Maret

‘Biru-biru na asing’ na didok di Mateus 25:31-36, i ma akka halak na naeng mangolu di tano on. Setia do nasida mangurupi akka haha anggi ni Jesus na lao mangolu di surgo, misalna marbarita na uli tu liat portibi on dohot mambahen sisean. (Mat. 24:14; 28:19, 20) Asing ni i ganup taon, diundang nasida do muse akka halak asa ro tu Borngin Parningotan i. Denggan do dipersiappon nasida akka na porlu tu acara i. On ma cara ni nasida mangurupi akka haha anggi ni Jesus. Jala manang aha pe na dibahen nasida lao mangurupi haha anggi ni Jesus, dos songon na mangurupi Jesus do i.​—Mat. 25:37-40. w22.01 22-23 ¶11-12

Tatiru ma sifat ni Jesus dohot cara ni ibana mangurupi akka halak. Misalna asi do roha ni Jesus mangida na marsahit kusta, mangida borua na marsahit na parah, jala diapuli ibana do akka halak na marlungun ni roha alani hamatean. (Mrk. 1:40, 41; 5:25-34; Joh. 11:33-35) Molo tatiru Jesus na maniru Jahowa do hita disi. Jala molo tatiru Jahowa, gabe lam jonok ma hita tu Ibana. Asing ni i molo taihutton bogas ni pat ni Jesus, dang taihutton be portibi on. Alana di borngin andorang so mate Jesus, didok ibana do, “Nungnga hutaluhon portibi on.” (Joh. 16:33) Maksud ni Jesus di ayat on, dang terpengaruh ibana tu cara marpikkir dohot pangalaho ni halak na di portibi on. Sai diingot Jesus do tujuanna disuru tu tano on, i ma pabadiahon goar ni Jahowa. Saonari godang do di portibi on na boi mambahen hita dang fokus manomba Jahowa. Alai molo tatiru Jesus, gabe torus ma hita fokus manomba Jahowa, jala boi ma hita “manaluhon” portibi on.​—1 Joh. 5:5. w21.04 3-4 ¶7-8

Diingot Apostel Paulus do janji ni Jesus na mandok, “Ganup na patuduhon haporseaon tu [Jesus] . . . mandapot hangoluan na saleleng ni lelengna.” (Joh. 3:16; Rom 6:23) Porsea do si Paulus tu tobusan. Jala porsea do ibana, molo bertobat sasahalak sesaon ni Jahowa do dosana i nang pe balga. (Ps. 86:5) Ala diboto si Paulus na dilehon Jahowa do Anakna i mate humokkop ibana, on paposson roha ni si Paulus na dihaholongi Jahowa do ibana. Dang hea si Paulus merasa dang layak dihaholongi. Alana di Galatia 2:20 didok ibana do, ‘Anak ni Debata i makkaholongi au jala mangalehon ngoluna humokkop au.’ Dang hea ro tu roha ni si Paulus pikkiran sisongon on, ‘Boi do huida dihaholongi Jahowa akka dongan. Alai dang boi hurasahon na dihaholongi Jahowa au.’ Alani i, dipaingot si Paulus ma akka dongan na di Rom, “Mate do Kristus i humokkop hita tikki mardosa dope hita.” (Rom 5:8) Takkas ma massai balga do holong ni Jahowa tu hita, dos songon holong na dipatudu Ibana tu halak Israel najolo. w21.04 22 ¶8-10

Urupi ma studimuna makkaholongi Jahowa. Songon dia carana? Tiap marsiajar hamu, hubungkon ma parsiajaran i tu akka sifat ni Jahowa. Urupi ma studimuna asa diboto ibana Debata na marlas ni roha do Jahowa, jala lomo do rohana mangurupi akka halak na makkaholongi Ibana. (1 Tim. 1:11; Heb. 11:6) Paboa ma tu studimuna sude na diparsiajarina i bukti holong ni Jahowa do i, jala adong do manfaatna molo diterappon ibana i. (Jes. 48:17, 18) Molo nungnga lam bagas holongna tu Jahowa, pasti berupaya do ibana lao muba. Asa boi studitta tardidi, ikkon adong do pengorbananna. Contohna ikkon ditinggalhon ibana do karejo na so sesuai tu prinsip ni Bibel dohot akka donganna na so makkaholongi Jahowa. Na asing mandapot tantangan do sian keluargana na so Saksi Jahowa. Alai nang pe songon i, marjanji do Jesus pasu-pasuon ni Jahowa do pengorbananna i. Jala dilehon do akka dongan sahaporseaon na boi gabe keluargana.—Mrk. 10:29, 30. w21.06 4-5 ¶8-9

