Referensi tu Parpunguan Hangoluan dohot Pangkobasion na Laho Diparsiajari
© 2024 Watch Tower Bible and Tract Society of Pennsylvania
4-10 NOVEMBER
ARTA NA ARGA NA ADONG DI BIBEL PSALMEN 105
“Diingot Ibana do Parjanjian na Binahenna Saleleng ni Lelengna”
Patogu ma Haporseaonmuna tu Janji ni Jahowa Taringot Tano na Imbaru
11 Pikkirhon ma piga-piga janji ni Jahowa tu naposona najolo na hira na so mungkin terjadi. Misalna didok Jahowa do tu si Abraham dohot si Sara na lao marianakkon nasida nang pe nungnga matua. (1 Mus. 17:15-17) Didok Ibana do muse tu si Abraham, pinopparna do annon na lao mewarisi tano Kanaan. Hira na so mungkin do i terjadi alana saleleng martaon-taon pinoppar ni si Abraham, i ma halak Israel gabe hatoban di Mesir. Alai tutu do saut janjina i. Belakangan, dipaboa Jahowa do tu si Elisabet na lao marianakkon ibana nang pe nungnga matua. Dipaboa Jahowa do muse tu si Maria sahalak perawan, na lao ditubuhon ibana Anak ni Debata. Jala marhite Anakna i ma pasautton ni Jahowa janjina marribu taon naung salpu di Taman Eden!—1 Mus. 3:15.
12 Molo tarimangi sude janji ni Jahowa jala songon dia Ibana pasautton i, gabe taattusi ma Debata na marhuaso do Ibana. Gabe lam togu ma haporseaotta tu janjina taringot tano na imbaru. (Jaha Josua 23:14; Jesaya 55:10, 11.) Haporseaotta i mambahen hita lam denggan paposson roha ni akka halak pasti saut do tano na imbaru i, dang holan nipi i. Tikki paboahon janji taringot tano na imbaru dohot langit na imbaru didok Jahowa do, “Sittong jala boi do dihaporseai akka hata on.”—Pgk. 21:1, 5.
it-1 726 ¶3
Hata ni Debata
Sude do toppaan ni Debata mangoloi hatana. Jala boi do dipakke Ibana toppaanna i lao pasautton lomo ni rohana. (Ps 103:20; 148:8) Boi do dihaporseai hatana jala sai dipasaut Ibana do sude janjina. (5Mus 9:5; Ps 105:42-45) Songon na didok di Bibel, “martahan do hata ni Debatanta ro di saleleng ni lelengna” jala dang mulak hatana i anggo so jolo adong hasilna.—Jes 40:8; 55:10, 11; 1Ptr 1:25.
Arta na Adong di Bibel
w86_s-30 10 ¶15
Peranan ni na Poso asa Marsada Keluarga
15 “Diikkat nasida do patna mamakke ratte. Jala dibahen do ratte tu rukkungna. Gabe ias do ibana dibahen hata ni Jahowa, sahat tu na saut na nidok ni Debata.” (Psalmen 105:17-19) Saleleng 13 taon, gabe hatoban jala dipenjarahon do si Josep sahat tu na saut janji ni Jahowa tu ibana. Nang pe dang Jahowa na mambahen ibana susa, alai dipaloas Jahowa do ibana manaon i asa boi ibana taruji. Toktong do pos roha ni si Josep tu janji ni Jahowa i nang pe marsitaonon ibana? Gabe lam denggan do akka sifatna saleleng adong sitaononna i? Misalna, gabe lam sabar do ibana? Lam serep do rohana? Lam jonok do hubunganna tu Jahowa? Jala lam bertanggung jawab do ibana lao mangulahon tugas na umbalga di joloan ni ari? Dung salpu sitaonon i, dos ma si Josep songon mas naung ditutung di api. Gabe lam ias do ibana jala lam arga di Debata. Boi ma dipakke Debata ibana lao mangulahon tugas na umbalga.—1 Musa 41:14, 38-41, 46; 42:6, 9.
11-17 NOVEMBER
ARTA NA ARGA NA ADONG DI BIBEL PSALMEN 106
“Dilupahon Nasida do Debata na Paluahon Nasida”
“Ise na Mangalehon Dirina tu Jahowa!”
13 Mabiar do halak Israel ala mangida huaso ni Jahowa. Ala mabiar nasida, gabe disuru ma si Musa tu Dolok Sinai asa mangkatai tu Jahowa. (2 Mus. 20:18-21) Ala ndang marnamulak si Musa tu parkemahan, gabe leleng do nasida paimahon ibana. Holsoan ma nasida di halongonan ala ndang adong na manguluhon nasida. Boasa songon i? Ala holan mangasahon si Musa do nasida. Jadi didok nasida ma tu si Aron, “Ndang huboto hami manang na mahua si Musa, na manogihon hami haruar sian Misir. Ala ni i, bahen ma di hami sada debata, asa adong na manguluhon hami.”—2 Mus. 32:1, 2, Bibel siganup ari.
