Toktong ma Marsiajar sian Ajaran Dasar ni Bibel

1. Aha do pengaruhna tu hamu tikki parjolo sahali mamboto hasittongan na sian Bibel?

GABE muba do ngolutta dung taparsiajari ajaran dasar na sian Bibel. Misalna, dung taboto Jahowa do goar ni Debata, gabe lomo ma rohatta jonok tu Ibana. (Jes. 42:8) Dung taparsiajari songon dia keadaan ni halak naung mate, gabe pos ma rohatta tikki mate halak na tahaholongi dang disiksa nasida. (Pjm. 9:10) Jala tikki taparsiajari taringot janji ni Debata na lao bahenonna Paradeiso di tano on, gabe dang khawatir be hita taringot masa depanta. Jala pos ma rohatta molo umurta dang holan sahat tu 70 manang 80 taon, alai boi do hita mangolu saleleng ni lelengna.—Ps. 37:29; 90:10.

2. Boasa dipaingot si Petrus akka dongan ‘naung togu di hasittongan’ asa toktong mangingot ajaran dasar ni Bibel? (2 Petrus 1:​12, 13)

² Unang ma talupahon akka ajaran dasar na hea taparsiajari sian Bibel. Di suratna na paduahon, dilehon si Petrus do sada sipasingot tu akka halak Kristen ‘naung togu di hasittongan’. (Jaha 2 Petrus 1:​12, 13.) Di tikki i, adong do piga-piga halak di huria na gabe jahat. Lomo do roha ni nasida asa ditinggalhon halak Kristen hasittongan. (2 Ptr. 2:​1-3) Alani i, lomo do roha ni si Petrus lao patoguhon akka donganna asa unang terpengaruh tu akka halak na jahat i. Jadi, dipaingot ibana do nasida tu akka ajaran naung hea diparsiajari nasida. Alana boi do akka ajaran i mangurupi nasida asa tetap setia tu Jahowa.

3. Boasa ikkon toktong dirimangi sude halak Kristen akka ajaran dasar ni Bibel? Paboa ma ilustrasina.

³ Nang pe naung leleng hita manomba Jahowa, alai boi do tong tadapot manfaat sian akka ajaran dasar na adong di Bibel. Bayakkon ma, adong sahalak naung malo mangaloppa dohot na baru marsiajar dope. Sarupa do bahan na dipakke nasida. Alai halak naung malo mangaloppa i, diboto ibana do marragam cara lao mamakke bahan i asa boi gabe sipanganon na tabo jala menarik. Suang songon i ma, ubbagas do parsiajaran na dapot ni halak naung leleng manomba Jahowa sian halak na baru marsiajar Bibel dope, nang pe sarupa ayat na diparsiajari nasida. Boasa boi tadok songon i? Ra dung tardidi hita, nungnga muba situasi dohot akka tugas na tadapot di organisasi ni Jahowa. Jadi tikki tarimangi muse akka ajaran dasar na hea taparsiajari, gabe boi ma taboto parsiajaran na asing na boi taterappon di ngolutta saonari. Di artikel on, lao tabahas ma tolu ajaran dasar ni Bibel jala songon dia sasahalak naung leleng manomba Jahowa boi mandapot manfaat sian i.

JAHOWA DO SITOPPA SALUHUTNA

4. Aha do pengaruhna dung taboto Jahowa do na manoppa hita?

⁴ Bibel mandok, “Debata do na manoppa nasa na adong.” (Heb. 3:4) Taboto do Debata na manoppa tano on dohot saluhutna. Pargogo na So Hatudosan do Ibana jala marbisuk. Alai godang dope na boi taparsiajari sian ayat on. Ala Jahowa do na manoppa hita, diboto Ibana do sude taringot hita. Parduli do Ibana tu hita jala diboto do aha na terbaik tu hita. Aha do pengaruhna dung taboto Jahowa do na manoppa hita? Gabe lam denggan ma ngolutta jala adong ma tujuan ni ngolutta.