Dipatudos Apostel Paulus do mambahen sisean i songon na martani. Didok ibana, “Au do na manuan, si Apollos do na maniram . . . Hamu do ladang na niula ni Debata.” (1 Kor. 3:6-9) Sahalak pangula, dang holan manuan bibit alai ikkon disiram ibana do i. Suang songon i ma hita parkarejo di ‘ladang ni Debata’. Dang holan marbarita na uli, alai ikkon taajarhon do i. (Joh. 4:35) Taingot ma, Jahowa do na mambahen hasittongan i tubu di roha ni sasahalak. Jala Jahowa do na manogu-nogu sasahalak asa jonok tu Ibana. Sada tugas na istimewa do marbarita dohot mangajarhon hasittongan tu akka halak. Jala karejo na mambahen las ni roha do i. Las ni roha i do na dihilala si Paulus ala godang halak Tessalonik na diurupi ibana gabe halak Kristen. Didok ibana, “Ai molo dang hamu, ise be huroa na mangurupi hami marpos ni roha jala marlas ni roha? Jala molo dang hamu, ise ma na gabe mahkota hasangaponnami di jolo ni Tuan Jesus di harorona i? Tutu, hamu do hasangaponnami dohot las ni rohanami.”—1 Tes. 2:19, 20; Ul. 17:1-4. w21.07 3 ¶5; 7 ¶17

Jahowa do na manogu hita sude asa jonok tu Ibana. (Joh. 6:44) Manat do diparrohahon Jahowa marmiliar jolma na adong di portibi on lao mangida ise halak na tulus marroha. (1 Kron. 28:9) Jadi ditanda jala dihaholongi Jahowa do hita secara pribadi. Alani i pasti dihaholongi Ibana do tong akka donganta sahaporseaon. Coba ma jo taingot muse tikki dipatudos Jesus Jahowa songon parmahan. Molo adong sada sian 100 biru-biruna na mago, aha do diulahon parmahan i? Tottu ditadikkon ibana do na 99 i kan? Dung i lao ma ibana mangalului na mago i. Dung dapot ni parmahan i biru-biru i, dang gabe muruk ibana. Gariada las do rohana. Aha do parsiajaranna? Sude naposo ni Jahowa, arga do di Ibana. Alani i ma didok Jesus, “Dang lomo roha ni Damang na di banua ginjang i mago apala sada pe sian na metmet on.”​—Mat. 18:12-14. w21.06 20 ¶1-2

Molo tarimangi balga ni holong ni Jahowa tu hita, gabe lam holong ma rohatta tu Jahowa jala lam togu ma hubungatta tu Ibana. (Rom 8:38, 39) Gabe tergerak ma hita maniru Jesus. (1 Ptr. 2:21) Biasana andorang so dapot Borngin Parningotan, taparsiajari do kisah ni Jesus sian Bibel. Taparsiajari do songon dia parngoluonna saminggu sebelum mate ibana, songon dia parmatena, dohot haheheonna. Jala tikki acara Borngin Parningotan i, dipasahat ma jamita na paingotton hita tu balga ni holong ni Jesus. (Eps. 5:2; 1 Joh. 3:16) Molo tarimangi i sude, gabe tergerak ma hita mangihutton “akka na diulahon [Jesus]”. (1 Joh. 2:6) Jala lam berupaya ma hita asa toktong di bagasan holong ni roha ni Debata. (Jud. 20, 21) Carana, taoloi ma parettana, tapabadia goarna, jala tabahen ma las rohana. (Poda 27:11; Mat. 6:9; 1 Joh. 5:3) Jadi ro ma hita tu Borngin Parningotan i, asa boi hita toktong di bagasan holong ni roha ni Jahowa. w22.01 23 ¶17; 25 ¶18-19

