Juli
Jumat, 1 Juli
Nungnga dipasahat tu au saluhut huaso na di banua ginjang dohot na di tano on.—Mat. 28:18.
Ikkon marale-ale do hita tu Jesus asa boi dialusi tangiangta. Dang cukkup holan mandok “di bagasan goar ni Jesus” tikki hita martangiang. Porlu do taattusi songon dia Jahowa mangalusi tangiangta marhite Jesus. Didok Jesus do tu akka apostelna, “Ulahononku do manang aha na pinangidomuna marhite goarhu.” (Joh. 14:13) Nang pe Jahowa na manangihon jala mangalusi tangiangta, Jesus do na disuru Ibana lao mandalatton keputusanna. Andorang so dialusi Jahowa tangiangta, ikkon dipastihon Ibana do naung taulahon poda ni Jesus. Uppamana, didok Jesus do, “Molo disesa hamu sala ni halak tu hamu, sesaon ni Amamuna na di banua ginjang i do hasalaanmuna. Alai molo ndang disesa hamu sala ni halak tu hamu, ndang sesaon ni Amamuna nang hasalaanmuna.” (Mat. 6:14, 15) Jadi, rikkot do di hita asa burju tu halak na asing, songon Jahowa dohot Jesus na burju tu hita! w20.04 22 ¶6
Sabtu, 2 Juli
Na lao paboahon barita na uli do hami tu hamu, asa ditadikkon hamu ulaon na so marguna sisongon on jala asa disomba hamu Debata.—Ul. 14:15.
Diparrohahon Apostel Paulus do aha na menarik di akka halak. Dung i, disesuaihon ibana ma carana marbarita hombar tusi. Misalna, di Listra otik do parbinotoan ni halak taringot Hata ni Debata. Jadi, dipillit si Paulus ma topik na boi diattusi nasida. Dihatai ibana ma taringot musim panen. Dohot boha carana asa boi marlas ni roha. Dipakke ibana do hata dohot tudosan na mura diattusi nasida. Marsitutu ma hamu mamparrohahon aha na menarik di akka halak. Jala, sesuaihon hamu ma caramuna marbarita hombar tusi. Holan taida pe halakna manang jabuna boi do taattusi aha na menarik di sasahalak. Boha carana? Parrohahon ma aha na di humaliangmuna. Ra, pajuppang do hita dohot halak na markobun, na manjaha bukku, na paturehon karetana, manang na asing. Molo cocok tikkina, boi do dibahen hamu i gabe topik lao makkatai tu nasida. (Joh. 4:7) Jala, sian pakkean ni halak pe boi do taboto sian dia do asalna, aha do karejona, manang tim olahraga dia do na lomo rohana. w20.04 11 ¶11-12
Minggu, 3 Juli
Pasahat hamu ma sude holso ni rohamuna tu Ibana, ai diparrohahon do hamu.—1 Ptr. 5:7.
Alani holsoan, adong do akka donganta na gabe parila manang mabiar tikki pajuppang dohot akka halak. Dang mura di nasida lao marsaor tu godang halak, alai toktong do nasida ro tu parpunguan dohot kebaktian. Dang mura di nasida makkatai tu halak na so ditanda dope, alai olo do nasida manjuppangi akka halak tikki marbarita na uli. Molo songon i do na dihilala hamu, pos ma rohamuna dang holan hamu na songon i. Halak na asing pe godang do na songon i. Las do roha ni Jahowa ala nungnga marsitutu hamu. Dang menyerah hamu sahat tu saonari, i do buktina na dipasu-pasu Jahowa hamu jala dilehon Ibana gogo. (Plp. 4:6, 7) Molo toktong hamu manomba Jahowa nang pe marsahit manang holsoan, pos ma rohamuna las do roha ni Jahowa mangida hamu. Godang do sian hita na gale di pardagingon alai boi do toktong martahan. (2 Kor. 4:16) Ala diurupi Jahowa do hita, boi ma hita toktong marlojong sahat tu ujungna! w20.04 31 ¶20-21
Senin, 4 Juli
Boi do taattusi akka pangalahona . . . molo taparsiajari akka na dibahen Ibana.—Rom 1:20.
Boi do taida bisuk ni Debata sian carana manoppa tano on. (Heb. 3:4) Alai, tano on ma planet na istimewa. Alana holan dison do diparade sude na tahaporluhon asa boi mangolu. Boi ma tabandingkon tano on tu pesawat terbang. Adong do imbar ni tano on dohot pesawat. Misalna, bayakkon ma molo adong akka halak na marpesawat. Boha do molo ikkon diparade nasida sandiri oksigen, sipanganon, dohot aek tu nasida? Jala boha do molo dang boi nasida mambolokkon sampah sian pesawat i? Sadia leleng do nasida boi mangolu? Boi do gabe hatop nasida mate. Alai imbar do tano on sian pesawat i. Boi do marmiliar jolma dohot binatang toktong mangolu dison. Sai toktong do adong oksigen, sipanganon, dohot aek. Jala dang marna habis i. Memang, dang hea akka sampah di tano on dibolokkon tu luar angkasa. Alai toktong do uli tano on jala boi diingani. Boasa? Ala dibahen Jahowa do adong sistem daur ulang di tano on. w20.05 20 ¶3-4
Selasa, 5 Juli
Dang na lao mate hamu.—1 Mus. 3:4.
