Juni

Ikkon parduli do sahalak guru tu parsiajar Bibelna. Anggap ma nasida songon dongan sahaporseaonmuna. Taboto do pasti dang mura di nasida maninggalhon donganna hian, jala mambahen hamubaon asa boi manomba Jahowa. Porlu do taurupi parsiajar Bibelta mananda akka dongan di huria. Molo nga marsaor ibana tu akka dongan di huria, boi ma akka dongan mangurupi parsiajar Bibelta i lam jonok tu Jahowa, jala patoguhon ibana tikki adong masalah. Dung lomo rohana marsaor dohot akka dongan di huria, taronjar ma rohana gabe bagian sian huria i. Ujungna gabe lam mura ma ibana pasohon parale-aleonna tu akka halak na so sisomba Jahowa. (Poda 13:20) Molo dang olo be akka donganna hian marsaor dohot ibana, boi ma dapotna dongan na burju di organisasi ni Jahowa.—Mrk. 10:29, 30; 1 Ptr. 4:4. w20.10 17 ¶10-11

Ikkon marale-ale do hita tu Jesus asa boi marale-ale tu Jahowa. Boasa songon i? Adong dua alasan. Na parjolo, didok Jesus do tu akka siseanna, “Ai holong do roha ni Ama i tu hamu, ala holong do rohamuna tu ahu.” (Joh. 16:27) Jala didok ibana do, “Ndang adong na boi ro tu Ama i molo so marhite ahu.” (Joh. 14:6) Molo naeng marale-ale hita tu Jahowa alai dang olo hita marale-ale tu Jesus, dos do hita songon naeng masuk tu sada bangunan alai dang sian pintuna. I do tong na didok Jesus tikki dipatudos ibana dirina songon “pintu ni biru-biru i”. (Joh. 10:7) Alasan na paduahon, ala Jesus do na takkas maniru parange ni Amana. Didok ibana do tu akka siseanna, “Manang ise na mangida ahu, nunga diida ibana Ama i.” (Joh. 14:9) Jadi asa boi tatanda Jahowa, ikkon taparsiajari do taringot Jesus. Lam godang na taboto taringot Jesus, lam holong ma rohatta tu ibana. Jala, lam togu parale-aleotta tu Jesus, gabe lam balga ma holongta tu Amana. w20.04 21-22 ¶5-6

Adong do sian hamu na holan boi hundul di kursi roda manang holan peak di podoman? Adong do na susa mardalan manang dang denggan be marnida? Molo songon i do situasimuna, boi do hamu toktong marlojong rap dohot akka na poso jala na gogo dope! Godang do akka donganta na matua dohot na gale na toktong marlojong. Ikkon diasahon nasida do gogo sian Jahowa, marhite manangihon akka parpunguan sian telepon, manang manonton parpunguan sian video. Marbarita do akka donganta on tu akka dokter, perawat, manang keluarga ni nasida. Nang pe dang godang be na boi diulahon hamu tu Jahowa, unang ma gabe metmet rohamuna. Ingot ma, dihaholongi Jahowa do hamu. Toktong ma asahon pangurupion ni Jahowa. Dang na tadikkononna hamu. (Ps. 9:10) Gariada, gabe lam jonok ma Ibana tu hamu. w20.04 29-30 ¶16-17

Aha do na boi diulas hamu dohot halak na taat maragama? Lului ma aha do na sarupa sian Bibel tu ajaran na dihaporseai nasida. Ra, porsea do ibana holan sada do Debata na sittong. Porsea do ibana molo Jesus i sipalua saluhut jolma. Manang porsea do ibana tokkin nai lao diripasson nama akka parjahat. Sian akka ajaran i, boi ma dipasahat hamu barita sian Bibel asa menarik i di nasida. Nang pe nungnga diboto hamu aha agamana, porlu do muse diboto hamu aha do sasittongna na dihaporseai ibana. Alana, dang sude halak na maragama porsea tu sude na diajarhon agama ni nasida. Sahalak misionaris mangida molo piga-piga halak porsea tu ajaran Debata Sitolusada, alai sasittongna dang pos roha ni nasida molo, Ama, Anak dohot tondi parbadia i sada. Didok ibana, “Molo taboto sude taringot i, gabe ummura ma hita mangalului topik na pas tu nasida.” Jadi lului ma aha do na sasittongna dihaporseai halak. Songon Apostel Paulus, boi ma hamu ‘mambahen sian nasa gogo lao mangurupi sude halak’.—1 Kor. 9:19-22. w20.04 10 ¶9-10

