Referensi tu Parpunguan Hangoluan dohot Pangkobasion na Laho Diparsiajari
1-7 SEPTEMBER
ARTA NA ARGA NA ADONG DI BIBEL PODA 29
Pasiding ma Ajaran dohot Adat na Dihasogohon Debata
wp16.6 6, kotak
Parnidaan Taringot Na Maringanan Di Surgo
Songon halak na dipenjara, marjuta halak diotootoi takhayul jala mabiar tu tondi na jahat. Dipangke nasida do jimat laho mangalinggomi diri. Unang ma diulahon hamu sisongon i. Bibel paposhon rohanta, “Ai manatap manonggor do mata ni Jahowa manatap sandok tano on humaliang, laho mangalehon gogo tu halak parroha na marsitiopan tu Ibana.” (2 Kronika 16:9) Debata na sintong, i ma Jahowa, gumogo sian Sibolis, jala ondingan ni Jahowa do hamu molo porsea tu Ibana.
Asa mandapot parlinggoman sian Jahowa, porlu taparsiajari aha na palashon rohaNa jala mangulahon i. Umpamana, di abad na parjolo, dipapungu halak Kristen di Epesus do sude buku ni nasida taringot hadatuon jala ditutung do i. (Ulaon ni Apostel 19:19, 20) Saonari pe, asa tadapot parlinggoman sian Debata, ingkon tabolongkon do angka jimat dohot manang aha pe na adong partalianna tu hadatuon dohot tondi na jahat.
Mamboto Hasintongan Taringot Halak Naung Mate
13 Molo ndang pos rohamuna tu sada hasomalan manang ulaon, martangiang ma tu Jahowa mangido bisuk sian Ibana. (Jaha Jakobus 1:5.) Dung i, boi do di riset hamu taringot i di publikasinta. Molo porlu, boi do disungkun hamu angka sintua di huria. Tontu ndang dipaboa nasida aha na ingkon ulahononmu, alai boi do dipaboa nasida angka prinsip na adong di Bibel na boi mangurupi. Molo diulahon hamu i, gabe tarlatik ma pangantusionmuna jala gabe boi ma hamu “mamboto dia na sintong dohot na sala”.—Heb. 5:14.
Tongtong Mangihuthon Hasintongan
12 Adat dohot hasomalan na dihasogohon Debata. Ra, adong do keluarga, dongan karejo, manang dongan sasingkolanta na manogihon hita asa dohot tu perayaan ni nasida. Aha do na boi mangurupi hita asa unang dohot tu perayaan na so dihalomohon Jahowa? Ingkon taboto do aha na mambahen ndang lomo roha ni Jahowa tu perayaan i. Boi do tariset sian publikasinta songon dia mula ni perayaan i. Dung tarimangi aha na didok Bibel, gabe taboto ma boasa ndang boi hita dohot tu perayaan i. Alani i, pos ma rohanta ala nunga taulahon angka “na hinalomohon ni Tuhan” i. (Eps. 5:10) Molo porsea hita tu Jahowa dohot tu Bibel, ndang mabiar be hita tu jolma.—Poda 29:25.
Arta na Adong di Bibel
“Mangkaholongi . . . Marhitehite Pambahenan dohot Hasintongan”
11 Sian ias ni roha ma hita mamuji. Boi do pujian patoguhon manang “padengganhon” sasahalak. (Eps. 4:29) Alani i, denggan do molo tapuji sasahalak. Alai, unang ma tapuji sasahalak holan laho palashon rohana. Taingot ma ringkot do pasingothon donganta. (Poda 29:5) Molo tapuji donganta alai tapahatahata ibana di pudina, dos do i songon halak na munafik. Tatiru ma holong ni apostel Paulus. Di suratna, dipuji ibana do halak Kristen na di Korint, ala denggan parniulaon ni nasida. (1 Kor. 11:2) Alai dipasingot ibana do muse nasida jala tangkas do dipaboa ibana boasa ringkot nasida dipasingot.—1 Kor. 11:20-22.
8-14 SEPTEMBER
ARTA NA ARGA NA ADONG DI BIBEL PODA 30
“Unang ma Lehon tu Au Hapogoson Manang Hamoraon”
Holong na Songon Dia do na Parohon Las ni Roha?
10 Tutu, porlu do hepeng. Boi do i mangurupi hita. (Pjm. 7:12) Alai boi do hita martua nang pe holan mandapot na tahaporluhon? Boi! (Jaha Parjamita 5:11.) Songon na disurat si Agur anak ni si Jake, “Hapogoson manang hamoraon unang lehon tu ahu; sai loas ma panganonku bohal tinurpukkonmi tu ahu.” Taantusi do boasa ndang olo ibana gabe pogos. Didok ibana boi do i gabe mangonjar rohana asa manangko. Jala ndang parohon sangap tu goar ni Debata. Alai boasa ibana tong ndang olo gabe mamora? Didok ibana, “Asa unang tung huporso Ho, dung butong ahu, gabe dohononku maon: Ise do Jahowa?” (Poda 30:8, 9) Ra, ditanda hamu do pigapiga halak na mardebatahon hamoraon.
11 Sahalak na mangkaholongi hepeng ndang boi pasonangkon roha ni Jahowa. Didok Jesus, “Ndang haoloan sada halak dua induk! Sai hosomanna do na sada, haholonganna do na sada nari; hombaranna do na sada, toisanna do na sada nari. Ndang haoloan hamu Debata rap dohot Mammon!” Jala didok do muse, “Unang papungupungu hamu arta di hamu di tano on, di na targagat tasik dohot ngitngit, di na tarhali jala tartangko panangko i!”—Mat. 6:19, 20, 24.
12 Godang do naposo ni Jahowa na so mangkaringkothon hamoraon. Alani i, gabe boi ma nasida mangalehon godang tingkina tu Jahowa, jala marlas ni roha ma nasida. Songon donganta si Jack na tading di Amerika. Saleleng martaontaon, holan na marsak do ibana di jabu alani karejona. Alai didok ibana, “Merintis do tungganeborungku jala sai jotjot do las rohana.” Jala didok tungganeboruna do muse, “Molo ahu, burju hian do boshu!” Ujungna, digadis ibana ma jabuna na balga, jala ditadingkon ibana ma bisnisna. Merintis ma ibana dohot tungganeboruna. Dipaboa ibana, “Ndang mura manadingkon jabu na bagak i.” Didok ibana do muse, “Alai, saonari nunga gabe sahalak perintis ahu, jala nunga karejo hami tu Bos na sarupa, i ma Jahowa.”
