Maret

Memang dang ro dope tano na imbaru i. Alai taparrohahon ma akka na adong di sakalilingta, misalna akka bintang, hau, binatang, dohot jolma. Nang pe sebelumna dang adong akka toppaan i, alai pos do rohatta nyata do i sude, ala Jahowa na manoppa i. (1 Mus. 1:​1, 26, 27) Dos songon i ma, nungnga marjanji Jahowa lao mambahen tano na imbaru. Pasti pasautonna do i. Di tano na imbaru, sempurna ma sude jolma, sehat, jala mangolu saleleng ni lelengna. Pos ma rohatta, pasti saut do tano na imbaru i di tikki naung ditottuhon Debata. (Jes. 65:17; Pgk. 21:​3, 4) Sambil paimahon i, pakke hamu ma sude kesempatan na adong lao patoguhon haporseaonmuna. Pabagas ma pangargaionmuna tu tobusan. Rimangi ma huaso ni Jahowa. Jala ulahon ma akka ulaon na mambahen hamu jonok tu Jahowa. Molo diulahon hamu songon i, termasuk ma hamu ‘akka halak na porsea jala na sabar, na manjalo akka na dijanjihon Debata’.—Heb. 6:​11, 12. w23.04 31 ¶18-19

Diida Jesus ma doppak ginjang jala martangiang ma ibana di jolo ni natorop. Lomo do rohana asa dipasangap Debata Jahowa alani na lao bahenonna. Dung i gogo ma didok Jesus, “Lasarus, kaluar ma ho!” (Joh. 11:43) Gabe kaluar ma si Lasarus sian kuburan i. Menurut piga-piga halak, dang mungkin terjadi na dibahen Jesus on. Peristiwa on patoguhon haporseaotta tu janji taringot haheheon. Taingot ma muse janji ni Jesus tu si Marta, “Mulak mangolu do muse ibotomi.” (Joh. 11:23) Songon Bapakna, lomo do roha ni Jesus jala sanggup do ibana menepati janjina i. Tikki tangis Jesus tarida ma na massai lomo do rohana pahehehon halak na mate jala manalpuhon lungun ni roha na dihilala akka halak alani hamatean. Jala tikki kaluar si Lasarus sian kuburan, on patuduhon sanggup do Jesus pahehehon halak na mate. Pikkirhon ma muse sipaingot ni Jesus tu si Marta di ayat sadari on. Godang do alasanta boi porsea na lao pasautton ni Jahowa do janjina lao pahehehon halak na mate. w23.04 11-12 ¶15-16

Sipata porlu do tapauba isi ni tangiangta dung lam takkas taboto aha na dihalomohon Jahowa. Taingot ma pasauton ni Jahowa do sakkapna di tikki naung ditottuhon Ibana. Sakkapna i termasuk ma manalpuhon sude akka na mambahen jolma marsitaonon. Misalna bencana alam, sahit, dohot hamatean. Pasauton ni Jahowa ma sakkapna i marhite Harajaonna. (Dan. 2:44; Pgk. 21:​3, 4) Alai huhut paimahon i, dipaloas Jahowa dope Sibolis mamaretta portibi on saonari. (Joh. 12:31; Pgk. 12:9) Alani i molo dipasae Jahowa saonari masalah na adong di portibi on, gabe hira na marhasil ma pamarettaon ni Sibolis. Nang pe ikkon tapaima Jahowa pasautton sakkapna i, pos ma rohatta dang tinggalhononna hita. Pasti urupanna do hita. w23.05 8 ¶4; 9-10 ¶7-8

Boha do caratta mangurupi halak na asing asa mandapot manfaat sian acara Borngin Parningotan? Na parjolo, taundang ma nasida. Boi do talehon undangan tu akka halak na tajuppangi tikki marbarita. Asing ni i, boi do tabahen daftar akka ise na lao taundang tu acara i. Contohna keluargatta, dongan sakarejo, dongan sasikkola, dohot halak na asing na tatanda. Molo holan otik undangan tercetak na adong di hita, boi do tabagihon undangan versi elektronik. Molo tabahen songon i, bisa jadi adong sian akka undanganta i na ro di na so panagamanta. (Pjm. 11:6) Adong do na porlu taingot tikki taundang sasahalak tu acara Parningotan, tarlumobi tu akka na so hea dope ro. Olo do ra godang sukkun-sukkun ni nasida. Alani i tapikkirhon ma aha do hira-hira na lao disukkun nasida. Bahkan dung ro akka halak na taundang tu Borngin Parningotan, olo do sukkun-sukkun dope roha ni nasida. Marsitutu ma hita mangurupi akka halak na “marpangalaho na denggan” asa boi nasida mandapot manfaat sebelum, saleleng, jala dung sae acara Borngin Parningotan.—Ul. 13:48. w24.01 12 ¶13, 15; 13 ¶16