Didok si Daniel dohot si Johannes, sai dijaga Jahowa dohot Jesus do akka naposona tikki hasusaan bolon. On boi mambahen dame rohatta lao mangadopi manang aha pe na masa di ari na naeng ro. Didok si Daniel akka halak na dipalua sian hasusaan bolon i, i ma akka halak na tarsurat goarna di bukku hangoluan. Jadi songon dia do asa boi disurat goarta di bukku i? Ikkon tapatudu do na porsea hita tu Jesus, Biru-Biru ni Debata. (Joh. 1:29) Ikkon tardidi do hita, alana i patuduhon nungnga talehon diritta tu Debata. (1 Ptr. 3:21) Ikkon tadukung do Harajaon ni Debata, carana marsitutu ma hita mangurupi akka halak asa mananda Jahowa. Saonari ma tikkina hita ikkon patoguhon haporseaotta tu Jahowa jala marpos ni roha tu organisasina. Saonari ma tikkina hita ikkon mendukung Harajaon ni Debata. Molo taulahon i, gabe dipalua ma hita tikki ro Harajaon i lao mangaripasson raja utara dohot raja selatan. w20.05 16 ¶18-19

Diboto si Adam dohot si Hawa do molo goar ni Debata, i ma Jahowa. Jala diboto nasida Jahowa do na manoppa nasida. Dilehon Jahowa do hangoluan dohot inganan na massai uli, jala dipasu-pasu Jahowa do parsaripeon ni nasida. (1 Mus. 1:26-28; 2:18) Alai toktong do dirimangi nasida sude naung dilehon Jahowa i? Boi do taboto alusna sian aha na diulahon nasida tikki diela-ela musu ni Debata. Marhite ulok, disukkun Sibolis do si Hawa: “Tongon do didok Debata, na so jadi panganonmuna sian saluhut hau angka na di porlak on?” (1 Mus. 2:16, 17; 3:1) Sian sukkun-sukkun i, tarida do na margabus Sibolis taringot Debata. Sasittongna, holan sada do parbue ni hau na diparettahon Jahowa asa unang diallang nasida. (1 Mus. 2:9) Alai dibahen Sibolis ma sukkun-sukkun asa dirippu si Hawa dang tutu Jahowa i Debata na burju. Gabe sukkun-sukkun do ra roha ni si Hawa, ‘Ai adong do hape akka na denggan na so dilehon Jahowa tu au?’ w20.06 3-4 ¶8-9

Adong piga-piga donganta na so aktif, ala haccit rohana dibahen dongan na asing. Didok Apostel Paulus, sipata olo do gabe haccit rohatta dibahen akka dongan. Manang olo do tahilala dang adil keputusan na dibahen tu hita. Molo torus muruk hita, boi do i mambahen hita lam dao sian akka dongan. Ida ma pengalaman ni si Pablo di Amerika Selatan. Didok akka dongan mangulahon dosa do ibana. Porsea do akka sintua tu nasida. Gabe dicabut ma tanggung jawab ni si Pablo di huria. Aha do didok ibana? “Muruk ma au, ujungna gabe mandao ma au sian huria.” Adong muse donganta na sai targanggu panggora ni rohana ala hea mangulahon dosa di tikki najolo. Nang pe nungnga marhamubaon jala nungnga disalpuhon Jahowa dosana, sai didok rohana dang tama ibana gabe naposo ni Debata. Boha do perasaanmuna mangida akka dongan na mangadopi situasi sisongon i? w20.06 19 ¶6-7

