April

Akka naposo ni Jahowa na disurat di Bibel mangadopi sitaonon na so tarduga. Contohna si Jakkob. Disuru bapakna do ibana lao mambuat istri sian boru ni si Laban, keluargana na manomba Debata. Jala dipapos bapakna do si Jakkob pasti pasu-pasuon ni Jahowa do ibana. (1 Mus. 28:​1-4) Jadi diulahon si Jakkob ma i. Borhat ma ibana sian tano Kanaan lao tu huta ni si Laban. Adong dua boru ni si Laban, i ma si Lea dohot si Rahel. Holong do roha ni si Jakkob tu si Rahel boru ni si Laban na upposo. Jala setuju do ibana karejo pitu taon tu si Laban asa boi si Rahel gabe istrina. (1 Mus. 29:18) Alai dang mardalan rencana i songon na diharappon si Jakkob. Ditipu si Laban do ibana, dilehon si Laban do si Lea gabe istri ni si Jakkob. Memang saminggu dukkon i, dilehon ibana do si Rahel gabe istri ni si Jakkob. Alai ikkon karejo do muse si Jakkob tu si Laban pitu taon nai. (1 Mus. 29:​25-27) Saleleng 20 taon si Jakkob karejo tu si Laban, dang denggan pambahenanna tu si Jakkob.—1 Mus. 31:​41, 42. w23.04 15 ¶5

Tikki porlu hita diapuli manang mangido petunjuk, tu ise do tapangido i? Takkas do taboto alusna. Boi do hita martangiang tu Debata Jahowa jala i do na dipangido Jahowa asa taulahon. Lomo do rohana asa ‘torus hita martangiang’ tu Ibana. (1 Tes. 5:17) Boi do hita martangiang tu Ibana manang sadihari pe mangido petunjukna di sude parngoluotta. (Poda 3:​5, 6) Debata na burju do Jahowa, dang dibatasi Ibana sadia jotjot hita boi martangiang tu Ibana. Takkas do diboto Jesus na massai arga do tangiangta di Jahowa. Sebelum ro ibana tu portibi on, diida Jesus do songon dia Bapakna mangalusi tangiang ni bawa dohot borua na setia. Misalna di labbung ni Bapakna do Jesus tikki dialusi Jahowa tangiang ni si Hanna, si Daud, si Elia, dohot akka tangiang ni naposona na setia. (1 Sam. 1:​10, 11, 20; 1 Raj. 19:​4-6; Ps. 32:5) Jadi dang heran be hita boasa diajari Jesus akka siseanna asa jotjot martangiang!—Mat. 7:​7-11. w23.05 2 ¶1, 3

Dihabiari Sintua ni Malim Jehoyada do Jahowa. Tarida do i tikki berupaya si Atalia, boru ni si Izebel merebut tahta harajaon di Juda. Halak na kejam jala ambisius do ibana. Ala lomo hian rohana gabe ratu, berupaya do ibana pamatehon akka pahoppuna! (2 Kron. 22:​10, 11) Alai adong sada pahoppuna, i ma si Jehoas na diselamatton si Jehoyada dohot istrina si Jehoseba. Ditabunihon nasida do dakdanak i jala dipagodang-godang. Alani i, gabe torus ma adong pewaris tahta harajaon sian pinoppar ni si Daud. Nang pe nungnga matua, setia do si Jehoyada tu Jahowa jala dang mabiar tu si Atalia. Tikki marumur pitu taon si Jehoas, dipatudu si Jehoyada do muse kesetiaanna tu Jahowa. Dibahen ibana ma rencana lao melantik si Jehoas gabe raja, ala ibana do pewaris tahta ni si Daud na sah. Molo gagal rencanana i, boi do dipamate si Jehoyada. Alai alani pasu-pasu ni Jahowa, marhasil do rencanana i. w23.06 17 ¶12-13