Arta na Adong di Bibel
w06 15/7 13 ¶9
Akka na Denggan sian Bukku Psalmen Bagian Patoluhon Dohot Paopatton
106:36, 37. Di ayat on dipatudos do halak na manomba patung songon na mangalehon pelean tu suru-suruan na jahat. Sian on gabe taboto ma, na lao dikendalihon suru-suruan na jahat do halak na manomba patung. Alani i ma didok Bibel, “Padao hamu ma dirimuna sian akka patung.”—1 Joh 5:21.
18-24 NOVEMBER
ARTA NA ARGA NA ADONG DI BIBEL PSALMEN 107-108
“Mandok Mauliate ma tu Jahowa, Ai na Burju do Ibana”
w07 15/4 20 ¶2
Sai Dipuji ma Jahowa di Tonga-Tonga ni Huria
2 Dibahen Jahowa pe huria dang holan lao papunguhon akka halak na sarupa keadaan ekonomina, latar belakangna, hobina, dohot na asing. Alai asa boi do hita rappak mamuji Debata Jahowa. Sian najolo pe nungnga adong huria. Songon na didok di Psalmen 35:18, “Pujiokku ma Ho di tonga-tonga ni godang halak.” Jala di Psalmen 107:31, 32 didok, “Sai mandok mauliate ma akka halak tu Jahowa alani holong na pinatuduna, dohot alani ulaonna na palongang roha na dibahen Ibana tu jolma. Sai dipasangap nasida ma Ibana di tonga-tonga ni akka halak na marpungu, sai dipuji nasida ma Ibana di tonga-tonga ni akka pamimpin na marpungu.”
w15 15/1 9 ¶4
Mandok Mauliate ma tu Jahowa asa Tajalo Pasu-Pasu
4 Songon dia do asa lam taargai haburjuon ni Jahowa tu hita? Na parjolo taingot ma muse akka pasu-pasu ni Jahowa, na gabe bukti na holong do roha ni Jahowa tu hita. On ma na diulahon panurat Psalmen. Luar biasa do dihilala ibana sude naung diulahon Jahowa tu ibana.—Jaha Psalmen 40:5; 107:43.
Arta na Adong di Bibel
it-2 145 ¶2
Halak Moab
Di pudian ni ari dung gabe raja si Daud, marporang ma halak Israel dohot halak Moab. Talu do halak Moab, jala ikkon digarar nasida do pajak tu si Daud. Dung sae porang i, disuru si Daud ma asa peak tentara ni Moab marbaris di tano. Jala diukkur ibana ma sude na marbaris i mamakke tali. Dipamate ma dua partolu sian nasida jala dipasombu ma mangolu na sapartolu nai. (2Sam 8:2, 11, 12; 1Kron 18:2, 11) Di parporangan i do ra si Benaya anak ni si Jehoyada pamatehon “dua anak ni si Ariel halak Moab i”. (2Sam 23:20; 1Kron 11:22) Ala monang si Daud tikki na marporang i dohot halak Moab gabe saut ma surirang na didok si Bileam na dipaboa lobi sian 400 taon sebelumna. Didok ibana, “Ro do sogot sada bintang sian si Jakkob, ro do sogot tukkot harajaon sian Israel. Hancurhononna do sogot ulu ni halak Moab, raphon ulu ni sude tentara na jahat.” (4Mus 24:17) Jala taringot on didok panurat psalmen, dipatudos Jahowa do halak Moab songon ‘baskom parbasuanna’.—Ps 60:8; 108:9.
25 NOVEMBER–1 DESEMBER
ARTA NA ARGA NA ADONG DI BIBEL PSALMEN 109-112
Tadukung ma Jesus, Rajatta i!
w06 1/9 13 ¶6
Akka na Denggan sian Bukku Psalmen Bagian Palimahon
110:1, 2—Aha do na diulahon ‘Tuan ni [si Daud]’, i ma Jesus Kristus, tikki hundul di sabola kanan ni Debata? Dung hehe Jesus, nakkok ma ibana tu surgo jala hundul ma ibana di sabola kanan ni Debata. Disi ma ibana paimahon sahat tu na mamaretta ibana gabe Raja di taon 1914. Saleleng na paimahon i Jesus, diurupi ibana ma akka na miniahan di ulaon marbarita dohot mambahen sisean. Jala diparade ibana do nasida asa boi rap mamaretta dohot ibana di Harajaonna.—Mateus 24:14; 28:18-20; Lukas 22:28-30.
w00 1/4 18 ¶3
Dang na lao Monang Akka Halak na Mangalo Debata!
