Februari

Holong na dipaboa Jesus di ayat harian sadari on, i ma holong na rela berkorban. Holong sisongon on ma na mangonjar roha ni sahalak Kristen olo mangalehon ngoluna humokkop akka donganna. Jotjot do dipaboa di Bibel massai penting patuduhon holong. Godang do halak na mambahen akka ayat ni Bibel on gabe ayat favorit ni nasida. Misalna, “Holong do Debata.” (1 Joh. 4:8) “Ikkon haholonganmu do donganmu jolma doshon dirim.” (Mat. 22:39) “Halak na marholong ni roha, rade do manalpuhon hasalaan.” (1 Ptr. 4:8) “Dang na olo salpu holong ni roha i.” (1 Kor. 13:8) Sian akka ayat on dohot ayat na asing, taboto ma massai penting do patuduhon holong. Sian Jahowa do holong na sasittongna. Jadi holan akka halak na diurupi tondi parbadia jala na dipasu-pasu Jahowa do na boi patuduhon holong sisongon i. (1 Joh. 4:7) Takkas ma, holan akka sisean ni Jesus do na boi patuduhon holong na rela berkorban. Songon naung didok Jesus, godang do halak na mananda halak Kristen na sittong ala mangida holong na dipatudu nasida. w23.03 27-28 ¶5-8

Lomo do roham manalpuhon hasalaan ni na asing? Jaha jala rimangi ma akka contoh na disurat di Bibel taringot halak na olo dohot na so olo manalpuhon hasalaan. Contohna Jesus, rade do ibana manalpuhon hasalaan ni na asing. (Luk. 7:47) Diboto Jesus do adong hahurangan manang hasalaan ni nasida. Alai diingot Jesus do tong akka sifat ni nasida na denggan. Sebalikna molo halak Parise, ‘leas do rohana mangida na asing’. (Luk. 18:9) Tikki diparsiajari hamu akka contoh i, sukkun ma dirimuna, ‘Aha do na huida sian na asing? Sifat na denggan na dia do sian nasida na naeng hutiru?’ Molo maol dirasa hamu manalpuhon hasalaan ni sasahalak, coba ma surat akka sifatna na denggan. Dung i sukkun ma muse tu dirimuna, ‘Songon dia do Jesus mangida ibana? Olo do Jesus manalpuhon hasalaanna?’ Molo tabahen songon i, gabe boi ma tapauba cara marpikkirta. Mulana, olo do maol tahilala manalpuhon hasalaan ni dongan na mambahen haccit rohatta. Alai molo torus hita berupaya, lam leleng lam mura ma hita manalpuhon hasalaanna. w22.04 23 ¶6

Di bukku Pangungkapon, dipakke do bahasa lambang lao paboahon taringot musu ni Debata. Digombarhon do nasida songon binatang buas. Contohna adong do binatang buas na ‘kaluar sian laut, pitu uluna jala sappulu tandukna’. (Pgk. 13:1) Adong do muse “binatang buas na asing kaluar sian tano on”. Songon naga do ibana makkatai jala “dipaturun ibana do api sian langit”. (Pgk. 13:​11-13) Dung i, adong do muse “binatang buas na merah songon api”. Jala adong do boru-boru na so hasea hundul di atasna. Akka binatang buas i manggombarhon akka musu ni Debata naung leleng mangalo Ibana dohot Harajaonna. Jadi massai penting do taboto ise nasida. (Pgk. 17:​1, 3) Ikkon taboto do ise na manggombarhon binatang buas i. Sada cara, boi ma tabandingkon hatorangan i tu hatorangan na asing na adong di Bibel. Godangan sian akka lambang na di bukku Pangungkapon sasittongna nungnga dipaboa di bukku na asing di Bibel. w22.05 8-9 ¶3-4

