Desember
Minggu, 1 Desember
Dang boi dope au tardidi?—Ul. 8:36.
Aha do na patuduhon nungnga rade pejabat Etopia i lao tardidi? Parrohahon ma on. Bibel mandok lao do halak Etiopia i “tu Jerusalem manomba Debata”. (Ul. 8:27) Nungnga pinda agama ibana gabe penganut agama Jahudi. Jadi pasti nungnga diboto ibana taringot Jahowa sian Akka Bukku Heber. Alai lomo do roha ni bawa i asa lam godang na diparsiajari ibana taringot Jahowa. Sian dia taboto? Tikki dijuppangi si Pilippus ibana di pardalanan, dijaha ibana do bukku na disurat Panurirang Jesaya. (Ul. 8:28) Lomo do rohana lam bagas mamparsiajari Bibel. Lao do ibana sian Etiopia tu Jerusalem lao manomba Jahowa di bagas joro. Diurupi si Pilippus do halak Etiopia i mamparsiajari godang hasittongan na penting, termasuk ma taringot ise do Messias. (Ul. 8:34, 35) Holongna tu Jahowa dohot tu Anakna i ma na manggerakkon ibana lao tardidi gabe pengikut ni Jesus Kristus. Dung diida si Pilippus nungnga rade be bawa i tardidi, dididihon si Pilippus ma ibana. w23.03 8-9 ¶3-6
Senin, 2 Desember
Sai lambok ma begeon akka hatamuna.—Kol. 4:6.
Dang boi tabahen las roha ni Jahowa molo dang jujur hita. Alana sogo do roha ni Jahowa tu gabus. (Poda 6:16, 17) Nang pe godang halak saonari mandok dang sala margabus, dang boi hita songon i, ala sala do i didok Jahowa. (Ps. 15:1, 2) Jala unang ma hita menahan informasi na porlu diboto na asing, ala boi do nasida gabe sala mambahen kesimpulan. Dang jujur hita disi molo taulahon i. Unang ma hita margosip. (Poda 25:23; 2 Tes. 3:11) Molo makkata-hatai hamu jala diida hamu nungnga mulai diparoa-roa na asing, pittor gatti hamu ma topikmuna. Ala tinggal di sakaliling ni halak na somal mamakke bahasa kotor, ikkon berjuang do hita manjaga pakkataionta asa boi tabahen las roha ni Jahowa. Lomo do rohana molo tapakke i lao mamuji Ibana tikki marbarita, di parpunguan, dohot di ngolutta siganup ari. Molo nungnga dihancurhon portibi na jahat on, lam mura ma hita pasangappon Jahowa marhite pakkataionta.—Jud 15. w22.04 9 ¶18-20
Selasa, 3 Desember
Tahaholongi pe halak na asing, ala naung parjolo do Debata patuduhon holongna hita.—1 Joh. 4:19.
Tikki tarimangi holong ni Jahowa dohot Jesus tu hita, gabe holong ma rohatta tu nasida. (1 Joh. 4:10) Gabe lam tamba ma muse holongta dung taboto bermanfaat do tobusan ni Jesus tu hita secara pribadi. On ma na disadari si Paulus. Mandok mauliate do ibana alani tobusan. Boi ma i taida sian suratna tu halak Galatia na mandok, “Anak ni Debata . . . makkaholongi au jala na mangalehon ngoluna humokkop au.” (Gal. 2:20) Alani tobusan, ditarik Jahowa do hita asa boi gabe ale-alena. (Joh. 6:44) Dipatogu do rohatta ala taboto diida Jahowa do akka na denggan sian diritta jala massai arga do ditobus Ibana hita asa boi gabe ale-alena. Pasti gabe lam tamba ma holongta tu Jahowa dohot tu Jesus. Alani i, tasukkun ma diritta, ‘Aha do na boi hubahen lao patuduhon holongku tu nasida?’ Ala holong rohatta tu Debata dohot tu Kristus gabe tergerak ma hita makkaholongi na asing.—2 Kor. 5:14, 15; 6:1, 2. w23.01 28 ¶6-7
Rabu, 4 Desember
Ajarhonokku ma bahasa na murni tu akka bangso.—Sep. 3:9.
Dipakke Jahowa do Bibel mangurupi naposona asa “marsada lao manomba Ibana”. Godang do bagian ni Bibel na maol diattusi. Alai holan halak na marserep ni roha do na boi mangattusi i. (Luk. 10:21) Godang do halak di portibi on na manjaha Bibel. Alai holan halak na serep roha do na boi mangattusi isina jala mangulahon i. (2 Kor. 3:15, 16) Sian Bibel, boi ma taparsiajari bisuk ni Jahowa. Dang holan secara kelompok dipakke Jahowa Bibel mangajari hita, alai diajari jala dipatogu do hita secara pribadi. Tikki tajaha Bibel, boi do taida na parduli do Jahowa tu hita secara pribadi. (Jes. 30:21) Pasti hea do dijaha hamu ayat ni Bibel na cocok tu situasimuna, jala hira na disurat do i tu hamu secara pribadi. Memang Bibel bukku na disurat tu marjuta halak. Alai boasa informasi na adong disi boi pas tu kebutuhanmuna? Pasti ala marbisuk do Pangarang ni Bibel i.—2 Tim. 3:16, 17. w23.02 4-5 ¶8-10
Kamis, 5 Desember
Rimangi ma akka i. Ulahon ma i sian nasa gogom, asa diida sude halak na lam togu parale-aleonmu tu Debata.—1 Tim. 4:15.