3 Mulai sian abad 20, diserang do naposo ni Jahowa. Di godang negara, berupaya do akka halak na jahat mangorai naposo ni Debata paboahon barita na uli taringot Harajaon ni Debata. Alai sebenarna na dikendalihon Sibolis do nasida. Didok Bibel, “Mardalani do musumuna Sibolis i songon singa na marauang mangalului siboddutonna.” (1 Petrus 5:8) Dung marujung “tikki naung ditottuhon tu akka bangso” di taon 1914, dilantik Debata ma Anakna gabe Raja na baru na lao mamaretta tu tano on. Jala didok Debata do tu ibana, “Lao ma ho mangarajai tu tonga-tonga ni akka musum.” (Lukas 21:24; Psalmen 110:2) Dung gabe Raja Kristus, disappatton ibana ma Sibolis sian surgo tu tano on. Ala diboto Sibolis otik nai nama tikkina, muruk hian ma ibana tu akka halak Kristen na miniahan dohot tu biru-biru na asing. (Pangungkapon 12:9, 17) Aha ma akibat ni on tu akka naposo ni Debata?
be 76 ¶2
Bahen ma Kemajuan
Asa boi dipakke hamu bakatmuna, porlu do berinisiatif hamu. Contohna, olo do hamu parjolo mangajak akka dongan lao marbarita? Dilului hamu do cara lao mangurupi akka dongan di huria, songon halak na baru, na poso, na marsahit, manang na cacat? Olo do hamu mangalean tikki dohot gogomuna lao paiasson Bale Harajaon dohot mangurupi di acara parpunguan wilayah manang parpunguan regional? Olo do hamu mambahen tikkimuna lao merintis ekstra piga-piga hali di bagasan sataon? Boi do hamu gabe perintis biasa manang pinda tu huria na porlu diurupi? Hamu akka donganta bawa, berupaya do hamu memenuhi syarat asa gabe parhobas manang sintua? Molo rade hamu mangurupi jala manjalo tanggung jawab di huria, on patuduhon na dibahen hamu do kemajuan.—Ps. 110:3.
Arta na Adong di Bibel
Sude do hita boi mangurupi huria. Contohna, adong do di huriamuna dongan na matua manang na marsahit? Molo adong, olo do hamu menjemput nasida lao marpungu? Manang olo do hamu mangurupi marhite cara na asing, contohna mangurupi nasida belanja manang paiasson jabu ni nasida? (Jaha Jakobus 1:27.) Boi do tong hita gabe relawan lao paiasson jala mangarawat Bale Harajaonta. Dang adong na mamaksa hita mangulahon i. Alai molo holong do rohatta tu Debata dohot tu akka donganta, pasti “rade do [hita] mangurupi”.—Psalmen 110:3.
2-8 DESEMBER
ARTA NA ARGA NA ADONG DI BIBEL PSALMEN 113-118
Aha ma Sibahenotta lao Mambalos Haburjuon ni Jahowa?
w01 1/1 11 ¶13
Holong Mambahen Lam Togu Haporseaon
13 Sian hata ni Jesus on takkas ma taboto makkaholongi Jahowa do na uppetting di ngolutta. Alai dang pittor holong rohatta tu Jahowa disi tubu hita, ikkon berupaya do hita makkaholongi Ibana. Tikki parjolo sahali taboto taringot Ibana, gabe holong do ra rohatta tu Ibana. Dung i taparsiajari ma songon dia Ibana paradehon tano on lao di hita. (1 Musa 2:5-23) Taparsiajari ma muse burju hian do Jahowa tu hita. Jala dang pittor ditinggalhon Ibana jolma dung mardosa nasida. Gariada dibahen Ibana do cara lao manobus hita sian dosa. (1 Musa 3:1-5, 15) Burju do Ibana tu halak na setia jala dilean Ibana do Anakna na sasada i asa boi disesa dosatta. (Johannes 3:16, 36) Dung taboto sudena i, gabe lam bagas ma holongta tu Ibana. (Jesaya 25:1) Raja Daud mandok holong hian do rohana tu Jahowa ala disarihon ibana. (Psalmen 116:1-9) Saonari pe disarihon Jahowa do hita, ditogu-togu, dijaga, jala dipatogu. Lam godang na taparsiajari taringot Jahowa, lam bagas ma holongta tu Ibana.—Psalmen 31:23; Sepania 3:17; Rom 8:28.