Dilean Jahowa do tu hita hak lao mamillit. Alani i, boi do tapillit akka na naeng taulahon di ngolutta. Las hian do roha ni Jahowa molo tapillit manomba Ibana. (Ps. 84:11; Poda 27:11) Ala dilean Jahowa do tu hita hak lao mamillit, adong ma kesempatanta mambahen akka keputusan na denggan. Songon Jesus, dipillit ibana do mambahen kepentingan ni halak uppetting sian kepentinganna sandiri. Hea do sada tikki nungnga loja hian Jesus dohot akka siseanna. Jadi naeng istirahat ma halak i. Hape ro ma akka halak mandapotton nasida naeng mambege ajaran ni Jesus. Gabe dang jadi nasida istirahat. Alai dang jut roha ni Jesus, gariada asi do rohana mangida halak i. Jadi aha do na diulahon Jesus? “Godang ma diajarhon ibana tu nasida taringot tu Debata.” (Mrk. 6:30-34) Tatiru ma Jesus, tabahen ma keputusan na denggan lao mangalean tikki dohot gogotta lao mangurupi akka dongan na asing. Molo taulahon i, na pasangappon Debata Jahowa do hita disi.​—Mat. 5:14-16. w21.08 3 ¶7-8

Dang diharappon Jahowa ikkon sarupa hita songon halak na asing. Marragam do ditoppa Jahowa jenis ni akka suan-suanan, akka binatang, jala jolma pe marasing-asing do. Dang adong halak na persis sama. Alani i, dang hea dibanding-bandingkon Jahowa hita tu na asing. Na diida Jahowa sian hita, na di bagasan rohatta do. (1 Sam. 16:7) Takkas do diboto Ibana kelebihanta, hahuranganta, dohot latar belakangta. Dang hea dipangido Jahowa na so boi taulahon. Molo tatiru Jahowa, gabe “marbisuk” ma hita manilai diritta sandiri. Dang taanggap be massai penting diritta, manang merasa hita dang mararga. (Rom 12:3) Lomo do rohatta marsiajar sian akka donganta na asing. Misalna molo adong donganta na malo marbarita na uli, boi do hita marsiajar sian ibana. (Heb. 13:7) Molo tabahen songon i, gabe malo ma tong hita marbarita. (Plp. 3:17) Alai tikki tatiru teladan ni sasahalak, manat ma hita asa unang sappe mambandingkon diri tu ibana. w21.07 20 ¶1-2

Molo jotjot taamati akka toppaan songon binatang, suan-suanan, dohot akka bintang, lam pos ma rohatta adong do Panoppa. (Ps. 19:1) Molo jotjot taparsiajari taringot i, lam togu ma haporseaotta tu Jahowa na manoppa saluhutna. Manat ma taparrohahon aha na boi taparsiajari taringot sifat ni Jahowa sian akka toppaan i. (Rom 1:20) Misalna mataniari, massai petting do on asa boi hita mangolu. Alana molo dang adong mataniari, dang adong sumber panas dohot sumber cahaya tu portibi on. Alai adong do sinar na berbahaya di mataniari i. Nang pe songon i, adong do lapisan ozon na melindungi planet bumi on sian sinar na berbahaya i. Molo lam mohop mataniari i, gabe lam tebal ma lapisan ozon i asa unang sahat sinar na berbahaya i tu planet bumi on. Luar biasa do i. Pasti adong do Panoppa na marbisuk na mambahen i sude. w21.08 17 ¶9-10

Molo nungnga tardidi sahalak parsiajar Bibel, toktong ma tahaholongi jala taargai ibana. (1 Joh. 4:20) Songon dia carana? Ikkon porsea do hita tu donganta i. Seandaina pe dibahen donganta i keputusan na so masuk akkal tahilala, unang ma pittor tahakimi ibana. Unang ma ragu hita tu motifna manomba Jahowa. Alai ikkon sangap do tabahen ibana. (Rom 12:10; Plp. 2:3) Sasittongna ikkon tapatudu do asi ni roha dohot haburjuon tu sude halak. Molo naeng toktong do hita gabe keluarga ni Jahowa salelengna, ikkon taulahon do paretta ni Jahowa. Misalna diajarhon Jesus do tu hita asa tapatudu asi ni roha dohot haburjuon tu akka halak, termasuk ma i tu musutta. (Luk. 6:32-36) Memang dang sai mura mangulahon i, alai ikkon tatiru do cara marpikkir ni Jesus. Molo taoloi Jahowa jala tatiru Jesus, i patuduhon na lomo do rohatta gabe anggota keluarga ni Jahowa salelengna. w21.08 6 ¶14-15

