Januari

Godang do tugas na dilehon tu si Timoteus lao melayani Jahowa. Boasa boi songon i? Ala denggan akka sifatna. (Plp. 2:​19-22) Sian hata ni Apostel Paulus taringot si Timoteus di ayat on, taboto ma molo si Timoteus halakna serep marroha, setia, jala bertanggung jawab. Holong do rohana tu akka dongan sahaporseaonna. Alani i ma holong hian roha ni si Paulus tu si Timoteus. Jala dang ragu ibana mangalehon akka tanggung jawab na borat tu si Timoteus. Sarupa songon i ma, molo berupaya hita padenggatton akka sifatta, lam godang ma na boi taulahon di huria jala lam holong ma roha ni Jahowa tu hita. (Ps. 25:9; 138:6) Tangiakkon jala pikkirhon ma aha do na porlu dipadenggan hamu sian dirimuna. Pillit ma sada sifat na porlu dipadenggan hamu. Misalna, boi do hamu lam berempati? Manang, boi do dibahen hamu tujuan asa gabe siboan dame jala mura manalpuhon hasalaan ni akka dongan? Denggan do muse molo dipangido hamu saran sian akka dongan na boi dihaporseai hamu.—Poda 27:6. w22.04 23 ¶4-5

Parbue ni tondi parbadia do las ni roha i. Sian on taboto lomo do roha ni Jahowa asa marlas ni roha hita. (Gal. 5:22) Umlas do roha ni na mangalehon sian na manjalo. Alani i do las rohatta molo godang na boi taulahon lao melayani Jahowa dohot mangurupi akka dongan. (Ul. 20:35) Songon na dipaboa si Paulus di ayat sadari on, adong dua na mambahen hita toktong marlas ni roha. Na parjolo, ikkon talean do na undenggan tu Jahowa. Alana molo talean na undenggan, gabe las ma rohatta. (Mat. 22:​36-38) Na paduahon, unang ma tabandingkon diritta tu na asing. Molo godang na boi taulahon tu Jahowa ala sehat dope hita, nga mandapot pelatihan, jala adong bakatta, ikkon mandok mauliate do hita tu Jahowa. Alai molo adong donganta na ummalo sian hita misalna tikki marbarita na uli, las ma rohatta disi. Alana lao mamuji Jahowa do dipakke ibana kemampuanna i. w22.04 10 ¶1-2

Tarsonggot do akka halak haduan mangida kehancuran ni agama na so sittong. (Pgk. 18:​8-10) Balga do pengaruh ni i tu sude jolma na adong di portibi on. Gabe lam susa do annon parngoluon ni jolma. Alai hita naposo ni Jahowa, dang tarsonggot. Gariada marlas ni roha do hita. Boasa? Adong dua alasanna. Na parjolo ala nungnga hancur agama na so sittong, musu ni Jahowa. Na paduahon, pos do rohatta satokkin nai dipalua nama hita sian portibi na jahat on! Si Daniel paboahon adong do tikkina “massai godang ma parbinotoan na sittong” di tano on. Jala saonari ma i masa. (Dan. 12:​4, 9, 10) Ala nungnga taida masa surirang i, pasti gabe lam taargai ma Bibel jala gabe tapasangap ma Jahowa. (Jes. 46:10; 55:11) Alani i, toktong ma berupaya hita patoguhon haporseaotta tu Jahowa. Ringgas ma hita marsiajar Bibel jala taurupi ma halak asa boi gabe ale-ale ni Jahowa. Pos ma rohatta, sai jagaon ni Jahowa do akka halak na porsea tu Ibana. Jala ‘toktong do lehononna hadameon’ tu nasida.—Jes. 26:3. w22.07 6-7 ¶16-17

Di bukku Pangungkapon dipaboa do molo Harajaon ni Debata nungnga dipajongjong jala Sibolis nungnga didabuhon tu tano on. (Pgk. 12:​1-9) Alani i gabe marlas ni roha ma akka suru-suruan na di surgo. Alai gabe parohon jea do i tu hita. Boasa? Alana gabe muruk do Sibolis tu akka naposo ni Jahowa na setia di tano on. (Pgk. 12:​12, 15, 17) Songon dia do carana asa toktong hita setia tu Jahowa nang pe diserang Sibolis? (Pgk. 13:10) Asa boi togu haporseaotta, taingot ma aha na lao masa di ari na naeng ro. Misalna dipaboa Apostel Johannes do di bukku Pangungkapon akka pasu-pasu na lao tadapot haduan. Sada sian i, lao dihancurhon ma akka musu ni Debata. w22.05 8 ¶1-3

