Sanggup do Jahowa Mangurupi Hamu

1. Tikki mamboan halak Israel kaluar sian Mesir, aha do na patuduhon na pos situtu roha ni si Musa tu Jahowa?

GODANG do akka halak na togu haporseaonna na disurat di Bibel. Sada sian i, i ma si Musa. (Heb. 3:​2-5; 11:​23-25) Tikki disuru Jahowa ibana mamboan halak Israel sian Mesir, pos situtu do rohana tu Jahowa. Dang mabiar si Musa tu si Firaun dohot akka tentarana na gogo. Torus do diasahon si Musa Jahowa tikki diboan ibana bangso Israel mangalewati Laut Merah. (Heb. 11:​27-29) Asing ni i, tikki di padang belantara godang do halak Israel i na ragu tu Jahowa, sanggup do Jahowa mangalehon akka na dihaporluhon nasida manang na daong. Alai anggo si Musa, pos do rohana tu Jahowa jala dang olo ibana dipengaruhi nasida. Jala memang i do na diulahon Jahowa marhite mukjizat. Diparade Ibana do sipanganon dohot aek asa boi toktong nasida mangolu tikki di padang belantara i.a—2 Mus. 15:​22-25; Ps. 78:​23-25.

2. Boasa didok Debata tu si Musa, “Ai na dirippu ho do na so sanggup Au Jahowa mangulahon i?” (4 Musa 11:​21-23)

² Pos situtu do roha ni si Musa tu Jahowa. Alai hira-hira sataon dung kaluar bangso Israel sian Mesir, sanga do ragu si Musa tu Jahowa. Marjanji do Jahowa na lao lehononna do jagal tu halak Israel. Alai didok roha ni si Musa ma, ‘Sanggup do Jahowa paradehon i tu marjuta halak na di padang belantara on?’ Alani i didok Jahowa ma tu si Musa, “Ai na dirippu ho do na so sanggup Au Jahowa mangulahon i?” (Jaha 4 Musa 11:​21-23.) Molo di bahasa aslina, hata “sanggup” na didok di ayat on, i ma “tangan ni Jahowa”. Tangan ni Jahowa na dimaksud di ayat on, i ma tondi parbadiana. Jala tondi parbadia i do na dipakke Jahowa lao mangulahon lomo ni rohana.

3. Boasa porlu tarimangi pengalaman ni si Musa dohot halak Israel?

³ Sipata olo do khawatir hita, paradeon ni Jahowa do akka na porlu di hita dohot keluargatta. Alani i tabahas ma pengalaman ni si Musa dohot halak Israel. Sanga do nasida ragu, sanggup do Jahowa mangalehon akka na porlu di nasida manang na daong. Jala lao tabahas ma piga-piga prinsip ni Bibel na mambahen lam pos rohatta, pasti sanggup do Jahowa mangalehon akka na tahaporluhon.

MARSIAJAR SIAN SI MUSA DOHOT HALAK ISRAEL

4. Aha do na mambahen gabe marungut-ungut bangso Israel?

⁴ Di tikki i, rap do halak Israel dohot akka “halak sian bangso na asing” kaluar sian Mesir tu Tano na Dijanjihon. Jala nungnga piga-piga leleng nasida di padang belantara. (2 Mus. 12:38; 5 Mus. 8:15) Alai bosan do akka halak na sian bangso na asing i mangallang manna jala godang do halak Israel na mangihutton nasida. Ujungna, marungut-ungut ma nasida sude tu si Musa. (4 Mus. 11:​4-6) Didok nasida, tabo do sipanganon ni nasida tikki di Mesir. Alani i, marsak ma si Musa. Didok rohana, sian dia ma boi dapotna sipanganon lao allangon ni nasida sude.—4 Mus. 11:​13, 14.

5-6. Aha do na taparsiajari sian pangalaho ni halak Israel?

