Februari

Lomo do roha ni Jahowa asa sude naposona marlas ni roha. Jonok do Ibana tu hita sude secara pribadi, jala diparrohahon do hita tikki lungun rohatta. (Ps. 145:18, 19) Songon i do na hea diulahon Ibana tu Panurirang Elia. Tikki i, susa hian do situasi di Israel. Akka pamimpin dang manomba Jahowa be. Dianiaya halak i do akka halak na manomba Jahowa. Jala naeng dipamate nasida do Panurirang Elia. (1 Raj. 19:1, 2) Alani i, gabe merasa ma si Elia holan sahalakna nama na manomba Jahowa. (1 Raj. 19:10) Alai hatop do diurupi Jahowa si Elia. Diutus ma suru-suruan patoguhon si Elia. Dipaboa ma, dang holan sahalakna na manomba Jahowa, alai godang nai dope halak Israel na setia tu Debata! (1 Raj. 19:5, 18) Songon i do tong na diulahon Jesus. Dipapos do roha ni akka siseanna na dapot ni nasida do keluarga di huria, i ma akka dongan sahaporseaon. (Mrk. 10:29, 30) Jala Jahowa pe marjanji dang tinggalhononna akka naposona.​—Ps. 9:10. w21.06 8-9 ¶3-4

Godang do halak na manolak Saksi Jahowa ala tapaboa dang sesuai ajaran ni agama ni nasida tu isi ni Bibel. Diajarhon pamimpin agama do taringot api naroko, jala dimanfaatton do ajaran i asa boi lomo-lomona mangatur jemaatna. Alai tapaboa do dang mungkin diulahon Debata parholong i. Diajarhon nasida do muse adong tondi na so olo mate. Alai tapaboa do na so sittong ajaran i. Alana molo sittong i berarti dang adong na porlu dipahehe. Diajarhon nasida do muse, nungnga ditottuhon Debata sude na masa. Alai tapaboa do, boi do hita sandiri na mamillit aha na lao taulahon, naeng tasomba Debata manang na dang. Ala tapaboa i sude, gabe muruk ma halak i. Molo holong rohatta tu hasittongan, ikkon Hata ni Debata do na tahaporseai jala taihutton. (Joh. 8:45, 46) Unang ma hita songon Sibolis. Toktong ma hita hot di bagasan hasittongan. Unang ma taulahon manang aha pe na maralo tu lomo ni roha ni Debata. (Joh. 8:44) Dipangido Debata do ‘ikkon sogo rohatta tu na jahat jala ikkon holong rohatta tu na denggan’.​—Rom 12:9; Heb. 1:9. w21.05 10 ¶10-11

Molo tasadari adong di hita sifat sombong manang tamak, boi do tabolokkon i. Songon na didok Apostel Paulus, akka halak na “ditakkup jorat ni Sibolis” boi dope ‘kaluar sian jorat i’. (2 Tim. 2:26) Taingot ma, unggogo do Jahowa sian Sibolis. Jadi molo tung pe nungnga tarjorat hita, boi dope hita malua sian jorat ni Sibolis i. Alai undenggan do molo dang sanga tarjorat hita. Alani i, tapangido ma tu Jahowa tiap ari asa diurupi hita mamareso diritta, atik naung adong akka sifat na roa i di rohatta. (Ps. 139:23, 24) Dos songon parburu do Sibolis. Marhasil do ibana manjorat akka halak saleleng marribu taon. Alai satokkin nai, diratte nama ibana jala dipamate saleleng ni lelengna. (Pgk. 20:1-3, 10) Tapaima do masa i. Alai saonari, tetap ma hita jaga asa unang sappe tarjorat. Berupaya ma hita asa unang adong sifat sombong manang tamak di hita. Bertekad ma hita ‘mangalo Sibolis, asa lari ibana sian hita’. w21.06 18-19 ¶15-17

