Toktong do Diihutton Hamu Hasittongan i?

1. Songon dia do pakkilalaanmuna tu hasittongan?

TAHAHOLONGI do Hata ni Debata, jala i ma na gabe dasar ni haporseaotta. (Rom 10:17) Pos rohatta, Jahowa do na mambahen huria Kristen “gabe tiang dohot fondasi ni hasittongan i”. (1 Tim. 3:15) Jala las do rohatta unduk tu “akka na manguluhon” hita tikki dipatorang nasida hasittongan ni Bibel, jala mangalehon petunjuk na sadalan tu lomo ni roha ni Jahowa.—Heb. 13:17.

2. Songon na dipaboa di Jakobus 5:​19, aha do na boi terjadi tu hita nang pe nungnga taparsiajari hasittongan?

² Nang pe nungnga tajalo hasittongan jala taihutton petunjuk sian organisasi ni Debata, boi dope hita dililuhon. (Jaha Jakobus 5:19.) Las hian do roha ni Sibolis molo mago haporseaotta tu Bibel manang tu petunjuk na tadapot sian organisasi.—Eps. 4:14.

3. Boasa ikkon taihutton hasittongan i? (Epesus 6:​13, 14)

³ Jaha Epesus 6:​13, 14. Satokkin nai, dipakke Sibolis do gabus lao mangaliluhon akka bangso asa mangalo Jahowa. (Pgk. 16:​13, 14) Jala taboto do na lam marsitutu Sibolis lao mangaliluhon naposo ni Jahowa. (Pgk. 12:9) Alani i, massai penting do talatik diritta asa boi mambedahon hasittongan dohot gabus, jala asa toktong taihutton hasittongan i. (Rom 6:17; 1 Ptr. 1:22) Porlu do on taulahon asa boi malua hita sian hasusaan bolon!

4. Aha do na lao tabahas di artikel on?

⁴ Di artikel on, naeng tabahas ma dua sifat na tahaporluhon lao mangurupi hita mangihutton hasittongan na sian Bibel dohot petunjuk sian organisasi. Dung i, tabahas ma tolu cara asa toktong taihutton hasittongan i.

AKKA SIFAT NA TAHAPORLUHON ASA BOI MANGIHUTTON HASITTONGAN

5. Aha do manfaatna molo tahabiari Jahowa?

⁵ Makkabiari Jahowa. Makkabiari Jahowa lapatanna tahaholongi do Jahowa jala dang olo hita mangulahon manang aha pe na mambahen haccit rohana. Lomo do rohatta mamboto beda ni hasittongan dohot gabus asa boi tabahen las roha ni Jahowa. (Poda 2:​3-6; Heb. 5:14) Jadi, unang ma paloas biarta tu jolma gabe umbalga sian holongta tu Jahowa. Alana, aha na mambahen las roha ni jolma belum tentu mambahen las roha ni Jahowa.

6. Aha do akibatna ala mabiar sappulu mata-mata i tu halak Kanaan?

⁶ Molo umbalga biar ni rohatta tu jolma sian tu Debata, gabe mura ma hita porsea tu barita na maralo tu hasittongan. Taida ma contoh ni 12 pamimpin na gabe mata-mata lao mangida Tano na Dijanjihon Jahowa tu halak Israel. Molo sappulu mata-mata i, umbalga do biar ni nasida tu halak Kanaan sian holong ni nasida tu Jahowa. Didok nasida do tu halak Israel na asing, “Dang taralo hita nasida, ai umgogo do nasida sian hita.” (4 Mus. 13:​27-31) Memang sian sudut pandang ni jolma, umgogo do halak Kanaan sian halak Israel. Alai akka mata-mata na mandok dang sanggup halak Israel manaluhon musu ni nasida, sasittongna dang porsea tu Jahowa. Seharusna, ikkon diingot sappulu mata-mata i do aha na dihalomohon Jahowa tu halak Israel, jala ikkon dirimangi nasida do aha na baru diulahon Jahowa tu bangso i. Molo diulahon nasida i, gabe disadari nasida ma dao do umgogo Jahowa sian halak Kanaan i. Alai asing do si Josua dohot si Kaleb. Lomo do roha ni nasida na dua mambahen las roha ni Jahowa. Didok nasida do tu bangso i, “Molo lomo do roha ni Jahowa mangida hita, boanonna do hita tu luat i. Jala lehononna do luat i tu hita.”—4 Mus. 14:​6-9.