Olo do ra dianggap Raja Nebukadnesar si Daniel halak na mangalo jala boi do dipamate ibana ala dipaboa lapatan ni nipi ni raja i. Alai barani do si Daniel pasahatton i. Aha do na mangurupi si Daniel asa boi barani saleleng ngoluna? Tikki poso si Daniel, pasti marsiajar do ibana sian teladan ni omak dohot bapakna. (5 Mus. 6:​6-9) Dang holan ajaran dasar ni Patik na diboto si Daniel, songon Sappulu Patik. Alai diboto ibana do muse godang hatorangan taringot patik i, misalna taringot aha na boi dohot na so boi diallang halak Israel. (3 Mus. 11:​4-8; Dan. 1:​8, 11-13) Diparsiajari ibana do muse sejarah ni naposo ni Debata jala diboto ibana do aha na masa tu nasida tikki dang diihutton nasida standar ni Jahowa. (Dan. 9:​10, 11) Pengalaman ni si Daniel saleleng ngoluna mambahen pos rohana pasti sanggup do Jahowa dohot suru-suruanna mangurupi ibana.—Dan. 2:​19-24; 10:​12, 18, 19. w23.08 3 ¶5-6

Sahalak borua na barani do si Rebekka, jala sai dibahen ibana do keputusan na marbisuk saleleng ngoluna. (1 Mus. 24:58; 27:​5-17) Alai nang pe songon i, rade do ibana mangihutton petunjuk. (1 Mus. 24:​17, 18, 65) Hamu akka borua na poso, tiru hamu ma si Rebekka. Serep ma rohamuna jala unduk ma hamu tu akka bawa na martanggung jawab di keluarga dohot di huria. Molo diulahon hamu songon i, gabe sitiruon ma hamu. Massai penting do serep ni roha di sude halak Kristen. Parrohahon ma contoh ni si Ester, sahalak borua na serep marroha na disurat di Bibel. Nang pe gabe ratu ibana alai dang gabe ginjang rohana. Ditangihon ibana do nasehat sian si Mordahai jala diihutton ibana do i. (Est. 2:​10, 20, 22) Hamu pe boi do songon si Ester. Pangido hamu ma nasehat sian halak na asing jala ulahon hamu ma i. (Tit. 2:​3-5) Dipatudu si Ester do serep ni roha marhite cara na asing. Nang pe bagak ibana jala uli rupana, alai dang lomo rohana asa holan ibana na diparrohahon akka halak.—Est. 2:​7, 15. w23.12 19-20 ¶6-8

Dang lomo roha ni Jahowa molo torus hita merasa bersalah. Pos ma rohatta molo nungnga taakkui dosatta, bertobat, jala berupaya dang mangulangi kesalahan i, disalpuhon Jahowa do dosatta. (Ul. 3:19) Diboto Jahowa boi do gabe susa hita molo sai torus hita merasa bersalah. (Ps. 31:10) Molo sai lungun rohatta, ujungna gabe menyerah do hita di parlumbaan tu hangoluan. (2 Kor. 2:7) Molo sai torus do hamu merasa bersalah, sai ingot ma na olo do Jahowa manesa dosamuna. (Ps. 130:4) Tikki disalpuhon Jahowa dosa ni halak na bertobat sian ias ni rohana, didok Ibana do, “Dang ingotokku be akka dosa ni nasida.” (Jer. 31:34) Maksudna, dang sai diingot Jahowa be dosamuna i. Unang ma sai diuhumi hamu dirimuna molo dicabut tanggung jawabmuna di huria. Molo Jahowa sandiri dang mangingot-ingot dosamuna, hamu pe ikkon songon i ma. w23.08 30-31 ¶14-15

Saleleng pandemi COVID-19, ditangihon Saksi Jahowa do petunjuk sian organisasi. Gabe dang marsak nasida songon na dihilala akka halak na porsea tu barita na so sittong. (Mat. 24:45) Ikkon torus do hita fokus tu “na urrikkot”. (Plp. 1:​9, 10) Molo dang fokus hita, boi do gabe habis tikki dohot gogotta alani ulaon siganup ari songon mangan, minum, rekreasi, dohot karejo. Boi do gabe i na uppetting di ngolutta. (Luk. 21:​34, 35) Asing ni i, ganup ari godang do tabege manang tajaha akka barita taringot masalah sosial dohot politik. Molo holan tusi fokusta, boi do gabe marpihak hita tu nasida di bagasan roha dohot pikkiranta. Dipakke Sibolis do sude cara i lao mambahen gale tekadta mangulahon na sittong. w23.07 16-17 ¶12-13