Massai las do roha ni Jahowa molo olo sasahalak marsiajar Bibel, jala paboahon hasittongan i tu na asing. (Poda 23:15, 16) Las hian do muse roha ni Jahowa mangida hita ala semangat marbarita na uli dohot mangajari! Nang pe masa pandemi, saleleng taon dinas 2020 adong do 7.705.765 parsiajar Bibel, jala adong do muse 241.994 halak na tardidi. Jala akka donganta na baru tardidi on, dohot ma muse mambahen studi. Ujungna gabe lam godang ma na tardidi. (Luk. 6:40) Takkas ma ulaonta mambahen sisean on, pasti mambahen las roha ni Jahowa. Memang dang mura mangalului studi. Alai molo diurupi Jahowa do hita, boi do adong studitta. Jadi tabahen ma targetta asa adong studitta nanggo apala sada. Molo berupaya do hita mamakke tiap kesempatan lao manogihon sasahalak marsiajar Bibel, pasti adong do hasilna. Pos ma rohatta, pasu-pasuon ni Jahowa do sude upayatta i. w21.07 6-7 ¶14-16

Dang holit Raja Daud mambagihon na adong di ibana. Dilean ibana do godang artana tikki mambangun bagas joro. (1 Kron. 22:11-16) Songon i ma akka donganta naung matua. Nang pe dang boi be dohot nasida mambangun Bale Harajaon ala nungnga matua, alai dilehon nasida sumbangan lao mendukung proyek i. Olo do muse nasida mambagihon pengalamanna tu akka na poso. Boi do muse akka dongan na matua marsiajar sian si Paulus. Tikki gabe missionaris dope ibana, ditogihon do si Timoteus asa rap dohot ibana marbarita na uli. Diajarhon si Paulus do muse tu si Timoteus akka cara lao marbarita dohot mangajari. (Ul. 16:1-3) Dilatik si Paulus do si Timoteus asa lam terampil di ulaon marbarita. (1 Kor. 4:17) Jala dipakke si Timoteus do pelatihan i lao mangalatik na asing. w21.09 12 ¶14-15

Gabe teladan do si Apollos dohot Apostel Paulus. Godang do diboto halak i na dua taringot Surat na Badia. Guru na terkenal jala na malo do halak i. Diurupi nasida do godang halak gabe sisean ni Jesus. Alai dang hea bersaing nasida. (Ul. 18:24) Alani i ma tikki ditinggalhon si Apollos huria Korint, dijujui si Paulus do ibana asa mulak muse tusi. (1 Kor. 16:12) Sian on taboto, denggan do dipakke si Apollos kemampuanna i. Dipakke do i lao paboahon barita na uli jala patoguhon akka dongan. Serep do muse roha ni si Apollos. Buktina tikki dipatorang si Priskilla dohot si Akuila tu ibana ‘dalan ni Debata asa lam takkas diattusi ibana’, dang haccit rohana tu nasida. (Ul. 18:24-28) Diboto Apostel Paulus do kelebihan ni si Apollos. Alai dang gabe merasa tersaingi ibana. Gariada boi do taida sian suratna tu halak Korint, halak na serep roha jala na masuk akkal do si Paulus.​—1 Kor. 3:3-6. w21.07 18-19 ¶15-17

Ala mangalo si Adam dohot si Hawa tu Jahowa, gabe dang anggota keluarga ni Jahowa be nasida. Alai songon dia do akka pinopparna? Dilehon Jahowa do kesempatan tu nasida asa boi gabe anggota keluargana asal ma setia nasida tu Jahowa. Alani i do dilehon Jahowa Anak haholonganna i gabe tobusan. (Joh. 3:16) Hasilna, adong ma 144.000 halak na setia na dipillit gabe akka anak ni Debata. (Rom 8:15-17; Pgk. 14:1) Asing ni si 144.000 halak i, adong dope akka halak na asing na dipillit Jahowa gabe anggota keluargana. Alai ikkon toktong do nasida setia tu Jahowa sappe ujian terakhir di ujung ni pamarettaon 1.000 taon i. (Ps. 25:14; Rom 8:20, 21) Alani harapan i, gabe boi ma nasida sian saonari manjou Jahowa ‘Ama’. (Mat. 6:9) Akka halak na dipahehe pe haduan, mandapot kesempatan do tong marsiajar taringot tu Jahowa. Molo setia do nasida, boi ma nasida gabe anggota keluarga ni Jahowa. w21.08 5 ¶10-11