Pendirian ni Saksi Jahowa na togu mambahen muruk akka na menentang Jahowa. Alani i, gabe marsada ma sude bangso lao menyerang akka naposo ni Debata di liat portibi on. Di Bibel digoari ma on, serangan Gog na sian Magog. (Hes. 38:​14, 15) Songon dia do reaksi ni Jahowa mangida serangan i? Didok Ibana, “Marsigorgor ma rimashu.” (Hes. 38:​18, 21-23) Dipaboa do di Pangungkapon bindu 19 aha na masa dukkon i. Disuru Jahowa do Jesus paluahon naposona jala manghancurhon akka musuna i. Haduan, rap ma Jesus dohot akka tentarana na di banua ginjang, i ma suru-suruan dohot si 144.000 i manghancurhon Gog na sian Magog. (Pgk. 17:14; 19:​11-15) Ujungna dihancurhon ma sude jolma dohot organisasi na mangalo Jahowa!—Pgk. 19:​19-21. w22.05 16-17 ¶9-10

Dung mardosa si Adam dohot si Hawa, pittor dipaboa Jahowa ma sada surirang na penting na marisi janji tu pinoppar ni nasida. Disurat do surirang i di 1 Musa 3:15 na mandok, “Bahenokku ma marmusu ho dohot borua i. Jala bahenokku ma marmusu pinopparmu dohot pinopparna. Ropukon ni pinopparna i ma ulum jala turbingonmu ma tumit ni patna.” On ma surirang na parjolo disurat di Bibel. Penting do taboto surirang on, ala sude isi ni Bibel berkaitan do tu surirang i. Songon jilid ni bukku na pasadahon sude halaman ni bukku, songon i ma surirang na disurat di 1 Musa 3:15. On ma na pasadahon sude isi ni Bibel gabe sada tema, i ma na lao suruon ni Debata do Sipalua lao manghancurhon Sibolis dohot akka pengikutna na jahat. Sada surirang na luar biasa do on di hita naposo ni Jahowa! Molo taparsiajari Bibel, boi ma taboto songon dia akka surirang i digenapi jala aha manfaat ni i tu hita. w22.07 14 ¶1-3

Pangido ma bisuk sian Jahowa asa boi diurupi hamu gellengmuna makkaholongi Ibana. (Jak. 1:5) Jahowa do na paling cocok mangalehon nasehat taringot pagodang-godangkon dakdanak. Boasa? Na parjolo, Jahowa do Natua-tua na paling berpengalaman. (Ps. 36:9) Na paduahon, nasehat ni Jahowa i selalu do bermanfaat. (Jes. 48:17) Marhite Bibel dohot organisasina, dilehon Jahowa do petunjuk tu akka natua-tua asa boi diurupi nasida gellengna makkaholongi Jahowa. (Mat. 24:45) Misalna adong do artikel berseri “Bantuan untuk Keluarga” di majalah Sadarlah!. Saonari nga tersedia i di situs webta. Asing ni i, adong do muse akka video di jw.org na marisi wawancara dohot akka video na asing na mangurupi natua-tua pagodang-godangkon gellengna.—Poda 2:​4, 5. w22.05 27 ¶4-5

Dang sarupa cara ni Jahowa mengampuni tu cara ni jolma mengampuni. Boasa? Na parjolo, ala sai rade do Jahowa mengampuni hita. Na paduahon, diboto Ibana do sude taringot hita. Jala diboto Ibana do na botul-botul hita bertobat manang na dang. Na patoluhon, molo nungnga diampuni Jahowa hita dang diingot-ingot Ibana be i. Jala dianggap Ibana do hira na so hea taulahon dosa i. Hasilna gabe ias ma panggora ni rohatta jala boi ma tabahen las roha ni Jahowa. Saleleng dang sempurna dope hita, pasti taulahon do na sala. Alai boi do tarapul rohatta molo taida hatorangan na adong di bukku Pemahaman Alkitab jilid 2, halaman 1.054. Disi didok, “Parasi roha do Jahowa. Jala takkas do diboto ibana jolma na gale do akka naposona. Jadi unang pola torus metmet rohatta molo taulahon dope na sala. (Ps. 103:​8-14; 130:3) Molo berupaya hita mambahen las roha ni Jahowa, boi do hita marlas ni roha. (Plp. 4:​4-6; 1 Joh. 3:​19-22).” w22.06 7 ¶18-19

