Toktong ma Tapaima Kota na Hot i

1. Aha do na didok Jesus na lao masa tu Jerusalem?

PIGA-PIGA ari andorang so mate Jesus, dipaboa ibana ma sada surirang tu akka siseanna. Digohi ma surirang on parjolo sahali tikki dihancurhon Jerusalem dohot bagas joro. Dipaboa Jesus do tu nasida na lao “markemah akka tentara di sakaliling ni Jerusalem”. (Luk. 21:20) Jala dipasingot Jesus do molo diida nasida ro akka tentara, i ma tentara ni Rom, ikkon lao do nasida maninggalhon Jerusalem dohot Judea.—Luk. 21:​21, 22.

2. Aha do na didok Apostel Paulus tu halak Kristen na di Judea dohot di Jerusalem?

² Piga-piga taon andorang so ro tentara ni Rom mengepung Jerusalem, dibahen Apostel Paulus do surat na massai penting. Digoari do surat on Bukku Heber. Di suratna i, didok si Paulus do tu halak Kristen na di Judea dohot di Jerusalem asa rade nasida mangadopi na lao masa. Aha do huroa na lao masa? Lao dihancurhon nama Jerusalem. Alani i ma taringot kota Jerusalem, didok si Paulus do, “Ai dang adong dison appunatta kota na hot saleleng ni lelengna.” Dung i didokkon ibana ma muse, “Alani i sai tapaima do kota na lao ro i.” (Heb. 13:14) Jadi molo rela halak Kristen di tikki i maninggalhon jabuna dohot bisnisna, boi ma nasida malua.

3. Aha do “kota na marfondasi na togu” i, jala boasa sai tapaima-ima i?

³ Ala ditinggalhon halak Kristen di tikki i do Jerusalem dohot Judea, olo do ra gabe direhei jala didok halak nasida halak na oto. Hape sebenarna, gabe malua do nasida ala lao sian i. Dos songon i saonari pe, olo do ra didok halak hita halak na oto ala dang tabahen hepeng na uppetting di ngolutta, jala dang taharappon boi jolma pasaehon akka masalah na di portibi on. Attong boasa olo hita mangulahon i? Alana taboto do lao ro nama Harajaon ni Debata manghancurhon portibi on. Sai tapaima do “kota na marfondasi na togu na lao ro i”, i ma Harajaon ni Debata.a (Heb. 11:10; Mat. 6:33) Di tiap subjudul di artikel on lao tabahas ma: (1) Songon dia hata ni si Paulus tu halak Kristen di abad na parjolo mangurupi nasida toktong paimahon “kota na lao ro i”, (2) aha do na diulahon si Paulus lao mangurupi nasida asa rade mangadopi na lao masa, jala (3) aha do manfaat ni hata ni si Paulus i tu hita saonari.

POS MA ROHATTA DANG TINGGALHONON NI JAHOWA HITA

4. Boasa massai penting kota Jerusalem di halak Kristen di tikki i?

⁴ Massai penting do kota Jerusalem di halak Kristen na di abad na parjolo. Boasa? Alana disi do parjolo sahali adong huria, i ma di taon 33 M, jala disi do tong punguan na mangaradoti. Asing ni i, godang do halak Kristen na marjabu di Jerusalem jala disi do tong akka arta ni nasida. Nang pe songon i, dipasingot Jesus do akka siseanna asa ditinggalhon nasida Jerusalem dohot Judea.—Mat. 24:16.

5. Songon dia do si Paulus mangurupi halak Kristen di abad na parjolo asa rade maninggalhon Jerusalem?

⁵ Diurupi si Paulus do halak Kristen di tikki i asa rade maninggalhon Jerusalem. Dipaboa ibana ma songon dia perasaan ni Jahowa tu kota i. Dipaingot si Paulus do nasida, dang badia be di adopan ni Jahowa bagas joro, akka malim, dohot akka pelean na dipelehon di Jerusalem i. (Heb. 8:13) Asing ni i, godangan halak disi dang olo manjalo Messias. Jala dang pusat ibadat na sittong be bagas joro na di Jerusalem i, bahkan na lao dihancurhon do i.—Luk. 13:​34, 35.

6. Boasa tepat waktu hata ni si Paulus na di Heber 13:​5, 6 tu halak Kristen di tikki i?

⁶ Di tikki i, kota na mora do Jerusalem. Adong sahalak panurat na sian Rom mandok, kota na massai terkenal do Jerusalem i. Ganup taon, marroan do halak Jahudi sian marragam inganan lao mangihutton akka perayaan disi. On ma sada na mambahen lam mamora kota i, jala adong do piga-piga halak Kristen na gabe mamora disi. Alani i ma ra didok si Paulus di suratna, “Unang ma holan hepeng na dipikkiri hamu di ngolumuna, alai las ma rohamuna tu akka na adong di hamu.” Dung i dipaboa ibana ma janji ni Jahowa na mandok, “Dang tadikkonokku ho jala dang pasombuokku ho.” (Jaha Heber 13:​5, 6; 5 Mus. 31:6; Ps. 118:6) Ikkon sai diingot halak Kristen di tikki i do janji ni Jahowa on. Boasa? Alana dang leleng dung dibahen si Paulus suratna i, ikkon rade do nasida maninggalhon jabu ni nasida, bisnisna, dohot akka arta ni nasida. Dung i, ikkon mandasor ma muse nasida di inganan na baru.