Di ganup taon, dirayahon naposo ni Jahowa do Borngin Parningotan hamamate ni Jesus. Massai penting do acara on di nasida, alana holan acara on ma na hea diparettahon Jesus asa diulahon akka siseanna. (Luk. 22:​19, 20) Dipaingot do tong hita carana mangargai pengorbanan na dibahen Jesus tu hita. (2 Kor. 5:​14, 15) Asing ni i, di acara on boi ma hita “masipatoguan” dohot akka dongan. (Rom 1:12) Godang do muse na olo marsiajar Bibel ala ro tu Borngin Parningotan i. Asing ni i, gabe marsada do hita dohot akka donganta di liat portibi on alani acara Borngin Parningotan i. Alani i ma massai penting do acara on di hita! w24.01 8 ¶1-3

Molo jotjot tarimangi balga ni pengorbanan na dibahen Jahowa dohot Jesus tu hita, gabe taattusi ma na massai balga do holong ni nasida tu hita ganup marsada-sada. (Gal. 2:20) Tobusan i patuduhon na holong do roha ni Jahowa tu hita. Rela do Jahowa mangida Anak hasianna gabe susa jala mate lao humokkop hita. Dipaboa Jahowa do na massai holong rohana tu hita. (Jer. 31:3) Ala holong rohana tu hita, dipillit Ibana do hita gabe naposona. (Bandingkon tu 5 Musa 7:​7, 8.) Jadi dang adong na boi manirang hita sian holong ni Debata. (Rom 8:​38, 39) Boha do perasaanmuna dung mamboto on? w24.01 28 ¶10-11

Massai arga do janji ni Debata i tu halak Kristen na miniahan. Sahalak donganta na miniahan na margoar si Frederick Franz mandok, “Pos do rohanami na lao jaloonnami do janji ni Debata i. Jala dang adong sian hami si 144.000 i na so manjalo janji i. Dang adong be na ummarga sian i.” Didok ibana ma muse, “Tetap do arga di hami janji ni Debata i. . . . Lam leleng i dipaima hami, lam arga do i di hami. Olo do hami paimahon i. . . . Molo di au, lam leleng au paimahon, lam arga do janji ni Debata i di au.” Pos do rohatta na lao mangolu salelengna do hita, dang soal naeng mangolu salelengna di surgo manang di tano on. Ala adong janji ni Debata na tapaima-ima, on ma na mambahen hita marlas ni roha. Jala boi do lam tamba pos ni rohatta tu janji ni Debata sian tikki tu tikki. w23.12 9 ¶6; 10 ¶8

Adong do langgatan inganan manutung pelean di jolo ni pintu tabernakel. (2 Mus. 27:​1, 2; 40:29) Alai dang boi akka pelean i manesa dosa ni jolma saleleng ni lelengna. (Heb. 10:​1-3) Akka binatang na torus dipelehon i holan gombaran do i tu sada pelean na boi manesa dosa ni jolma saleleng ni lelengna. Diboto Jesus do na disuru Jahowa ibana tu tano on asa mangalehon ngoluna gabe tobusan tu sude jolma. (Mat. 20:28) Alani i, tikki tardidi Jesus dilehon ibana do ngoluna lao mangulahon lomo ni roha ni Jahowa. (Joh. 6:38; Gal. 1:4) Holan “sahali ro di saleleng ni lelengna” do dilehon Jesus ngoluna. Tobusan ni Jesus i boi do manesa dosa ni sude jolma na porsea tu ibana saleleng ni lelengna.—Heb. 10:​5-7, 10. w23.10 26-27 ¶10-11