Ikkon taboto do situasi na boi parohon jea tu hita jala ikkon tapasiding do i. (Heb. 5:14) Misalna, taringot rekreasi dohot hiburan. Jotjot do acara TV dohot film patuduhon pangalaho na rorang. Sogo do roha ni Jahowa molo taida hiburan sisongon i. (Eps. 5:5, 6) Ikkon tapakke do pangattusionta lao mamboto bahaya ni ajaran ni halak na murtad. (1 Tim. 4:1, 7; 2 Tim. 2:16) Misalna, dibahen nasida do informasi na so sittong taringot akka donganta, manang mambahen hita dang porsea be tu organisasi ni Jahowa. Ikkon tapasiding do akka informasi sisongon i. Boasa? Alana informasi sisongon i ro sian akka halak “naung sega pingkiranna dohot na so adong be hasintongan di rohana”. Holan “naeng marsoal jala marbada” do tujuan ni nasida. (1 Tim. 6:4, 5) Lomo do roha ni nasida asa porsea hita tu gabus ni nasida jala asa unang tahaporseai be akka donganta. w20.09 29 ¶13, 15

Ikkon masihaholongan do suami dohot istri. (Eps. 5:33) Di Bibel, diajari do hita asa urringgas mangalehon sian na manjalo. (Ul. 20:35) Parange aha do na boi mangurupi suami dohot istri asa masihaholongan jala mangargai dongan saripena? I ma serep ni roha. Godang do suami dohot istri na marlas ni roha ala patuduhon serep ni roha. Misalna, donganta si Steven mandok, “Sada tim do suami dohot istri. Jadi ikkon kerja sama do hami, tarlumobi tikki adong parsoalan. Jadi unang ma tapikkirhon ‘Aha ma na dumenggan di au?’, alai pikkirhon ma ‘Aha na dumenggan di hami nadua?’” Songon i do tong na dihilala istrina, si Stephanie. Didok ibana, “Tikki adong parsoalan, dilului hami do boasa boi tubu parsoalan i. Ditangiakkon hami ma i, dibahen hami ma riset, jala dihatai hami ma songon dia pasaehon parsoalan i. Jala dang gabe marbadai hami alani i.” w20.07 3-4 ¶5-6

Timbo do sikkola ni si Paulus jala si Gamaliel do guruna, i ma sahalak pamimpin agama Jahudi na sangap di tikki i. (Ul. 5:34; 22:3) Jala najolo hea do si Paulus gabe halak na sangap di halak Jahudi. (Ul. 26:4) Alai dang olo si Paulus mangasahon dirina sandiri. Las do roha ni si Paulus manadikkon akka na boi mambahen ibana sangap di portibi on. (Plp. 3:8) Ala gabe sisean ni Jesus, sogo do roha ni akka halak sabangsona tu ibana. (Ul. 23:12-14) Hea do ibana dipukkuli jala dipenjarahon halak Rom. (Ul. 16:19-24, 37) Asing ni i, diboto si Paulus do dang sempurna ibana, jala maol do di ibana lao mangulahon na sittong. (Rom 7:21-25) Alai nang pe mangadopi godang hasusaan, boi do ibana marlas ni roha “tingki gale”. Boasa? Alana tikki gale ibana, boi ma idaonna songon dia gogo na sian Jahowa mangurupi ibana.—2 Kor. 4:7; 12:10. w20.07 16 ¶7-8

Nungnga disurirangkon Jesus hian torus do akka siseanna marbarita nang pe nungnga mate ibana. Jala umbalga do na diulahon siseanna sian na diulahon Jesus tikki mangolu di tano on. Dung hehe Jesus, diurupi ibana do akka siseanna manakkup godang dekke marhite mukjizat. Dung i, dipatakkas Jesus do muse tu akka siseanna, molo ulaon marbarita dohot mambahen sisean do na uppetting na ikkon diulahon nasida. (Joh. 21:15-17) Andorang so nakkok Jesus tu surgo, dipaboa ibana do tu akka siseanna molo ulaon marbarita on dang holan diulahon di Israel. (Ul. 1:6-8) Di pudian ni ari, dilehon Jesus ma sada parnidaan tu Apostel Johannes na patuduhon aha na lao masa saleleng “ari ni Tuan”. Diida ibana ma sada suru-suruan na mamboan “barita na uli sisaleleng ni lelengna” na dibaritahon “tu angka jolma na di tano on, tu saluhut bangso, marga dohot bahasa”. (Pgk. 1:10; 14:6) Jadi lomo do roha ni Jahowa asa toktong hita marbarita na uli. w20.09 9 ¶5