⁵ Gabe ditiru halak Israel do pangalaho ni akka halak sian bangso na asing i. Dang dihamauliatehon nasida akka naung dilehon Jahowa tu nasida. Hita pe boi do gabe songon i. Gabe tatiru pangalaho ni akka halak na di portibi on jala dang tahamauliatehon sude na dilehon Jahowa tu hita. Olo do ra gabe marungut-ungut hita mangida tabo ngolu ni akka halak, jala sai taingot-ingot akka naung tatinggalhon najolo. Alai molo puas do hita tu na adong di hita saonari, boi ma hita marlas ni roha.

⁶ Asing ni i, ikkon diingot halak Israel do janji ni Jahowa tu nasida. Nungnga didok Jahowa, na lao lehononna do godang pasu-pasu tu nasida. Alai dung sahat di Tano na Dijanjihon do dapot ni nasida i, dang tikki di padang belantara. Dos songon i, sai taingot ma lao lehonon ni Jahowa do tu hita akka pasu-pasuna haduan di tano na imbaru. Alani i, unang ma akka na so adong di hita saonari na sai tapikkirhon. Jala tarimangi ma akka ayat ni Bibel na mangurupi hita asa lam marpos ni roha tu Jahowa.

7. Boasa pos rohatta pasti sanggup do Jahowa mangurupi hita?

⁷ Tikki i, didok Jahowa do tu si Musa, “Ai na dirippu ho do na so sanggup Au Jahowa mangulahon i?” Boasa didok Jahowa songon i? Lomo do roha ni Jahowa asa diingot si Musa on: (1) Dang terbatas huasona. (2) Boi do dipakke Jahowa huasona i mangurupi akka naposona manang didia pe nasida. Hita pe gabe pos ma rohatta, rade do Jahowa mamakke huasona i lao mangurupi akka naposona. (Ps. 136:​11, 12) Nang pe halak Israel i di padang belantara, sanggup do Jahowa paradehon jagal lao allangon ni nasida. Jadi pos ma rohatta, tikki susa hita pasti urupan ni Jahowa do hita ganup marsada-sada, dang soal didia hita tinggal.—Ps. 138:​6, 7.

8. Asa unang gabe songon halak Israel hita, aha do na porlu taulahon? (Ida gambar.)

⁸ Ditepati Jahowa do janjina i. Dikirim Ibana ma massai godang burung puyuh tu halak Israel. Alai dang dihamauliatehon nasida i. Sian dia taboto? Arian nang borngin sai dipapungu nasida do burung puyuh i. Mokkus hian do nasida. Alani i, muruk ma Jahowa tu nasida jala dihukum Jahowa ma “akka halak na mokkus i”. (4 Mus. 11:​31-34) Aha ma na taparsiajari sian on? Dang soal mamora hita manang pogos, puas ma hita tu na adong di hita. Tapapungu ma “arta di banua ginjang”. Lapatanna ikkon tapatogu do hubungatta tu Jahowa dohot tu Jesus. (Mat. 6:​19, 20; Luk. 16:9) Molo taulahon i, pos ma rohatta pasti paradeon ni Jahowa do akka na tahaporluhon.

9. Aha do na taboto taringot Jahowa?

⁹ Saonari pe sai rade do Jahowa mangurupi akka naposona. Memang, tetap dope ra susa hita di parhepengon manang kelaparan.b Alai pos ma rohatta, dang na lao tinggalhonon ni Jahowa hita. Dang soal sitaonon aha pe na masa tu hita, pasti do diurupi Jahowa hita. Songon dia do carana patuduhon na pos rohatta pasti diparade Jahowa kebutuhanta? Tabahas ma dua situasi: (1) tikki susa di parhepengon, dohot (2) tikki mamikkirhon boha do kebutuhanta haduan dung matua hita.

TIKKI SUSA DI PARHEPENGON

10. Akka situasi aha do na boi mambahen hita susa di parhepengon?

¹⁰ Ala lam jonok ari ni Jahowa, pasti lam susa do parhepengon. Alana terjadi do porang, bencana alam, situasi politik na so stabil manang pandemi. Tikki terjadi sudena i, olo do ra dang adong be karejotta, mago artatta, manang jabutta. Jala gabe lam maol ma hita paradehon akka na tahaporluhon. Ikkon talului do ra karejo na baru, manang ikkon pinda hita tu inganan na asing asa boi taparade akka na tahaporluhon. Alai molo masa sisongon i, tabahen ma keputusan na patuduhon na pos rohatta tu Jahowa. Boha do caratta mangulahon i?