Sasittongna, dang adong sian hita na boi paluahon ngolutta sandiri. (Ps. 49:​7, 8) Alani i, disuru Jahowa ma Jesus mangalehon ngoluna lao paluahon hita. Jadi balga do pengorbanan na dibahen Jahowa dohot Jesus humokkop hita. Molo tapikkirhon on sude, pasti lam taargai ma tobusan i. Taingot ma na masa tu jolma na parjolo. Sempurna do ditoppa si Adam, jala boi do ibana mangolu saleleng ni lelengna. Alai ala mardosa ibana gabe dang boi be ibana mangolu salelengna, songon i nang akka pinopparna. Asa boi mangolu salelengna akka pinopparna, ikkon adong ma jolma na sempurna dos songon si Adam na boi gabe tobusan. Holan Jesus ma na cocok gabe tobusan. Alana tikki di tano on Jesus, “dang mardosa ibana jala dang hea ibana margabus”. (1 Ptr. 2:22) Jala sahat tu na mate Jesus, sempurna do ibana dos songon si Adam tikki parjolo sahali ditoppa Debata.—1 Kor. 15:45; 1 Tim. 2:6. w24.01 10 ¶5-6

Dung dipahehe Jesus, masuk ma ibana tu Inganan na Massai Badia di bagas joro na mulia i. Saonari nungnga takkas be taboto undenggan do pengaturan ibadat na sittong marhite tobusan ni Jesus sian pengaturan na diihutton halak Jahudi najolo. Molo sintua ni malim halak Israel, tu Inganan na Massai Badia do ibana masuk mamboan mudar ni binatang pelean. Alai molo Jesus “tu surgo do ibana masuk”, i ma inganan na paling badia sian sude inganan na asing. Tu jolo ni Debata do ibana ro mangalehon ngoluna na sempurna “lao manesa dosa ni jolma”. (Heb. 9:​24-26) Jadi boi do hita sude manomba Debata di bagas jorona na mulia, dang soal hita lao mangolu di tano on manang di surgo. w23.10 28 ¶13-14

Tapikkirhon ma taringot Jesus naung gabe Raja dohot Sintua ni Malim di surgo. Takkas do diattusi ibana perasaanta. Marhite ibana, boi ma tapajonok “diritta tu tahta ni Debata na patuduhon asi ni roha na massai balga” marhite tangiang. Boi ma tapangido asi ni roha dohot bantuan ni Jahowa “di tikki na tahaporluhon”. (Heb. 4:​14, 15) Alani i, porlu do ganup ari tapikkirhon aha naung dibahen Jahowa dohot Jesus, jala aha na dibahen nasida saonari tu hita. Molo tarimangi holong ni nasida, gabe lam semangat ma hita manomba Jahowa. (2 Kor. 5:​14, 15) Sada cara lao patuduhon pangargaion, i ma berupaya mangurupi na asing asa gabe Saksi Jahowa jala gabe sisean ni Jesus. (Mat. 28:​19, 20) On ma na diulahon Apostel Paulus. Diboto ibana do na lomo roha ni Jahowa “asa malua saluhut jolma jala boi mandapot parbinotoan na bagas taringot tu hasittongan i”.—1 Tim. 2:​3, 4. w23.10 22-23 ¶13-14

Godang do sian hita na manjahahon Pangungkapon 21:​3, 4 tikki marbarita lao patuduhon songon dia ngolutta di Paradeiso annon. Songon dia do hita boi paposson roha ni na asing dohot diritta na lao saut do na disurat di ayat on? Dipaboa Jahowa do alasanna boasa boi pos rohatta tu janjina i. Didok do di Bibel, “Dung i didok Ibana na hundul di tahta i ma, ‘Ida ma! Hupaimbaru do saluhutna.’ Didok Ibana muse, ‘Suratton ma on, ai sittong jala boi do dihaporseai akka hata on.’ Didok Ibana ma tu au, ‘Nungnga saut be akka i! Au do Alpa dohot Omega, mulana dohot ujungna.’”—Pgk. 21:​5, 6a. w23.11 3 ¶3-5

Molo manat sahalak bawa na poso marpikkir, boi ma gabe denggan ibana tikki mamillit pakkean dohot manottuhon penampilanna. Alana godangan halak na mambahen model ni pakkean saonari dang mangargai Jahowa. Jala roa do pangalaho ni nasida. Tarida do i sian model ni pakkean na dibahen nasida na paketathu, manang model ni pakkean na mambahen bawa gabe songon boru-boru. Jadi tikki mamillit pakkean, ihutton hamu ma prinsip ni Bibel jala tiru ma akka donganta bawa na gabe sitiruon di huria. Alani i pikkirhon ma on, ‘Sian pakkean dohot penampilanku, tarida do au halak na marbisuk? Huargai do pandangan ni halak na asing? Sian carakku marpakkean, mura do halak mananda na sisomba Jahowa au?’ (1 Kor. 10:​31-33) Molo manat hamu marpikkir, gabe togu ma haporseaonmuna tu Jahowa. Jala gabe diargai akka donganmuna ma hamu, tarlumobi ma Jahowa. w23.12 26 ¶7