Saleleng martaon-taon marsak hian do roha ni si Abraham dohot si Sara ala dang boi ibana marianakkon. Ujungna, dilehon si Sara ma hatobanna, i ma si Hagar tu si Abraham, asa boi adong ianakkon ni nasida. Alai, tikki hamil si Hagar, lea do dibahen ibana si Sara. Lam maol do situasina, ujungna gabe dipalao si Sara ma si Hagar sian jabu. (1 Mus. 16:1-6) Ujungna, hamil ma si Sara, jala digoari ma anakna i si Isak. Holong do roha ni si Abraham tu si Isak dohot si Ismael. Alai jahat do si Ismael tu si Isak. Gabe ikkon dipalao si Abraham ma si Ismael dohot si Hagar. (1 Mus. 21:9-14) Martaon-taon dukkon i, dipangido Jahowa do si Abraham asa mamelehon si Isak gabe pelean. (1 Mus. 22:1, 2; Heb. 11:17-19) Di dua situasi i, ikkon pos do roha ni si Abraham na lao pasauton ni Jahowa do janjina taringot pinopparna. w20.08 4 ¶9-10

Bayakkon ma boha do perasaan ni akka halak naung dipahehe ala dibahen nasida hamubaon jala mangihutton paretta ni Jahowa. Las do roha ni nasida ala boi mangolu salelengna di Paradeiso. Alai dang diloas Jahowa akka halak na mangalo tu Ibana torus mangolu salelengna jala manggugai hadameon di Paradeiso. (Jes. 65:20; Joh. 5:28, 29) Tikki mamaretta Harajaon ni Debata i, sude sisomba Jahowa makkilala songon na didok Poda 10:22, “Pasupasu ni Jahowa do mambahen mamora, jala ndang mardongan hangaluton dibahen.” Songon i ma na lao dihilala sude naposo ni Jahowa di tano na imbaru. Ala diurupi tondi parbadia ni Jahowa nasida, gabe lam sarupa ma pangalaho ni nasida songon Kristus jala ujungna gabe sempurna. (Joh. 13:15-17; Eps. 4:23) Ganup ari, gabe lam sehat jala lam sempurna ma nasida. Tottu las hian do rohatta tikki masa i.—Job 33:25. w20.08 17 ¶11-12

Adong do memang akka donganta na mambahen keputusan dang marhasohotan. Na asing, olo do marhasohotan alai dang dapotna dope pasangan na cocok. Na deba dang marhasohotan ala nga monding pasanganna. Manang songon dia pe situasina, porlu do sukkunonta boasa nasida dang marhasohotan? Manang porlu do taurupi nasida mangalului pasangan? Daong. (1 Tim. 5:13) Pasti las do roha ni akka donganta na so marhasohotan molo taargai nasida alani parange ni nasida na denggan. Jala dang leas rohatta mangida nasida nang pe dang marhasohotan nasida. Ikkon taargai do nasida ala toktong setia manomba Jahowa. Molo taulahon i, dang adong be akka donganta na so marhasohotan na makkilala dang marguna nasida di huria.—1 Kor. 12:21. w20.08 28 ¶10; 29 ¶14

Di pudian ni ari dipatuduhon Jesus do dirina tu si Paulus. (1 Kor. 15:8) Tikki di pardalanan tu Damaskus, dibege si Paulus (si Saulus) ma soara ni Jesus naung dipahehe. (Ul. 9:3-5) On ma bukti na asing, na tutu do Jesus dipahehe. (Ul. 26:12-15) Tarsonggot do piga-piga halak mambege pengalaman ni si Paulus on. Alana disiksa ibana do najolo halak Kristen. Dung pos roha ni si Paulus naung hehe Jesus, gabe diurupi ibana ma halak na asing asa porsea tu haheheon i. Sabar do ibana nang pe dipukkuli, dipenjarahon, manang mengalami karam kapal. (1 Kor. 15:9-11; 2 Kor. 11:23-27) Massai pos do roha ni si Paulus tu haheheon ni Jesus, sappe rela do ibana mate mampartahatton haporseaonna i. Tottu gabe pos ma rohatta tu haheheon ni Jesus dohot tu haheheon na lao masa haduan. w20.12 3 ¶8-10

