Oktober
Sabtu, 1 Oktober
“Ise ma na boi mamboto pikkiran ni Jahowa jala na boi mangajari Ibana?” Alai adong do di hita pikkiran ni Kristus.—1 Kor. 2:16.
Molo taboto cara marpikkir ni Jesus jala tatiru i, gabe lam solhot ma hita tu ibana. Boha carana maniru Jesus? Parrohahon ma sada contoh. Unlomo do roha ni Jesus mangurupi halak na asing sian pasonakkon dirina sandiri. (Mat. 20:28; Rom 15:1-3) Alani i, rade do ibana mambahen pengorbanan jala manalpuhon hasalaan ni halak. Dang mura ibana tersinggung tikki adong na mandok na hurang denggan taringot ibana. (Joh. 1:46, 47) Jala, dang sai diingot-ingot ibana hasalaan ni halak. (1 Tim. 1:12-14) Didok Jesus, “Molo masihaholongan hamu, botoon ni sude jolma ma na siseanku hamu.” (Joh. 13:35) Jadi tasukkun ma di rohatta, ‘Marsitutu do au maniru Jesus lao mardame tu akka dongan?’ w20.04 24 ¶11
Minggu, 2 Oktober
Pasangapon ni nasida ma goarhu.—Jes. 29:23.
Molo taajarhon hasittongan taringot Bibel tu akka halak, hita patuduhon holan Jahowa do na tama mamaretta. Tapatudu ma na lomo do rohatta mamillit Jahowa asa gabe Pamimpin di hita. Taurupi ma akka halak asa mangattusi holan Jahowa do na tigor mamaretta, jala boi do Ibana parohon hadameon dohot las ni roha tu sude toppaanna. (Ps. 37:9, 37; 146:5, 6, 10) Alai, na urrikkot dang holan paboahon taringot uhum ni Debata. Ikkon taurupi do akka halak asa makkaholongi Jahowa jala marsihohot tu Ibana. Ikkon takkas do tapaboa taringot parange na denggan sian Jahowa, jala Debata na songon dia do Ibana. (Jes. 63:7) Molo i do na taajarhon tu akka halak, gabe taurupi ma nasida asa makkaholongi Jahowa jala unduk tu Ibana. w20.06 6 ¶16; 7 ¶19
Senin, 3 Oktober
Ai ise huroa na mambahen baba ni jolma? Au do Jahowa na boi mambahen i.—2 Mus. 4:11.
Massai denggan do ditoppa Jahowa utok-utokta. Tikki di bortian dope hita, nungnga ditottuhon hian songon dia perkembangan ni utok-utokta. Jala ganup minut, adong marribu sel baru di utok-utok i! Akka peneliti mandok, di bagasan utok-utok ni halak naung dewasa, adong hira-hira 100 miliar sel na digoari neuron na dibentuk gabe utok-utok na boratna 1,5 kilogram. Sada na boi diulahon utok-utok ni jolma i ma mambahen gabe boi hita makkatai. Rimangi ma aha na masa di utok-utokta tikki makkatai hita. Holan sada hata pe na tadok, adong hira-hira 100 otot na ikkon diatur utok-utok asa boi bergerak, i ma akka otot na adong di dila, aru-aru, bibir, rahang, dohot andora. Sude otot i ikkon bergerak di tikki na pas, asa jelas hata na tadok jala boi diattusi halak na mambege. Adong hasil penelitian di taon 2019 na mandok, poso-poso na baru tubu pe nungnga boi mangattusi sada hata na dibege ibana. Jadi takkas ma, sada silehon-lehon sian Debata do ala boi hita makkatai. w20.05 22-23 ¶8-9
Selasa, 4 Oktober
Dipaima-ima si Abraham do kota na marfondasi na togu, i ma kota na dibahen jala na dipajongjong Debata.—Heb. 11:10.
Olo do si Abraham manadikkon ngoluna na tabo di kota Ur. Boasa? Ala dipaima ibana do “kota na marfondasi na hot”. (Heb. 11:8-10, 16) Kota na dipaima si Abraham, i ma Harajaon ni Debata. Harajaon i diuluhon Jesus Kristus dohot 144.000 halak Kristen na miniahan. Digoari si Paulus do Harajaon i “kota ni Debata na mangolu i, i ma Jerusalem na di banua ginjang”. (Heb. 12:22; Pgk. 5:8-10; 14:1) Diajarhon Jesus do akka siseanna lao manangiakkon asa ro Harajaon i, jala asa saut lomo ni roha ni Debata di tano on, songon na di banua ginjang. (Mat. 6:10) Diboto si Abraham do songon dia Jahowa pajongjokkon Harajaon i? Daong. Saleleng marratus taon, gabe “rahasia na badia” do i. (Eps. 1:8-10; Kol. 1:26, 27) Alai, diboto si Abraham do na lao gabe raja do akka pinopparna, songon naung dijanjihon Jahowa tu ibana.—1 Mus. 17:1, 2, 6. w20.08 2-3 ¶2-4
Rabu, 5 Oktober
Toktong ma hamu marpangalaho songon [Tuan i] . . . ikkon marurat do haporseaonmuna, togu, jala dipajongjong di ginjang ni Kristus i.—Kol. 2:6, 7.