Molo muba situasitta ala nungnga matua manang marsahit hita, gabe terbatas do na boi taulahon. Olo do gabe metmet rohatta alani i. Alai tasukkun ma diritta, ‘Aha do na dipangido Jahowa sian au?’ Taingot ma na dipangido Jahowa sian hita, mangalean na undenggan tu Ibana sesuai tu kesanggupanta saonari. Tapikkirhon ma jo on: Bayakkon ma sahalak donganta borua naung marumur 80 taon. Metmet do rohana ala dang godang be na boi diulahon ibana tu Jahowa, songon tikki marumur 40 taon dope ibana. Diboto donganta i do nungnga dilean ibana na undenggan. Alai didok rohana, dang cukkup i lao mambahen las roha ni Jahowa. Tutu do i? Pikkirhon ma on: Tikki marumur 40 taon, na undenggan do dilehon ibana tu Jahowa. Saonari dung marumur 80 taon, na undenggan do tong dilehon ibana. Berarti, torus do na undenggan dilehon ibana tu Jahowa. Molo torus do talehon na dumenggan, didok Jahowa ma tu hita, “Denggan ma na binahenmi.” (Bandingkon tu Mateus 25:​20-23.) Boi do tamba las ni rohatta molo fokus hita tu na boi dope taulahon. w22.04 10 ¶2; 11 ¶4-6

Di Pangungkapon bindu 21, dipatudos do si 144.000 i tu kota na uli, i ma “Jerusalem na imbaru”. Fondasi ni kota i dibahen sian 12 batu. “Tarsurat do sada sian goar ni 12 apostel ni Anak ni Biru-Biru i di ganup batu i.” (Pgk. 21:​10-14; Eps. 2:20) Beda do kota on sian kota na asing. Dalan ni kota i dibahen sian mas murni, 12 gerbangna dibahen sian mutiara, tembok dohot fondasina dibahen sian akka batu na arga, jala sarupa do ganjangna, bidangna, dohot timbona. (Pgk. 21:​15-21) Alai adong dope na hurang diida si Johannes. Didok ibana, “Dang adong huida bagas joro di kota i. Ai Debata Jahowa Pargogo na So Hatudosan dohot Anak ni Biru-Biru i do bagas jorona. Dang porlu mataniari manang bulan manondangi kota i. Ai hamuliaon ni Debata do na manondangi jala Anak ni Biru-Biru i do lampuna.” (Pgk. 21:​22, 23) Sude na gabe bagian ni Jerusalem na imbaru i lao rap do dohot Jahowa.—Heb. 7:27; Pgk. 22:​3, 4. w22.05 17-18 ¶14-15

Jahowa do na manoppa hita, Ibana do Silehon Patik dohot Hakim di hita. Asing ni i Bapakta na parholong do Ibana. (Ps. 100:3; Jes. 33:22) Molo mardosa hita tu Ibana jala botul-botul hita bertobat, boi do disesa Ibana dosatta i jala olo do Ibana mangulahon i. (Ps. 86:5) Marhite Panurirang Jesaya didok Jahowa do, “Nang pe songon merah ni mudar dosamuna, bottar do i bahenokku songon salju.” (Jes. 1:18) Ala dang sempurna hita, olo do tabahen haccit roha ni na asing. (Jak. 3:2) Nang pe songon i, boi dope hita jonok tu nasida molo olo hita saling mengampuni. (Poda 17:9; 19:11; Mat. 18:​21, 22) Tikki haccit rohatta dibahen na asing, dipangido Jahowa do hita asa olo mengampuni. Adong do alasanna boasa dipangido Jahowa i. Alana Ibana sandiri pe rade do ‘manesa sude dosatta’.—Jes. 55:7. w22.06 8 ¶1-2

Dang denggan molo tabandingkon diritta tu na asing. Alai denggan do molo marsiajar hita sian nasida. Teladan na terbaik na boi tatiru, i ma Jesus. Memang dang sempurna hita songon ibana. Alai boi do tatiru akka sifat dohot tindakanna. (1 Ptr. 2:21) Molo berupaya hita maniru Jesus, lam denggan ma hita melayani Jahowa. Di Bibel, godang do akka bawa dohot borua na gabe sitiruon nang pe dang sempurna nasida. Contohna Raja Daud. Didok Jahowa do ibana “halak na boi mambahen las [rohana]”. (Ul. 13:22) Memang hea do si Daud mangulahon dosa na balga. Nang pe songon i, gabe sitiruon do ibana di hita. Boasa? Alana dang membenarkan diri si Daud. Dijalo ibana do sipasingot i jala disolsoli ibana do kesalahanna. Hasilna, disesa Jahowa ma dosana.—Ps. 51:​3, 4, 10-12. w22.04 13 ¶11-12