7. Mulai sian saonari, boasa ikkon pos situtu rohatta tu Jahowa?

⁷ Parsiajaranna: Satokkin nai, ro nama “hasusaan bolon” jala na lao dihancurhon nama portibi on. (Mat. 24:21) Dos songon halak Kristen di abad na parjolo, hita pe ikkon torus do setia tu Jahowa jala sai jaga. (Luk. 21:​34-36) Alana saleleng masa hasusaan bolon i, olo do ra ikkon tatinggalhon jabutta dohot akka artatta. Di tikki i, ikkon pos situtu do rohatta tu Jahowa dang na lao tinggalhononna hita. Jadi mulai sian saonari, andorang so ro hasusaan bolon i, ikkon tapatudu do na pos situtu rohatta tu Jahowa. Pikkirhon ma on: ‘Sian akka keputusan dohot rencana na hubahen, tarida do na pos rohakku tu Jahowa? Manang hepeng do na uppetting di au?’ (1 Tim. 6:17) Memang, sitiruon na dibahen halak Kristen di abad na parjolo i boi do mangurupi hita asa tetap setia. Alai taingot ma, umborat do “hasusaan bolon” na lao ro i sian na diadopi nasida. Jadi, sian dia ma taboto aha na porlu taulahon annon dung dimulai hasusaan bolon i?

OLOI MA AKKA NA MANGULUHON HITA

8. Aha do na didok Jesus tu akka siseanna?

⁸ Piga-piga taon dung dibahen si Paulus suratna tu halak Heber, diida nasida ma ro tentara ni Rom mengepung Jerusalem. On ma na gabe tanda ikkon lari nasida sian Jerusalem, alana lao dihancurhon nama kota i. (Mat. 24:3; Luk. 21:​20, 24) Alai tudia do nasida ikkon lao? Didok Jesus, “Ikkon lari do halak na di Judea tu akka dolok.” (Luk. 21:21) Alai godang do akka dolok di daerah i. Jadi tu dolok na dia ma nasida ikkon lao?

9. Boasa gabe bingung halak Kristen di tikki i tudia nasida ikkon lari? (Ida peta.)

⁹ Boi do halak Kristen i lari tu akka dolok on: Dolok Samaria, Dolok Galilea, Dolok Hermon, Dolok Lebanon, dohot dolok di bariba ni Sunge Jordan. (Ida peta.) Adong do akka halak na mandok, aman do piga-piga kota na adong di akka dolok i. Misalna Kota Gamla. Di pussu ni dolok na timbo do kota on, jala maol hian do dalan tusi. Alani i, sanga do piga-piga halak Jahudi naeng lari tusi. Hape di kota i do marporang halak Jahudi dohot halak Rom, jala godang do na mate disi.b

10-11. (a) Boha do hira-hira cara ni Jahowa mangalehon petunjuk tu halak Kristen na di Jerusalem? (Heber 13:​7, 17) (b) Aha do manfaatna ala dioloi halak Kristen di tikki i akka dongan na manguluhon di huria? (Ida gambar.)

¹⁰ Dilehon Jahowa do ra petunjuk tu halak Kristen di tikki i marhite akka bawa na manguluhon di huria. Sahalak sejarawan na margoar si Eusebius paboahon taringot na masa di tikki i. Didok ibana, dilehon Debata do tudu-tudu tu halak Kristen di tikki i marhite akka bawa di Jerusalem asa lao nasida tu Pella, sada kota di Perea. Cocok do lao nasida tu Kota Pella on. Boasa? Alana dang dao kota i sian Jerusalem, jadi mura ma nasida lao tusi. Asing ni i, godangan halak na tinggal disi dang halak Jahudi. Jadi dang dohot nasida marporang mangalo halak Rom.—Ida peta.

¹¹ Halak Kristen na ‘mangoloi akka dongan na manguluhon’ di huria ma na borhat tu Kota Pella. (Jaha Heber 13:​7, 17.) Ala diulahon nasida i, gabe selamat ma nasida. Jadi mulai sian najolo, dang ditinggalhon Jahowa akka halak na ‘paimahon kota na marfondasi na togu’, i ma Harajaon ni Debata.—Heb. 11:10.

12-13. Songon dia do Jahowa mangurupi akka naposona di tikki masa hasusaan?

¹² Parsiajaranna: Dipakke Jahowa do akka halak na manguluhon di huria lao mangalehon petunjuk na jelas tu akka naposona. Di Bibel, godang do contoh na patuduhon na dipakke Jahowa do akka bawa na setia lao mangarahon akka naposona di tikki masa hasusaan. (5 Mus. 31:23; Ps. 77:20) Jala sahat tu saonari pe, boi taida na toktong do dipakke Jahowa akka halak na manguluhon di huria i lao mangurupi hita.