Unang ma taihutton ajaran ni akka halak na murtad. Sian jaman ni halak Kristen di abad na parjolo, sai marsitutu do Sibolis lao mambahen gale haporseaon ni halak Kristen. Alani i, ikkon boi do taboto dia na sittong jala dia do na so sittong. Olo do ra dipakke akka musutta Internet manang media sosial lao mambahen gale haporseaotta tu Jahowa dohot holongta tu akka dongan. Alai unang ma porsea tu akka gabus i alana sian Sibolis do i! (1 Joh. 4:1, 6; Pgk. 12:9) Asa boi hita pasidikkon jorat ni Sibolis, ikkon tapabagas do haporseaotta tu Jesus. Ikkon pos do rohatta tu cara ni Jahowa mamakke Jesus lao mangulahon lomo ni rohana. Jala ikkon pos do rohatta tu akka halak naung dipillit Jahowa lao manguluhon organisasina saonari. (Mat. 24:45-47) Boi ma lam bagas haporseaotta molo ringgas hita marsiajar Bibel. Dung i boi ma lam bagas haporseaotta, songon hau na lam bagas akarna masuk tu tano. I do tong na ditaringoti Apostel Paulus tikki disurat ibana ayat sadari on. w20.07 23-24 ¶11-12
Kamis, 6 Oktober
Ai rupa do na niida ni jolma, alai anggo Jahowa roha do na niidana.—1 Sam. 16:7.
Ala jolma na so sempurna do hita, olo do pittor hatop tauhumi sasahalak sian penampilanna. (Joh. 7:24) Alai dang boi tabahen penilaian tu sasahalak holan sian na boi taida. Uppamana, dokter na berpengalaman jala na malo pe, dang boi ibana mamboto takkas sahit ni sahalak pasien molo holan mangida halakna. Ikkon jolo ditangihon ibana do pasienna i. Asa diboto songon dia do kesehatanna saleleng on, boha do pakkilalaanna, jala aha do keluhanna. Jala adong do dokter na ikkon ma-rontgen pasienna. Alana molo dang, olo do gabe sala diagnosa. Suang songon i ma, dang boi pittor taattusi situasi ni akka donganta molo holan mamereng sian penampilanna. Ikkon marsitutu do hita mangattusi na di bagasan rohana, asa taboto halak na songon dia do ibana. Marsitutu ma tatiru Jahowa. w20.04 14-15 ¶1-3
Jumat, 7 Oktober
Marbisuk ma hamu.—Rom 12:3.
Ikkon marsitutu do hita asa toktong marserep ni roha. Alana halak na so “marbisuk” do na ginjang rohana. Halak na ginjang rohana, lomo rohana marbadai jala marpikkir urrikkot do dirina sian na asing. Molo dang muba halak sisongon i, boi do gabe sega pikkiran ni nasida i dibahen Sibolis. (2 Kor. 4:4; 11:3) Alai halak na serep roha seimbang do carana mangida dirina sandiri, jala diattusi ibana do dumenggan do halak na asing sian ibana. (Plp. 2:3) Jala diboto ibana “dihasogohon Debata do ginjang ni roha, alai dipatuduhon Ibana do asi ni rohana na mansai balga i tu halak na serep marroha”. (1 Ptr. 5:5) Asa toktong serep rohatta, ikkon taulahon do poda di Bibel na mandok asa tatanggalhon pangalaho na leleng dohot akka na taulahon najolo. Jala tapakke ma pangalaho na imbaru. Ikkon marsiajar do hita sian Jesus, jala ikkon marsitutu do hita lao maniru ibana.—Kol. 3:9, 10; 1 Ptr. 2:21. w20.07 7 ¶16-17
Sabtu, 8 Oktober
Songon sada daging . . . nang pe marragam jala godang bagian-bagianna, alai sada daging do sudena i.—1 Kor. 12:12.
Sada hasangapon do di hita boi gabe bagian sian huria ni Jahowa! Dipatudos Apostel Paulus do huria i songon pamatangta. Jala akka halak di huria songon bagian ni pamatangta. (Rom 12:4-8; 1 Kor. 12:12-27; Eps. 4:16) Didok si Paulus, “Ai sada do pamatang i alai godang do ruasna, jala marasing-asing be do ulaonna. Songon i ma nang hita, nang pe godang hita alai marsada do hita di bagasan Kristus. Jala sude do angka ruas ni pamatang i masiurupan.” (Rom 12:4, 5) Aha do maksud ni si Paulus di ayat i? Mararga do sude hita di huria nang pe marasing-asing tugas na tadapot. w20.08 20 ¶1-2, 4
Minggu, 9 Oktober
Disukkun Jahowa ma tu ibana, “Songon dia ma bahenonmu?”—1 Raj. 22:21.