“Humolong do Roham di Ahu Sian Angka On?”
15 Saonari, lomo do roha ni halak manuhor angka barang na baru, songon baju, handphone, komputer, dohot na asing. Dirajai holongan di hepeng dohot arta do nasida. Ala naung gabe halak Kristen, aha do na rumingkot di hamu? Rimangi ma: ‘Gabe suda do tingkingku mamingkirhon mobil manang baju na baru sian mangalehon tingki paradehon na diulas di parpunguan? Pasibukhu do ahu gabe ndang jotjot martangiang dohot manjaha Bibel?’ Molo ndang manat, boi do gabe rumingkot roha na holongan di hepeng sian holong ni rohanta tu Kristus. Tarimangi ma na didiok Jesus, “So tung hisapan hamu di arta.” (Luk. 12:15, Bibel siganup ari) Boasa didok songon i?
16 Jesus mandok, “Ndang haoloan sada halak dua induk.” Didok muse, “Ndang haoloan hamu Debata rap dohot Mammon (Hamoraon)!” Lapatanna, molo hamoraon manang arta do na rumingkot di hita, ndang boi talehon na dumenggan tu Jahowa. Didok Jesus do muse pangkorhonna, i ma “hosomanna do na sada, haholonganna do na sada nari” jala “hombaranna do na sada, toisanna do na sada nari”. (Mat. 6:24) Ala mardosa dope hita, ingkon marsitutu do mangalo “hisaphisap ni dagingta”, dohot ma i roha na holongan di hepeng.—Eps. 2:3.
17 Saonari, godang na mangkaringkothon lomo ni rohana dohot hasonangan. Gabe maol ma nasida pasidingkon roha na holongan di hepeng. (Jaha 1 Korint 2:14.) Ala nunga asing pamingkirion ni nasida, maol ma paimbarhon dia na sala jala dia na sintong. (Heb. 5:11-14) Ujungna, lam humolong ma roha ni nasida di hepeng. Molo lam godang na didapot, lam godang ma na dihalomohon muse. (Pjm. 5:9) Boi do tapasiding roha na holongan di hepeng molo tajaha Bibel. (1 Ptr. 2:2) Ala dirimangi Jesus taringot bisuk na sian Jahowa, boi ma ibana manjua elaela ni Sibolis. (Mat. 4:8-10) Saonari pe, asa boi tapasiding roha na holongan di hepeng, ingkon taihuthon do poda ni Jahowa. Molo taulahon on, nunga tapatudu na humolong do rohanta tu Jesus sian angka arta.
w11 1/6 10 ¶4
Bijak ma Hamu Mangatur Hepengmuna
Jolo papungu ma hepengmuna sebelum manuhor sada barang. Saonari on hampir sude do barang boi dikredit. Alai asa unang pagodangku utangmuna tumagon do jolo dipapungu hamu hepengmuna sebelum manuhor sada barang. Sebenarna rugi do molo mangkredit sada barang alana timbo do bungana molo mangkredit sada barang jala gabe arga hian ma barang i. Didok di Bibel, binatang na “marbisuk” do porngis, alana “dipapungu nasida do sipanganon ni nasida tikki musim panen” asa adong allangonna di ari na naeng ro.—Poda 6:6-8; 30:24, 25.
Toktong ma Gabe Tamu di Kemah ni Jahowa Salelengna!
18 Denggan do molo tapareso songon dia sikapta taringot hepeng. Tasukkun ma tu diritta, ‘Aha do na sai hupikkirhon, taringot hepeng dohot akka na boi hutuhor do? Molo hupinjam hepeng ni halak, hupaleleng-leleng do manggarar i ala didok rohakku dang porlu di ibana hepeng i? Gabe unjago do huhilala dirikku sian na asing ala godang hepengku, jala holit do au? Gabe huanggap do akka donganta na mora halak na holongan di hepeng? Holan tu halak na mora do au olo mardongan, jala dang parduli tu halak na pogos?’ Massai penting do tapikkirhon sukkun-sukkun on. Alana nungnga dilehon Jahowa kesempatan na luar biasa tu hita lao gabe tamuna. Alani i, taargai ma i jala unang ma holongan di hepeng hita. Molo taulahon i, dang tadikkonon ni Jahowa hita.—Jaha Heber 13:5.
Arta na Adong di Bibel
w09 15/4 17 ¶11-13
Tarida do Bisuk ni Jahowa sian Toppanna
11 Binatang na gelleng na asing na boi tatiru i ma marmut. (Jaha Poda 30:26.) Marmut na didokkon di bukku Poda on, i ma binatang na songon kelinci na balga, alai geleng pinggolna jala pendek patna. Di inganan na marbatu-batu do marmut on tinggal. Ala boi do mata ni marmut on mangida tu na dao, gabe boi ma ibana martabuni molo ro musu. Asing ni i ala sompit do lubang ni marmut di inganan na marbatu-batu i, gabe maol ma masuk musu tu ingananna i. Jala biasana godang do marmut na marpungu-pungu di sada liang, on mambahen nasida gabe aman jala dang ngalian tikki musim dingin.
12 Aha ma na boi taparsiajari sian marmut? Na parjolo, dang olo binatang on sengaja mambahen dirina mura ditakkup musu. Alai dipakke ibana do matana lao mangida musu sian na dao. Jala dang olo ibana dao sian liangna asa pittor hatop ibana martabuni tusi tikki ro musu. Dos songon i ma, ikkon marbisuk do hita jala ikkon tajaga do pikkiranta asa boi taboto akka bahaya na adong di portibi on. Songon on ma na didok Apostel Petrus tu halak Kristen, “Jaga ma hamu, toktong ma torang pikkiranmuna! Ai mardalani do musumuna Sibolis i songon singa na marauang mangalului siboddutonna.” (1 Ptr. 5:8) Tikki di tano on pe Jesus, toktong do dijaga ibana pikkiranna. Alani i gabe boi ma ibana tetap setia tu Jahowa nang pe digoda Sibolis. (Mat. 4:1-11) Gabe sitiruon do Jesus tu akka siseanna!