Dipaboa do di Bibel molo hamatean i musu. (1 Kor. 15:​25, 26) Olo do gabe mabiar hita molo sai tapikkirhon taringot hamatean, tarlumobi molo adong halak na tahaholongi na marsahit na parah. Alai wajar do i. Boasa? Ala dilehon Jahowa do tu hita keinginan lao mangolu saleleng ni lelengna. (Pjm. 3:11) Sabotulna adong do dengganna molo mabiar hita mate. Misalna, gabe taallang ma akka sipanganon na sehat jala rajin ma hita olahraga. Asing ni i, marubat do hita tu dokter tikki marsahit. Jala tahindari do akka situasi na boi membahayakan ngolutta. Diboto Sibolis do na taargai hangoluan. Jadi didok Sibolis, pasti taulahon do manang aha pe asal ma boi hita tetap mangolu, nang pe gabe sega hubungatta tu Jahowa. (Job 2:5) Alai sala do Sibolis! Ibana do “na parohon hamatean”. Alani i sai berupaya do ibana memanfaatton biar ni rohatta tu hamatean lao mambahen hita mangalo Jahowa.—Heb. 2:​14, 15. w22.06 18 ¶15-16

Molo adong pelarangan, olo do dibahen akka parpunguan dalam kelompok kecil. Alani i massai penting do manjaga asa toktong mardame dohot akka dongan. Taingot ma, Sibolis do musutta dang akka dongan. Jadi molo adong hahurangan ni donganta, tasalpuhon ma i. Jala molo adong parsoalan, pittor hatop ma tapasae i. (Poda 19:11) Berupaya ma hita marsiurupan dohot akka dongan. (Tit. 3:14) On ma na dihilala sahalak donganta borua. Marsiurupan do akka dongan di kelompok dinasna. Gabe mandapot manfaat ma ibana dohot akka dongan na asing, jala gabe lam kompak ma nasida songon sada keluarga. (Ps. 133:1) Adong marribu donganta na toktong setia melayani Jahowa nang pe diorai pamaretta. Piga-piga sian nasida dipenjarahon do alani haporseaonna. Boi do tatangiakkon nasida dohot keluargana. Boi do tong tatangiakkon akka dongan na barani mangurupi nasida, nang pe boi i parohon bahaya tu nasida. Contohna adong do na barani mangunjungi dongan na dipenjara lao patoguhon nasida, paradehon kebutuhanna, jala mambela nasida di pengadilan. (Kol. 4:​3, 18) Taingot ma, balga hian do pengaruh ni tangiangta tu akka dongan i!—2 Tes. 3:​1, 2; 1 Tim. 2:​1, 2. w22.12 26-27 ¶15-16

Akka dakdanak jotjot do maniru natua-tuana. Memang dang adong natua-tua na sempurna, alai ikkon berupaya do nasida gabe teladan na denggan tu anakkonna. (Rom 3:23) Sahalak bapak mandok, “Akka dakdanak i dos do songon spons na menyerap sude na di sekitarna.” Didok ibana muse, “Pasti dipaboa nasida do molo dang sesuai tindakanta tu na taajarhon.” Jadi molo lomo rohatta asa dihaholongi gellengta Jahowa, ikkon hita do na parjolo makkaholongi Jahowa jala ikkon tarida do i sian tindakanta. Godang do cara na dibahen natua-tua lao mangajari anakkonna asa makkaholongi Jahowa. Songon pengalaman ni donganta si Andrew na marumur 17 taon. Didok ibana, “Sai diajarhon natua-tuakku do massai penting martangiang. Ganup borngin martangiang do bapak dohot au nang pe nungnga martangiang au. . . . Saonari leluasa ma au martangiang tu Jahowa jala boi do huanggap Ibana songon Bapak na botul-botul makkaholongi au.” Hamu akka natua-tua, molo holong rohamuna tu Jahowa boi do diurupi hamu gellengmuna asa makkaholongi Ibana. w22.05 27-28 ¶7-8

