Referensi tu Parpunguan Hangoluan dohot Pangkobasion na Laho Diparsiajari
3-9 FEBRUARI
ARTA NA ARGA NA ADONG DI BIBEL 1 MUSA 12-14
“Sada Parjanjian na Marlaba tu Hamu”
it-2-IN 478 ¶3
Parjanjian
Parjanjian tu si Abraham. Tikki di Mesopotamia si Abraham, i ma di kota Ur, kota ni halak Kaldea, disuru Jahowa ma ibana asa maninggalhon kota i tu inganan na lao patuduon ni Jahowa. (Ul 7:2, 3; 1Mus 11:31; 12:1-3) Jadi, lao ma ibana tu Kanaan manaripari sunge Euprat tanggal 14 Nisan 1943 SM. Jala disi ma dipukka parjanjian ni Jahowa dohot si Abraham. Di 2 Musa 12:40, 41 (LXX) dipaboa ma molo halak Israel tikki i tinggal di Mesir dohot di tano Kanaan dope. Dukkon 430 taon, i ma di ari Paska tanggal 14 Nisan 1513 SM, kaluar ma nasida sian tano Mesir. (2Mus 12:2, 6, 7) Jala disi ma tikkina dibahen Parjanjian Hukum. (Gal 3:17) Dukkon i, tikki di Sikem si Abraham, didok Jahowa ma muse tu ibana, “Tu pinomparmu ma lehononku tano on.” On patuduhon adong do hubungan ni parjanjian tu si Abraham dohot tu surirang na didok Jahowa di porlak Eden. Jala marhite “pinoppar” ni si Abraham ma saut surirang na didok di 1 Musa 3:15 i. (1Mus 12:4-7) Di pudian ni ari, dipatakkas Jahowa do muse janjina i tu si Abraham, songon na disurat di 1 Musa 13:14-17; 15:18; 17:2-8, 19; 22:15-18.
w89-IN 1/7 3 ¶4
Boasa Ikkon Botoonmuna Taringot si Abraham?
Janji na palashon roha do on. Jala dua hali ma muse didok Jahowa janji on tu si Abraham. (1 Musa 18:18; 22:18) Lao pasauthon janjina i, paheheon ni Jahowa ma akka halak naung mate. Sada pakkirimon do on tu akka halak naung mate, alana lao hilalaon ni nasida nama hangoluan di tano on dos songon Paradeiso di mulana i. Dung i, diajari ma nasida asa boi mandapot hangoluan saleleng ni lelengna.—1 Musa 2:8, 9, 15-17; 3:17-23.
it-1-IN 977 ¶8
Hukum
Sian bukti sejarah, didok akka pakar, molo adong tano na naeng dijual, ikkon dipatudu panjual tano i do tu panuhor, sadia bidang tano i. Jala ikkon dipaboa do batas-batas ni tano i. Molo didok panuhor i, “nungnga huida be”, lapatanna nungnga sah be di ibana tano i. Suang songon i ma tikki Jahowa marjanji tu si Abraham lao mangalehon tano Kanaan. Mulana, disuru Jahowa do si Abraham asa mangida sadia bidang tano i. Memang, dang didok si Abraham, “nungnga huida be”. Ala didok Debata do ra lao lehononna Tano na Dijanjihon i tu akka pinoppar ni si Abraham di pudian ni ari. (1Mus 13:14, 15) Ala si Musa do wakil ni halak Israel na sah, ibana do na disuru “mangida” tano i. Lapatanna, nungnga sah be halak Israel nampunasa tano i. Jala si Josua ma na manguluhon nasida di tikki i. (5Mus 3:27, 28; 34:4; rimangi ma tikki ditawarhon Sibolis tano on tu Jesus na disurat di Mat 4:8.) Adong muse cara na asing. Boi do tong panuhor i mardalan huhut mamareso tano i asa sah tano i gabe ampunana. (1Mus 13:17; 28:13) Somalna, di akka surat ni tano najolo, dipaboa do sadia godang hau na adong di tano na lao dijual i.—Bandingkon tu 1Mus 23:17, 18.
