Zeremin
14 Wawa nga be ko kpɛn’n be su ndɛ nga Zoova kan kleli Zeremin’n yɛ:+
2 Zida o ɲrɛnnɛn nun,+ i klɔ’m be anuan’m b’a saci.
B’a bubu b’a gua asiɛ wun,
be ti sran’m be kpanlɛ Zerizalɛmun lɔ.
3 Sran dandan’m be sunman be junman difuɛ mun* kɛ be ko kunndɛ nzue.
Be junman difuɛ’m be kɔ gbo su sanngɛ be ɲanman nzue.
Sɛ ngbɛn yɛ be fa sa be sin-ɔn.
Ɲannzuɛn kun be kpo, be sa sin bubu be,
yɛ be kata be ti.
4 Fie difuɛ’m be kata be ti, be wunman like nga bé fá yó be wun-ɔn,
afin nzue m’ɔ tɔman’n ti’n,+
asiɛ’n w’a tɛtɛ.
5 Flete m’ɔ o blo lɔ bɔbɔ’n, ijre m’ɔ ɲɛnmɛn i dimɛn i kun’n ti’n,
kɛ ɔ wu ba’n, ɔ yaci i lɛ kɔ.
6 Blo aflunmun’m be ko jran kpɔlɛ’m be su.
Be lo wunmiɛn fokufoku kɛ blo alua’m be sa.
Be ɲinma w’a blo be ti nun, afin b’a kunndɛ ijre lele ngbɛn be ɲanman wie.+
7 Ee Zoova, kannzɛ sa tɛ nga e yoli’n ti’n, e ndɛ yoman fɛ’n,
sanngɛ ɔ bɔbɔ ɔ dunman’n ti’n, yi ɔ wun nglo.+
Sa tɛtɛ nga e yoli be’n be sɔnnin,+
yɛ wɔ yɛ e fɔnnin ɔ wun-ɔn.
8 ?Ee, wɔ mɔ Izraɛli i wla o ɔ su’n, wɔ mɔ a ti i Defuɛ+ blɛ kekle nun’n,’
ngue ti yɛ a yo ɔ wun kɛ aofuɛ wie yɛle wɔ sa nvle’n nun-ɔn?
?Ngue ti yɛ a yo ɔ wun kɛ sran wie m’ɔ su kɔ lika mɔ w’a jran kan naan ɔ́ lá kɔnguɛ’n sa-ɔ?
9 ?Ngue ti yɛ a yo ɔ wun kɛ sran kun mɔ i nuan w’a bo i wun’n sa-ɔ?
?Ngue ti yɛ a yo ɔ wun kɛ safuɲrɛn kun m’ɔ kwlá deman sran’n sa-ɔ?
Afin Zoova, a o e afiɛn,+
yɛ ɔ dunman’n yɛ ɔ o e su-ɔ.+
Nán yi e ase.