Saleleng marpulu taon, dibahen si Paulus do marbarita na uli ulaon na paling penting di ngoluna. Marbarita do ibana “di jolo ni godang halak dohot sian jabu tu jabu”. (Ul. 20:20) Dipakke ibana do setiap kesempatan na adong. Misalna, tikki paimahon akka donganna ibana di Atena, dipaboa ibana do barita na uli tu akka pejabat na adong disi jala denggan do hasilna. (Ul. 17:16, 17, 34) Bahkan tikki dipenjara, torus do ibana marbarita na uli tu akka halak na disi. (Plp. 1:13, 14; Ul. 28:16-24) Denggan do muse dipakke si Paulus tikkina. Contohna tikki pardalanan utusan injil na parjolo, diajak ibana do si Johannes Markus. Jala tikki pardalanan utusan injil na paduahon, diajak ibana do si Timoteus. (Ul. 12:25; 16:1-4) Saleleng na rap kerja sama i nasida, pasti diajari si Paulus do halak i songon dia mengorganisasi huria, songon dia asa boi gabe parmahan na denggan, jala songon dia asa lam malo mangajari.​—1 Kor. 4:17. w22.03 27 ¶5-6

Piga-piga halak dang porsea na adong Panoppa, ala dang boi diida Debata. Hape porsea do nasida na adong angin, nang pe so boi diida. Bibel mandok, ‘tutu do akka na tahaporseai i nang pe dang taida dope’, alai ikkon adong do dasarna boasa tahaporseai i. (Heb. 11:1) Porlu do talean tikki dohot upaya asa boi tabuktihon na tutu adong Debata. Alai godang do halak saonari dang olo mangalului buktina. Gabe disimpulhon nasida ma dang adong Debata. Adong do piga-piga ilmuwan na gabe porsea tu Debata dung dibuktihon nasida memang adong do Sitoppa saluhutna. Alani i gabe holong ma roha ni nasida tu Jahowa. Torus ma tapatogu haporseaotta tu Debata, dang soal aha sikkolatta. w21.08 14 ¶1; 15-16 ¶6-7

Dipakke Jesus do ilustrasi taringot anak na mago lao manggombarhon balga ni holong dohot asi ni roha ni Jahowa. Bawa na di ilustrasi ni Jesus i lao do tu luat na dao. “Marsonang-sonang ma ibana disi jala dipahabis ma sude artana.” (Luk. 15:13) Alai dukkon i, disadari ibana ma hasalaanna, dipatutoru dirina jala mulak ma ibana. Songon dia do reaksi ni bapakna? Didok Jesus, “Sian na dao dope nungnga diida bapakna i ibana. Gabe asi ma roha ni bapakna i, marlojong ma ibana, dihaol, jala diumma ma anakna i.” Dang ditolak bapakna i ibana, gariada asi do rohana tu anakna i. Las do rohana manjalo anakna i mulak tu jabu. Disalpuhon bapakna i do sude hasalaan ni anakna i, ala diida ibana nungnga muba anakna i. Bapak na di ilustrasi ni Jesus on, manggombarhon Jahowa. Sian on taboto ma, rade do Jahowa manalpuhon hasalaan ni halak na botul-botul bertobat.​—Luk. 15:17-24. w21.10 8 ¶4; 9 ¶6

