November

Molo natua-tua do hamu, urupi ma gellengmuna paradehon komentar na cocok sesuai tu umur ni nasida. Sipata topik na dibahas di parsiajaran olo do topik na serius, songon masalah keluarga manang taringot moral. Alai adong do ra sada manang dua paragraf na boi dikomentari nasida. Asing ni i, urupi ma gellengmuna mangattusi boasa dang ditunjuk nasida nang pe nungnga tunjuk tangan. Molo dipatorang hamu i, boi ma nasida dang merasa kecil hati tikki na asing na ditunjuk markomentar. (1 Tim. 6:18) Sude do hita boi paradehon komentar na pasangappon Jahowa jala na patoguhon akka dongan. (Poda 25:11) Sipata olo do dipangido hita lao manceritahon pengalaman pribadi, alai taingot ma unang pagodangku hita manceritahon taringot diritta sandiri. (Poda 27:2; 2 Kor. 10:18) Sebalikna di komentarta i fokus ma hita tu Jahowa, tu Hatana, dohot tu akka dongan.—Pgk. 4:11. w23.04 24-25 ¶17-18

Penting do holong asa sai toktong dungo jala sadar pikkiranta. (Mat. 22:​37-39) Holong tu Debata boi mangurupi hita asa torus marbarita nang pe adong sitaononta. (2 Tim. 1:​7, 8) Ala holong rohatta tu akka halak na so manomba Jahowa, torus do hita marbarita na uli, bahkan sian telepon manang surat. Torus do hita berharap sada tikki akka halak na takabari boi muba jala mangulahon na sittong. (Hes. 18:​27, 28) Tahaholongi do muse akka dongan sahaporseaon di huria. Tapatudu do holong tu nasida tikki ‘marsiurupan hita jala patoguhon na asing’. (1 Tes. 5:11) Sarupa songon akka tentara na rap marporang, hita pe rap berjuang do dohot akka dongan. Dang mungkin sengaja hita mambahen haccit roha ni donganta manang sengaja hita mambalos pambahenan ni nasida na mambahen haccit rohatta. (1 Tes. 5:​13, 15) Asing ni i, tapatudu do holong molo taargai akka dongan na manguluhon hita di huria.—1 Tes. 5:12. w23.06 10 ¶6; 11 ¶10-11

Sada cara lao patoguhon haporseaotta, i ma mangarimangi tobusan. Tobusan gabe jaminan pasti saut do akka janji ni Debata. Tarimangi ma boasa porlu diparade tobusan jala songon dia pengorbanan ni Jahowa lao paradehon i. Hasilna, gabe dipatogu ma haporseaotta na lao saut do janji ni Debata taringot hangoluan salelengna di tano na imbaru. Boasa boi tadok songon i? Aha do na dibahen Jahowa lao paradehon tobusan? Disuru Jahowa ma Anak haholonganna i ma Jesus tu tano on gabe jolma na sempurna. Tikki di tano on Jesus, toktong do ibana setia nang pe godang sitaonon. Susa do dihilala ibana jala haccit do parmatena. Massai arga do tobusan i dibayar Jahowa! Dang mungkin Debata parholong paloasson Anakna i marsitaonon jala mate hape holan satokkin do tahilala ngolu na dumenggan. (Joh. 3:16; 1 Ptr. 1:​18, 19) Ala dilehon Jahowa Anak haholonganna i manobus hita, pos ma rohatta boi do hita mangolu saleleng ni lelengna di tano na imbaru. w23.04 27 ¶8-9

Lomo do roha ni Jahowa pahehehon halak na mate. Sian dia taboto? Marhite tondi parbadia, ditogu-togu Ibana do akka panurat ni Bibel manuratton janji taringot haheheon. (Jes. 26:19; Pgk. 20:​11-13) Jala tikki marjanji Jahowa, pasti ditepati Ibana do i. (Jos. 23:14) Bahkan, masihol do Jahowa lao pahehehon halak na mate. Rimangi ma na didok si Job. Pos do rohana molo mate pe ibana, lomo do roha ni Jahowa pahehehon ibana. (Job 14:​14, 15) Songon i ma tong perasaan ni Jahowa tu sude naposona na setia naung mate. Lomo do rohana asa mulak mangolu muse nasida, sehat, jala marlas ni roha. Attong boha do marmiliar halak naung mate na so hea dope marsiajar taringot Jahowa? Lomo do tong roha ni Jahowa pahehehon nasida. (Ul. 24:15) Dipahehe Jahowa pe nasida asa adong do kesempatan ni nasida gabe ale-alena jala mangolu saleleng ni lelengna di tano on.—Joh. 3:16. w23.04 9 ¶5-6

