November

Dang boi halak Kristen mandok hata na kasar, termasuk ma i sude jenis ni hata na mangaleai. Misalna unang ma hea taparoa-roa budaya ni na asing, sukuna, manang kebangsaanna. Jala unang ma tadok hata na mambahen haccit roha ni na asing. Tajaga ma pakkataionta asa boi patoguhon na asing. Unang ma hita mangkritik na asing, alai tapuji ma nasida. Unang ma hita songon halak Israel na so mamboto mandok mauliate. Sabotulna godang do na denggan na dijalo nasida sian Jahowa. Alai jotjot do nasida marungut-ungut. Pasti diingot hamu dope songon dia laporan negatif sian sappulu mata-mata mambahen ‘sude halak Israel marungut-ungut tu si Musa’. (4 Mus. 13:31–14:4) Sian on taboto ma molo marungut-ungut sasahalak, boi do i menular tu na asing. Gabe dohot ma tong nasida marungut-ungut. Sebalikna, molo tapuji na asing gabe denggan ma hasilna, gabe marlas ni roha ma ibana. Alani i, sai talului ma akka na denggan sian dongan asa boi tapuji nasida. w22.04 8 ¶16-17

Sian najolo, godang do akka na poso na diurupi Jahowa asa jonok tu Ibana. Jadi boi do tong diurupi Jahowa gellengmuna asa jonok tu Ibana, molo memang i pilihan ni nasida. (1 Kor. 3:​6, 7) Nang pe hira na mandao nasida sian Jahowa, sai dihaholongi Jahowa do nasida. (Ps. 11:4) Tikki dipatudu nasida na lomo rohana mambahen las roha ni Jahowa, sai rade do Ibana mangurupi nasida. (Ul. 13:48; 2 Kron. 16:9) Boi do muse diurupi Jahowa hamu makkatahon na denggan di tikki na pas tu gellengmuna. (Poda 15:23) Manang boi do dipakke Ibana akka dongan di huria lao mangurupi nasida. Nang pe nga dewasa gellengmuna i, alai boi do diurupi Jahowa nasida mangingot akka na hea diajarhon hamu. (Joh. 14:26) Molo torus dilatik hamu gellengmuna sian pakkataion dohot sian teladanmuna, pasti pasu-pasuon ni Jahowa do hamu. w22.04 21 ¶18

Ala dang boi be Sibolis mulak tu surgo, gabe muruk ma ibana tu akka halak na dimiahi na mangolu dope di tano on. Nasida ma na mewakili Harajaon ni Debata dohot “na paboahon taringot tu Jesus”. (2 Kor. 5:20; Eps. 6:​19, 20) Di taon 1918 adong do ualu donganta bawa na ditudu mangulahon na sala jala divonis ma nasida asa leleng dipenjara. Alani i godang do na marpikkir nungnga so be ulaon ni akka dongan na dimiahi i. (Pgk. 11:​3, 7-11) Alai di bulan Maret 1919, bebas ma nasida jala dicabut ma tuduhan i. Dung kaluar sian penjara, pittor diatur nasida ma muse ulaon marbarita na uli dohot mangajari. Alai Sibolis dang menyerah, torus do dibahen ibana penganiayaan na songon “sunge” tu naposo ni Debata. (Pgk. 12:15) Alani i “ikkon togu, ikkon sabar, jala ikkon marhaporseaon” do hita sude.—Pgk. 13:10. w22.05 5-6 ¶14-16

Di sada parnidaan, diida si Johannes do dua kelompok na mendukung Harajaon ni Debata jala na mandapot hangoluan na saleleng ni lelengna. Kelompok na parjolo, godangna 144.000 halak. Nasida ma akka halak na dipillit lao mangolu di surgo jala mandongani Jesus mamaretta tano on. (Pgk. 5:​9, 10; 14:​3, 4) Di parnidaan i, diida si Johannes do nasida rap jongjong dohot Jesus di Dolok Sion. (Pgk. 14:1) Sian jaman ni akka apostel sahat tu saonari, nungnga marribu halak na dipillit gabe bagian ni si 144.000 i. (Luk. 12:32; Rom 8:17) Dipaboa si Johannes do, adong dope otik nai akka na tarpillit i na tading di tano on saleleng ari parpudi. (Pgk. 12:17) Di hasusaan bolon diangkat ma nasida tu surgo, gabe lengkap ma jumlah ni si 144.000 i. Dohot ma nasida mandongani Jesus mamaretta di Harajaon ni Debata.—Mat. 24:31; Pgk. 5:​9, 10. w22.05 16 ¶4-5