Taandalhon ma Jahowa. Marjanji do Jahowa lao mamasu-masu hita molo talehon na dumenggan tu Ibana. Di Bibel adong do disurat teladan ni akka halak na berjuang lao mangulahon na dumenggan tu Jahowa. Sian akka contoh i hita marsiajar, ikkon jolo bertindak do hita asa boi dipasu-pasu. Misalna si Abraham, dung ditinggalhon ibana do hutana baru pe dipasu-pasu Jahowa ibana, “nang pe dang diboto [ibana] dope manang tudia ibana lao”. (Heb. 11:8) Molo si Jakkob, jolo margulat do ibana dohot suru-suruan, dung i pe asa dipasu-pasu Jahowa ibana. (1 Mus. 32:24-30) Tikki naeng masuk tu Tano na Dijanjihon, jolo mangalakka do akka malim, dung i pe asa so aek ni Sunge Jordan na doras i. (Jos. 3:14-16) Saonari pe, adong do akka donganta na mandapot pasu-pasu ala mangalehon godang tikki dohot gogona tu Jahowa. w21.08 29-30 ¶12-14

Hamu akka dongan na matua, nang pe nga godang pengalamanmuna, alai porlu do hamu mambahen penyesuaian molo muba situasi. Nang pe baru tardidi dope hamu, alai godang do na boi diceritahon hamu tu akka na poso. Ceritahon hamu ma songon dia las ni rohamuna boi mananda Jahowa. Pasti diargai akka na poso do i. Molo lam godang pengalaman na dibagihon hamu tu akka na poso, dipasu-pasu Jahowa ma hamu. (Luk. 6:38) Molo jonok hamu tu akka na poso, gabe boi ma hamu masiurupan. (Rom 1:12) Sude do hita adong kelebihanna. Akka dongan na matua, nga godang be pengalamanna, gabe marbisuk ma nasida. Akka na poso, kuat dope nasida. Jadi molo olo do nasida kerja sama, gabe parohon sangap ma i tu Jahowa, jala gabe dipasu-pasu ma huria. w21.09 8 ¶3; 13 ¶17-18

Ala dihukum mate Jesus di hau, gabe ditolak halak Jahudi ma ibana. Boasa? Alana menurut nasida, parjahat do na dihukum mate di hau, dang Messias. (5 Mus. 21:22, 23) Godang do halak Jahudi dang porsea tu Jesus, ala dirippu nasida Jesus marsala. Jala dang diboto nasida na dibahen do tuduhan palsu tu ibana. Sasittongna dang adil na masa tu Jesus i. Alana dang diihutton pengadilan ni halak Jahudi aturan na sah lao mangadili Jesus. (Luk. 22:54; Joh. 18:24) Bahkan dilului nasida do hatorangan sian akka saksi palsu asa boi pamatehon Jesus. (Mat. 26:59; Mrk. 14:55-64) Dung hehe Jesus, dilean sintua ni malim ma tu akka tentara na manjaga kuburan ni Jesus “godang hepeng logam perak” lao menyogok nasida. Tujuanna, asa margabus halak i mandok sisean ni Jesus do na manakko bakke ni Jesus i sian kuburan.​—Mat. 28:11-15. w21.05 11 ¶12-13

Saleleng marribu taon, sabar do Jahowa mangida hasusaan na masa di tano on. Sabotulna, boi do dihancurhon Jahowa manang na sadihari pe portibi na jahat on. Alai sabar do Jahowa jala parohon pasu-pasu do i tu hita. Dang adong nanggo sada pe pinoppar ni si Adam dohot si Hawa na sempurna. Alai dihaholongi Jahowa do hita jala dipardulihon. Marjanji do Ibana lao padenggatton portibi na jahat on. (1 Joh. 4:19) Jala nungnga ditottuhon ibana andigan i masa. Molo tarimangi on gabe taronjar ma rohatta asa toktong sabar, songon Jahowa na jotjot patuduhon hasabaron. Jesus pe ditiru do hasabaron ni Jahowa. Tikki di tano on dope ibana, sabar do Jesus nang pe kasar halak tu ibana, dileai, jala dipakkuhon di hau partinaonan. (Heb. 12:2, 3) Boi pe Jesus toktong setia jala martahan, ala ditiru ibana do hasabaron ni Jahowa. On do tong na mambahen hita togu saonari. w21.07 12-13 ¶15-17