7. Songon dia do carana asa lam tahabiari Jahowa? (Ida gambar.)

⁷ Asa lam tahabiari Jahowa, andorang so tabahen keputusan ikkon taingot do aha na mambahen las roha ni Jahowa. (Ps. 16:8) Tikki dijaha hamu sada cerita di Bibel, sukkun ma dirimuna, ‘Molo di situasi on au, aha do keputusan na hubahen?’ Misalna, bayakkon ma dirimuna mambege sappulu mata-mata ni Israel mandok, dang sanggup halak Israel mangalo halak Kanaan. Pittor porsea do hamu tu hata ni nasida i jala mabiar? Manang, umbalga do holongmuna tu Jahowa jala bertekad do hamu mambahen las rohana? Ingot ma, sude bangso Israel dang porsea tu hasittongan na dipaboa si Josua dohot si Kaleb. Akibatna, dang diloas Jahowa nasida masuk tu Tano na Dijanjihon.—4 Mus. 14:​10, 22, 23.

8. Sifat aha do muse na ikkon tapatudu asa toktong mangihutton hasittongan, jala boasa?

⁸ Serep ni roha. Holan tu halak na serep roha do Jahowa paboahon hasittongan. (Mat. 11:25) Pasti ala na serep do rohatta umbahen na olo hita marsiajar hasittongan. (Ul. 8:​30, 31) Alai, ikkon manat do hita asa unang gabe ginjang rohatta. Alana molo ginjang rohatta, boi do hita merasa sarupa do sittong ni pandapotta songon prinsip ni Bibel dohot petunjuk sian organisasi.

9. Songon dia do carana asa toktong tapatudu serep ni roha?

⁹ Asa toktong serep rohatta, taingot ma unjago do pikkiran ni Jahowa sian pikkiranta sandiri. (Ps. 8:​3, 4) Jala, martangiang ma hita asa boi toktong serep rohatta jala rade diajari Jahowa. Pasti diurupi Jahowa do hita asa boi taargai jala taihutton pikkiranna na tadapot sian Bibel dohot sian organisasina. Tikki dijaha hamu Bibel, lului ma akka bukti na patuduhon na holong do roha ni Jahowa tu halak na serep roha, jala sogo do rohana tu halak na ginjang roha dohot na mangandalhon pikkiranna sandiri. Jala, lam marsitutu ma hamu asa toktong marserep ni roha tarlumobi molo adong tanggung jawabmuna di organisasi.

CARA ASA TOKTONG TAIHUTTON HASITTONGAN I

10. Ise do na dipakke Jahowa lao mangalehon petunjuk tu akka naposona?

¹⁰ Toktong ma porsea tu petunjuk na dilehon organisasi ni Jahowa. Najolo, dipakke Jahowa do si Musa dohot si Josua lao mangalehon petunjuk tu halak Israel. (Jos. 1:​16, 17) Tikki halak Israel mangihutton jala mangakkui nasida gabe wakil ni Jahowa, dipasu-pasu do bangso i. Marratus taon dukkon i, dung adong huria Kristen na parjolo, akka apostel na 12 halak i ma na mangalehon petunjuk. (Ul. 8:​14, 15) Di pudian ni ari, dohot do muse akka sintua na di Jerusalem mangalehon petunjuk. Ala diihutton akka dongan do petunjuk sian nasida, “gabe lam togu ma haporseaon ni akka huria i, jala lam tamba ma godang ni nasida ganup ari”. (Ul. 16:​4, 5) Saonari pe, dipasu-pasu do hita molo taihutton petunjuk sian organisasi ni Jahowa. Alai songon dia do perasaan ni Jahowa molo dang olo hita mangihutton petunjuk sian akka halak na dipillit Ibana? Asa tadapot alusna, tabahas ma na terjadi tu halak Israel tikki di pardalanan lao tu Tano na Dijanjihon.

11. Aha do na terjadi tikki adong halak Israel na mangalo si Musa? (Ida gambar.)

¹¹ Tikki di pardalanan halak Israel tu Tano na Dijanjihon, adong ma akka bawa na mangalo si Musa jala dang mangakkui si Musa gabe wakil ni Jahowa. Didok nasida, “Badia do bangso on, jala didongani Jahowa do nasida.” (4 Mus. 16:​1-3) Memang, badia do “bangso” i di adopan ni Jahowa. Alai, nungnga dipillit Jahowa si Musa lao manguluhon akka naposona. (4 Mus. 16:28) Jadi tikki dialo nasida si Musa, sebenarna Jahowa do na dialo nasida disi. Dang dipikkirhon nasida lomo ni roha ni Jahowa. Holan mamikkiri dirina sandiri do nasida. Lomo do roha ni nasida asa dipasangap jala mandapot lam godang tanggung jawab. Akibatna, dipamate Jahowa ma nasida dohot marribu halak na mendukung nasida. (4 Mus. 16:​30-35, 41, 49) Saonari pe, pos do rohatta dang lomo roha ni Jahowa mangida akka halak na so olo mangihutton petunjuk sian organisasi.