5. Ajaran ni Bibel na dia do na boi mangurupi hita asa marserep ni roha? (Jesaya 45:​9-12)

⁵ Dung taboto Jahowa do Sitoppa hita, gabe marsiajar ma muse hita na ikkon serep rohatta. Taida ma contoh ni si Job. Hea do sala cara marpikkirna taringot Jahowa. Jotjot do ibana holan mamikkiri dirina sandiri, jala berupaya mambuktihon molo ibana do na sittong. Alai dipaingot Jahowa do si Job, Sitoppa saluhutna do Jahowa jala Pargogo na So Hatudosan. (Job 38:​1-4) Gabe disadari si Job ma, sai sittong do sude na dibahen Jahowa. Di pudian ni ari didok Panurirang Jesaya do di suratna, “Patut do dohonon ni tano liat tu Sitopa ibana, ‘Ai aha do dibahen ho?’”—Jaha Jesaya 45:​9-12.

6. Tikki sadihari do porlu tarimangi gogo dohot bisuk ni Jahowa Sitoppa saluhutna? (Ida gambar.)

⁶ Ala nungnga leleng hita manomba Jahowa, olo do ra gabe taandalhon pikkiranta sandiri. Gabe dang taandalhon be Jahowa jala dang talului be petunjuk sian Bibel. (Job 37:​23, 24) Asa unang songon i hita, ikkon tarimangi do gogo dohot bisuk ni Jahowa Sitoppa saluhutna. (Jes. 40:22; 55:​8, 9) Boi do i mangurupi hita lao menyadari na untimbo do pikkiran ni Jahowa sian pikkiranta. Jala boi do i mangurupi hita asa marserep ni roha.

7. Aha do na diulahon si Rahela asa boi mangihutton perubahan di organisasi?

⁷ Taida ma jo pengalaman ni si Rahela na tinggal di Slovenia. Ala dirimangi ibana Jahowa do Sitoppa saluhutna, gabe boi ma ibana mangihutton perubahan di organisasi. Didok si Rahela, “Sipata, maol do di au mangihutton perubahan na dibahen akka dongan na manguluhon di organisasi. Misalna, taringot Laporan na Terbaru sian Punguan na Mangaradoti Bagian 8 Taon 2023. Disi dipaboa, boi do akka donganta bawa marjanggut. Alai tikki parjolo sahali huida donganta na marjanggut pasahatton jamita, hira dang terima au disi. Alani i, martangiang ma au tu Jahowa asa boi huihutton perubahan i.” Disadari si Rahela, ala Jahowa do Sitoppa saluhutna, pasti diboto Ibana do cara na terbaik lao manogu-nogu naposona. Jadi molo maol dihilala hamu mangihutton pemahaman manang petunjuk na terbaru, bahen ma tikki lao mangarimangi Debata Pargogo na So Hatudosan jala na marbisuk do Jahowa i.—Rom 11:​33-36.

BOASA DIPALOAS DEBATA HITA SUSA

8. Aha do pengaruhna tu hita dung taboto boasa dipaloas Debata hita susa?

⁸ Boasa dipaloas Debata hita susa? Piga-piga halak na so mamboto alusna gabe muruk do tu Debata manang didok rohana dang tutu adong Debata. (Poda 19:3) Alai berbeda do molo hita. Nungnga taparsiajari, susa pe hita ala na mardosa do hita jala dang sempurna. Dang Jahowa na mambahen hita susa. Marsiajar do tong hita, ala sabar do Jahowa gabe lam godang ma halak na boi mananda Ibana. Gabe diboto nasida ma, satokkin nai salpuhonon ni Jahowa do sude sitaononta. (2 Ptr. 3:​9, 15) Dung taboto boasa dipaloas Jahowa hita susa, gabe tarapul ma rohatta. Jala gabe taronjar ma rohatta lao pajonokkon diritta tu Ibana.

9. Tikki sadihari do ikkon tarimangi boasa dipaloas Jahowa hita susa?

⁹ Memang taboto do na ikkon sabar hita paimahon Jahowa manalpuhon sude sitaononta. Alai tikki dibahen na so adil tu hita, tikki susa hita dohot keluargatta, manang tikki mate halak na tahaholongi, olo do gabe sukkun-sukkun rohatta, boasa dang pittor hatop Jahowa bertindak. (Hab. 1:​2, 3) Molo songon i na tahilala, denggan do molo tarimangi muse boasa dipaloas Jahowa hita susa.a (Ps. 34:19) Asing ni i, denggan do molo taingot muse janji ni Jahowa na lao manalpuhon sude sitaononta sahat tu saleleng ni lelengna.