13 Sada cara na boi taulahon asa boi toktong jaga, unang ma mandao hita sian sude naung diparade Jahowa. Misalna, ringgas ma hita mamparsiajari Hata ni Debata jala unang ma tatinggalhon parpunguan. (Luk. 4:4; Heb. 10:24, 25) Dos songon marmut na sai rappak-rappak dohot marmut na asing asa unang ngalian, songon i ma nang hita, porlu do hita kompak dohot dongan sahaporseaotta asa boi “masipatoguan” dohot nasida. (Rom 1:12) Molo taulahon i sude on patuduhon na setuju do hita tu hata ni si Daud na mandok, “Jahowa do dolok batu di au, Ibana do benteng di au, jala Ibana do Sipalua di au. Debatakku do dolok batukku, tusi do au marlinggom, Ibana do na gabe perisai di au, Sipalua na gogo, inganan parlinggomakku na aman.”—Ps. 18:2.
15-21 SEPTEMBER
ARTA NA ARGA NA ADONG DI BIBEL PODA 31
Na Boi Taparsiajari sian Poda ni Sahalak Ina
w11 1/2 19 ¶7-8
Ajarhon ma Aturan Taringot Marpangalaho tu Gellengmuna
Paboa ma ajaran na sittong taringot hubungan seks. Porlu do taulahon on. (1 Korint 6:18; Jakobus 1:14, 15) Bibel mandok hadiah sian Debata do hubungan seks, dang holan jorat ni Sibolis. (Poda 5:18, 19; Akka Ende 1:2) Alai molo holan taringot bahaya ni mangulahon seks do na diajarhon hamu tu gellengmuna, boi do gabe sala pandangan ni gellengmuna taringot hubungan seks jala dang sadalan i tu na didok Bibel. Songon i ma na dihilala si Corrina, sahalak anak boru na sian Prancis. Didok ibana, “Holan taringot bahaya ni hubungan seks na so patut do na jotjot dihatai natua-tuakku. Alani i gabe negatif ma pandanganku taringot hubungan seks.”
Berupaya ma hamu paboahon ajaran na sittong taringot seks tu gellengmuna. Songon i ma na diulahon si Nadia, sahalak ina na sian Meksiko. Didok ibana, “Berupaya do au paboahon tu gellengku dang sala hubungan seks i. Jahowa do na mambahen jolma boi mangulahon i asa boi nasida marlas ni roha. Alai holan halak naung menikah do na boi mangulahon i. Jadi boi do hubungan seks i parohon las ni roha manang arsak ni roha, bergantung tu hita do i.”
ijwhf artikel 4 ¶11-13
Paboa ma Taringot Minuman Beralkohol tu Gellengmuna
Ikkon hamu do na parjolo manukkun i. Songon on ma na didok si Mark sahalak ama sian Inggris, “Olo do bingung dakdanak molo makkatai taringot minuman beralkohol. Jadi husukkun ma tu gellengku na marumur ualu taon, sala do menurut ibana manginum minuman beralkohol i manang na daong. Alai dang paseriushu au manukkun i tu ibana. Alani i gabe boi ma gellengku paboahon na di rohana.”
Boi do diingot gellengmuna topik taringot minuman beralkohol molo dibahas hamu i piga-piga hali. Molo nga cocok umur ni gellengmuna boi do saotik dibahas hamu taringot minuman beralkohol tikki makkatai taringot topik na asing. Misalna tikki makkatai taringot cara na aman mamboan kendaraan, manang taringot seks.
Bahen ma sitiruon. Songon spons do dakdanak. Sada penelitian mandok, sian natua-tuana do na paling godang ditiru dakdanak. Jadi molo diida gellengmuna pittor minum minuman beralkohol hamu tikki marsak manang tikki adong masalahmuna, olo do gabe dirippu gellengmuna boi minuman beralkohol pasaehon masalah. Jadi bahen ma sitiruon tu gellengmuna. Unang ma pagodangku hamu minum minuman beralkohol.
g17.6 9 ¶5
Ajari ma Gellengmuna asa Serep Rohana
Ajari ma gellengmuna asa lomo rohana mangalehon na adong di ibana. Patudu ma tu nasida “Umlas do roha ni halak na mangalehon sian na manjalo”. (Ulaon ni Apostel 20:35) Boha ma carana? Ajak ma ibana mambahen daftar akka dongan na porlu diurupi. Misalna akka dongan na porlu diurupi berbelanja, na porlu dialap manang ditaruhon marpungu, manang na porlu diurupi padenggatton jabu ni nasida. Dung i ajak ma gellengmuna mangurupi nasida asa boi langsung diida ibana las hian do rohamuna tikki mangurupi halak na asing. Molo diulahon hamu songon i, boi do hamu gabe sitiruon tu gellengmuna lao patuduhon serep ni roha.—Prinsip na sian Bibel: Lukas 6:38.
Arta na Adong di Bibel
Toktong ma Bahen Hamu Marsigorgor “Api na sian Jahowa”
6 Togu do parale-aleon ni si Maria tu Jahowa, jala haporseaonna dang bergantung tu si Josep. Takkas do diboto ibana Surat na Badia.e Dilehon ibana do muse tikkina lao mangarimangi i. (Luk. 2:19, 51) Takkas ma, parale-aleon ni si Maria na togu tu Jahowa mambahen ibana gabe istri na burju. Saonari godang do akka istri na berupaya maniru teladan ni si Maria. Contohna sahalak donganta na margoar si Emiko mandok, “Tikki lajang au, adong do hubahen rutin rohanikku. Alai dung menikah, suamikku do na martangiang tu hami jala manguluhon ibadat keluarganami. Alai lam leleng gabe bergantung tu suamikku do haporseaokku. Husadari ma tanggung jawabhu do manjaga parale-aleokku tu Jahowa. Jadi hubahen ma tikki sahalakku lao martangiang tu Ibana, manjaha Bibel, jala mangarimangi isina.” (Gal. 6:5) Hamu akka istri, molo torus hamu berupaya patoguhon parale-aleonmuna tu Jahowa, gabe lam godang ma alasan ni suamimuna lao mamuji jala makkaholongi hamu.—Poda 31:30.