Boha do carana asa lam pos rohamuna tu janji ni Debata? Misalna molo harapanmuna naeng mangolu saleleng ni lelengna di tano on, jaha jala rimangi ma aha na didok Bibel taringot Paradeiso. (Jes. 25:8; 32:​16-18) Bayakkon ma hamu mangolu disi. Molo toktong dirimangi hamu akka janji ni Debata i, gabe hira ‘parsatokkinan ma dihilala hamu masalahmuna i jala dang borat’. (2 Kor. 4:17) Janji ni Debata i boi mambahen hamu toktong martahan mangadopi sitaononmuna. Nungnga diparade Jahowa sude na tahaporluhon asa boi hita margogo. Alani i martangiang ma hita tu Jahowa, jala belajar pribadi asa marhasil hita mangulahon sada tugas, martahan mangadopi sitaonon, jala toktong marlas ni roha. Tajalo ma bantuan sian akka dongan sahaporseaon, jala tabahen ma tikki lao mangarimangi janji ni Debata di ari na naeng ro. Molo taulahon i, gabe lam margogo ma hita “alani huaso ni Debata na massai balga i. Dung i boi ma [hita] martahan, sabar, jala marlas ni roha”.—Kol. 1:11. w23.10 17 ¶19-20

Godang do alasanta lao mandok mauliate tu Jahowa di tangiangta. Boi do hita mandok mauliate tu Ibana alani akka na denggan na dilehon Ibana tu hita. (Jak. 1:17) Misalna, boi do hita mandok mauliate alani uli ni tano on dohot akka toppaanna na luar biasa. Boi do muse hita mandok mauliate ala dilehon do hangoluan, keluarga, ale-ale, dohot harapan tu hita. Jala lomo do rohatta mandokkon mauliate tu Jahowa ala boi hita marale-ale tu Ibana. Berupaya ma hita mamikkirhon alasanta mandok mauliate tu Jahowa. Godang do halak saonari dang diboto mandok mauliate. Jadi nasida holan mamikkirhon aha na boi didapot nasida daripada mamikkirhon songon dia carana mandok mauliate tu na adong di nasida. Molo songon i do tong cara marpikkirta, boi do gabe songon daftar permintaan tangiangta i. Asa unang masa i, porlu do hita torus mamikkirhon alasanta mandok mauliate jala taargai ma sude na dibahen Jahowa tu hita.—Luk. 6:45. w23.05 4 ¶8-9

Ala holong roha ni Jahowa tu hita, dang lomo rohana mangida hita susa. (Jes. 63:9) Alai on dang patuduhon diabbati Jahowa sitaonon ro tu hita, na sipata dos songon sunge manang api. (Jes. 43:2) Nang pe songon i, marjanji do Jahowa tu hita lao urupanna do hita “manaripari” sitaononta i. Jala dang pasombuonna gabe sega hubungatta tu Ibana alani sitaononta i. Asing ni i, dilehon Jahowa do tondi parbadiana tu hita asa tolap hita mangadopi i sude. (Luk. 11:13; Plp. 4:13) Dung i gabe pos ma rohatta, lehonon ni Jahowa do tu hita akka na porlu na boi mambahen hita toktong martahan jala setia manomba Ibana. Dipangido Jahowa do hita asa porsea tu Ibana. (Heb. 11:6) Sipata olo do borat hian sitaonon na masa tu hita. Molo songon i situasitta olo do gabe ragu hita, diurupi Jahowa do hita manang dang. Alai pos ma rohatta tu Jahowa. Alana didok Bibel, boi do ‘tibbungotta tembok’ manang sitaonon na borat molo dilehon Jahowa huasona tu hita. (Ps. 18:29) Jadi unang ma ganggu rohatta. Gariada martangiang ma hita jala pos ma rohatta pasti dialusi Jahowa do tangiangta i.—Jak. 1:​6, 7. w23.11 22 ¶8-9