Tiap ari do Jahowa patuduhon asi ni rohana tu hita. (Ps. 103:10-14) Jesus pe ditiru do Jahowa. Nang pe dang sempurna akka siseanna, olo do Jesus patuduhon asi ni roha tu nasida, jala rade do ibana manalpuhon hasalaan ni halak i. Dang holan i, gariada olo do ibana mate lao manobus dosatta. (1 Joh. 2:1, 2) Molo ‘rade hita manalpuhon hasalaan’ ni akka dongan, gabe lam balga ma holongta tu nasida. (Eps. 4:32) Memang dang sai mura mangulahon i. Songon i do na dihilala sahalak donganta borua. Alai sada artikel di Menara Pengawal na marjudul “Ampunilah Satu Sama Lain dengan Lapang Hati”, boi mangurupi ibana. Didok ibana, “Dipaboa disi, molo rade hita manalpuhon hasalaan ni akka donganta, dang na berarti setuju hita tu tindakanna i manang dang boi haccit rohatta sama sekali tu ibana. Alai manalpuhon hasalaan berarti, dang torus muruk hita tu ibana asa boi toktong dame rohatta.” Jadi molo olo hita manalpuhon hasalaan ni akka dongan, i patuduhon na holong do rohatta tu nasida jala na tatiru do Jahowa, Bapakta i. w21.09 23-24 ¶15-16

Holong do roha ni Jesus tu hasittongan, i ma hasittongan taringot tu Debata dohot akka janjina. Tarida do i sian parniulaon ni Jesus, semangat do ibana paboahon hasittongan tu akka halak. (Joh. 18:37) Songon Jesus, dihaholongi akka siseanna do hasittongan. (Joh. 4:23) I do alana didok si Petrus molo halak Kristen mardalan di “dalan hasittongan”. (2 Ptr. 2:2, surat na di toru) Ala dihaholongi halak Kristen di abad na parjolo do hasittongan, dang olo nasida mangihutton ajaran ni pamimpin agama, tradisi, dohot cara marpikkir ni jolma na maralo tu hasittongan. (Kol. 2:8) Hita pe saonari, berupaya do “mangihutton hasittongan”. Tapastihon do sude na tahaporseai sesuai tu hata ni Jahowa, jala taulahon do i. (3 Joh. 3, 4) Dang didok Saksi Jahowa, naung diattusi nasida sude isi ni Bibel. Alani i do sipata disesuaihon muse pemahamanta taringot ajaran ni Bibel dohot petunjuk ni organisasi. w21.10 21-22 ¶11-12

Najolo asa terlindungi akka halak sian musu, ikkon dibahen do tembok ni kota. Dos songon i ma holong ni Jahowa na manoktong, mangalinggomi hita sian akka bahaya na boi mambahen gale haporseaotta. Holong na manoktong i do na mangonjar roha ni Jahowa lao manarik hita tu hasittongan. (Jer. 31:3) Didok si Daud, “Debata do inganan parlinggomakku na aman, dipatudu Debata do holong ni rohana tu au.” Didok si Daud do muse, “Dipatuduhon Ibana do holongna tu au jala Ibana do Sipalua au, Ibana do bentengku jala Ibana do parlinggoman di au, Ibana do perisaiku jala Ibana do parlinggomakku.” (Ps. 59:17; 144:2) Boasa dipatudos holong ni Jahowa na manoktong i songon benteng manang inganan parlinggoman? Alana dang soal didia hita tinggal, molo toktong tasomba Jahowa, pasti jagaonna do hita sian akka bahaya na boi mambahen gale haporseaotta. w21.11 6 ¶14-15

Sada tikki marlayar ma Jesus dohot akka siseanna. Ro ma badai jala masuk ma aek tu parau i. Modom do Jesus tikki i. Ala mabiar hian akka sisean i, gabe didungoi nasida ma Jesus. Didok Jesus ma tu nasida, “Boasa pola mabiar hamu, hamu siotik haporseaon?” (Mat. 8:23-26) Sipata taadopi do hasusaan na songon badai. Misalna bencana alam manang masalah kesehatan. Gabe marsak do hita alani i. Jala olo do dang taboto aha na ikkon taulahon. Alai unang ma sappe gale haporseaotta. Torus ma tapatogu haporseaotta tu Jahowa marhite tangiang, jala tarimangi ma songon dia Jahowa mangurupi hita saleleng on. (Ps. 77:11) Pos ma rohatta molo tung pe taadopi hasusaan, dang tadikkonon ni Jahowa hita. w21.11 22 ¶7, 10

