September

Dienet si Petrus ma hata na adong di surirang ni si Joel. (Ul. 2:16, 17) Dang dipakke si Petrus be hata “dung i”, alai digatti gabe hata “di angka ari parpudi”. Lapatanna, i ma ari parpudi andorang so diripashon Jerusalem taon 70 M. Jadi di tikki i ma dilehon Debata tondi parbadia “tu ganup halak”. On patuduhon, ikkon jolo salpu do godang tikki asa gabe saut surirang i. Dung dilehon Debata tondi parbadiana tu akka halak Kristen di abad na parjolo, mulai ma diulahon ulaon marbarita i tu sude liat portibi on. Tikki dilehon si Paulus suratna tu halak Kolosse hira-hira taon 61 M, didok ibana do barita na uli i nungnga tarsar jala dibaritahon tu “sude tompaan na di tano on”. (Kol. 1:23) Di jaman ni si Paulus, “sude tompaan” manggombarhon sude luat ni portibi on na boi didalani si Paulus dohot akka dongan di tikki i. Marhite tondi parbadia sian Jahowa, gabe lam tarsar ma ulaon marbarita na uli sahat “tu ujung ni tano on”, i ma di tikkitta saonari.—Ul. 13:47. w20.04 6 ¶15-16

Dihaholongi Jahowa do hita sude, tarmasuk ma akka naposona na mandao sian huria. (Mat. 18:12-14) Marjanji do Debata, dilului Ibana do akka biru-biruna na mago songon sahalak parmahan Israel na mangalului biru-biruna na mago. (Hes. 34:12-16) Dilului ma biru-biru i. Porlu do tikki jala ikkon marsitutu do ibana mangulahon on. Dung dapotna biru-biru i, diboan ma i mulak tu handangna. Molo lukka manang male biru-biru i, pittor diubati ibana ma i jala dilehon mangan. Akka sintua na gabe parmahan ni “biru-biru ni Debata”, porlu mamakke cara on lao mangurupi akka na mandao sian huria. (1 Ptr. 5:2, 3) Dilului akka sintua do nasida, diurupi asa mulak muse tu huria, jala dilehon do pangurupion asa marale-ale muse nasida tu Jahowa. w20.06 20 ¶10

Ala na pos do roha ni Jesus pasti godang halak na mangihutton ibana, umbahen didok ibana nungnga boi panenon akka eme i? Daong. Nungnga disurirangkon hian di Bibel dang godang halak na olo porsea tu ibana. (Joh. 12:37, 38) Jala diboto Jesus do aha na di bagasan roha ni sasahalak. (Mat. 9:4) Alai nang pe songon i, toktong do ibana marbarita. Tarlumobi ma hita, dang taboto aha na di bagasan roha ni sasahalak, jadi unang ma pittor tadok dang olo halak na di luatta manangihon barita na uli. Ingot ma aha na didok Jesus tu akka siseanna. Nungnga masak be eme i jala boi panenon. Jadi boi do akka halak mambahen hamubaon jala gabe sisean ni Kristus. “Hasudungan ni roha” ni Jahowa do akka halak sisongon i. (Hag. 2:7) Molo tatiru cara ni Jahowa dohot Jesus mangida nasida, gabe lomo ma rohatta naeng mamboto aha latar belakang ni nasida jala aha do na menarik di nasida. w20.04 13 ¶18-19

Takkas do dipaboa di Bibel, ikkon tahaholongi do Jesus asa las roha ni Jahowa. Sada cara na boi taulahon asa boi gabe ale-ale ni Jesus i ma ikkon ditanda do Jesus. Carana, jaha ma Bibel di bukku Mateus, Markus, Lukas dohot Johannes. Molo tarimangi carita taringot Jesus na adong di Bibel, gabe lam holong ma rohatta tu Jesus jala gabe taargai ibana ala burju maradoppon akka halak. Misalna, nang pe ibana sahalak guru alai dang dibahen ibana siseanna gabe hatoban. Gariada, olo do ibana paboahon pakkilalaan dohot pikkiranna tu nasida. Tikki lungun roha ni nasida, tong do lungun roha ni Jesus jala rap do ibana tangis dohot nasida. (Joh. 11:32-36) Haru akka musuna pe boi do diida nasida na marale-ale do Jesus dohot akka halak na manangihon barita na uli sian ibana. (Mat. 11:19) Molo tatiru cara ni Jesus maradoppon siseanna, gabe lam solhot ma parale-aleotta tu halak na asing. Gabe mararga ma ngolutta jala las ma rohatta. Jala lam tamba ma holongta tu Kristus. w20.04 22 ¶9-10