Mangalului Arta na Adong di Bibel
Pasaehon Parsalisian Marhite Holong
12 Dipatuduhon do di Bibel, na boi do toktong naposo ni Debata mardame nang pe sipata dang sapandapot dohot dongan nasida. Umpamana, tubu ma parbadaan di tonga-tonga ni parmahan ni si Abraham dohot si Lot ala dang sae be inganan parmahanan tu pinahan ni nasida. Ala lomo roha ni si Abraham nasida mardame, parjolo do disuru ibana si Lot mamillit ingananna. (1 Mus. 13:1, 2, 5-9) Gabe pogos do si Abraham? Dang. Gariada, marjanji do Jahowa lao mangalehon godang pasu-pasuNa tu si Abraham. (1 Mus. 13:14-17) Aha do na boi taparsiajari? Nang pe rugi hita, alai lehonon ni Jahowa do pasu-pasuNa molo rade hita pasaehon parsalisian marhite holong.
it-1-IN 1026 ¶4
Malim
Si Melkisedek, i ma raja ni Salem. Sahalak malim (kohen) do ibana, alai imbar do ibana sian malim na asing. Dang adong dipaboa di Bibel taringot tarombona, ari hatutubuna, dohot ari hamamatena. Dang ala malim bapakna umbahen na gabe malim ibana. Dang adong na songon ibana jala dang adong panggantina. Raja do ibana laos gabe malim. Umsangap do hamalimonna sian hamalimon ni halak Lepi. Alana tikki dang tubu dope si Lepi, nungnga digarar si Lepi saparsampulu tu si Melkisedek marhite si Abraham. Jala dipasu-pasu si Melkisedek ma si Abraham. (1Mus 14:18-20; Heb 7:4-10) Jadi, si Melkisedek manggombarhon Jesus Kristus, i ma “malim na saleleng ni lelengna na songon si Melkisedek”.—Heb 7:17.
10-16 FEBRUARI
ARTA NA ARGA NA ADONG DI BIBEL 1 MUSA 15-17
“Boasa Digatti Jahowa Goar ni si Abram dohot si Sarai?”
w02-IN 1/6 16 ¶15
Tiru ma Hatigoran ni Jahowa
Asa boi didok sasahalak tigor di adopan ni Jahowa, dang cukup holan mangulahon lomo ni roha ni Jahowa. Alai, ikkon dipatudu do haporseaonna, pangargaionna, holongna tu Jahowa dohot tu sude janjina sian nasa rohana. Songon na didok Bibel, “Porsea ma si Abram di Jahowa, gabe hatigoranna do i dietong Jahowa.” (1 Musa 15:6) Jadi, si Abraham dang holan porsea taringot tu Debata, alai porsea do ibana taringot tu “pinompar” naung dijanjihon i. (1 Musa 3:15; 12:2; 15:5; 22:18) Alani haporseaonna dohot parniulaonna, gabe boi ma ibana marale-ale tu Jahowa jala dipasu-pasu do ibana dohot akka halak na toktong marsihohot tu Jahowa nang pe nasida dang sempurna.—Psalmen 36:11; Rom 4:20-22.
it-1-IN 27 ¶2
Si Abraham
Nungnga di Kanaan be nasida hira-hira saleleng sappulu taon. Alai dang hamil dope si Sara. Alani i, disuru si Sara ma hatobanna, i ma si Hagar manggattihon ibana asa boi manubuhon anak di si Abraham. Jala dioloi si Abraham do i. Di taon 1932 SM, tikki marumur 86 taon si Abraham, tubu ma si Ismael. (1Mus 16:3, 15, 16) Dukkon i, taon 1919 SM, tikki marumur 99 taon si Abraham, disuru Jahowa ma asa disunat sude baoa di keluargana. On ma na gabe bukti hubungan parjanjian ni Jahowa dohot si Abraham. Di tikki i ma digatti Jahowa goar ni si Abram gabe si Abraham. Didok Jahowa, “Ai nunga hupabangkit ho gabe ompu ni torop angka bangso.” (1Mus 17:5, 9-27; Rom 4:11) Dukkon i, ro ma tolu suru-suruan na menjelma gabe jolma manjuppangi si Abraham. Jala didok ma lao hamil nama si Sara jala manubuhon sada anak di taon na ro!—1Mus 18:1-15.
w09-IN 1/2 13
Lapatan ni Sada Goar
Digatti Debata do goar ni piga-piga halak lao paboahon aha na lao masa. Umpamana, digatti Ibana do goar ni si Abram, na lapatanna “Ompu na Dipasangap”, gabe si Abraham na lapatanna “Ompu ni Torop Bangso”. Dos songon goarna i, gabe ompu ni torop bangso do ibana. (1 Musa 17:5, 6) Goar ni si Sarai pe, na lapatanna “Parbada” digatti Debata do gabe “si Sara” na lapatanna “Boru ni Raja”. Las do rohana ala digatti Debata goarna i. On patuduhon na gabe ompu ni akka raja do ibana.—1 Musa 17:15, 16.
