Boasa Saksi Jahowa Dang Manjalo Mudar Marhite Transfusi?

Pandapot ni godangan halak

Nasida mandok: Dang porsea Saksi Jahowa tu perawatan medis.

Na Sasittongna: Dijalo hami do perawatan medis ala dihaholongi hami do dirinami dohot keluarganami. Tikki marsahit, lao do hami tu dokter na olo mangubati dohot mangoperasi, alai dang mamakke mudar. Diargai hami do perawatan medis na lam maju. Sasittongna, dang holan Saksi Jahowa be na so manjalo mudar marhite transfusi. Di godang negara, boi do akka pasien mamillit asa unang manjalo mudar marhite transfusi. Dang olo nasida hona jea alani transfusi. Umpamana, alani hasalaan ni jolma gabe hona sahit tikki transfusi, manang gabe mura marsahit.

Nasida mandok: Porsea do Saksi Jahowa molo haporseaon boi pamalumhon sahit.

Na Sasittongna: Dang porsea hami molo sahit boi malum alani haporseaon.

Nasida mandok: Ummarga do molo marubat dang mamakke transfusi.

Na Sasittongna: Ummura do molo marubat dang mamakke mudar.a

Nasida mandok: Ganup taon, godang do Saksi, dohot ma i akka dakdanak mate ala dang olo manjalo mudar marhite transfusi.

Na Sasittongna: Hata on dang toho. Godang do ahli bedah na so mamakke mudar tikki mangulahon operasi jantung, operasi ortopedis, dohot transplantasi organ.b Boi do malum akka pasien na so manjalo mudar marhite transfusi. Sipata, umhatop do malum nasida sian na manjalo transfusi.c Dang boi tadok molo halak na so manjalo transfusi gabe mate, manang halak na manjalo transfusi gabe malum.

Boasa Saksi Jahowa dang manjalo mudar marhite transfusi?

Alani haporseaonnami do. Takkas do didok di Padan na Robi dohot Padan na Imbaru, asa unang manjalo mudar. (1 Musa 9:4; 3 Musa 17:10; 5 Musa 12:23; Ulaon ni Apostel 15:28, 29) Jala, mudar i manggombarhon hangoluan do di adopan ni Debata. (3 Musa 17:14) Alani i, dang dijalo hami mudar alana diargai hami do Debata na mangalehon hangoluan.

Pandapot naung muba

Hea do didok akka dokter molo parubatan na so manjalo mudar marhite transfusi, i ma parubatan na pamatehon halak. Alai, dung piga-piga taon, nungnga muba be pandapot on. Umpamana, di taon 2004, sada artikel taringot medis mandok, “Parubatan na dipakke tu Saksi Jahowa, gabe sitiruon lao dipakke di piga-piga taon na naeng ro.”d Di taon 2010, sada artikel sian jurnal Heart, Lung and Circulation patorakkon molo “operasi na so mamakke mudar, dang holan tu Saksi Jahowa be diulahon. Alai, boi do on dipakke tu na asing, tarlumobi tikki adong operasi.”

Marribu dokter di liat portibi on nungnga mamakke isara na asing tikki operasi, alai dang mamakke mudar. Parubatan na so mamakke mudar nungnga diulahon di godang negara na berkembang jala nungnga godang halak na manjalo parubatan on, nang pe so Saksi Jahowa nasida.”