Akka natua-tua, boi do ditiru hamu Jahowa. Sukkun ma pandapot ni ianakkonmuna taringot songon dia mangulahon sada tugas. Jala molo cocok do pandapotna i, boi ma diihutton hamu i. Sabar do Jahowa nang pe adong na so marpos ni roha tu cara ni Ibana mambahen keputusan. Ditangihon Ibana do si Abraham tikki didok si Abraham dang setuju ibana tu keputusan ni Jahowa lao mangaripasson Sodom dohot Gomora. (1 Mus. 18:22-33) Jala ingot ma cara ni Jahowa maradoppon istri ni si Abraham, i ma si Sara. Mekkel do si Sara tikki dibege ibana janji ni Jahowa boi ibana hamil nang pe nungnga matua. Alai dang gabe muruk Jahowa tu ibana. (1 Mus. 18:10-14) Gariada, diargai Jahowa do si Sara. Aha do na boi diparsiajari akka natua-tua sian Jahowa? Songon dia do reaksimuna molo ianakkonmuna manang akka dongan di huria dang setuju tu keputusanmuna? Pittor disalahon hamu do nasida? Manang olo do hamu manangihon pandapot ni nasida? Pasti godang do labana molo ditiru akka natua-tua dohot akka sintua Jahowa. w20.08 10 ¶7-9
Senin, 10 Oktober
Lam balga do huasokku alani hagaleonmi.—2 Kor. 12:9.
Tikki parjolo sahali mananda hasittongan, tottu lomo do rohatta diurupi na asing. (1 Kor. 3:1, 2) Alai boha do saonari? Olo do ra nungnga martaon-taon hamu di hasittongan, jala nga godang be pengalamanmuna. Jadi olo do dang lomo rohamu mangido pangurupion sian na asing, tarlumobi sian akka dongan na baru dope di hasittongan. Alai sasittongna, jotjot do dipakke Jahowa akka donganta lao patoguhon hita. (Rom 1:11, 12) Jadi asa boi mandapot gogo sian Jahowa, ikkon olo ma hita diurupi akka dongan. Marhasil pe sasahalak dang alani gogona, sikkola, hamoraon manang sukuna. Alai ala serep do rohana jala toktong mangasahon Jahowa. Anggiat ma hita boi toktong (1) mangasahon Jahowa, (2) marsiajar sian akka contoh di Bibel, jala (3) olo diurupi akka donganta. w20.07 14 ¶2; 18-19 ¶18-19
Selasa, 11 Oktober
Asa toktong hamu ringgas songon naung dibahen hamu saleleng on . . . unang ma gabe malas hamu. Alai lomo do rohakku ditiru hamu akka halak na porsea jala na sabar. Ai nasida do na gabe manjalo akka na dijanjihon Debata.—Heb. 6:11, 12.
Maol do patuduhon hasabaron tikki marbarita na uli tu keluarga na so Sitindangi. Alai, taingot ma prinsip di Parjamita 3:1, 7, Bibel siganup ari na mandok, “Adong do tingki hohom, adong do tingki mangkatai.” Molo denggan pangalahotta olo do ra keluargatta manangihon barita na tapaboa. (1 Ptr. 3:1, 2) Ikkon semangat do hita marbarita dohot mangajari. Alai ikkon toktong do sabar hita tu sude halak, termasuk ma i tu keluargatta na so Sitindangi. Boi do tatiru hasabaron ni akka halak na setia na disurat di Bibel dohot di tikkitta saonari. Lomo do roha ni si Habakuk asa unang adong be hajahaton. Alai sabar do ibana paimahon alus ni Jahowa. (Hab. 2:1) Apostel Paulus pe lomo do rohana asa pittor sae ulaonna marbarita. Alai, toktong do ibana sabar “paboahon barita na uli”.—Ul. 20:24. w20.09 11-12 ¶12-14
Rabu, 12 Oktober
Dang hea tarpikkir [Jesus] lao mambahen asa sarupa ibana tu Debata.—Plp. 2:6.
Dang olo Jesus asa gabe sarupa songon Bapakna. Dang didok rohana urrikkot do dirina sian na asing. Molo serep rohatta, gabe lam balga ma holongta tu akka dongan. Jala gabe ditanda ma hita naposo ni Debata. (Luk. 9:48; Joh. 13:35) Boha molo adong parsoalan di huria, jala dihilala hamu dang denggan cara ni akka sintua menangani parsoalan i? Unang ma marungut-ungut. Toktong ma unduk tu akka dongan na manguluhon hamu. (Heb. 13:17) Sukkun ma dirimuna, ‘Memang serius hian do parsoalan on umbahen ikkon hupasingot akka sintua i? Cocok do molo saonari hupasingot nasida? Memang tugashu do lao pasingotton nasida? Sasittongna, aha do tujuanku pasingotton nasida, asa mambahen huria gabe marsada do, manang holan naeng pasangappon dirikku sandiri?’ Jadi marsitutu ma asa toktong serep rohatta manomba Jahowa asa marsada huria.—Eps. 4:2, 3. w20.07 4-5 ¶9-11
Kamis, 13 Oktober
Ninna Jesus ma tu nasida, “Unang pola mabiar hamu! Lao ma hamu mandapotton akka haha anggikku.”—Mat. 28:10.