Di Bibel adong do dipaboa taringot ualu halak na dipahehe. Manat ma parsiajari hamu i jala lului ma parsiajaranna. Rimangi ma songon dia i patuduhon na lomo do roha ni Debata pahehehon halak na mate jala sanggup do Ibana mangulahon i. Asing ni i na paling penting, rimangi ma muse taringot haheheon ni Jesus. Ingot ma godang do saksi mata na mangida tikki Jesus dipahehe, jala on mambahen lam pos rohatta tu janji taringot haheheon. (1 Kor. 15:​3-6, 20-22) Mandok mauliate do hita tu Jahowa alani janji taringot haheheon! Pos do rohatta pasti saut do janjina i alana lomo do roha ni Jahowa jala sanggup do Ibana mangulahon i. Alani i bertekad ma hita asa torus patoguhon haporseaotta tu harapan na massai arga on. Molo taulahon i, gabe lam jonok ma hita tu Debata na marjanji tu hita, ‘Mulak mangolu do muse halak na dihaholongi hamu!’—Joh. 11:23. w23.04 8 ¶2; 12 ¶17; 13 ¶20

Molo serep rohatta, seimbang do cara pandangta taringot diritta sandiri jala taakkui do keterbatasanta. Asing ni i, taargai do halak na asing jala sangap do tabahen nasida. (Plp. 2:3) Halak na serep roha do si Gidion jala disadari ibana do keterbatasanna. Tikki dipaboa suru-suruan ni Jahowa naung dipillit do si Gidion lao paluahon halak Israel sian halak Midian, didok si Gidion ma, “Keluargakku do na ummetmet di marga Manasse. Jala au ma na so apala sangap di keluarga ni bapakku.” (Pangh. 6:15) Dihilala si Gidion dang layak ibana manjalo tugas i, alai diboto Jahowa do na sanggup ibana mangulahon tugas i. Alani bantuan ni Jahowa, marhasil do si Gidion mandalatton tugasna. Berupaya do akka sintua lao patuduhon serep ni roha di sasude. (Ul. 20:​18, 19) Dang olo nasida mambangga-banggahon akka na dicapai nasida. Jala dang sai disalahon nasida dirina ala hea mambahen kesalahan. w23.06 3 ¶4-5

Lao diropukkon ma ulu ni Sibolis. Lobi sian 1.000 taon nai ma i masa. (Pgk. 20:​7-10) Jala dipaboa Bibel do muse akka aha na lao masa sebelum dipaujung parmusuon ni portibi na dirajai Sibolis on dohot organisasi ni Jahowa. Na parjolo, didok akka bangso ma “dame do sude jala dang adong be sihabiaran!” (1 Tes. 5:​2, 3) Alai “toppu” ma masa hasusaan bolon. Masa ma i dung diserang akka bangso sude agama palsu. (Pgk. 17:16) Dukkon i lao diuhumi Jesus ma akka jolma, jala dipapulik ma biru-biru sian hambing. (Mat. 25:​31-33, 46) Muruk hian do Sibolis di tikki i. Alani sogo ni rohana, dipapungu ibana ma akka bangso lao menyerang naposo ni Jahowa. Digoari ma nasida Gog sian tano Magog. (Hes. 38:​2, 10, 11) Tikki masa hasusaan bolon i, lao adong ma tikkina dipapungu tu surgo akka halak na miniahan na mangolu dope di tano on. Di ujung ni hasusaan bolon i, marsada ma nasida dohot Kristus rap dohot tentarana na di surgo lao marporang di Armagedon. (Mat. 24:31; Pgk. 16:​14, 16) Dung i dimulai ma Pamarettaon Saribu Taon ni Kristus di tano on.—Pgk. 20:6. w23.10 20-21 ¶9-10

Saonari godang do naposo ni Jahowa na tinggal di inganan na mangorai ulaonta. Dihormati nasida do akka pamaretta, alai songon si Obaja toktong do nasida setia tu Jahowa. (Mat. 22:21) Ala dihabiari nasida Debata, dioloi nasida do paretta ni Debata sian paretta ni jolma. (Ul. 5:29) Toktong do nasida marbarita na uli jala marpungu nang pe ikkon martabuni. (Mat. 10:​16, 28) Dipastihon nasida do asa boi akka donganna mandapot publikasi. Parrohahon ma pengalaman ni si Henri, na tinggal di sada negeri di Afrika. Tikki diorai ulaonta di negeri i, rade do si Henri manaruhon publikasi tu akka dongan. Didok ibana, “Parila do au halakna. Ala na mabiar do au tu Jahowa umbahen na barani au.” Boi do hamu barani songon si Henri? Pasti boi, molo berupaya hamu makkabiari Debata. w23.06 16 ¶9, 11

