 13:2, 16) Molo diboto hamu adong do kemampuanmuna na so adong di halak na asing, gabe pos ma rohamu marguna do hamu di huria. Jala dang mangiburu be hamu tu akka dongan na kemampuanna dang sarupa songon hamu. Manang aha pe tugasta di huria, ikkon lam denggan do hita sude mangulahon tugasta i. w20.08 23-24 ¶16-18

Sada jamita na marjudul “Punguan Bolon”, dipasahat si J. F. Rutherford di kebaktian di Washington, D.C., Amerika Serikat taon 1935. Dipaboa ibana ma ise do “punguan bolon” na dipaboa di Pangungkapon 7:9. Najolo na diattusi Parsiajar Bibel, dohot do punguan on tu surgo alai dang dohot nasida mamaretta rap dohot Jesus. Alana hurang togu do haporseaon ni nasida. Alai dipatorang si Rutherford ma sian Bibel, molo punguan bolon i dang dipillit lao mangolu di surgo. Nasida ma na didok Jesus biru-biru na asing na malua sian hasusaan bolon jala mangolu salelengna di tano on. (Pgk. 7:14) Didok Jesus, “Adong dope biru-birukku na asing na so sian handang on jala ikkon dohot do akka i boanokku. Tangihonon ni nasida ma soarakku, gabe sada punguan ma nasida jala sada parmahan.” (Joh. 10:16) Nasida ma akka naposo ni Jahowa na setia na naeng mangolu salelengna di tano on.—Mat. 25:31-33, 46. w21.01 14 ¶1-2

Porlu do tarajai diritta asa boi pasaehon ulaonta. (Mat. 28:19, 20) Somalna lomo do rohatta makkarejohon ulaon na mura diulahon. Alai sipata ulaon na rikkot do na maol diulahon. Jadi ikkon talatik do diritta mangulahon ulaon na maol di hita. Urupan ni Jahowa do hita marhite tondi parbadiana. (Gal. 5:22, 23) Boi do dirajai Apostel Paulus dirina. Alai didok ibana ikkon tong do ‘dilissingi’ ibana dirina asa boi mangulahon na sittong. (1 Kor. 9:25-27) Jala dijujui ibana do na asing asa boi mangarajai diri. Didok ibana do, “ingkon denggan do sude mardalan jala taratur” tikki mangulahon ulaon ni nasida. (1 Kor. 14:40) Jadi, ikkon marsitutu do hita mangulahon ulaon panombaonta tu Jahowa, termasuk ma i taratur marbarita dohot mangajari.—Ul. 2:46. w20.09 6-7 ¶15-17

Di godangan negara, bebas do hita marbarita na uli. Boha molo di negaramuna? Molo bebas do hita marbarita tasukkun ma diritta, ‘Songon dia do au mamakke kebebasan on?’ Di ari parpudi on, lam semangat do naposo ni Debata marbarita dohot mangajari, ala on do ulaon na umbalga na hea diulahon di tano on. Aha do na boi diulahon hamu di tikki masa hadameon on? (2 Tim. 4:2) Boi do hamu dohot keluargamuna mangalehon gumodang tikki dohot gogo di ulaon marbarita? Misalna, boi do hamu merintis? Dang tikkina be saonari papunguhon arta, alana dang boi i paluahon hita tikki masa haporsuhon bolon. (Poda 11:4; Mat. 6:31-33; 1 Joh. 2:15-17) Godang do parbarita na marsiajar bahasa na baru asa boi nasida mangurupi godang halak marsiajar taringot Jahowa. Diparade organisasi do publikasi di godang bahasa, lao mangurupi nasida marbarita di lobi sian 1.000 bahasa! w20.09 16 ¶9-11