w09 15/7 29 ¶4-5
Mangalehon sian Nasa Roha Balos ni Haburjuon ni Jahowa
Sukkun-sukkun do roha ni panurat psalmen, “Aha ma sibahenokku tu Jahowa lao mambalos sude akka na denggan na binahenna tu au?” (Ps. 116:12) Akka aha ma naung dijalo ibana sian Jahowa? Nungnga diurupi Jahowa ibana di tikki “susa” jala tikki ‘lungun rohana’. Jala dipalua Jahowa do ibana “sian hamatean”. Alani i lomo ma rohana lao mambalos haburjuon ni Jahowa. Aha ma na boi diulahon ibana? Didok ibana, “Gararokku ma sumpakku tu Jahowa.” (Ps. 116:3, 4, 8, 10-14) Marsitutu do ibana lao manggarar sumpana jala mangulahon tanggung jawabna tu Jahowa.
Hita pe boi do mangulahon i. Songon dia ma carana? Taihutton ma aturanna dohot prinsipna di ngolutta siganup ari. Alani i pastihon ma manomba Jahowa na paling petting di ngolutta jala rade ma hita ditogu-togu tondi parbadia. (Pjm. 12:13; Gal. 5:16-18) Sasittongna dang boi tabalos sude haburjuon ni Jahowa. Alai ‘las do rohana’ molo taulaon lomo ni rohana sian nasa rohatta. (Poda 27:11) Sada hasangapon do di hita boi mambahen las roha ni Jahowa!
Parsiajaran na Tadapot Sian Buku Tolu Musa
9 Parsiajaran na paduahon: Tasomba Jahowa ala naeng patuduhon hamauliateonta tu Ibana. Adong parsiajaran na ringkot sian pelean hamauliateon na diulahon halak Israel najolo. Sian buku 3 Musa, taboto ma na dilehon halak Israel do “sada pelean pujipujian” laho patuduhon hamauliateon ni nasida. (3 Mus. 7:11-13, 16-18) Sasintongna, ndang na ingkon dilehon sasahalak pelean hamauliateon, alai ala lomo do rohana mangalehon i. Jala on patuduhon, na holong do rohana tu Jahowa. Halak na mangalehon pelean i, keluargana, dohot angka malim boi mangallang jagal pelean i. Alai, adong piga-piga bagian sian pelean binatang i na ingkon dilehon tu Jahowa. Angka aha ma i?
10 Parsiajaran na patoluhon: Alani holongta, talehon do na dumenggan tu Jahowa. Dipaboa Jahowa do molo bagian na dumenggan sian pelean binatang, i ma tabo-tabona. Jala didok muse piga-piga bagian na asing sian binatang i, i ma ginjalna. (Jaha 3 Musa 3:6, 12, 14-16.) Alani i, las do roha ni Jahowa tingki rade halak Israel mangalehon i gabe pelean. Jala on patuduhon na lomo do roha ni nasida mangalehon na dumenggan tu Jahowa. Suang songon i ma, dilehon Jesus do na dumenggan tu Jahowa ala holong do rohana tu Ibana. (Joh. 14:31) Lomo do roha ni Jesus mangulahon sangkap ni Debata, jala holong do rohana tu patikna. (Ps. 40:9) Mansai las do roha ni Jahowa tingki mangida Jesus rade mangulahon lomo ni rohana!
11 Ulaonta manomba Jahowa, dos do songon pelean pardamean. Talehon do na dumenggan tu Jahowa, ala mansai holong do rohanta tu Ibana. Tontu las hian do rohana mangida marjuta halak sian ias ni roha manomba Ibana! Diida jala diargai Jahowa do aha na taulahon jala aha na mangonjar rohanta laho mangulahon i. On boi mangapuli rohanta. Umpamana, ala nunga matua, ra dihilala hamu ndang godang be na boi diulahon hamu. Alai pos ma rohamuna, diantusi Jahowa do i. Jala diida Ibana, holong do na mangonjar rohamu mangulahon aha na boi ulahononmuna. Las do rohana manjalo na dumenggan na dilehon hamu.
Arta na Adong di Bibel
w12 15/5 22 ¶1-2
Sukkun-Sukkun sian na Manjaha
Sahalak panurat psalmen mandok, “Lungun do roha ni Jahowa molo mate akka naposona na setia.” (Ps. 116:15) Arga do di Jahowa ngolu ni ganup naposona na setia. Alai hata na adong di Psalmen 116 on dang holan paboahon taringot hamatean ni sasahalak.