Massai uli do digombarhon cinta sejati i! Ayat on boi paposson roha ni pasangan suami istri: Boi do toktong hamu marsihaholongan. Porlu do upaya asa boi sapasang suami istri toktong marsihaholongan saleleng mangolu nasida. Bayakkon ma jo contoh on. Boi do toktong marsigorgor api unggun molo adong halak na manambai sobanna. Molo dang ditambai sobanna, pasti gabe mittop ma api i. Dos songon i ma, boi do toktong togu holong ni suami dohot istri molo torus nasida patoguhon hubungan ni nasida. Olo do sipata sapasang suami istri merasa nungnga lam ngali holong ni nasida, tarlumobi tikki adong masalah parhepengon, masalah kesehatan, manang tekanan lao pagodang-godangkon dakdanak. Jadi asa toktong marsigorgor “api na sian Jahowa”, ikkon togu do parale-aleon ni suami dohot istri tu Jahowa. w23.05 20-21 ¶1-3

Asa boi hita barani, aha do na porlu taulahon? Bisa jadi halak na barani do natua-tuatta jala dijujui nasida do hita asa barani. Alai dang boi bahenon ni nasida hita barani songon nasida. Gabe halak na barani dos do songon na mamparsiajari sada keterampilan na baru. Sada cara asa malo hita, i ma manat mamparrohahon na dibahen gurutta jala maniru ibana. Dos songon i ma, boi do hita gabe barani molo taparrohahon songon dia halak na asing patuduhon sifat i, jala tatiru nasida. Ikkon takkas do tatanda Hata ni Debata. Jotjot ma hita martangiang tu Jahowa asa lam jonok hita tu Ibana. Jala porlu do muse hita porsea tu Jahowa asa pos rohatta na urupanna do hita. Hasilna, tikki diuji haporseaotta gabe barani ma hita. Molo barani hita pasti diargai halak na asing do hita. Gariada olo do ra gabe tertarik nasida naeng mananda Jahowa. Takkas ma godang do manfaatna molo barani hita. w23.08 2 ¶2; 4 ¶8-9

Hata Junani “uji” di ayat on dipakke lao manggombarhon cara ni sasahalak manguji mas dohot perak lao mamastihon keaslianna. Alani i, porlu do hita manguji aha na tabege dohot na tajaha lao mamastihon sittong do i manang na dang. Massai penting sipasingot i tu hita ala nungnga lam jonok hasusaan bolon i. Unang ma pittor porsea hita tu sude hata ni halak. Alai tapakke ma kesanggupan marpikkirta lao mambandingkon aha na tajaha dohot na tabege tu na nidok ni Bibel dohot organisasi ni Jahowa. Molo taulahon i, dang na lao tartipu hita tu gabus ni Sibolis. (Poda 14:15; 1 Tim. 4:1) Taboto do na dipalua Debata do naposona secara kelompok sian hasusaan bolon. Alai molo hita secara pribadi, dang taboto songon dia ngolutta sogot. (Jak. 4:14) Dang soal hita selamat mangalewati hasusaan bolon manang mate sebelum ro i, molo toktong hita setia dapotta do annon upatta, i ma hangoluan na salelengna. Sai anggiat ma hita torus fokus tu janji ni Debata na luar biasa i jala sai rade ma hita tu ari ni Jahowa! w23.06 13 ¶15-16

Dang taboto songon dia akka surirang ni Bibel i saut. (Dan. 12:​8, 9) Alai tung pe dang takkas taattusi songon dia sada surirang saut, dang na berarti dang na lao saut i. Pos ma rohatta urupan ni Jahowa do hita mangattusi i di tikki na pas, songon naung dibahen Ibana di tikki naung salpu. Lao diumumhon akka bangso ma taringot boa-boa na mandok, “Dame do sude jala dang adong be sihabiaran!” (1 Tes. 5:3) Satokkin nai, lao diserang akka pamaretta ni portibi on do sude agama na so sittong jala dihancurhon ma i. (Pgk. 17:​16, 17) Jala diserang nasida ma naposo ni Debata. (Hes. 38:​18, 19) Dung i dimulai ma porang na parpudi, i ma Armagedon. (Pgk. 16:​14, 16) Pos do rohatta masa do akka peristiwa on satokkin nai. Huhut paimahon i, sai anggiat ma hita torus patuduhon pangargaion tu Jahowa, Bapakta na parholong i. Taparsiajari ma surirang ni Bibel jala taurupi ma na asing mangulahon na sarupa. w23.08 13 ¶19-20