Mangalului Arta na Adong di Bibel
it-1-IN 1334 ¶1
Keterangan Waktu
Didok Jahowa tu si Abram (Abraham), “Ia pinomparmu gabe panompang ma di tano ni halak; gabe hatoban disi jala porsuk bahenonna tu nasida, opatratus taon lelengna.” (1Mus 15:13, Bibel siganup ari; ida muse Ul 7:6, 7.) Hata on didok Jahowa tikki dang tubu dope si Isak, i ma na gabe “pinoppar” na dijanjihon i. Taon 1932 SM, tubu ma si Ismael sian si Hagar, hatoban ni si Sara. Dung i taon 1918 SM, tubu ma si Isak. (1Mus 16:16; 21:5) Tikki kaluar halak Israel sian Mesir, marujung ma ‘haporsuhon’ ni nasida. (1Mus 15:14) Opat ratus taon andorang so masa i, i ma di taon 1913 SM, marumur lima taon ma si Isak. Di tikki i nungnga sirang susu ra si Isak, jala gabe “panompang” do ibana. Susa do ibana di tikki i ala ‘direhei’ si Ismael ibana. Marumur 19 taon ma si Ismael disi. (1Mus 21:8, 9) Nang pe di tikkinta saonari sepele do pambahenan ni si Ismael i, alai dang songon i di tikki ni si Abraham. Buktina, diusir si Sara do si Hagar dohot si Ismael, jala dang muruk Debata disi. (1Mus 21:10-13) Takkas do disurat di Bibel songon dia pambahenan ni si Ismael i. On ma mulana haporsuhon na 400 taon i, jala marujung ma i tikki kaluar halak Israel sian Mesir.—Gal 4:29.
it-1-IN 647 ¶3
Halak Israel Kaluar sian Mesir
Generasi na paopatton. Taingot ma nungnga didok Jahowa tu si Abraham, lao mulak do pinopparna tu Kanaan di generasi na paopatton. (1Mus 15:16) Sian tikki dimulai parjanjian tu si Abraham sahat tu na kaluar halak Israel sian Mesir lelengna 430 taon. Adong lobi sian opat generasi na mangolu di tikki i. Songon na didok Bibel, ganjang do umur ni jolma di tikki i. Alai sasittongna, holan 215 taon do halak Israel tinggal di Mesir. Jadi, generasi na paopatton na didok ayat i dietong sian tikki halak Israel masuk tu Mesir sahat tu na kaluar nasida. Boi ma tappake sada contoh sian sada suku Israel, i ma suku Lepi: (1) si Lepi, (2) si Kohat, (3) si Amram, dohot (4) si Musa.—2Mus 6:16, 18, 20.
17-23 FEBRUARI
ARTA NA ARGA NA ADONG DI BIBEL 1 MUSA 18-19
“‘Siuhumi Liat Portibi on’ Mangaripashon Sodom dohot Gomorra”
Sai na Denggan do na Diulahon “Siuhumi Liat Portibi On”
“TUNG na so uhum ma bahenon ni Siuhumi liat portibi on?” (1 Mus. 18:25) Dang na ganggu roha ni si Abraham umbahen na disukkun ibana songon i. Alai sukkun-sukkunna i patuduhon pos do rohana tu hatigoran ni Jahowa na manguhumi Sodom dohot Gumora. Pos rohana, dang olo Jahowa “mambunu na tigor rap dohot parjahat” jala dang hea ro tu pikkiran ni si Abraham songon i. Didok Jahowa ma taringot diriNa, “Tau partanobatoan do Ibana, na so hasurahan di pambahenanna, ai na tigor do luhut dalanna, sihaposan do Debata, ndang adong hageduhonna, na tigor jala na bonar do Ibana.”—5 Mus. 31:19; 32:4.