Dang holan tekanan sian pamaretta na dipakke Sibolis lao pabiar-biarhon hita. Adong do halak na mabiar molo diboto keluargana nungnga gabe Saksi Jahowa nasida. Sipata umbiar do nasida tu reaksi ni keluargana i daripada dianiaya pamaretta. Holong do roha ni nasida tu keluargana jala lomo do roha ni nasida asa manomba jala makkaholongi Jahowa keluargana i. Jadi tikki adong keluargana na mangaleai Debata dohot akka dongan sahaporseaon, gabe lungun ma roha ni nasida. Memang adong do anggota keluarga na menentang hinan ujungna gabe Saksi Jahowa. Alai molo so olo be anggota keluargatta berhubungan tu hita alani haporseaotta, songon dia do reaksitta? Dipatogu do rohatta molo taingot isi ni Psalmen 27:10. Pos ma rohatta pasti dipasu-pasu Jahowa do kesetiaanta tu Ibana. Taingot ma holan Jahowa do na boi paradehon sude kebutuhanta, mambahen dame roha dohot pikkiranta, jala mangurupi hita asa torus jonok tu Ibana. w22.06 16-17 ¶11-13

Saleleng di tano on Jesus, jotjot do halak mandok ibana sisobur anggur, simokkus, dongan ni Sibolis, halak na mangalanggar Sabat, jala na mangaleai Debata. (Mat. 11:19; 26:65; Luk. 11:15; Joh. 9:16) Alai dang hea muruk Jesus mangalusi nasida. Songon Jesus, toktong ma hita lambok nang pe kasar halak makkatai tu hita. (1 Ptr. 2:​22, 23) Memang dang sai mura mangulahon i. (Jak. 3:2) Attong aha ma na boi mangurupi hita? Molo adong parjabu na muruk-muruk tikki marbarita na uli hita tu ibana, unang ma pittor jut rohatta. Coba ma tapikkiri boasa sappe songon i ibana. Donganta si Sam mandok, “Na sai huingot, porlu hian do parjabu i mananda Jahowa. Jala boi do nasida muba.” Sipata muruk pe parjabu tu hita, ala na so pas do tikkitta makkunjungi nasida. Pittor martangiang ma tu Jahowa, asa dibahen ibana tenang jala asa unang sappe kasar makkatai. Molo adong halak na muruk-muruk tu hita, toktong ma hita lambok makkatai jala unang ma jut rohatta. w22.04 6 ¶8-9

Sada cara mangurupi ianakkotta asa jonok tu Jahowa, i ma rap mamparsiajari Bibel dohot nasida. (2 Tim. 3:​14-17) Alai dipaboa Bibel do muse adong cara na asing lao marsiajar taringot Jahowa. Di bukku Poda dipaboa do taringot sahalak ama na paingotton anakna asa unang lupa tu sifat ni Jahowa na tarida sian akka toppaan. (Poda 3:​19-21) Hamu akka natua-tua, bahen hamu ma tikki rap dohot gellengmuna mengamati akka toppaan. Urupi ma nasida marsiajar taringot sifat ni Jahowa sian akka toppaan i. (Rom 1:20) Parrohahon ma songon dia Jesus mamakke toppaan tikki mangajari. Hea do dijujui Jesus akka siseanna asa mamparrohahon burung gagak dohot akka bunga di ladang. (Luk. 12:​24, 27-30) Dipaboa ibana ma sada parsiajaran na penting taringot haburjuon ni Jahowa: Pasti paradeon ni Jahowa do pakkean dohot sipanganon ni sude naposona na setia, dos songon na dibahen Ibana tu burung gagak dohot akka bunga na di ladang i. w23.03 20-21 ¶1-4

Mandok mauliate do hita tu Jahowa ala boi tapasahat tangiangta marhite goar ni Anakna. Asa olo Jahowa manangihon dohot mangalusi tangiangta, ikkon tapasahat do i marhite goar ni Jesus. Marhite tobusan ni Jesus do Jahowa manesa dosatta. (Rom 5:1) Di Bibel didok do Jesus i ‘sintua ni malim na hundul di sabola kanan ni tahta ni Debata na Marmulia’. (Heb. 8:1) Didok do muse di Bibel Jesus do “na mangurupi hita”, jala rap do ibana dohot Damang i. (1 Joh. 2:1) Pasti mandok mauliate do hita tu Jahowa ala dilehon Ibana do tu hita Sintua ni Malim na boi mangattusi hagaleonta, jala na “mambahen pangidoan tu Debata taringot tu hita”. (Rom 8:34; Heb. 4:15) Molo dang alani tobusan ni Jesus, dang adong nanggo sada pe sian hita na boi martangiang tu Jahowa. Jadi silehon-lehon na massai arga do tobusan ni Jesus, jala dang tarbalos hita i. Mandok mauliate ma hita tu Jahowa ala dilehon Ibana Anak haholonganna i. w22.07 23 ¶10-12