Diajarhon Jesus do tu akka siseanna asa seimbang cara pandang ni nasida tu dirina sandiri. Sada tikki didok Jesus do tu nasida, “Gari obuk na di ulumuna pe nungnga dibilangi sude.” (Mat. 10:30) Hata ni Jesus on paposson rohatta na arga do hita di Jahowa, jala massai holong do rohana tu hita. Jadi molo jotjot hita marpikkiran negatif taringot diritta sandiri, taingot ma nungnga dipillit Jahowa hita gabe sisomba Ibana. Berarti menurut Jahowa, layak do hita mangolu saleleng ni lelengna di tano na imbaru. Jadi unang ma tadok sala do penilaian ni Jahowa i. Hira-hira 15 taon naung salpu, hea do dibahas di Menara Pengawal songon dia asa seimbang hita mangida diri sandiri. Didok disi, “Unang ma tadok di rohatta undenggan hita sian na asing, ala boi do i mambahen hita sombong. Unang ma tong tadok di rohatta dang berharga hita, ala boi do i mambahen metmet rohatta. Sebalikna ikkon masuk akkal ma hita mangida diri sandiri. Ikkon taakkui do adong hahurangatta, alai tasadari ma adong do tong kelebihanta.” w22.05 24-25 ¶14-16

Songon dia do hita boi mambahen huria marsada? Gabe siboan dame ma hita. (Mat. 5:9; Rom 12:18) Molo taulahon on, gabe dame ma suasana di huria. Taingot ma Jahowa do na manarik hita tu ibadat na sittong. (Joh. 6:44) Jadi pasti las do roha ni Jahowa mangida upayatta asa toktong mardame jala marsada tu akka naposona na massai arga di Ibana! (Jes. 26:3; Hag. 2:7) Godang do pasu-pasu naung dilehon Jahowa tu akka naposona. Attong songon dia do carana asa tadapot manfaat sian i? Ikkon torus do taparsiajari jala tarimangi isi ni Bibel. Molo taulahon i, boi ma i mangurupi hita patuduhon akka sifat Kristen jala ‘makkaholongi haha anggitta’ di huria dohot pasangappon nasida.—Rom 12:10. w22.11 12-13 ¶16-18

Ala taboto na diampuni Jahowa do hita gabe boi ma hita “margogo”, boi ma muse dame rohatta, jala ias panggora ni rohatta. Holan Jahowa do na boi mangalehon pengampunan sisongon i. (Ul. 3:19) Dung diampuni Jahowa hasalaatta, gabe denggan ma muse hubungatta tu Ibana. Jala dianggap Ibana ma hira na so hea taulahon dosa i. Dung disesa Jahowa dosatta i, dang dihukum Ibana be hita berdasarkan dosatta i. (Jes. 43:25) Dipadao Jahowa do hasalaatta sian hita, “songon dao ni timur tu barat”. (Ps. 103:12) Molo tarimangi asi ni roha ni Jahowa na massai balga i, pasti mandok mauliate do hita tu Ibana. (Ps. 130:4) Olo do Jahowa mengampuni sasahalak dang soal sadia balga dosana. Asing ni i nungnga taboto Jahowa do Sipanoppa hita, Silehon Patik, jala Hakim na terbaik. Dipakke Ibana do kemampuanna i lao mamutusson naeng mengampuni sasahalak manang na dang. w22.06 5 ¶12-14

Nungnga dilehon Jahowa janjina tu sude halak na makkaholongi Ibana. Satokkin nai, bahenonna ma dang adong be sahit, hasusaan, dohot hamatean. (Pgk. 21:​3, 4) Urupanna do haduan akka halak “na lambok roha” mambahen tano on gabe Paradeiso. (Ps. 37:​9-11) Dung i lam akrab ma hubungatta tu Jahowa, lobi sian na tahilala saonari. Janji na luar biasa do on. Jala pasti pasauton ni Jahowa do i. Alana sai ditepati Jahowa do akka janjina. Jadi pos ma rohatta ‘paimahon janji ni Debata na mangolu i’. (1 Tim. 4:10) Toktong ma hita sabar paimahon i. (Jes. 55:​10, 11) Sai anggiat ma torus setia hita tu Jahowa. Jala pos ma rohatta pasu-pasuon ni Debata do “halak na marsitutu mangalului Ibana”. w22.06 20 ¶1; 25 ¶18