Dukkon mangalo si Adam dohot si Hawa tu Debata, hira na so mungkin be adong jolma na sempurna na manggohi tano on. Hira na marhasil do Sibolis mambahen gagal tujuan ni Debata. Didok roha ni Sibolis, dang boi be Jahowa pasautton janjina. Dirippu Sibolis do ra lao pamateon ni Debata si Adam dohot si Hawa, jala ditoppa muse jolma na sempurna asa boi saut tujuan ni Jahowa. Alai molo dibahen Debata songon i, gabe didok Sibolis ma Debata pargabus. Boasa? Alana songon na disurat di 1 Musa 1:​28, nungnga marjanji Jahowa tu si Adam dohot si Hawa, ikkon pinoppar ni nasida do na manggohi tano on. Dirippu Sibolis do ra molo tung pe marianakkon si Adam dohot si Hawa, dang na lao boi pinoppar ni nasida sempurna muse. (Pjm. 7:20; Rom 3:23) Molo dang boi sempurna pinoppar ni si Adam dohot si Hawa, boi ma didok Sibolis nungnga gagal Debata pasautton tujuanna. Alana dang jolma na sempurna na lao manggohi tano on. w23.11 6 ¶15-16

Saonari nungnga dilehon Jahowa petunjuk na jelas marhite Bibel dohot organisasina. Dang adong alasan di hita lao mambahen aturan na baru. (Poda 3:​5-7) Jadi unang ma hita mangulahon lobi sian na tarsurat di Bibel manang mambahen aturan tu akka donganta. Dipakke Sibolis do “akka hata na so marguna” dohot “akka na mangarajai portibi on”, lao mangaliluhon jolma jala mambahen nasida dang marsada. (Kol. 2:8) Di abad na parjolo termasuk ma on ajaran ni jolma, ajaran ni halak Jahudi na so berdasarhon Surat na Badia, dohot ajaran na mandok ikkon diihutton halak Kristen do Patik ni si Musa. Didok do on hata na mangoto-otoi, ala gabe mandao do jolma sian Mual ni bisuk na sittong, i ma Jahowa. Saonari pe dipakke Sibolis do barita dohot media sosial lao paboahon teori konspirasi manang barita na so adong buktina, dohot barita na so sittong na dibahen akka parpolitik. w23.07 16 ¶11-12

Dibahen Jahowa do solusi na terbaik lao pasautton janjina i, nang pe mangalo Sibolis, si Adam, dohot si Hawa. Dipaloas Jahowa do si Adam dohot si Hawa marianakkon jala gabe saut ma hata ni Jahowa. Dang margabus Ibana. Jala sian on dipatudu Jahowa do muse dang adong na boi mangabbati tujuanna i. Dipastihon Jahowa do saut tujuanna i marhite paradehon sada “pinoppar”, na lao paluahon pinoppar ni si Adam dohot si Hawa na setia. (1 Mus. 3:15; 22:18) Pinoppar on ma na mangalehon ngoluna gabe tobusan lao paluahon jolma. Dang hea tarpikkir Sibolis tu solusi na dibahen Jahowa on. Boasa? Alana, holong na so makkarikkotton diri do na mambahen adong tobusan. (Mat. 20:28; Joh. 3:16) Sifat on dang adong di Sibolis, alana holan dirina do na dipikkiri Sibolis. Jadi aha ma na lao terjadi alani tobusan on? Di ujung ni pamarettaon saribu taon, gabe sempurna ma pinoppar ni si Adam dohot si Hawa na setia. Nasida ma na mangingani tano on. Gabe saut ma tujuan naung didok Jahowa. w23.11 6 ¶17

Taoloi ma patik ni Jahowa taringot mangargai hangoluan dohot mudar. Boasa? Molo di Jahowa, sarupa do mudar i tu hangoluan, jala silehon-lehon ni Jahowa na massai arga do hangoluan di hita. (3 Mus. 17:14) Tikki parjolo sahali diloas Jahowa jolma boi mangallang jagal, diorai Ibana do nasida mangallang mudar ni binatang i. (1 Mus. 9:4) Diulangi Jahowa do muse paretta on di Patik ni si Musa tu halak Israel. (3 Mus. 17:10) Jala di abad na parjolo, diarahon Ibana do punguan na mangaradoti organisasi lao mangalehon petunjuk tu sude halak Kristen asa ‘padaohon diri sian mudar’. (Ul. 15:​28, 29) Jadi ikkon togu do hita mangoloi patik on tikki naeng mambahen keputusan taringot perawatan kesehatan. Taihutton ma muse standar moral ni Jahowa na timbo. Dilehon si Paulus do nasehat tu hita asa ‘pamatehon’ giot-giot ni dagingta na sala. Lapatanna, ikkon tegas do hita jala berupaya mambolokkon keinginan na sala. Unang ma taida manang taulahon akka na mambahen hita gabe mangulahon seks na so patut. w23.07 15 ¶5-6