Halak na boi dihaporseai i ditepati do janjina jala makkatahon na sittong. (Ps. 15:4) Asing ni i, boi do ibana diandalhon. Lomo do rohatta asa songon i pandangan ni akka dongan tu hita. Dang boi tapaksa na asing asa porsea tu hita, jadi ikkon tabuktihon do i sian pambahenatta. Dos do i songon hepeng, maol papunguhon alai mura pahabisson. Ikkon berusaha do hita asa boi dihaporseai. Marsiajar ma hita sian Jahowa. Dibuktihon Ibana do na boi Ibana dihaporseai. Pos do rohatta tu Ibana “alani sude na binahenna”. (Ps. 33:4) Jala lomo do rohana asa tatiru Ibana. (Eps. 5:1) Mandok mauliate do hita ala dipillit Jahowa gabe bagian sian keluargana na marsihaholongan jala na boi tahaporseai. Alani i, berusaha ma hita sude asa boi dihaporseai akka donganta di huria. Torus ma tapatudu holong, serep ni roha, bisuk, jujur ma hita, jala tarajai ma diritta. Toktong ma tatiru Jahowa jala torus ma tabuktihon sian tindakanta na boi hita dihaporseai. w22.09 8 ¶1-2; 13 ¶17

Nang pe taboto godang akka dongan sahaporseaon di huria, alai olo do hita merasa kesepian, kecil hati, jala merasa dang adong na mangattusi perasaanta. Dang lomo roha ni Jahowa molo songon i perasaanta. Pikkirhon ma songon dia Jahowa mangurupi si Elia. Ditogihon Ibana do si Elia asa makkatai tu Ibana. Dua hali ma disukkun Jahowa tu si Elia, “Marhua ho dison Elia?” (1 Raj. 19:​9, 13) Tikki dipaboa si Elia sude na di rohana, ditangihon Jahowa do ibana. Dipaboa Jahowa do tu si Elia, godang nai dope halak Israel na toktong manomba Ibana. (1 Raj. 19:​11, 12, 18) Pasti lega do perasaan ni si Elia dung paboahon sude na di rohana jala mangida songon dia Jahowa mangalusi ibana. Asing ni i dilehon Jahowa do tu si Elia tugas na penting. Disuru do ibana asa melantik si Hasael gabe raja di Siria, si Jehu gabe raja di Israel, jala si Elisa gabe panurirang. (1 Raj. 19:​15, 16) Hasilna gabe boi ma si Elia torus marpikkiran positif. Dang holan i, ditugasson Jahowa do si Elisa lao mandongani ibana. w22.08 8 ¶3; 9 ¶5

Hea do adong pembangunan manang renovasi Bale Harajaon di huriamuna? Molo hea, pasti diingot hamu dope tikki parjolo sahali marpungu disi. Mandok mauliate do hamu tu Jahowa. Jala alani las ni rohamuna olo do ra sappe tangis hamu tikki parjolo sahali marende di Bale i. Tottu gabe dipasangap do goar ni Jahowa alani pembangunan Bale Harajaon i. Alai adong dope na boi taulahon lao pasangappon Ibana, i ma patoguhon akka dongan sahaporseaon. Umbalga do pengaruh ni i sian pembangunan Bale Harajaon. Hea do ditaringoti Apostel Paulus on di suratna na gabe ayat harian sadari on. Dipatudu Apostel Paulus do roha sapakkilalaan tikki patoguhon akka dongan sahaporseaon. Gabe teladan na denggan do ibana di hita. Tatiru ma Apostel Paulus lao patoguhon akka donganta saonari.—1 Kor. 11:1. w22.08 20 ¶1-2

Halak Kristen boi didok mangulahon na sittong di jolo ni Debata molo jujur ibana tikki marbisnis. Asing ni i, dang lomo rohana molo dibahen na so adil tu halak na asing. Jala tikki naeng mambahen keputusan, ikkon jolo dipikkirhon ibana do songon dia perasaan ni Jahowa asa boi ibana “marpangalaho hombar tu lomo ni roha ni Jahowa”. Bibel mandok Jahowa do “mual ni hasittongan”. (Jer. 50:7) Ala Jahowa do Sipanoppa jala sempurna do Ibana, holan Ibana do na marhak manottuhon dia na sittong dohot na sala. (Poda 14:12; Jes. 55:​8, 9) Nang pe songon i, boi do hita mangihutton standar ni Jahowa na sittong ala dilehon do tu hita kemampuan lao maniru Ibana. (1 Mus. 1:27) Lomo do rohatta mangulahon i jala alani holongta tu Jahowa, berupaya do hita maniru Ibana sian nasa tolapta.—Eps. 5:1. w22.08 27 ¶5-6