¹³ Misalna saleleng pandemi COVID-19, dilehon “akka na manguluhon” hita do petunjuk tu sude huria. Dipaboa nasida ma tu akka sintua di huria songon dia asa boi hita tetap beribadat tu Jahowa. Buktina dang leleng dung masa pandemi, tetap do dibahen parpunguan regional di lobi sian 500 bahasa. Dipasahat ma i marhite Internet, TV, dohot radio. Dang hea dope tabahen pertemuan sisongon i. Takkas ma taboto sian on, toktong do diparade Jahowa akka na tahaporluhon asa togu haporseaotta. Hasilna boi ma hita tetap marsada. Jadi pos ma rohatta, hasusaan aha pe na lao masa, pasti sai diurupi Jahowa do akka na manguluhon hita asa boi dibahen nasida keputusan na denggan. Alani i asa rade hita haduan mangadopi hasusaan bolon, ikkon pos situtu do rohatta tu Jahowa jala ikkon taoloi do akka parettana. Alai, adong dope na porlu taulahon. Aha ma i?

PATUDU MA HOLONG DOHOT HABURJUON

14. Songon na disurat di Heber 13:​1-3, sifat aha do na ikkon dipatudu halak Kristen andorang so dihancurhon Jerusalem?

¹⁴ Tikki ro hasusaan bolon i haduan, ikkon lam balga do holongta tu akka dongan. Alani i, tatiru ma halak Kristen na tinggal di Jerusalem dohot Judea. Marsihaholongan do nasida. (Heb. 10:​32-34) Alai dung lam jonok tikkina dihancurhon Jerusalem, lam marsitutu do nasida ‘patuduhon holong dohot burju ni roha tu dongan sahaporseaon’. (Jaha Heber 13:​1-3.) Hita pe tapatudu ma holong sisongon i tikki ro hasusaan bolon i haduan.

15. Boasa ikkon masihaholongan halak Kristen tikki na lao i nasida sian Jerusalem?

¹⁵ Di tikki i, ro ma tentara ni Rom mengepung Jerusalem. Alai toppu ma lao nasida sian i. On ma tikkina ikkon lari halak Kristen sian Jerusalem. Alani i ma dang boi diboan nasida godang barang. (Mat. 24:​17, 18) Saleleng di pardalanan tu Pella, ikkon marsiurupan do nasida, songon i nang dung sahat nasida di kota i. Di situasi i, porlu do dipatudu nasida holong dohot burju ni roha. Alana mandasor do nasida di Pella, jala godang do na dihaporluhon nasida. Jadi ikkon rade do nasida marbagi tu na asing.—Tit. 3:14.

16. Songon dia do hita patuduhon na tahaholongi do akka dongan? (Ida gambar.)

¹⁶ Parsiajaranna: Ala holong rohatta tu akka dongan, rade do hita mangurupi nasida. Misalna tikki masa porang dohot bencana alam, rade do akka donganta mangurupi akka dongan na gabe korban di situasi i. Dipatogu do akka donganta i jala dilehon do akka na porlu di nasida. On ma na dihilala sahalak donganta borua sian Ukraina. Ikkon mangungsi do ibana alani porang. Didok ibana, “Boi do hurasahon hami na diurupi Jahowa do hami marhite akka dongan. Disambut nasida do hami jala diurupi tikki di Ukraina, di Hungaria, jala saonari di Jerman.” Jadi molo rade hita mangurupi akka dongan sian ias ni rohatta, on patuduhon na bekerja sama do hita dohot Jahowa.—Poda 19:17; 2 Kor. 1:​3, 4.

17. Mulai sian saonari, boasa massai penting patuduhon holong dohot haburjuon tu akka dongan?

¹⁷ Saleleng hasusaan bolon i haduan, ikkon sai rade do hita mangurupi akka donganta, lobi sian naung taulahon saleleng on. (Hab. 3:​16-18) Alani i ma dilatik Jahowa hita mulai sian saonari asa tapatudu holong dohot haburjuon. Alana akka sifat sisongon i do annon na massai porlu tapatudu.

AHA DO NA LAO MASA HADUAN?

18. Aha do na ikkon tatiru sian halak Kristen di abad na parjolo?

¹⁸ Tikki dihancurhon Jerusalem, selamat do halak Kristen na lari tu dolok. Memang ditinggalhon nasida do sude artana. Alai, dilehon Jahowa do sude na dihaporluhon nasida. Aha ma parsiajaranna tu hita saonari? Dang taboto dope akka na lao masa haduan. Alai, dipaingot Jesus do hita asa toktong jaga. (Luk. 12:40) Asing ni i, tarimangi jala taoloi ma hata ni si Paulus tu halak Heber i. Jala sai taingot ma janji ni Jahowa na mandok dang na lao tinggalhononna hita. (Heb. 13:​5, 6) Jadi toktong ma tapaima kota na hot i, i ma Harajaon ni Debata. Molo taulahon i, tahilala ma pasu-pasu ni Jahowa saleleng ni lelengna.—Mat. 25:34.