Didok Sibolis tu si Hawa, pargabus do Jahowa i. I do alana gabe digoari ma ibana Sibolis, manang pangissaki. Olo muse do si Hawa dioto-otoi Sibolis. (1 Tim. 2:14) Gabe tu Sibolis i do ibana porsea, dang tu Jahowa. Gabe dibahen si Hawa ma keputusan na sala. Dang unduk be ibana tu Jahowa. Diallang ibana ma parbue ni hau na diorai i. Dung i, dilehon ibana ma i tu si Adam. (1 Mus. 3:6) Rimangi ma aha do na sasittongna ikkon didok si Hawa hian tu Sibolis. Bayakkon ma molo songon on hian alus ni si Hawa, “Ise haroa ho? Dang hutanda ho. Alai hutanda do Bapakku Jahowa. Holong jala pos do rohakku tu Ibana. Nungnga dilehon Ibana tu hami on sude. Boasa songon i dohononmu? Lao ho!” Tottu massai las do roha ni Jahowa molo songon i alus ni si Hawa! (Poda 27:11) Alai dang setia si Hawa tu Jahowa, songon i nang si Adam. Ala dang setia tu Jahowa, dang boi nasida pabadiahon goar ni Amana. w20.06 4 ¶10-11
Rabu, 6 Juli
Akka borua na paboahon barita na uli dos songon tentara na godang.—Ps. 68:11.
Tapuji do akka donganta borua di sude naung diulahon nasida tu Jahowa. Dohot do nasida mambangun jala mangarawat bangunan ni organisasi, mangurupi kelompok bahasa asing, jala gabe relawan di fasilitas Betel. Adong do muse na dohot mangurupi na hona bencana, menerjemahon publikasi, gabe perintis, manang gabe misionaris. Diurupi akka istri do tong suami ni nasida asa boi mangulahon tanggung jawab di huria. ‘Silehon-lehon’ do akka sintua on di huria jala godang do na diulahon nasida. (Eps. 4:8) Diboto sintua na marbisuk do, “torop situtu” do akka borua na malo marbarita na uli jala na rade mangurupi ulaon Harajaon. Diboto akka sintua do, donganta borua na matua pe boi do mangurupi donganta borua na poso tikki mangadopi masalah. (Tit. 2:3-5) Takkas ma, ikkon tahaholongi jala taargai do donganta borua! w20.09 23 ¶13-14
Kamis, 7 Juli
Dang lomo roha ni Damang na di banua ginjang i mago apala sada pe sian na metmet on.—Mat. 18:14.
Dang dihalupahon Jahowa akka naposona na so aktif. (Heb. 6:10) Dipaboa Panurirang Jesaya do sada tudosan na patuduhon songon dia do pakkilalaan ni Jahowa tu naposona. Didok di Bibel, “Parmahanonna ma punguanna songon parmahan, papunguonna ma angka anak ni birubiru tu tanganna jala usungonna di ampuanna.” (Jes. 40:11) Boha do pakkilalaan ni Jahowa molo adong biru-biruna na mandao sian huria? Dipaboa Jesus do alusna. Didok ibana tu akka siseanna, “Songon dia do pandapotmuna? Molo adong sasahalak nampuna 100 biru-biru jala adong sada na lilu, nda tadingkononna na 99 i di dolok jala laho mangalului sada na lilu i? Hudok ma tu hamu, molo dung dapotna i, umbalga do las ni rohana mida biru-biru na sada i sian apala tu na 99 na so lilu i.”—Mat. 18:12, 13. w20.06 19-20 ¶8-9
Jumat, 8 Juli
Molo marsitutu sahalak bawa naeng gabe sintua, na lomo do rohana mandapot ulaon na denggan.—1 Tim. 3:1.
Tottu sada hasangapon do di hita ala boi mangalehon gumodang tikki dohot gogo lao manomba Jahowa. (Ps. 27:4; 84:10) Jadi molo adong donganta bawa na rade mangalehon gumodang tikkina tu Jahowa, tapujihon do i. Alai unang ma gabe didok rohana urrikkot do dirina sian na asing. (Luk. 17:7-10) Ikkon toktong do serep rohana jala marsitutu lao mangurupi na asing. (2 Kor. 12:15) Di Bibel, dipaboa do taringot akka halak na makkarikkotton dirina sandiri. Ginjang do roha ni si Diotrepes, marsitutu do ibana “patimbohon dirina” di huria. (3 Joh. 9) Ala ginjang do roha ni si Usia, diulahon ibana do tugas na so dilehon Jahowa tu ibana. (2 Kron. 26:16-21) Marsitutu do si Absalom mambuat roha ni akka halak, asa dibahen nasida gabe raja ibana. (2 Sam. 15:2-6) Sian akka contoh i, takkas ma dang lomo roha ni Jahowa mangida akka halak na marsitutu pasangappon dirina. (Poda 25:27) Marjea do ujungna akka halak na ginjang rohana jala pasangappon dirina.—Poda 16:18. w20.07 4 ¶7-8
Sabtu, 9 Juli
Ai ganup do halak martanggung jawab tu na diulahon ibana.—Gal. 6:5.