Asa boi hamu tardidi, ikkon bertobat do hamu sian akka dosamuna. (Ul. 2:​37, 38) Molo botul-botul do hamu bertobat, berarti ikkon dibahen hamu do perubahan. Nungnga marhasil hamu mambolokkon akka ulaon na dihasogohon Jahowa, songon mangulahon seks na so patut, mamakke tembakau, manang mandokkon hata na rorang? (1 Kor. 6:​9, 10; 2 Kor. 7:1; Eps. 4:29) Torus ma berupaya mambahen perubahan. Pangido ma bantuan ni guru studimuna manang sintua di huria. Molo poso dope hamu jala tinggal dohot natua-tua, pangido ma bantuan ni nasida asa boi hamu mambolokkon kebiasaan na so denggan na mangabbati hamu tardidi. Penting do muse mangulahon akka ulaon na mambahen togu parale-aleotta tu Jahowa, termasuk ma i ro tu parpunguan jala mangalehon komentar. (Heb. 10:​24, 25) Molo nungnga memenuhi syarat hamu lao marbarita, pastihon ma asa taratur hamu mangulahon i. w23.03 10-11 ¶14-16

Di 1 Musa 3:​14, 15 dipaboa do taringot sada “ulok”, dohot ‘pinoppar ni ulok i’. Dang mungkin ulok na adong di Taman Eden on. Attong ise do i? Dipaboa ma alusna di Pangungkapon 12:9. Disi didok, “ulok na parjolo” i, i ma Sibolis, suru-suruan na mangalo tu Debata Jahowa. Di Bibel jotjot do dipakke hata pinoppar lao manggombarhon halak na maniru cara marpikkir dohot pangalaho ni na asing. Jadi pinoppar ni ulok i maksudna, akka suru-suruan dohot akka jolma na mangalo tu Jahowa jala na menyerang naposo ni Debata. Contohna, akka suru-suruan na so setia tu Jahowa di jaman ni si Noak dohot akka jolma na jahat na marpangalaho songon Sibolis.—1 Mus. 6:​1, 2; Joh. 8:44; 1 Joh. 5:19; Jud. 6. w22.07 15 ¶4-5

Massai holong do roha ni si Paulus tu akka dongan sahaporseaonna. Dipatudu ibana do asi ni roha dohot empati tu akka donganna na susa, ala ibana sandiri pe hea do susa. Hea do si Paulus dang marhepeng jala ikkon karejo do ibana mambahen tenda asa boi paradehon na porlu di ibana dohot akka halak na mandongani ibana. (Ul. 20:34) Tikki di Korint, mambahen tenda do ibana raphon si Akuila dohot si Priskilla. Alai setiap “ari Sabat”, lao do ibana marbarita tu halak Jahudi dohot tu halak Junani. Dung ro si Silas dohot si Timoteus, “dipakke si Paulus ma sude tikkina lao paboahon hata ni Debata tu akka jolma”. (Ul. 18:​2-5) Sai diingot si Paulus do na uppetting di ngoluna, i ma manomba Jahowa. Kerja keras do si Paulus patoguhon akka dongan sahaporseaon. Dipaingot si Paulus do nasida asa unang sappe akka hasusaan dohot tanggung jawab keluarga mangabbati nasida mangulahon “na urrikkot”, i ma manomba Jahowa. w22.08 20 ¶3

Lomo do roha ni Jahowa asa dibaritahon barita na uli taringot tu Harajaon di liat portibi on. (1 Tim. 2:​3, 4) Massai penting do ulaon i di Jahowa. Alani i, dipillit Jahowa do Jesus Kristus Anak haholonganna i mangarahon hita mangulahon i. Ala Jesus do pengawasta, pos do rohatta pasti sae do ulaon marbarita na uli i sebelum ro ujungna songon na dihalomohon Jahowa. (Mat. 24:14) Sian dia taboto? Dang leleng sebelum nakkok ibana tu surgo, pajuppang do Jesus dohot akka siseanna di sada dolok di Galilea. Didok Jesus do tu nasida, “Nungnga dipasahat tu au saluhut huaso na di banua ginjang dohot na di tano on.” Dung i didok ibana ma muse, “Lao ma hamu, bahen hamu ma saluhut halak sian nasa bangso gabe siseanku.” (Mat. 28:​18, 19) Jadi Jesus do na mangarahon ulaon marbarita na uli, ala tu ibana do dilean huaso i. Jala ibana dope na mangarahon ulaon i sahat tu saonari. w22.07 8 ¶1, 3, 4