Sabar—Toktong Togu ala Adong na Tinujuna
Jahowa do sitiruon na dumenggan taringot hasabaron. (2 Ptr. 3:15) Jotjot do tajaha di Bibel taringot Jahowa na massai sabar. (Neh. 9:30; Jes. 30:18) Umpamana, tikki Jahowa lao mangaripashon huta Sodom, marulak-ulak do disukkun si Abraham taringot i. Alai sabar do Jahowa manangihon ganup sukkun-sukkun dohot holso ni roha ni si Abraham. Didok Jahowa, diattusi Ibana do holso ni roha ni si Abraham. Jala dipapos do rohana dang na lao ripashononna huta i nang pe holan sappulu halak na tigor disi. (1 Mus. 18:22-33) Sai sabar do Jahowa manangihon jala dang hea pittor muruk!
w10-IN 15/11 26 ¶12
Jahowa do na Tama Mamaretta!
12 Pos do rohatta, lao patuduon ni Jahowa nama hakna lao mamaretta. Dang pasombuon ni Jahowa toktong adong hajahaton di tano on, songon na masa di tikkinta saonari. Umpamana, diripashon Ibana do akka parjahat di tikki Aek na Sumar, di Sodom dohot Gomorra, songon i nang si Firaun dohot akka tentarana. Si Sisera pe raphon tentarana dohot si Sanherib pe raphon tentara Asiria, dang tolap ni nasida mangalo Jahowa. (1 Mus. 7:1, 23; 19:24, 25; 2 Mus. 14:30, 31; Pangh. 4:15, 16; 2 Raj. 19:35, 36) Alani i, pos ma rohatta dang sai pasombuon ni Jahowa akka halak mangaleai goarna jala mambahen susa akka naposona. Jala, nungnga taida saonari tanda haroro ni Jesus dohot tanda ni panutup ni jaman on.—Mat. 24:3.
Mangalului Arta na Adong di Bibel
w04-IN 15/1 27 ¶3
Akka na Denggan sian Bukku 1 Musa—II
19:8—Boasa olo si Lot mangalehon boruna tu halak Sodom? Di adat ni halak Timur, martanggung jawab do parjabu lao manjaga tamuna. Gariada, rade do nasida mate humokkop tamuna. I do na diulahon si Lot. Barani do ibana kaluar mandapotton akka baoa di Sodom. Ditutup ibana ma pintu jala dialo ma akka baoa i. Tikki dilehon ibana akka boruna tu halak Sodom i, naung diboto ibana do molo tamuna i suru-suruan ni Debata. Jala, pos do rohana, jagaon ni Debata do akka boruna i, songon tikki Debata manjaga si Sara tikki di Mesir. (1 Musa 12:17-20) Tutu do, dijaga Jahowa si Lot dohot akka boruna.
Mangurupi Akka Halak na Marsak
3 Dibahen si Lot do keputusan na sala. Dipillit ibana do tading di Sodom, hape akka halak na jahat do na tading disi. (Jaha 2 Petrus 2:7, 8.) Alai ala pinda tusi, gabe godang do hasusaan na diadopi si Lot, nang pe godang artana. (1 Mus. 13:8-13; 14:12) Jala ra, ala na holong situtu do roha ni istri ni si Lot tu kota i manang tu akka halak na disi, umbahen dang dioloi ibana Jahowa. Alani i, tikki dibahen Jahowa udan api dohot barerang, mate ma istrina i. Dua boru ni si Lot nungnga martunangan dohot halak Sodom. Alai mate do tunangan ni nasida i. Mago do sude arta ni si Lot, jabuna, jala mate istrina. (1 Mus. 19:12-14, 17, 26) Alai nang pe songon i, tikki susa si Lot toktong do sabar Jahowa tu ibana.
24 FEBRUARI–1 MARET
ARTA NA ARGA NA ADONG DI BIBEL 1 MUSA 20-21
“Sai Dipasaut Jahowa do Sude Janjina”
Ina ni Akka Raja
Na gale do haporseaon ni si Sarah umbahen na mekkel ibana? Dang songon i. Bibel mandok, “Laos hinorhon ni haporseaon do dijangkon si Sara gogo manubuhon pomparan maralohon timbo ni umurna, ala haposan di rohana na marbagabagahonsa.” (Heber 11:11) Takkas do ditanda si Sarah songon dia Jahowa; pos do rohana na lao saut do sude janjiNa. Sude do hita mangkaporluhon haporseaon na togu songon si Sarah. Denggan do molo tatanda Debata na disurat di Bibel. Molo taulahon i, taboto ma sittong do haporseaon na pinatudu ni si Sarah. Toktong do Jahowa marsihohot tu sude janjiNa. Sipata, dipakke Ibana do cara na palongang roha, mambahen songgot roha manang mambahen hita gabe mekkel!