Diargai Jesus do akka borua na ‘mamakke arta ni nasida lao makkobasi Jesus’. (Luk. 8:1-3) Dipaboa Jesus do tu nasida hasittongan taringot lomo ni roha ni Debata. Misalna, dipaboa Jesus do tu nasida lao mate nama ibana jala dipahehe muse. (Luk. 24:5-8) Dang holan siseanna na diparade Jesus mangadopi aha na lao masa, alai dohot do tong akka borua on. (Mrk. 9:30-32; 10:32-34) Lari do akka siseanna tikki ditakkup Jesus. Alai toktong do akka borua i mandongani Jesus sahat tu na lao mate Jesus di tiang. (Mat. 26:56; Mrk. 15:40, 41) Akka borua do na parjolo sahali mamboto molo Jesus nungnga dipahehe. Dipangido Jesus do asa dipaboa nasida tu akka apostel naung hehe ibana. (Mat. 28:5, 9, 10) Tikki Pentakosta taon 33 M, dohot do ra akka borua manjalo tondi parbadia songon sisean na asing. Gabe boi ma nasida makkatai di bahasa na asing, jala paboahon “taringot tu ulaon ni Debata na balga” tu akka halak.—Ul. 1:14; 2:2-4, 11. w20.09 23 ¶11-12
Jumat, 14 Oktober
Toktong ma parrohahon dirim dohot na diajarhonmi.—1 Tim. 4:16.
Di Mateus 28:19, 20 dilehon Jesus do paretta, “Laho ma hamu, bahen ma saluhut halak . . . gabe siseanku, didi hamu ma nasida.” Boasa rikkot mangurupi sasahalak asa tardidi? Alana ikkon tardidi do ibana asa boi malua. Alai tikki naeng tardidi sasahalak, ikkon jolo porsea do ibana boi dapotna hangoluan salelengna ala nungnga mate Jesus jala dipahehe. I do alana didok Apostel Petrus tu halak Kristen, ‘Pandidion i do na paluahon hamu marhite haheheon ni Jesus Kristus.’ (1 Ptr. 3:21) Tikki mambahen sisean, ikkon gabe “sahalak guru na malo mangajari” do hita. (2 Tim. 4:1, 2) Boasa? Alana Jesus mandok, “Laho ma hamu, bahen ma saluhut halak . . . gabe siseanku, . . . Ajari hamu ma nasida.” Didok Apostel Paulus do, “Marsitutu ma ho mangulahon i, ai molo diulahon ho i na paluahon dirim do ho dohot na manangihon ho.” w20.10 14 ¶1-2
Sabtu, 15 Oktober
Mulai sian saonari, gabe sijala jolma nama ho.—Luk. 5:10.
Marsiajar do sisean ni Jesus, i ma si Petrus asa lomo rohana gabe sijala jolma. Ala diurupi Jahowa, gabe malo ma si Petrus mangulahon ulaonna i. (Ul. 2:14, 41) Holongta tu Jahowa mambahen hita semangat marbarita na uli jala paboahon taringot Ibana tu na asing, nang pe tahilala dang pola malo hita. Tikki digokkon Jesus si Petrus asa gabe sijala jolma, didok Jesus ma tu ibana, ‘Unang mabiar ho.’ (Luk. 5:8-11) Dang na mabiar si Petrus taringot tu aha na lao masa molo ibana gabe sisean ni Jesus. Alai di tikki i, longang do ibana mangida godang ni dekke na dapot ni nasida. Gabe dihilala si Petrus ma dang tama ibana saulaon dohot Jesus. Alai mabiar do ra hamu tu akka na lao ulahononmuna molo gabe sisean ni Kristus. Molo songon i do pakkilalaanmuna, patogu ma holongmuna tu Jahowa, tu Jesus, dohot tu akka dongan. Ujungna, gabe rade ma hamu manjalo gokkon ni Jesus gabe sijala jolma.—Mat. 22:37, 39; Joh. 14:15. w20.09 3 ¶4-5
Minggu, 16 Oktober
Lao ma hamu, bahen hamu ma . . . , gabe siseanku, ajari hamu ma nasida.—Mat. 28:19, 20.