Adong do ra piga-piga keluarga Kristen na pinda tu negara na asing. Biasana, gabe marsikkola do gellengna di sikkola na mamakke bahasa ni negara i. Natua-tuana pe ikkon marsiajar bahasa i do ra asa boi mandapot karejo. Boha ma molo di negara i adong huria manang kelompok na mamakke bahasa ni nasida? Tu huria na dia do nasida ikkon margabung? Tu huria na mamakke bahasa ni negara i do, manang tu huria na mamakke bahasa ni nasida sandiri? Ikkon kepala keluarga do na mamutusson i. Dang boi halak na asing na manottuhon i. Manang aha pe keputusan na dibahen kepala keluarga i, ikkon taargai do i. Las ma rohatta manjakkon keluargana di huriatta.—Rom 15:7. w20.08 30 ¶17-18
Minggu, 10 Juli
Na gale di portibi on, i do na dipillit Debata.—1 Kor. 1:27.
Asa boi mandapot gogo sian Jahowa, unang ma mangasahon gogo, sikkola, suku manang hamoraonta. Dang i na mambahen hita gabe mararga di Jahowa. Sasittongna, dang godang naposo ni Debata ‘na marbisuk di jolo ni jolma, na marhuaso, jala na ro sian keluarga na sangap’. (1 Kor. 1:26) Jadi nang pe dang adong di hamu akka na dipaboa di mula ni paragraf on, alai unang ma hagaleonmuna i na mangabbati hamu lao manomba Jahowa. Gariada, bahen ma i gabe kesempatan di hamu lao mangida songon dia Jahowa mangalehon gogo tu hamu. Contohna, molo mabiar hamu ala adong na mangaleai haporseaonmuna, martangiang ma tu Jahowa asa barani hamu membela haporseaonmuna. (Eps. 6:19, 20) Manang molo marsahit na posi hamu, pangido ma gogo sian Jahowa asa boi hamu toktong manomba Ibana sian nasa tolapmuna. Tikki diida hamu pangurupion ni Jahowa, gabe lam togu ma haporseaonmuna jala lam margogo ma hamu. w20.07 16 ¶9
Senin, 11 Juli
Sai parjolo ma lului Harajaon ni Debata.—Mat. 6:33.
Molo Harajaon ni Debata do na urrikkot di ngolutta, ikkon olo do hita mambahen pengorbanan songon si Abraham asa las roha ni Jahowa. (Mrk. 10:28-30; Heb. 11:8-10) Unang ma didok rohamu dang adong masalah na lao diadopi hamu. Sian contoh ni si Abraham boi ma taida, akka halak na manomba Jahowa pe toktong do mangadopi masalah. (Jak. 1:2; 1 Ptr. 5:9) Saonari, ikkon lam tapikkiri do janji ni Debata di ari na naeng ro. Alana akka na masa saonari di portibi on patuduhon nungnga mangolu hita di ujung ni ari parpudi. Sada pasu-pasu na boi tahilala i ma, boi hita pajuppang muse dohot halak na mate na tahaholongi. Di tikki i, pasu-pasuon ni Jahowa do si Abraham ala sabar jala marhaposan tu Jahowa. Paheheon ni Jahowa ma ibana dohot keluargana asa mangolu salelengna di tano on. Boi do pajuppang hamu dohot nasida? Boi. Molo ditiru hamu si Abraham. Bahen hamu ma pengorbanan tu Harajaon ni Debata, toktong ma hamu marhaposan nang pe mangadopi hasusaan, jala sabar ma hamu paimahon Jahowa.—Mik. 7:7. w20.08 5-6 ¶13-14; 7 ¶17
Selasa, 12 Juli
Patudu ma na toktong ho setia sahat tu na mate jala lehonokku ma tu ho mahkota hangoluan.—Pgk. 2:10.
Taboto do, nang pe dipamate akka musu hita, boi do dipahehe Jahowa hita. Pos do rohatta, manang aha pe na diulahon nasida, dang boi nasida mangabbati hita asa toktong setia tu Jahowa. (Rom 8:35-39) Alani i, dang mabiar hita nang pe diancam akka musu, jala barani do hita toktong setia tu Jahowa. Molo didok akka musu ni Jahowa naeng dipamate nasida hamu, aha do na diulahon hamu? Pos do rohamuna paheheon ni Jahowa hamu? Sukkun ma dirimuna, ‘Sian keputusan na hubahen ganup ari, tarida do na pos rohakku tu Jahowa?’ (Luk. 16:10) ‘Sian carakku mamakke tikki dohot hepeng, tarida do Harajaon ni Debata na urrikkot di ngolukku, jala pos do rohakku lehonon ni Jahowa do aha na huhaporluhon?’ (Mat. 6:31-33) Molo pos rohamu tu Jahowa, tottu gabe lam rade ma hamu mangadopi manang aha pe na lao masa.—Poda 3:5, 6. w20.08 17-18 ¶15-16
Rabu, 13 Juli
Marsitutu ma ho mambahen dirim gabe halak na dihalomohon Debata, gabe songon parkarejo na so siissakan, denggan mangajari jala patorakkon hasittongan i.—2 Tim. 2:15.
