Boha do Carana asa Boi Taattusi Isi ni Bibel?

Na Didok Bibel

Sebenarna dipaboa do di Bibel boha carana asa taattusi isi ni Bibel i. Dang soal songon dia latar belakangmuna, sude na tarsurat di Bibel i “dang na pola maol lao attusanmuna jala dang na pola maol i lao ulahononmuna”.—5 Musa 30:11.

Cara lao mangattusi isi ni Bibel

1. Ikkon denggan do motifta. Ikkon taakkui do molo Bibel i Hata ni Debata. Jala, ikkon serep do rohatta tikki mamparsiajari i, alana sogo do roha ni Debata tu akka siginjang roha. (1 Tessalonik 2:13; Jakobus 4:6) Alai dang boi hita asal porsea, alana dipangido Debata do asa tapakke ‘nasa pikkiranta’ lao mangattusi aha na tajaha i.—Rom 12:1, 2.

2. Martangiang ma mangido bisuk. Didok di Poda 3:5, “Unang ma ho mangasahon pikkiranmu sandiri.” Sebalikna, ikkon ‘toktong do tapangido’ bisuk sian Debata asa boi taattusi isi ni Bibel.—Jakobus 1:5.

3. Taratur ma marsiajar. Molo holan sahali-sahali do hamu marsiajar Bibel, dang godang manfaat na boi dapotmuna. Alai molo taratur do hamu marsiajar Bibel, pasti godang do manfaat na dapotmuna.—Josua 1:8.

4. Tottuhon ma aha topikna. Asa lam menarik parsiajaran Bibelmuna, tottuhon hian ma topik aha do na lao diparsiajari hamu. Parjolo, parsiajari ma akka ajaran na ummura diattusi, dung i baru pe parsiajari hamu akka ajaran na ubbagas. (Heber 6:1, 2) Boi do muse dibandingkon hamu sada ayat tu ayat na asing. Molo dibahen hamu songon i, boi do annon ayat i patorakkon akka ayat na asing, termasuk ma akka ayat “na maol attusan”.—2 Petrus 3:16.

5. Pangido ma bantuan sian na asing. Dijujui do hita di Bibel lao mangido bantuan sian halak naung takkas mangattusi isi ni Bibel. (Ulaon ni Apostel 8:30, 31) Adong do dibahen Saksi Jahowa kursus marsiajar Bibel gratis. Sarupa songon halak Kristen di abad na parjolo, dipakke Saksi Jahowa do akka ayat ni Bibel lao mangurupi halak na asing asa mangattusi aha do sasittongna na diajarhon Bibel.—Ulaon ni Apostel 17:2, 3.

Na so pola porlu

1. Dang ikkon malo manang ikkon timbo sikkolamuna. Boi do denggan diattusi jala diajarhon 12 apostel ni Jesus isi ni Surat na Badia. Hape dianggap akka halak do nasida ‘dang parsikkola’.—Ulaon ni Apostel 4:13.

2. Dang ikkon adong hepeng. Dang ikkon mambayar hamu asa boi marsiajar Bibel. Alana didok Jesus do tu akka siseanna, “Ala dang margarar dijalo hamu sudena i, lehon hamu ma i dang margarar.”—Mateus 10:8.