Boi do tasukkun diritta, ‘Taratur do au ro tu parpunguan?’ Di parpunguan ni Sitindangi Ni Jahowa, dipatogu do hita asa toktong manomba Jahowa. (Mat. 11:28) Ikkon tasukkun do muse diritta, ‘Hujaha do Bibel ganup ari?ʼ Dibahen hamu do jadwal ibadat keluarga? Taratur do hamu pelajaran pribadi? Jala diulahon hamu do na dumenggan tikki marbarita dohot mangajari? Boasa ikkon tasukkun diritta? Didok do di Bibel dipareso Jahowa do roha dohot pikkiranta, jadi hita pe ikkon tapareso do roha dohot pikkiranta. (1 Kron. 28:9) Molo adong na ikkon tapauba sian pikkiran dohot tujuanta, tapangido ma asa diurupi Jahowa hita. Saonari ma tikkina taparade diritta lao mangadopi aha na lao masa. Marbisuk ma hamu mamakke tikki saleleng masa hadameon on. w20.09 19 ¶19-20

Dibahen Jesus do tudosan lao paboahon na porlu diulahon sasahalak asa gabe siseanna. Tudosan i paboahon sasahalak na naeng mambangun menara, dohot sahalak raja na naeng lao marporang. Didok Jesus asa boi dibangun menara i, ikkon ‘jolo hundul do ibana mangetong sipalaoonna’. Jala andorang so lao sahalak raja marporang, ikkon ‘jolo hundul do ibana manjalo poda’ asa boi monang. (Luk. 14:27-32) Jadi didok Jesus, ikkon diboto sasahalak do aha na porlu ulahononna asa boi gabe siseanna. Alani i, porlu do tajujui parsiajar Bibelta asa taratur marsiajar ganup minggu. Tikki naeng marsiajar Bibel, porlu do sahalak guru persiapan. Tikki persiapan, ikkon dipikkirhon do parsiajar Bibel i. Ikkon dipikkirhon do muse songon dia cara patorakkon parsiajaran i sederhana jala takkas, asa boi diattusi jala diulahon ibana parsiajaran i.—Neh. 8:8; Poda 15:28a. w20.10 7 ¶5; 8 ¶7

Takkas do didok Jesus, ikkon taajarhon do parettana tu akka halak. Alai adong dope na upporlu na ikkon taulahon. Dang adong didok Jesus, ‘Ajarhon hamu ma tu nasida sude na huparettahon tu hamu.’ Alai na didok ibana, “Ajari hamu ma nasida mangulahon sude na huparettahon tu hamu.” Asa boi taulahon paretta ni Jesus on, ikkon tapaboa do tu parsiajar Bibelta na porlu diulahon ibana. (Ul. 8:31) Tikki marsiajar Bibel hita dohot sasahalak dang cukkup holan mangajarhon paretta ni Debata. Ikkon taajari do ibana cara mangulahon i. (Joh. 14:15; 1 Joh. 2:3) Molo diida parsiajar Bibelta taulahon prinsip ni Bibel, boi ma ditiru ibana i. Tapaboa ma songon dia prinsip ni Bibel mangurupi hita mambahen keputusan na denggan jala manjaga hita sian bahaya. Rap martangiang ma hita dohot parsiajar Bibelta. Tapangido ma asa diurupi tondi parbadia ni Jahowa ibana.—Joh. 16:13. w20.11 2-3 ¶3-5

Adong do tantangan na diadopi sisean ni Jesus. Di tikki i, dang adong dope Bibel jala otik do Gulungan. Jala ikkon marbarita do nasida tu akka halak na marasing-asing bahasana. Alani godang ni tantangan, hira na so mungkin do diulahon nasida i. Alai boi do nasida marhasil. Buktina di bagasan 30 taon, dibaritahon nasida do barita na uli i “tu sude tompaan na di tano on”. (Kol. 1:6, 23) Saonari torus do ditogu-togu Jahowa naposona. Jala dilehon do gogo asa boi mangulahon lomo ni rohana. Dilehon Jahowa do tudu-tudu sian Bibel. Disurat do di Bibel songon dia Jesus marbarita, dohot paretta na dilehon ibana tu siseanna asa torus marbarita. (Mat. 28:19, 20) Jadi lomo do rohana asa barita na uli i dipasahat “tu saluhut bangso, marga dohot bahasa”.—Pgk. 14:6, 7. w20.10 21 ¶6-8