Ikkon marlatik do hita asa boi denggan mangajarhon jala patorakkon hasittongan. Di parpunguan ma hita marlatik mangulahon i. Alai asa boi tapapos roha ni halak na massai arga do hasittongan i, ikkon jolo tapatogu do haporseaotta. Ikkon taratur do taparsiajari Bibel. Alai dang sae holan manjaha i, ikkon tarimangi jala tariset do i asa boi tadapot pangattusion na sittong jala boi tapatorang tu akka halak. (1 Tim. 4:13-15) Dung i, tapakke ma Bibel tikki mangajari akka halak. Alai dang sae holan manjahahon ayat. Taurupi ma nasida mangattusi ayat i jala mangulahon i di parngoluon ni nasida. Molo taratur hita mamparsiajari Bibel, boi ma lam malo hita mangajarhon i tu halak.—2 Tim. 3:16, 17. w20.09 28 ¶12
Kamis, 14 Juli
Ingot hamu ma [Jesus] . . . , asa unang habis gogomuna jala asa unang mandele hamu.—Heb. 12:3.
Boi do toktong tajumolohon ulaon marbarita na uli molo tarimangi songon dia cara ni Jahowa mangurupi hita. Misalna, diparade Ibana do publikasi tercetak dohot elektronik, rekaman audio dohot video, dohot sude video na asing na adong di jw.org na boi patoguhon parale-aleotta tu Ibana. Boi do tadapot informasi di situs webta di lobi sian 1.000 bahasa! (Mat. 24:45-47) Cara na asing asa boi toktong tajumolohon ulaon marbarita di ngolutta, i ma mangihutton contoh ni Jesus. Dang adong na boi mangabbati ibana manjumolohon ulaon marbarita di ngoluna. (Joh. 18:37) Dang olo Jesus manjalo “sude harajaon ni portibi on dohot hasangaponna” na dilehon Sibolis tu ibana. Jala dang olo tong Jesus gabe raja di portibi on. (Mat. 4:8, 9; Joh. 6:15) Dang hea tarpikkir ibana naeng mamora, jala dang mabiar ibana nang pe adong paraloan. (Luk. 9:58; Joh. 8:59) Tikki diuji haporseaotta, boi do toktong tajumolohon ulaon marbarita molo taingot poda ni Apostel Paulus songon di ayat sadari on. w20.09 9-10 ¶6-7
Jumat, 15 Juli
Tiru hamu ma au, songon au na maniru Kristus.—1 Kor. 11:1.
Massai las do rohatta ala godang do donganta borua na kerja keras di huria. Uppamana, ringgas do nasida di parpunguan dohot di ulaon marbarita. Dohot do nasida mangarawat Bale Harajaon, jala parduli do nasida tu akka dongan na asing. Alai adong do masalah na diadopi nasida. Adong do na mangurus natua-tuana. Adong do na mangadopi tentangan sian keluarga. Jala adong do na gabe orang tua tunggal, na ikkon kerja keras lao mangurus ianakkonna. Boasa ikkon tadukung akka donganta borua? Ala di portibi on, godang do akka halak na so mangargai akka borua. Alai di Bibel dijujui do hita asa mangurupi akka borua. Misalna, dipaboa Apostel Paulus do tu huria Rom asa dijakkon nasida si Poibe jala ‘dilehon nasida akka na rikkot di ibana’. (Rom 16:1, 2) Najolo, sahalak Parise do si Paulus. Dang diargai halak Parise akka borua. Alai dung gabe halak Kristen, ditiru si Paulus do Jesus na mangargai akka borua. w20.09 20 ¶1-2
Sabtu, 16 Juli
Bahen hamu ma saluhut halak . . . gabe siseanku. . . . Ajari hamu ma nasida mangulahon sude naung huparettahon tu hamu.—Mat. 28:19, 20.
Lao mangurupi parsiajar Bibel asa olo marbarita na uli tasukkun ma nasida, “Dung diulahon hamu akka prinsip ni Bibel aha do labana dihilala hamu? Menurutmu porlu do begeon ni halak barita on? Aha do na boi diulahon hamu lao mangurupi nasida?” (Poda 3:27; Mat. 9:37, 38) Ingot ma disuru Jesus do hita mangajari halak asa boi nasida “mangulahon sude” paretta ni Jesus. Termasuk ma i mangulahon dua paretta na umbalga, i ma makkaholongi Debata dohot akka dongan jolma. Jala adong do hubungan ni on tu ulaon marbarita na uli. (Mat. 22:37-39) Sasittongna, holong i boi mangonjar sasahalak marbarita na uli. Alai olo do ra mabiar parsiajar Bibelta marbarita. Alani i tapapos ma rohana urupan ni Jahowa do ibana mangatasi i.—Ps. 18:1-3; Poda 29:25. w20.11 3 ¶6-8
Minggu, 17 Juli
Dang marnaso hami manangiakkon hamu.—Kol. 1:9.