Tikki adong masalah na taadopi manang tikki metmet rohatta, lomo do rohatta mangulahon kegiatan na asing asa unang masalahta i na sai tapikkiri. Wajar do i, alai manat ma hita asa unang sappe mangulahon akka na dihasogohon Jahowa. (Eps. 5:​10-12, 15, 16) Di suratna tu huria Pilippi, dipaingot si Paulus do halak Kristen asa toktong mamikkirhon ‘akka na sittong, . . . na badia, na mambahen halak marholong ni roha, . . . dohot akka na denggan’. (Plp. 4:8) Memang dang taringot hiburan na dipaboa si Paulus di ayat on. Alai prinsip na adong di ayat on boi mangurupi hita mamillit hiburan, songon ende, film, sijahaon, manang video game. Gabe taboto ma hiburan na songon dia do na sesuai tu lomo ni roha ni Jahowa dohot na dihasogohon rohana. Pasti lomo do rohatta mangihutton standar ni Jahowa.—Ps. 119:​1-3. w22.10 9 ¶11-12

Najolo diulahon “halak na jahat” do akka na dihasogohon Jahowa. Jadi dung dipahehe nasida, porlu do nasida diajari asa boi mangulahon standar ni Jahowa. Alani i, lao bahenon ni Debata ma program pendidikan na umbalga di saluhut tano on. Ise do na lao mangajari akka “halak na jahat i”? Punguan bolon dohot akka “halak na burju” na dipahehe. Asa boi tarsurat goar ni halak na jahat i di bukku hangoluan, ikkon jonok do hubungan ni nasida tu Jahowa jala olo mangalehon diri lao melayani Ibana. Jesus dohot si 144.000 i ma na mangida sian surgo songon dia tanggapan ni nasida tu standar ni Jahowa na diajarhon tu nasida. (Pgk. 20:4) Molo adong na so mangoloi, dang diloas ibana toktong mangolu, nang pe ra nungnga marumur 100 taon ibana. (Jes. 65:20) Boi do takkas diida Jahowa dohot Jesus isi ni roha ni jolma. Jala dang na loason ni nasida adong akka halak na mambahen masalah di tano na imbaru.—Jes. 11:9; 60:18; 65:25. w22.09 17 ¶11-12

“Pamaretta” na didok di ayat on, i ma akka halak na mamaretta jala na marhuaso tu na asing. Unduk do halak Kristen tu nasida. Alana berupaya do nasida mambahen akka peraturan asa tertib jala taratur sudena. Jala di piga-piga situasi, dilindungi nasida do akka naposo ni Jahowa. (Pgk. 12:16) Alani i taoloi ma nasida. Contohna tabayar ma pajak jala tapasangap ma nasida. (Rom 13:7) Alai taingot ma, boi pe akka pamaretta i marhuaso ala na diloas Jahowa dope nasida. Songon i do na didok Jesus tu gubernur ni Rom, i ma si Pontius Latus. Tikki didok si Latus boi do ibana paluahon manang pamatehon Jesus, didok Jesus ma mangalusi, “Dang marhuaso ho tu au, molo so Debata na mangalehon huaso i tu ho.” (Joh. 19:11) Sian hata ni Jesus on taboto ma, terbatas do huaso ni sude pamaretta na adong di portibi on. w22.10 13-14 ¶6

Marhite panogu-noguon ni tondi parbadia, disurat Raja Daud do songon dia annon ngolu ni akka halak molo dung mamaretta raja na marbisuk jala na setia. (Ps. 37:​10, 11, 29) Jotjot do ra tajahahon Psalmen 37:11 tu akka halak tikki martukkar pikkiran taringot Paradeiso di ari na naeng ro. Jesus pe hea do dikutip ibana ayat i tikki marjamita di dolok. Dipaboa ibana do na lao digenapi i di ari na naeng ro. (Mat. 5:5) Alai hea do ayat i digenapi tikki mamaretta Raja Salomo. Di pamarettaon ni Raja Salomo marlas ni roha do naposo ni Debata, jala dame do dihilala nasida tinggal di luat na “godang susu dohot madu”. Nungnga marjanji Debata, “Molo toktong dioloi hamu akka aturanku . . . bahenokku ma dame luatmuna, jala boi do hamu sonang modom, dang mabiar tu manang aha pe.” (3 Mus. 20:24; 26:​3, 6) Digenapi ma janji i saleleng pamarettaon ni Raja Salomo. (1 Kron. 22:9; 29:​26-28) Hata na di Psalmen 37:​10, 11, 29 hea do digenapi najolo jala lao digenapi ma i muse di ari na naeng ro. w22.12 10 ¶8