Tapakke ma tikkitta, gogotta, dohot artatta lao mangalului “halak na marpangalaho na denggan na mambahen nasida tama mandapot hangoluan na saleleng ni lelengna”. (Ul. 13:48) Jesus mandok, “Sipanganonku i ma mangulahon lomo ni roha ni na marsuru ahu jala pasaehon ulaonna.” (Joh. 4:34; 17:4) Hita pe, lomo do rohatta pasaehon tugas naung dilehon Jesus tu hita. (Joh. 20:21) Jala lomo do rohatta asa boi sude hita pasaehon tugas on, dohot ma i mangurupi akka dongan na so aktif. (Mat. 24:13) Memang dang mura mangulahon paretta ni Jesus on. Marjanji do Jesus na dongananna do hita. Jala “dongan saulaon ni Debata” do hita. (1 Kor. 3:9; 2 Kor. 2:17) Jadi pasti marhasil do hita mangulahon i. Sada hasangapon do di hita ala boi hita mangulahon tugas on jala mangurupi akka halak asa boi dohot mangulahon i!—Plp. 4:13. w20.11 7 ¶19-20
Senin, 17 Oktober
Lam magodang ma Jesus, lam marbisuk, jala lam dihalomohon Debata dohot jolma ma ibana.—Luk. 2:52.
Keputusan na dibahen natua-tua boi do berpengaruh tu ngolu ni ianakkonna. Molo dibahen nasida do keputusan na denggan, gabe boi ma marlas ni roha ianakkonna di ngoluna. Tottu, ianakkonna pe ikkon mambahen keputusan na denggan do di ngoluna. Keputusan na massai denggan na boi dibahen sasahalak, i ma manomba Jahowa. (Ps. 73:28) Marsitutu do si Josep dohot si Maria mangurupi ianakkonna asa manomba Jahowa. Jala keputusan ni nasida pe patuduhon Jahowa do na urrikkot di ngoluna. (Luk. 2:40, 41, 52) Dibahen Jesus do muse keputusan na denggan na boi mangurupi ibana mangulahon lomo ni roha ni Jahowa. (Mat. 4:1-10) Pasti lomo do roha ni sude natua-tua molo songon Jesus ianakkonna. w20.10 26 ¶1-2
Selasa, 18 Oktober
Tigor ma ho mamereng tu jolo.—Poda 4:25.
Bayakkon ma contoh on. Sahalak donganta borua na matua, mangingot akka na denggan na dihilala ibana tikki poso. Alai saonari, nang pe nga lam matua jala godang hasusaanna, dibahen ibana do nasa tolapna mangulahon lomo ni roha ni Jahowa. (1 Kor. 15:58) Ganup ari sai dibayakkon ibana do dirina, dohot akka halak na dihaholongi ibana tinggal di Paradeiso. Adong muse donganta borua na haccit rohana dibahen sasahalak di huria, alai dang sai torus diingot ibana i. (Kol. 3:13) Sahalak donganta bawa mangingot hasalaanna najolo, alai sai fokus do ibana asa boi toktong setia tu Jahowa saonari. (Ps. 51:10) Aha do na sarupa sian pengalaman ni tolu donganta on? Sude do nasida mangingot akka na masa di tikki naung salpu. Alai dang sai torus dipikkiri nasida i, sai ‘tu jolo do nasida mamereng’. Boasa on rikkot? Molo sai tapikkiri aha na masa di tikki naung salpu, dang boi be hita fokus tu ulaonta manomba Jahowa.—Luk. 9:62. w20.11 24 ¶1-3
Rabu, 19 Oktober
Diparekkeli ma si Daud jala direhei.—1 Sam. 17:42.
Dirippu si Goliat, gale do si Daud. Alana balga do si Goliat, godang sinjatana, jala nga tarlatik be ibana lao marporang. Hape, poso dope si Daud, dang adong pengalamanna. Jala dang tarlatik ibana lao marporang. Alai si Daud mangasahon gogo sian Jahowa do ibana, jala boi ma ditaluhon ibana si Goliat. (1 Sam. 17:41-45, 50) Adong muse abbat-abbat na asing na ikkon diadopi si Daud. Unduk do ibana tu raja na dipillit Jahowa, i ma si Saul. Mulana, lomo do roha ni Raja Saul tu si Daud. Alai, gabe ginjang do roha ni Saul jala mangiburu do ibana tu si Daud. Jahat do ibana tu si Daud, gariada naeng bunuonna do si Daud. (1 Sam. 18:6-9, 29; 19:9-11) Nang pe jahat Raja Saul tu si Daud, alai toktong do unduk si Daud tu raja naung dipillit Jahowa i. (1 Sam. 24:6) Pos do roha ni si Daud, lehonon ni Jahowa do gogo asa boi ibana martahan mangadopi ambat-ambat i.—Ps. 18:1, superskripsi. w20.07 17 ¶11-13
Kamis, 20 Oktober
Di tikki ari parpudi, ro ma Raja Selatan mangalo ibana. Dung i dialo Raja Utara ma ibana.—Dan. 11:40.