Taon 1870, Inggris do pamarettaon na umbalga jala na umgogo pasukan militerna di liat portibi on. Digombarhon do ibana songon tanduk na metmet na manaluhon tolu tanduk na asing, i ma Prancis, Spanyol, dohot Belanda. (Dan. 7:7, 8) Inggris ma na gabe raja selatan sahat tu Porang Dunia I. Di tikki i, Amerika Serikat do negara na umgogo di bidang ekonomi. Jala kerja sama do ibana dohot Inggris. Saleleng Porang Dunia I, marsada ma Inggris dohot Amerika lao mambahen pasukan militer na umgogo. Mulai sian i ma, nasida gabe Kuasa Dunia Inggris-Amerika. Songon naung disurirangkon si Daniel, rap do nasida paradehon ‘tentara na massai godang’ jala massai gogo. (Dan. 11:25, Bibel siganup ari) Saleleng ari parpudi, Inggris-Amerika ma na gabe raja selatan. w20.05 4 ¶7-8

Boi do adong aek di tano on, ala pas do jarak ni tano on tu mataniari. Molo otik pe unjonok tano on sian mataniari, boi do gabe gurgur sude aek, jala gabe lam mohop ma tano on. Jala molo otik pe undao sian mataniari, gabe beku ma sude aek, jala gabe es ma sude isi ni tano on. Alai, ala pas do parpeak ni tano on dibahen Jahowa, gabe adong ma sistem daur ulang aek jala boi ma hita mangolu di tano on. Mohop ni mataniari i ma na mambahen aek na di laut dohot di permukaan ni tano on menguap, jala gabe awan di langit. Ganup taon, adong martriliun liter aek na menguap gabe awan di langit. Toktong do aek i di langit hira-hira saleleng sappulu ari. Dung i, madabu ma i tu tano gabe udan manang salju. Mulak ma muse aek i tu laut, tu tao, manang tu sunge. Songon i ma na masa marulak-ulak. Sian sistem daur ulang aek on, tarida do na marbisuk Jahowa jala balga situtu do huasona.—Job 36:27, 28. w20.05 22 ¶6

Disuru Jesus do hita asa martangiang mangido tondi parbadia. (Luk. 11:9, 13) Marhite tondi parbadia, dilehon Jahowa do tu hita ‘hagogoon na sumurung’. (2 Kor. 4:7) Gabe boi ma hita martahan mangadopi sude hasusaan. Boi do tondi parbadia mangurupi hita mangulahon tugas di organisasi ni Jahowa. Jadi, molo marhasil hita mangulahon sada tugas, tapasahat ma pujian tu Jahowa. Boi do muse tondi parbadia mangurupi hita mamboto atik na adong do pikkiran manang giot-giot na sala di rohatta. (Ps. 139:23, 24) Alani i tapangido ma tondi parbadiana asa margogo hita mangalo giot-giot na sala i. Molo taulahon songon i, on patuduhon na marsitutu do hita asa unang dipaso Jahowa tondi parbadiana lao mangurupi hita.—Eps. 4:30. w20.05 29 ¶10-12

Molo tapabadia goar ni Jahowa, na maniru Jesus do hita disi. Dipatandahon Jesus do goar ni Amana tu akka halak. Ibana dang holan manjou goar ni Jahowa. Alai, dipaboa ibana Debata na songon dia do Jahowa i. Misalna, dipatudu ibana do na so setuju ibana tu halak Parise, na mangajarhon molo Jahowa i kejam, kaku, dang olo marale-ale tu jolma, jala dang marasi ni roha. Alai diajarhon Jesus do molo Jahowa i dang kaku, sabar, parholong, jala rade manalpuhon hasalaan. Jala, diurupi Jesus do akka halak asa mananda Jahowa marhite parniulaonna. Ditiru ibana do parange ni Amana di parngoluonna siganup ari. (Joh. 14:9) Songon Jesus, boi do tapaboa tu akka halak taringot Jahowa. Taajarhon ma molo Jahowa i burju jala parholong. Molo taulahon i, hita mangurupi akka halak asa dang be porsea tu sude gabus taringot Jahowa. Gabe tapabadia ma goarna, jala gabe denggan ma goarna i di pikkiran dohot di roha ni akka halak. Molo tahatahon jala taulahon aha na dihalomohon Jahowa, gabe tapaboa ma hasittongan taringot Jahowa tu akka halak. w20.06 6 ¶17-18

