Martriliun Hepeng Dipakke lao Marporang—Alai Holan i do Harugianna?

Massai balga do dampak ni akka porang.

• Di taon na salpu, adong hira-hira 2,2 triliun dolar AS hepeng na dipakke pamaretta lao membiayai porang. Dibandikkon tu taon-taon sebelumna, on ma jumlah ni hepeng na unggodang na hea dipakke nasida.—The Washington Post, 13 Februari 2024.

Alai dang holan hepeng na dikorbanhon nasida, adong dope muse na asing. Taida ma sada contohna: Porang na adong di Ukraina.

• Akka tentara. Sian mulai terjadi porang i dua taon naung salpu, nungnga adong hira-hira 500.000 akka tentara na mate tarbunu manang na lukka-lukka.

• Akka penduduk. Menurut PBB, lobi sian 28.000 halak na mate manang na lukka. Sahalak pejabat di PBB mandok, “Dang taretong be sadia godang ni harugian manang dampak na dihilala akka halak alani porang i.”a

Massai balga hian do hasusaan na dihilala akka halak alani porang dohot konflik na terjadi di liat portibi on.

• 114 juta. Nasa on ma godang ni halak na ikkon mangungsi alani porang dohot kekerasan na terjadi di liat portibi on sahat tu September 2023.

• 783 juta. Nasa on ma godang ni akka halak na so boi mandapot sipanganon. “Konflik dohot porang ma na gabe penyebab utama ni terjadi kelaparan. Buktina, 70 persen sian halak na kelaparan tinggal di daerah na terjadi konflik dohot porang.”—Program Pangan Dunia.

Adong do tikkina dang adong be porang? Tutu do lao adong hadameon haduan? Mungkin do dang adong be na kelaparan manang na pogos? Aha do na didok Bibel taringot i?

Porang na masa saonari

Nungnga dipaboa hian di Bibel na ikkon terjadi porang di liat portibi on, jala digombarhon do i di Bibel sebagai hoda na merah songon api.

• “Huida ma ro hoda na asing, i ma hoda na merah songon api. Diloas do na hundul di hoda i mambuat hadameon sian tano on, alani i gabe marsibunuan ma akka jolma. Dung i dilehon ma tu ibana sada podang na balga.”—Pangungkapon 6:4.

Adong dua hoda na mangihutton hoda na merah i sian pudi. Hoda na birong manggombarhon kelaparan. Hoda na pucat manggombarhon hamatean alani sahit dohot na asing. (Pangungkapon 6:5-8) Asa diboto hamu taringot surirang ni Bibel on jala aha buktina nungnga terjadi i saonari, jaha ma artikel “Angka Ise do Na Mangkunduli Hoda I?”

Hadameon di ari na naeng ro

Satokkin nai, dang adong be porang. Jala dang adong be halak na lao pahabisson hepengna lao marporang. Alai dang jolma na lao pasautton i. Didok di Bibel:

• Lao ‘dipaujung Debata ma akka porang di saluhut tano on’.—Psalmen 46:9.

• Lao padengganon ni Debata ma sude hasusaan na terjadi alani porang. “Apusan ni Debata ma nasa ilu-ilu sian mata ni nasida. Dang adong be hamatean nang arsak ni roha, nang angguk-angguk, nang na haccit, dang disi be. Ai nungnga salpu na parjolo i.”—Pangungkapon 21:4.

• Bahenon ni Debata ma sude halak makkilala hadameon. “Toktong do bangsokku maringanan di inganan na dame, di inganan na aman jala na dame.”—Jesaya 32:18.

Songon naung disurirakkon di Bibel, akka porang dohot akka peristiwa na asing na terjadi saonari patuduhon, nungnga jonok be hadameon na dijanjihon Debata i.

Boha ma bahenon ni Debata lao pasautton hadameon i? Marhite Harajaonna ma Debata lao pasautton i. (Mateus 6:10) Asa diboto hamu aha do Harajaon ni Debata i jala aha labana tu hamu, tonton ma video Aha do Harajaon ni Debata i?