Desember

Sanggup do Jahowa pahehehon halak na mate, alana “Debata Pargogo na So Hatudosan” do Ibana. (Pgk. 1:8) Umgogo do Ibana sian sude musuna, termasuk ma i hamatean. (1 Kor. 15:26) Alasan na asing boasa boi pos rohatta na sanggup do Jahowa pahehehon halak na mate, i ma ala dang terbatas ingatanna. Boi do dijou Ibana goar ni akka bintang sada-sada. (Jes. 40:26) Asing ni i, diingot Ibana do akka halak naung mate. (Job 14:13; Luk. 20: 38) Boi do diingot Jahowa sude taringot halak na lao paheheonna termasuk ma i penampilan, sifat, pengalaman ni nasida saleleng mangolu, dohot ingatan ni nasida. Takkas ma, boi do pos rohatta tu janji ni Jahowa taringot haheheon ala taboto na lomo do rohana jala sanggup do Ibana pasautton i. Alai adong dope alasan na asing boasa boi pos rohatta tu janji ni Debata taringot haheheon: Nungnga hea Jahowa pahehehon halak na mate. Dipaboa do di Bibel, dilehon Jahowa do huaso tu piga-piga bawa na setia, termasuk ma i tu Jesus lao pahehehon halak na mate. w23.04 9-10 ¶7-9

Molo marbisuk jala lambok hita mangalusi nasida, gabe olo ma nasida manangihon hita jala boi ma hita lanjut makkata-hatai dohot nasida. Tottu molo adong halak tujuanna lao berdebat manang lao mangarehei hita, tumagon ma unang taalusi nasida. (Poda 26:4) Alai dang sude halak songon i, godang nai dope halak na olo manangihon hita. Takkas ma, godang do manfaatna molo tapatudu lambok ni roha. Martangiang ma tu Jahowa asa boi hamu toktong tenang tikki adong halak na kritis tu hamu. Ingot ma molo lambok hamu, dang porlu berdebat hamu dohot nasida. Molo lambok hamu jala diargai hamu pandapot ni na asing, olo do ra gabe muba pandangan ni nasida taringot hita dohot taringot Bibel. “Sai rade ma hamu mangalusi sude halak na manukkun hamu taringot tu haporseaonmuna. Alai lambok ma alusi hamu jala sangap ma nasida bahen hamu.” (1 Ptr. 3:15) Alani i, toktong ma tapatudu lambok ni roha! w23.09 19 ¶18-19

Parrohahon ma opat cara songon dia do hita boi patuduhon sifat sabar. Parjolo, halak na sabar dang mura-mura muruk. Tikki adong halak na mambahen jut rohana, toktong do ibana tenang jala dang olo ibana mambalos. Dang kasar ibana mangalusi. (2 Mus. 34:6) Na paduahon, halak na sabar tenang do tikki adong na dipaima ibana. Nang pe leleng ibana paimahon sian na diharappon, dang gabe jut rohana. (Mat. 18:​26, 27) Na patoluhon, halak na sabar dang buru-buru. Molo adong karejo na penting na ikkon dipasae, berupaya do ibana asa unang buru-buru mamulai manang pasaehon karejona i. Gariada masuk akkal do diatur ibana tikkina lao mambahen rencana aha na lao ulahononna. Jala diboto ibana do porlu tikki lao mangulahon karejona i asa denggan hasilna. Na paopatton, halak na sabar dang marungut-ungut tikki masa sitaonon tu ibana. Dipikkirhon ibana do akka na denggan di ngoluna jala berupaya mambahen na terbaik asa toktong marlas ni roha manomba Jahowa. (Kol. 1:11) Jadi, ikkon dipatudu halak Kristen do sifat sabar di opat situasi i. w23.08 20-21 ¶3-6

Alasan utama boasa ikkon tajaga rohatta, i ma ala dipareso Jahowa do rohatta. Maksudna boi do diida Ibana aha na adong di bagasan rohatta jala halak na songon dia hita sasittongna. Dihaholongi Ibana do hita molo torus tapikkirhon nasehatna na boi mambahen hita mangolu salelengna. (Joh. 4:14) Alani i, unang ma olo hita dipengaruhi gabus ni Sibolis dohot maniru pangalaho ni akka parjahat. (1 Joh. 5:​18, 19) Lam jonok hita tu Jahowa lam holong ma rohatta tu Ibana jala lam tapasangap ma Ibana. Haru mamikkirhon na sala pe dang olo hita, ala dang lomo rohatta mambahen haccit roha ni Bapakta. Sahalak donganta borua di Kroasia na margoar si Marta hea do tergoda lao mangulahon seks na so patut. Didok ibana, “Maol do huhilala asa toktong ias pikkiranku jala mangalo keinginan lao mangulahon na sala. Alai biar tu Jahowa melindungi au.” Boasa didok ibana songon i? Ala dirimangi si Marta do akibatna molo diulahon ibana seks na so patut. Hita pe taulahon ma songon i. w23.06 20-21 ¶3-4