Pos ma rohatta pasti ulahonon ni Jahowa do tanggung jawabna sebagai Kepala keluarga, songon na didok di 1 Timoteus 5:8. Molo pos rohatta na dihaholongi Jahowa hita dohot keluargatta, pasti yakin do hita paradeonna do akka na porlu di hita. (Mat. 6:​31-33) Lomo do roha ni Jahowa mangulahon i, ala Debata na murah hati do Ibana. Tikki ditoppa Ibana pe tano on, dang holan kebutuhan dasar na diparade Ibana. Diparade Ibana do muse akka na asing asa boi hita marlas ni roha. (1 Mus. 2:9) Jadi pos ma rohatta sai diparade Jahowa do kebutuhanta, nang pe holan kebutuhan dasar na adong di hita. (Mat. 6:11) Taingot ma pengorbanan aha pe na tabahen saonari, dang sadia dope i molo tabandingkon tu na dilehon Jahowa tu hita saonari dohot di ari na naeng ro.—Jes. 65:​21, 22. w22.06 15 ¶7-8

Dang holan akka parsiajar Bibel na porlu mandapot parbinotoan na bagas taringot Jahowa. Sude do hita porlu mandapot i. Didok Apostel Paulus, molo taulahon akka naung taparsiajari sian Bibel gabe boi ma taboto dia “na sittong dohot na sala”. Memang maol do mangihutton standar moral ni Jahowa. Alana godang do halak saonari na so hasea pangalahona. Alai, akka naung taparsiajari i boi do mangurupi hita mampartahatton haporseaotta tu Jahowa. Alana sian Bibel do sude parsiajaran i. Songon Jesus, tapasangap do goar ni Jahowa. (Joh. 17:​6, 26) Contohna di taon 1931 mulai do tapakke goar Saksi Jahowa. On patuduhon, massai penting do goar ni Debata di hita. Jala las do rohatta ditanda mamakke goar i. (Jes. 43:​10-12) Asing ni i, di Bibel Terjemahan Tano na Imbaru tabahen do goar ni Debata di akka ayat na pas sesuai tu teks aslina. w22.07 11 ¶11-12

Barita na uli taringot Harajaon ni Debata, termasuk do hasittongan na adong di Bibel. Dipatudos Jesus do i songon arta na buni. Di Mateus 13:44 didok ibana, “Tudos do Harajaon banua ginjang i tu arta na buni di ladang. Adong ma sasahalak na mandapot i, alai ditanom ma muse. Alani las ni rohana, lao ma ibana manggadis sude artana jala dituhor ma ladang i.” Sasittongna dang na berencana bawa i mangalului arta i. Alai tikki diida ibana i, digadis ma sude artana asa dapotna arta na buni i. Boasa diulahon ibana i? Ala diboto ibana massai arga do arta i. Las do rohatta manomba Debata Jahowa jala mandapot harapan lao mangolu salelengna di Harajaon ni Debata. Ummarga do i sian manang aha pe na ditawarhon di portibi on. Jala dang sadia dope pengorbanan na tabahen, dibandingkon tu kesempatan boi marale-ale tu Debata Jahowa. Pasti las hian do rohatta mangulahon “lomo ni roha ni Jahowa”.—Kol. 1:10. w22.08 15 ¶8-9; 17 ¶12