Najolo dianiaya “raja selatan” do naposo ni Jahowa. (Dan. 11:40) Saleleng Perang Dunia I dohot Perang Dunia II, godang do akka donganta na dipenjarahon ala netral nasida. Jala piga-piga anak ni Saksi dipakaluar do sian sikkola ala dang olo hormat bendera. Piga-piga taon na parpudi on, diuji do kesetiaan ni naposo ni Jahowa na tinggal di daerah ni “raja selatan” i. Misalna saleleng kampanye pemilihan umum, olo do targoda donganta lao mendukung sada partai politik manang calon sian partai politik i. Memang dang dohot nasida mamillit tikki pemilihan i. Alai, olo do di roha dohot pikkiran ni nasida gabe dohot nasida marpihak. Jadi massai penting do tapastihon na toktong hita netral di roha dohot pikkiranta.—Joh. 15:​18, 19. w23.08 12 ¶17

Ikkon ‘marlojong do hita sian nasa gogotta asa boi monang’ di parlumbaan i. (1 Kor. 9:24) Didok Jesus olo do gabe ‘dirajai sipanganon dohot siinumon na marlobi-lobi hita manang gabe holsoan mamikkiri akka na porlu di ngolutta’. (Luk. 21:34) Ayat on dohot ayat na asing boi mangurupi hita mamboto aha na porlu tapadenggan di ngolutta asa boi toktong marlojong di parlumbaan i. Boi do hita monang di parlumbaan tu hangoluan ala dilehon Jahowa gogo tu hita. (Jes. 40:​29-31) Alani i, unang ma lambat hita marlojong di parlumbaan i! Tatiru ma Apostel Paulus na toktong marlojong lao mandapot upa. (Plp. 3:​13, 14) Nang pe dang boi halak na asing manggattihon hita marlojong, alai diurupi Jahowa do hita asa sahat tu garis finis. Diurupi Jahowa do hita mangulahon tanggung jawabta jala mambolokkon boban na boi mangabbati hita. Pos ma rohatta molo didongani Jahowa hita, boi do hita toktong marlojong di parlumbaan i jala monang! w23.08 31 ¶16-17

Tikki marumur 12 taon Jesus, ditinggalhon natua-tuana do ibana di pardalanan lao mulak sian Jerusalem. (Luk. 2:​46-52) Sasittongna, tanggung jawab ni si Josep dohot si Maria do mamastihon sude gellengna asa rap dohot nasida. Alai dung juppang ni nasida Jesus, disalahon si Maria do ibana ala tinggal dope di Jerusalem. Sasittongna, boi do Jesus makkilala dang adil pambahenan ni natua-tuana i. Alai tikki disukkun Jesus, lambok do ibana mangalusi. Memang dang diattusi si Josep dohot si Maria ‘lapatan ni hata ni Jesus i’. Alai “toktong do dioloi [Jesus] nasida”. Hamu akka na poso, hea do maol dihilala hamu mangoloi natua-tuamuna tarlumobi tikki dibahen nasida hasalaan, manang tikki dang diattusi nasida songon dia perasaanmuna? Molo hea, aha do na porlu diingot hamu? Pikkirhon ma songon dia perasaan ni Jahowa. Didok do di Bibel, oloi hamu ma natua-tuamuna, “ai i do na dihalomohon Debata”. (Kol. 3:20) Sipata, olo do dang diattusi natua-tuamuna songon dia perasaanmuna. Manang olo do dibahen nasida peraturan na so mura dioloi hamu. Diboto Jahowa do i sude. Alai molo tetap do hamu unduk tu nasida, gabe las ma roha ni Jahowa tu hamu. w23.10 7 ¶5-6