10. Aha do na mangapuli roha ni si Anne dung mate omakna?

¹⁰ Ala taboto boasa dipaloas Jahowa hita susa, gabe boi ma i mangurupi hita asa martahan tikki adong sitaononta. Si Anne na tinggal di Pulau Mayotte di Samudra Hindia mandok, “Piga-piga taon na salpu, mate ma omakku. Gabe lungun hian ma rohakku. Alai torus do huingot dang Jahowa na mambahen hita susa. Gariada lomo hian do rohana manalpuhon sude sitaononta jala pahehehon halak naung mate. Nang pe lungun dope rohakku, alai ala hurimangi on sude gabe tenang ma perasaanku jala tarapul ma rohakku.”

11. Dung taboto boasa dipaloas Jahowa hita susa, songon dia do i mangurupi hita asa toktong semangat marbarita?

¹¹ Ala taboto boasa dipaloas Debata hita susa, gabe taronjar ma rohatta asa toktong semangat marbarita. Dipaboa si Petrus do molo Jahowa i sabar jala lomo do rohana asa sude jolma bertobat jala dipalua. Didok si Petrus do muse, “Parrohahon hamu ma songon dia ngolumuna. Badia ma pangalahomuna jala marsitutu ma hamu manomba Debata.” (2 Ptr. 3:11) Sada cara patuduhon na ‘marsitutu hita manomba Debata’, i ma marhite marbarita na uli. Holong do roha ni Jahowa tu sude jolma. Hita pe songon i do. Lomo do rohatta asa boi nasida mangolu di tano na imbaru. Ala sabar Jahowa, dilehon do kesempatan tu akka halak di daerahta asa boi manomba Ibana. Sada hasangapon do di hita boi gabe dongan sakarejo ni Debata jala mangurupi godang halak mananda Ibana sebelum ro ari ni Jahowa!—1 Kor. 3:9.

HITA MANGOLU DI “ARI PARPUDI”

12. Aha do manfaatna tu hita dung taboto na mangolu di “ari parpudi” hita?

¹² Takkas do dipaboa di Bibel songon dia pangalaho ni akka halak saleleng “ari parpudi”. (2 Tim. 3:​1-5) Tikki taida pangalaho ni akka halak na di sakalilingta, takkas ma taida tutu do na didok di Bibel. Jala tikki taida lam jahat pangalaho ni nasida, gabe lam pos ma rohatta na boi do dihaporseai Hata ni Debata i.—2 Tim. 3:​13-15.

13. Sian ilustrasi ni Jesus na dipaboa di Lukas 12:​15-21, aha do na boi tasukkun tu diritta?

¹³ Ala taboto na mangolu di ari parpudi hita, boi ma i mangurupi hita asa denggan mamakke tikki. Boasa on massai penting? Taida ma ilustrasi ni Jesus na disurat di Lukas 12:​15-21. (Jaha.) Boasa didok “jolma na oto” do bawa na dipaboa di ilustrasi i? Ala na mamora do ibana? Daong. Alai ala dibahen ibana do arta na uppetting di ngoluna. Dipapungu ibana do “arta tu dirina sandiri alai dang mamora [ibana] di adopan ni Debata”. Sala do keputusan ni bawa on, alana didok Debata do tu ibana, “Mate nama ho borngin on.” Sian kisah on, aha do parsiajaranna tu hita saonari? Satokkin nai, ro nama ari ni Jahowa. Otik nai nama tikkina. Alani i denggan do molo tasukkun tu diritta: ‘Sian cita-cita na hubahen, tarida do na denggan au mamakke tikki? Huurupi do gellengku mambahen cita-cita na palasson roha ni Debata? Tudia do hupakke gogokku, tikkikku, dohot hepengku? Lao papunguhon arta tu dirikku sandiri do, manang lao papunguhon arta di banua ginjang?’