Mulak-ulak do mangelek-elek si Delila tu si Simson asa dipaboa si Simson aha na mambahen ibana margogo. Ala massai holong roha ni si Simson tu si Delila, gabe dioloi ibana ma pangidoanna i. Ujungna gabe mago ma gogo ni si Simson i, jala gabe ditadikkon Jahowa ma ibana. (Pangh. 16:​16-20) Susa do dihilala si Simson ala upporsea ibana tu si Delila sian tu Jahowa. Ujungna ditakkup halak Palistim ma ibana jala dipulsikkon ma matana. Dipenjarahon ma ibana di Gasa jala dibahen ma ibana gabe panggiling ni gandum. Dung i, dipaila do muse ibana tikki marpesta halak Palistim. Dilehon nasida do godang pelean tu Dagon, i ma debata ni nasida, ala nungnga dipasahat si Simson tu nasida. Diboan nasida ma si Simson sian penjara asa “diparekkeli” ibana.—Pangh. 16:​21-25. w23.09 5-6 ¶13-14

Olo do ra dongan sakarejo manang dongan sasikkolatta manukkun hita taringot boasa hita mangihutton standar moral ni Bibel. Berupaya do hita lao patorakkon boasa pos rohatta standar ni Bibel i do na terbaik. Alai tikki patorakkon i, ikkon taargai do pandapot ni nasida. (1 Ptr. 3:15) Jadi molo adong halak na mandokkon songon i tu hita, unang ma tarippu na kritis do nasida tu hita. Gariada sian sukkun-sukkunna i, gabe taboto ma aha na dipikkirhon nasida. Jadi manang aha pe alasan ni nasida manukkun songon i, lambok jala denggan ma hita mangalusi nasida. Olo do ra sian alusta i, gabe dipikkiri nasida muse taringot pandapot ni nasida i. Molo adong dongan sakarejotta na manukkun boasa dang tarayahon ari ulang tahun, pikkirhon ma on: Boasa disukkun ibana songon i? Na didok rohana do dang boi Saksi Jahowa marlas ni roha? Tapatudu ma na taargai do dongan sakarejotta i. Bisa jadi ala na parduli do ibana tu hita umbahen disukkun ibana songon i. Boi ma i gabe dalan di hita lao mambahas dohot ibana aha na dipaboa Bibel taringot ari ulang tahun. w23.09 17 ¶10-11

Sada hasangapon do di hita mangalehon tikkitta lao marbarita tu sude halak. Dijujui Apostel Petrus do hita asa “sai mangingot” haroro ni ari ni Jahowa. (2 Ptr. 3:​11, 12) Carana, tarimangi ma ganup ari akka pasu-pasu na lao jalootta di tano na imbaru. Bayakkon ma dirimuna boi manghirup udara na ias, mangallang sipanganon na sehat, jala pajuppang muse dohot akka halak na dihaholongi hamu naung dipahehe. Asing ni i, bayakkon ma lao dipahehe do annon akka halak na mate marratus taon naung salpu, jala diajari hamu ma nasida taringot akka surirang di Bibel naung saut. Molo dibayakkon hamu on, boi do i mangurupi hamu asa sabar paimahon ari ni Jahowa, jala paposson rohamuna nungnga jonok be tikkina. Molo ‘nungnga taboto’ songon dia masa depanta, gabe dang dililuhon ajaran na so sittong be hita. w23.09 27 ¶5-6

Godang do na poso saonari na so “mangoloi natorasna”. (2 Tim. 3:​1, 2) Boasa songon i? Adong na makkilala dang sadalan pangalaho ni natua-tuana tu na diajarhon nasida. Na asing mandok, nasehat ni natua-tuana nungnga ketinggalan jaman manang pakakuhu. Hamu akka na poso, hea do hamu makkilala songon i? Maol do ra dihilala hamu mangulahon paretta ni Jahowa songon na didok di ayat sadari on. Alai aha do na boi mangurupi hamu mangulahon i? Boi do hamu marsiajar sian Jesus. Ibana do teladan na dumenggan taringot patuduhon unduk ni roha. (1 Ptr. 2:​21-24) Jolma na sempurna do Jesus, alai dang sempurna natua-tuana. Hea do nasida mambahen kesalahan jala dang diattusi nasida situasi ni Jesus. Nang pe songon i, tetap do dihormati Jesus nasida. w23.10 7 ¶4-5