12. Boasa boi toktong tapatogu pos ni rohatta tu organisasi ni Jahowa?

¹² Boi do tapatogu pos ni rohatta tu organisasi ni Jahowa. Sipata, porlu do dibahen penyesuaian taringot pangattusiotta na sian Bibel dohot caratta lao melayani Jahowa. Di situasi sisongon i, pittor rade do Punguan na Mangaradoti Organisasi mambahen penyesuaian. (Poda 4:18) Nasida mangulahon i asa boi mambahen las roha ni Jahowa. Berupaya do nasida mambahen asa sadalan keputusan ni nasida tu Hata ni Debata. Alana, i do aturan na ikkon diihutton sude naposo ni Jahowa.

13. Aha do “aturan naung ditottuhon di ajaran na sittong”, jala aha do na ikkon taulahon?

¹³ “Toktong ma ihutton akka aturan naung ditottuhon di ajaran na sittong.” (2 Tim. 1:13) “Aturan naung ditottuhon di ajaran na sittong” lapatanna akka ajaran na diajarhon Jesus dohot sude ajaran na adong di Bibel. (Joh. 17:17) Ajaran i ma na gabe dasar ni haporseaotta. Alani i, sai diurupi organisasi do hita asa toktong taihutton aturan na sian Bibel. Molo toktong taulahon i, pasti dipasu-pasu do hita.

14. Songon dia do piga-piga halak Kristen dang be mangihutton “aturan naung ditottuhon di ajaran na sittong”?

¹⁴ Aha do na masa molo dang taihutton be “aturan naung ditottuhon di ajaran na sittong”? Tabahas ma jo sada contoh. Di abad na parjolo adong do piga-piga halak Kristen na paboahon barita na so sittong. Didokkon nasida nungnga ro ari ni Jahowa. Bisa jadi, adong dapot ni nasida surat na dirippu nasida sian Apostel Paulus. Dang jolo dipastihon halak Kristen na di Tessalonik faktana. Gariada pittor porsea do nasida tu barita i, jala dipaboa nasida muse tu na asing. Autsugari ma diingot nasida aha naung dipaboa si Paulus tu nasida, pasti dang tertipu nasida. (2 Tes. 2:​1-5) Dipaboa si Paulus do tu nasida asa unang pittor porsea tu akka barita na dibege. Jala asa unang tertipu be nasida, didokkon si Paulus ma di suratna na paduahon, “Au si Paulus, au sandiri do na manuratton tabe on. Sai songon i do hubahen di sude surattu, asa diboto hamu au do na manurat surat i.”—2 Tes. 3:17.

15. Aha do na ikkon taulahon molo adong barita na songon na sittong idaon? Paboa ma contoh. (Ida gambar.)

¹⁵ Aha do na boi taparsiajari sian hata ni si Paulus tu halak Kristen di Tessalonik? Molo adong tabege barita na so sesuai tu hasittongan na sian Bibel, ikkon marbisuk do hita. Misalna najolo, akka dongan di Uni Soviet mandapot surat na dirippu nasida sian kantor pusat. Hape sebenarna sian akka halak na karejo di pemerintahan do surat i. Di surat i, dijujui do akka dongan asa mambahen organisasi sandiri. Memang songon na sittong do idaon isi ni surat i. Alai akka dongan na setia dang olo tertipu. Diboto nasida do molo isi ni surat i dang sadalan tu na diparsiajari nasida saleleng on. Saonari pe, olo do akka halak na marsogo ni roha tu hita mamakke Internet manang media sosial, lao paboahon barita na mambahen hita gabe bingung jala dang marsada be. Alani i, “unang ma pittor bingung [hita] manang gabe ragu”. Asa boi hita terlindung, tapastihon ma sesuai do barita na tajalo i tu hasittongan manang na daong.—2 Tes. 2:2; 1 Joh. 4:1.

16. Songon na dipaboa di Rom 16:​17, 18, aha do na ikkon taulahon molo adong piga-piga halak na paboahon barita na so sittong di huria?

¹⁶ Toktong ma marsada dohot akka dongan na setia tu Jahowa. Lomo do roha ni Jahowa asa marsada hita lao manomba Ibana. Asa boi hita toktong marsada, ikkon taihutton do hasittongan i. Dipasingot Debata do hita asa ‘tapadao’ diritta sian akka halak na paboahon barita na so sittong. Alana, boi do i mambahen huria gabe dang marsada. Molo dang taihutton sipasingot i, hita sandiri do na gabe dao sian Jahowa.—Jaha Rom 16:​17, 18.

17. Aha do manfaatna molo toktong taihutton hasittongan i?

¹⁷ Molo toktong taihutton hasittongan i, boi ma toktong jonok hita tu Jahowa jala togu haporseaotta. (Eps. 4:​15, 16) Boi ma hita terlindung sian ajaran ni Sibolis dohot akka barita na so sittong. Hita pe boi toktong aman saleleng hasusaan bolon. Alani i, toktong ma taihutton hasittongan i, “dung i donganan ni Debata silehon dame i ma [hita]”.—Plp. 4:​8, 9.