Diboto Jesus do lomo roha ni Jahowa pabadiahon goarna jala mambuktihon dang toho gabus na dipaboa Sibolis taringot Ibana. On ma alasanna boasa disuru Jesus akka siseanna asa martangiang songon on, “Ale Amanami na di banua ginjang, sai dipabadia ma goarmu.” (Mat. 6:9) Diboto Jesus, pabadiahon goar ni Jahowa on do na paling penting. Sasittongna dibandingkon toppaan ni Jahowa na asing, Jesus ma na paling jotjot pabadiahon goar ni Jahowa. Alai tikki ditakkup Jesus, ditudu akka musuna do ibana mangaleai goar ni Debata. Tottu lungun hian do roha ni Jesus ala ditudu songon i. I do alana “marsak situtu” do Jesus andorang so ditakkup ibana.—Luk. 22:​41-44. w24.02 11 ¶11

Di parlumbaan lao mandapot hangoluan na salelengna, ikkon tahaholongi do Jahowa dohot Jesus, lobi sian keluargatta. (Mat. 10:37) Alai maksudna, dang na gabe taabaihon tanggung jawabta di keluarga. Sebalikna, ikkon tadalatton do tanggung jawabta di keluarga asa las roha ni Debata dohot Kristus tu hita. (1 Tim. 5:​4, 8) Molo taulahon i, gabe lam marlas ni roha ma hita. Asing ni i, diboto Jahowa do boha carana asa marlas ni roha keluarga. Ikkon marsihaholongan do suami istri, ikkon dihaholongi jala dilatik natua-tua do ianakkonna, jala ikkon dioloi ianakkonna do natua-tuana. (Eps. 5:33; 6:​1, 4) Dang soal hita suami, istri, manang ianakkon, ikkon pos do rohatta tu nasehat ni Bibel. Unang ma olo hita dipengaruhi budaya, perasaan, manang na didok akka penasehat perkawinan. Manfaatton ma publikasitta na marisi akka saran na mangurupi hita mangulahon prinsip ni Bibel. w23.08 28 ¶6-7

Ikkon diparsiajari sahalak borua do akka keterampilan na marguna. Molo diparsiajari ibana i sian tikki poso, pasti marlaba do i saleleng ni ngoluna. Contohna, marlatik ma asa denggan manjaha dohot manurat. Di piga-piga daerah, dang diajari akka borua asa denggan manjaha dohot manurat. Alai sasittongna penting do keterampilan on di sude halak Kristen. (1 Tim. 4:13) Alani i torus ma hamu marlatik asa boi denggan manjaha dohot manurat. Aha ma manfaatna? Boi do i mangurupi hamu mangalului karejo. Gabe lam mura ma hamu marsiajar Bibel dohot mangajarhon i tu na asing. Alai na urrikkot, gabe lam jonok ma hubunganmuna tu Jahowa ala boi hamu denggan manjaha jala mangarimangi Hatana.—1 Tim. 4:15. w23.12 20 ¶10-11

Pangido ma bantuan ni Jahowa asa boi menolak godaan. Ala jolma na mardosa hita, ikkon torus do taalo godaan lao mangulahon na sala. Sai berupaya do Sibolis mambahen nasa tolapna asa tergoda hita. Misalna dipakke Sibolis do hiburan na so denggan na mambahen sega cara marpikkirta. Hiburan sisongon i boi mambahen pikkiranta dang ias, dang badia di jolo ni Jahowa, jala boi mambahen hita mangulahon dosa na balga. (Mrk. 7:​21-23; Jak. 1:​14, 15) Porlu do hita diurupi Jahowa asa boi menolak godaan lao mangulahon na sala. Tikki mambahen contoh tangiang, didok Jesus do, “Urupi ma hami asa unang tergoda jala palua ma hami sian Sibolis.” (Mat. 6:13) Lomo do roha ni Jahowa mangurupi hita, alai ikkon tapangido do bantuanna. Asing ni i, ikkon sadalan do tindakanta tu tangiangta. w23.05 6-7 ¶15-17