Ala halak Kristen do hita, holong hian do rohatta tu Jahowa. Lomo do rohatta mangalehon na undenggan tu Ibana. Alai asa boi taulahon i, porlu do hita mambahen tujuan asa lam denggan sifatta, marsiajar akka keterampilan na marguna tu organisasi, jala mangalului cara lao mangurupi akka dongan sahaporseaon. Boasa ikkon mambahen kemajuan hita? Alasan utamana, ala lomo do rohatta mambahen las roha ni Jahowa. Las do roha ni Jahowa molo tapakke kemampuatta lao manomba Ibana. Asing ni i muse, las do rohatta mambahen kemajuan asa boi taurupi akka donganta. (1 Tes. 4:9, 10) Dang soal nungnga sadia leleng hita di hasittongan, porlu do hita sude mambahen kemajuan. w22.04 22 ¶1-2
Jumat, 6 Desember
Allangon ni nasida ma dagingna jala tutungon ni nasida ma ibana dohot api.—Pgk. 17:16.
Satokkin nai diserang akka pamaretta nama Babel na Balga, i ma sude agama na so sittong. Peristiwa on ma na memulai hasusaan bolon. Gabe godang do annon akka halak na manomba Jahowa alani na masa i? Daong. Sebalikna songon na didok di Pangungkapon bindu 6, tikki masa i godang do na mangalului parlinggoman sian sistem politik dohot sistem perdagangan di portibi on, na dipatudos songon akka dolok. Jadi ala dang olo nasida mendukung Harajaon ni Debata, dianggap Jahowa ma nasida musuna. (Luk. 11:23; Pgk. 6:15-17) Alai anggo naposo ni Jahowa na setia, berbeda do pendirianna saleleng masa hasusaan bolon. Holan nasida do haduan kelompok di tano on na manomba Jahowa, jala dang olo nasida mendukung “binatang buas” i.—Pgk. 13:14-17. w22.05 16 ¶8-9
Sabtu, 7 Desember
Dibaritahon ibana do barita na uli sisaleleng ni lelengna tu akka jolma na di tano on, tu saluhut bangso, suku, marga, dohot bahasa.—Pgk. 14:6.
Dang holan “barita na uli taringot tu Harajaon” na dibaritahon naposo ni Debata. (Mat. 24:14) Songon dipaboa di Pangungkapon bindu 8 sahat tu 10, ditugasson ma suru-suruan lao paboahon barita panguhuman tu akka halak na menolak Harajaon ni Debata. Jadi hita Saksi Jahowa ikkon taurupi do akka suru-suruan i. Haduan lao tapaboa ma barita panguhuman tu portibi na jahat on. Dipatudos do barita i songon “udan es” dohot “udan api”. (Pgk. 8:7, 13) Ikkon diboto akka halak do nga jonok be ari rimas ni Jahowa. Jadi ikkon hatop ma nasida muba asa boi selamat. (Sep. 2:2, 3) Alai dang sude lomo rohana mambege barita i. Jadi ikkon barani do hita. Saleleng hasusaan bolon lam sogo ma roha ni akka halak tu barita na tapasahat i.—Pgk. 16:21. w22.05 6-7 ¶18-19
Minggu, 8 Desember
Ikkon haholonganmu do Jahowa Debatam sian nasa roham, sian nasa ngolum dohot sian nasa pikkiranmu.—Mat. 22:37.
Bayakkon ma songon dia perasaan ni sapasang suami istri na naeng gabe natua-tua. Sabotulna nungnga jotjot dibege nasida jamita taringot pagodang-godangkon gelleng. Alai saonari massai penting do akka prinsip i di nasida. Alana tanggung jawab na borat do pagodang-godangkon gelleng. Memang tikki berubah ngolutta, piga-piga prinsip ni Bibel gabe lebih penting do di hita. I do alana hita akka sisomba Jahowa ikkon manjaha jala mangarimangi isi ni Bibel, songon na diparettahon Jahowa tu akka raja ni Israel. Ikkon dijaha nasida do i “saleleng ngoluna”. (5 Mus. 17:19) Dilehon Jahowa do tu akka natua-tua tanggung jawab na istimewa, i ma mangajarhon taringot Jahowa tu gellengna. Alai dang holan i. Ikkon diurupi nasida do gellengna i asa makkaholongi Jahowa. w22.05 26 ¶2-3
Senin, 9 Desember
Pakke hamu ma pangalaho na imbaru.—Kol. 3:10.