Tikki dibahas Apostel Paulus taringot haporseaon, paima-imahon janji ni Debata, dohot taringot holong, didok ibana, “holong ma na umbalga” sian na tolu i. (1 Kor. 13:13) Boasa didok ibana songon i? Molo di ari na naeng ro, dang porlu be hita patuduhon haporseaon tu janji ni Debata taringot tano na imbaru. Alana nga saut be sude na tapaima-ima i. Alai molo holong, ikkon torus do i tapatudu tu Jahowa dohot tu akka jolma. Gariada ikkon lam balga do holongta tu nasida sahat tu saleleng ni lelengna. Molo tapatudu holong tu akka dongan, on patuduhon na tutu do hita halak Kristen na sittong. Didok Jesus do tu akka apostelna, “Molo marsihaholongan hamu, botoon ni sude jolma ma na siseanku hamu.” (Joh. 13:35) Asing ni i, molo tapatudu holong boi do i mambahen hita toktong marsada. Didok si Paulus, “Holong ni roha do na boi mambahen jolma marsada.” (Kol. 3:14) Didok Apostel Johannes do tu akka donganna, “Manang ise na makkaholongi Debata, ikkon haholonganna do donganna.” (1 Joh. 4:21) Molo holong rohatta tu Debata, ikkon marsihaholongan do hita dohot akka donganta. w23.11 8 ¶1, 3

Di Bibel, dipatudos do hangoluan ni halak Kristen tu parlumbaan. Molo marhasil hita marlojong sahat tu garis finis, gabe dapotta ma hangoluan na salelengna. (2 Tim. 4:​7, 8) Alani i, ikkon berupaya do hita asa torus marlojong di parlumbaan i, tarlumobi ala nga jonok hita tu garis finis. Dipaboa Apostel Paulus do aha na mambahen hita marhasil. Didok ibana, ‘Tabolokkon ma boban na boi mangabbati hita di parlumbaatta. Toktong ma hita marsitutu marlojong di parlumbaan naung ditottuhon tu hita.’ Tikki didok si Paulus ‘ikkon tabolokkon boban’, na gabe so adong be boban manang tanggung jawab ni halak Kristen? Daong. Na didok si Paulus dison, boban na boi mangabbati hita di parlumbaan i do na ikkon tabolokkon. Alana boban on boi mambahen hita gabe lambat manang loja. Asa boi hita torus marlojong, ikkon taboto do boban na dia na ikkon taboan jala na dia na ikkon tabolokkon. Alai sipata dang taboto boban manang tanggung jawab na dia do na ikkon taboan. Hape massai penting do i asa boi torus hita marlojong di parlumbaan i.—2 Tim. 2:5. w23.08 26 ¶1-2

Boi do taargai pandangan ni na asing molo tapatudu sikap masuk akkal. Misalna, adong do donganta borua na lomo rohana mardandan, hape na asing dang pola lomo rohana. Adong do muse piga-piga halak Kristen na minum minuman beralkohol, hape na asing dang olo manginum i. Sude do halak Kristen lomo rohana asa tetap sehat, alai marasing-asing do pilihan ni nasida taringot perawatan kesehatan. Molo tapikkir pandapotta do na sittong jala sai tapaksahon dongan sahaporseaon asa mangihutton na tabahen, boi do gabe tartuktuk nasida jala dang marsada be huria. (1 Kor. 8:9; 10:​23, 24) Dang dibahen Jahowa aturan na kaku taringot songon dia caratta marpakkean. Alai dilehon Ibana do prinsip na boi taihutton. Ikkon pasangappon Debata do caratta marpakkean, jala ikkon tapakke ma “pakkean na tama mardongan toruk ni roha dohot bisuk”. (1 Tim. 2:​9, 10) Alani i, tottu dang olo hita mambahen akka halak berfokus tu penampilanta. Prinsip ni Bibel pe boi do mangurupi akka sintua asa unang mambahen peraturan sandiri taringot gaya rambut dohot cara marpakkean. w23.07 23-24 ¶13-14

Dipaboa Jahowa do songon dia carana asa boi marlas ni roha hita di ari na naeng ro. Akka halak na manjalo undangan sian “borua na oto”, sip-sip do nasida mangulahon seks na so patut. Bibel mandok lao masuk ma nasida ‘tu bagasan Kuburan’. (Poda 9:​13, 17, 18) Alai imbar do na dihilala akka halak na manjalo undangan ni “bisuk” i! (Poda 9:1) Marsiajar do hita makkaholongi akka na dihaholongi Jahowa jala makkasogohon akka na dihasogohon rohana. (Ps. 97:10) Las do muse rohatta mangundang akka halak asa marsiajar jala mandapot manfaat sian bisuk ni Debata. Hira na “jou-jou do hita sian inganan na timbo di kota mandok, ‘Manang ise na so marpengalaman, ro ma tuson’”. Manfaat na tadapot dohot akka halak na menyambut undanganta dang holan tahilala saonari. Alai leleng do i martahan. Molo torus taihutton “dalan ni bisuk” i, boi ma hita mangolu saleleng ni lelengna.—Poda 9:​3, 4, 6. w23.06 24 ¶17-18