Didok Apostel Paulus, dang boi pelean na dipaboa di Patik ni si Musa manesa dosa ni sude halak. I do alana ‘dang dipakke be’ Patik ni si Musa. Jadi diajarhon si Paulus ma piga-piga parbinotoan na bagas sian Hata ni Debata. Jala dipaingot ibana do sude halak Kristen taringot “janji na dumenggan”, i ma marhite tobusan ni Jesus na boi mangurupi nasida “jonok tu Debata”. (Heb. 7:19) Dipaboa si Paulus do tu halak Kristen Heber i, boasa undenggan cara ni nasida manomba Debata sian cara ni nasida tikki maragama Jahudi hinan. Didok ibana, Patik na diihutton halak Jahudi najolo holan “gombaran tu akka na lao masa do i sude, alai Kristus i do anggo na sasittongna”. (Kol. 2:17) Jadi holan gombaran do cara ni halak Jahudi manomba Debata, alana lao adong ma cara na undenggan sian i. Porlu do taattusi pengaturan na dibahen Jahowa lao manesa dosatta asa boi hita manomba Ibana songon na dihalomohon rohana. w23.10 25 ¶4-5

Dipaboa do di Daniel bindu 11 taringot dua raja manang dua pamarettaon na bersaing. Molo tabandingkon surirang on dohot surirang ni Bibel na asing, boi ma taboto molo saonari “raja utara”, i ma Rusia dohot negara na mendukung ibana. Jala “raja selatan”, i ma kuasa dunia Anglo-Amerika. Dianiaya “raja utara” do naposo ni Debata na tinggal di daerah na dikuasai nasida. Adong do donganta na dipukkuli jala dipenjarahon alani haporseaon ni nasida. Nang pe songon i, dang gabe mabiar akka donganta na disi. Gariada gabe lam togu do haporseaon ni nasida tu Jahowa dohot tu Bibel. Alana diboto nasida do penganiayaan i mambuktihon tutu do surirang ni si Daniel i. (Dan. 11:41) Dung taboto on, gabe lam togu do haporseaotta jala toktong setia tu Jahowa. w23.08 11 ¶15-16

Dipatudos Jahowa do hita songon anak ni matana. Bagian na sensitif jala na massai penting do mata. Molo lungun rohatta, Jahowa pe lungun do rohana. Hira na didok Jahowa ma songon on, ‘Manang ise na mambahen na jahat tu hamu naposokku, hira na mambahen na jahat do tong i tu Au!’ Ala massai holong roha ni Jahowa tu hita, diattusi Ibana do songon dia perasaanta. Jala lomo do rohana manjaga hita. Ala taboto songon i balga ni holong ni Jahowa tu hita, gabe pos ma rohatta mandok di tangiangta, “Jaga ma au songon na manjaga anak ni matamu.” (Ps. 17:8) Lomo do roha ni Jahowa asa porsea hita na holong do rohana tu hita. Alai diboto Ibana boi do ragu hita tu holongna i. Olo do ra alani sitaonon na hea taadopi, manang alani sitaononta saonari. Aha do na boi mangurupi hita asa porsea na holong do roha ni Jahowa tu hita? Rimangi ma holong na dipatudu Jahowa tu Jesus, tu akka na miniahan, dohot tu hita sude. w24.01 27-28 ¶6-7

Nungnga dihilala si Esra songon dia Jahowa mangurupi naposona tikki mangadopi tantangan. Piga-piga taon sebelumna, i ma di taon 484 SM, dibahen Raja Ahasweros ma paretta asa dipamate sude halak Jahudi na di luat Persia. Di tikki i, nungnga di Babel si Esra tinggal. (Est. 3:​7, 13-15) Pasti terancam do ngoluna di tikki i. Gabe marpuasa, tangis jala mangandungi ma halak Jahudi “di sude provinsi” mangido bantuan sian Jahowa. (Est. 4:3) Bayakkon ma, songon dia lungun ni roha ni si Esra dohot halak Jahudi tikki direncanahon naeng dipamate nasida sude. (Est. 9:​1, 2) Alani pengalaman ni si Esra tikki i, gabe pos ma rohana lao mangadopi tantangan di ari na naeng ro. Jala lam pos ma roha ni si Esra na boi do Jahowa mangalinggomi sude naposona. w23.11 17 ¶12-13