Tottu adong do laba na denggan sian media sosial. Misalna, gabe boi ma hita marsaor raphon keluarga dohot akka donganta. Alai molo taparrohahon adong do piga-piga halak na mambahen komentar, poto dohot video asa lomo roha ni halak mangida nasida. Sian na dibahen nasida i, hira na didok nasida ma, “Bereng hamu ma au!” Adong do muse na mambahen komentar na kasar dohot na rorang di poto ni nasida manang di poto ni halak na asing. Dijujui do halak Kristen asa marserep ni roha jala patuduhon holong. Jadi dang cocok molo songon i caratta mamakke media sosial. (1 Ptr. 3:8) Molo dipakke hamu media sosial, sukkun ma dirimuna, ‘Sian komentar, poto, dohot video na hubahen, gabe diida halak do na ginjang rohakku? Gabe mangiburu do akka halak tu au?’ Halak Kristen dang makkilala urrikkot dirina sian na asing. Diihutton nasida do poda di Bibel. Molo serep rohatta, dang olo hita maniru akka halak di portibi on na sai manganggarhon dirina sandiri.—1 Joh. 2:16. w20.07 6 ¶14-15

Andorang so gabe sisean ni Jesus, si Paulus do na menganiaya halak Kristen. (Ul. 7:58) Jotjot do ibana menyerang halak Kristen di tikki i, alai diabbati Jesus do ulaonna i. Makkatai ma Jesus sian surgo tu si Paulus, jala dibahen ma ibana gabe buta. Asa boi ibana marnida muse, ikkon dipangido ibana do pangurupion sian halak na hea dianiaya ibana. Serep do roha ni si Paulus. Olo do ibana diurupi sahalak sisean na margoar si Ananias. Jala si Ananias do na mangurupi ibana asa boi marnida muse. (Ul. 9:3-9, 17, 18) Ujungna ditanda do si Paulus gabe halak Kristen. Alai dang dihalupahon ibana parsiajaran na dapotna sian Jesus tikki di pardalanan tu Damaskus. Toktong do serep rohana, jala las rohana diurupi akka donganna. Diboto ibana do, akka donganna i do na patoguhon rohana.—Kol. 4:10, 11. w20.07 18 ¶16-17

Nang pe Jahowa do Debata Natumimbul, alai olo do Ibana mangalehon tugas tu na asing. Contohna, dipillit Ibana do Jesus dohot 144.000 halak lao mamaretta di Harajaonna. Dilatik Jahowa do Jesus lao gabe Raja dohot Sintua ni Malim. (Heb. 5:8, 9) Dilatik Jahowa do muse si 144.000 i. Alai dang diatur-atur Jahowa songon dia cara ni nasida mangulahon tugasna i. Pos do roha ni Jahowa tu nasida. (Pgk. 5:10) Sasittongna, dang porlu di Jahowa pangurupion sian manang ise pe. Alai olo do Ibana mangalehon tugas tu na asing. Tarlumobi ma hita. Misalna, molo sahalak kepala keluarga manang sahalak sintua do hamu di huria, tiru ma Jahowa. Lehon ma tugas tu na asing, alai unang ma gabe diatur-atur hamu nasida. Hasilna, gabe boi ma hamu pasaehon karejomuna i. Jala gabe boi ma dilatik hamu na asing asa lam percaya diri nasida.—Jes. 41:10. w20.08 9 ¶5-6