Saonari godang do akka pamimpin agama na manabunihon goar ni Debata. Dihapus nasida do muse goar ni Debata di terjemahan Bibel ni nasida. Jala diorai do anggota garejana mamakke goar ni Debata. Alai molo hita Saksi Jahowa dang songon i. Tapatudu do sian pangalahotta na tapasangap goar ni Jahowa di ngolutta. Berupaya do hita mamaritahon goar ni Jahowa di liat portibi on. (Jes. 43:10-12) Taterjemahon do Bibel na mamakke goar ni Jahowa, i ma Bibel Terjemahan Tano na Imbaru. Jala dicetak ma i lobi sian 240 juta. Asing ni i, tabahen do muse publikasi lobi sian 1.000 bahasa na mamakke goar ni Jahowa. w21.10 20-21 ¶9-10

Taurupi ma akka donganta na butuh bantuan. Marjanji do Jahowa tu halak Israel, molo burju nasida tu na pogos pasu-pasuon ni Jahowa do nasida. (5 Mus. 15: 10) Jadi hita pe, taurupi ma akka dongan na porlu dibantu. Molo di Jahowa, bantuanta i dos do songon pelean tu Ibana. (Poda 19:17) Contohna, najolo dilehon halak Kristen di Pilippi do bantuan tu si Paulus tikki dipenjara ibana, jala didok si Paulus do bantuan ni nasida i “pelean na angur, na mambahen las roha ni Debata”. (Plp. 4:18) Alani i, taparrohahon ma akka dongan na porlu diurupi. Las do roha ni Jahowa molo talehon gogo, tenaga, tikki, dohot hepengta lao mangurupi akka dongan. Alana, bagian sian ibadat tu Jahowa do i. (Jak. 1:27) Nang pe godang tikki dohot upaya na ikkon tabahen lao melayani Jahowa, dang gabe beban i di hita. (1 Joh. 5:3) Boasa? Ala holong rohatta tu Jahowa. w22.03 24 ¶14-15

Molo olo hita mamikkiri masalah na diadopi akka donganta, pasti ummura do hita patuduhon asi ni roha tu nasida. Bayakkon ma situasi ni sahalak donganta borua na parah sahitna. Dang hea ra donganta i mengeluh taringot sahitna i. Alai pasti las hian do rohana molo olo hita mangurupi ibana, contohna mangaloppa sipanganonna manang paiasson jabuna. Manang tapikkiri ma jo situasi ni sahalak donganta bawa na dipecat sian karejona. Porlu do ra ibana diurupi sappe dapotna karejo. Boi do ra talean hepengta lao mangurupi ibana, jala undenggan do molo dang pola tapaboa na sian hita hepeng i. Unang ma jolo minta tolong akka dongan tu hita baru pe taurupi nasida. Tatiru ma Jahowa. Dibahen Jahowa do terbit mataniari tiap ari jala dilehon do i tu sude halak, termasuk tu parjahat. Dang hea jolo tajalo i baru pe dilehon Jahowa. Alana, diboto Ibana do na porlu i di hita. Ala holong roha ni Jahowa tu hita, sai diparade do sude kebutuhanta. Hita pe gabe holong ma rohatta tu Ibana. w21.09 22-23 ¶12-13

Holong ni Jahowa na manoktong mangonjar rohana manalpuhon hasalaatta. Tikki diida Jahowa sasahalak bertobat jala dang diulangi ibana be hasalaanna i, rade do Jahowa mengampuni ibana. Si Daud mandok, “Dang hea dibalos [Jahowa] hita hombar tu akka dosatta, jala dang hea dihukum Ibana hita hombar tu akka hasalaatta.” (Ps. 103:8-11) Hea do si Daud mangulahon dosa na balga jala marsak situtu do ibana alani i. Alai ‘rade do Jahowa manalpuhon hasalaanna’. Boasa? Tadapot ma alusna di ayat sadari on. Sian tangiang ni si Daud, taboto ma rade do Jahowa manalpuhon hasalaan. Alana dipatudu Ibana do holong na manoktong tu sude na jou-jou tu Ibana. Tikki taulahon dosa, pasti merasa bersalah do hita. Denggan do i. Alana i do na mangurupi hita asa muba jala dang mangulangi hasalaan na sarupa. w21.11 5 ¶11-12