Halak na burju, i ma halak na mangulahon na denggan andorang so mate nasida. Lao dipahehe do nasida “tu hangoluan” ala nungnga tarsurat goar ni nasida di bukku hangoluan. Akka halak “na mangulahon na denggan” na disurat di Johannes 5:​29, sarupa do i tu “halak na burju” na disurat di Ulaon ni Apostel 24:15. Hatorangan on sesuai do tu isi ni Rom 6:7 na mandok, “Molo nungnga mate sasahalak, nungnga malua be ibana sian dosana.” Jadi tikki mate halak na burju nungnga diampuni Jahowa be dosana, jala torus do diingot Ibana kesetiaan ni nasida. (Heb. 6:10) Nang pe songon i, ikkon torus do nasida setia tu Jahowa, asa unang dihapus goar ni nasida sian bukku hangoluan i. w22.09 18 ¶13, 15

Gabe teladan do Panurirang Daniel tu hita ala boi ibana dihaporseai. Nang pe tawanan ibana di Babel alai denggan do reputasina disi. Ditanda do ibana halak na boi dihaporseai. Lam denggan do muse reputasina dung diurupi Jahowa si Daniel paboahon nipi ni Raja Nebukadnesar. (Dan. 4:​20-22, 25) Martaon-taon dukkon i, dipaboa si Daniel do lapatan ni hata na tarsurat di dinding ni istana Babel, jala tutu do masa sude na didokna i. On ma bukti na asing si Daniel halak na boi dihaporseai. (Dan. 5:​5, 25-29) Belakangan, si Darius dohot akka pejabat tinggina pe mandok si Daniel halak na “malo hian”. “Boi do ibana dihaporseai, sai marhasil do ulaonna, jala jujur do ibana.” (Dan. 6:​3, 4) Sambil mangingot contoh ni si Daniel on tasukkun ma diritta, ‘Ditanda do au halak na martanggung jawab jala boi dihaporseai?’ Molo ditanda hita halak na boi dihaporseai, gabe dipasangap ma goar ni Jahowa. w22.09 8-9 ¶2-4

Godang do manfaatna molo taihutton standar ni Jahowa. Boasa tadok songon i? Pikkirhon ma on: Boha do molo tiap bank mambahen nilai mata uang ni nasida sandiri, manang perusahaan konstruksi mambahen standar ukuran ni nasida sandiri? Pasti sursar do hasilna. Boha do molo dokter dohot perawat dang mangihutton standar perawatan kesehatan naung ditetappon? Boi do gabe mate pasienna. Sian on taboto ma molo taihutton standar na ditottuhon, parohon manfaat do i tu hita. Songon i ma tong standar ni Jahowa taringot na sittong dohot na sala, gabe perlindungan do i di hita. Dipasu-pasu Jahowa do akka halak na berupaya mangihutton standarna. Didok Ibana, “Lehononna do tano on gabe parbagianan ni halak na tigor marroha, jala mangolu ma nasida disi saleleng ni lelengna.” (Ps. 37:29) Bayakkon ma songon dia parngoluotta molo sude halak di portibi on mangihutton standar ni Jahowa. Pasti gabe dame ma tahilala jala marlas ni roha ma hita. Jala i do lomo ni roha ni Jahowa. Jadi ala nungnga taboto manfaatna mangihutton standar ni Jahowa, pasti gabe bertekad do hita mangulahon i di parngoluotta. w22.08 27-28 ¶6-8

Tikki masa tu hita tantangan na maol, olo do diuji kesetiaanta tu Jahowa dohot tu organisasina. Aha do na mangurupi hita mangatasi i? ‘Tajaga ma rohatta’, toktong sadar jala togu di haporseaon. Manjaga roha lapatanna toktong tenang, marpikkiran positif, jala boi mangida masalahta i sian sudut pandang ni Jahowa. Molo taulahon i, gabe dang perasaanta be na mengendalihon hita. Bisa jadi adong do dongan na martanggung jawab di huria na mambahen na so adil tu hita. Mungkin dang sengaja ibana mangulahon i. (Rom 3:23; Jak. 3:2) Alai na diulahonna i mambahen haccit rohamuna. Olo do ra gabe sukkun-sukkun rohamu, ‘Boasa adong dongan na songon i pangalahona? Tutu do on organisasi ni Debata?’ Lomo do roha ni Sibolis songon i pikkiranta. (2 Kor. 2:11) Boi do dipakke ibana pikkiran sisongon i lao manirang hita sian Jahowa dohot organisasina. Jadi ikkon manat do hita asa unang torus muruk. w22.11 20 ¶1, 3; 21 ¶4