Alani i dang cocok dipakke ayat di Psalmen 116:15 on di jamita tikki adong na marujung ngolu, nang pe na mate i naposo ni Jahowa na setia. Boasa? Alana lapatan ni ayat i, i ma dang loason ni Debata mate sude naposona na setia, ala mararga do nasida di Ibana.—Ida Psalmen 72:14; 116:8.
9-15 DESEMBER
ARTA NA ARGA NA ADONG DI BIBEL PSALMEN 119:1-56
“Songon dia do Bahenon ni na Poso Manjaga Ngoluna asa Toktong Ias?”
w87_s-42 15 ¶10
Toktong do Dijaga Hamu Ias Dirimuna?
10 Di Epesus 5:5 didok si Paulus do, “Ai takkas do diboto hamu, manang ise na mangulahon seks na so patut, na mangulahon na ramun, manang na mangulahon hahisapon, dos songon halak na manomba akka patung do i. Akka halak na mangulahon sisongon i, dang parsidohot tu Harajaon ni Kristus dohot Debata.” Nang pe adong sipaingot na songon i, ganup taon adong do marribu donganta na didisiplin manang na dipecat ala mangulahon seks na so patut. Gabe “mangulahon dosa tu dagingna sandiri” ma nasida. (1 Korint 6:18) Jotjot do i masa ala dang dijaga nasida pangalahona asa sadalan tu hata ni Debata. (Psalmen 119:9) Misalna adong do donganta bawa dang manjaga pikkiranna sian akka na so denggan tikki liburan. Dang dilului ibana dongan sahaporseaon manang parpunguan tikki liburan i. Gariada dilului ibana ma akka dongan na so saksi. Ala didok rohana akka halak na burju do nasida, gabe dohot ma ibana tu akka ulaon na boi manegai hubunganna tu Jahowa. Adong do muse akka halak na paakrabhu dohot dongan sakarejona. Misalna, adong sahalak sintua na paakrabhu dohot borua dongan sakarejona. Gabe ditinggalhon ibana ma keluargana jala rap tinggal ma ibana dohot borua i! Akibatna gabe dipecat ma ibana. Jadi toho do na didok Bibel i, “Molo mardongan hamu tu halak na so denggan, sega do pangalahomuna na denggan i”!—1 Korint 15:33.
w06 15/6 25 ¶1
“Lomo do Rohakku tu Akka Sipaingotmu”
DILEHON Jahowa do sipaingot tu akka naposona na boi mangurupi nasida mangadopi akka hasusaan saonari. Boi do tadapot akka sipaingot i tikki manjaha Bibel, manang sian parsiajaran dohot komentar di parpunguan. Nungnga hea ra tajaha, tatangihon, manang tabahas akka sipaingot i. Alai ala jotjot hita lupa, porlu do dipaingot hita muse taringot tujuan ni Debata, uhumna, dohot petunjukna. Mandok mauliate do hita tu Jahowa ala dilehon Ibana akka sipaingot i. On boi mangurupi hita asa toktong semangat mangulahon lomo ni roha ni Debata di ngolutta. Alani i didok panurat psalmen ma tu Jahowa, “Lomo do rohakku tu akka sipaingotmu. I do na mamodai au.”—Psalmen 119:24.
w10 15/4 20 ¶2
Padao ma Matakku sian Akka na So Marguna!
2 Na taida i boi do gabe jorat di hita. Balga do pengaruh na taida tu pikkiranta. Boi do i mambahen taronjar rohatta lao mangulahon sakkap na di rohatta. Ala dirajai Sibolis do portibi on, godang ma halak na holan mangulahon lomo ni rohana sandiri. Jala dibahen nasida ma akka gambar dohot iklan na boi mambahen hita gabe lilu nang pe holan satokkin i taida. (1 Joh. 5:19) Alani i ma taboto boasa didok sahalak panurat psalmen tu Jahowa, “Padao ma matakku asa unang huida akka na so marguna. Jaga ma au asa toktong mangolu di akka dalanmu.”—Ps. 119:37.
Arta na Adong di Bibel
w05 15/4 10 ¶2
Marpos ni Roha tu Hata ni Jahowa
2 Taringot laba ni hata ni Debata do na diondolhon di Psalmen 119 on. Dibahen panurat psalmen pe akka ende on sesuai tu abjad, asa mura do ra diingot. Adong 176 ayatna jala disusun do i sesuai tu abjad ni bahasa Heber. Di bahasa aslina adong 22 bait ende on. Jala 8 baris ma sada bait, na dimulai sian huruf na sarupa. Di psalmen on dipaboa do taringot hata, uhum, sipaingot, dalan, patik, tudu-tudu, aturan, paretta, dohot ketetapan ni Debata. Di artikel on dohot di artikel na mangihut lao tabahas ma Psalmen 119 on sian terjemahan aslina, i ma bahasa Heber. Marhite mangarimangi pengalaman ni naposo ni Jahowa di tikki najolo dohot saonari, boi ma gabe lam taargai akka ende na adong di psalmen on. Jala gabe mandok mauliate do hita tu Debata ala dilehon Ibana Bibel tu hita.