Dipangido Jahowa do asa dipasangap goarna, ala arga do i di Ibana. (Jes. 42:8) Nungnga lobi 6.000 taon dileai goarna na badia i. (Ps. 74:10, 18, 23) Dimulai ma i di Taman Eden tikki didok Sibolis (lapatanna “Pargabus”), ditabunihon Debata do akka na denggan sian si Adam dohot si Hawa. (1 Mus. 3:1-5) Sahat tu saonari, margabus do Sibolis mandok na ditabunihon Debata na denggan sian jolma. Alani i ma diajari Jesus akka siseanna pabadiahon goar ni Amana. Jahowa do na paling marhak mamaretta di surgo dohot di tano on. Jala cara ni Ibana mamaretta do na paling denggan. (Pgk. 4:11) Alai dioto-otoi Sibolis do akka suru-suruan dohot jolma. Didok Sibolis, dang marhak Debata mamaretta nasida. Alai satokkin nai, pasaeon ni Jahowa nama masalah i. Gabe sude ma mamboto cara ni Debata mamaretta do na paling denggan, jala holan Harajaonna do na boi parohon hadameon tu tano on. w21.07 9 ¶5-6

Lomo do roha ni akka kepala keluarga paradehon akka na porlu di keluargana, songon sipanganon, pakkean, dohot tempat tinggal. Tikki susa parhepengonta, pasti maol do tahilala mangadopi situasi i. Alai boi do tapakke situasi i lao patoguhon haporseaotta. Martangiang ma hita jala tarimangi ma hata ni Jesus na disurat di Mateus 6:25-34. Tapikkirhon ma muse pengalaman ni akka dongan na toktong sibuk mangulahon ulaon Harajaon jala torus do nasida dipasu-pasu Jahowa. (1 Kor. 15:58) Molo taulahon i, gabe lam togu ma haporseaotta. Jala gabe pos ma rohatta urupan ni Jahowa do hita songon akka donganta na asing. Diboto Jahowa do aha na tahaporluhon, jala lehononna do i tu hita. Tikki tahilala songon dia Jahowa mangurupi hita, gabe lam togu ma haporseaotta jala boi ma taadopi hasusaan na umbalga di ari na naeng ro. w21.11 20 ¶3; 21 ¶6

Ajaran taringot tobusan, mambahen lam togu haporseaon ni halak Kristen. Gabe torus ma nasida setia marbarita na uli nang pe ditentang jala manaon na haccit saleleng ni ngoluna. Songon Apostel Johannes, toktong do ibana setia marbarita na uli taringot Kristus dohot tobusan lobi sian 60 taon. Tikki hampir marumur 100 taon, dipenjarahon halak Rom ma ibana di Pulo Patmos, ala ‘mambaritahon taringot tu Debata dohot taringot tu Jesus’. (Pgk. 1:9) Gabe sitiruon na denggan do si Johannes di hita. Adong do lobi sian 100 hali disurat ibana taringot tobusan dohot manfaatna. (1 Joh. 2:2) Takkas ma, massai holong do roha ni si Johannes tu Jesus jala diargai ibana do tobusan i. w21.04 17 ¶9-10

Dipangido Jahowa do asa tapatudu haburjuon tu halak na cacat. Najolo diorai Ibana do halak Israel mamburai halak na nengel. Alana tindakan na kejam do i! Ala dang boi dibege ibana hata na jahat i, gabe dang boi dibela ibana dirina. Di 3 Musa 19:14 pe, didok Jahowa do asa unang dibahen “abbat-abbat di jolo ni halak na mapitung”. Adong sada bukku na mandok, “Najolo di Timur Tengah, jotjot do halak mambahen na jahat tu halak na cacat.” Adong do akka halak di tikki i na mambahen abbat-abbat asa madabu na mapitung. Dung i, diparekkel-ekkeli nasida ma na mapitung i. Tindakan na kejam do i! Alani i ma diparettahon Jahowa tu halak Israel asa marasi ni roha nasida tu akka halak na cacat. w21.12 8-9 ¶3-4