Tikki persiapan, porlu do tong tatangiakkon parsiajar Bibelta tu Jahowa. Tapangido ma tu Jahowa asa diurupi hita mangajarhon hasittongan ni Bibel asa hona tu rohana. Ingot ma tujuanta, i ma mangurupi ibana asa boi tardidi. Ikkon makkatai do ibana tu Jahowa jala manangihon Jahowa marhite manjaha Bibel ganup ari. (Jos. 1:8; Ps. 1:1-3) Jujui ma ibana asa martangiang tu Jahowa ganup ari. Martangiang ma sian nasa rohamuna andorang so marsiajar, dohot dung sae marsiajar. Tangiakkon ma ibana jala dok ma goarna di tangiangmuna i. Tikki dibege ibana tangiangmuna i, diboto ibana ma rikkot ni martangiang sian ias ni roha tu Jahowa marhite goar ni Jesus Kristus. (Mat. 6:9; Joh. 15:16) Molo ganup ari do parsiajar Bibelmuna i manangihon Jahowa marhite manjaha Bibel, jala makkatai tu Jahowa marhite tangiang, gabe lam jonok ma ibana tu Debata.—Jak. 4:8. w20.10 8 ¶8; 9 ¶10-11
Senin, 18 Juli
Toktong ma hamu marsada jala mardame ala ditogu-togu tondi parbadia i.—Eps. 4:3.
Saonari, marsitutu do organisasi ni Jahowa mangurupi huria Kristen asa taratur jala dame. (Ul. 16:4, 5) Misalna, tu huria dia pe hita lao, manang di negara dia pe i, taboto do artikel Joujou Paboahon na diulas dohot cara mangulas artikel i. Takkas ma, holan tondi parbadia ni Debata do na boi mambahen hita marsada! (Sep. 3:9) Jadi tasukkun ma diritta, ‘Marsitutu do au mangurupi huria asa marsada jala mardame? Unduk do au tu akka dongan na manguluhon? Molo adong tanggung jawabhu di huria, boi do pos roha ni akka dongan tu au? Tepat waktu do au, jala sai rade do au mangurupi na asing?’ (Jak. 3:17) Molo adong dope na porlu dipadenggan sian diritta, pangido ma tondi parbadia mangurupi hamu. Molo tapaloas tondi parbadia padenggatton parangetta, lam diargai jala dihaholongi akka dongan di huria ma hita. w20.10 23 ¶12-13
Selasa, 19 Juli
Unang paoto-oto hamu dirimuna marhite holan na manangihon hata i.—Jak. 1:22.
Dipatudos do Bibel songon kaca. (Jak. 1:23-25) Biasana markaca do hita ganup ari molo naeng lao tu luar. Jadi boi ma taida na porlu tapadenggan sian penampilanta, andorang so diida na asing. Suang songon i ma molo tajaha Bibel ganup ari, boi ma taida aha na porlu tapauba sian cara marpikkir dohot sikapta. Godang do na mandapot laba ala manjaha ayat harian ganup manogot. Diloas nasida do na dijahana i masuk tu pikkiranna. Jadi, sai dilului ma cara mangulahon ayat harian sadari i. Jala ikkon tabahen do muse jadwal mamparsiajari Bibel dohot mangarimangi i ganup ari. Ala on ma sada cara na rikkot asa boi hita toktong mardalan di dalan na soppit tu hangoluan. Hata ni Debata, dos do songon mesin rontgen na boi mangurupi hita mamboto aha na adong di bagasan, na so boi taida sian luar. Alai ikkon serep do rohatta asa boi taulahon poda na sian Bibel manang sian halak na dilantik Debata. w20.11 18 ¶3; 20 ¶8
Rabu, 20 Juli
Gabe lam togu ma haporseaon ni akka huria i jala lam tamba ma godang ni nasida ganup ari.—Ul. 16:5.
Nang pe jotjot halak Kristen di abad na parjolo dianiaya, alai hea do tong dihilala nasida masa hadameon. Aha do na diulahon nasida saleleng masa hadameon i? Torus do marbarita akka halak na setia di tikki i. Didok do di Bibel, “dihabiari nasida do Jahowa di parngoluon ni nasida”. Torus do nasida marbarita na uli jala hasilna ‘lam tamba ma godang ni nasida’. Dipasu-pasu Jahowa do nasida ala semangat marbarita saleleng masa hadameon i. (Ul. 9:26-31) Manang sadihari pe, torus do halak Kristen di abad na parjolo pasahatton barita na uli. Uppamana, tikki diboto si Paulus godang nai dope halak Epesus na ikkon mambege barita na uli, dipakke ibana do kesempatan i lao marbarita tu nasida. Jala gabe disi ma ibana tinggal. (1 Kor. 16:8, 9) Gabe lam semangat ma halak Kristen di abad na parjolo paboahon “barita na uli taringot tu hata ni Jahowa”. (Ul. 15:30-35) Aha do hasilna? Dipaboa do di ayat sadari on. w20.09 16 ¶6-8
Kamis, 21 Juli
Hamatean i na ro sian sahalak jolma.—1 Kor. 15:21.