Olo do ra sasahalak marpikkir dang hea ibana manakko, jadi merasa ma ibana nungnga mandalatton patik i. Alai belum tentu ibana benar-benar jujur. Contohna, adong do partiga-tiga na mamakke timbangan manang ukkuran na so sittong. Di 3 Musa 19:13 didok, “Unang oto-otoi hamu donganmuna jolma.” Jadi sesuai tu ayat on, taboto ma molo halak na mangoto-otoi manang halak na so jujur, sarupa do i songon na manakko. Memang tikki dijaha halak Jahudi patik paualuhon, diboto halak i do na sala manakko. Alai 3 Musa 19 boi do mangurupi halak i asa lam takkas mangattusi aha prinsip na adong di patik i. Hita pe saonari boi do marsiajar sian i. Sian on taboto ma songon dia pandangan ni Jahowa taringot halak na so jujur dohot panakko. Jadi porlu do tasukkun diritta, ‘Mangihutton 3 Musa 19:11-13, adong do na porlu hupadenggan sian carakku marbisnis?’ w21.12 9-10 ¶6-8

Tikki martangiang hita tu Jahowa ganup ari, penting do tong tapikkiri hasalaan na taulahon di sadari i, jala tapangido ma asa diampuni Jahowa hita. Alai molo dosa serius do na taulahon, ikkon tapaboa do i tu akka sintua, asa diurupi hita. Pasti olo do nasida manangihon hita, jala lehononna ma poda sian Hata ni Debata. Ditangiakkon nasida ma hita. Dipangido nasida ma tu Jahowa asa disesa dosatta i marhite tobusan ni Jesus, asa denggan muse hubungatta tu Jahowa. (Jak. 5:14-16) Godang do manfaatna molo tarimangi taringot tobusan, boi ma tabayakkon songon dia pakkilalaan ni Jahowa tikki mate Jesus manobus hita. Molo tarimangi do pengorbanan ni Jesus i, gabe lam balga ma holongta tu ibana dohot tu Jahowa. Boi do muse lam taargai tobusan i molo dohot hita mangundang godang halak asa ro nasida tu Borngin Parningotan Hamamate ni Jesus. Hasangapon na massai balga do i. w21.04 18-19 ¶13-16

Sada tikki lao ma Jesus tu sada dolok. Disi ma ibana saborngin manipat martangiang tu Debata. Pasti nga loja hian Jesus tikki i. Alai marsogotna i ro ma godang halak manjuppangi ibana. Asi do roha ni Jesus tu nasida, khususna tu halak na pogos dohot tu akka na marsahit. Alani i dipamalum Jesus ma nasida jala dipasahat ma jamita lao patoguhon nasida. Digoari do jamita i, Jamita na di Dolok. (Luk. 6:12-20) Olo do muse Jesus paradehon tikkina tu na asing. Boi do dibayakkon hamu songon dia perasaan ni Jesus tikki dibege ibana nungnga dipamate si Johannes Pandidi? Bibel mandok, “Dung dibege Jesus na masa i, lao ma sahalakna marparau tu inganan na lungun.” (Mat. 14:10-13) Alai ro ma godang halak mandapotton Jesus tu inganan i. Bahkan parjolo do nasida sahat disi. Boha do reaksi ni Jesus? (Mrk. 6:31-33) “Gabe asi ma rohana” mangida nasida. Diboto Jesus do porlu nasida diurupi jala dipatogu. Jadi pittor diurupi Jesus ma nasida.​—Luk. 9:10, 11. w22.02 21 ¶4, 6

Aha ma na ikkon taulahon molo tasadari nungnga tabahen haccit roha ni donganta? Tatangiakkon ma parsoalan i tu Jahowa. Tapangido ma asa dipalambok roha ni donganta i, asa boi hita mardame muse dohot ibana. Porlu do muse tasukkun diritta, ‘Molo dung pajuppang au dohot ibana, olo do au na parjolo minta maaf? Boha do perasaan ni Jahowa dohot Jesus molo hubahen songon i?’ Porlu do tarimangi i asa lam tergerak hita mardame dohot donganta i. Jala porlu do muse tapatudu serep ni roha. (Eps. 4:2, 3) Ikkon lambok do hita makkatai tu ibana, alana tujuanta manjuppangi donganta i, asa boi do muse denggan hubungatta. Ingot ma, uppetting do mardame dohot donganta sian apala mambuktihon ise na sala.​—1 Kor. 6:7. w21.12 25-26 ¶13-16