‘TANGIHON MA SUDE NA NIDOKNA’
Tikki marumur 90 taon, digohi ma na pinaimaima ni si Sarah! Ditubuhon ma sada anak di si Abraham, na di tikki i marumur 100 taon. Songon naung dipaboa Debata, digoari si Abraham ma anakna i si Isak manang “Siparengkelon”. Boi ma tarimangi songon dia si Sarah naung gale alai mekkel suping huhut didok, “Siparengkelon do dibahen Debata tu ahu; nasa na umbegesa parengkelanna do ahu.” (1 Musa 21:6) On ma silehon-lehon ni Jahowa na umbalga di ngoluna. Alai, ikkon rade do ibana mangulahon tanggung jawab na balga.
Tikki marumur lima taon si Isak, dibahen ma pesta sirang susu. Alai masa ma na so denggan. Diida si Sarah ma si Ismael na marumur 19 taon, jotjot mangarehei si Isak. Ra, dang holan na diparekkel-ekkeli si Isak. Hea do didok apostel Paulus taringot tu parange ni si Ismael, i ma si penganiaya. Dihilala si Sarah, sada parsoalan na serius do on. Diboto si Sarah, rikkot do si Isak, ala marhite ibana do digohi sakkap ni Debata. Jadi, barani ma ibana paboahon i sude tu si Abraham. Dipangido ma asa dipalao si Hagar dohot si Ismael.—1 Musa 21:8-10; Galatia 4:22, 23, 29.
Songon dia do pakkilalaan ni si Abraham? Didok di Bibel, “Sogo situtu do roha ni si Abraham di hata i, ala ni anakna i.” Massai holong do rohana tu si Ismael, ala ibana do anakna na parjolo. Alai, Jahowa do na takkas mamboto sasude, alani i diurupi Jahowa ma nasida pasaehon parsoalan i. Didok di Bibel, “Alai ninna Debata ma tu si Abraham: Unang sogo roham taringot tu dakdanak i dohot taringot tu hatobanmu; tangihon ma sude na nidok ni soara ni si Sarah tu ho, ai marhitehite si Isak do targoar di ho pinompar.” Dipapos Jahowa ma roha ni si Abraham, toktong do sarihononNa si Hagar dohot si Ismael. Porsea jala dioloi si Abraham do i.—1 Musa 21:11-14.
Mangalului Arta na Adong di Bibel
wp17.3 12, surat na di toru
“Boru-boru na Uli Rupa do Ho”
Ianakhon ni si Tara do si Abraham dohot si Sarah, alai dang saina nasida. Alani i, na mariboto do nasida. (1 Musa 20:12) Saonari, dang boi sasahalak marhasohotan tu ibotona. Alai, asing do di tikki i. Jonok dope jolma tu hangoluan na sempurna, na hea dihilala si Adam dohot si Hawa. Molo marhasohotan na mariboto, dang apala mangkorhon na roa i tu pinopparna ala massai sehat dope halak najolo i. Hira-hira 400 taon dukkon i, nungnga dao be jolma sian hangoluan na sempurna. Diorai do sasahalak marhasohotan tu sisolhotna di Patik ni si Musa.—3 Musa 18:6.
Rikkot do Toktong Maju di Partondion?
9 Ra, lomo do rohatta mangalehon gumodang tikki di ulaon partondion. Alai, songon dia do molo dang dilehon hak na sumurung tu hita, manang situasinta mambahen hita maol mangalehon gumodang tikki? Sabar ma paimahon. (Mik. 7:7) Nang pe dipaloas Jahowa masa sisongon i, pos ma rohatta sai na urupanNa do hita. Tatiru ma si Abraham, marjanji do Jahowa mangalehon ianakhon tu ibana. Alai, leleng do ibana paimahon andorang so tubu dope si Isak.—1 Mus. 15:3, 4; 21:5; Heb. 6:12-15.
10 Olo do dang sabar hita paimahon. (Poda 13:12) Alai molo sai marungut-ungut hita, boi do i mambahen hita gabe marmetmet ni roha. Alani i, taparhaseang ma tikkinta lao padengganhon parange asa boi denggan hita mangulahon tanggung jawab na dilehon tu hita di joloan ni ari.