22-28 SEPTEMBER
ARTA NA ARGA NA ADONG DI BIBEL PARJAMITA 1-2
Latik ma Generasi Berikutna
Pasahat ma Poda I tu Angka Baoa Haposan
3 Las do rohanta manomba Jahowa jala denggan do taulahon tanggung jawabta. Las do rohanta mangulahon ulaonta jala hirim rohanta asa taulahon i saleleng tolap dope gogonta. Alai dung lam matua, ndang boi be godang taulahon songon di tingki haposoon. (Pjm. 1:4) Ambatambat do on di naposo ni Jahowa. Saonari, lam maju do ulaon parbaritaon jala dipangke organisasi ni Jahowa do teknologi na baru laho pasahathon barita na uli tu godang halak. Sipata, maol do di angka na umtua marsiajar cara na baru laho mangulahon ulaon on. (Luk. 5:39) Lam suda do gogo ni sasahalak dung lam matua. (Poda 20:29) Alani i, las do roha mangida angka na umtua mangalatik na poso asa mandapot tanggung jawab di organisasi ni Jahowa.—Jaha Psalmen 71:18.
4 Maol do di angka naung leleng mandapot hak na sumurung mangalehon tanggung jawab tu na poso. On boi mambahen nasida marmetmet ni roha, ala mansai dihaholongi tanggung jawab i. Ra, lungun do rohanasida tingki mangalehon tanggung jawab i tu na asing. Ra dipingkirhon nasida, molo ndang ditogutogu nasida angka baoa i, ndang boi denggan i diulahon. Olo do didok nasida, ndang adong tingki laho mangalatik na asing. Baoa na poso porlu sabar tingki ndang dilehon dope gumodang tanggung jawab.
Arta na Adong di Bibel
Lomo Roha ni Jahowa asa Marlas ni Roha Angka na Poso
14 Ndang hea dope adong jolma na ummora jala na umsangap songon si Salomo. Hea do didok ibana tu dirina sandiri, “Antong unjunanku ma ho marhite sian las ni roha, guru lomo ni roham idaonmu!” (Pjm. 2:1-10) Alani i, dibangun ibana do jabu dohot taman na mansai bagak. Dibahen ibana do sude aha na dihalomohon rohana. Alai ndang boi i mambahen ibana marlas ni roha. Didok ibana do, “Ida ma laho salpu do saluhutna.” Jala didok muse, “Ndang adong hape na hot anggo di hasiangan on.” (Pjm. 2:11) Olo do hamu marsiajar sian pengalaman ni si Salomo?
29 SEPTEMBER–5 OKTOBER
ARTA NA ARGA NA ADONG DI BIBEL PARJAMITA 3-4
Asa Lam Kuat Perkawinanmuna
ijwhf artikel 10 ¶2-8
Cara asa Unang Kecanduan Mar-HP
● Boi do bermanfaat HP tu akka halak naung menikah. Misalna boi do suami istri toktong berkomunikasi nang pe dao nasida.
“Las hian do roha ni istrikku tikki hukirim pesan ‘holong hian do rohakku tu ho’ manang ‘masihol au tu ho daba’.”—Si Jonathan
● Alai boi do tong sega hubungan ni suami istri alani HP. Misalna, adong do halak na sai lalap mar-HP akibatna gabe dang diparrohahon ibana be pasanganna.
“Sipata gabe dang saut be suamikku makkatai dohot au ala sai lalap au mar-HP.”—Si Julissa.
● Adong halak na mandok boi do tong ibana makkatai taringot hal na penting nang pe sambil mar-HP. Alai sahalak ahli sosiologi na margoar si Sherry Turkle paboahon, nang pe godang halak na boi mangulahon songon i, sebenarna dang kebiasaan na denggan i. Alana “molo diulahon hamu sada ulaon jala di tikki na sarupa mangulahon ulaon na asing, pasti dang denggan hasilna.”
“Lomo do rohakku makkata-hatai dohot suamikku. Alai molo sai lalap ibana mar-HP, huhilala gabe hirana uppetting HPna i sian au.”—Si Sarah.
Kesimpulan: Molo denggan caratta mamakke HP boi ma i bermanfaat tu perkawinanta. Alai molo sai lalap hita mar-HP boi ma gabe sega hubungatta tu pasanganta.
Toktong ma Bahen Hamu Marsigorgor “Api na sian Jahowa”
12 Songon dia do suami dohot istri boi maniru si Akuila dohot si Priskilla? Pikkirhon ma akka kegiatan na porlu diulahon hamu dohot pasanganmuna. Boi do hamu rap mangulahon i daripada mangulahon i sahalakmuna? Misalna, rap marbarita do si Akuila dohot si Priskilla. Boi do dibahen hamu jadwal asa rap marbarita na uli? Asing ni i, rap karejo do si Akuila dohot si Priskilla. Bisa jadi dang sarupa karejomuna dohot pasanganmuna. Alai boi do rap hamu makkarejohon tugas di jabu? (Pjm. 4:9) Molo marsiurupan hamu makkarejohon tugas di jabu, gabe songon sada tim ma hamu jala gabe adong ma kesempatanmuna makkata-hatai. Nungnga menikah si Robert dohot si Linda lobi sian 50 taon. Didok si Robert, “Sasittongna, dang godang tikkinami rap rekreasi. Alai tikki manucci piring au, dohot do istrikku mangurupi. Manang tikki karejo au di taman, dohot do istrikku mangurupi. Gabe las hian ma rohakku. Gabe lam jonok ma hami jala lam bagas ma holongnami.”
13 Alai ingot ma, nang pe rap hamu, dang otomatis i mambahen jonok hamu tu pasanganmuna. Sahalak istri na tinggal di Brasil mandok, “Alani godang ni ulaon, olo do gabe ro tu pikkiranku memang nungnga rap hami ala tinggal sajabu. Alai husadari ma dang cukkup holan i. Ikkon huparrohahon do kebutuhan ni suamiku.” Parrohahon ma songon dia si Bruno dohot istrina si Tays berupaya mamparrohahon kebutuhan ni pasanganna. Didok si Bruno, “Dibahen hami do dao HP-nami asa boi dinikmati hami tikki padua-dua.”