Sian dia diboto si Josep na mangulahon “na jahat” do ibana molo mangalakkup? Sasittongna dua ratus taon dukkon i pe baru disurat Patik ni si Musa na mandok “unang hamu mangalakkup”. (2 Mus. 20:14) Alai diboto si Josep do dang lomo roha ni Jahowa tu ulaon seks na so patut. Contohna, diboto si Josep do tujuan ni perkawinan dibahen Jahowa, i ma lao pasadahon sada bawa dohot sada borua. Jala pasti nga hea dibege ibana songon dia Jahowa dua hali melindungi si Sara oppung buyutna sian akka raja na naeng mambuat ibana gabe istrina. (1 Mus. 2:24; 12:​14-20; 20:​2-7) Hasilna gabe diboto si Josep ma dia na sittong di jolo ni Jahowa. Ala holong do roha ni si Josep tu Jahowa, gabe holong ma tong rohana tu standar ni Jahowa na sittong. Jala bertekad ma ibana mangulahon i. w22.08 26 ¶1-2

Najolo tadok do haheheon na disurat di Daniel 12:​2, i ma haheheon tu surgo manang pertumbuhan rohani dukkon masa pelarangan taon 1918. Alai saonari nungnga disesuaihon be pemahamanta on. Haheheon na nidokna di ayat i, i ma haheheon ni akka halak di tano na imbaru. Haheheon i lao masa dukkon marujung ari parpudi jala dung sae porang Armagedon. Dipaboa do di Daniel 12:​2, adong deba halak na dipahehe lao “mangolu saleleng ni lelengna”. Lapatanna, saleleng 1.000 taon akka halak na dipahehe ikkon torus do mananda Jahowa jala mangoloi Ibana dohot Jesus asa boi mangolu saleleng ni lelengna.—Joh. 17:3. w22.09 21 ¶6-7

Alai dang na berarti gabe asal porsea hita tu akka dongan. Dipangido Jahowa pe hita porsea tu akka dongan, ala nungnga dipatudu nasida do na layak nasida dihaporseai. Porlu do godang tikki asa boi tahaporseai akka dongan di huria. Aha ma na ikkon taulahon? Ikkon tatanda do nasida. Makkata-hatai ma hita dohot nasida di parpunguan, rap bekerja sama ma hita dohot nasida di ulaon marbarita, jala sabar ma hita tu nasida. Talehon ma kesempatan tu akka donganta lao mambuktihon memang layak do nasida dihaporseai. Mulana, dang pittor tapaboa masalah pribaditta tu dongan na baru tatanda. Alai lam leleng, gabe lam akrab ma hita tu ibana. Gabe nyaman ma hita paboahon perasaanta tu donganta i. (Luk. 16:10) Alai boha molo dikecewahon hita? Unang ma pittor tadok dang olo be hita mardongan tu donganta i. Taingot ma lam leleng salpu do annon masalah i. Jala molo tung pe hea hita dikecewahon sasahalak, unang ma gabe tu sude dongan hita dang porsea. w22.09 4 ¶7-8

Sahalak sintua na margoar si Miqueas makkilala adong do piga-piga sintua di huria na mambahen na so adil tu ibana. Alai dijaga si Miqueas do rohana jala dikendalihon ibana do perasaanna. Torus do ibana martangiang mangido tondi parbadia dohot gogo asa boi martahan. Dijaha ibana do muse akka publikasi na boi mangurupi ibana. Aha do parsiajaranna? Molo adong dongan na mambahen na so adil tu hamu, tetap ma hamu tenang jala berupaya ma mambolokkon pikkiran na negatif. Dang sai taboto aha na masa tu donganta i umbahen na songon i ibana makkatai manang bertindak. Alani i, martangiang ma hamu tu Jahowa jala pangido ma asa boi diattusi hamu situasina. Molo diulahon hamu i, gabe marpikkiran positif ma hamu jala rade manalpuhon hasalaan ni nasida. (Poda 19:11) Ingot ma, diboto Jahowa do songon dia situasimuna, jala lehononna do gogo asa boi hamu martahan.—Pjm. 5:8. w22.11 21 ¶5

Pillit ma akka dongan na makkaholongi Jahowa. Dongan na tapillit berpengaruh do tu kemajuan rohanitta. (Poda 13:20) Sahalak sintua na margoar si Julien mandok, “Tikki poso au jotjot do au marbarita dohot akka dongan na semangat. Hasilna gabe lomo ma rohakku marbarita na uli. Husadari do muse, saleleng on hubatasi do pergaulanku holan tu na sebaya. Alani i ma gabe holan saotik donganku.” Boha do molo adong dongan di huria na mangalehon pengaruh na so denggan tu hamu? Hea do dipaboa si Paulus adong halak Kristen di abad na parjolo na so denggan pangalahona. Alani i dipasingot ibana ma asa mandao si Timoteus sian nasida. (2 Tim. 2:​20-22) Taingot ma massai arga do hubungatta tu Bapakta Jahowa. Nungnga godang pengorbanan na tabahen asa boi hita akrab tu Ibana. Jadi unang ma taloas adong na manegai i. w22.08 5-6 ¶13-15