Halak na bertobat dang cukkup holan merasa menyesal ala nungnga mangulahon na sala. Molo botul-botul sasahalak bertobat, ikkon tarida do i sian tindakanna. Tikki naeng mengampuni dipertimbangkon Jahowa do, olo do halak na mardosa i muba manang na dang. Muba lapatanna “berbalik”. Dang diulahon ibana be na sala jala mulai ma ibana mangulahon lomo ni roha ni Jahowa. (Jes. 55:7) Ikkon diuba ibana do cara marpikkirna asa boi ibana mangihutton cara marpikkir ni Jahowa. (Rom 12:2; Eps. 4:23) Jala ikkon berupaya do ibana asa unang diihutton ibana be cara marpikkir dohot pangalahona na sala i. (Kol. 3:7-9) Molo berupaya sasahalak manguba pangalahona na sala i, gabe diampuni Jahowa ma ibana. Alana nungnga diparade Jahowa tobusan ni Jesus lao paluahon hita sian dosa.—1 Joh. 1:7. w22.06 6 ¶16-17
Selasa, 10 Desember
Unang ma mabiar ho tu hasusaan na naeng sitaononmu.—Pgk. 2:10.
Godang do jolma na mangulahon na jahat jala mambahen susa na asing. (Pjm. 8:9) Contohna, adong do halak na lomo-lomona mamakke jabatanna lao mambahen na jahat tu na asing. Akka parsikkola pe, di-bully do donganna sasikkola. Bahkan adong do halak na mangulahon kekerasan tu keluargana sandiri. Jadi dang heran hita molo adong halak na mabiar tu jolma. Ala diboto Sibolis sipata hita mabiar tu jolma, aha ma na diulahon ibana? Dipakke Sibolis do biar ni rohatta asa unang marbarita be hita jala asa taulahon na dihasogohon Jahowa. Dipakke do pamaretta lao mangorai ulaonta marbarita jala menganiaya hita. (Luk. 21:12) Godang do muse akka halak na dipakke Sibolis lao paboahon informasi na so sittong taringot Saksi Jahowa. Akibatna godang do na mangarehei hita, bahkan menyerang hita. (Mat. 10:36) Dang pola heran hita disi! Alana nga hea dipakke Sibolis cara sisongon i di abad na parjolo.—Ul. 5:27, 28, 40. w22.06 16 ¶10-11
Rabu, 11 Desember
Manang ise na mangurupi godang halak mamboto na sittong, na lao marsinondang ma nasida saleleng ni lelengna dos songon bintang.—Dan. 12:3.
Ise do maksudna “godang halak” na diurupi mamboto na sittong? Akka halak na dipahehe jala na selamat sian Armagedon, dohot akka dakdanak na bisa jadi tubu di tano na imbaru. Di ujung ni 1.000 taon, nungnga sempurna be sude jolma. Taingot ma nang pe nungnga sempurna sasahalak, dang otomatis ibana mangolu saleleng ni lelengna. Pikkirhon ma na masa tu si Adam dohot si Hawa. Sempurna do nasida, alai ala dang dioloi nasida Debata, gabe dang dapot ni nasida hangoluan na saleleng ni lelengna i. (Rom 5:12) Ala lam sempurna sude di ujung ni 1.000 taon i, sude do nasida olo mendukung pamarettaon ni Jahowa saleleng ni lelengna? Manang, adong do annon na gabe songon si Adam dohot si Hawa na so setia tu Jahowa nang pe nungnga sempurna? Porlu do taboto alus ni akka sukkun-sukkun i. w22.09 22-23 ¶12-14
Kamis, 12 Desember
Harajaon ni tano on nungnga gabe Harajaon ni Tuhanta dohot Kristusna.—Pgk. 11:15.
Molo taida godang masalah na masa saonari, olo do ra gabe marpikkir hita dang mungkin lam tu dengganna keadaan ni portibi on. Godang do halak dang marsihaholongan be bahkan tu keluargana sandiri. Akka halak lam jahat, lam kasar, jala lam egois. Godang do halak saonari na so porsea tu akka pamimpin. Alai sabotulna keadaan ni portibi on, boi do paposson rohatta lam tu dengganna nama situasitta. Boasa boi songon i? Alana sifat ni akka jolma na jahat i patuduhon nungnga digenapi be surirang ni Bibel taringot “ari parpudi”. (2 Tim. 3:1-5) Jala i pe paposson rohatta nungnga mamaretta Jesus gabe Raja di Harajaon ni Debata. Gabe takkas ma taida nungnga saut surirang i. Alai dang holan on surirang taringot Harajaon ni Debata naung digenapi, adong dope na asing. Sude surirang i saling berkaitan, songon potongan-potongan gambar na membentuk sada gambar na lengkap. w22.07 2 ¶1-2
Jumat, 13 Desember
Tarida do bisuk sian parniulaonna.—Mat. 11:19.