Dilehon Jahowa do tu sude naposona harapan na luar biasa, i ma hangoluan na saleleng ni lelengna. Adong do na harapanna naeng mangolu salelengna di surgo. Dilehon ma tu nasida daging na so boi mate. (1 Kor. 15:​50, 53) Alai godangan naposo ni Jahowa harapanna naeng mangolu saleleng ni lelengna di tano on. Sempurna ma nasida jala marlas ni roha. (Pgk. 21:​3, 4) Dang soal tudia harapanta, naeng tu surgo manang di tano on, pasti berharga do harapan i di hita. Pos do rohatta pasti saut akka janji i, ala Jahowa do na manjanjihon i. (Rom 15:13) Sian Bibel taboto do sai ditepati Jahowa do akka janjina. (4 Mus. 23:19) Pos do rohatta sanggup jala lomo do roha ni Jahowa pasautton i. Massai holong do roha ni Jahowa tu hita jala lomo rohana asa marpos ni roha hita tu Ibana. Molo pos rohatta tu Jahowa, gabe lam togu ma harapanta. Ujungna sanggup ma hita mangadopi masalah manang aha pe. Gabe barani jala marlas ni roha ma hita nang pe adong tantangan. w22.10 24 ¶1-3

Ala dang ditangihon halak Israel Jahowa, disurirakkon si Jesaya ma na lao masa jea tu nasida. (Jes. 30:​5, 17; Jer. 25:​8-11) Jala tutu do i masa tikki ditawan halak Babel nasida. Alai adong do sian nasida na toktong setia tu Jahowa jala dipaboa si Jesaya lao boanon ni Jahowa ma nasida mulak muse tu Jerusalem. (Jes. 30:​18, 19) Alai memang dang pittor masa i. Didok si Jesaya, “Sabar do Jahowa paima-imahon lao patuduhon asi ni rohana tu hamu.” Hata on patuduhon dang langsung dipalua Jahowa akka halak Jahudi na setia. Adong do 70 taon lelengna nasida ditawan di Babel baru pe dipaloas mulak tu Jerusalem. (Jes. 10:21; Jer. 29:10) Tikki di Babel halak Israel, tangis do nasida alani lungun ni rohana. Alai dung mulak nasida tu Jerusalem, tangis do nasida alani las ni rohana. w22.11 9 ¶4

Sarupa do na dialami akka donganta saonari dohot na dialami akka apostel di abad na parjolo. Dianiaya do nasida ala marbarita taringot Jesus. Jotjot do pengadilan tinggi ni halak Jahudi mangorai nasida “makkatahon jala mangajarhon manang aha pe marhite goar ni Jesus”. (Ul. 4:​18-20; 5:​27, 28, 40) Alai diboto nasida Jesus do na manuru nasida asa marbarita tu akka halak taringot ibana. (Ul. 10:42) Alani i barani do si Petrus dohot si Johannes mewakili akka apostel mandok urrikkot do di nasida mangoloi Debata sian akka hakim di pengadilan i. Jala didok nasida do dang mungkin gabe so nasida marbarita taringot Jesus. (Ul. 5:29) Dung dilissingi akka apostel i, dipalao ma nasida sian pengadilan ni halak Jahudi. Alai marlas ni roha do nasida, “ai didok roha ni nasida, na patut do nasida manaon na haccit alani goar ni Jesus i”. Jala dukkon i, toktong do nasida marbarita na uli.—Ul. 5:​41, 42. w22.10 12-13 ¶2-4

Tikki mulai hita marsiajar Bibel, holan ajaran dasarna dope na taparsiajari. Di suratna tu halak Heber didok si Paulus do i “ajaran na parjolo sian hata ni Debata”. Dang didok ibana molo ajaran dasar i dang penting, alana dipatudos ibana do i songon susu na mambahen poso-poso magodang. (Heb. 5:12; 6:1) Nang pe songon i, dijujui ibana do sude halak Kristen asa unang holan mamparsiajari ajaran dasar alai ikkon bagas do diparsiajari nasida Hata ni Debata. Balga do keinginanmuna marsiajar lam bagas taringot ajaran ni Bibel? Olo do hamu torus marsiajar taringot Jahowa dohot lomo ni rohana? Godang do ra sian hita na merasa maol mandapot manfaat tikki marsiajar. Songon i do tong dirasa hamu? Tikki di sikkola, diajari do hamu cara manjaha dohot marsiajar na denggan? Boi do dinikmati hamu tikki marsiajar jala dihilala hamu do manfaatna? Manang na merasa do hamu dang parsiajar na denggan? Molo ido, dang holan hamu na songon i. Alai pos ma rohamuna olo do Jahowa mangurupi hamu, alana sempurna do Ibana jala Guru na terbaik di hamu. w23.03 9-10 ¶8-10