Godang do halak na so olo manangihon bisuk ni Jahowa. Alai hita dang songon i. Tahaholongi do patik ni Jahowa jala taulahon do i. Boi do lam togu holongta i molo tabandingkon songon dia parngoluon ni halak na mangoloi Jahowa dohot halak na so mangoloi Jahowa. Songon na taida, godang do masalah ni akka halak na oto ala manolak bisuk ni Jahowa. Alai molo halak na mangoloi Jahowa, dao do undenggan ngolu ni nasida. (Ps. 32:​8, 10) Lomo do roha ni Jahowa asa sude halak manangihon bisukna, alai dang dipaksa Ibana manang ise pe manjalo i. Nang pe songon i, dipaboa Ibana do akibatna molo dang olo manangihon bisukna. (Poda 1:​29-32) “Jaloon ni nasida ma upa ni pambahenan ni nasida.” Gabe marsak ma nasida, susa ngoluna, jala ujungna pamateon ni Jahowa ma nasida saleleng ni lelengna. Alai aha do upa ni halak na manangihon bisuk ni Jahowa? Marjanji do Jahowa, “Na lao dame do ngolu ni halak na manangihon Au jala dang mabiar nasida molo ro jea.”—Poda 1:33. w22.10 21 ¶11-13

Molo tahabiari Jahowa, dang olo hita mangulahon akka na so dihalomohon rohana. (Poda 16:6) Sebalikna ikkon tabahen do sian nasa tolapta mangihutton standar ni Jahowa na dipaboa di Bibel. (2 Kor. 7:1) Gabe marlas ni roha do hita molo taulahon akka na dihalomohon Jahowa jala tahasogohon akka na dihasogohon Ibana. (Ps. 37:27; 97:10; Rom 12:9) Pasti taboto do na marhak Jahowa manottuhon dia na sittong dohot na sala. Alai dang cukkup holan i. Ikkon olo do hita mangulahon standar ni Jahowa i. (Rom 12:2) Ikkon tabuktihon do sian tindakanta na botul-botul hita porsea holan standar ni Jahowa do na boi mambahen hita marlas ni roha. (Poda 12:28) On ma na dihilala si Daud tikki didok ibana tu Jahowa, “Dipatudu Ho do tu au dalan tu hangoluan. Marlas ni roha situtu do au ala lomo do roham mangida au. Jala sonang do rohakku saleleng ni lelengna ala di sabola kananmu do au.”—Ps. 16:11. w22.10 8 ¶9-10

Serep do roha ni Jesus jala seimbang do ibana mangida dirina. Sebelum ro tu tano on, nungnga godang na diulahon Jesus lao melayani Jahowa. Didok Bibel, “Marhite ibana do ditoppa saluhut na di surgo dohot na di tano on.” (Kol. 1:16) Dukkon tardidi Jesus, diingot ibana ma muse sude naung diulahon ibana rap dohot Bapakna di surgo. (Mat. 3:16; Joh. 17:5) Nang pe massai godang parbinotoan ni Jesus alai dang gabe sombong ibana alani i. Dang hea dianggap Jesus undenggan ibana sian na asing. Gariada didok ibana do tu akka siseanna “dang na lao dihobasi ibana umbahen na ro. Alai ro do ibana lao marhobas tu na asing jala mangalehon ngoluna lao manobus godang jolma”. (Mat. 20:28) Asing ni i dang adong manang aha pe na diulahon Jesus mangihutton lomo ni rohana sandiri. Takkas ma serep hian do roha ni Jesus. Jadi ikkon tatiru do ibana. w22.05 24 ¶13