Dihaholongi Raja Daud do “patik ni Jahowa”. (Ps. 1:1-3) Diboto si Daud do na dihalomohon Jahowa halak na serep roha jala dihasogohon Ibana halak siginjang roha. Jadi dipaloas si Daud do patik ni Debata paubahon cara marpikkirna. Disurat ibana ma, “Hupuji ma Jahowa na manogunogu ahu, jala di tingki borngin panggora ni rohangku mangajari ahu.” (Ps. 16:7, Bibel siganup ari) Molo serep rohatta tapaloas do Bibel paubahon cara marpikkirta na sala, asa unang sappe taihutton i. Dipasingot Bibel do hita asa unang manirpang tu kanan manang tu kiri. Jadi, Bibel i songon na mandok, “On do dalan i, i ma dalan i!” (Jes. 30:21) Molo tatangihon Jahowa, godang ma laba na tadapot. (Jes. 48:17) Misalna, dang gabe maila be hita molo dipasingot sasahalak hita. Jala boi ma hita lam jonok tu Jahowa, ala taboto dibahen Ibana do hita songon anak haholonganna.—Heb. 12:7. w20.11 20 ¶6-7

Piga-piga halak Kristen na di Korint, sala do pangattusionna tu haheheon. (1 Kor. 15:12) Gariada adong sian nasida na mandok molo lapatan ni haheheon i, i ma “mate” di bagasan dosa, alai “mulak mangolu” tikki gabe halak Kristen. Aha pe alasan ni nasida dang porsea tu haheheon, on patuduhon sia-sia do haporseaon ni nasida tu Debata. Molo dang dipahehe Debata dope Jesus, berarti dang digarar dope tobusan i jala toktong ma hita dang dipalua sian dosa. Alani i, dang adong harapan ni halak na so porsea tu haheheon. (1 Kor. 15:13-19; Heb. 9:12, 14) Takkas do diboto Apostel Paulus “nunga dipahehe Kristus sian na mate”. Dumenggan do haheheon ni Jesus on sian sude haheheon na hea masa najolo. Ai mate do ujungna akka halak na dipahehe i. Didok si Paulus do molo Jesus i “na parjolo dipahehe sian sude halak na mate”. Ala ibana do na parjolo dipahehe lao mangolu di surgo.—1 Kor. 15:20; Ul. 26:23; 1 Ptr. 3:18, 22. w20.12 5 ¶11-12

Di abad na parjolo, punguan na manguluhon huria Kristen di Jerusalem, marsitutu do mambahen asa taratur jala dame akka huria di tikki i. (Ul. 2:42) Misalna, tikki adong masalah sunat taon 49 M, diurupi tondi parbadia do punguan na manguluhon huria Kristen di tikki i mambahen keputusan. Molo dang marsada huria alani masalah i, tottu gabe maol ma nasida marbarita. Nang pe halak Jahudi akka apostel dohot akka sintua, alai dang gabe terpengaruh nasida tu tradisi ni halak Jahudi, nang tu akka halak na mandukung ajaran i. Alai dibahen nasida do keputusan i, hombar tu Hata ni Debata dohot pangurupion ni tondi parbadia. (Ul. 15:1, 2, 5-20, 28) Aha do hasilna? Dipasu-pasu Jahowa do keputusan i. Gabe marsada jala dame ma huria, jala boi ma nasida toktong marbarita na uli. (Ul. 15:30, 31; 16:5) Di jaman modern, marsitutu do organisasi ni Jahowa mambahen naposo ni Jahowa taratur jala dame. w20.10 22-23 ¶11-12

Adong do piga-piga alasan na mambahen hita dang mandapot tugas di huria. Olo do ala nungnga matua hita, marsahit, manang ala situasi na asing. Molo on do na masa tu hita saonari tatiru ma Raja Daud. Nang pe lomo roha ni si Daud pajongjokkon bagas joro ni Jahowa, alai dang ibana na dipillit. Alai nang pe songon i dilehon ibana do godang perak dohot mas lao mangurupi pembangunan i. Sitiruon na denggan do si Daud on di hita. (2 Sam. 7:12, 13; 1 Kron. 29:3-5) Alani masalah kesehatan, dang sintua be donganta si Hugues na di Prancis. Jala dang boi be ibana karejo. Didok ibana, “Mulana mandele do au, ala sai hupikkiri akka na so boi be huulahon. Alai ikkon boi do au toktong marlas ni roha mangulahon akka na boi dope huulahon tu Jahowa. Hutiru do si Gidion dohot 300 tentarana. Nang pe nungnga loja nasida alai torus marporang.”—Pangh. 8:4. w20.12 25 ¶14-15