Nungnga masa be deba surirang taringot raja utara dohot raja selatan. Alani i, pos do rohatta molo haduan pasti do masa sude isi ni surirang i. Asa boi taattusi surirang na disurat di Daniel 11, ikkon taingot do molo surirang i mangulas holan taringot akka pamarettaon na mangalo naposo ni Debata. Memang otik do naposo ni Debata dibandingkon godang ni akka halak di portibi on. Alai nasida do na unjotjot dialo akka pamarettaon i. Boasa? Alana holan sada do tujuan ni Sibolis dohot pamarettaonna, i ma lao mambunu akka halak na manomba Jahowa jala mangihutton Jesus. (1 Mus. 3:15; Pgk. 11:7; 12:17) Asing ni i, ikkon sadalan do surirang ni si Daniel on tu akka surirang na asing na disurat di Bibel. Jadi asa lam takkas taattusi surirang ni si Daniel on, porlu do tabandingkon i tu akka ayat na asing na adong di Bibel. w20.05 2 ¶1-2
Jumat, 21 Oktober
Songon dia do halak na mate boi dipahehe? Daging na songon dia do lehononna tu nasida?—1 Kor. 15:35.
Marasing-asing do pangattusion ni halak taringot na masa tu halak na mate. Alai taparrohahon ma alus ni Bibel. Molo dung mate sasahalak, gabe busuk do dagingna. Alai boi do Debata na manoppa saluhutna pahehehon ibana jala mangalehon daging na imbaru tu ibana. (1 Mus. 1:1; 2:7) Dibahen Apostel Paulus do tudosan na patuduhon na so porlu Debata mamakke daging na leleng i lao pahehehon sasahalak. Didok si Paulus do, molo tasuan sada “boni” manang bibit, gabe suan-suanan na baru do i. Ujungna, asing do bentuk ni bibit i dohot bentuk ni suan-suanan na baru i. Jadi songon i ma bahenon ni Debata paradehon daging na imbaru na “hombar tu lomo ni rohana”. Didok si Paulus do, “Asing do daging ni angka na di banua ginjang jala asing do daging ni angka na di tano on.” Aha do lapatan ni i? Molo na di tano on, mardaging sibuk. Alai molo na di surgo, mardaging songon suru-suruan.—1 Kor. 15:36-41. w20.12 10 ¶7-9
Sabtu, 22 Oktober
Sadia leleng nai do au sai marsak? Sadia leleng nai do lungun rohakku ganup ari?—Ps. 13:2.
Dang adong sian hita na lomo rohana marsak. Alai sai adong do situasi na mambahen hita marsak jala manukkun songon Raja Daud. Misalna, tamba taon tamba do arga ni sipanganon, arga ni pakkean, dohot sewa ni jabu, jala dang tarabbati hita i. Asing ni i, dang sai taboto sadia jotjot donganta sasikkola manang donganta sakarejo menggoda hita asa unang jujur manang asa mangulahon seks na so patut. Dung i, sai tamba do hajahaton di inganatta tinggal. Masa pe sudena i, ala mangolu di tonga-tonga ni akka jolma na so mamboto prinsip ni Bibel do hita. Diboto Sibolis debata ni portibi on do, molo sai ‘holsoan hita mamikkiri parngoluan di tikki on’ boi do gabe dang tasomba be Jahowa.—Mat. 13:22; 1 Joh. 5:19. w21.01 2 ¶1, 3
Minggu, 23 Oktober
Manang ise na marsogo ni roha tu donganna pambunu do i. Jala diboto hamu do, dang adong pambunu na mandapot hangoluan na saleleng ni lelengna.—1 Joh. 3:15.
Dipasingot si Johannes do hita asa unang marsogo ni roha tu akka dongan sahaporseaon. Molo dang taoloi sipasingot on, gabe dimanfaatton Sibolis ma hita. (1 Joh. 2:11) Hea do masa on di abad na parjolo. Marsitutu do Sibolis mamola-mola naposo ni Debata asa tarbagi di huria. Tikki dibahen si Johannes suratna na patoluhon adong do na mamola-mola di huria, contohna si Diotrepes. (3 Joh. 9, 10) Dang diargai ibana akka sintua na disuru ni Punguan na Mangaradoti Organisasi di tikki i. Molo adong dongan di huria na burju tu halak na so dihalomohon rohana, dipakaluar ibana do i sian huria. Siginjang roha do si Diotrepes on. Sahat tu saonari pe marsitutu do Sibolis mamola-mola huria asa unang marsada hita. Unang ma sai torus sogo rohatta mamereng donganta, ala boi do i mambahen tarbagi huria. w21.01 11 ¶14
Senin, 24 Oktober
Dung sae nasida manurirangi, kaluar ma binatang buas . . . Marporang ma nasida dohot binatang buas i, ditaluhon ma nasida jala dibunu.—Pgk. 11:7.