Tikki naeng mengampuni dipertimbangkon Jahowa do, sengaja do sasahalak mangulahon dosa manang na dang. Takkas do i tarida sian hata ni Jesus na disurat di Lukas 12:​47, 48. Molo adong halak na sengaja mangulahon na sala hape nga diboto ibana i mambahen haccit roha ni Jahowa, berarti nungnga mangulahon dosa na balga ibana disi. Kemungkinan dang olo Jahowa mengampuni halak sisongon i. (Mrk. 3:29; Joh. 9:41) Alai adong dope faktor na asing na dipertimbangkon Jahowa. Dipertimbangkon Jahowa do, botul-botul do halak na mangulahon dosa i bertobat manang na dang. Molo bertobat sasahalak diuba ibana do cara marpikkirna, pangalahona, dohot tujuanna. Botul-botul do ibana menyesal jala lungun rohana ala dang diulahon ibana be na sittong jala nungnga diulahon ibana dosa na balga. Asing ni i, lungun do tong rohana ala dang dijaga ibana hubunganna tu Jahowa, gabe sappe diulahon ibana ma dosa na balga. w22.06 5-6 ¶15-17

Dipakke musu do informasi na sala taringot akka donganta bawa na martanggung jawab di organisasi. (Ps. 31:13) Piga-piga donganta on adong na ditakkup jala ditudu sebagai parjahat. Songon i do na masa di abad na parjolo tikki ditakkup Apostel Paulus jala ditudu mangulahon na sala. Adong do piga-piga halak Kristen di abad na parjolo na maninggalhon si Paulus tikki dipenjara ibana di Rom. (2 Tim. 1:​8, 15; 2:​8, 9) Bayakkon ma songon dia perasaan ni si Paulus tikki ditinggalhon ibana. Hape nungnga dilean ibana ngoluna tu nasida jala nungnga godang ditaon ibana hasusaan. (Ul. 20:​18-21; 2 Kor. 1:8) Unang ma tatiru akka halak na maninggalhon si Paulus! Jadi dang heran be hita molo diserang Sibolis akka dongan na martanggung jawab di huria. Lomo do rohana asa unang setia be donganta on tu Jahowa jala gabe mabiar hita alani i. (1 Ptr. 5:8) Torus ma urupi ma akka donganta jala setia ma tu nasida.—2 Tim. 1:​16-18. w22.11 16-17 ¶8-11

Halak Jahudi do ra parjahat na bertobat na digantung di sapping ni Jesus. Holan sada do Debata na disomba halak Jahudi. Alai molo halak sian bangso na asing porsea tu godang dewa. (2 Mus. 20:​2, 3; 1 Kor. 8:​5, 6) Autsugari ma bawa i sian bangso na asing, pasti gabe dang songon ayat harian sadari on sukkun-sukkunna. Mungkin didok ibana do, “Na so mabiar do ho tu akka dewa?” Asing ni i, holan tu “halak Israel na songon biru-biru na lilu” do Jesus disuru marbarita, dang tu sude bangso. (Mat. 15:24) Jotjot do dipaboa Jahowa tu halak Israel na lao paheheonna do halak na mate. Bisa jadi nga hea diboto parjahat na bertobat i taringot on. Jadi sian hatana i, hira na berharap do parjahat i na paheheon ni Jahowa do Jesus lao mamaretta di Harajaon ni Debata. Jala berharap do muse parjahat i asa dipahehe Debata ibana. Ala halak Jahudi do parjahat i, tottu nga diboto ibana taringot si Adam dohot si Hawa dohot Paradeiso na dibahen Jahowa. Jadi tikki dipaboa Jesus taringot Paradeiso, na diingot ibana i ma taman na bagak di tano on.—1 Mus. 2:15. w22.12 8-9 ¶2-3

Saonari pe boi do hita marhasil di ulaon marbarita molo diurupi tondi parbadia. Boasa tadok songon i? Alana berupaya keras do Sibolis pasohon ulaon marbarita. (Pgk. 12:17) Godang halak marpikkir dang boi hita monang mangalo Sibolis ala umgogo do ibana sian hita. Alai sasittongna tikki marbarita hita, nungnga tataluhon Sibolis! (Pgk. 12:​9-11) Boasa tadok songon i? Tikki marbarita hita, tapatudu ma na so mabiar hita tu ancaman ni Sibolis. Dibahen Jahowa do hita margogo marhite tondi parbadiana. Jala las roha ni Jahowa mangida hita. (Mat. 5:​10-12; 1 Ptr. 4:14) Boi do dibahen tondi parbadia hita margogo tikki mangadopi tantangan manang aha pe di ulaon marbarita. (2 Kor. 4:​7-9) Attong aha do na ikkon taulahon? Ikkon torus do hita martangiang tu Jahowa mangido tondi parbadiana. Pos ma rohatta dialusi Jahowa do tangiangta i. w22.11 5 ¶10-11