Molo diargai suami dohot istri do parale-aleon ni nasida dohot Jahowa, pasti dioloi nasida do paretta ni Jahowa. On ma na mangurupi nasida pasidikkon jala mangatasi masalah na boi mambahen ngali holong ni nasida. Asing ni i, halak na togu parale-aleonna tu Jahowa berupaya do maniru sifat ni Jahowa, songon haburjuon, sabar, jala rade manalpuhon hasalaan. (Eps. 4:32–5:1) Molo dipatudu suami dohot istri do akka sifat i, gabe lam togu ma hubungan ni nasida. Sahalak donganta borua na margoar si Lena naung menikah lobi sian 25 taon mandok, “Ummura do patuduhon holong dohot respek tu halak na togu parale-aleonna tu Jahowa.” Parrohahon ma contoh ni si Josep dohot si Maria. Sian godang pinoppar ni si Daud, nasida do na dipillit Jahowa lao gabe natua-tua ni Messias. Alana togu do parale-aleon ni nasida tu Jahowa, jala diboto Jahowa pasti diutamahon nasida do Ibana di perkawinan ni nasida. w23.05 21 ¶3-4

Sempurna do Jesus Pamimpinta. Alai molo akka donganta bawa na dipillit ibana manguluhon huria, dang sempurna nasida. Alani i, olo do ra maol tahilala mangoloi nasida, tarlumobi molo dipangido hita mangulahon na so sesuai tu lomo ni rohatta. I ma na masa tu Apostel Petrus. Diparettahon sada suru-suruan do ibana mangallang jagal ni binatang na ramun menurut Patik ni si Musa. Mulana dang olo si Petrus mangihutton petunjuk i. Sappe tolu hali do ditolak ibana i! (Ul. 10:​9-16) Alana dang masuk akkal petunjuk na baru i di si Petrus. Molo si Paulus, rade do ibana mangihutton petunjuk. Dipangido akka sintua na di Jerusalem ma asa diboan si Paulus opat bawa tu bagas joro lao mambahen ulaon paiasson diri. Tujuanna, asa boi diida akka dongan na diihutton si Paulus do Patik. Sasittongna dang sala si Paulus disi, ala diboto si Paulus do halak Kristen dang porlu be mangihutton Patik ni si Musa. Alai “marsogotna i, ditogihon si Paulus ma siopat halak i asa dibahen nasida ulaon paiasson diri”. (Ul. 21:​23, 24, 26) Ala dioloi si Paulus do petunjuk i, gabe toktong ma nasida marsada.—Rom 14:​19, 21. w23.10 10 ¶15-16

Olo do dang tarpikkir hamu porlu do biar ni roha asa boi marale-ale. Alai, akka halak na lomo rohana marale-ale tu Jahowa ikkon “makkabiari Ibana”. Dang soal nungnga sadia leleng hita manomba Jahowa, ikkon torus do tahabiari Ibana. Aha do lapatanna makkabiari Debata? Halak na makkabiari Debata, i ma halak na makkaholongi Ibana jala dang olo mangulahon manang aha pe na boi manegai parale-aleonna dohot Ibana. Songon i ma Jesus, “dihabiari Jesus do Debata”. (Heb. 5:7) Las do rohana pasangappon Jahowa. (Jes. 11:​2, 3) Massai holong do roha ni Jesus tu Jahowa jala lomo do rohana mangoloi paretta ni Jahowa. (Joh. 14:​21, 31) Songon Jesus, tapasangap do Jahowa ala taboto Debata na parholong, marbisuk, jala marhuaso do Ibana. Taboto do muse na massai holong do roha ni Jahowa tu hita, jala tanggapanta tu akka petunjukna berpengaruh do tu perasaan ni Jahowa. Boi do tabahen haccit roha ni Jahowa manang tabahen las rohana.—Ps. 78:41; Poda 27:11. w23.06 14 ¶1-2; 15 ¶5