Saleleng pandemi COVID-19, dilehon organisasi do petunjuk na jelas taringot songon dia hita marpungu dohot marbarita. Pittor taihutton do petunjuk i. Tabahen do parpunguan ganup minggu, parpunguan wilayah, dohot parpunguan regional mamakke video konferensi. Asing ni i, marbarita do hita sian telepon dohot surat. Dipasu-pasu Jahowa do upayatta. Godang do kantor cabang na melaporhon, tamba do jumlah ni penyiar di cabang ni nasida. Jala godang do pengalaman na menarik di ulaon marbarita saleleng masa pandemi COVID-19. Olo do ra adong na makkilala pakakuhu do petunjuk ni organisasi taringot pandemi on. Alai boi do tarasahon na bermanfaat akka petunjuk i. Taingot ma dilehon Jesus pe akka petunjuk i alani holongna do tu hita. Molo sai tarimangi on, gabe pos ma rohatta manang aha pe na masa haduan di ngolutta, pasti donganan ni Jahowa dohot Jesus do hita.—Heb. 13:5, 6. w22.07 13 ¶15-16
Sabtu, 14 Desember
Torus ma hamu martangiang. Mandok mauliate ma hamu di sasudena. Ai i do na dipangido Debata sian hamu akka na marsada dohot Kristus Jesus i.—1 Tes. 5:17, 18.
Tikki martangiang, porlu do muse hita mandok mauliate tu Jahowa. Alana nungnga massai godang na dilehon Ibana tu hita. Dilehon do godang jenis ni sipanganon na tabo, akka dongan na burju, dohot godang warna ni bunga na bagak. Dilehon Jahowa pe sudena i, alani holongna do tu hita jala lomo rohana asa marlas ni roha hita. (Ps. 104:12-15, 24) Na paling penting, mandok mauliate ma hita ala dilehon Jahowa harapan dohot akka petunjuk sian Bibel na mambahen togu haporseaotta. Sipata olo do lupa hita mandok mauliate tu Jahowa. Attong songon dia ma asa unang lupa hita? Boi do tasurat aha na naeng tatangiakkon tu Jahowa, jala taida ma songon dia Jahowa mangalusi tangiangta i. Dung i mandok mauliate ma hita tu Jahowa ala nungnga diurupi Ibana hita.—Kol. 3:15. w22.07 22 ¶8-9
Minggu, 15 Desember
Patik ni Jahowa do na dihalomohon rohana, dijaha jala dirimangi ibana do patik i arian nang borngin.—Ps. 1:2.
Asa benar-benar bermanfaat hasittongan i, dang cukkup holan na marsiajar Bibel. Alai ikkon taulahon do i di ngolutta. Hasilna gabe tadapot ma las ni roha. (Jak. 1:25) Boha do carana asa boi hita menerappon hasittongan i? Sahalak donganta bawa paboahon, denggan do molo tapareso diritta tikki belajar pribadi. Tujuanna asa taboto nungnga taterappon na taparsiajari i, manang adong dope na ikkon tapadenggan sian diritta. Apostel Paulus mandok, “Molo nungnga togu haporseaotta, toktong ma taulahon songon naung taulahon saleleng on.” (Plp. 3:16) Pikkirhon ma godang ni manfaat na tadapot molo torus hita “mangihutton hasittongan”. Gabe lam denggan ma ngolutta jala gabe las ma roha ni Jahowa dohot akka donganta. (Poda 27:11; 3 Joh. 4) Molo torus tapikkirhon on, pasti gabe lam bertekad hita asa torus mangargai jala menerappon hasittongan i di ngolutta. w22.08 18-19 ¶16-18
Senin, 16 Desember
Parmahani hamu ma biru-biru ni Debata.—1 Ptr. 5:2.
Songon dia do akka sintua patuduhon na holong do roha ni nasida tu Jahowa dohot tu Jesus? Sada cara na penting, i ma mamparrohahon na porlu di biru-biru ni Jesus. (1 Ptr. 5:1, 2) Tarida ma i sian hata ni Jesus tu Apostel Petrus. Dung tolu hali disoadahon si Petrus Jesus, pasti menyesal do ibana jala bertekad ma si Petrus lao patuduhon holongna tu Jesus. Dung dipahehe Jesus, disukkun ibana ma tu si Petrus, “Simon, anak ni si Johannes, holong do roham tu au?” Tottu pos rohatta holong do roha ni si Petrus tu Jesus jala berupaya do si Petrus mangulahon manang aha pe na patuduhon holongna tu Tuanna i. Didok Jesus ma muse tu si Petrus, “Lehon ma mangan anak ni biru-birukki.” (Joh. 21:15-17) Saleleng ngoluna dibuktihon si Petrus do na holong rohana tu Jesus. Diparmahani ibana do akka biru-biru ni Jesus. Akka sintua, songon dia do hamu patuduhon na massai penting hata ni Jesus tu si Petrus i di hamu? Patudu ma na holong rohamuna tu Jahowa dohot tu Jesus. Bahen hamu ma kunjungan penggembalaan jala urupi ma akka dongan na so aktif asa mulak muse tu Jahowa.—Hes. 34:11, 12. w23.01 29 ¶10-11
Selasa, 17 Desember
Toktong do dipasaut Debata sude hatana. Dang pasombuonna hamu manaon sitaonon lobi sian na tolapmuna.—1 Kor. 10:13.