16-22 DESEMBER
ARTA NA ARGA NA ADONG DI BIBEL PSALMEN 119:57-120
Asa Sabar Tikki Adong Sitaonon
w06 15/6 20 ¶2
“Massai Holong do Rohakku tu Patikmi!”
2 Ra sukkun-sukkun do rohamuna, “Songon dia patik ni Debata boi mangapuli roha ni panurat psalmen? Ala mandapot laba sian mangulahon patik ni Debata, toktong ma las roha ni panurat psalmen nang pe susa ibana dibahen akka musu. Gabe diboto ibana ma na parduli jala burju do Jahowa tu ibana. Asing ni i ala diulahon ibana patik ni Debata, gabe umbisuk ma ibana sian akka musuna jala i do na manjaga ngoluna. Jala ala dioloi ibana patik ni Debata, gabe dame ma rohana jala ias ma panggora ni rohana.—Psalmen 119:1, 9, 65, 93, 98, 165.
w00 1/12 14 ¶3
Dihaholongi Hamu do Sipaingot na sian Jahowa?
3 Holong do roha ni panurat psalmen tu sipaingot ni Debata. Didok ibana do di endena, “Toktong do huulahon parettam, hatop do i huulahon jala dang hupaleleng-leleng. Dililit tali ni akka parjahat do au, alai dang hulupahon patikmi.” (Psalmen 119:60, 61) Sipaingot ni Jahowa boi mangurupi hita mamboto na lao paluaonna do hita sian akka hasusaan na dibahen musu. Tikki adong tantangan boi do hita martahan ala pos rohatta tu janji i. Jala di tikkina, pasautonna do janjina i asa boi hita toktong marbarita na uli.—Markus 13:10.
w06 1/9 14 ¶4
Akka na Denggan sian Bukku Psalmen Bagian Palimahon
119:71—Aha do manfaat na boi tadapot tikki marsitaonon? Boi do hita marsiajar tikki hita mangadopi hasusaan. Misalna asa lam mangandalhon Jahowa hita, lam jotjot ma martangiang, lam ringgas marsiajar Bibel, jala mangulahon na taparsiajari. Asing ni i boi do gabe taboto aha na porlu tapadenggan di diritta sian caratta mangadopi sitaonon i. Jadi sebenarna dang holan mambahen susa sitaonon i, alai boi do i mambahen hita gabe taruji.
“Tangis ma Hamu Rap Dohot Angka na Tangis”
3 Ama Parasiroha jala Sipangapul na sumurung do Jahowa. Sai diapuli do hita di saluhut sitaononta. (Jaha 2 Korint 1:3, 4.) Ibana ma sitiruon na dumenggan tingki mangapuli. Didok do tu naposoNa, “Ahu, ahu sandiri tutu na mangapuli hamu.”—Jes. 51:12; Ps. 119:50, 52, 76.
5 Pos ma rohanta na urupan ni Jahowa do hita. Sadihari pe, boi do hita martangiang tu Ibana paboahon arsak dohot lungun ni rohanta. Tarapul do roha mamboto na diantusi Jahowa do pangkilalaanta jala diapuli do hita! Songon dia Ibana mangulahon i?
Arta na Adong di Bibel
Unang ma Paloas Lam Ngali Holongmuna
Tontu tahaholongi do hasintongan, jala di Bibel do tadapot hasintongan. Didok Jesus tu Jahowa, “Hatami do hasintongan.” (Joh. 17:17) Asa holong rohanta tu hasintongan na sian Bibel, ingkon taboto do isi ni Bibel. (Kol. 1:10) Alai adong dope na porlu taulahon. Parrohahon ma na didok panurat ni Psalmen 119 asa taboto na porlu taulahon. (Jaha Psalmen 119:97-100.) Ganup ari, ingkon tarimangi jala tapingkirhon do na tajaha sian Bibel. Lam holong ma rohanta tu hasintongan na sian Bibel molo tarimangi laba na tadapot.
Panurat ni psalmen mandok, “Tumonggi do bagabagami didai aruarungku sian situak ni loba di pamanganku.” (Ps. 119:103) Publikasi na diparade organisasi ni Debata dipatudos songon sipanganon na tabo. Molo adong sipanganon na tahalomohon, tontu talehon do tingki laho mangallang i. Suang songon i, talehon do tingki laho marsiajar. Dung i, las ma rohanta marsiajar hata hasintongan. Mura ma taingot na taparsiajari jala mamangke i mangurupi na asing.—Pjm 12:10.