Na dimaksud si Paulus di ayat on, i ma mangulahon Patik ni si Musa na dilehon tu halak Israel tikki di Dolok Sinai. (Rom 3:​21, 28) Olo do ra di jaman ni si Paulus adong piga-piga halak Kristen Jahudi na mandok, ikkon torus do diihutton nasida Patik ni si Musa. Alani i, dipakke si Paulus ma si Abraham gabe contoh lao patuduhon dang porlu be sasahalak mandalatton patik asa boi mambahen las roha ni Debata. Gariada, ikkon marhaporseaon do nasida tu Debata. Gabe dipatogu do rohatta mamboto on. Alana molo porsea hita tu Debata dohot tu Kristus, boi ma tabahen las roha ni Debata. Asing do lapatan ni hata “parniulaon” na dipaboa di Jakobus bindu 2 sian na dipaboa si Paulus nakkin. Na dimaksud si Jakobus disi, dang taringot “mangulahon patik”, alai maksudna sude parniulaotta siganup ari. (Jak. 2:24) Sian parniulaotta i ma tarida na togu do haporseaotta tu Debata manang na dang. w23.12 3 ¶8; 4-5 ¶10-11

Molo naeng menikah hamu, ikkon manat do hamu mamillit ise na lao gabe suamimuna. Molo nga menikah hamu, ikkon unduk do hamu tu suamimuna. (Rom 7:2; Eps. 5:​23, 33) Jadi tikki naeng mamillit ise na lao gabe suamimuna, rimangi ma sukkun-sukkun on: ‘Togu do haporseaonna tu Jahowa? Melayani Jahowa do na uppetting di ngoluna? Marbisuk do ibana mambahen keputusan? Olo do ibana mangakkui kesalahanna? Diargai ibana do akka borua? Boi do ibana mangurupi au asa jonok tu Debata? Boi do ibana paradehon kebutuhanku? Boi do ibana gabe ale-alekku? Molo naeng dapotmuna suami na burju, hamu pe ikkon paradehon diri do asa gabe istri na burju. Istri na burju boi do gabe “dongan” jala rade “mangurupi” suamina. (1 Mus. 2:18) Molo holong roha ni sahalak istri tu Jahowa, pasti marsitutu do ibana manjaga reputasi ni suamina. (Poda 31:​11, 12; 1 Tim. 3:11) Alani i, sian saonari parade hamu ma dirimuna. Patogu ma hubunganmuna tu Jahowa jala rade ma hamu mangurupi anggota keluargamuna dohot akka dongan di huria. w23.12 22-23 ¶18-19

Marjanji do Jahowa mangalehon bisuk na tahaporluhon lao mambahen keputusan na denggan. Khususna porlu do di hita bisuk na sian Debata tikki mambahen keputusan na berpengaruh tu ngolutta. Dilehon Jahowa do muse gogo tu hita asa boi martahan di situasi na maol, songon naung dibahen Ibana tu Apostel Paulus. (Plp. 4:13) Sada cara ni Jahowa patoguhon hita, dipakke Ibana do akka dongan sahaporseaon. Di borngin andorang so mate Jesus, marsitutu do ibana martangiang. Dipangido ibana ma tu Jahowa asa unang dianggap halak ibana mate alani mangaleai goar ni Jahowa. Jadi diutus Jahowa ma sada suru-suruanna lao patoguhon Jesus. (Luk. 22:​42, 43) Bisa jadi Jahowa patoguhon hita marhite akka dongan sahaporseaon na manelepon manang mangunjungi hita. Takkas ma, sude do hita boi mangalului kesempatan lao mandok “akka hata na denggan” tu dongan sahaporseaon.—Poda 12:25. w23.05 10-11 ¶9-11

Olo do mabiar akka dongan na so aktif tu pandangan ni akka dongan taringot nasida. Jadi unang ma tasukkun manang tadok hata na mambahen haccit roha ni nasida manang na mambahen maila nasida. Alana dongan sahaporseaotta do nasida. Gariada las do rohatta ala boi muse manomba Jahowa rap dohot nasida! (Ps. 119:176; Ul. 20:35) Sada hasangapon do di hita boi mangulahon paretta ni Jesus lao pabadiahon ari hamamatena. Jala nungnga taboto be boasa massai penting acara on. Tikki ro hita tu acara on, godang do manfaatna tu hita dohot tu halak na asing. (Jes. 48:​17, 18) Misalna gabe lam bagas ma holongta tu Jahowa dohot tu Jesus. Boi ma tapatudu na taargai do sude pengorbanan na dibahen nasida tu hita. Asing ni i, gabe lam kompak ma hita dohot akka dongan sahaporseaon. Jala boi ma taurupi halak na asing mandapot manfaat sian tobusan ni Jesus. Alani i, berupaya ma hita sian nasa tolapta asa rade tu acara na massai penting di taon on, i ma Borngin Parningotan! w24.01 14 ¶18-19