Molo serep rohatta, taloas do Bibel padenggatton cara marpikkirta. Hasilna gabe boi ma hita patuduhon haburjuon, asi ni roha, dohot holong. Tarida do na dibentuk Hata ni Debata hita sian caratta berurusan tu na asing. Molo halak Parise dang diloas nasida Hata ni Debata membentuk cara marpikkir ni nasida, ‘ai dihukum nasida do halak na so marsala’. (Mat. 12:7) Sarupa songon i ma, cara marpikkirta dohot caratta berurusan tu halak patuduhon na tapaloas do Hata ni Debata membentuk hita manang na dang. Misalna berfokus do hita mangida na denggan sian akka donganta, manang hatop do hita mangida hahurangan ni nasida? Tapatudu do asi ni roha jala rade do hita manalpuhon hasalaan, manang sai talului do kesalahan ni na asing jala mendendam? Alus ni sukkun-sukkun on boi patuduhon tapaloas do Hata ni Debata membentuk cara marpikkirta, perasaanta, dohot tindakanta manang na dang.—1 Tim. 4:​12, 15; Heb. 4:12. w23.02 12 ¶13-14

Taparrohahon ma contoh ni si Josep sian Arimatea. Halak na sangap do ibana di halak Jahudi. Anggota ni Sanhedrin manang pengadilan tinggi agama Jahudi do ibana. Alai tikki di tano on Jesus dang barani si Josep bertindak. Didok si Johannes “sisean ni Jesus do [si Josep], alai dang dipaboa ibana tu halak na asing, ala mabiar do ibana tu halak Jahudi”. (Joh. 19:38) Sasittongna lomo do roha ni si Josep mambege barita taringot Harajaon ni Debata, alai dang dipaboa ibana tu na asing na porsea do ibana tu Jesus. Bisa jadi mabiar do ibana dang dipasangap halak Jahudi i be ibana. Nang pe songon i Bibel mandok dung mate Jesus, “dibaranihon ibana ma dirina mandapotton si Latus lao mangido bakke ni Jesus”. (Mrk. 15:​42, 43) Dang mabiar be si Josep patuduhon na sisean ni Jesus do ibana. Hea do hamu mabiar songon si Josep? w23.01 30 ¶13-14

Dibege Ratu Syeba do barita taringot hadameon dohot las ni roha ni akka halak di pamarettaon ni Raja Salomo. Pola do ro ibana tu Jerusalem sian hutana na dao holan lao mangida i. (1 Raj. 10:1) Dukkon diparrohahon ibana pamarettaon ni si Salomo, didok ibana ma hatana songon di ayat harian sadari on. Alai sebenarna situasi na terjadi tikki mamaretta Raja Salomo, holan gambaran do i tu na lao bahenon ni Jahowa annon tikki mamaretta Anakna Jesus. Dao do umbalga Jesus sian si Salomo. Molo si Salomo dang sempurna ibana, jala hea do dibahen ibana dosa na balga na ujungna mambahen susa naposo ni Debata. Alai molo Jesus, Raja na sempurna do ibana jala dang hea mambahen kesalahan. (Luk. 1:32; Heb. 4:​14, 15) Nungnga dibuktihon Jesus dang mardosa ibana jala dang olo ibana mambahen susa rakyatna. Jadi pos ma rohatta, Jesus do Raja na terbaik. w22.12 11 ¶9-10