14 Alai boha do molo dang dinikmati hamu dohot pasanganmuna tikki rap hamu na dua? Bisa jadi dang sarupa seleramuna, manang jut do rohamuna dibahen pasanganmuna, songon i do sebalikna. Aha do na boi diulahon hamu? Ingot ma ilustrasi taringot api unggun nakkin. Tottu dang pittor balga apina tikki dipagalak. Ikkon palan-palan do ditambai sobanna asa boi balga apina. Dos songon i ma, coba ma lehon tikki ganup ari asa boi rap dohot pasanganmuna nang pe holan satokkin. Ulahon ma akka kegiatan na boi dinikmati hamu na dua, unang ma kegiatan na boi mambahen jut rohamuna. (Jak. 3:18) Molo dimulai hamu i sian akka na sederhana, gabe lam tamba ma holongmuna tu pasanganmuna.
Toktong ma Bahen Hamu Marsigorgor “Api na sian Jahowa”
3 Asa toktong marsigorgor “api na sian Jahowa”, ikkon togu do parale-aleon ni suami dohot istri tu Jahowa. Alana molo diargai nasida do parale-aleonna dohot Jahowa, pasti dioloi nasida do paretta ni Jahowa. On ma na mangurupi nasida pasidikkon jala mangatasi masalah na boi mambahen ngali holong ni nasida. (Jaha Parjamita 4:12.) Asing ni i, halak na togu parale-aleonna tu Jahowa berupaya do maniru sifat ni Jahowa, songon haburjuon, sabar, jala rade manalpuhon hasalaan. (Eps. 4:32–5:1) Molo dipatudu suami dohot istri do akka sifat i, gabe lam togu ma hubungan ni nasida. Sahalak donganta borua na margoar si Lena naung menikah lobi sian 25 taon mandok, “Ummura do patuduhon holong dohot respek tu halak na togu parale-aleonna tu Jahowa.”
Arta na Adong di Bibel
Boi do Hita Mangolu Saleleng ni Lelengna
Tikki ditoppa Jahowa jolma, dilehon do tu nasida keinginan lao mangolu salelengna. Bibel mandok, “Dibahen [Jahowa] do tu roha ni nasida sakkap lao mangolu saleleng ni lelengna.” (Pjm. 3:11) On ma alasanna boasa hita manganggap hamatean i songon musu. (1 Kor. 15:26) Buktina molo marsahit na parah hita, pasti dang pasrah hita paima tikkina mate. Alai lao do hita tu dokter marubat asa malum sahitta. Berupaya do hita asa unang mate. Jala molo mate halak na tahaholongi, dang soal poso dope ibana manang nga matua, tottu lungun hian do rohatta. (Joh. 11:32, 33) Lomo pe rohatta mangolu salelengna ala na songon i do hita ditoppa Jahowa. Takkas ma, lomo do roha ni Jahowa asa mangolu salelengna hita. Alai adong dope alasan na asing na paposson rohatta boi do hita mangolu salelengna. Saonari tabahas ma akka na diulahon Jahowa najolo dohot saonari na mambuktihon dang hea muba tujuanna na parjolo i.
6-12 OKTOBER
ARTA NA ARGA NA ADONG DI BIBEL PARJAMITA 5-6
Tapatudu ma na Taargai Debatanta na Sangap i
w08 15/8 15-16 ¶17-18
Ikkon Taparrohahon ma Diritta asa Boi Pasangappon Jahowa
17 Bibel patuduhon ikkon taparrohahon do diritta tikki naeng beribadat tu Jahowa. Parjamita 5:1 mandok, “Manat ma parrohahon lakkam molo lao ho tu jabu ni Debata na sittong.” Tikki naeng manjonok si Musa dohot si Josua tu inganan na badia ikkon dibukka nasida do solopna. (2Mus. 3:5; Jos. 5:15) On patuduhon na diargai nasida do Jahowa. Akka malim ni halak Israel pe ikkon mamakke celana pendek na sian bonang linen do “lao manutupi hailaon ni nasida”. (2Mus. 28:42, 43) Ikkon dibahen nasida do songon i tarlumobi ma tikki naeng marhobas di langgatan ni Jahowa. Jala ikkon diparrohahon keluarga ni malim do tong diri ni nasida lao patuduhon na diargai nasida do Jahowa.
18 Ala sisomba Jahowa do hita ikkon tapatudu ma na taargai do Jahowa di saluhut parngoluotta. Alai unang ma holan sian luar i tarida. Ikkon sahat ma i di bagasan rohatta, alana i do na diida Jahowa. (1Sam. 16:7; Poda 21:2) Molo na taargai do Jahowa ikkon tarida do i sian pangalaho, sifat, hubungatta dohot halak na asing, bahkan sian caratta menilai diritta sendiri. Ikkon boi do i tarida sian na tahatahon dohot na taulahon ganup tikki. Songon on ma na didok Apostel Paulus taringot i, “Dang olo hami mambahen haccit roha ni halak di sude ulaonnami, asa unang adong halak na mandok na so denggan taringot tu ulaonnami marhobas tu Debata. Alai, di sasudena hupatuduhon hami do molo hami parhobas ni Debata.” (2Kor. 6:3, 4) Jadi asa boi hita diargai halak na asing, ikkon tajaga do pangalahotta. Ikkon boi do pangalahotta i “parohon pujian tu akka na diajarhon Debata Sipalua hita”.—Tit. 2:10.
w09 15/11 11 ¶21
Marsiajar ma Hamu sian Tangiang ni Akka Naposo ni Debata na Adong di Bibel
21 Sian tangiang ni Jesus dipatudu ibana do na pos do rohana tu Jahowa. Misalna tikki naeng dipahehe ibana si Lasarus, “Diida Jesus ma doppak ginjang jala didok ma, ‘Mauliate ma di Ho Amang, ala ditangihon Ho do au. Huboto do sai ditangihon Ho do au.’” (Joh. 11:41, 42) Boi do tarida sian tangiangmuna na diargai hamu Jahowa jala pos rohamuna tu Ibana? Molo diparrohahon hamu tangiang ni Jesus, boi ma diida hamu taringot pabadiahon goar ni Jahowa do na parjolo ditangiakkon ibana, taringot asa ro Harajaonna, jala asa saut lomo ni roha ni Debata. (Mat. 6:9, 10) Songon dia do tangiangmuna saleleng on? Taringot Harajaon ni Debata, lomo ni rohana dohot pabadiahon goarna do na rumikkot di tangiangmuna?