Mabiar jala marsak do si Jakkob mamikkiri songon dia reaksi ni si Esau molo dung pajuppang nasida. Ditangiakkon ibana ma i tu Jahowa. Dung i dikirim ma godang hadiah tu si Esau. (1 Mus. 32:9-15) Tikki pajuppang nasida, marsomba ma si Jakkob tu jolo ni si Esau. Dang holan dua hali, alai sappe pitu hali! On patuduhon na serep do roha ni si Jakkob jala diargai ibana si Esau. Hasilna gabe mardame ma nasida. (1 Mus. 33:3, 4) Jadi sadalan do na diulahon si Jakkob tu tangiangna. Dibahen ibana do sian nasa gogona asa boi mardame dohot abangna i. Jala dung pajuppang nasida, dang diparsoalhon si Jakkob ise do na sala. Alana tujuan ni si Jakkob naeng mardame dohot abangna. Olo do hita maniru si Jakkob?​—Mat. 5:23, 24. w21.12 25 ¶11-12

Tikki tarimangi tobusan ni Jesus, olo do ra didok rohatta, ‘Dang layak au manjalo i.’ Boasa songon i perasaanta? Ala licik do roha i. Gabe didok rohatta ma dang mararga hita jala dang layak dihaholongi. (1 Joh. 3:19) Alai taingot ma “umbalga do Debata sian rohatta”. Holong hian do roha ni Jahowa tu hita, jala olo do Ibana manesa dosatta i. Jadi porlu do tapapos rohatta na dihaholongi Jahowa do hita. Carana, ringgas ma hita marsiajar Bibel, torus ma hita martangiang, jala jotjot ma bergaul tu akka dongan sahaporseaon. Boasa penting i taulahon? Asa lam takkas tatanda akka parange ni Jahowa. Dung i, gabe boi ma tahilala na holong hian do roha ni Jahowa tu hita. Asing ni i mangarimangi Hata ni Debata ganup ari, boi mangurupi hita mambolokkon akka pikkiranta na sala.​—2 Tim. 3:16. w21.04 24 ¶12-13

Porlu do tarimangi akka naung taparsiajari asa togu haporseaotta. Parrohahon ma pengalaman ni panurat Psalmen 77. Marsak do ibana ala dirippu ibana nungnga ditinggalhon Jahowa ibana dohot halak Israel. Sappe dang boi ibana modom alani i. (Ayat 2-8) Didok ibana ma tu Jahowa, “Hurimangi ma sude pambahenanmu, jala hupahusor-husor ma di rohakku akka ulaonmu.” (Ayat 12) Alai nang pe nungnga dirimangi ibana sude ulaon ni Jahowa tu akka naposona di tikki naung salpu, tong dope holsoan ibana. Didok ibana, “Naung lupa do Debata patuduhon asi ni rohana tu hami? Naung muruk hian do Ibana sappe dang asi be rohana tu hami?” (Ayat 9) Torus do dirimangi panurat Psalmen i akka ulaon ni Jahowa dohot asi ni rohana di tikki naung salpu. (Ayat 11) Ala dirimangi ibana i sude, gabe pos ma rohana dang ditinggalhon Jahowa akka naposona. (Ayat 15) w22.01 30 ¶17-18