Di surat ni Apostel Johannes, jotjot didok ibana molo halak Kristen ikkon patuduhon holong. Buktina tikki manuratton taringot parngoluon ni Jesus, jotjot do dipakke si Johannes hata “holong”. Sian on taboto ikkon torus do halak Kristen patuduhon holong. (1 Joh. 4:10, 11) Alai di si Johannes sandiri dang mura mangulahon i. Misalna hea do Jesus dohot akka siseanna lao tu Jerusalem mangalewati Samaria. Alai adong sada huta di Samaria i na so manjalo nasida. Pittor didok si Johannes do tu Jesus asa dijou ibana api turun sian langit lao manutung parhuta i. (Luk. 9:52-56) Jala hea do si Johannes dang patuduhon holong tu donganna apostel. Disuru ibana dohot si Jakobus do omak ni nasida mangido tu Jesus asa dilehon tu nasida inganan na ussangap di Harajaon ni Debata. Alani i, gabe muruk ma akka apostel na asing tu nasida. (Mat. 20:20, 21, 24) Alai toktong do dihaholongi Jesus si Johannes.—Joh. 21:7. w21.01 8-9 ¶3-4

Sude keputusan na dibahen Jahowa pasti adong manfaatna tu hita. Misalna, ditoppa Ibana pe saluhutna dang holan naeng pasonakkon dirina sandiri. Alai asa dohot do hita marlas ni roha songon Ibana. Jala berkorban pe Jahowa mangalean tobusan tu hita, dang na terpaksa Ibana mangalean i. Songon i do nang Jesus, tikki mambahen keputusan, dang holan naeng pasonakkon dirina sandiri ibana. Misalna, rela do Jesus mamakke tikkina istirahat lao mangajari akka halak. (Mrk. 6:31-34) Diboto kepala keluarga na burju do dang sai mura mambahen keputusan. Hape tanggung jawab na massai penting do i. Jadi ikkon dipangido ibana do Jahowa mangurupi ibana mambahen keputusan na denggan. (Poda 2:6, 7) Molo dibahen songon i, gabe bermanfaat ma keputusan i tu ibana dohot tu keluargana.—Plp. 2:4. w21.02 7 ¶19-21

Tikki poso Raja Asa, halak na serep roha jala barani do ibana. Misalna dung gabe raja ibana manggattihon bapakna si Abia, dihancurhon ibana ma akka patung berhala na di Juda. “Asing ni i, disuru ibana do halak Juda mangalului Jahowa Debata ni akka ompu ni nasida. Jala disuru ibana do nasida mangulahon Patik dohot paretta ni Debata.” (2 Kron. 14:1-7) Jala tikki ro si Jara halak Etiopia dohot sajuta tentarana mangalo Juda, martangiang do si Asa mangido bisuk sian Jahowa asa boi monang. Didok ibana ma, “Ale Jahowa, dang maol di Ho mangurupi na gogo manang na so margogo. Urupi ma hami ale Jahowa Debatanami, ai Ho do na hupangasahon hami.” Sian hata ni si Asa on, tarida ma pos situtu do rohana na sanggup do Jahowa paluahon ibana dohot rakyatna. Ala porsea do ibana tu Bapakna na di surgo i, “ditaluhon Jahowa ma halak Etiopia”. (2 Kron. 14:8-12) Coba ma bayakkon hamu songon dia perasaan ni Raja Asa tikki ro sajuta tentara mangalo ibana. Pasti mabiar do ibana ate. Alai boi do monang si Asa ala Jahowa do diandalhon ibana. w21.03 5 ¶12-13