14. Sian pengalaman ni si Miki, aha do manfaatna molo taingot na mangolu di ari parpudi do hita saonari?

¹⁴ Molo taingot na mangolu hita di ari parpudi, boi ma i mangurupi hita manottuhon keputusan aha na lao tabahen di ngolutta. On ma na diulahon sahalak donganta borua na margoar si Miki. Didok ibana, “Dung tamat sikkola au, lomo do rohakku mandapot karejo na mambahen au boi lam godang marsiajar taringot akka binatang. Alai lomo do tong rohakku gabe perintis biasa jala melayani di daerah na membutuhkan. Adong ma piga-piga dongan di huria na mangalehon saran tu au asa manat mamikkirhon, masuk akkal dope mengejar sude cita-cita i manang na dang. Alana didok nasida, satokkin nai nama ro ari ni Jahowa. Alai dipaingot nasida do tong au, annon di tano na imbaru boi do huparsiajari sude taringot binatang sahat tu saleleng ni lelengna. Jadi hubahen ma keputusan. Hupillit ma kursus keterampilan na singkat. Gabe boi ma dapottu karejo na mendukung au merintis, jala pinda tu daerah na membutuhkan di Ekuador.” Saonari las do roha ni si Miki mandongani suamina gabe pengawas wilayah di negara i. 

15. Sian contoh ni si Jakobus, boasa dang menyerah hita mangurupi akka halak na so berminat dope tu barita na uli? (Ida gambar.)

¹⁵ Unang ma metmet rohatta tikki adong halak na so olo manangihon barita na uli na tapasahat. Alana boi do muba situasi di ngolu ni nasida. Taida ma contoh ni si Jakobus anggi ni Jesus. Diida ibana do Jesus magodang, gabe Messias, jala diida ibana do massai denggan cara ni Jesus mangajari akka halak. Alai saleleng martaon-taon, dang olo si Jakobus gabe sisean ni Jesus. Dung dipahehe pe Jesus asa gabe sisean ibana. Mulai sian i, ditanda do si Jakobus sahalak sisean na bersemangat!b (Joh. 7:5; Gal. 2:9) Alani i, unang ma menyerah hamu mangurupi keluargamuna na so berminat dope tu barita na uli. Jala torus ma hamu marbarita tu akka halak na sebelumna dang olo manangihon hamu. Ingot ma, mangolu di ari parpudi do hita saonari. Jadi massai penting do ulaon marbarita. Ra, di pudian ni ari diingot nasida do muse barita na hea tapasahat tu nasida. Jala boi do i mangonjar roha ni nasida asa bertindak, bahkan dung dimulai hasusaan bolon.c

TOKTONG MANGARGAI AKKA SIPAINGOT SIAN JAHOWA

16. Aha do manfaat na boi dapotmuna sian akka persediaan na diparade organisasi ni Jahowa? (Ida kotak “Pakke ma Hasittongan na Adong di Bibel lao Mangurupi na Asing.”)

¹⁶ Adong do piga-piga hatorangan na diparade organisasi khusus dibahen tu akka halak na so hea dope mamboto ajaran dasar ni Bibel. Misalna, akka khotbah umum, piga-piga artikel dohot video di jw.org, dohot majalah edisi umum. Alai nang pe songon i, hita pe boi do mandapot manfaat sian akka persediaan i. Boi do i mangurupi hita asa lam bagas holongta tu Jahowa, asa lam pos rohatta tu isi ni Bibel, jala asa lam terampil hita tikki mangajarhon hasittongan tu halak na asing.—Ps. 19:7.

17. Di akka situasi na songon dia do hita boi mangingot muse akka ajaran dasar ni Bibel?

¹⁷ Nang pe nungnga leleng hita manomba Jahowa, las do rohatta tikki mandapot pemahaman na terbaru taringot Bibel. Alai las do tong rohatta tu akka ajaran dasar ni Bibel na parjolo sahali mambahen hita gabe olo jonok tu Jahowa. Songon naung taparsiajari, akka ajaran dasar i boi dope mangurupi hita saonari. Misalna, taingot do molo Jahowa i Debata Pargogo na So Hatudosan jala na marbisuk. Ibana do na manogu-nogu organisasina. Hasilna, gabe serep ma rohatta lao mangihutton petunjuk sian organisasi. Jala dang didok rohatta na undenggan pikkiranta sian pikkiran ni Jahowa. Asing ni i, gabe sabar ma hita tikki masa hasusaan tu hita dohot tu halak na tahaholongi molo taingot aha alasan ni Jahowa paloasson hasusaan i masa tu hita. Ala taingot muse na mangolu di ari parpudi hita, jala satokkin nai ro nama ari ni Jahowa, gabe denggan ma caratta mamakke tikki. Anggiat ma akka sipaingot na dilehon Jahowa on toktong mambahen hita marbisuk jala mangurupi hita asa setia manomba Ibana.