Unang ma didok rohatta dang adong na mangattusi tantangan na taadopi. Alana molo songon i pikkiranta, gabe kecil hati ma hita jala dang olo be hita berjuang mangalo keinginan na sala. Hape Bibel mandok, “Molo adong sitaononmuna, patuduonna do tu hamu dalan asa boi hamu sabar jala martahan manaon i.” Jadi nang pe kuat keinginanmuna lao mangulahon na sala, alai boi do hamu marhasil mangatasi i marhite bantuan ni Jahowa. Ingot ma on: Ala jolma na so sempurna hita, pasti sai ro do keinginan na sala tu pikkiranta. Alai molo ro keinginan na sala i, pittor hatop ma tatolak i. Tatiru ma si Josep. Pittor lari do ibana tikki digoda istri ni si Potifar. (1 Mus. 39:12) Unang ma oloi hamu keinginan na sala i! w23.01 12-13 ¶16-17
Rabu, 18 Desember
Dang marimbar jolma di Debata.—Rom 2:11.
Debata na adil do Jahowa i. (5 Mus. 32:4) Halak na adil dang olo mambeda-bedahon halak. Songon i ma Jahowa, dang olo Ibana mambeda-bedahon halak. (Ul. 10:34, 35) Tarida do i sian bahasa na dipakke tikki manuratton Bibel. Marjanji do Jahowa molo di ari parpudi ‘massai godang ma parbinotoan na sittong’ dapot ni halak sian Bibel. (Dan. 12:4) Ala diterjemahon, dicetak, jala dibagihon Bibel dohot publikasi na berdasarhon Bibel, boi ma godang halak mandapot parbinotoan na sittong. Bibel lengkap dohot sebagian naung diterjemahon naposo ni Debata nungnga adong di lobi sian 240 bahasa, jala gratis do i. Hasilna gabe sude ma halak boi mamboto “barita na uli taringot tu Harajaon” sebelum ro ujungna. (Mat. 24:14) Lomo do roha ni Debatanta na adil asa sude halak mananda Ibana marhite manjaha Bibel. On ma buktina na massai holong do roha ni Debata tu hita sude. w23.02 5 ¶11-12
Kamis, 19 Desember
Unang be tiru hamu akka halak na di portibi on. Alai muba ma hamu marhite paubahon pikkiranmuna.—Rom 12:2.
Pasti lomo do rohatta mangulahon na sittong. Alai dang sempurna hita jala molo dang hati-hati, gabe mura ma hita terpengaruh tu standar ni portibi on. (Jes. 5:20) Akka pamimpin di jaman ni Jesus mangakku mangulahon na sittong. Alai dipissang Jesus do nasida ala jotjot menghakimi jala mamaksa na asing mangihutton peraturan ni nasida. (Pjm. 7:16; Luk. 16:15) Adong do tong akka halak di jamanta saonari na songon i. Didok do nasida mangulahon na sittong, hape jotjot do dihakimi nasida halak na asing na so olo mangihutton standar ni nasida. Sasittongna halak na makkilala undenggan ibana sian na asing, halak na sombong do i. Sogo do roha ni Jahowa tu halak sisongon i. Di jolo ni Jahowa dang diulahon ibana na sittong. Mangulahon na sittong lapatanna mangulahon na sittong di jolo ni Jahowa. Halak na mangulahon na sittong ikkon mangihutton standar ni Jahowa na badia di parngoluonna. w22.08 27 ¶3-5
Jumat, 20 Desember
Dohonokku ma hamu ale-alekku.—Joh. 15:15.
Porsea do Jesus tu akka siseanna nang pe jotjot nasida mambahen kesalahan. (Joh. 15:16) Contohna hea do si Jakobus dohot si Johannes mangido tu Jesus asa dilehon kedudukan na sangap di Harajaon ni Debata. Nang pe songon i, dang hea diraguhon Jesus motif ni nasida melayani Jahowa, manang ditolak Jesus nasida gabe apostel. (Mrk. 10:35-40) Di pudian ni ari, sude do sisean ni Jesus maninggalhon ibana tikki ditakkup ibana. (Mat. 26:56) Alai torus do Jesus porsea tu nasida. Jala dihaholongi do nasida “sahat ro di ujungna”, nang pe diboto Jesus jolma na so sempurna do nasida. (Joh. 13:1) Bahkan dung dipahehe Jesus, dilehon ibana do tu 11 apostelna i tanggung jawab na balga lao manguluhon barita na uli dohot mangurus biru-biruna. (Mat. 28:19, 20; Joh. 21:15-17) Terbukti do boi dihaporseai akka apostel ni Jesus i. Torus do nasida setia sahat tu na mate. Gabe teladan do Jesus di hita asa toktong porsea tu akka dongan na so sempurna. w22.09 6 ¶12
Sabtu, 21 Desember
Jahowa do di labbungku, dang mabiar au.—Ps. 118:6.