23-29 DESEMBER
ARTA NA ARGA NA ADONG DI BIBEL PSALMEN 119:121-176
Na Porlu Taulahon asa Unang Tamba Masalahta
Pangke ma Hata ni Debata Mangalatik Panggora ni Rohamuna
5 Asa marguna uhum ni Debata di ngolunta, ndang sae holan manjaha Bibel. Alai ingkon tahaholongi jala taargai do i. Didok do di Bibel, “Hagigihon hamu ma na jat i, jala haholongi hamu na denggan.” (Am. 5:15) Alai songon dia carana? Ingkon taihuthon ma pingkiran ni Jahowa. Rimangi ma. Umpamana ndang boi hamu renges modom. Jadi, disuru dokter ma hamu asa gok mangallang sayur, olahraga, jala ingkon taratur do ngolumuna. Dung diulahon hamu i, gabe boi ma hamu renges modom! Tontu gabe diargai hamu do tudutudu ni dokter i, ndang i?
6 Suang songon i ma Debata. Dilehon Ibana do uhum tu hita, asa unang na roa na tadapot jala asa lam denggan ngolunta. Umpamana, diajarhon Bibel do asa unang margabus, mangoto-otoi, manangko, mangulahon na rorang, mangulahon na jahat, manang mardatu. (Jaha Poda 6:16-19; Pgk. 21:8) Molo nunga taulahon i jala tadapot do na denggan, gabe lam holong ma rohanta tu Debata dohot tu uhumNa.
w93 15/4 17 ¶12
Akka na Poso, Aha do na Uppetting di Ngolumuna?
12 Jala na uppetting ikkon berupaya do asa sogo rohamuna manang magigi tu akka na so denggan. (Psalmen 97:10) Nang pe mulana lomo rohamuna mangulahon akka na so denggan i, songon dia ma asa sogo rohamuna tu akka ulaon i? Pikkirhon ma akibatna. Bibel mandok, “Unang ma hamu lilu, dang boi gabusan Debata. Manang aha na disuan sasahalak, i do panenonna. Manang ise na manuan mangihuthon giot-giot ni dagingna na mardosa, panenonna do hamatean sian dagingna na mardosa i.” (Galatia 6:7, 8) Tikki targoda hamu mangihutton giot-giot ni dagingmuna i, pikkirhon ma songon dia perasaan ni Jahowa molo diulahon hamu i. (Bandikkon tu Psalmen 78:41.) Jala pikkirhon ma muse akibat na asing. Misalna, boi do gabe hamil di luar nikah hamu manang hona penyakit HIV. Asing ni i, boi do gabe dang mararga be dihilala hamu dirimuna i. Jala boi do leleng akibatna dihilala hamu. Sahalak donganta borua mandok, “Sebelum pajuppang au dohot suamikku hea do au mangulahon seks na so patut dohot halak na asing. Nang pe saonari hami nungnga gabe Saksi Jahowa, alai sipata olo do hami marbada alani seks na so patut na diulahon hami di tikki najolo.” Jala molo taulahon akka na so denggan, dang boi be hita mangulahon akka tanggung jawab di huria manang gabe dipecat. (1 Korint 5:9-13) Jadi olo do hamu manaon sude akibat i holan alani mangihutton giot-giot ni dagingmuna?
Arta na Adong di Bibel
Pos ma Rohamuna “Sittong do Sude” Hata ni Debata
2 Sude do naposo ni Jahowa porsea molo Jahowa “Debata na makkatahon na sittong” jala lomo do rohana mangalehon na terbaik tu hita. (Ps. 31:5; Jes. 48:17) Boi do hita porsea tu na tajaha di Bibel ala “sittong do sude hata ni [Debata]”. (Jaha Psalmen 119:160.) Setuju do hita tu hata ni sahalak pakar ni Bibel na manurat, “Dang adong Hata ni Debata na sala, jala pasti saut do i. Ala porsea do naposona tu Debata, gabe porsea ma nasida tu hatana.”