Tikki mardosa si Adam, gabe mate ma ibana dohot sude pinopparna. Alai ala dipahehe Debata do Anakna, boi ma lam denggan ngolutta di ari na naeng ro. “Haheheon ni halak na mate ro do i sian sahalak jolma”, i ma Jesus. Didok Apostel Paulus do, “Songon sude jolma mate alani si Adam, suang songon i ma sude jolma mulak mangolu alani Kristus.” (1 Kor. 15:22) Sude jolma na didok si Paulus dison, i ma pinoppar ni si Adam na gabe mardosa alani si Adam. Alani dosa i, gabe mate ma nasida. (Rom 5:12) Jadi tikki didok si Paulus na lao “mulak mangolu” halak na mate, dang termasuk si Adam disi. Tobusan ni Jesus, dang marlakku tu si Adam. Ai sengaja do ibana mangalo Debata. Alani i, na masa tu si Adam sarupa do tu na lao masa tu akka halak na dos songon “hambing”. Na lao diuhumi “Anak ni jolma” i ma nasida “tu hamatean saleleng ni lelengna”.—Mat. 25:31-33, 46; Heb. 5:9. w20.12 5 ¶13-14
Jumat, 22 Juli
Diparrohahon [Jahowa] do halak na serep marroha.—Ps. 138:6.
Molo dang dapotta tugas di huria, taingot ma contoh suru-suruan na setia. Di tikki ni Raja Ahab, hea do dipangido Jahowa pandapot ni akka suru-suruan taringot carana mangoto-otoi si Ahab. Alai holan pandapot ni sada suru-suruan do na jadi. (1 Raj. 22:19-22) Gabe mandele do akka suru-suruan na asing jala didok di bagasan rohana, ‘Ala loja au mangalehon pandapotti.’ Tottu daong ate. Serep do roha ni akka suru-suruan i jala Jahowa do na dipasangap nasida. (Pangh. 13:16-18; Pgk. 19:10) Sada hasangapon do gabe Saksi Jahowa jala paboahon barita Harajaon. Sasittongna, dang penugasanta na mambahen hita mararga di jolo ni Debata. Alai molo serep rohatta gabe arga ma hita di Jahowa dohot di akka donganta. Jadi pangido ma tu Jahowa asa diurupi hamu toktong marserep ni roha. Tatiru ma akka naposo ni Debata na marserep ni roha na disurat di Bibel. Jala sai rade ma hita mangurupi akka donganta.—1 Ptr. 5:5. w20.12 26 ¶16-17
Sabtu, 23 Juli
Jalo hamu ma muse takkuluk bosi, i ma mamikkirhon haluaon na sian Debata. Jala jalo hamu ma podang na sian tondi parbadia, i ma hata ni Debata.—Eps. 6:17.
Takkuluk bosi manggombarhon harapan, manang mamikkirhon haluaon sian Jahowa. Pos do rohatta, leanon ni Jahowa do upa tu akka halak na mangulahon lomo ni rohana. Jala pos do rohatta paheheonna do hita molo tung pe mate hita. (1 Tes. 5:8; 1 Tim. 4:10; Tit. 1:1, 2) Harapan pe boi manjaga pikkiranta. Molo sai tapaima-ima do akka janji ni Debata, dang menyerah hita nang pe godang masalahta. Tapakke ma takkuluk bosi i, tasesuaihon ma cara marpikkirta tu cara marpikkir ni Jahowa. Misalna taringot tu hepeng. Dang marhaposan tu hamoraon be hita, alai marhaposan tu Debata. (Ps. 26:2; 104:34; 1 Tim. 6:17) Podang na sian tondi parbadia, manggombarhon Hata ni Debata. Podang on, boi mangaruppakkon ajaran dohot hasomalan na sala. (2 Kor. 10:4, 5; 2 Tim. 3:16, 17; Heb. 4:12) Songon dia do carana mamakke podang i? Belajar pribadi ma hita, jala taulahon ma pelatihan na tajalo sian organisasi ni Jahowa.—2 Tim. 2:15. w21.03 27 ¶4; 28-29 ¶10-11
Minggu, 24 Juli
Di Pulo Patmos do au nuaeng ala hubaritahon taringot tu Debata dohot taringot tu Jesus.—Pgk. 1:9.