Molo pos rohatta na dihaholongi Jahowa hita jala sai didongani hita, boi do tataluhon Sibolis. Marsiajar ma hita sian panurat Psalmen 118. Godang do hasusaan na diadopi ibana. Godang do musuna, termasuk do akka pamimpin (ayat 9, 10). Marsak do ibana ala massai borat sitaononna (ayat 13). Asing ni i, hea do ibana dipissang Jahowa (ayat 18). Alai didok panurat Psalmen i do ‘dang mabiar ibana.’ Diboto ibana do dipissang Jahowa pe ibana ala massai holong do roha ni Jahowa tu ibana. Pos do rohana situasi aha pe na diadopi ibana, sai rade do Jahowa mangurupi ibana. (Ps. 118:29) Molo pos rohatta na massai holong do roha ni Jahowa tu hita, dang porlu hita: (1) mabiar dang boi memenuhi kebutuhan keluarga, (2) mabiar tu jolma, dohot (3) mabiar tu hamatean. w22.06 15 ¶3-4
Minggu, 22 Desember
Marlas ni roha ma halak na setia nang pe adong sitaonon. Ai molo tahan ibana diuji, jaloonna ma mahkota hangoluan.—Jak. 1:12.
Tabahen ma ibadatta tu Jahowa gabe na paling penting di ngolutta. Ala Jahowa na manoppa hita, holan Ibana ma tasomba. (Pgk. 4:11; 14:6, 7) Jadi sai tabahen ma melayani Jahowa na paling penting di ngolutta. Jala taulahon ma i sesuai tu lomo ni roha ni Jahowa. Tasomba ma Ibana mangihutton panogu-noguan ni “tondi parbadia dohot hasittongan”. (Joh. 4:23, 24) Lomo do rohatta molo diurupi tondi parbadia hita tikki manomba Jahowa asa sesuai ibadatta i tu hasittongan ni Bibel. Ikkon tetap do tabahen ibadatta tu Jahowa na paling penting di ngolutta, bahkan molo diorai pamaretta ibadatta. Saonari adong do lobi sian 100 donganta na dipenjarahon ala Saksi Jahowa nasida. Nang pe songon i, toktong do nasida marlas ni roha. Torus do nasida martangiang, marsiajar Bibel, jala marbarita na uli taringot Debata dohot Harajaonna. Molo dianiaya hita, boi do hita toktong marlas ni roha ala taboto sai urupan ni Jahowa do hita jala pasti lehononna do upa tu hita.—1 Ptr. 4:14. w22.10 9 ¶13
Senin, 23 Desember
Parlinggoman do bisuk.—Pjm. 7:12.
Di bukku Poda disurat do godang nasehat na mambahen hita marbisuk jala na marguna saleleng ni lelengna. Taida ma dua contohna. Na parjolo, puas ma tu akka na adong di hita. Poda 23:4, 5 mandok, “Unang ma marsitutu ho mangalului hamoraon. . . . Ai marhabong do i songon lali dung i habang tu langit.” Godang halak saonari, na mora dohot na pogos holan mamikkiri hepeng. Rela do nasida sega reputasina, sega hubunganna tu na asing, bahkan sappe marsahit holan alani hepeng. (Poda 28:20; 1 Tim. 6:9, 10) Na paduahon, tapikkiri ma aha sidohonotta. Molo dang manat hita, boi do gabe haccit roha ni na asing mambege hatatta. Poda 12:18 mandok, “Dos songon podang na manikkam do akka hata na asal dipandok, alai pamaluppon do hata ni halak na marbisuk.” Asa toktong denggan hubungatta tu na asing, unang ma margosip hita.—Poda 20:19. w22.10 21 ¶14; 22 ¶16-17
Selasa, 24 Desember
Allang ma gulungan on. Dung i lao ma ho, makkatai ma ho tu halak Israel.—Hes. 3:1.