Dung gogo pamarettaon ni Raja Usia, lupa do ibana mandok mauliate tu sude bantuan ni Jahowa tu ibana. Aha ma na boi taparsiajari sian on? Taingot ma, sian Jahowa do sude akka na denggan di ngolutta dohot tugas na tadapot. Unang ma diritta na tabangga-banggahon. Alai ikkon mandok mauliate do hita tu Jahowa. (1 Kor. 4:7) Ikkon tasadari ma jolma na so sempurna do hita jala porlu dipasingot. Sahalak donganta bawa na marumur 60 taon lobi mandok, “Hea do jut rohakku tikki dipasingot alani kesalahanku. Alai marsiajar do au asa unang haccit rohakku manang metmet rohakku molo dipasingot. Berupaya do au padenggatton pangalahokku jala toktong mangalehon na terbaik tu Jahowa.” Takkas ma, molo taoloi Jahowa jala toktong marserep ni roha, pasti denggan do ngolutta.—Poda 22:4. w23.09 10 ¶10-11

Porlu do sabar jala togu halak Kristen di abad na parjolo. Sarupa do tantangan na diadopi nasida dohot halak na asing di tikki i. Alai, diadopi nasida do muse tantangan na asing ala gabe halak Kristen. Godang do sian nasida na dianiaya pamimpin agama Jahudi, pamarettaon ni Rom, bahkan dianiaya keluarga ni nasida sandiri. (Mat. 10:21) Olo do muse ro tantangan sian huria. Ikkon berupaya do halak Kristen asa unang dipengaruhi ajaran ni halak na murtad na berupaya mambahen huria dang marsada. (Ul. 20:​29, 30) Alai toktong do nasida martahan. (Pgk. 2:3) Boasa boi songon i? Ala dirimangi nasida do teladan ni akka halak na toktong sabar jala togu na disurat di Bibel, songon si Job. (Jak. 5:​10, 11) Martangiang do nasida mangido gogo sian Jahowa. (Ul. 4:​29-31) Jala fokus do nasida tu upa na lao lehonon ni Jahowa tu nasida molo toktong martahan. (Ul. 5:41) Hita pe boi do sabar jala togu molo taratur hita mamparsiajari dohot mangarimangi teladan ni akka halak na disurat di Bibel dohot sian publikasitta. w23.07 3 ¶5-6

Sai diurupi Jahowa dohot Jesus do hita. Taingot ma contoh ni si Petrus. Dung disoadahon si Petrus Jesus, ikkon dipillit ibana do naeng toktong gabe sisean ni Jesus manang menyerah. Alai ditangiakkon Jesus do tu Jahowa asa unang mago haporseaon ni si Petrus. Dipaboa Jesus do tangiangna i tu si Petrus. Jala dipapos do rohana, na lao dipakke do ibana lao patoguhon akka apostel na asing. (Luk. 22:​31, 32) Pasti dipatogu do roha ni si Petrus alani hata ni Jesus i. Sarupa songon i ma, tikki naeng mambahen keputusan na penting hita, dipakke Jahowa do akka sintua lao paposson rohatta na boi do hita toktong setia. (Eps. 4:​8, 11) Dilehon Jahowa do sude kebutuhan ni si Petrus dohot akka apostel na asing. Dos songon i ma, pasti lehonon ni Jahowa do akka na tahaporluhon molo tabahen Ibana gabe na uppetting di ngolutta. w23.09 24-25 ¶14-15

Diida Jahowa do sude haburjuon na tapatudu tu akka dongan, nang pe tahilala dang sadia i. Jala dianggap Jahowa do i songon pelean na massai arga tu Ibana manang songon pinjaman na ikkon gararonna. Molo dang parhobas manang dang sintua be hamu saonari, ingot ma diingot Jahowa do sude na dibahen hamu najolo dohot holong na dipatudu hamu tu Ibana. (1 Kor. 15:58) Jala diparrohahon Jahowa do holong na dipatudu hamu sahat tu saonari. Lomo do roha ni Jahowa asa lam balga holongta tu Ibana dohot tu na asing. Boi do tapatogu holongta tu Jahowa marhite manjaha Bibel dohot mangarimangi i jala taratur martangiang tu Ibana. Boi do muse lam balga holongta tu dongan sahaporseaon molo talului cara lao mangurupi nasida. Lam balga holongta, lam jonok ma hita tu Jahowa dohot tu akka dongan sahaporseaon. Jala boi ma hita marale-ale dohot nasida saleleng ni lelengna! w23.07 10 ¶11; 11 ¶13; 13 ¶18