“Gohi ma Janjimuna”
12 Tingki tardidi, nunga marjanji hamu tu Jahowa na laho mangalehon ngolumuna manomba Ibana jala mangihuthon tudutuduNa. Alai, pandidion i holan mulana dope i. Porlu do tasungkun tu dirinta: ‘Dungkon tardidi, lam solhot do paralealeonku tu Jahowa? Tongtong dope husomba Ibana sian nasa rohangku? (Kol. 3:23) Jotjot dope ahu martangiang? Hujaha do Bibel ganup ari? Ringgas dope ahu marpungu? Jotjot dope ahu marbarita? Manang gabe mago do hiras ni rohangku mangulahon on?’ Didok apostel Petrus, boi do parohon jea molo ndang hiras rohanta mangulahon ulaon partondion. Alai, boi do tapasiding i molo marsitutu hita patoguhon haporseaonta, parbinotoanta, habengetonta, jala marsihohot.—Jaha 2 Petrus 1:5-8.
Arta na Adong di Bibel
Sukkun-Sukkun Sian na Manjaha
Di Parjamita 5:8 dipaboa do taringot sahalak parhuaso na manindas halak na pogos jala dang adil tu nasida. Ikkon diingot parhuaso i do, adong do halak na mangawasi ibana, na untimbo jabatanna sian ibana. Alai adong dope na untimbo jabatanna sian na mangawasi i. Sude do parhuaso on dang adil tu jolma. Gabe susa do akka halak ala ketidakadilan na dibahen nasida.
Alai nang pe songon i situasina, tarapul do rohatta ala taboto diawasi Jahowa do sude parhuaso, tarmasuk parhuaso na untimbo jabatanna di pamarettaon ni jolma. Alani i, tapangido ma tu Debata asa diurupi hita jala tapasahat ma holso ni rohatta tu Ibana. (Ps. 55:23; Plp. 4:6, 7) Pos ma rohatta “tongtong do ditatap Jahowa sude portibi on, asa lehononNa pangurupion tu angka na marhaposan tu Ibana”.—2 Kron. 16:9, Bibel siganup ari.
Jadi sian Parjamita 5:8 taboto ma, di pamarettaon ni jolma sai adong dope halak na untimbo jabatanna sian halak na asing. Alai na uppetting sian ayat on, Jahowa do parhuaso na paling timbo sian sasudena. Nungnga mamaretta Ibana saonari, jala Jesus Kristus Anakna ma na gabe Raja di Harajaonna. Diawasi Jahowa dohot Jesus do sudena jala adil do nasida.
13-19 OKTOBER
ARTA NA ARGA NA ADONG DI BIBEL PARJAMITA 7-8
“Lao tu Jabu ni Halak na Marhabot ni Roha”
it “Berkabung” ¶6
“Mangandungi”
Tikki lao Mangandungi. Parjamita 3:1, 4 mandok, “Adong do tikkina tangis, adong do tikkina mekkel. Adong do tikkina mangandungi, adong do tikkina manortori.” Ala pasti marujung ngolu do sude jolma, dipillit halak na marbisuk ma asa ro tu “jabu ni halak na marhabot ni roha” sian lao tu jabu ni halak na marpesta. (Pjm 7:2, 4; bandingkon Poda 14:13.) Jadi, dang na lao marsonang-sonang na uppetting di halak na marbisuk. Alai dipakke nasida do kesempatan lao patuduhon asi ni roha dohot mangapuli halak na marhabot ni roha. Jala gabe boi ma diingot nasida na lao marujung ngolu ma annon sude jolma termasuk ma dirina sandiri. Alani i gabe diparrohahon nasida ma ngoluna asa toktong mangihutton lomo ni roha ni Debata na manoppa sude jolma.
Mangurupi Angka Halak na Marsak
15 Si William na mate istrina piga-piga taon naung salpu mandok, “Huargai do tingki didok angka dongan angka na denggan taringot istrikku. On mambahen pos rohangku na dihaholongi jala diargai nasida do istrikki. Balga do pengaruhna tu ahu. Hata ni nasida i mangapuli rohangku. Alana mansai arga do istrikki di ahu.” Donganta na mabalu na margoar si Bianca mandok, “Tarapul do rohangku tingki ditogihon angka dongan ahu asa rap martangiang jala dijahahon nasida piga-piga ayat sian Bibel. Las do muse rohangku tingki ditaringoti nasida angka na denggan taringot suamikki, jala denggan do ditangihon nasida tingki hupaboa muse taringot ibana.”
“Tangis ma Hamu Rap Dohot Angka na Tangis”
16 Boi do tangiangta mangurupi angka dongan na marhabot ni roha. Tangiangkon ma nasida manang rap martangiang ma dohot nasida. Molo tung pe maol mangulahon i ala boi mambahen hita gabe tangis, tangiang sian nasa roha boi mangapuli nasida. Songon na didok si Dalene, “Tingki ro donganta borua mangapuli ahu, hupangido do asa rap martangiang hami. Tingki martangiang, maol do dihilala ibana di mulana i, alai dung pigapiga hata gabe lam tangkas jala tarida ma na sian roha do tangiangna. Haporseaon na togu, holong, dohot panarihon ni nasida mambahen lam togu haporseaonku.”
“Tangis ma Hamu Rap Dohot Angka na Tangis”
17 Ndang taboto sadia leleng sasahalak marhabot ni roha. Tingki baru marujung ngolu halak na dihaholongi, godang do angka dongan dohot sisolhot na ro mangapuli. Alai ndang sadia leleng dungkon i, mangulahon ulaonna be ma nasida. Sasintongna porlu dope halak na marhabot ni roha i diapuli. Rade ma hamu mangurupi. “Manang ise na tongtong marholong ni roha, i ma aleale.” (Poda 17:17) Ingkon taapuli do nasida saleleng na dihaporluhon.—Jaha 1 Tessalonik 3:7.
18 Ingot ma olo do tompu sasahalak marlungun ni roha. Olo do alani tanggal parbogason, musik, poto, ulaon, suara manang manganggo angur ni manang aha. Olo do na mabalu marlungun ni roha tingki parjolo sahali mangulahon sada ulaon sahalakna, umpamana songon tingki ro tu kebaktian manang tu Borngin Parningotan. Sahalak donganta paboahon, “Dung mabalu, didok rohangku lungun do ra huhilala di tanggal ni ari parbogasonnami. Alai dibahen angka dongan do acara, asa unang lungunan rohangku di ari i.”