Ikkon botul-botul do diattusi si Hesekiel barita na lao dipasahat ibana, jala ikkon hona do i tu rohana asa taronjar rohana paboahon i. Dung diallang si Hesekiel gulungan i, didok ibana “manis do i songon madu”. (Hes. 3:3) Boasa didok ibana songon i? Ala las roha ni si Hesekiel mandapot hasangapon boi mewakili Jahowa paboahon hatana. (Ps. 19:8-11) Mandok mauliate do ibana dipillit Jahowa gabe panurirangna. Dung i didok Jahowa ma tu si Hesekiel, “Tangihon ma sude na hudok tu ho, jala sippan ma i di bagasan roham.” (Hes. 3:10) Disuru Jahowa do asa berupaya si Hesekiel mangingot sude na tarsurat di gulungan i jala mangarimangi i. Molo diulahon si Hesekiel i, lam togu ma haporseaonna. Jala boi ma ibana pasahatton barita i tu akka halak. (Hes. 3:11) Molo nungnga takkas diattusi si Hesekiel jala porsea ibana tu barita i, gabe rade ma ibana pasahatton barita i sahat tu na sae tugasna. w22.11 6 ¶12-14
Rabu, 25 Desember
Dumenggan do mangoloi sian mangalehon pelean.—1 Sam. 15:22.
Molo adong perubahan di organisasi, aha do na porlu diulahon hamu? Torus ma dukung i. Tikki di padang belantara dope halak Israel, sering do nasida marpinda-pinda perkemahan. Tikki pinda, pinoppar ni si Kohat do na mamboan poti parpadanan, jala nasida ma di jolo mardalan. (4 Mus. 3:29, 31; 10:33; Jos. 3:2-4) Tugas na istimewa do i! Alai dung masuk halak Israel tu Tano na Dijanjihon, gabe muba ma tugas ni nasida. Alana dang porlu be poti parpadanan i dipapinda-pinda. Jadi gabe muba ma tugas ni pinoppar ni si Kohat. (1 Kron. 6:31-33; 26:1, 24) Alai dang adong disurat di Bibel, na marungut-ungut akka pinoppar ni si Kohat i alani perubahan tugas ni nasida. Manang manuntut asa mandapot tugas na sangap songon na parjolo i. Aha ma parsiajaranna tu hita? Rade ma hamu mangihutton perubahan di organisasi, termasuk na berpengaruh tu tugasmuna. Las ma rohamuna mangulahon tugas aha pe na dilehon tu hamu. Ingot ma, dang tugasmuna na manottuhon arga do hamu di Jahowa manang na dang. Alai molo unduk hamu tu Ibana, i do na paling mambahen las rohana. w22.11 23 ¶10-11
Kamis, 26 Desember
Dang maila ibana nang pe dipenjara au.—2 Tim. 1:16.
Dibahen si Onesiporus do sian nasa gogona lao mangalului si Paulus. Dung pajuppang berupaya do ibana lao mangurupi si Paulus. Hape boi do i parohon jea tu dirina sandiri. Aha do na boi taparsiajari sian on? Unang ma mabiar hita mangurupi akka dongan na dianiaya, gariada berusaha ma hita mangurupi nasida. (Poda 17:17) Alana massai porlu do nasida diurupi jala dipatogu. Taida ma jo songon dia akka donganta di Rusia mangurupi akka dongan sahaporseaon ni nasida na dipenjara. Godang do sian nasida na ro tu pengadilan lao mendukung akka dongan i. Aha ma parsiajaranna tu hita? Unang ma mabiar hita molo adong donganta na difitnah, dipenjara, manang dianiaya. Tatangiakkon ma nasida, taparrohahon ma keluarga ni nasida, jala talului ma cara lao mangurupi nasida.—Ul. 12:5; 2 Kor. 1:10, 11. w22.11 17 ¶11-12
Jumat, 27 Desember
Nasida ma na patoguhon rohakku.—Kol. 4:11.
Martanggung jawab do akka sintua patoguhon jala menghibur akka dongan na di huria. (1 Ptr. 5:2) Tikki masa bencana alam, parjolo sahali porlu do akka sintua mamastihon asa toktong aman akka dongan jala mandapot sipanganon, pakkean, dohot tempat tinggal. Alai porlu dope akka dongan i dipatogu marbulan-bulan dukkon i. (Joh. 21:15) Donganta si Harold, anggota Panitia Cabang na hea mangunjungi akka dongan korban bencana mandok, “Porlu do tikki di nasida asa boi semangat muse. Memang nga boi be halak i mangulahon ulaonna siganup ari, alai olo do taringot muse nasida tu keluarga manang tu dongan na mate alani bencana i, tu akka barang ni nasida, manang tu situasi na berbahaya na diadopi nasida. Di tikki sisongon i olo do gabe lungun muse roha ni nasida. Wajar do i, jala dang na berarti na hurang haporseaon ni nasida.” Berupaya do akka sintua menerappon nasehat “tangis ma hamu dohot halak na tangis”.—Rom 12:15. w22.12 22 ¶1; 24-25 ¶10-11
Sabtu, 28 Desember
Toktong ma ihutton hamu tondi parbadia asa unang diulahon hamu hisap-hisap ni daging i.—Gal. 5:16.