Ganup halak Kristen ikkon mamutusson sandiri perawatan kesehatan ni nasida. Di Bibel holan otik do hukum taringot perawatan kesehatan na ikkon diihutton halak Kristen, i ma asa padaohon diri sian mudar jala unang mardatu. (Ul. 15:20; Gal. 5:​19, 20) Asing sian i, boi do nasida mamillit sandiri pengobatan na boi dijalo nasida. Ikkon taargai do hak ni akka donganta mambahen keputusan tu perawatan kesehatan ni nasida sandiri. Taringot on, adong opat na porlu taingot: (1) Holan Harajaon ni Debata do na boi pamaluppon dohot pasaehon sude sahit. (Jes. 33:24) (2) Ganup halak Kristen ikkon ‘pos do rohana tu na pinillitna’. (Rom 14:5) (3) Unang ma tauhumi na asing jala unang ma taulahon manang aha pe na mambahen nasida tartuktuk.—Rom 14:​15, 19, 20. w23.07 24 ¶15

Pasti holong hian do rohamuna tu Jahowa. Sian najolo pe, godang do halak na makkaholongi Jahowa. (Ps. 104:​33, 34) Termasuk ma i halak Nasir di jaman ni halak Israel najolo. Halak Nasir lapatanna halak na dipapulik. Semangat do nasida jala rade mambahen pengorbanan khusus lao manomba Jahowa. Di Patik ni si Musa, boi do sahalak bawa manang borua marsumpa tu Jahowa naeng gabe halak Nasir saleleng piga-piga tikki. (4 Mus. 6:​1, 2) Tikki dibahen ibana sumpa i, marjanji do ibana mangihutton piga-piga aturan khusus na so porlu diihutton halak Israel na asing. Alai boasa adong halak Israel na olo gabe halak Nasir? Ala bagas do holong ni nasida tu Jahowa jala naeng patuduhon pangargaion tu sude pasu-pasu na dilehon Ibana.—5 Mus. 6:5; 16:17. w24.02 14 ¶1-2

Di Bibel jotjot do dipaboa taringot hata “setia” manang “holong na manoktong”, lao patuduhon holong na dipatudu Debata tu akka naposona. Hata “setia” boi do muse dipakke lao manggombarhon holong na dipatudu naposo ni Debata tu akka dongan sahaporseaonna. (2 Sam. 9:​6, 7) Sian tikki tu tikki, boi do gabe lam setia hita. Taida ma songon dia si Daniel patuduhon na setia do ibana. Saleleng ngolu ni si Daniel, ikkon dibuktihon ibana do na setia ibana tu Jahowa. Tikki marumur 90 taon lobi ibana, adong ma sada ujian na balga na ikkon diadopi ibana. Dang lomo roha ni akka pejabat tu si Daniel dohot tu Debata na disomba ibana. Alani i dibahen nasida ma rencana lao pamatehon si Daniel. Dibahen ma muse peraturan na mambahen si Daniel ikkon setia tu raja. Molo dang martangiang si Daniel tu Jahowa saleleng 30 ari, berarti na setia do ibana tu raja jala dang porlu dihukum. Alai dang olo si Daniel.—Dan. 6:​12-15, 20-22. w23.08 5 ¶10-12

Lomo do roha ni Jahowa asa unang menyerah hita makkaholongi akka donganta. Molo adong donganta na so patuduhon sifat Kristen jala mambahen haccit rohatta, unang ma tadok na sengaja do ibana mangulahon i. Pos ma rohatta na berjuang do ibana mangulahon na sittong. (Poda 12:18) Taingot ma, toktong do holong roha ni Jahowa nang pe dang sempurna hita. Nang pe sala hita, dang sai muruk Jahowa jala dang ditadikkon Ibana hita. (Ps. 103:9) Alani i, tatiru ma Jahowa lao memaappon hasalaan ni akka donganta. (Eps. 4:32–5:1) Taingot ma muse, ala nungnga lam jonok ari ni Jahowa, ikkon lam kompak ma hita dohot akka donganta. Haduan, lam jotjot do masa penganiayaan tu naposo ni Jahowa. Bahkan hita sandiri olo do ra dipenjara alani haporseaotta. Di situasi sisongon i, massai porlu do hita diurupi akka dongan.—Poda 17:17. w24.03 15-16 ¶6-7