30 DESEMBER–5 JANUARI
ARTA NA ARGA NA ADONG DI BIBEL PSALMEN 120-126
Tarilu-ilu do Nasida Manabur Boni, Alai Marlas ni Roha Mambuat Hasilna
w04 1/6 16 ¶10
Lehonon ni Debata do Pasu-Pasu tu Halak na Pasangappon Ibana
10 Dung gabe sisean ni Jesus hita, ikkon berupaya do hita mangalo Sibolis. Di Jakobus 4:7 didok do, “Alo hamu ma Sibolis, dung i lari ma ibana sian hamu.” Alai memang dang mura mangalo Sibolis. Asa boi taulahon lomo ni roha ni Debata, ikkon berupaya do hita sian nasa gogotta. (Lukas 13:24) Alai marjanji do Debata di Psalmen 126:5, “Akka halak na manabur boni huhut tarilu-ilu, mambuat hasilna di bagasan las ni roha.” Pos ma rohatta, sai diingot Jahowa do sude akka na denggan naung taulahon. “Lehononna upa tu halak na marsitutu mangalului Ibana”, jala pasu-pasuonna ma akka halak na pasangappon goarna.—Heber 11:6.
Tapatogu ma Haporseaotta
17 Manang aha pe tantangan na taadopi saonari, tapakke ma situasi i gabe kesempatan lao patoguhon haporseaotta. Misalna molo mate halak na tahaholongi, pasti lungun do rohatta. Alai boi do toktong togu haporseaotta molo tarimangi janji ni Jahowa taringot tu haheheon. Dung i, lungun do rohatta molo adong keluargatta na dipecat. Alai taingot ma, pengaturan ni Jahowa do na dumenggan. Pasahat ma sude arsak ni rohamuna tu Jahowa. Unang ma mandao hamu sian akka dongan sahaporseaon, alai toktong ma hamu jonok tu nasida. (Poda 18:1) Nang pe marsak dope hamu alani situasi na borat i, toktong ma hamu sibuk. (Ps. 126:5, 6) Torus ma hamu marpungu, marbarita na uli, dohot manjaha Bibel. Asing ni i, torus ma ingot hamu akka janji ni Jahowa di ari na naeng ro. Molo nungnga dirasahon hamu songon dia Jahowa mangurupi hamu, gabe lam togu ma haporseaonmuna.
w01 15/7 18-19 ¶13-14
Unang ma Marlemba-lemba di Ulaon Marbarita!
13 Pasti tarapul do roha ni naposo ni Debata na mangadopi penganiayaan tikki manjaha Psalmen 126:5, 6. Didok di ayat i, “Akka halak na manabur boni huhut tarilu-ilu, mambuat hasilna di bagasan las ni roha. Halak na tarilu-ilu huhut mamboan boni na lao disabur, na lao marlas ni roha do ibana mulak mamboan hasil panenna.” Hata na dipakke panurat psalmen taringot manabur dohot mamanen, paboahon songon dia Jahowa manjaga jala mamasu-masu akka halak naung mulak sian pembuangan di Babel. Las situtu do roha ni nasida tikki mulak. Alai olo do gabe tarilu-ilu nasida tikki mangula tano naung tarulang saleleng 70 taon. Alai adong do akka halak na toktong sabar manabur dohot padenggatton huta ni nasida i. Hasilna dipasu-pasu Jahowa do na niula ni nasida.
14 Ra olo do hita gabe tarilu tikki mangadopi hasusaan. Jala tarilu do hita molo mangadopi penganiayaan hita dohot dongan sahaporseaotta alani hasittongan. (1 Petrus 3:14) Tikki marbarita na uli pe, olo do gabe metmet rohatta di mulana molo taida hira na so adong hasil na taulahon. Alai toktong ma hita sabar tikki manabur dohot maniram, i ma marbarita jala manjuppangi akka halak. Alana di na so panagamatta, boi do bahenon ni Debata tubu hasittongan i di bagasan roha ni nasida. (1 Korint 3:6) Takkas do on taida sian godang ni Bibel dohot sijahaon na tarsar tu akka halak.
Arta na Adong di Bibel
cl 73 ¶15
“Debata do Parlinggomatta”
15 Na parjolo, pikkirhon ma songon dia Jahowa manjaga naposona. Boi do taharappon dijaga Jahowa hita secara kelompok. Molo dang dijaga Jahowa hita, gabe mura do hita diserang Sibolis. Pikkirhon ma: Sibolis do “na mangarajai portibi on”, lomo do rohana mambahen asa dang adong be ibadat na sittong. (Johannes 12:31; Pangungkapon 12:17) Berupaya do akka pamaretta na marhuaso di portibi on lao mangorai jala pasohon ulaonta marbarita. Alai togu do akka naposo ni Jahowa jala torus do nasida marbarita na uli. Boasa ma akka pamarettaon i dang boi pasohon ulaonta, hape saotik do hita jala hira na so adong gogotta mangalo nasida? Ala dijaga Jahowa do hita marhite habongna na massai gogo.—Psalmen 17:7, 8.