Molo tahaholongi akka donganta, berupaya ma hita asa toktong mardame dohot nasida. Tatiru ma Jahowa na rade manalpuhon hasalaan. Olo do Ibana mangalehon Anakna mate lao manobus dosatta. Alani i ikkon olo ma hita manalpuhon hasalaan ni akka donganta. Unang ma hita songon hatoban na jahat na dipaboa di ilustrasi ni Jesus. Nang pe nga dihapus raja utangna na massai balga, alai dang olo ibana marasi ni roha jala manghapus utang ni donganna hatoban na holan saotik. (Mat. 18:​23-35) Molo adong parsoalanmuna dohot sahalak dongan di huria, olo do hamu berinisiatif asa mardame tu ibana sebelum ro tu Borngin Parningotan? (Mat. 5:​23, 24) Molo diulahon hamu i, on patuduhon na massai holong do rohamuna tu Jahowa dohot tu Jesus. w23.01 29 ¶8-9

Asa boi taboto aha na porlu di akka donganta, tasukkun ma nasida. Alai marbisuk ma hita manukkun asa unang maila nasida. (Poda 20:5) Contohna taparrohahon ma cukkup dope sipanganon, obat, dohot keperluan ni nasida na asing? Karejo dope nasida jala boi dope nasida mambayar sewa ni jabuna? Porlu do nasida diurupi asa boi mandapot bantuan ni pamaretta? Las do roha ni Jahowa molo sude hita mangurupi jala patoguhon akka dongan na asing. (Gal. 6:10) Nang pe otik na boi tabahen lao mangurupi akka dongan na marsahit, alai balga do pengaruh ni i tu nasida jala boi do nasida gabe dipatogu. Misalna, tikki adong dakdanak rap dohot natua-tuana mangunjungi nasida, tikki adong akka na poso na berbelanja kebutuhanna, manang tikki adong na mangaloppa sipanganon tu nasida. Adong do piga-piga dongan na mambahen surat manang kartu ucapan tu akka sintua, ala godang do na diulahon nasida tu dongan sahaporseaon saleleng masa wabah penyakit. Alani i denggan do molo torus hita ‘marsiurupan jala patoguhon na asing’.—1 Tes. 5:11. w22.12 22 ¶2; 23 ¶5-6

Takkas do diboto halak Saduse lima bukku na parjolo sian bukku Heber. Alai dang porsea nasida tu hasittongan na adong di bukku i. Uppamana parrohahon ma songon dia hata ni Jesus tikki makkatai tu halak Saduse taringot haheheon. Disukkun ibana do, “Na so hea do dijaha hamu di bukku ni si Musa taringot tu ramba na marsuga? . . . Ai didok [Debata] do, ‘Au do Debata ni si Abraham, Debata ni si Isak, dohot Debata ni si Jakkob.’” (Mrk. 12:​18, 26) Sebenarna jotjot do dijaha halak Saduse ayat i. Alai sian sukkun-sukkun ni Jesus tarida ma dang porsea nasida tu ajaran ni Bibel na penting, i ma taringot haheheon. (Luk. 20:38) Aha do parsiajaranna tu hita? Tikki manjaha Bibel, berupaya ma hita mangida parsiajaran sian ayat manang kisah na adong disi. Unang ma puas hita holan mamboto ajaran dasar, alai berupaya ma hita mangalului arta na arga dohot prinsip sian ayat i. w23.02 11 ¶9-10