Setia do sahalak tentara na burju. Marsitutu do sahalak tentara manjaga na arga di ibana dohot manjaga halak na dihaholongi ibana. Dijujui si Paulus do si Timoteus asa marsitutu mangoloi paretta ni Debata. I do buktina na setia ibana tu Debata. (1 Tim. 4:7) Molo setia hita tu Debata jala taoloi parettana, gabe boi ma toktong tajaga hasittongan i. (1 Tim. 4:8-10; 6:6) Ikkon sering do marlatik sahalak tentara, asa rade ibana marporang. Suang songon i ma, ikkon dilatik si Timoteus do dirina asa toktong togu parale-aleonna tu Jahowa. Diihutton ibana do poda ni si Paulus. Marsitutu do ibana mangalo keinginan na sala, toktong do dipatudu ibana parange na denggan, jala marsaor do ibana dohot akka dongan sahaporseaonna. (2 Tim. 2:22) Jadi hita pe, ikkon talatik do diritta asa boi taalo keinginan na sala. (Rom 7:21-25) Porlu do hita muse mangalatik diri asa boi tatanggalhon pangalaho na leleng jala mamakke pangalaho na imbaru. (Eps. 4:22, 24) Ikkon talatik do muse diritta asa toktong marpungu nang pe nungnga loja hita karejo di bagasan sadari.—Heb. 10:24, 25. w20.09 28 ¶9-11

Porlu do hita sabar mangurupi parsiajar Bibelta asa boi mangalehon diri jala tardidi. Alai porlu do tong taboto na olo do ibana manomba Jahowa manang na dang. Dibahen ibana do upaya lao mangihutton paretta ni Jesus? Manang na holan marsiajar Bibel sambing do ibana? Porlu do torus taida hamajuon na dibahen parsiajar Bibelta. Misalna, dipaboa ibana do songon dia pakkilalaanna tu Jahowa? Martangiang do ibana tu Jahowa? (Ps. 116:1, 2) Lomo do rohana manjaha Bibel? (Ps. 119:97) Taratur do ibana ro tu parpunguan? (Ps. 22:22) Dibahen ibana do hamubaon di ngoluna? Dipaboa ibana do aha na diparsiajarina tu keluarga dohot tu akka donganna? (Ps. 9:1) Jala na uppetting, olo do ibana gabe sahalak Sitindangi Ni Jahowa? (Ps. 40:8) Molo dang dibahen parsiajar Bibelmuna hamajuon sisongon i, porlu do diboto hamu alasanna, jala terus terang ma hamu makkatai tu ibana taringot i. w20.10 18 ¶14-15

Dibahen Jahowa do keputusan na denggan tu Jesus. Jala si Josep dohot si Maria pe mambahen keputusan na marbisuk tu ibana. Alai dung magodang Jesus, ibana sandiri do na ikkon mambahen keputusan tu dirina. (Gal. 6:5) Dos songon hita, dilehon do tu Jesus kebebasan lao mamillit. Boi do dipillit ibana lao makkarikkotton diri sandiri. Alai mangulahon lomo ni roha ni Debata do na dipillit ibana. Tikki diboto Jesus aha na dihalomohon Jahowa sian ibana, olo do ibana mangulahon i. (Joh. 6:38) Pasti diboto Jesus, godang do halak na lao marsogo ni roha tu ibana. Alai nang pe dang lomo rohana masa i, toktong do dioloi ibana Jahowa. Tikki tardidi Jesus taon 29 M dipatudu ibana ma na rikkot di ngoluna, i ma mangulahon lomo ni roha ni Jahowa. (Heb. 10:5-7) Nang pe naeng mate nama ibana di hau partinaonan, toktong do diulahon ibana lomo ni roha ni Amana.—Joh. 19:30. w20.10 29 ¶12; 30 ¶15