Songon dia do perasaan ni Jahowa tu akka naposona naung mate? Malungun do Ibana! (Job 14:15) Boi do dibayakkon hamu songon dia sihol ni roha ni Jahowa naeng mangida si Abraham muse? (Jak. 2:23) Songon dia sihol ni rohana naeng makkatai muse “langsung” tu si Musa? (2 Mus. 33:11) Jala songon dia siholna naeng mambege si Daud dohot akka parende na asing mangendehon pujian tu Ibana? (Ps. 104:33) Dang hea dilupahon Jahowa akka ale-alena i nang pe naung mate nasida. (Jes. 49:15) Alani i paheheonna do nasida. Boi ma begeon ni Jahowa muse nasida martangiang, jala boi ma sombaon ni nasida muse Jahowa. Molo lungun rohatta ala mate halak na tahaholongi, pasti tarapul do rohatta mamboto on. Mulai sian na mangalo si Adam dohot si Hawa di Taman Eden, diboto Jahowa do lam tu jahatna nama pangalaho ni jolma. Sogo hian do roha ni Jahowa mangida hajahaton, tindakan na so adil, dohot kekerasan na masa di liat portibi on. w21.07 10 ¶11; 12 ¶12

Molo tahaholongi akka dongan, i patuduhon na taargai do tobusan. Taboto do dang holan hita na ditobus, dohot do akka donganta i. Jadi massai holong do tong roha ni Jesus tu nasida. (1 Joh. 3:16-18) Ikkon tarida do holongta tu akka dongan sian pambahenanta. (Eps. 4:29, 31–5:2) Misalna, taurupi ma nasida tikki marsahit manang tikki masa bencana alam. Jala tapatogu do nasida asa sabar manaon i. Alai songon dia ma hita boi toktong patuduhon holong tikki haccit rohatta dibahen dongan? Songon dia do molo maol tahilala lao manalpuhon hasalaan? (3 Mus. 19:18) Taingot ma poda on, “Toktong ma hamu sabar tu na asing, jala rade ma hamu manalpuhon hasalaan ni nasida nang pe haccit rohamuna dibahen. Songon Jahowa na rade manalpuhon hasalaanmuna, songon i ma ulahon hamu.” (Kol. 3:13) Tikki tasalpuhon hasalaan ni akka dongan, i patuduhon na massai taargai do tobusan. w21.04 18 ¶12-13

Godang do ra naung taulahon tu Jahowa, jala godang do ra halak naung taurupi asa tardidi. Alai taingot ma, boi pe taulahon i ala diurupi Jahowa do hita. Sian contoh ni si Apollos dohot Apostel Paulus hita marsiajar, molo lam godang tanggung jawabta di huria, lam godang ma kesempatanta mambahen huria marsada. Pasti mandok mauliate do hita ala sai berupaya do akka sintua dohot parhobas mangurupi hita marsada dohot mardame di huria. Diurupi nasida do hita asa boi maniru Jesus, dilehon do tu hita poda na sian Bibel, jala dang olo nasida mangalului hasangapon tu dirina sandiri. (1 Kor. 4:6, 7) Sude hita adong be do kelebihanna, jala pasu-pasu sian Jahowa do i. Dipatudos do kelebihanta i songon akka bonang na gelleng na dipasada lao mambahen baju. Jadi nang pe holan saotik na boi taulahon, molo denggan tapakke kemampuanta i boi do i mambahen huria dame jala marsada. Alani i, berupaya ma hita mambolokkon keinginan naeng bersaing sian diritta.​—Eps. 4:3. w21.07 19 ¶18-19