11. Aha do na boi mangurupi hamu tikki susa di parhepengon? (Lukas 12:​29-31)

¹¹ Cara na uppetting na porlu dibahen hamu, i ma paboahon arsak ni rohamuna tu Jahowa. (Poda 16:3) Pangido ma bisuk asa diurupi hamu mambahen keputusan na denggan. Jala pangido ma asa diurupi Jahowa hamu tetap tenang asa ‘unang paholsohu’ mamikkiri situasimuna i. (Jaha Lukas 12:​29-31.) Asing ni i, pangido ma asa diurupi Jahowa hamu toktong puas tu na adong di hamu. (1 Tim. 6:​7, 8) Boi do muse dibahen hamu riset sian akka publikasitta, asa diboto hamu cara mangadopi masalah di parhepengon. Alana, godang do naung mandapot manfaat sian akka publikasi dohot video di jw.org na mambahas taringot i.

12. Sukkun-sukkun aha do na porlu tapikkirhon tikki naeng mamillit karejo?

¹² Adong do piga-piga na olo manjalo karejo tu inganan na dao, hape ikkon ditinggalhon do keluargana. Alai di pudian ni ari, disadari nasida ma dang denggan hape keputusanna i. Jadi andorang so tajalo sada karejo, unang ma holan mamikkirhon sadia balga gajina. Alai, pikkirhon ma boha do pengaruh ni i tu hubungatta tu Jahowa. (Luk. 14:28) Pikkirhon ma muse sukkun-sukkun on: ‘Molo hutinggalhon dongan saripekku alani karejo on, boha do annon perkawinannami? Boi do annon au marpungu, marbarita, jala bergaul dohot akka dongan?’ Molo adong gellengmuna, pikkirhon ma tong taringot on: “Molo dang rap au dohot gellengku, boi do ‘huajar-ajari jala hupodai nasida hombar tu lomo ni roha ni Jahowa’?” (Eps. 6:4) Tikki naeng mambahen keputusan, unang ma taihutton hata ni keluargatta manang donganta na so mangihutton prinsip ni Bibel.c Alai pikkiran ni Jahowa ma na taihutton. Adong sahalak donganta na tinggal di sada negara di Asia, goarna si Tony. Ditawarhon do tu ibana piga-piga karejo di luar negeri na balga gajina. Boha do tanggapan ni si Tony? Dihatai ibana ma i dohot istrina, jala ditangiakkon nasida do i. Ujungna, ditolak si Tony ma karejo i. Berupaya do ibana dohot keluargana asa hemat. Aha do pasu-pasu na dijalo si Tony? Didok ibana, “Ala hutolak karejo i, boi ma huurupi piga-piga halak mananda Jahowa. Asing ni i, boi ma diurupi hami gellengnami marale-ale tu Jahowa. Jadi sian on marsiajar do hami, molo toktong taihutton prinsip na adong di Mateus 6:​33, pos do rohanami pasti diparade Jahowa do akka na porlu di hami.”

TIKKI MAMIKKIRHON KEBUTUHANTA DUNG MATUA HITA

13. Aha do na porlu taulahon saonari asa boi taparade kebutuhanta molo dung matua hita?

¹³ Hea do ra tapikkirhon boha do ngolutta molo dung matua hita. Khawatir do hamu mamikkirhon parhepengonmuna molo nungnga matua hamu? Pos do rohamuna na boi Jahowa paradehon kebutuhanmuna? Memang didok do di Bibel, hepeng i boi songon parlinggoman. (Pjm. 7:12) Jala didok Bibel do muse, ikkon kerja keras do hita asa boi taparade kebutuhanta di ari na naeng ro. (Poda 6:​6-11) Jala denggan do tong molo tasippan hepengta lao tu kebutuhanta di ari na naeng ro. Alai, unang ma mangalului hepeng gabe na uppetting di ngolutta.