Adong do ra dongan sasikkolatta na mandok porlu do diuba Saksi Jahowa pandanganna taringot halak na homoseksual. Molo songon i, porlu do tapapos rohana na taargai do pilihan pribadi ni sasahalak. (1 Ptr. 2:17) Tapaboa ma muse tu ibana aha na didok Bibel taringot i jala aha do manfaatna molo taihutton standar ni Bibel. Tikki adong sasahalak na naeng berdebat dohot hita, unang ma pittor didok rohatta nungnga taboto sude na dihaporseai ibana. Olo do ra adong dongan sasikkolatta na mandok halak na oto do molo porsea tu Debata. Molo didok nasida songon i, unang ma pittor didok rohamuna na porsea nasida tu evolusi jala godang informasi diboto nasida taringot i. Bisa jadi otik dope na diboto nasida taringot i. Boi do ra dikirim hamu link taringot toppaan na adong di situs jw.org. Olo do ra gabe lomo roha ni nasida mambahas artikel manang video na adong disi. Molo dibahen hamu songon i, gabe olo do ra annon nasida mangalului gumodang informasi sian Bibel. w23.09 17 ¶12-13

Pos ma rohatta nang pe hea tabahen kesalahan, alai molo tapadenggan pangalahotta jala taandalhon Jahowa, pasti pasu-pasuonna do hita. (Poda 28:13) Jolma na so sempurna do si Simson. Hea do ibana mambahen keputusan na sala ala holong rohana tu si Delila. Nang pe songon i, toktong do ibana manomba Jahowa. Jala toktong do si Simson dipakke Jahowa lao mangulahon lomo ni rohana. Dang holan i, dipakke Jahowa do si Simson marhite cara na luar biasa. Disuru Jahowa do asa disurat goarna di Bibel. Ibana ma sada sian akka halak na togu haporseaonna na disurat di Heber bindu 11. Dipatogu do rohatta ala taboto Debata na tasomba olo mangalehon gogo tu hita, tarlumobi tikki gale hita. Songon si Simson, tapangido ma tu Jahowa, “Ingot ma au. Bahen ma au gogo.”—Pangh. 16:28. w23.09 7 ¶18-19

Ala taboto satokkin nai nama ro ari ni Jahowa i, tottu lomo do rohatta paboahon barita na uli tu halak na asing. Alai olo do sipata gabe dang saut tapaboa barita na uli i ala mabiar tu jolma. On ma na masa tu si Petrus. Di borngin andorang so mate Jesus, mabiar do si Petrus mangakkui na sisean ni Jesus do ibana. Jala mulak-ulak do ibana mandok dang ditanda ibana Jesus. (Mat. 26:​69-75) Nang pe songon i, marhasil do si Petrus mangatasi biar ni rohana i. Jala di pudian ni ari didok ibana do di suratna, “Unang ma habiari hamu manang aha na mambahen halak mabiar. Jala unang ma ganggu rohamuna.” (1 Ptr. 3:14) Hata ni si Petrus on paposson rohatta na boi do hita mangatasi biar ni rohatta tu jolma. Aha do na boi mangurupi hita mangatasi biar ni rohatta tu jolma? Didok si Petrus, “Pos ma rohamuna Kristus i do Tuan jala badia do ibana.” (1 Ptr. 3:15) Molo mabiar hamu marbarita na uli, rimangi ma huaso ni Jesus Kristus Rajatta dohot akka na diulahon ibana saonari. w23.09 27-28 ¶6-8

Unang ma tatiru “akka pangalaho ni halak na di haholomon”. (Eps. 5:11) Molo lam jotjot hita mangida, mambege, manang makkata-hatai taringot seks na so patut, gabe lam mura ma hita targoda lao mangulahon dosa. (1 Mus. 3:6; Jak. 1:​14, 15) Berupaya do akka halak di portibi on lao mangoto-otoi hita. Lomo do roha ni nasida asa porsea hita dang sala mangulahon seks na so patut. (2 Ptr. 2:19) Sasittongna nungnga leleng dipakke Sibolis cara on lao mangaliluhon akka halak. Tujuanna, asa dang boi nasida mambedahon dia na sittong dohot na sala. (Jes. 5:20; 2 Kor. 4:4) Alani i ma godang do film, acara TV, dohot situs web na patuduhon akka ulaon na maralo tu standar ni Jahowa. Lomo do roha ni Sibolis asa marpikkir hita molo gaya hidup dohot akka ulaon seks na so patut dang ulaon na berbahaya.—Eps. 5:6. w24.03 22 ¶8-10