Ala halak Kristen hita, ikkon taihutton do petunjuk. Bibel mandok, “Molo marporang ho, ihutton ma poda sian halak na marbisuk, jala boi do monang molo godang na mamodai.” (Poda 24:6) Molo taihutton prinsip na adong di ayat on, boi ma i mangurupi hita asa marhasil marbarita na uli dohot mangajari. Nang pe nungnga terbiasa hita mamakke sada cara, alai tacoba ma akka cara na asing na dilehon organisasi. Di parpunguan, diajari do hita asa malo marbarita na uli dohot mangajari. Disediahon organisasi do muse akka alat na efektif. Contohna akka publikasi dohot video na boi mangurupi hita mangajarhon isi ni Bibel tu na asing. Marlas ni roha do hita ala boi tabege bisuk ni Jahowa i sian Bibel. Bayakkon ma songon dia parngoluotta molo dang adong i. Pasti dang bahagia hita. Alani i, sai berupaya ma hita mamparsiajari bisuk ni Jahowa jala mangulahon i.—Poda 3:​13-17. w22.10 23 ¶18-19

Molo taallang sipanganon boi do lam gogo dagingta. Dos songon i ma, molo taparsiajari Hata ni Debata jala tarimangi i lam togu ma haporseaotta. Lomo do roha ni Jahowa asa taattusi aha na didok Jahowa. Boi do taulahon i molo martangiang hita, manjaha Bibel, jala mangarimangi i. Parjolo martangiang ma hita asa rade rohatta manjalo pikkiran ni Debata. Dung i tajaha ma Bibel, jala tarimangi ma na tajaha i. Aha do hasilna molo taulahon i? Molo taattusi Hata ni Debata, lam togu ma haporseaotta. Boasa massai penting manjaha Bibel jala mangarimangi i? Alana boi do i mambahen hita margogo pasahatton barita Harajaon dohot paboahon barita panguhuman di ari na naeng ro. Asing ni i muse, molo tarimangi akka sifat ni Jahowa gabe lam togu ma parale-aleotta tu Ibana. w22.11 6-7 ¶16-17

Didok Jesus akka halak na so siseanna pe boi do mananda ise halak Kristen na sittong ala mangida holong na dipatudu nasida. Luar biasa do holong na dipatudu Saksi Jahowa. Nang pe songon i, dang adong sian nasida na sempurna. (1 Joh. 1:8) Lam tatanda akka dongan di huria, lam takkas do taboto hahurangan ni nasida. (Rom 3:23) Akibatna adong do piga-piga halak na gabe tartuktuk jala dang olo be manomba Jahowa alani hahurangan ni na asing. Songon dia do Jesus patuduhon holong tu akka apostelna? Jala songon dia do carana maniru Jesus saonari? Nang pe nungnga gabe Saksi Jahowa hita, pasti lomo do rohatta mamboto alus ni sukkun-sukkun on. Gabe lam tergerak ma hita patuduhon holong tarlumobi tikki berurusan tu akka dongan na so sempurna.—Eps. 5:2. w23.03 26-27 ¶2-4

Lam jonok hita tu ujung ni portibi na dirajai Sibolis on, bisa jadi lam godang do tantangan na ro sian huria na manguji kesetiaanta. Jadi tajaga ma rohatta. Molo adong dongan sahaporseaon na mambahen na so adil tu hita, unang ma gabe jut rohatta. Molo dipissang hita, olo do ra maila hita. Alai tajalo ma sipasingot i jala tabahen ma perubahan. Molo dibahen organisasi perubahan na berdampak tu hita, rade ma hita manjalo dohot mangihutton i. Toktong ma porsea tu Jahowa dohot tu organisasina nang pe diuji kesetiaanta. Toktong ma tenang jala taida ma masalahta i sian cara pandang ni Jahowa. Martangiang ma hamu tu Jahowa asa diurupi jala toktong ma jonok tu akka dongan di huria. Molo diulahon hamu i, dang soal aha na masa dang na lao marhasil Sibolis manirang hamu sian Jahowa dohot organisasina.—Jak. 4:7. w22.11 24-25 ¶14-16