Marhite Bibel ditogu-togu Jahowa do hita. Alai dipakke Ibana do tong akka jolma lao manogu-nogu hita. Contohna dipillit Ibana do “naposo haposan jala na marbisuk”. Diparade nasida do akka petunjuk, sijahaon, dohot video na boi mangurupi hita mambahen keputusan na denggan. (Mat. 24:45) Dipakke Jahowa do tong akka bawa na boi diandalhon lao manogu-nogu hita. Contohna akka pengawas wilayah dohot akka sintua. Dipatogu nasida do hita jala dilehon nasida do petunjuk tikki maol situasitta. Mandok mauliate do hita tu Jahowa ala ditogu-togu hita saleleng ari parpudi on. Gabe diurupi do hita asa boi toktong marale-ale tu Ibana jala marlas ni roha sahat tu salelengna. Olo do sipata maol hita mangihutton petunjuk ni Jahowa, tarlumobi molo akka bawa na so sempurna na mangalehon petunjuk i. Alai di tikki sisongon i ma ikkon pos rohatta, Jahowa do na manogu-nogu naposona. Jala molo taihutton petunjukna, parohon manfaat do i tu hita. w24.02 20 ¶2-3

Asa lam tamba holongta tu Jahowa, i ma ringgas mamparsiajari Bibel. Tikki dijaha hamu Bibel, rimangi ma aha na diajarhon ayat i taringot Jahowa. Sukkun ma dirimuna, ‘Sian na hujaha on, aha do buktina na dihaholongi Jahowa do au? Sifat ni Jahowa na dia ma na huparsiajari sian on, na mambahen au lam makkaholongi Ibana?’ Cara na asing asa lam tamba holongta tu Jahowa, i ma martangiang ganup ari paboahon sude perasaanta tu Ibana. (Ps. 25:​4, 5) Olo do Jahowa mangalusi tangiangta. (1 Joh. 3:​21, 22) Asing ni i, ikkon tapatogu do holongta tu akka dongan. Saleleng pardalanan utusan injil ni si Paulus, pajuppang ma ibana dohot sahalak bawa na poso na margoar si Timoteus. Burju do si Timoteus. Holong do rohana tu Jahowa dohot tu akka halak. Didok si Paulus do tu halak Kristen na di Pilippi, “Dang adong na songon [si Timoteus] burjuna, na sian ias ni roha mamparrohahon hamu.” (Plp. 2:20) Takkas do diida si Paulus na massai holong do roha ni si Timoteus tu akka dongan sahaporseaon. Pasti tarpaima do akka huria tu kunjungan ni si Timoteus.—1 Kor. 4:17. w23.07 9 ¶7-10

Andorang so masuk halak Israel tu Tano na Dijanjihon, nungnga mate si Musa. Alai, gabe dipasombu Jahowa do naposona? Daong. Molo setia nasida tu Jahowa, toktong do dijaga Jahowa nasida. Andorang so mate si Musa, disuru Jahowa do ibana asa mangalantik si Josua gabe pamimpin ni bangsona. Nungnga dilatik si Musa ibana saleleng martaon-taon. (2 Mus. 33:11; 5 Mus. 34:9) Asing ni i, godang do akka bawa na malo na dipillit gabe pamimpin ni na sasaribu, pamimpin ni na sasaratus, pamimpin ni na lima pulu, dohot pamimpin ni sappulu halak. (5 Mus. 1:15) Toktong do denggan dijaga naposo ni Jahowa. Contoh na asing, i ma si Elia. Marsitutu do ibana saleleng martaon-taon mangurupi halak Israel lao manomba Jahowa. Alai sada tikki ditugasson Jahowa ma ibana tu Juda. (2 Raj. 2:1; 2 Kron. 21:12) Gabe songon dia ma bangso Israel na sappulu marga? Gabe dipasombu Jahowa do nasida? Daong. Alana nungnga dilatik si Elia si Elisa saleleng martaon-taon. Jadi toktong do dipasaut Jahowa tujuanna lao manjaga naposona na setia. w24.02 5 ¶12