Songon kemah do tabernakel i, jala boi do diboan halak Israel i tikki marpinda-pinda. Nungnga naeng 500 taon tabernakel i dipakke halak Israel sahat tu na dipajongjong bagas joro di Jerusalem. (2 Mus. 25:​8, 9; 4 Mus. 9:22) Di tabernakel i ma marpungu halak Israel lao mangalehon pelean jala manomba Debata. (2 Mus. 29:​43-46) Alai holan gombaran do tabernakel i lao patuduhon cara na dumenggan manomba Debata. Tabernakel na dibahen di tikki najolo gabe “gombaran do i lao patuduhon akka na di banua ginjang”. Jala i manggombarhon bagas joro ni Jahowa na mulia. Didok si Paulus, “Lao manggombarhon tikki sisaonari on do kemah [manang, tabernakel] i.” (Heb. 9:9) Tikki dibahen si Paulus suratna tu halak Heber, nungnga adong be bagas joro na mulia i. Nungnga adong be bagas joro i sian taon 29 M. Di taon i ma Jesus tardidi jala dipillit Debata marhite tondi parbadia. Jala laos di tikki i ma ibana gabe “sintua ni malim” di bagas joro na mulia i.—Heb. 4:14; Ul. 10:​37, 38. w23.10 25-26 ¶6-7

Ikkon lentuk ma hita asa boi toktong marlas ni roha manomba Jahowa. Songon dia carana? Bersikap masuk akkal ma hita marhite menyesuaihon diri tikki muba situasitta. Molo bersikap masuk akkal hita, boi ma muse taargai pandangan dohot keputusan ni na asing. Ala naposo ni Jahowa hita, lomo do rohatta asa bersikap masuk akkal. Lomo do muse rohatta patuduhon serep ni roha dohot asi ni roha. Didok do Jahowa i “Dolok Batu” alana togu do Ibana jala dang muba-uba. (5 Mus. 32:4) Alai nang pe songon i, masuk akkal do tong Ibana. Nang pe muba-uba situasi di portibi on, alai boi do saut sude lomo ni roha ni Jahowa ala lentuk Ibana. Ditoppa Jahowa do jolma tudos songon Ibana, alani i hita pe boi do menyesuaihon diri tikki muba situasitta. Dilehon Jahowa do muse akka prinsip ni Bibel na boi mangurupi hita mambahen keputusan na marbisuk, dang soal tantangan aha pe na taadopi. Teladan ni Jahowa dohot akka prinsip na dilehon Ibana tu hita gabe bukti nang pe Jahowa “Dolok Batu”, alai boi do Ibana bersikap masuk akkal. w23.07 20 ¶1-3

Di Bibel dipatudos Jahowa do dirina songon sahalak ina na parholong. (Jes. 66:​12, 13) Pasti denggan do sahalak ina tikki mangurus gellengna. Dos songon i ma, tikki marsak hita, pos ma rohatta tu holong ni Jahowa. Sai holong do rohana tu hita nang pe hea taulahon na sala. (Ps. 103:8) Contohna halak Israel najolo. Sai jotjot do dibahen nasida haccit roha ni Jahowa. Alai dung disolsoli nasida hasalaanna i, dipapos Jahowa do roha ni nasida na holong dope rohana tu nasida. Didok Ibana do, “Arga do ho di Au, sangap do ho, jala holong do rohakku tu ho.” (Jes. 43:​4, 5) Sahat tu saonari, dang muba holong ni Jahowa. Nang pe hea taulahon dosa na balga, alai molo bertobat hita jala mulak tu Ibana, boi do tahilala na holong dope rohana tu hita. Marjanji do Jahowa, ‘Rade do Au manesa sude dosamuna.’ (Jes. 55:7) Ala olo Jahowa manesa dosatta, gabe “margogo” ma muse hita.—Ul. 3:19. w24.01 27 ¶4-5