Pos ma rohamuna pasti hehe do annon halak na dihaholongi hamu. Tikki diida Jesus lungun ni roha ni si Marta dohot si Maria ala mate ibotona si Lasarus, dohot do Jesus marlungun ni roha. Alani i dipahehe ibana ma si Lasarus. On patuduhon lomo hian do roha ni Jesus naeng pahehehon halak naung mate. (Joh.11:35) Tikki diida Jesus tangis si Marta dohot si Maria, dohot do ibana tangis. (Joh. 11:25-27) Ditangihon Jesus do halak i jala dipatogu do roha ni nasida. Hita pe, porlu do tabahen songon i. Donganta si Daniel, sahalak sintua na tinggal di Australia mandok, “Tikki mate istrikku, hancur hian do perasaanku. Alai sai didukung akka dongan do au. Adong do piga-piga pasangan na sai rade mandongani au. Dang bosan nasida mambege au marcerita. Dang diorai nasida au tangis. Alani i gabe dang maila au patuduhon perasaanku di jolo ni nasida. Rade do nasida mangurupi au manucci mobil, belanja, dohot mangaloppa. Jotjot do hami rap martangiang. Nungnga songon keluargakku nasida, na sai adong di labbungku ‘tikki masa sitaonon’.”​—Poda 17:17. w22.01 16 ¶8-9

Lomo do roha ni Jahowa asa denggan ngolutta. (Poda 4:20-22) Alani i ma dipasingot Ibana hita marhite Bibel, akka publikasi, dohot akka dongan. Dipasingot Debata pe hita lao mambahen na denggan do i tu hita. (Heb. 12:9, 10) Olo do sipata tahilala dang denggan cara ni sasahalak manasehati. Alai fokus ma hita tu isi ni nasehat i, dang tu carana pasahatton. Memang halak na mangalehon nasehat, ikkon berupaya do mambahen asa mura dijalo nasehatna i. (Gal. 6:1) Alai tikki dipasingot hita, fokus tu isi ni nasehat i ma hita, dang tu halakna. Porlu do tasukkun diritta, ‘Nang pe dang lomo rohakku tu carana pasingotton au, alai tutu do nasehatna i? Gabe berfokus tu hahuranganna do au manang berfokus tu sipasingotna?’ Molo taulahon nasehat na dilehon tu hita, i patuduhon halak na marbisuk do hita. w22.02 12 ¶13-14

Diboto Jahowa do porlu tikki dohot upaya asa boi mambolokkon pikkiran dohot kebiasaan na sala. (Ps. 103:13, 14) Dilehon Jahowa do bisuk dohot gogo tu hita asa boi muba. Dilehon do i marhite Bibel, tondi parbadiana, dohot organisasina. Pakke ma Bibel mamareso dirimuna. Sarupa do Bibel songon kaca. Boi do i mangurupi hamu mamareso cara marpikkir, pakkataion, dohot tindakanmuna. (Jak. 1:22-25) Ingot ma, sai rade do Jahowa mangurupi hamu. Jala diboto Jahowa do na di rohamuna. Diboto Ibana do muse cara na terbaik mangurupi hamu. (Poda 14:10; 15:11) Jadi taratur ma hamu martangiang dohot marsiajar Bibel ganup ari. Pos ma rohamuna standar ni Jahowa do na undenggan. Molo olo hita mangulahon akka paretta ni Jahowa, godang ma manfaat na tadapot. Gabe adong ma harga diritta, adong tujuan ni ngolutta, jala las rohatta.​—Ps. 19:8-11. w22.03 4 ¶8-10

Dohot ma hita mambangun jala mangarawat Bale Harajaon. Didok di Bibel, ibadat tu Jahowa do ulaon mambangun tabernakel dohot mambahen akka peralatanna. (2 Mus. 36:1, 4) Jadi ulaonta lao mambangun jala mangarawat Bale Harajaon dohot akka fasilitas teokratis, termasuk do i bagian sian ibadatta tu Jahowa. Godang do akka donganta na gabe relawan tusi. Taargai ma sude pengorbanan ni nasida. Semangat do nasida muse marbarita na uli. Bahkan adong do sian nasida na bercita-cita gabe perintis biasa. Alani i, molo diida akka sintua memenuhi syarat do nasida gabe perintis, unang ma diabbati nasida cita-citana i. Molo tung pe saonari hita dang boi gabe relawan pembangunan, alai dohot ma hita mangarawat akka fasilitas teokratis. w22.03 22 ¶11-12