Adong do diboto hamu akka dongan di huria na marsitaonon alani sahit, manang alani situasi na maol? Manang adong do akka dongan na marhabot ni roha ala mate halak na dihaholongi ibana? Molo adong akka dongan na mangadopi sisongon i tapangido ma tu Jahowa, asa diurupi hita patuduhon holongta tu nasida marhite pakkataion dohot parniulaon. Pakkataion dohot parniulaotta i boi do patoguhon akka donganta. (1 Ptr. 4:10) Boi do hita gabe togu ala didongani Jahowa do hita. Diurupi ibana do hita marhite Jesus dohot akka suru-suruan. Jala boi do diurupi Jahowa hita marhite akka halak na marhuaso lao mangulahon lomo ni rohana. Jala songon na tahilala, dipakke Jahowa do tondi parbadiana asa taronjar roha ni akka dongan lao mangurupi hita. Jadi songon Apostel Paulus, gabe pos ma rohatta mandok, “Jahowa do pangurupi di ahu, ndang mabiar ahu. Aha ma na boi bahenon ni jolma tu ahu?”—Heb. 13:6. w20.11 17 ¶19-20

Pos do roha ni akka apostel na didongani Jahowa do nasida di tikki i ala boi do dibahen nasida mukjizat. (Ul. 5:12-16; 6:8) Alai anggo saonari dang masa be mukjizat. Nang pe songon i pos do rohatta na dihaholongi Jahowa hita. Alana disurat do di Bibel molo toktong hita setia tikki dianiaya, sai urupanna do hita marhite tondi parbadiana. (1 Ptr. 3:14; 4:14) Jadi unang pola marsak hita mamikkiri penganiayaan na so masa dope. Tumagon ma hita fokus patoguhon haporseaotta tu Jahowa. Porsea ma hita tu janji ni Jesus na mandok, “Lehonokku ma bisuk tu hamu jala urupanku do hamu mamboto aha na lao dohononmuna. Jala musumuna pe dang tolap mangalusi manang aha.” Didok Jesus do muse, “Molo toktong hamu setia jala martahan, mangolu ma hamu.” (Luk. 21:12-19) Molo tung pe mate hita ala setia tu Ibana, diingot Jahowa do sude naung taulahon lao manomba Ibana. Jadi pasti paheheonna do hita. w21.01 4 ¶12

Dang holan Apostel Paulus na hea paboahon taringot haheheon. Si Job pe hea do paboahon taringot i. Pos do roha ni si Job, na diingot Debata do ibana jala paheheonna. (Job 14:7-10, 12-15) Ajaran taringot tu “haheheon ni halak na mate” termasuk ma i “ajaran na parjolo” na dihaporseai halak Kristen. (Heb. 6:1, 2) Haheheon i ma na diulas si Paulus di 1 Korint 15. Na disurat ni si Paulus i boi patoguhon halak Kristen di abad na parjolo. Jala boi do tong paposson rohatta na lao masa do haheheon i. Ikkon porsea do hita tu haheheon ni Jesus, asa pos rohatta na boi do mulak mangolu halak na tahaholongi naung mate. Haheheon ni Jesus on ma barita na uli na dibahas si Paulus tu halak Korint. (1 Kor. 15:1, 2) Sasittongna molo so porsea halak Kristen tu haheheon ni Jesus, sia-sia ma haporseaonna tu Debata.—1 Kor. 15:17. w20.12 2 ¶2-4

Aha do na mangurupi Apostel Petrus? Diingot ibana do tikki ditangiakkon Jesus ibana asa unang mago haporseaonna. Ditangihon Jahowa do tangiang ni Jesus i. Alana di pudian ni ari, dijuppangi Jesus do si Petrus lao patoguhon ibana. (Luk. 22:32; 24:33, 34; 1 Kor. 15:5) Tikki manjala dekke akka siseanna di sada borngin, ro ma Jesus manjuppangi nasida. Di tikki i ma dipatogu Jesus si Petrus. Gabe adong ma kesempatan ni si Petrus lao patuduhon holongna tu Jesus. Nungnga disalpuhon Jesus be hasalaan ni si Petrus jala dilehon do tu ibana tugas. (Joh. 21:15-17) Asi ni roha ni Jesus tu si Petrus manggombarhon asi ni roha ni Debata. Jadi molo taulahon na sala, unang ma didok rohatta, dang na lao sesaon ni Jahowa dosatta. Ai las do roha ni Sibolis molo songon i pakkilalaatta. Taingot ma, massai holong do roha ni Jahowa tu hita. Jala diboto Ibana do na jotjot hita sala. Alani i ma rade Ibana manalpuhon hasalaatta. Hita pe molo adong dongan na mambahen haccit rohatta, tatiru ma Jahowa.—Ps. 103:13, 14. w20.12 20-21 ¶17-19