14. Boasa porlu tarimangi Heber 13:5 tikki mamikkirhon taringot ngolutta haduan?

¹⁴ Hea do dipaboa Jesus sada tudosan taringot sasahalak na papunguhon arta, alai “dang mamora di adopan ni Debata”. (Luk. 12:​16-21) Alai sasittongna, dang masuk akkal na binahenna i. Alana, dang taboto songon dia ngolutta sogot. (Poda 23:​4, 5; Jak. 4:​13-15) Asing ni i, hea do dipaboa Jesus tu akka siseanna, ikkon rade do nasida ‘manadikkon sude arta ni nasida’. (Luk. 14:33) I ma na dihilala halak Kristen na di Judea di abad na parjolo. Alai, toktong do nasida marlas ni roha. (Heb. 10:34) Saonari pe, ala dang olo terlibat tu urusan politik, godang do akka dongan na agoan arta jala dipakaluar do nasida sian parkarejoanna. (Pgk. 13:​16, 17) Aha ma na mangurupi nasida asa martahan mangadopi situasi i? Pos do roha ni nasida tu janji ni Jahowa na mandok, “Dang tadikkonokku ho jala dang pasombuokku ho.” (Jaha Heber 13:5.) Memang, porlu do manat tapikkirhon jala tabahen rencana taringot parhepengonta tu ari na naeng ro. Alai molo masa pe situasi na so tarduga, ikkon pos do rohatta pasti paradeon ni Jahowa do akka na tahaporluhon.

15. Aha do sasittongna tujuan ni natua-tua pagodang-godangkon gellengna? (Ida gambar.)

¹⁵ Di piga-piga budaya, godang do halak na lomo rohana margelleng. Tujuanna asa boi akka gellengna i mangurus nasida haduan molo nungnga matua nasida. Jala berharap do nasida asa akka gellengna i na paradehon kebutuhan ni nasida. Hape didok di Bibel, natua-tua do na ikkon paradehon akka na porlu tu gellengna. (2 Kor. 12:14) Memang molo nga matua hita, porlu do ra hita diurupi akka gellengta di parhepengon dohot di akka situasi na asing. Jala godang do akka ianakkon na las rohana mangulahon i. (1 Tim. 5:4) Alai, boha do sasittongna pandangan ni natua-tua taringot i? Ikkon diingot nasida do tujuan ni nasida pagodang-godangkon gellengna, i ma asa disomba gellengna i do Jahowa, dang asa adong na mangalehon hepeng tu nasida haduan.—3 Joh. 4.

16. Aha do na porlu diulahon natua-tua asa gabe halak na mandiri gellengna? (Epesus 4:28)

¹⁶ Hamu akka natua-tua, ajari ma gellengmuna mangasahon Jahowa. Patudu ma i sian tindakanmuna. Jala latik ma nasida asa gabe halak na mandiri. Nang pe gelleng dope ianakkonmuna, alai ajari ma nasida mamboto massai penting do kerja keras. (Poda 29:21; jaha Epesus 4:28.) Urupi ma tong nasida asa ringgas di sikkola. Porlu do dibahen hamu riset jala mangalului akka prinsip na adong di Bibel lao mangurupi gellengmuna mambahen keputusan na denggan taringot pendidikan. Molo dibahen hamu songon i, boi ma gellengmuna paradehon kebutuhanna sandiri haduan. Jala boi ma nasida mangalehon godang tikkina tu Jahowa, bahkan merintis.

17. Aha do na porlu taingot?

¹⁷ Molo taasahon Jahowa, pos do rohatta pasti sanggup jala olo do Jahowa paradehon akka na tahaporluhon. Ala nungnga lam jonok panutup ni jaman on, ikkon lam taasahon do Jahowa. Manang aha pe na masa, pos ma rohatta pasti dipakke Jahowa do huasona na balga i lao paradehon kebutuhanta. Jadi taingot ma, sanggup do Jahowa mangurupi sude naposona manang didia pe nasida tinggal.