Godang do disurat di Bibel taringot akka na poso na marlas ni roha. Alana jonok do nasida tu Jahowa jala las do roha ni Jahowa tu nasida. Sada sian i, i ma si Daud. Tikki poso dope ibana, dipillit ibana do lao manomba Jahowa jala ujungna gabe raja na setia. (1 Raj. 3:6; 9:​4, 5; 14:8) Molo diparsiajari hamu taringot si Daud, gabe dipatogu ma rohamuna asa toktong setia manomba Jahowa. Boi do muse diparsiajari hamu taringot si Markus manang si Timoteus. Poso dope nasida manomba Jahowa jala toktong setia manomba Ibana. Las do roha ni Jahowa dibahen nasida. Keputusan na dibahen hamu saonari balga do pengaruhna i tu masa depanmuna. Molo pos rohamuna tu Jahowa jala dang mangandalhon diri sandiri, pasti diurupi Jahowa do hamu lao mambahen keputusan na denggan. Boi ma hamu marlas ni roha jala dipasu-pasu Jahowa ma hamu. Ingot ma, diargai Jahowa do sude akka na dibahen hamu tu Ibana. Sian sude keputusan na dibahen hamu di ngolumuna, melayani Jahowa ma keputusan na terbaik. w23.09 13 ¶18-19

Diboto Apostel Paulus do dang sempurna akka donganna. Contohna adong do piga-piga dongan di Jerusalem na so porsea nungnga gabe sisean ni Jesus si Paulus. (Ul. 9:26) Dung i, adong do na paroa-roahon ibana. (2 Kor. 10:10) Asing ni i, diida si Paulus do sahalak sintua mambahen keputusan na sala na boi mambahen tartuktuk akka dongan na asing. (Gal. 2:​11, 12) Jala hea do haccit roha ni si Paulus dibahen dongan kompakna, i ma si Markus. (Ul. 15:​37, 38) Nang pe haccit roha ni si Paulus dibahen akka donganna, dang gabe mandao ibana sian nasida. Diargai ibana do akka donganna i jala torus setia manomba Jahowa. Boasa boi songon i si Paulus? Holong do roha ni si Paulus tu akka donganna. Akka na denggan sian nasida do na sai diingot si Paulus. Jala holong do na mangurupi si Paulus boi mangulahon nasehat na dipaboa di ayat sadari on. w24.03 15 ¶4-5

Godang do contoh na disurat di Bibel taringot na massai penting do patuduhon lambok ni roha. Misalna taida ma pengalaman ni si Isak. Tinggal do ibana di Gerar, i ma daerah ni halak Palistim. Mangiburu do akka tetanggana tu ibana. Alani i ditutup nasida do sude sumur na digali parkarejo ni bapakna. Nang pe songon i dibahen, dang olo si Isak marbada dohot nasida. Pinda do ibana dohot keluargana tu inganan na asing jala digali ibana ma sumur na baru. (1 Mus. 26:​12-18) Alai didok halak Palistim, appuna ni nasida do tong sumur na digalina i. Nang pe songon i, tong do dang olo si Isak marbada dohot nasida. (1 Mus. 26:​19-25) Aha do na mambahen ibana boi tetap lambok nang pe berupaya halak na asing naeng marsoal dohot ibana? Tottu ala ditiru si Isak do teladan ni natua-tuana. Marsiajar do ibana sian bapakna si Abraham na so olo marbada dohot teladan ni omakna si Sara na patuduhon “roha na lambok jala na dame”.—1 Ptr. 3:​4-6; 1 Mus. 21:​22-34. w23.09 15 ¶4

Disuru Jahowa do Jesus Anakna na sasada i tu tano on lao mangajari akka halak taringot Harajaon i. Jala dilehon Jesus do ngoluna lao manobus hita sian dosa dohot hamatean. Dung i, dipahehe Jahowa ma Jesus tu surgo gabe Raja ni Harajaon ni Debata. Aha do tema utama ni Bibel? Lao dipabadia Jahowa ma goarna tikki saut sakkapna tu tano on marhite Harajaonna na dipimpin Kristus. Dang muba sakkapna i. Alana nungnga marjanji Jahowa lao pasautonna sude sakkapna. (Jes. 46:​10, 11; Heb. 6:​17, 18) Satokkin nai, bahenon ni Jahowa ma tano on gabe Paradeiso. Disi ma maringanan “saleleng ni lelengna” pinoppar ni si Adam dohot si Hawa naung sempurna. (Ps. 22:26) Alai dang holan i sakkap ni Jahowa. Lao marsada ma bahenon ni Jahowa sude naposona na di surgo dohot na di tano on. Sude ma nasida mangoloi Jahowa jala setia tu Ibana. (Eps 1:​8-11) Pasti longang do rohatta mangida na luar biasa do cara ni Jahowa pasautton sakkapna. w23.10 20 ¶7-8