19 Alai, ndang holan di tingki sisongon i halak na marhabot ni roha porlu dipatogu. Si Junia patorangkon, “Sadihari pe, boi do talehon tingki tu halak na marhabot ni roha, marlaba situtu do i.” Sasintongna, ndang boi tapamalum sude lungun ni rohanasida, alai adong do na boi tabahen laho mangapuli nasida. (1 Joh. 3:18) Didok si Gaby, “Mandok mauliate do ahu tu Jahowa ala rade do angka sintua mangurupi ahu di tingki susa. Gabe pos ma rohangku sai na donganan ni Jahowa do ahu.”
Arta na Adong di Bibel
“Botoon ni Sude Jolma ma na Siseanku Hamu”
18 Sipata olo do tahilala porlu makkatai tu dongan na mambahen haccit rohatta. Alai denggan do jolo tapikkirhon sukkun-sukkun on: ‘Takkas do huboto sude faktana?’ (Poda 18:13) ‘Memang sengaja do ibana mambahen haccit rohakku?’ (Pjm. 7:20) ‘Hea do hubahen kesalahan na sarupa?’ (Pjm. 7:21, 22) ‘Molo makkatai au tu ibana, gabe lam denggan do annon situasina manang gabe lam parah?’ (Jaha Poda 26:20.) Molo tapikkirhon sukkun-sukkun on, olo do tahilala dumenggan do mengabaihon kesalahanna i ala holong rohatta tu ibana.
20-26 OKTOBER
ARTA NA ARGA NA ADONG DI BIBEL PARJAMITA 9-10
Ikkon Sittong do Pandanganta Taringot Sitaononta
w13 15/8 14 ¶20-21
Unang ma Hea ‘Jut Rohamuna tu Jahowa’
20 Unang ma tasalahon Debata. Tikki masa sitaonon tu hita, boasa dang boi tasalahon Jahowa? Alana sipata hita sandiri do na mambahen masalahta. (Gal. 6:7) Dang masuk akkal molo tadok Jahowa do na mambahen hita susa. Uppamana adong sada mobil na dirancang asa boi kaccang mardalan. Alai ala pakaccanghu supirna mamboan mobil i di tikungan gabe marlanggar ma mobil i. Pabrik ni mobil i do na sala? Daong. Dos songon i ma, dilehon Jahowa do kebebasan tu hita lao mamillit. Alai dilehon ibana do tong petunjuk asa boi tapakke kebebasan mamillit i lao mambahen keputusan na denggan. Jadi dang boi tadok Jahowa do na mambahen hita gabe susa.
21 Alai dang sai alani keputusan na sala na tabahen, umbahen gabe marsitaonon hita. Alana boi do masa “akka na so diharappon di tikki na so panagaman.” (Pjm. 9:11) Jala na uppetting ingot ma alani Sibolis do umbahen na adong sitaonon di tano on. (1Joh. 5:19; Pgk. 12:9) Ibana do musutta, dang Jahowa!—1 Ptr. 5:8.
Arga do di Jahowa Naposona na Marserep ni Roha
10 Molo serep rohanta, gabe mura do taadopi angka hasusaan na masa tu hita. Sipata, olo do tahilala dibahen na so denggan tu hita manang tu halak na asing. Didok Raja Salomo, “Huida do angka hatoban marsihundul hoda, hape ia angka na sangap mardalan pat songon hatoban.” (Pjm. 10:7) Sipata, halak na malo ndang hea dipuji. Alai halak na so pola malo do na gabe jotjot dipuji. Nang pe songon i, didok Salomo ingkon rade do hita mangadopi aha pe na masa di ngolunta jala unang ma sai tapingkirhon taringot i. (Pjm. 6:9) Molo serep rohanta, gabe mura ma hita mangadopi aha pe na masa di ngolunta.
w11 15/10 8 ¶1-2
Bermanfaat do Rekreasi na Dinikmati Hamu?
MOLO tajaha di Bibel, lomo do roha ni Jahowa asa marlas ni roha hita di ngolutta. Misalna dipaboa do di Psalmen 104:14, 15 dibahen Jahowa do ‘gabe adong ma sipanganon sian tano on. Adong ma anggur na mambahen las roha ni jolma, miak na mambahen bagak bohi ni nasida, jala adong roti na mambahen las roha ni jolma’. Ala ditoppa Jahowa akka suan-suanan, gabe boi ma dapotta sian i akka biji-bijian, miak, dohot anggur lao allangonta. Jala anggur pe boi do mambahen ‘sonang rohatta’. Nang pe dang porlu hian anggur di ngolutta, alai boi do i mambahen las rohatta. (Pjm. 9:7; 10:19) Jadi lomo do roha ni Jahowa asa ‘las rohatta’.—Ul. 14:16, 17.
2 Jadi dang sala molo lao hita sahali-sahali mamparrohahon “akka pidong na di langit” dohot “akka bunga na di ladang”. Jala dang sala molo lao hita sahali-sahali mangulahon kegiatan na asing na boi mambahen hita semangat jala marlas ni roha. (Mat. 6:26, 28; Ps. 8:3, 4) “Silehon-lehon ni Debata” do las ni roha dohot hangoluan na martujuan. (Pjm. 3:12, 13) Jadi molo taanggap do rekreasi i silehon-lehon ni Debata, pasti olo do hita mamillit rekreasi na sadalan tu lomo ni rohana.
Arta na Adong di Bibel
Hatahon ma na Denggan
11 Gosip na parohon jea, i ma mangkatahon na so tutu taringot sasahalak. Gosip, i ma pangkataion na somal taringot sasahalak manang parngoluon ni nasida. Sai parohon jea do gosip? Ndang songon i. Molo na tinuju ni pangkataion i ndang parohon harugian. Umpamana, taringot ulaon na marlaba, barita taringot sasahalak na baru tardidi manang sasahalak na porlu hata pangapulion. Halak Kristen di abad na parjolo, mansai lomo do roha ni nasida mamboto parngoluon ni donganna jala dilehon nasida do angka barita na denggan taringot dongan sahaporseaon tu nasida. (Epesus 6:21, 22; Kolosse 4:8, 9) Alai, boi do parohon jea gosip molo mangkatahon hata na so tutu manang paboaboahon urusanna sandiri tu na asing. Gosip boi gabe fitnah, i ma “mangkatahon na so tutu manang manudu sasahalak mangulahon na so tingkos, na paroaroahon jala manegai goar ni sasahalak”. Umpamana, laho paroaroahon goar ni Jesus, didok halak Parise do molo ibana mangulahon na jahat. (Mateus 9:32-34; 12:22-24) Fitnah jotjot do mambahen parbadaan.—Poda 26:20.