Diboto Jesus do godangan halak Jahudi dang olo manjalo Ibana. Alani i do gabe dihancurhon kota Jerusalem jala godang ma penduduk ni kota i na gabe tawanan. (Luk. 21:20-24) On ma na mambahen massai lungun roha ni Jesus. Hea do hamu merasa songon i? Olo do ra godang halak na manolak hamu tikki marbarita na uli. Molo songon i do situasimuna, marsiajar ma hamu sian Jesus. Lungun do rohana mamikkirhon kota Jerusalem na lao dihancurhon. Tikki na diandungi Jesus i kota Jerusalem, taboto ma na holong do roha ni Jahowa tu akka jolma. “Dang lomo rohana diripasson manang ise pe, alai naeng ma sude jolma marhamubaon.” (2 Ptr. 3:9) Hita pe boi do patuduhon holongta tu akka halak, molo berupaya hita marbarita na uli tu nasida.​—Mat. 22:39. w22.01 16-17 ¶10-12

Boi do lam togu haporseaotta molo tarimangi akka na diulahon Jahowa tu naposona dohot tu hita secara pribadi. On pe boi do mambahen gabe lam tamba holongta tu Jahowa. Hasilna gabe mura ma hita mangoloi parettana, rade ma hita mambahen pengorbanan lao palasson rohana, jala boi ma hita martahan nang pe adong tantangan. (Mat. 22:37-39; 1 Kor. 13:4, 7; 1 Joh. 5:3) Dang adong na ummarga sian hubungatta tu Jahowa! (Ps. 63:1-8) Taingot ma bagian sian ibadat tu Jahowa do martangiang, marsiajar Bibel, dohot mangarimangi. Songon na dibahen Jesus, talului ma inganan na tenang jala tapasiding ma akka gangguan tikki mangulahon i. Dung i tapangido ma tu Jahowa asa diurupi hita fokus. Molo denggan tapakke tikkitta, pasti dipasu-pasu Jahowa do hita jala boi ma dapotta ngolu salelengna di tano na imbaru.​—Mrk. 4:24. w22.01 30-31 ¶18-20

Aha na tapikkirhon berpengaruh do tu tindakanta. Alani i ma disuru Jesus hita mambolokkon pikkiran na sala, ala boi do i mambahen hita mangulahon dosa na balga. (Mat. 5:21, 22, 28, 29) Molo lomo do rohatta mambahen las roha ni Jahowa, ikkon hatop do tabolokkon pikkiran na sala. Didok Jesus, “Sude na kaluar sian pamangan ni halak, na ro sian roha do i jala i do na mambahen ramun.” (Mat. 15:18) Sian pakkataionta tarida do aha na adong di bagas rohatta. Jadi tasukkun ma diritta, ‘Berusaha do au jujur nang pe gabe parohon masalah i tu au? Molo nungnga menikah au, olo dope au menggoda lawan jenis? Hupasiding do pakkataion na rorang? Lambok do au mangalusi halak na mambahen jut rohakku?’ Godang do manfaatna molo tapikkirhon sukkun-sukkun i. Molo berupaya hita jujur, dang kasar makkatai, jala dang olo mandok hata na rorang, gabe mura ma hita mananggalhon pangalaho na leleng i. w22.03 5 ¶12-14

Biasana halak na olo mangido nasehat ukkatop do mambahen kemajuan sian halak na so olo mangido i. Jadi denggan do molo berinisiatif hita mangido nasehat sian halak na asing. Tikki sadihari do hita porlu mangido nasehat sian akka donganta? Taida ma piga-piga situasi on. (1) Sahalak donganta borua manogihon donganta naung berpengalaman mandongani ibana memandu studi. Dung sae studi, disukkun ibana ma patnerna i aha do na porlu dipadenggan sian carana memandu studi. (2) Sahalak donganta borua naeng manuhor pakkean. Disukkun ibana ma pandapot ni sahalak donganta borua na gabe teladan di huria. (3) Sahalak donganta bawa ditugasson marjamita, jala on do tugasna marjamita parjolo sahali. Dipangido ibana ma sahalak donganta naung berpengalaman manangihon jamitana i. Dung i disukkun ibana ma tu donganta i atik adong do na porlu dipadenggan sian carana marjamita. Nang pe nungnga sering sasahalak marjamita, denggan do molo dipangido ibana nasehat sian donganta naung berpengalaman, dung i diulahon ibana ma nasehat i.​—Poda 19:20. w22.02 13 ¶15-17