Dang leleng dung sahat halak Jahudi di Jerusalem, terjadi ma masalah ekonomi dohot politik. Asing ni i, ro ma paraloan sian akka negara di sakaliling ni nasida. Akibatna, gabe maol ma nasida mangalehon rohana lao padenggatton bagas joro ni Jahowa. Jadi disuru Jahowa ma Panurirang Haggai dohot Panurirang Sakaria patoguhon naposona asa semangat muse, jala marhasil do nasida. (Hag. 1:1; Sak. 1:1) Alai, hira-hira 50 taon dukkon i, ikkon dipatogu do muse halak Jahudi. Jadi ro ma muse si Esra sahalak panalin sian Babel tu Jerusalem. Dipatogu ibana ma nasida asa semangat muse lao mangulahon ibadat na sittong. (Esr. 7:​1, 6) Alani hata ni Debata na dipasahat Panurirang Haggai dohot si Sakaria, gabe lam pos do roha ni halak Jahudi najolo tu Jahowa nang pe godang masalah ni nasida. Alai boi do tong hata na dipasahat akka panurirang i paposson rohatta saonari, pasti diurupi Jahowa do hita dang soal aha pe na masa.—Poda 22:19. w23.11 14-15 ¶2-3

Songon dia carana patuduhon na holong rohatta tu akka dongan? Sada carana, tapatogu ma nasida. Molo asi do rohatta tu akka donganta, boi ma tapatogu nasida. (1 Tes. 4:18) Songon dia do asa toktong togu holongta tu akka dongan? Rade ma hita manalpuhon hahurangan ni nasida, nang pe sipata maol mangulahon i. Boasa massai penting patuduhon holong tu akka dongan saonari? Dipaboa si Petrus do alasanna, “Nungnga jonok ujung ni saluhutna. Alani i, . . . marsitutu ma hamu marsihaholongan.” (1 Ptr. 4:​7, 8) Ala nungnga lam jonok be ujung ni portibi na jahat on, aha ma na lao masa tu hita? Nungnga dipaboa Jesus hian tu akka siseanna, “Sogo ma roha ni sude jolma mangida hamu alani goarhu.” (Mat. 24:9) Ikkon toktong do hita marsada dohot akka donganta asa boi hita toktong martahan mangadopi akka hasusaan i. Molo marsihaholongan hita, dang na lao marhasil Sibolis mamola-mola hita.—Plp. 2:​1, 2. w23.11 13 ¶18-19

Balga do pengaruh ni hasittongan na adong di Bibel tu akka halak. Tikki taajari nasida taringot Jahowa jala Debata na songon dia Ibana sasittongna, boi ma taida hasil na luar biasa. Gabe dang boi be dioto-otoi Sibolis nasida jala boi ma diida nasida akka sifat ni Jahowa na denggan. Misalna, gabe diboto nasida ma na massai balga do huaso ni Jahowa. (Jes. 40:26) Gabe pos ma roha ni nasida tu Jahowa, ala Debata na adil do Ibana. (5 Mus. 32:4) Boi do muse nasida marsiajar taringot bisuk ni Jahowa. (Jes. 55:9; Rom 11:33) Jala gabe tarapul ma roha ni nasida dung mamboto, Debata parholong do Jahowa i. (1 Joh. 4:8) Dung jonok nasida tu Jahowa, gabe lam pos ma roha ni nasida tu janji ni Debata taringot hangoluan salelengna. Sada hasangapon do di hita boi mangurupi akka halak asa jonok tu Jahowa. Molo taulahon i, gabe ‘dongan sakarejo ni Jahowa’ do hita.—1 Kor. 3:5. w24.02 12 ¶15

Olo do ra diboto hamu hasittongan sian natua-tuamuna manang sian halak na asing. Adong do rencanamuna naeng tardidi? Denggan do i. Memang sebelum tardidi hamu, ikkon dilehon hamu do ngolumuna tu Jahowa. Songon dia do carana mangalehon ngolumuna tu Jahowa? Martangiang ma hamu marjanji holan Jahowa do sombaonmuna, jala lomo ni rohana do na uppetting di ngolumuna. Marjanji ma hamu asa toktong makkaholongi Jahowa “sian nasa rohamuna, sian nasa ngolumuna, sian nasa pikkiranmuna, dohot sian nasa gogomuna”. (Mrk. 12:30) Tikki na martangiang i hamu, holan sahalakmuna do na marjanji tu Jahowa. Alai tikki tardidi hamu, diboto godang halak do naung dilehon hamu ngolumuna tu Jahowa. Janji na serius do on, jala dipangido Jahowa do asa digohi hamu janjimuna i.—Pjm. 5:4. w24.03 2 ¶2; 4 ¶5