Nang pe dipenjarahon si Johannes, alai toktong do dipikkirhon ibana akka dongan sahaporseaon. Misalna tikki di Pulo Patmos si Johannes mandapot parnidaan ma ibana. Disuratton ma i jala dikirim ma tu akka huria asa diboto nasida “akka na lao masa satokkin nai”. (Pgk. 1:1) Dung malua ibana, disurat ma bukku Johannes na patorakkon parngoluon ni Jesus. Dung i disurat ibana ma muse bukku 1, 2, dohot 3 Johannes lao patoguhon akka dongan sahaporseaon. Boi do hita maniru pengorbanan ni si Johannes. Dijujui portibi ni Sibolis on do hita mamakke sude gogo dohot tikkitta mangalului hepeng dohot pasangappon diri sandiri. Alai adong do na boi diulahon halak Kristen lao patuduhon holongna tu akka jolma. Dipakke nasida do ngolu dohot tikki ni nasida paboahon barita na uli taringot Harajaon. w21.01 10 ¶9-10
Senin, 25 Juli
Dihaholongi si Jonatan do si Daud dos songon makkaholongi dirina.—1 Sam. 18:1.
Boi do sebenarna cemburu si Jonatan tu si Daud. Ala ibana do anak ni Raja Saul, jadi boi do dohononna ibana do na ikkon manggattihon bapakna gabe raja. (1 Sam. 20:31) Alai serep do roha ni si Jonatan, jala setia do ibana tu Jahowa. Didukung ibana do keputusan ni Jahowa na mamillit si Daud gabe raja. Setia do ibana tu si Daud, nang pe gabe muruk si Saul alani i. (1 Sam. 20:32-34) Ala dihaholongi si Jonatan do si Daud, dang dianggap ibana gabe saingan si Daud i. Pemanah na malo do si Jonatan, jala sahalak tentara na barani. Ditanda halak do si Jonatan dohot bapakna si Saul, ‘ukkatop sian lali’ jala ‘umgogo sian singa’. (2 Sam. 1:22, 23) Alani i, boi do sebenarna dianggarhon si Jonatan sudena i. Alai dang olo si Jonatan bersaing manang cemburu tu si Daud. Gariada longang do roha ni si Jonatan mangida habaranion ni si Daud dohot pos ni rohana tu Jahowa. Dung dipamate si Daud si Goliat, gabe dihaholongi si Jonatan ma si Daud, dos songon dirina. w21.01 21 ¶6; 22 ¶8-9
Selasa, 26 Juli
Ulu ni borua i ma bawa.—1 Kor. 11:3.
Sude halak Kristen, Jesus na sempurna do kepalana. Alai dung marrumah tangga sahalak borua, bawa na so sempurna nama na gabe kepalana. Alani i gabe tantangan do on. Jadi andorang so marrumah tangga dope ibana, denggan do jolo dipikkiri ibana akka sukkun-sukkun on, ‘Aha do na mambahen pos rohakku molo halletton boi gabe kepala keluarga na denggan? Jahowa do na uppetting di ngoluna? Molo dung marrumah tangga hami haduan, aha do na mambahen pos rohakku boi ibana mangurupi keluarganami torus marale-ale tu Jahowa?’ Asing ni i, porlu do muse sukkunonna dirina, ‘Halak na songon dia do au? Boi do hubahen annon lam denggan rumah tangganami? Halak na sabar do au jala burju? Jonok do au tu Jahowa?’ (Pjm. 4:9, 12) Jadi sebelum marrumah tangga, porlu do marbisuk sahalak borua lao mambahen keputusan na denggan asa marlas ni roha annon keluargana. Godang do donganta borua na gabe sitiruon na denggan ala olo unduk tu suamina. Pasti lomo do rohatta mamuji nasida. w21.02 8 ¶1-2
Rabu, 27 Juli
Ro ma ho tu Makedonia, jala urupi ma hami.—Ul. 16:9.
Di piga-piga taon na parpudi on, godang do akka donganta na marsiajar bahasa na asing asa boi mangalehon na dumenggan tu Jahowa di ulaon marbarita jala asa boi mangurupi huria na makkaporluhon parbarita. Nasida sandiri do na mambahen keputusan i asa boi mangalehon gumodang tikki dohot gogo lao marhobas tu Jahowa. Nang pe porlu do ra martaon-taon asa boi nasida malo makkatai di bahasa i, alai balga do pengaruh ni nasida tu huria. Akka parange ni nasida na denggan dohot pengalaman ni nasida boi do patoguhon huria. Taargai do akka donganta on ala olo mambahen pengorbanan. Dang boi akka sintua mamutusson molo sahalak donganta dang boi gabe sintua manang hamba pelayanan, holan ala dang malo dope ibana makkatai di bahasa na dipakke di huria i. Alai dibahen nasida do penilaian hombar tu persyaratan na adong di Bibel taringot tu sintua dohot hamba pelayanan. Jadi dibahen akka sintua pe keputusan i, dang alani kemampuan bahasa ni donganta i.—1 Tim. 3:1-10, 12, 13; Tit. 1:5-9. w20.08 30 ¶15-16
Kamis, 28 Juli
Hamu akka donganku, las ma rohamuna molo masa tu hamu akka sitaonon.—Jak. 1:2.