Dipatudu Jahowa do holongna tu hita dos songon holong na dipatudu Ibana tu Jesus. (Joh. 5:20) Diurupi Jahowa do Jesus asa toktong togu haporseaonna, dipatogu do muse Jesus tikki marsak, jala diparade do kebutuhan ni Jesus. Didok Jahowa do muse tu Jesus, na holong rohana tu ibana jala las situtu rohana mangida Anakna i. (Mat. 3:16, 17) Ala boi do dihilala Jesus holong ni Jahowa i, gabe dang hea ibana merasa kesepian. Songon Jesus, pasti sude do hita nungnga hea makkilala holong ni Jahowa. Ditogu-togu Ibana do hita asa bergabung tu organisasina. Jala dibahen do hita gabe anggota keluargana. Godang do akka dongan sahaporseaotta di liat portibi on, diurupi nasida do hita tikki susa. Alani i, gabe boi ma hita toktong marlas ni roha. (Joh. 6:44) Dipatogu Jahowa do muse haporseaotta lewat publikasi dohot parpunguan. Jala diparade Jahowa do sude kebutuhanta. (Mat. 6:31, 32) Molo sai taingot haburjuon dohot holong ni Jahowa i, gabe lam balga ma holongta tu Ibana. w21.09 22 ¶8-9

Songon dia do parngoluonmuna sebelum marsiajar Bibel dohot Saksi Jahowa? Godang do sian hita dang olo mangingot-ingot i. Sebelum marsiajar Bibel, standar ni portibi on do na mempengaruhi cara marpikkir dohot pangalahotta. Tikki i, ‘dang tatanda Debata jala dang adong janji ni Debata na tapaima’. (Eps. 2:12) Alai dung marsiajar Bibel, gabe diboto hamu ma massai holong do roha ni Jahowa tu hamu. Diboto hamu ma muse, molo naeng dibahen hamu las rohana jala gabe bagian ni keluargana, ikkon dipauba hamu do gaya hidup dohot cara marpikkirmuna. Jala, ikkon diihutton hamu do standar ni Jahowa. (Eps. 5:3-5) Bapakta do Jahowa jala Ibana do Sitoppa hita, jadi marhak do Ibana manottuhon standar na ikkon diihutton anggota keluargana. Jala dipangido Ibana do asa ‘tatanggalhon pangalahotta na leleng’ sebelum tardidi hita. w22.03 2 ¶1-3

Las do roha ni biru-biru na asing ro tu acara Borngin Parningotan. Gabe kesempatan na denggan do i lao mangarimangi harapan ni nasida. Tarpaima do nasida mambege jamita na mangulas akka pasu-pasu na lao jaloon ni nasida molo dung mamaretta Jesus dohot si 144.000 saleleng 1.000 taon. Di tikki i, bahenon ni Jesus dohot si 144.000 i ma tano on gabe Paradeiso jala urupan ni nasida ma sude jolma asa sempurna. Di acara Borngin Parningotan i, pasti las do roha ni biru-biru na asing mambayakkon songon dia Jahowa pasautton akka janjina na tarsurat di Jesaya 35:5, 6; 65:21-23, dohot di Pangungkapon 21:3, 4. Molo dirimangi nasida sudena i, gabe lam togu ma haporseaon ni nasida jala lam bertekad ma nasida asa toktong setia melayani Jahowa.​—Mat. 24:13; Gal. 6:9. w22.01 21 ¶5-7

Aha do arti ni tobusan? Arga na ikkon digarar Jesus lao manobus akka naung digadaihon si Adam. (1 Kor. 15:22) Sesuai tu standar ni Jahowa taringot keadilan, ikkon hosa do gatti ni hosa. (2 Mus. 21:23, 24) Jadi asa boi didalatton standar ni Jahowa i, ikkon dilean Jesus do ngoluna na sempurna lao manggattihon ngolu na sempurna na dipamago si Adam. (Rom 5:17) Alani i gabe “Ama na Saleleng ni lelengna” ma Jesus tu sude halak na porsea tu tobusanna i. (Jes. 9:6; Rom 3:23, 24) Ala massai holong do roha ni Jesus tu Jahowa dohot tu hita, dilehon ibana ma ngoluna gabe tobusan. (Joh. 14:31; 15:13) Toktong do Jesus setia sahat tu na mate, gabe boi ma dipasae ibana tugas na sian Jahowa. Hasilna, boi ma saut rencana ni Jahowa tu jolma dohot tu portibi on. w21.04 14 ¶2-3