Songon na disurat di ayat harianta sadari on, akka naposo ni Jahowa najolo torus do setia tu Jahowa saleleng mangolu nasida nang pe mangadopi hasusaan. (Heb. 11:​36-40) Nang pe dang diida nasida dope saut sude janji ni Jahowa i, alai torus do nasida paimahon i. Sia-sia do kerja keras dohot ketekunanna i? Daong. Ala nungnga berupaya nasida mambahen las roha ni Jahowa, pasti idaon ni nasida do annon saut sude janjina i. (Heb. 11:​4, 5) Jala gabe teladan do nasida di hita asa toktong marpos ni roha tu janji ni Jahowa. Saonari, lam tu jahatna do portibi on. (2 Tim. 3:13) Dang menyerah dope Sibolis mambahen susa naposo ni Debata. Nang pe songon i bertekad ma hita torus melayani Jahowa. Jala torus ma ‘tapaima-ima janji ni Debata na mangolu i’.—1 Tim. 4:10. w22.06 25 ¶17-18

Sada alasanna boasa ikkon tajaga kesehatanta, ala lomo rohatta mangalehon na dumenggan lao manomba Jahowa. (Mrk. 12:30) Alani i, unang ma taulahon akka ulaon na boi mambahen hita marsahit. (Rom 12:1) Memang dang boi tajamin torus hita sehat, alai ikkon berupaya do hita asa toktong sehat. Alana lomo do rohatta patuduhon na taargai do hangoluan silehon-lehon ni Bapakta na di surgo. Molo dung matua hita jala marsahit, dang godang be na boi taulahon. Olo do gabe kecil hati hita jala lungun rohatta alani i, alai unang ma gabe dang tajaga be kesehatanta. Boasa? Alana dang soal hita matua manang marsahit boi dope hita mamuji Jahowa songon na diulahon Raja Daud. Massai tarapul do rohatta mamboto na arga do hita di Jahowa, nang pe marsahit hita manang nungnga matua. (Mat. 10:​29-31) Bahkan molo mate pe hita, lomo do roha ni Debata pahehehon hita. (Job 14:​14, 15) I ma alasanna ikkon berupaya do hita manjaga kesehatan saleleng mangolu hita. w23.02 20-21 ¶3-5

Tarsurat do goar ni punguan bolon di bukku i molo dung selamat sian Armagedon? Ido. (Pgk. 7:14) Termasuk do nasida bagian ni biru-biru na asing na lao mandapot “hangoluan na saleleng ni lelengna”. (Mat. 25:46) Alai nang pe nungnga selamat nasida mangalewati Armagedon, dang otomatis dapot ni nasida hangoluan na saleleng ni lelengna i. Saleleng Pamarettaon Saribu Taon, ‘diparmahan [Jesus] ma nasida. Boanonna ma nasida tu mata mual ni aek hangoluan’. Jadi asa boi permanen disurat goar ni nasida di bukku hangoluan, ikkon dioloi nasida do petunjuk ni Jesus jala terbukti setia tu Jahowa. (Pgk. 7:​16, 17) Alai akka halak na songon hambing lao dipamate nama di Armagedon. Jesus mandok “tu hamatean na saleleng ni lelengna ma halak sisongon i”. (Mat. 25:46) Si Paulus pe mandok, “Hukumon ni Tuan i ma nasida. Mate ma nasida saleleng ni lelengna.”—2 Tes. 1:9; 2 Ptr. 2:9. w22.09 16 ¶7-8

Tikki rap sada keluarga menikmati akka toppaan, gabe kesempatan ma i di nasida lao bersantai, marlas ni roha, jala gabe lam kompak. Nungnga ditoppa Jahowa akka inganan na bagak di tano on asa boi tanikmati. Godang do keluarga na lao tu luar kota, tu dolok-dolok, manang tu pantai. Di tano na imbaru, sude keluarga boi do annon marlas ni roha menikmati toppaan ni Jahowa, lobi sian na boi diulahon nasida saonari. Dang porlu be mabiar hita tu binatang jala akka binatang pe dang mabiar be tu hita. (Jes. 11:​6-9) Marlas ni roha ma hita ala boi menikmati akka toppaan ni Jahowa saleleng ni lelengna. (Ps. 22:26) Alai sasittongna mulai sian saonari boi do diurupi akka natua-tua gellengna menikmati akka toppaan. Molo dipakke hamu akka toppaan i lao mangajarhon taringot Jahowa tu gellengmuna, gabe sarupa ma perasaan ni nasida tu Raja Daud na mandok, “Ale Jahowa, dang adong na boi mambahen songon na binahenmi.”—Ps. 86:8. w23.03 25 ¶16-17