Godang do halak mandok molo godang hepeng, sehat hita, jala las roha ni keluargatta, baru pe boi las rohatta. Alai sian surat ni si Jakobus taboto ma boi do hita marlas ni roha dang soal aha na masa di ngolutta. Alana las ni roha i parbue ni tondi parbadia do. (Gal. 5:22) Boi do halak Kristen marlas ni roha situtu molo ditiru ibana teladan ni Jesus Kristus jala dibahen ibana las roha ni Jahowa. (Luk. 6:22, 23; Kol. 1:10, 11) Dipatudos do las ni roha i songon api ni lampu sapporong na torus galak di bagasan kaca nang pe mangullus alogo. Songon i ma las ni roha ni halak Kristen. Dang mittop las ni roha i molo tung pe marsahit manang susa di parhepengon. Jala dang mago las ni roha molo tung pe adong paraloan sian keluarga manang sian na asing. Gariada boi do tamba las ni rohatta nang pe torus adong sitaonon. Alana akka sitaonon i patuduhon na tutu do hita sisean ni Jesus. (Mat. 10:22; 24:9; Joh. 15:20) Alani i do disurat si Jakobus songon di ayat sadari on. w21.02 27 ¶6
Jumat, 29 Juli
Boi do tarapul [roha] alani akka hata na denggan.—Poda 12:25.
Molo adong akka ayat ni Bibel na boi patoguhon haporseaotta tu Jahowa, taingot ma i. Asa lam mura taingot akka ayat i marsoara ma hita tikki manjaha, tasurat ma i, jala jotjot ma tajaha muse. Najolo diparettahon Jahowa do tu si Josua asa marsoara ibana tikki manjaha Patik. Dung i boi ma ibana marhasil jala marbisuk. Molo diihutton ibana paretta ni Jahowa i, gabe boi ma ibana marhasil mamimpin bangso ni Jahowa. (Jos. 1:8, 9) Saonari godang do situasi na mambahen hita marsak jala mabiar. Alai adong do akka ayat ni Bibel na boi patoguhon hita asa toktong tenang jala dame. (Ps. 27:1-3; Poda 3:25, 26) Molo ro hita tu parpunguan dipatogu do hita marhite acara parpunguan, komentar ni akka dongan, jala dipatogu do hita tikki makkata-hatai dohot nasida. (Heb. 10:24, 25) Boi do hita diurupi akka dongan di huria molo tapaboa holso ni rohatta tu nasida. w21.01 6 ¶15-16
Sabtu, 30 Juli
Gabe sitiruon ma ho tu akka halak na setia.—1 Tim. 4:12.
Tikki tardidi hamu, nungnga dipatudu hamu na balga haporseaonmuna tu Jahowa. Las do roha ni Jahowa ala nungnga gabe bagian ni keluargana hamu. Nang pe songon i, ikkon torus do hamu mangandalhon Jahowa. Biasana tikki mambahen keputusan na balga pengaruhna, pittor tapangido do bisuk sian Jahowa. Alai boha na so pola balga pengaruhna? Balga manang dang pengaruh ni sada keputusan, ikkon jolo tajalo do petunjuk sian Jahowa. Termasuk ma i tikki mamillit hiburan, parkarejoan, manang tikki mambahen cita-cita. Unang ma andalhon pikkiranmuna sandiri. Alai lului ma prinsip ni Bibel na cocok tu situasimuna jala ulahon ma i. (Poda 3:5, 6) Molo diulahon hamu i, gabe las ma roha ni Jahowa mangida hamu. Jala gabe direspek akka dongan di huria ma hamu. Jolma na so sempurna do hita sude. Sipata olo do hita mambahen hasalaan. Alai unang ma gabe mabiar hita mangulahon tugas sian Jahowa. w21.03 6 ¶14-15
Minggu, 31 Juli
Dipalua do au sian baba ni singa.—2 Tim. 4:17.
Adong do keluargamuna na marsogo ni roha ala Saksi Jahowa hamu? Tinggal di negara na mangorai ulaon ni Saksi Jahowa do hamu? Molo songon i do situasimuna, boi do hamu dipatogu molo dijaha hamu 2 Timoteus 1:12-16 dohot 4:6-11, 17-22, na disurat Apostel Paulus tikki dipenjara ibana. Sebelum dijaha hamu akka ayat on, paboa ma tu Jahowa masalahmuna dohot perasaanmuna. Takkas ma sudena paboa. Dung i, pangido ma asa diurupi hamu mangattusi prinsip na adong di ayat i, asa boi marhasil mangatasi tantangan i. Nungnga dipaboa Jahowa hian na lao dianiaya nama si Paulus. (Ul. 21:11-13) Rimangi ma muse, “Songon dia do cara ni Jahowa mangurupi si Paulus asa martahan manaon hasusaanna i?” Dialusi Jahowa do tangiangna jala dibahen do ibana margogo. (2 Tim. 4:17) Marjanji do Jahowa mangalean upa ni kerja kerasna i. Jala dipakke Jahowa do akka dongan ni si Paulus na setia lao mangurupi ibana. w21.03 17-18 ¶14-15, 19