Aha do na dipangido Jahowa asa taulahon molo adong biru-biruna na mago? Boi ma hita marsiajar sian Jesus. Diboto ibana do, mararga do di adopan ni Jahowa sude biru-biruna. Jadi marsitutu do Jesus mangurupi halak Israel na songon biru-biru na lilu asa mulak muse tu Jahowa. (Mat. 15:24) Parmahan na burju do Jesus. Jadi, marsitutu do ibana asa unang adong biru-biru ni Jahowa na mago. (Joh. 6:39) Dijujui Apostel Paulus do akka sintua di huria Epesus asa maniru Jesus. Didok ibana, “Ingkon urupanmuna do na gale. Ingot hamu ma hata ni Tuan Jesus na mandok, ‘Umlas do roha ni halak na mangalehon sian na manjalo.’” (Ul. 20:17, 35) Sian ayat i taboto ma, martanggung jawab do akka sintua lao manarihon akka naposo ni Jahowa. Sahalak sintua di Spanyol na margoar si Salvador mandok, “Molo hurimangi na sai disarihon Jahowa do akka biru-biruna, gabe taronjar ma rohakku asa marsitutu mangurupi nasida. Pos do rohakku, lomo do roha ni Jahowa asa husarihon nasida.” w20.06 23 ¶15-16

Sabar do Jahowa paimahon hita gabe sempurna di ujung ni pamarettaon saribu taon. Andorang so dapot dope tikki i, sai rade do Jahowa manalpuhon hasalaatta. Jadi, tatiru ma Ibana. Toktong ma taida akka parange na denggan sian akka donganta, jala sabar ma hita tu nasida. Las do roha ni Jesus dohot akka suru-suruan tikki ditoppa tano on. Alai bayakkon ma, pasti las hian do roha ni nasida haduan tikki mangida sude jolma di tano on gabe sempurna. Jala pasti songon i do tong na dihilala akka na miniahan na mamaretta rap dohot Jesus. (Pgk. 4:4, 9-11; 5:9, 10) Sahat tu na ro tikki i, tatiru ma holong, bisuk, dohot hasabaron ni Jahowa. Molo taulahon i, gabe toktong ma las rohatta manang aha pe hasusaan na masa. (Jak. 1:2-4) Mandok mauliate ma hita tu Jahowa, ala dilehon Ibana janji taringot “haheheon”!—Ul. 24:15. w20.08 18-19 ¶18-19

Silehon-lehon sian Debata do Bibel i. Ala massai holong do roha ni Debata tu hita, disuru Ibana do piga-piga bawa asa manuratton Bibel. Marhite Bibel ma dipaboa Jahowa alus ni sukkun-sukkun na rikkot di parngoluotta. Misalna, songon dia do jolma ditoppa? Boasa ditoppa Debata jolma? Aha do na lao masa di ari na naeng ro? Lomo do roha ni Debata asa sude jolma mamboto alus ni sukkun-sukkun i. Jadi saleleng marratus taon, diurupi Ibana do piga-piga halak asa menerjemahon Bibel tu godang bahasa. Saonari, nungnga diterjemahon be Bibel di lobi sian 3.000 bahasa. Adong naung lengkap isina, adong na sebagian dope. Bibel ma bukku na unggodang diterjemahon jala disarhon di liat portibi on. Taargai ma Bibel. Carana, tajaha ma i ganup ari. Tarimangi ma akka na taparsiajari sian i, jala taulahon ma i di parngoluotta. Asing ni i, marsitutu ma hita lao mambagihon barita sian Bibel tu godang halak.—Ps. 1:1-3; Mat. 28:19, 20. w20.05 24-25 ¶15-16

Adong do na boi taparsiajari sian Panurirang Jeremia. Maol do inganan ni ibana marbarita. Alani i, hea do ibana marmetmet ni roha jala dang olo be lao marbarita. Alai dang torus songon i pakkilalaanna. Boasa? Ala “hata ni Jahowa” dos songon api di bagasan rohana. Sappe dang tahan be ibana manippan barita i di rohana. (Jer. 20:9) Hita pe boi do songon si Jeremia pakkilalaatta molo ringgas hita marsiajar Bibel jala mangarimangi i ganup ari. Hasilna, boi ma hita toktong marlas ni roha jala denggan ma hita marbarita na uli. (Jer. 15:16) Jadi molo metmet rohatta, tapangido ma asa diurupi Jahowa hita asa unang sai marpikkiran negatif hita tu diritta sandiri, unang sai taingot-ingot akka hasalaatta naung salpu. Sai na dongananna do hita tikki marsahit hita. Urupanna do hita asa unang marmetmet ni roha molo dang dapot dope tugas na taharappon. Jala urupanna do hita asa toktong positif tikki marbarita na uli. Tapasahat ma sude holso ni rohatta tu Jahowa. Urupanna do hita asa unang torus marmetmet ni roha. w20.12 27 ¶20-21