Diurupi akka sintua do akka dongan mambahen persiapan sebelum masa bencana. Dipastihon nasida do sude na di huria mamboto aha na porlu diulahon nasida asa tetap aman jala songon dia nasida boi manghubungi akka sintua. Aha do na boi diulahon hamu? Molo jonok do lokasi bencana i sian ingananmuna, sukkun ma tu akka sintua songon dia carana mangurupi. Boi do ra hamu manawarhon jabumuna gabe tempat tinggal sementara tu akka dongan na mangungsi manang tu relawan pembangunan. Boi do muse hamu manaruhon sipanganon dohot kebutuhan na asing na dihaporluhon akka dongan. Molo dao lokasi bencana i sian ingananmuna, boi do tong hamu mangurupi. Songon dia carana? Tangiakkon hamu ma akka dongan na hona bencana. (2 Kor. 1:​8-11) Boi do muse hamu mangalehon sumbangan tu pekerjaan seluas dunia. (2 Kor. 8:​2-5) Molo boi hamu lao tu lokasi bencana i, sukkun ma akka sintua songon dia carana hamu mangurupi. Molo diundang hamu tusi, dapotmuna ma annon pelatihan lao mangurupi akka dongan di lokasi bencana i. w22.12 24 ¶8; 25 ¶11-12

Ayat harian sadari on ditujuhon tu akka bawa dohot borua Kristen na tinggal di Korint. Piga-piga sian nasida adong do na hea gabe pangalakkup, parmabuk, jala mangulahon seks dohot sesama jenis. (1 Kor. 6:​9-11) Menurut hamu dung tardidi halak i, pittor mago do keinginan ni nasida na sala i? Daong. Nang pe nungnga dimiahi tondi parbadia nasida, jolma na so sempurna dope nasida. Alani i, ikkon torus do nasida berjuang mangalo keinginan na sala. Gabe tarapul do rohatta mamboto on. Boasa? Alana dang holan sahalakta na berjuang mangalo keinginan na sala. Godang do akka donganta naung marhasil mangatasi i. Gabe dipatogu do haporseaotta ala taboto ‘akka dongan sahaporseaotta na di liat portibi on pe manaon sitaonon na songon i do’.—1 Ptr. 5:9. w23.01 12 ¶15

Dipangido Jesus ma tu Jahowa asa dijaga akka siseanna i. (Joh. 17:11) Boasa on mambahen hita barani? Alana dao do umgogo Jahowa sian sude musutta. (1 Joh. 4:4) Jadi pos ma rohatta molo taandalhon Jahowa pasti boi do taatasi biar ni rohatta jala gabe barani. Maila do hamu paboahon na Saksi Jahowa hamu? Ragu do hamu naeng gabe parbarita manang tardidi ala khawatir tu pandangan ni halak? Unang ma paloas akka perasaan sisongon i mangabbati hamu mangulahon na sittong. Torus ma tangiakkon i tu Jahowa. Pangido ma tu Jahowa asa barani hamu mangulahon lomo ni rohana. Tikki diida hamu songon dia Jahowa mangalusi tangiangmuna, gabe lam togu ma hamu jala barani.—Jes. 41:​10, 13. w23.01 29 ¶12; 30 ¶14

Disukkun Jesus do halak Parise “Na so hea do dijaha hamu?” lao patuduhon dang diattusi nasida Surat na Badia. (Mat. 12:​1-7) Di tikki i, halak Parise mandok molo sisean ni Jesus nungnga mangalanggar ari Sabat. Lao mangalusi nasida, dikutip Jesus ma dua contoh sian Surat na Badia dohot sada ayat sian bukku Hosea na patuduhon dang diattusi nasida lapatan ni ari Sabat jala dang dipatudu nasida asi ni roha. Nang pe jotjot dijaha nasida Hata ni Debata, alai boasa dang dipaloas nasida i membentuk cara marpikkirna? Ala ginjang do roha ni nasida jala dijaha nasida pe i holan lao mangalului kesalahan ni na asing. Alani i gabe dang boi diattusi nasida na dijahana i. (Mat. 23:23; Joh. 5:​39, 40) Di Mateus 19:​4-6 hea do muse disukkun Jesus tu halak Parise, “Na so hea do dijaha hamu?” Nang pe nungnga jotjot dijaha nasida taringot panoppaon, alai dang dijalo nasida pandangan ni Debata taringot perkawinan. Sian hata ni Jesus marsiajar do hita, ikkon denggan do cara marpikkirta tikki manjaha Bibel. Unang ma songon halak Parise hita, ikkon serep ma rohatta jala olo diajari. w23.02 11-12 ¶12-13