Aha do na ikkon taulahon molo masa sahit na menular di inganatta? Taihutton ma petunjuk sian pamaretta. Misalna manucci tangan, manjaga jarak, mamakke masker, dohot karantina. Molo taulahon on sude, on patuduhon na taargai do hangoluan na sian Debata. Tikki masa situasi darurat, olo do tabege informasi na so akurat sian akka dongan, tetangga, bahkan di berita. Alai unang ma tatangihon “sude hata”, tatangihon ma informasi na akurat sian pamaretta dohot sian tenaga medis. (Poda 14:15) Berusaha do Punguan na Mangaradoti Organisasi dohot kantor cabang mandapot informasi na akurat sebelum dibahen nasida petunjuk taringot parpunguan dohot ulaon marbarita na uli. Molo taihutton petunjuk i, gabe terlindungi ma hita dohot akka na asing sian bahaya. Jala boi ma denggan pandangan ni halak di daerahta taringot Saksi Jahowa.—1 Ptr. 2:12. w23.02 23 ¶11-12

Dung masuk halak Israel tu Tano na Dijanjihon tinggal do nasida di luat na luas. Boi do halak Israel na tinggal di sada daerah gabe dang mamikkirhon halak Israel na tinggal di daerah na asing di luat i. Alai dibahen Jahowa do sada pengaturan asa rap marpungu halak Israel di piga-piga kesempatan lao manangihon Hata ni Debata dijahahon jala dipatorang. (5 Mus. 31:​10-12; Neh. 8:​2, 8, 18) Bayakkon ma songon dia perasaan ni halak Israel na setia dung sahat nasida di Jerusalem jala mangida dongan sahaporseaonna marroan sian ganup inganan di luat i! Marhite cara on diurupi Jahowa ma nasida asa toktong marsada. Di pudian ni ari, akka bawa dohot borua na ro sian marragam latar belakang do na margabung tu huria Kristen. Marasing-asing do bahasa, status sosial, dohot keadaan ekonomi ni nasida. Alai gabe boi ma nasida marsada manomba Debata na sittong. Akka halak na baru porsea pe boi do mangattusi Hata ni Debata molo olo nasida diurupi dongan sahaporseaonna jala molo ro nasida tu parpunguan.—Ul. 2:42; 8:​30, 31. w23.02 3 ¶7

Marjanji do Jahowa lao mangalehon “hangoluan na saleleng ni lelengna” tu akka halak na mangoloi Ibana. (Rom 6:23) Molo tarimangi i, gabe lam balga ma holongta tu Ibana. Pikkirhon ma on: Ala massai holong roha ni Jahowa tu hita dilehon ma harapan lao mangolu salelengna, asa unang adong na manirang hita sian Ibana. Janji ni Debata taringot hangoluan na salelengna mangurupi hita asa toktong martahan di situasitta na maol saonari. Bahkan molo adong musu na mangancam lao pamatehon hita, dang gabe mabiar hita manang gabe dang olo be manomba Jahowa. Alana taboto do molo toktong hita setia tu Jahowa nang pe ikkon mate, paheheonna do hita jala adong do harapan lao mangolu salelengna. (Joh. 5:​28, 29; 1 Kor. 15:​55-58; Heb. 2:15) Boi do pos rohatta tu janji ni Jahowa taringot hangoluan salelengna ala sian Ibana do ro hangoluan jala Ibana pe mangolu salelengna. (Ps. 36:9) Adong piga-piga ayat ni Bibel na mambuktihon i.—Ps. 90:2; 102:​12, 24, 27. w22.12 2 ¶1-3

Ala naposo ni Jahowa do hita, dang songgot be rohatta molo masa tu hita sitaonon. Bibel mandok, “Ikkon talewati do godang hasusaan lao masuk tu Harajaon ni Debata”. (Ul. 14:22) Taboto do muse, adong do piga-piga masalah na so boi taselesaihon sahat tu na mangolu hita di tano na imbaru. Di tikki i “dang adong be hamatean nang arsak ni roha, nang angguk-angguk, nang na haccit”. (Pgk. 21:4) Dang sai dilindungi Jahowa hita sian akka masalahta, alai diurupi Ibana do hita asa martahan mangadopi i. Parrohahon ma na didok Apostel Paulus tu halak Kristen na di Rom. Parjolo sahali dipaboa ibana do akka tantangan na diadopi nasida. Alai dang holan i, didok ibana do muse, “Marhite pangurupion ni Kristus na makkaholongi hita, boi do hita monang mangadopi sudena i.” (Rom 8:​36, 37) Maksud ni si Paulus, boi do hamu marhasil mangadopi tantangan aha pe na masa tu hamu molo diurupi Jahowa. w23.01 14 ¶1-2