Di parpunguan ma kesempatan ni akka donganta borua marsaor dohot akka dongan. Jadi tajakkon ma nasida di parpunguan, makkata-hatai ma hita dohot nasida, jala tapatudu ma na parduli do hita tu nasida songon na diulahon Jesus. (Luk. 10:38-42) Boi do tatogihon nasida rap mangan manang rap rekreasi. Tikki marsaor dohot nasida, tapastihon ma aha na tahatai boi patoguhon nasida. (Rom 1:11, 12) Jala ikkon ditiru akka sintua do cara marpikkir ni Jesus taringot akka halak na so marhasohotan. Didok ibana, dang ikkon marhasohotan manang marianakkon asa boi marlas ni roha. (Luk. 11:27, 28) Alai boi do las rohatta molo tasomba Jahowa. (Mat. 19:12) Ikkon dibahen akka sintua do akka donganta borua songon iboto manang omak ni nasida sandiri. Porlu do dilehon akka sintua tikkina lao makkata-hatai dohot akka donganta borua, andorang manang dukkon sae parpunguan. w20.09 21-22 ¶7-9

Di Israel mulai ma pangula manuan di ari udan na parjolo, na dimulai hira-hira parsitongaan ni bulan Oktober. Jala dipanen ma i di ari udan na parpudi na dimulai hira-hira parsitongaan ni bulan April. (Mrk. 4:28) Tatiru ma hasabaron ni pangula i. Molo lomo rohatta asa tubu jala marparbue suan-suanatta porlu do tikki lao mangarawat i. Ikkon diombak do tanona, dung i disuan, dicabuti akka ramba, jala disirami suan-suanan i. Dos songon i ma, ikkon kerja keras do hita molo mambahen sisean. Porlu do ra tikki lao mangurupi parsiajar Bibelta asa patuduhon holong jala asa unang paimbar-imbarhon jolma. Alana, dang boi tapaksa asa pittor togu haporseaon ni parsiajar Bibelta. Sisean ni Jesus pe sipata dang sai mura mangattusi aha na diajarhon Jesus. (Joh. 14:9) Taingot ma, holan na manuan dohot na maniram do hita, alai Debata do na patubuhon.—1 Kor. 3:6. w20.09 11 ¶10-11

Molo ro parsiajar Bibel tu parpunguan gabe hatop ma dibahen nasida hamajuon. Didok sahalak donganta tu parsiajar Bibelna, godang do na boi diparsiajari ibana sian parpunguan na so boi dapotna molo holan marsiajar Bibel. Jahahon ma Heber 10:24, 25 tu parsiajar Bibelmuna, jala patorang ma tu ibana laba na boi dapotna molo ro tu parpunguan. Semangat ma hamu paboahon tu ibana aha na diparsiajari hamu di parpunguan. Tikki dibege ibana boasa las rohamuna marpungu, gabe olo do ra ibana marpungu. Tikki ro parjolo sahali parsiajar Bibelmuna tu parpunguan, gabe boi ma diida ibana imbar ni parpunguanta i dohot parpunguan ni agama na asing na hea diida ibana. (1 Kor. 14:24, 25) Disi ma ibana pajuppang dohot akka dongan na boi gabe sitiruonna, asa mambahen hamajuon jala tardidi. w20.10 10-11 ¶14-15

Diurupi tondi parbadia do hamu mangulahon aha na dijaha jala diparsiajari hamu sian Bibel. Martangiang ma hamu songon tangiang ni panurat Psalmen na mandok, “Sai ajarhon ma tu ahu, ale Jahowa, dalanmu, asa marpangalaho ahu di bagasan hasintonganmi; sai pasada ma rohangku mangkabiari goarmu.” (Ps. 86:11) Jadi, torus ma jaha jala parsiajari Bibel dohot akka publikasi na diparade organisasi ni Jahowa. Alai, unang ma holan manambai parbinotoanmuna. Ikkon hona do hasittongan i tu rohamuna, asa boi diulahon hamu i di parngoluonmuna. Diurupi tondi parbadia do hamu mangulahon i. Porlu do tong hamu patoguhon akka dongan di huria. (Heb. 10:24, 25) Boasa? Ala keluargamuna do nasida. Martangiang ma asa diurupi tondi parbadia hamu mangalehon komentar sian ias ni rohamuna, jala mambahen na dumenggan tikki mandapot tugas di parpunguan. Molo diulahon hamu i, dipatudu hamu ma tu Jahowa dohot tu Jesus na dihaholongi hamu do ‘biru-biruna’. (Joh. 21:15-17) Jadi tangihon hamu ma Jahowa, manfaathon hamu ma sude naung diparade Ibana asa togu hubunganmuna tu Ibana. w20.10 24-25 ¶15-17