Dilehon Jahowa do Patik tu halak Israel songon dia nasida boi melindungi diri sian kecelakaan na boi terjadi di jabu manang di inganan karejo. (2 Mus. 21:​28, 29; 5 Mus. 22:8) Molo adong sasahalak na so sengaja mambunu halak na asing, ikkon ditanggung ibana do akibatna. (5 Mus. 19:​4, 5) Bahkan di Patik i dipaboa ikkon dihukum do sasahalak na so sengaja mambahen celaka poso-poso na di kandungan dope. (2 Mus. 21:​22, 23) Jadi takkas do dipaboa di Bibel lomo do roha ni Jahowa asa tajaga keselamatanta. Tapatudu ma na taargai hangoluan sian Debata molo toktong tajaga keselamatan tikki di jabu dohot di inganan karejo. Molo naeng tabolokkon benda-benda tajam, bahan kimia na marraccun, manang obat-obatan, tapastihon ma i unang parohon bahaya tu na asing. Jala pastihon ma akka benda sisongon i dang boi dijangkau dakdanak. Asing ni i, berhati-hati ma hita tikki mamakke kompor, mangarobus aek, dohot mamakke peralatan. Unang ma tatinggalhon i molo so adong na mengawasi. Unang ma hita mamboan mobil molo dang fokus hita, misalna ala baru minum obat, minum minuman beralkohol, manang molo hurang modom hita. Jala unang ma tatiop HP tikki mamboan mobil alana boi do gabe dang fokus hita. w23.02 21-22 ¶7-9

Sabar do Jahowa, burju, jala masuk akkal. Akka na denggan do diida Ibana sian muridna. (Ps. 130:3) Jala dang hea dipangido tu hita lobi sian na boi taulahon. Taingot ma muse Jahowa do na merancang otakta, jala silehon-lehon na luar biasa do i. (Ps. 139:14) Lomo do roha ni Jahowa asa marlas ni roha hita marsiajar taringot Ibana salelengna. Alani i, sian saonari ikkon “mauas” hita tu hasittongan ni Bibel. (1 Ptr. 2:2) Bahen ma tujuan na boi diraih hamu jala toktong ma ihutton jadwal naung dibahen hamu lao marsiajar. (Jos. 1:8) Marhite pangurupion ni Jahowa, boi ma lam dinikmati hamu tikki marsiajar jala mangarimangi taringot Ibana. Memang porlu do adong parbinotoan asa mura hita marsiajar taringot Jahowa jala asa boi tapatudu sifat na denggan, songon holong dohot haporseaon. Alai dang sae holan i. (1 Kor. 8:​1-3) Tikki marsiajar hita, tapangido ma tu Jahowa asa lam togu haporseaotta. (Luk. 17:5) Dialusi Jahowa do tangiang sisongon i. w23.03 10 ¶11, 13

Lomo do roha ni Jesus asa toktong sibuk akka siseanna huhut paimahon kehancuran ni Jerusalem dohot bagas jorona. Alani i, dilehon Jesus ma tu nasida tugas asa marbarita na uli “di Jerusalem, di sude luat na di Judea, di Samaria, sahat tu ujung ni tano on”. (Ul. 1:​6-8) Ulaon na massai balga do on! Alani i, ikkon denggan do nasida mamakke tikki asa boi mangulahon tugas na penting on. Sada cara mamparrohahon diritta, i ma mangarimangi songon dia caratta mamakke tikki. Alana boi do toppu masa “akka na so diharappon” tu hita sude. (Pjm. 9:11) Boi do toppu salpu ngolutta manang sadihari pe. Denggan ma tapakke tikkitta. Carana, taulahon ma lomo ni roha ni Jahowa jala tapatogu ma parale-aleotta tu Ibana. (Joh. 14:21) “Ikkon togu do hita, dang muba-uba, jala sai marsitutu ma hita mangulahon godang ulaon ni Tuhan.” (1 Kor. 15:58) Molo taulahon i, tung pe mate hita manang marujung portibi na jahat on, dang manolsoli be hita. Alana nungnga tabahen na dumenggan lao melayani Jahowa.—Mat. 24:13; Rom 14:8. w23.02 18 ¶12-14