Di Porang Dunia I dianiaya pamaretta Jerman dohot Inggris do akka naposo ni Debata ala dang olo dohot marporang. Jala dipenjarahon pamaretta ni Amerika Serikat do manang ise na dohot di ulaon marbarita. Akka penganiayaan on patuduhon na tutu do masa surirang na disurat di Pangungkapon 11:7-10. Dung i di taon 1930-an, tarlumobi tikki masa Porang Dunia II, kejam situtu do cara ni raja utara on lao menganiaya naposo ni Debata. Tikki i, Nazi do na mangarajai Jerman. Diorai si Hitler dohot anggotana ma ulaon marbarita. Jala dibunu nasida ma marratus Sitindangi Ni Jahowa, jala marribu na dikirim tu kamp konsentrasi. Nungnga disurirangkon si Daniel hian i. Didok di surirang i, ro ma raja utara “mangaramuni Bagas Joro”, jala mangorai “pasahathon pelean siganup ari”. Lapatanna, diorai nasida do ulaon marbarita na uli. (Dan. 11:30b, 31a, Bibel siganup ari) Jala marjanji do si Hitler pamimpin ni nasida, lao mambunu sude Sitindangi Ni Jahowa na adong di Jerman. w20.05 5-6 ¶12-13
Selasa, 25 Oktober
Haholongi ma na asing songon makkaholongi haha anggim. Jala parjolo ma hamu pasangappon halak na asing.—Rom 12:10.
Molo tahaholongi sude dongan di huria, unang ma adong semangat bersaing di hita. Si Jonatan dang cemburu tu si Daud. Jala dang dilului ibana cara, asa ibana gabe raja. (1 Sam. 20:42) Hita pe boi do maniru si Jonatan. ‘Toruk ma rohatta, jala sangap ma tabahen tu na asing.’ (Plp. 2:3) Taingot ma songon dia pe kemampuanta, mararga do hita sude di huria. Molo serep rohatta, boi ma taida akka parange na denggan sian akka donganta. (1 Kor. 12:21-25) Tikki taparrohahon akka dongan, boi ma tarapul jala marsada akka naposo ni Debata. Molo marsihaholongan hita, tarida ma na tutu hita sisean ni Jesus. Jala on boi mambahen akka halak na serep roha tertarik manomba Jahowa. Alai na paling penting, molo taulahon i tapuji ma Debata “Ama parasi roha, na lambok, jala Debata Sipangapul na sumurung”.—2 Kor. 1:3. w21.01 24 ¶14; 25 ¶16
Rabu, 26 Oktober
Dang sian portibi on hamu, . . . alani i ma umbahen na sogo roha ni portibi on tu hamu.—Joh. 15:19.
Saonari on, adong do piga-piga halak na mangaleai naposo ni Jahowa. Jala didok nasida do hita halak na oto jala gale. Boasa? Alana, dang olo hita maniru parange ni akka halak na adong di humaliangta. Marsitutu do hita patuduhon serep ni roha, lambok jala unduk. Hape di portibi on, godang do halak na holan pasangappon dirina, ginjang rohana jala mangalo. Asing ni i, dang olo hita dohot tu partai politik, jala dang olo hita gabe tentara. Ala imbar hita sian akka halak di portibi on, gabe leas do roha ni nasida mangida hita. (Rom 12:2) Nang pe songon i pandapot ni akka halak di portibi on, alai dipakke Jahowa do akka naposona lao mangulahon ulaon na massai balga. Diurupi do hita lao mambaritahon barita na uli di liat portibi on. Boi do hita mambahen majalah na unggodang diterjemahon sian akka sijahaon na asing. Jala tapakke do Bibel lao mangurupi marjuta halak asa lam denggan ngolu ni nasida. Sude on boi saut alani pangurupion ni Jahowa do. w20.07 15 ¶5-6
Kamis, 27 Oktober
Huulahon do songon na diparettahon Damang i.—Joh. 14:31.
Malo hian do Jesus tikki mangajar, jala molo patorakkon ibana mura do attusan. Nang pe malo hian Jesus jala godang keahlianna, olo do ibana unduk tu Jahowa. (Joh. 7:45, 46) Diargai Jahowa do kemampuan ni Jesus on. Ditogihon Jahowa do Jesus asa dohot manoppa sude na di surgo dohot na di tano on. (Poda 8:30; Heb. 1:2-4) Dung dipahehe Jesus, dipasahat Jahowa do muse tu ibana “huaso na di banua ginjang dohot na di tano on”. (Mat. 28:18) Nang pe songon i malo ni Jesus, alai torus do dilului ibana petunjuk sian Jahowa. Boasa? Ala massai holong do rohana tu Bapakna. Ikkon diingot akka suami do on. Dipangido Jahowa pe istri unduk tu suamina, dang ala na urrendah borua sian bawa di jolo ni Jahowa. Buktina dipillit Jahowa do bawa dohot borua rap mamaretta dohot Jesus di Harajaonna na di surgo. (Gal. 3:26-29) Dilehon Jahowa do huaso tu Jesus ala pos rohana tu ibana. Jadi akka suami pe, boi do mangalehon tanggung jawab tu istrina. w21.02 10-11 ¶13-14
Jumat, 28 Oktober
Hudok hami do marlas ni roha halak na martahan manaon hasusaan.—Jak. 5:11.