Aha do na diulahon Jesus tikki marmetmet ni roha akka apostelna? Dang dipasombu Jesus akka siseanna i. Dung hehe Jesus, didok ibana tu akka siseanna, “Unang hamu mabiar! Laho ma hamu.” (Mat. 28:10a) Nang pe hea ditinggalhon siseanna ibana, toktong do dijou ibana nasida “haha anggingku”. Songon Jahowa, parasi roha do Jesus jala olo manalpuhon hasalaan. (2 Raj. 13:23) Parduli do hita tu akka dongan na so aktif be marbarita na uli. Holong do rohatta tu akka donganta on. Taingot dope songon dia upaya ni akka donganta on lao manomba Jahowa. Adong do sian nasida naung marpulu taon manomba Jahowa. (Heb. 6:10) Masihol do hita tu nasida! (Luk. 15:4-7) Boi do tapatogu akka donganta na so aktif asa ro muse tu parpunguan. Molo ro ibana tu Bale Harajaon, ikkon parjolo do hita manjakkon nasida. w20.11 6 ¶14-17

Dipangido si Jakobus, si Johannes, dohot omakna do hasangapon na so boi dope dilehon Jesus tu nasida. Pittor didok Jesus do, holan Amana na di surgo i do na boi mamillit ise na lao hundul di hambirang dohot di siamun ni Jesus di Harajaon ni Debata. (Mat. 20:20-23) Serep do roha ni Jesus. Diboto ibana adong do na so boi ulahononna. Dang hea diulahon ibana tugas na so dilehon Jahowa tu ibana. (Joh. 12:49) Songon dia do hita boi maniru Jesus? Molo taulahon poda na disurat di ayat sadari on, na maniru Jesus do hita disi. Jadi, tikki disukkun halak pandapotta, unang ma tapaksa ikkon dijalo nasida pandapotta i, manang pittor tadok aha na adong di rohatta. Alai, lehon ma poda na adong di Bibel dohot sian akka sijahaonta. Molo taulahon i, on patuduhon na taakkui do dang sai sude taboto. Serep do rohatta molo taakkui, poda ni Jahowa do na undenggan sian pikkiranta sandiri.—Pgk. 15:3, 4. w20.08 11 ¶14-15

Molo adong donganta na porlu tapasingot, aha do na porlu tapikkirhon? Andorang so makkatai hita dohot donganta i, tasukkun ma diritta, ‘Patigorhu do au?’ Biasana halak na patigorhu, dang patuduhon asi ni roha. Ai aturanna sandiri do na dipakke, dang aturan ni Jahowa. Molo dihilala hamu do memang porlu pasingotton donganta i, takkas ma paboa tu ibana masalahna. Jala pakke ma sukkun-sukkun lao mangurupi ibana mamboto sala do na binahenna i. Ingot ma dang boi hita manguhumi donganta. Alai urupi ma ibana paboahon songon dia pakkilalaan ni Jahowa tu na diulahonna i. (Rom 14:10) Tapakke ma Hata ni Debata, jala tatiru ma Jesus na marasi ni roha. (Poda 3:5; Mat. 12:20) Boasa? Alana songon dia caratta maradoppon na asing, songon i do cara ni Jahowa maradoppon hita.—Jak. 2:13. w20.11 21 ¶13

Las do rohatta ala taboto Jahowa dang manguhumi halak sian aha na boi diida jolma. Misalna, tikki disuru ibana si Samuel mamillit sada sian anak ni si Isai lao gabe raja di Israel, dang sarupa cara ni si Samuel mangida akka anak ni si Isai songon cara ni Jahowa mangida nasida. Tikki diida si Samuel do si Eliab, didok ibana ma, “On do huroha simiahan di jolo ni Jahowa!” Memang uli do rupa ni si Eliab, jadi dirippu si Samuel cocok do ibana gabe raja. “Alai didok Jahowa ma tu si Samuel: ‘Unang ho mamereng tu rupana, manang tu tongam di dagingna, ai nungnga hubolongkon anggo ibana.’” Didok Jahowa ma muse, “Ianggo jolma rupa do na niidana, alai anggo Jahowa roha di bagasan do na niidana.” (1 Sam. 16:1, 6, 7) Tatiru ma Jahowa tikki maradoppon akka donganta. w20.04 14 ¶1; 15 ¶3