Diulahon halak Kristen di Epesus do Hata ni Debata, jala gabe songon lampu do i na manogu-nogu nasida. (Ps. 119:105) Dang diulahon nasida be seks na so patut dohot akka ulaon na diajarhon agama na so sittong. Ditiru nasida do Jahowa, marsitutu do nasida manomba jala mambahen las rohana. (Eps. 5:1) Sarupa do hita songon halak Kristen di Epesus. Andorang so mamboto hasittongan, hira di haholomon do hita. Hea do hita mangarayahon perayaan ni agama na so sittong manang mangulahon seks na so patut. Alai dung taparsiajari standar ni Jahowa taringot na sittong dohot na sala, tabahen do perubahan di ngolutta. Mulai ma hita mangulahon paretta ni Jahowa, jala godang do manfaat na tahilala di ngolutta. (Jes. 48:17) Alai nang pe nungnga kaluar hita sian haholomon, dang sai mura toktong ‘marpangalaho songon akka anak ni na tiur i’. w24.03 21-22 ¶6-7

Olo do didok rohamuna dang rade dope hamu lao mangalehon ngolumuna tu Jahowa jala tardidi. Olo do ra ikkon dibahen hamu dope perubahan asa boi mangihutton sude paretta ni Jahowa. Manang porlu dope di hamu tikki lao patoguhon haporseaonmuna. (Kol. 2:​6, 7) Memang dang sai sarupa tikki na dihaporluhon ganup parsiajar Bibel lao mambahen kemajuan. Jala dang sai sarupa umur ni akka na poso tikki mangalehon ngolu ni nasida tu Jahowa jala tardidi. Alani i pikkirhon ma aha dope na porlu dipadenggan hamu, ulahon ma i, jala unang ma bandingkon dirimuna tu halak na asing. (Gal. 6:​4, 5) Nang pe saonari dang rade dope hamu mangalehon ngolumuna tu Jahowa, alai tetap ma bahen hamu i gabe cita-citamuna. Tangiakkon ma asa dipasu-pasu Jahowa upayamuna lao mambahen perubahan. (Plp. 2:13) Jala pos ma rohamuna tangihonon ni Jahowa do tangiangmuna jala urupanna do hamu.—1 Joh. 5:14. w24.03 5 ¶9-10

Sada tikki, hea do marsak si Sara. Dipaboa si Sara do tu si Abraham na massai jut rohana, bahkan disalahon si Sara do si Abraham alani masalah i. Diboto si Abraham istri na burju do si Sara, jala rade do si Sara mendukung keputusanna. Ditangihon ibana do si Sara jala berupaya do ibana pasaehon masalah i. (1 Mus. 16:​5, 6) Aha do na boi taparsiajari sian on? Hamu akka suami, tanggung jawabmuna do mambahen keputusan tu keluargamuna. (1 Kor. 11:3) Alai molo holong rohamuna tu istrimuna, pasti olo do hamu denggan manangihon jala mempertimbangkon pandapot ni istrimuna sebelum mambahen keputusan, tarlumobi molo berpengaruh keputusan i tu ibana. (1 Kor. 13:​4, 5) Asing ni i, hea do si Abraham mamutusson lao menjamu tamu na ro di na so panagaman ni nasida. Dipangido si Abraham do si Sara asa so sian ulaonna jala paradehon godang sipanganon tu tamuna i. (1 Mus. 18:6) Pittor diulahon si Sara ma i jala rade do ibana mendukung keputusan ni si Abraham. Hamu akka istri, tiru hamu ma si Sara. Dukung ma keputusan na dibahen suamimuna. Molo diulahon hamu i, gabe lam togu ma perkawinanmuna.—1 Ptr. 3:​5, 6. w23.05 24-25 ¶16-17

Dung ditugasson si Gidion lao mamimpin bangso Israel, ikkon barani do ibana jala unduk. Disuru do muse ibana lao mangaruppakkon langgatan ni Baal appuna ni bapakna. Tugas na berbahaya do i. (Pangh. 6:​25, 26) Belakangan dung dipapungu ibana akka tentarana, disuru do ibana sappe dua hali lao mangorui godang ni tentarana i. (Pangh. 7:​2-7) Dang holan i, disuru do muse ibana menyerang perkemahan ni musu di tonga borngin. (Pangh. 7:​9-11) Akka sintua ikkon rade do “mangoloi”. Ikkon rade do sahalak sintua mangihutton na didok Bibel dohot petunjuk sian organisasi. Molo dibahen nasida songon i, gabe sitiruon ma nasida tu na asing. Olo do diuji unduk ni rohana tu Jahowa. Uppamana, olo do dilehon tu ibana godang petunjuk manang hatop muba akka petunjuk i. Alani i gabe maol do ibana menerappon akka petunjuk i. Jala sipata, olo do sukkun-sukkun rohana cocok dope petunjuk on manang na daong. Bisa jadi dilehon do muse tugas na boi mambahen ibana dipenjarahon. Di akka situasi i, songon dia do akka sintua boi maniru si Gidion? Denggan ma tangihon petunjuk jala ulahon ma i. w23.06 4-5 ¶9-11