Godangan sian hita taroktokon do tikki disukkun dongan sakarejo manang dongan sasikkola taringot haporseaotta. Alai sasittongna sian sukkun-sukkunna i, gabe taboto ma aha na dipikkirhon nasida. Jala gabe sada kesempatan do on di hita lao marbarita na uli. Sipata adong do halak na manukkun holan ala naeng marbada manang ala dang setuju tu hita. Dang heran hita disi, alana godangan nasida mamboto informasi na so sittong taringot hita. (Ul. 28:22) Asing ni i muse, ala mangolu hita di “ari parpudi”, godangan halak “dang olo mardos ni roha” jala “parmuruk-muruk”. (2 Tim. 3:​1, 3) Olo do sukkun-sukkun rohamuna, ‘Songon dia do asa tetap tenang au jala marbisuk molo adong na naeng berdebat taringot haporseaokku?’ Porlu do dipatudu hamu lambok ni roha. Halak na lambok roha dang mura-mura muruk, alai boi mengendalihon dirina tikki adong halak na naeng marbada dohot ibana. w23.09 14 ¶1-2

Olo do sipata tadapot nasehat sian organisasi asa unang holongan di hepeng hita manang mangulahon aha pe na boi manegai parale-aleotta tu Jahowa. Lao manjaga hita do umbahen dilehon akka nasehat i. (Jes. 48:​17, 18; 1 Tim. 6:​9, 10) Pos do rohatta, toktong do dipakke Jahowa akka jolma lao mangalehon petunjuk saleleng hasusaan bolon dohot Pamarettaon Saribu Taon. Olo do hita mangihutton petunjuk i? Molo sian saonari hita mangihutton petunjuk ni Jahowa, gabe ummura ma hita mangihutton petunjukna haduan. Alani i, toktong ma taihutton petunjuk ni Jahowa, termasuk ma i petunjuk na dilehon akka bawa na dipillit Ibana lao manogu-nogu hita. (Jes. 32:​1, 2; Heb. 13:17) Boi do pos rohatta tu Jahowa ala Ibana do na mangurupi hita asa boi marale-ale dohot Ibana jala boi mangolu salelengna di Paradeiso. w24.02 25 ¶17-18

Las do roha ni Apostel Paulus melayani Jahowa, alai godang do tantangan na diadopi ibana. Jotjot do ibana marbarita tu inganan na dao, jala dang sai mura pardalananna i. Di pardalanan, jotjot do ibana mangadopi bahaya ‘alani sunge manang alani pangarampok’. Hea do muse ibana dipukkuli akka musuna. (2 Kor. 11:​23-27) Jala adong do piga-piga dongan sahaporseaon na so mangargai upaya ni si Paulus lao mangurupi nasida. (2 Kor. 10:10; Plp. 4:15) Aha do na mangurupi si Paulus asa toktong melayani Jahowa? Godang do dapotna parsiajaran taringot akka sifat ni Jahowa sian Surat na Badia dohot sian pengalamanna sandiri. Gabe pos ma roha ni si Paulus na dihaholongi Jahowa do ibana. (Rom 8:​38, 39; Eps. 2:​4, 5) Gabe lam holong ma roha ni si Paulus tu Jahowa. Dipatudu si Paulus do i marhite “mangurupi akka na badia”.—Heb. 6:10. w23.07 9 ¶5-6

Godang halak setuju porlu do adong “pamaretta”, jala ikkon taoloi do aturan na dibahen nasida. Alai molo dihilala nasida dang adil pamaretta jala pagodangku aturan na dibahen pamaretta i, dang porlu nasida mangihutton i. Memang didok Bibel, susa do hita dibahen pamarettaon ni jolma na dirajai Sibolis on. Jala taboto do na lao dihancurhon nama i satokkin nai. (Ps. 110:​5, 6; Pjm. 8:9; Luk. 4:​5, 6) Alai nang pe songon i, didok Bibel do tu hita sude, “Manang ise na mangalo tu pamaretta na mangalo aturan ni Debata do i.” Alana diloas Jahowa dope pamaretta mambahen aturan tu hita asa taratur sude. Jala dipangido Jahowa do asa unduk hita tu nasida. I do alana, talehon ma tu pamaretta “aha na gabe hak ni nasida”, termasuk ma i manggarar pajak, patuduhon hormat tu nasida, jala unduk tu peraturan na dibahen nasida. (Rom 13:​1-7) Olo do ra tahilala aturan na dibahen pamaretta i dang adil, mambahen hita repot, manang rugi. Alai taoloi ma Jahowa, unduk ma hita tu pamaretta saleleng dang maralo i tu paretta ni Jahowa.—Ul. 5:29. w23.10 8 ¶9-10