Tikki di pardalanan Jesus, dilewati ibana do akka hauma, jala gok do eme na baru tubu disi. (Joh. 4:3-6) Hira-hira opat bulan nai ma asa boi panenon eme i. Alai sukkun-sukkun do ra roha ni akka halak tikki didok Jesus, “Tatap hamu ma hauma i. Ida hamu ma, nunga masak jala nunga boi panenon.” (Joh 4:35, 36) Aha do lapatan ni hata ni Jesus i? Na dihatahon Jesus dison, dang na taringot eme i, alai taringot akka halak na lao dipapungu Jesus asa gabe siseanna. Parrohahon ma aha na masa andorang so dihatahon Jesus taringot i. Baru pe ibana marbarita tu sahalak borua Samaria, nang pe di tikki i dang hea olo halak Jahudi mangattoi halak Samaria. Pittor olo do borua i manangihon Jesus! Jala tikki makkatai dope Jesus taringot hauma na “nunga masak jala nunga boi panenon” i, ro do akka halak Samaria mandapotton Jesus. Nungnga dibege nasida taringot Jesus sian borua i, jadi naeng marsiajar do nasida tu ibana. (Joh. 4:9, 39-42) Sada referensi ni Bibel mandok, “Pittor ro do halak i lao mandapotton Jesus asa manangihon ibana. On patuduhon, songon eme i do nasida, na naung masak jala nunga boi panenon.” w20.04 8 ¶1-2

Di parpunguan diajari do hita asa lam terampil marbarita dohot mangajari. Misalna diajari do hita mamakke publikasi na adong di Akka Alat Lao Mangajari. Alani i, tapersiappon ma akka bahan na lao dibahas di parpunguan. Tikki marpungu, denggan ma tatangihon. Dung i taulahon ma sude na taparsiajari i asa boi hita gabe “tentara ni Kristus Jesus na burju”. (2 Tim. 2:3) Asing ni i, adong do muse marjuta suru-suruan na mangurupi hita. Bayakkon ma aha na boi diulahon sada suru-suruan! (Jes. 37:36) Saonari, bayakkon ma songon dia molo na mangurupi hita marjuta suru-suruan. Jadi, molo jonok hita tu Jahowa, dang adong na boi manaluhon hita dang soal sadia godang musutta. (Pangh. 6:16) Sai taingot ma on, asa unang menyerah hita tikki haccit rohatta dibahen dongan sakarejo, dongan sasikkola, manang keluargatta na so Saksi. w21.03 29 ¶13-14

Hata di Jesaya 22:13 do ra na dikutip si Paulus dison. Ai songon i do cara marpikkir ni halak Israel najolo i. Didok nasida, “Tanikmati ma jo sadari on, ai so binoto boha sogot.” Sahat tu saonari pe, songon i do tong cara marpikkir ni godang jolma. Ala porsea do hita na paheheon ni Debata do halak na mate, ikkon manat do hita mamillit dongan. Dipasingot do halak Kristen na di Korint asa unang mardongan tu akka halak na so porsea tu haheheon. Aha do parsiajaranna tu hita? Dang denggan molo torus hita mardongan tu halak na holan naeng marsonang-sonang. Alana, boi do i mambahen hita marpangalaho na so denggan. Jala ujungna gabe mangalo ma hita tu Debata. Takkas do dipasingot si Paulus, “Dungo ma hamu jala ulahon hamu ma na sintong, unang be sai mardosai hamu.”—1 Kor. 15:33, 34. w20.12 9 ¶3, 5-6