Dilehon Jahowa do tondi parbadiana asa boi hita mangulahon na sittong. Molo taparsiajari Hata ni Debata, boi do hita ditogu-togu tondi parbadia. Boi do muse dapotta tondi parbadia tikki di parpunguan. Alana di parpunguan sisongon i, boi ma hita marsipatoguan dohot akka dongan, na sarupa songon hita berupaya mangulahon na sittong. (Heb. 10:24, 25; 13:7) Jala tikki martangiang hita tu Jahowa mangido asa diurupi hita mengatasi kelemahanta, lehonon ni Jahowa do tondi parbadiana asa unang menyerah hita. Memang nang pe taulahon i sude, olo dope ro keinginan na sala. Alai gabe margogo ma hita manolak keinginan na sala i. Molo nungnga dimulai hamu akka ulaon na mambahen jonok hubunganmuna tu Debata Jahowa, partahatton ma i. Jala torus ma berupaya mangulahon na sittong. w23.01 11 ¶13-14
Minggu, 29 Desember
Dang olo au gabe hatoban ni manang aha pe.—1 Kor. 6:12.
Nang pe dang bukku kesehatan Bibel, alai dipaboa do disi songon dia pandangan ni Jahowa taringot kesehatan. Misalna, dijujui do hita asa mambolokkon sude na boi mambahen sega dagingta. (Pjm. 11:10) Didok do muse di Bibel asa unang pagodangku taallang sipanganon jala unang pagodangku tainum minuman beralkohol. Boi do i mambahen hita marsahit jala boi mambahen hita mate. (Poda 23:20) Dipangido Jahowa do tu hita asa mangarajai diritta tikki mamillit sipanganon dohot siinumon, jala sadia godang i taallang dohot tainum. (1 Kor. 6:12; 9:25) Molo taargai hangoluan na dilehon Debata, manat ma tapikkirhon sebelum hita mambahen keputusan. (Ps. 119:99, 100; Poda 2:11) Misalna, manat ma hita marpikkir tikki mamutusson aha na lao taallang. Nang pe lomo rohatta tu sada jenis sipanganon, alai molo taboto gabe marsahit hita ala mangallang i, pasti tahindari do i. Tapatudu ma tong na marbisuk hita molo cukkup hita modom, taratur berolahraga, jala manjaga kebersihan diri dohot jabutta. w23.02 21 ¶6-7
Senin, 30 Desember
Dung dijaha ho i, aha do na boi diattusi ho?—Luk. 10:26.
Songon dia do asa dapotmuna arta na arga tikki manjaha Bibel? Parrohahon ma na didok di 2 Timoteus 3:16, 17. Didok, “sude Surat na Badia i . . . marguna do i” (1) mangajari, (2) mamissang, (3) padenggatton pangalaho, jala (4) manogu-nogu lao mangulahon na sittong. Boi do dapotmuna opat manfaat on bahkan sian bukku ni Bibel na so jotjot dijaha hamu. Tikki dijaha hamu sada ayat, parrohahon ma songon dia i mangajari hamu taringot Jahowa, sakkapna, manang taringot prinsipna. Ida ma songon dia ayat i boi mamissang hamu. Parrohahon ma songon dia ayat i mangurupi hamu mamboto jala manolak sifat manang keinginan na sala jala songon dia carana asa toktong setia tu Jahowa. Parrohahon ma muse songon dia ayat i boi dipakke hamu lao padenggatton pangalaho dohot cara marpikkir na sala sian akka halak na bisa jadi dijuppangi hamu tikki marbarita. Asing ni i, ida ma songon dia ayat i manogu-nogu hamu lao mangulahon na sittong manang mangalatik hamu lao maniru cara marpikkir ni Jahowa. Molo diingot hamu opat manfaat on, boi ma dapotmuna godang arta na arga tikki manjaha Bibel. w23.02 11 ¶11
Selasa, 31 Desember
Harajaonna pe, dang boi dihancurhon.—Dan. 7:14.
Adong do sada surirang di bukku Daniel na patuduhon nungnga mulai mamaretta Jesus di Harajaon ni Debata tikki marujung “pitu masa”. Nandigan do i? (Dan. 4:10-17) “Pitu masa” na dipaboa di ayat i lelengna 2.520 taon. Dimulai ma i sian taon 607 SM, tikki dihancurhon halak Babel harajaon na parpudi di Jerusalem na mewakili pamarettaon ni Jahowa. Marujung do “pitu masa” i di taon 1914, tikki dilantik Jahowa Jesus gabe Raja di Harajaon ni Debata. Alana ibana do “na marhak lao mandapot i”. (Hes. 21:25-27) Aha do manfaat ni surirang on tu hita? Surirang taringot “pitu masa” boi paposson rohatta pasti digenapi Jahowa do akka janjina. Dibahen Jahowa do jongjong Harajaonna sesuai tu waktu naung ditetappon Ibana. Jadi pasautonna do tong sude surirang na asing pas di tikkina. Alani i, pos ma rohatta “dang na lao tarlambat” ari ni Jahowa i.—Hab. 2:3. w22.07 3 ¶3-5