Tikki tubu si Simson, halak Palistim do na mangarajai halak Israel. (Pangh. 13:1) Massai kejam do halak Palistim i jala susa do halak Israel dibahen nasida. Alani i, dipillit Jahowa do si Simson “lao paluahon halak Israel sian tangan ni halak Palistim”. (Pangh. 13:5) Ikkon diandalhon si Simson do Jahowa asa boi ibana mangulahon tugasna i. Sada tikki hea ma tentara ni halak Palistim lao manakkup si Simson tu huta Lehi na adong di Juda. Mabiar do halak Juda tu nasida. Alani i dipasahat halak Juda ma si Simson tu nasida. Dung i, diikkat halak Juda ma si Simson mamakke dua tali na baru jala diboan ma ibana tu tentara ni halak Palistim. (Pangh. 15:​9-13) Nang pe songon i, “dibahen tondi parbadia ni Jahowa ma ibana lam gogo. Gabe malua ma tali i sian tanganna”. Dung i dapot ni si Simson ma “osang-osang ni halode jantan na baru mate”, jala dipakke ibana ma i pamatehon 1.000 halak Palistim.—Pangh. 15:​14-16. w23.09 2 ¶3-4

Dang sahali sude dipaboa Jahowa ‘sakkapna’ i di Bibel. Sai marhasil do Jahowa pasautton sakkapna. Alana “dipakke Jahowa do manang aha pe lao pasautton sakkapna” i. (Poda 16:4) Sude naung dipasaut Jahowa lao martahan ma i saleleng ni lelengna. Aha do sakkap ni Jahowa i? Jala aha do na dibahen Jahowa asa saut sakkapna i? Dipaboa Debata do sakkapna tu si Adam dohot si Hawa. Didok Debata, “Marpinoppari ma hamu asa lam godang hamu. Gohi hamu ma tano on jala rajai ma i. Rajai hamu ma akka . . . binatang na di tano on.” (1 Mus. 1:28) Dung dialo si Adam dohot si Hawa Jahowa, gabe mardosa ma sude jolma. Nang pe songon i, pasti saut do sakkap ni Debata. Dibahen Jahowa do cara na asing asa boi saut sakkapna i. Pittor dibahen Debata ma sada Harajaon di surgo na lao pasautton sakkapna tu jolma dohot tu tano on.—Mat. 25:34. w23.10 20 ¶6-7

Diurupi Jahowa do hita asa unang menyerah. Memang dang sai mura mangatasi hagaleonta i. Tarlumobi molo nungnga martaon-taon hita mangatasi i. Sipata, olo do upparah hagaleonta i sian hagaleon na diadopi si Petrus. Alai diurupi Jahowa do hita asa unang menyerah. (Ps. 94:​18, 19) Taida ma jolo pengalaman ni sahalak donganta bawa. Homoseksual hian do ibana saleleng martaon-taon andorang so marsiajar Bibel. Alai dung marsiajar Bibel ibana, muba do ibana. Nang pe songon i, olo do sipata muncul keinginanna na sala i. Alai dang menyerah ibana. Aha ma na mangurupi ibana asa unang menyerah? Didok ibana, “Dilehon Jahowa do gogo tu au. Sian on au marsiajar, boi do hita toktong mangihutton standar ni Jahowa. Dipakke Jahowa do au lao mangulahon lomo ni rohana. Jala nang pe dang sempurna au, sai dipargogoi Ibana do au.” w23.09 23 ¶12

Hamu akka na poso, berupaya ma hamu asa togu haporseaonmuna tu Jahowa. Pillit hamu ma ise na naeng ditiru hamu, marlatik ma hamu asa manat marpikkir jala boi diandalhon. Parsiajari ma akka keterampilan, jala parade hamu ma dirimuna asa boi mandapot tanggung jawab di ari na naeng ro. Dung diparsiajari hamu artikel on, olo do ra dihilala hamu hira na maol hian do on diulahon. Alai ingot ma, pasti boi do hamu marhasil mangulahon i. Alana massai lomo do roha ni Jahowa mangurupi hamu. (Jes. 41:​10, 13) Asing ni i, lomo do roha ni akka dongan di huria mangurupi hamu. Molo marhasil hamu mangulahon i sude, pasti marlas ni roha do hamu annon. Hamu akka doli-doli, holong hian do rohanami tu hamu. Sai anggiat ma dipasu-pasu Jahowa upayamuna asa gabe bawa na togu haporseaonna tu Jahowa! w23.12 29 ¶19-20