Jahowa do kepala keluarga ni saluhutna. Ibana do na paling marhuaso, jala dang adong na untimbo sian Ibana. Alai adong do dipillit Jahowa muse akka kepala lao mandalatton tanggung jawab di organisasina. Sude kepala i, ikkon mangalean partanggung jawaban tu Jahowa. (Rom 14:10; Eps. 3:14, 15) Misalna, dilean Jahowa do wewenang tu Jesus gabe kepala ni huria. Alai cara ni Jesus mandalatton wewenang i, ikkon partanggung jawabhononna do i tu Jahowa. (1 Kor. 15:27) Dilean Jahowa do muse wewenang tu suami lao mamimpin istri dohot gellengna. Jadi ikkon diboto suami do boasa adong dipillit Jahowa na gabe kepala. Ikkon diboto ibana do muse songon dia carana boi maniru Jahowa dohot Jesus. Boasa penting botoon ni akka bawa on? Ala adong do tanggung jawab na dilean Jahowa dohot Jesus tu kepala keluarga jala dipangido do asa denggan didalatton tanggung jawab i.—Luk. 12:48b. w21.02 2 ¶1-3

Denggan do tatiru Jahowa na so mangingot-ingot hasalaatta. Sempurna do ingatan ni Jahowa, alai molo muba hita, olo do Ibana manalpuhon hasalaatta. Jala dang diingot-ingot Ibana be hasalaatta i. (Ps. 25:7; 130:3, 4) Jadi, lomo do rohana asa tasalpuhon hasalaan ni halak na mambahen haccit rohatta. (Mat. 6:14; Luk. 17:3, 4) Ala dilehon Jahowa do tu hita otak, boi ma hita marpikkir jala tapakke ma i lao pasangappon Ibana. Adong do halak na gabe holan makkarikkotton dirina sandiri. Lomo-lomona do manottuhon dia na sala jala dia na sittong. Alai ala ditoppa Jahowa do hita, tottu dao do undenggan uhum na dilehon Ibana sian uhum na tabahen sandiri. (Rom 12:1, 2) Molo taihutton uhumna i, gabe dame ma ngolutta. (Jes. 48:18) Jala gabe taboto ma aha do tujuan ni ngolutta, i ma lao pasangappon Debata na manoppa hita, jala mambahen las rohana.—Poda 27:11. w20.05 24 ¶13-14

Molo lam tatanda dongan sahaporseaotta, boi ma taattusi pakkilalaan ni nasida jala gabe holong rohatta tu nasida. Boi do hita marale-ale tu nasida, nang pe uttua manang upposo nasida sian hita. Taingot ma uttua do si Jonatan hira-hira 30 taon sian si Daud, alai marale-ale do nasida. Jadi, molo berupaya hita marale-ale dohot akka donganta, tarida ma na tahaholongi do nasida. (1 Ptr. 2:17) Memang ikkon tahaholongi do akka donganta. Alai dang berarti ikkon kompak hian hita tu sude dongan di huria. Olo do ra unjonok hita tu piga-piga dongan di huria, ala sarupa lomo ni rohatta. Ai Jesus sandiri pe, didok ibana do sude apostelna ‘ale-alena’. Alai unjonok do ibana tu si Johannes. (Joh. 13:23; 15:15; 20:2) Nang pe songon i, dang hea dibahen Jesus na sada lebih istimewa sian dongan na asing.—Mrk. 10:35-40. w21.01 23 ¶12-13

Dang sarupa cara ni si Paulus marbarita tu halak Atena songon cara ni ibana marbarita tu akka halak Jahudi na di sinagoga. Manat do diparrohahon ibana humaliangna, jala diparrohahon do boha agama ni akka halak disi. (Ul. 17:23) Dung i, dilului si Paulus do ajaran sian Bibel na mirip tu ajaran na dihaporseai nasida. Dipaboa ibana do tu halak Atena, molo barita na dipasahatna i ro sian “Debata na So Tinanda”, na naeng disomba nasida saleleng on. Nang pe dang diboto nasida surat na badia, alai dang gabe didok si Paulus na so boi nasida gabe halak Kristen. Diida ibana do nasida songon eme na boi panenon. Jadi disesuaihon ibana do carana marbarita na uli tu nasida. Songon si Paulus, manat ma parrohahon aha na adong di humaliangta tikki marbarita. Ida ma akka tanda na adong, asa diboto hamu aha do na dihaporseai akka halak na dijuppangi hamu. Parrohahon ma, akka hiasan aha do na adong dibahen di jabuna? Jala sian goarna, pakkeanna, dohot carana makkatai pe boi do taboto aha do agama ni nasida. w20.04 9-10 ¶7-8