Adong do na disurat di Bibel pengalaman ni akka halak na gabe busisaon ala dang torus mangasahon Jahowa. Porlu do hita marsiajar sian nasida asa unang taulahon hasalaan na sarupa. Mangasahon Jahowa do si Asa tikki pasaehon sada masalah. Alai di pudian ni ari mangasahon dirina sandiri do ibana. (2 Kron. 16:1-3, 12) Memang hira na masuk akkal do idaon keputusan ni si Asa manggaji halak Siria lao mangurupi ibana. Alai hasilna holan satokkin do dame ngolu ni halak Juda. Marhite panurirangna didok Jahowa ma tu si Asa, “Sasittongna boi hian do ditaluhon ho tentara ni Siria, hape gabe dipalua ho do nasida. Ai gabe raja ni Siria do na dipangasahon ho, dang Jahowa Debatam.” (2 Kron. 16:7) Alani i, ikkon manat do hita unang sappe didok rohatta boi do tapasae sandiri masalahta. Gabe dang taasahon be Jahowa jala dang talului be akka prinsip ni Bibel lao pasaehon i. Molo tung pe ikkon hatop hita mambahen keputusan, torus ma taasahon Jahowa asa marhasil hita. w21.01 6 ¶13-15

Adong do naposo ni Jahowa na kelaparan, ala susa di parhepengon manang alani porang. Na asing dipenjarahon alani haporseaon ni nasida. Alai diboto nasida do, dapotna do haduan gok sipanganon jala boi ma nasida toktong marale-ale tu Jahowa molo dung dihancurhon portibi na jahat on. Asing ni i muse, tikki diusehon Jahowa rimasna lao manghancurhon portibi ni Sibolis on, linggomanna do akka naposona. Dung salpu hasusaan bolon, togu-toguon ni Jesus do nasida tu “aek hangoluan” asa boi mangolu saleleng ni lelengna. (Pgk. 7:17) Jadi istimewa do harapan ni punguan bolon na malua i. Alana, sian marmilliar halak na hea mangolu, nasida ma na so hea mate. (Joh. 11:26) Pasti mandok mauliate do biru-biru na asing tu Jahowa dohot tu Jesus, ala dilehon do tu nasida harapan na istimewa. w21.01 16-17 ¶11-12

Di borngin andorang so mate Jesus, dipikkiri ibana do tantangan na lao diadopi akka siseanna. Diboto Jesus do molo dung nakkok ibana tu surgo, diporangi Sibolis do akka siseanna i. Alani i, martangiang ma Jesus tu Jahowa asa ‘dijaga nasida sian Sibolis’. (Joh. 17:14, 15) Jadi pasti jagaon ni Jahowa do akka naposona. Dung diusir Sibolis sian surgo tu portibi on, massai “muruk situtu” do ibana. (Pgk. 12:12) I do alana porlu hian hita dijaga Jahowa saonari. Dibahen Sibolis do, asa porsea halak molo dianiaya sisomba Jahowa, na “marhobas tu Debata” do i. (Joh. 16:2) Adong do muse na menganiaya hita ala dang taihutton standar ni portibi on. Nang pe songon i, unang pola mabiar hita. Boasa? Alusna adong di ayat sadari on. w21.03 26 ¶1, 3