Bayakkon ma hamu rap marpungu dohot akka donganmuna. Massai las do rohamuna di tikki i. Dung sae acara i, marfoto ma hamu. Dung i marfoto ma hamu dua hali nai, atik boha foto na parjolo i hurang denggan hasilna. Saonari nungnga adong be tolu foto naung dibuat hamu. Alai dung diparrohahon hamu, diida hamu ma adong di foto na parjolo i donganmuna na murhing bohina. Dihapus hamu ma foto na hurang denggan i. Alana adong dope dua foto nai na denggan hasilna. Disi tersenyum do sude donganmuna i. Pasti jotjot do hita rap marsaor dohot akka dongan. Alai olo do ra sada tikki adong donganta na makkatahon manang mangulahon na so denggan na mambahen haccit rohatta. Aha do na ikkon taulahon tu kenangan na so denggan i? Ikkon talupahon do i. Sarupa ma i songon manghapus foto na hurang denggan i. (Eps. 4:32) Taingot godang nai dope kenangan na denggan tikki rap hita dohot nasida. Akka kenangan na denggan i ma na ikkon torus taingot jala taargai. w23.11 12-13 ¶16-17

Hata Junani na dipakke si Paulus di ayat i patuduhon, ikkon tarida do na diargai sahalak borua pakkilalaan ni halak na asing sian carana marpakkean. Bangga do hami tu hamu akka borua na poso ala serep rohamuna mangihutton nasehat on. Ikkon marbisuk do sahalak borua asa boi gabe halak na togu haporseaonna tu Jahowa. Halak na marbisuk, i ma halak na mamboto dia na sittong dohot na sala, dung i dipillit ibana do mangulahon na sittong. Parrohahon ma contoh ni si Abigail. Hea do dibahen suamina keputusan na so denggan na boi parohon jea tu keluargana. Alai pittor hatop do si Abigail bertindak, alani i gabe selamat ma keluargana. (1 Sam. 25:​14-23, 32-35) Molo marbisuk hita songon si Abigail, boi ma taboto andigan tikkina makkatai jala andigan tikkina hohom. Asing ni i molo marbisuk hita, gabe boi ma hita toktong parduli tu akka dongan, alai dang sappe mangattoi urusan ni nasida.—1 Tes. 4:11. w23.12 20 ¶8-9

Disurat Apostel Paulus do on tu akka dongan na di huria Rom. Akka dongan na disi nungnga mamboto taringot Jahowa dohot Jesus, nungnga marhaporseaon, jala nungnga gabe halak Kristen. Alani haporseaon ni nasida, ‘didok Debata ma nasida halak na mangulahon na sittong’. Asing ni i, dimiahi Debata ma nasida marhite tondi parbadiana. (Rom 5:1) Jala pos situtu do roha ni nasida, na lao saut do janji ni Debata i. Dipaboa si Paulus do muse tu halak Kristen na miniahan di Epesus taringot janji ni Debata na dilehon tu nasida. Lao dijalo nasida ma ‘hasangapon na dilehon Debata tu akka na badia’. (Eps. 1:18) Dipaboa si Paulus do muse tu akka dongan na di Kolosse, didia do annon nasida mandapot upa i. Didok ibana, hadiah na dipaima-ima nasida i, i ma hangoluan salelengna di surgo. (Kol. 1:​4, 5) Jadi lao dipahehe ma sude halak Kristen na miniahan asa boi mangolu saleleng ni lelengna di surgo jala rap mamaretta dohot Kristus.—1 Tes. 4:​13-17; Pgk. 20:6. w23.12 9 ¶4-5