12 Ndang leas di Jahowa molo tapangke haboionta mangkatai tu na so denggan, na manegai goar ni sasahalak manang patubu parbadaan. Dihasogohon Ibana do na “pabolabola halak na marhahamaranggi”. (Poda 6:16-19) Hata Junani na diterjemahon gabe “halak na mangulahon fitnah”, i ma di·aʹbo·los, dipangke do gabe goar panjouon tu Sibolis. Didok do ibana “Sibolis”, ala sada hadirion na jahat do ibana, na manudu Jahowa mangulahon hajahaton. (Pangungkapon 12:9, 10) Lomo do rohanta pasidingkon pangkataion na mambahen hita dos songon Sibolis. Ndang boi adong di huria pangkataion na manudu sasahalak mangulahon hajahaton. Ala on, boi patubuhon “parbadabadaon” dohot “parsalisian”. (Galatia 5:19-21) Alani i, andorang so tahatahon taringot sasahalak tu na asing, tasungkun ma dirinta: ‘Sintong do barita on? Na patuduhon holong do ahu molo hupaboa tu na asing? Ringkot do manang marbisuk do ahu molo hupaboa on tu na asing?’—Jaha 1 Tessalonik 4:11.
27 OKTOBER–2 NOVEMBER
ARTA NA ARGA NA ADONG DI BIBEL PARJAMITA 11-12
Jaga ma Kesehatan jala Marlas ni Roha ma Hamu di Ngolumuna
g 3/15 13 ¶6-7
“Antibiotik” Alami do Udara Segar Dohot Las ni Ari
Boi do las ni ari pamatehon akka kuman. Majalah Journal of Hospital Infection paboahon “mate do dibahen las ni ari godangan bibit penyakit na adong di udara”.
Aha do manfaat ni penelitian on di hamu? Bahen hamu ma tikki satokkin lao mandadang jala menghirup udara segar. Pasti boi do dihilala hamu manfaatna.
Mangargai Hangoluan Silehon-lehon ni Debata
6 Nang pe dang bukku kesehatan Bibel, alai dipaboa do disi songon dia pandangan ni Jahowa taringot kesehatan. Misalna, dijujui do hita asa mambolokkon sude na boi mambahen sega dagingta. (Pjm. 11:10) Didok do muse di Bibel asa unang pagodangku taallang sipanganon jala unang pagodangku tainum minuman beralkohol. Boi do i mambahen hita marsahit jala boi mambahen hita mate. (Poda 23:20) Dipangido Jahowa do tu hita asa mangarajai diritta tikki mamillit sipanganon dohot siinumon, jala sadia godang i taallang dohot tainum.—1 Kor. 6:12; 9:25.
7 Molo taargai hangoluan na dilehon Debata, manat ma tapikkirhon sebelum hita mambahen keputusan. (Ps. 119:99, 100; jaha Poda 2:11.) Misalna, manat ma hita marpikkir tikki mamutusson aha na lao taallang. Nang pe lomo rohatta tu sada jenis sipanganon, alai molo taboto gabe marsahit hita ala mangallang i, pasti tahindari do i. Tapatudu ma tong na marbisuk hita molo cukkup hita modom, taratur berolahraga, jala manjaga kebersihan diri dohot jabutta.
“Ikkon Ulahononmuna do Hata i”
2 Akka halak na marlas ni roha do naposo ni Jahowa. Boasa tadokkon songon i? Godang do alasanna. Alai sada alasan na penting, i ma ala tajaha hata ni Debata ganup ari, jala sai berupaya do hita mangulahon na taparsiajari.—Jaha Jakobus 1:22-25.
3 Adong piga-piga manfaat na boi tadapot molo ‘taulahon hata ni Debata’. Contohna, tikki taulahon na taparsiajari sian Hata ni Debata, gabe las do roha ni Jahowa tabahen, jala hita pe gabe marlas ni roha do. (Pjm. 12:13) Molo taihutton poda sian hata ni Debata, gabe denggan ma hubungatta tu keluarga dohot akka dongan di huria. Pasti nungnga dihilala hamu manfaatna. Asing ni i, gabe terhindar ma hita sian akka masalah na boi terjadi ala dang mangihutton hata ni Jahowa. Sarupa do pakkilalaatta songon Raja Daud. Dung dipaboa ibana di endena taringot patik, aturan, dohot keputusan ni Jahowa tikki mangadili, didok ibana do, “Molo diulahon nasida i, dapotna ma upa na balga.”—Ps. 19:7-11.
Arta na Adong di Bibel
it “Ilham” ¶6
“Sinihatton”
Godang bukti na patuduhon dang songon robot akka bawa na dipakke Debata lao manurat akka Surat na Badia, na holan manuratton hata na didiktehon. Molo tajaha taringot Apostel Johannes, ‘dilehon Debata’ do pangungkapon tu ibana marhite “akka lambang” na dipaboa sada suru-suruan. Dung i “dipaboa si Johannes ma sude na niidana. Dipaboa ibana do taringot tu hata na dipaboa Debata dohot taringot hata na dipaboa Jesus Kristus”. (Pgk 1:1, 2) “Marhite panogu-noguon ni tondi parbadia diboan ma [si Johannes] tu ari ni Tuan i” jala dipaboa do tu ibana, “Suratton ma di sada gulungan akka naung diida ho.” (Pgk 1:10, 11) Jadi, diloas Debata do akka bawa na manurat Bibel mamillit hata na lao dipakke nasida tikki patorangkon parnidaan na diida nasida. (Hab 2:2) Alai tong do diurupi Debata nasida marhite tondi parbadiana asa boi toktong akurat na disurat nasida jala sesuai tu lomo ni rohana. (Poda 30:5, 6) Nang pe diurupi Debata nasida, ikkon bekerja keras do nasida tikki manurat Bibel. Parjamita 12:9, 10 paboahon manat do nasida mamikkiri, mamareso, jala denggan do disusun nasida hasilna. Gabe boi ma nasida manuratton ‘akka hata na palashon roha jala akka hata na sittong’.—Bandingkon Luk 1:1-4.