Jolma na so sempurna pe boi do patuduhon holong tu na asing, contohna si Jonatan dohot si Daud. Bibel mandok, “Gabe holong ma rohana tu si Daud. Dihaholongi si Jonatan do si Daud dos songon makkaholongi dirina. Jala gabe marale-ale ma nasida.” (1 Sam. 18:1) Nungnga dipillit be si Daud lao manggattihon si Saul gabe raja. Gabe muruk hian ma si Saul, jala naeng dipamate ma si Daud. Alai dang setuju si Jonatan. Marjanji do si Jonatan dohot si Daud, na toktong do nasida marale-ale jala marsiurupan. (1 Sam. 20:42) Massai balga do holong ni si Jonatan dohot si Daud. Hira-hira 30 taon ma uttua umur ni si Jonatan sian si Daud. Boi do ro tu roha ni si Jonatan dang cocok si Daud gabe ale-alena, ala upposo do si Daud jala otik dope pengalamanna. Alai dang songon i pandangan ni si Jonatan tu si Daud. Sangap do ibana dibahen si Jonatan. w21.01 21-22 ¶6-7

Hea do didok Jesus tu akka siseanna boi do nasida marlas ni roha situtu. Alai dipaingot Jesus do tong nasida, ikkon taonon ni nasida do na haccit. (Mat. 10:22, 23; Luk. 6:20-23) Las do rohatta ala boi gabe sisean ni Kristus. Alai boha do molo adong tantangan sian keluarga, penganiayaan sian pamaretta, manang tekanan sian dongan karejo dohot dongan sasikkola? Memang molo masa sisongon i wajar do marsak hita. Godang do halak mandok dang mungkin hita marlas ni roha molo dianiaya. Alai Hata ni Debata mandok boi do hita marlas ni roha nang pe dianiaya. Misalna disurat si Jakobus do, boi do hita marlas ni roha jala dang sai marsak molo masa sitaonon. (Jak. 1:2, 12) Jala Jesus pe mandok boi do hita marlas ni roha nang pe dianiaya. (Mat. 5:11) Dipakke Jahowa ma si Jakobus manuratton poda tu akka dongan sahaporseaonna i, asa toktong nasida marlas ni roha nang pe godang tantangan. w21.02 26 ¶1-2; 27 ¶5

Di tikki ni si Timoteus adong do halak Kristen na so mangargai tugas ni nasida boi rap saulaon dohot Debata. I ma si Demas, si Pigelus, si Hermogenes, si Himeneus, si Aleksander, dohot si Piletus. (1 Tim. 1:19, 20; 2 Tim. 1:15; 2:16-18; 4:10) Di mulana dihaholongi nasida do Jahowa. Alai ujungna, dang mararga be dianggap nasida aha naung dilehon Jahowa tu nasida. Songon dia do Sibolis mambahen hita dang be manjaga silehon-lehon ni Jahowa? Parrohahon ma cara na dipakke ibana. Dipakke Sibolis do hiburan dohot media lao mangajarhon pikkiran dohot pangalaho na sala tu hita, asa unang gomos be tatiop hasittongan. Dipakke Sibolis do penganiayaan manang tekanan ni akka halak mambahen hita dang be marbarita. Jala dipakke Sibolis do ajaran ni halak na murtad mambahen hita manadikkon hasittongan. Molo dang manat hita, lam leleng boi do gabe dang gomos be tatiop hasittongan.—1 Tim. 6:21. w20.09 27 ¶6-8

Hea do dihianati dongan manang keluargamuna hamu? Molo hea, marsiajar ma sian pengalaman ni Raja Daud. Hea do ibana dihianati anakna si Absalom. (2 Sam. 15:5-14, 31; 18:6-14) Paboa ma tu Jahowa songon dia haccit ni rohamuna ala dihianati hamu. (Ps. 6:6-8) Holong do rohana tu si Absalom, jala porsea do ibana tu si Ahitopel. Jadi boi ma tabayakkon, tikki dihianati ibana, pasti haccit hian do pakkilalaanna. Apalagi tikki diboto ibana na berupaya do nasida pamatehon ibana. Gabe curiga do si Daud naung berpihak tu si Absalom akka donganna na asing? Merasa do ibana dang adong be donganna? Dibahen ibana do keputusan melarikan diri sahalakna? Gabe marsak jala mandele do ibana? Martangiang do ibana asa diurupi Jahowa, jala dipangido do bantuan sian akka donganna. Toktong do ibana porsea tu Jahowa dohot tu akka donganna i. w21.03 15 ¶7-8; 17 ¶10-11