Hata Junani “manjaga” biasana dipakke lao manggombarhon akka tentara na manjaga sada kota asa toktong aman sian musu. Ala diboto akka halak na di kota i na dijaga akka tentara nasida, gabe aman ma dihilala nasida. Suang songon i ma, tikki hadameon na sian Debata i manjaga roha dohot pikkiranta, gabe boi ma aman jala tenang tahilala. (Ps. 4:8) Nang pe dang pittor muba situasitta songon pengalaman ni si Hanna, alai boi dope dame rohatta. (1 Sam. 1:​16-18) Jala molo dame rohatta, gabe boi ma hita denggan marpikkir jala mambahen keputusan. Aha do na porlu taulahon? Songon akka halak na di kota na manjou akka tentara asa dijaga nasida, ikkon songon i ma hita tikki borat sitaononta. Tapangido ma bantuan ni Jahowa. Boha do carana? Torus ma martangiang tu Ibana, sappe boi tahilala dame na sian Debata. (Luk. 11:9; 1 Tes. 5:17) Tikki borat sitaononmuna, toktong ma hamu martangiang tu Jahowa. Hilalaonmuna ma dame na sian Jahowa i manjaga roha dohot pikkiranmuna.—Rom 12:12. w24.01 21 ¶5-6

Lao pabadiahon goar ni Bapakna, rela do Jesus disiksa, dileai, jala didok na so toho taringot ibana. Dang maila ibana nang pe dibahen songon i. Alana diboto ibana do nungnga dioloi ibana sude paretta ni Bapakna. (Heb. 12:2) Asing ni i, diboto ibana do na diuji Sibolis ibana di tikki i. (Luk. 22:​2-4; 23:​33, 34) Lomo do roha ni Sibolis asa dang setia Jesus. Alai dang marhasil Sibolis. Dibuktihon Jesus do na pargabus Sibolis jala na boi do toktong setia naposo ni Debata nang pe marsitaonon. Lomo do rohamuna mambahen las roha ni Jesus? Molo i do, toktong ma puji goar ni Jahowa jala urupi ma halak na asing marsiajar taringot akka sifatna. Molo diulahon hamu songon i, na maniru Jesus do hamu disi. (1 Ptr. 2:21) Gabe las ma roha ni Jahowa dibahen hamu. Jala songon Jesus boi ma dibuktihon hamu, pargabus na so ubboto ila do Sibolis i. w24.02 11-12 ¶11-13

Saleleng lima taon na parpudi on, adong lobi sian sajuta halak naung tardidi gabe Saksi Jahowa. Molo dilehon hamu ngolumuna tu Jahowa, lapatanna nungnga rade hamu gabe sisean ni Jesus, jala mangulahon lomo ni roha ni Debata ma na uppetting di ngolumuna. Alai aha ma na ikkon diulahon hamu? Didok Jesus, “Manang ise na naeng mangihutton au, ikkon disoadahon do dirina.” (Mat. 16:24) Bahasa Junani “ikkon disoadahon do dirina” lapatanna, dang mangihutton lomo ni rohana sandiri be ibana. Jadi molo nga talehon ngolutta gabe naposo ni Jahowa, dang taulahon be akka ulaon na dihasogohon Jahowa. (2 Kor. 5:​14, 15) Termasuk ma i “parniulaon ni daging”, songon seks na so patut. (Gal. 5:​19-21; 1 Kor. 6:18) Maol do dihilala hamu mangulahon paretta ni Debata i? Molo holong do rohatta tu Jahowa jala pos rohatta na bermanfaat do sude parettana, tottu dang maol mangulahon i.—Ps. 119:97; Jes. 48:​17, 18. w24.03 2 ¶1; 3 ¶4

Dilehon Jahowa do tondi parbadiana tu halak na dihaholongi Ibana. (Mat. 12:18) Sukkun ma tu dirimuna, ‘Nungnga hupatudu parbue ni tondi parbadia di ngolukku ganup ari?’ Dung marsiajar Bibel, gabe lam sabar do hamu tu halak na asing? Pos ma rohamuna pasti las do roha ni Jahowa mangida hamu molo marsitutu hamu patuduhon parbue ni tondi parbadia. Dilehon Jahowa do tobusan lao manesa dosa ni akka halak na dihaholongi Ibana. (1 Tim. 2:​5, 6) Alai boha do molo ragu dope hita tu holong ni Jahowa? Nang pe porsea hita tu tobusan ni Jesus jala nungnga tardidi, taingot ma boi do sala pakkilalaatta. Jadi unang ma pos rohatta tu pakkilalaatta sandiri, alai pos ma rohatta tu Jahowa. Molo di Jahowa, manang ise na porsea tu tobusan ni Anakna, dianggap Ibana do nasida halak na tigor marroha jala marjanji do Ibana lao mangalehon pasu-pasu tu nasida.—Ps. 5:12; Rom 3:26. w24.03 30 ¶15; 31 ¶17