Sude na menikah pasti mangadopi masalah di perkawinan. Bibel pe mandok, “Godang do hasusaan na lao masa tu halak na marhasohotan.” (1 Kor. 7:28) Boasa songon i? Alana dang sempurna suami dohot istri. Dang sarupa sifat, akka na dihalomohon, dohot na so dihalomohon nasida. Olo do muse dang sarupa latar belakang dohot budaya ni nasida. Jala adong do ra kebiasaan na baru diboto pasanganna dung menikah nasida. Sudena on boi do gabe masalah di perkawinan. Bisa jadi nasida na dua do na sala, alai gabe disalahon nasida do pasanganna jala dang olo rap mangalului solusina. Bahkan olo do tarpikkir nasida naeng padao-dao manang marsirang. Alai denggan do keputusan sisongon i? Daong. Lomo do roha ni Jahowa asa toktong rap suami dohot istri, nang pe jotjot nasida kecewa dibahen pasanganna. w24.03 16 ¶8; 17 ¶11

Dung tardidi pe hamu, boi do lam tamba pos ni rohamuna tu janji ni Debata taringot Paradeiso. Alana sian tikki tu tikki, pasti lam godang ma na diboto hamu taringot Jahowa jala lam holong ma rohamuna tu Ibana. (Heb. 5:13–6:1) Gariada olo do ra nungnga dihilala hamu proses na dipaboa di Rom 5:​2-4. Tikki adong sitaonon, martahan do hamu mangadopi i. Ala martahan hamu, gabe pos ma rohamuna na las do roha ni Debata mangida hamu. Hasilna gabe lam tamba ma muse pos ni rohamuna tu janji ni Debata. Alana, nungnga lam bagas i tarsuan di roha dohot di pikkiranmuna. Balga do pengaruh ni i tu ngolumuna jala gabe lam denggan ma hamu maradoppon keluarga, mambahen keputusan, dohot mamakke tikki. Dipapos Apostel Paulus do muse rohatta, na lao saut do janji ni Debata i ala nungnga tabahen las roha ni Debata.—Rom 15:13. w23.12 12-13 ¶16-19

Tikki borat sitaononta, olo do dang songon na biasa perasaanta, pikkiran, dohot tindakanta. Gabe muba-uba do perasaanta songon kapal na munggil-unggil alani galumbang. Songon dia do Jahowa mangurupi hita tikki marsak? Marjanji do Jahowa lao mambahen hita hot. Tikki masa badai di laut, olo do munggil-unggil kapal dibahen galumbang. Asa boi kapal i toktong hot, dipakke ma sirip ni kapal na adong di bagian partoru ni kapal i. Hasilna, gabe dang pola munggil-unggil kapal i alani galumbang. Asing ni i, boi ma aman jala nyaman akka penumpang na adong di kapal i. Alai boi pe berfungsi sirip ni kapal i molo tetap do mardalan kapal i. Dos songon i ma, pahoton ni Jahowa do hita molo toktong hita setia manomba Ibana, nang pe massai borat sitaononta. w24.01 22 ¶7-8

Tikki mabiar hamu, pikkirhon ma akka naung dibahen Jahowa. Pikkirhon ma akka toppaanna. Contohna, parrohahon ma songon dia Jahowa mangurus akka pidong dohot akka bunga. Hape dang ditoppa Jahowa akka pidong dohot akka bunga asa boi maniru sifatna jala manomba Ibana. Tarlumobi ma hita, pasti dijaga Jahowa do hita. Molo tarimangi on, gabe lam pos ma rohatta tu Ibana. (Mat. 6:​25-32) Pikkirhon ma muse akka naung dibahen Jahowa tu naposona. Parsiajari ma akka ise na disurat di Bibel na togu haporseaonna. Manang jaha ma pengalaman ni akka naposo ni Jahowa di tikkitta saonari. Asing ni i, pikkirhon ma akka naung dibahen Jahowa tu hamu. Songon dia do Jahowa mangurupi hamu asa boi manomba Ibana? (Joh. 6:44) Songon dia do Jahowa mangalusi tangiangmuna? (1 Joh. 5:14) Jala aha do manfaat na dihilala hamu sian tobusan ni Jesus ganup ari?—Eps. 1:7; Heb. 4:​14-16. w24.01 4 ¶6; 7 ¶17