Tikki mangadopi tantangan hita, boi do Jahowa mangurupi hita. Uppamana, ikkon mangido ijin do hita tu bosta asa boi ro tu kebaktian manang asa boi ro marpungu. On gabe kesempatan di hita lao mangida songon dia Jahowa mangurupi hita. Olo do ra longang rohatta mangida cara ni Jahowa mangalusi tangiangta lobi sian na taharappon. Alani i, gabe lam tamba ma pos ni rohatta tu Jahowa. Serep do roha ni si Esra mangido pangurupion sian Jahowa. Tikki dang sanggup dihilala si Esra mangulahon tugasna, serep do rohana mangido bantuan tu Jahowa. (Esr. 8:​21-23; 9:​3-5) Ala mangandalhon Jahowa si Esra, gabe olo ma na asing mangurupi ibana jala maniru haporseaonna. (Esr. 10:​1-4) Dos songon i ma hita, molo holsoan hita alani kebutuhanta siganup ari, manang keamanan ni keluargatta, ikkon marpos ni roha do hita tu Jahowa. Jala tapasahat ma i di tangiangta. w23.11 18 ¶15-17

Dang didok Jahowa, ikkon songon si Abraham hita asa boi didok Debata hita mangulahon na sittong. Alana sasittongna, godang do cara lao patuduhon na porsea hita tu Jahowa. Misalna, tajakkon ma akka halak na parjolo sahali ro tu parpunguan, taurupi ma dongan sahaporseaon na susa, jala tabahen ma na denggan tu keluargatta. Molo taulahon i, pasti las ma roha ni Debata tu hita jala pasu-pasuonna ma hita. (Rom 15:7; 1 Tim. 5:​4, 8; 1 Joh. 3:18) Tapatudu ma muse sian parniulaotta na pos do rohatta pasti saut sude janji ni Jahowa. Jala pos ma rohatta pasti na dumenggan do sude na diulahon Jahowa. Sada cara na massai penting na patuduhon na porsea hita tu Jahowa, i ma molo semangat hita marbarita na uli. (1 Tim. 4:16) Molo taulahon i, pos ma rohatta na boi do hita gabe ale-ale ni Jahowa jala didok Ibana ma hita halak na mangulahon na sittong. w23.12 2 ¶3; 6 ¶15

Andorang so mate, didok Raja Daud do tu si Salomo hata na di ayat sadari on. (1 Raj. 2:​1, 3) Marlakku do poda on tu sude bawa na adong di huria saonari. Asa boi togu haporseaon ni akka bawa na poso, ikkon diparsiajari nasida do Hata ni Debata jala ikkon diulahon do i. (Luk. 2:52) Boasa on massai penting? Godang do tanggung jawab ni akka bawa di keluarga dohot di huria. Hamu akka na poso, pasti nungnga dipikkirhon hamu tanggung jawab na boi diulahon hamu di ari na naeng ro. Contohna boi do hamu gabe perintis, parhobas, jala dukkon i gabe sintua di huria. Manang lomo do ra rohamuna naeng menikah jala marianakkon. (Eps. 6:4; 1 Tim. 3:1) Asa boi diraih hamu cita-citamuna i jala boi hamu mandalatton i, ikkon togu do haporseaonmuna tu Jahowa. w23.12 24 ¶1-2

Dilehon Jahowa do tugas tu akka sintua lao melindungi biru-biruna na massai arga. Las do roha ni akka sintua na setia on mangurupi akka dongan jala berupaya do nasida gabe “parmahan na burju”. (Jer. 23:4; 1 Ptr. 5:2) Pasti mandok mauliate do hita tu akka sintua di huriatta! Boi do akka sintua marsiajar sian teladan ni si Gidion. (Heb. 6:12; 11:32) Sahalak panguhum do ibana jala parmahan ni bangso ni Debata. (Pangh. 2:16; 1 Kron. 17:6) Songon si Gidion, dipillit do akka sintua lao mangurus naposo ni Debata saleleng ari parpudi on. (Ul. 20:28; 2 Tim. 3:1) Boi do akka sintua marsiajar sian si Gidion asa boi patuduhon serep ni roha, unduk ni roha, jala asa unang menyerah tikki mangulahon tugasna. Asing ni i, akka na so sintua pe boi do lam mangargai jala mendukung akka sintua.—Heb. 13:17. w23.06 2 ¶1, 3