Tikki tajaha Bibel songon na markaca do hita. Gabe boi ma taida akka na porlu tapadenggan sian diritta. (Jak. 1:23-25) Misalna, gabe taboto ma ikkon tarajai do diritta asa unang mura-mura muruk. Molo diurupi Jahowa do hita, boi do toktong hita lambok tikki adong halak na mambahen hita muruk manang adong masalah na mambahen jut rohatta. (Jak. 3:13) Jadi penting hian do taboto isi ni Bibel. Olo do ra dung tabahen keputusan na sala jala taboto aha akibatna, gabe marsiajar ma hita mambahen keputusan na denggan. Alai undenggan do molo marsiajar hita sian pengalaman ni na asing. Alani i do disuru si Jakobus hita marsiajar sian si Abraham, si Rahab, si Job, dohot si Elia. (Jak. 2:21-26; 5:10, 11, 17, 18) Boi do torus nasida marlas ni roha nang pe godang sitaononna. Songon nasida hita pe boi do torus marlas ni roha manaon godang hasusaan molo diurupi Jahowa. w21.02 29-30 ¶12-13
Sabtu, 29 Oktober
Saut do sakkap ni roha molo godang na mamodai, jala molo marporang ho ihutton ma poda sian halak na marbisuk.—Poda 20:18.
Memang, guru studi do na paling martanggung jawab mangurupi studina mangattusi Hata ni Debata. Alai molo ditogihon hita mandongani ibana, gabe patner na mendukung ma hita. (Pjm. 4:9, 10) Sukkun ma tu guru studina i informasi taringot parsiajar Bibelna i, latar belakangna, bukku na diparsiajari, dohot topik na dibahas. Sukkun ma aha na porlu ditandasson tu parsiajar Bibelna i. Sukkun ma aha na boi dohot na so boi dihatahon hamu. Tottu dang sude informasi taringot parsiajar Bibel i dipaboa guru studina i. Godang do manfaatna molo dipaboa informasi taringot parsiajar Bibel tu patner, songon pengalaman na dipaboa donganta si Joy sahalak misionaris. Didok ibana, “Akka informasi i mambahen patnerhu gabe tertarik mangurupi studikku.” w21.03 9 ¶5-6
Minggu, 30 Oktober
Molo sogo roha ni portibi on tu hamu, ingot hamu ma naung parjolo do au dihasogohon portibi on sian hamu.—Joh. 15:18.
Piga-piga sian hita dihasogohon, ala standar ni Jahowa do na tadalatton di ngolutta. Hape beda hian do standar ni portibi on tu standar ni Jahowa. Misalna godang do halak saonari marpikkir dang sala mangulahon seks na so patut. Hape ulaon sisongon i do na mambahen Jahowa manghancurhon Sodom dohot Gumora. (Jud. 7) Ala standar ni Bibel do na taihutton, godang ma na mandok hita halak na kaku. (1 Ptr. 4:3, 4) Songon dia do asa boi hita martahan nang pe dihasogohon manang dihina halak? Ikkon pos do rohatta na urupan ni Jahowa do hita. Dos songon perisai do haporseaon i, na boi “pamatehon api na sian panah ni Sibolis”. (Eps. 6:16) Alai dang holan haporseaon na porlu, ikkon adong do holong. Boasa? Alana halak na marholong ni roha i “dang parmuruk”. Tahan do ibana manaon sude hasusaan jala sabar mangadopi manang aha pe. (1 Kor. 13:4-7, 13) Holong tu Jahowa, tu akka dongan, dohot tu musu mangurupi hita martahan nang pe dianiaya. w21.03 21 ¶3-4
Senin, 31 Oktober
Unang ma mura-mura haccit roham. Ai halak na oto do molo mura-mura haccit rohana.—Pjm. 7:9.
Andorang so mate Jesus, hea do didok ibana tu akka siseanna asa boi dapot ni nasida hangoluan na saleleng ni lelengna ikkon mangallang dagingna dohot manginum mudarna. (Joh. 6:53-57) Gabe tarsonggot do godang sisean ni Jesus mambege i jala ditinggalhon ma ibana. Alai anggo akka ale-ale ni Jesus dang olo maninggalhon ibana. Memang tarsonggot do tong nasida jala dang diattusi lapatan ni hata i. Alai toktong do nasida setia tu Jesus. Dang tersinggung nasida tu hata ni Jesus i. Jala dang didok nasida ajaran na sala i, alai porsea do nasida ajaran na sittong do na didok ni Jesus i. (Joh. 6:60, 66-69) Hita pe saonari, unang ma mura-mura hita tersinggung tu hata ni donganta. Jadi asa unang sala paham hita tapaloas ma donganta i paboahon aha do sasittongna maksud ni hatana i.—Poda 18:13. w21.01 11 ¶13