Sude na diulahon Jahowa alani holong do. Alani holongna, diparade Ibana do tobusan lao paluahon hita. Songon i do tong Jesus, massai balga do holongna tu hita. Dilehon do ngoluna humokkop hita. (Joh. 3:16; 15:13) Dang adong na boi manirang holong ni Jahowa dohot Jesus sian akka halak na setia tu nasida. (Joh. 13:1; Rom 8:35) Suang songon i ma, sude na diulahon kepala keluarga alani holong ma nian. Boasa songon i? Didok Apostel Johannes, “Molo dang dihaholongi sasahalak donganna [manang keluargana] na niidana, dang boi ibana makkaholongi Debata na so niidana.” (1 Joh. 4:11, 20) Molo holong do roha ni kepala keluarga tu istri dohot gellengna, ikkon tiruonna do Jahowa dohot Jesus. Diurupi ibana ma keluargana asa marale-ale tu Jahowa, diparade sude kebutuhan ni nasida, jala dipastihon keluargana merasa aman jala marlas ni roha. (1 Tim. 5:8) Dung i, ikkon dilatik ibana do gellengna. Jala tikki mambahen keputusan ibana, ikkon pastihononna do keputusanna i pasangappon Jahowa jala sesuai tu kebutuhan ni keluargana. w21.02 5 ¶12-13

Pos do roha ni nasida diboto Jahowa Debata parholong do aha na mambahen halak i sappe marpikkiran negatif tu dirina sandiri. Gariada diida Jahowa do akka parangetta na denggan na so tasadari dope. (1 Joh. 3:19, 20) Sasahalak na berjuang asa unang mangulahon hasomalan na roa, boi do marmetmet ni roha molo gagal ibana. Memang wajar do molo metmet rohatta tikki taulahon na sala. (2 Kor. 7:10) Alai dang denggan molo sai tauhumi diritta jala tadok, ‘Dang na boi huulahon na denggan. Dang sesaon ni Jahowa be ra dosakki.’ Berbahaya do pikkiran sisongon i, ala boi do i mambahen hita dang manomba Jahowa be. Tapasae ma parsoalatta dohot Jahowa. Martangiang ma hita tu Ibana jala tapangido ma asi ni rohana asa disesa dosatta. (Jes. 1:18) Molo diida Jahowa hita manolsoli jala tabahen sian nasa gogotta lao muba, pasti salpuhonna do hasalaatta i. Dung i, juppangi hamu ma akka sintua. Boi do urupanna hamu asa togu muse.—Jak. 5:14, 15. w20.12 23 ¶5-6

Diargai Jesus do akka borua. Beda hian do Jesus tu halak Parise. Molo halak Parise direndahkan do akka borua jala dang olo makkatai tu borua di jolo ni godang halak. Jala tikki marsiajar Surat na Badia dang olo nasida rappak marsiajar dohot borua. Alai molo Jesus dang songon i. Tikki mangajarhon Surat na Badia ditogihon ibana do asa dohot akka borua. (Luk. 10:38, 39, 42) Gariada diloas do akka borua mandongani ibana marbarita na uli. (Luk. 8:1-3) Asing ni i, akka borua do ditugasson Jesus paboahon naung hehe ibana tu siseanna. (Joh. 20:16-18) Dipaingot si Paulus do asa diargai si Timoteus akka borua ala diboto ibana do molo na parjolo mangurupi si Timoteus mananda “surat na badia”, i ma omak dohot oppung boruna. (2 Tim. 1:5; 3:14, 15) Tikki mangirim surat ibana tu huria na di Rom, dipasahat si Paulus do tong tabena tu akka borua jala didok do goar ni nasida sada-sada. Takkas do dipaboa si Paulus di suratna i na diargai ibana do kerja keras ni nasida di huria.—Rom 16:1-4, 6, 12; Plp. 4:3. w21.02 15 ¶5-6