10 Nvle nga nunfuɛ’m be wun ndɛ nga Zoova kan’n yɛ: “Be klo wlanwlanlɛ,+ be tranman lika kun diin.+ Zoova i klun jɔman be wun kusu.+ Yɛ i wla wá kpɛ́n be sa nga be yoli’n su yɛ ɔ́ wá úsa be sa tɛtɛ nga be yoli’n i nun ndɛ.”+
11 I sin’n, Zoova seli min kɛ: “Nán srɛ min kɛ n yo nvle nga nunfuɛ’m be ye.+ 12 Kɛ be ci nglɛmun’n, n sieman min su n tieman kpatalɛ mɔ be kpata min’n.+ Yɛ kɛ be yi tɛ nga kɛ bé yí’n be yra nnɛn’n i kɔlikɔli’n, yɛ kɛ be man ble annzɛ i wunsu like’n, n nianman be lɔ.+ Ń má fá alɛ nin awe nin tukpacɛ m’ɔ sa ndɛndɛ’n, ń fá núnnún be sekeseke.”+
13 Sanngɛ n seli kɛ: “Ee, min Min Zoova, wɔ mɔ a Sie Like Kwlakwla’n, Ɲanmiɛn nuan ijɔfuɛ’m be liɛ’n, be se sran’m be kɛ: ‘Alɛ fi su tɔman, yɛ awe fi su kpɛnman. Afin ń yó maan amún trán fɔuun nun lika nga nun wa.’”+
14 Zoova seli min ekun kɛ: “Ɲanmiɛn nuan ijɔfuɛ’m be fa min dunman be kpɛ gblɛ.+ M’an sunmanman be, m’an seman be kɛ be ko kan ndɛ, m’an kanman ndɛ fi m’an kleman be.+ Aolia nun like nga be waan be wunnin i’n, ɔ ti ato. Sa nga be kan kɛ ɔ́ wá jú’n, ɔ ti amun lakalɛ. Ndɛ nga be kan kle amun’n, be kpɛ i be bɔbɔ be ti’n nun.+ 15 I sɔ’n ti’n, Zoova waan yoo: ‘Ɲanmiɛn nuan ijɔfuɛ nga be fa min dunman be kan sa nga bé wá jú’n be ndɛ’n, kusu nn m’an sunmanman be’n, mɔ be se kɛ alɛ su tɔman nvle nga nun naan awe su kpɛnman’n, alɛ’n dí be, yɛ awe’n kún be lele bé wú.+ 16 Yɛ be nga be kɛn i sɔ ndɛ be kle be kusu’n, awe’n kún be lele bé wú yɛ alɛ’n dí be wie. Bé tó be yí i Zerizalɛmun klɔ’n i akpɔ’m be su, sran fi su sieman be.+ Be bɔbɔ-o, be yi mun-o, be mma yasua mun-o, be mma bla mun-o, kɛ be liɛ’n wá yó sɔ-ɔ. Afin ɲrɛnnɛn nga be kunndɛ’n yɛ ń má fá yí be su-ɔ.’+
17 “Se be kɛ yoo:
‘Maan min ɲinmuɛn nzue’n bu sa puu kɔnguɛ nin wia nun, nán maan ɔ jran,+
afin b’a kpɔtɔ min nvle’n i wa bla’n m’ɔ nin-a siman bian’n i sekeseke, b’a bubu i nun,+
yɛ i kannin’n timan aɔwi.
18 Kɛ n kɔ blo lɔ’n,
n wun sran nga be fali tokofi be kunnin be’n!+
Yɛ kɛ n wlu klɔ’n nun’n,
n wun sran nga awe’n ti’n, b’a tɔ tukpacɛ’n!+
I Ɲanmiɛn nuan ijɔfuɛ-o, i Ɲanmiɛn ɲrun jranfuɛ-o, be kwlaa be wlan sin nvle kun mɔ be siman nun’n i nun.’”+
19 ?Naan w’a yi Zida i blo mlɔnmlɔn? ?Annzɛ kusu ɔ konvi w’a tu Siɔn su?+
?Ngue ti yɛ a boli e mɔ e kwlá yoman juejue kun-ɔn?+
E buli i kɛ nn é ɲán fɔundi, sanngɛ y’a ɲanman like kpa kun sa.
E buli i kɛ nn blɛ kun wá jú naan é yó juejue, sanngɛ ɲrɛnnɛn’n yɛ ɔ tɔli e su-ɔ.+
21 Ɔ dunman’n ti’n, nán yi
e blo.+
Nán bu ɔ famiɛn bia’n m’ɔ le ɲrun dan’n i like finfin.
Maan ɔ wla kpɛn aenguɛ nga a nin e trali’n su, yɛ nán se kɛ a diman su kun.+
22 ?Nvle nga be o lɛ’n, be amuin mɔ be timan like fi’n, be nun kun sa kwla tɔ nzue?
?Annzɛ ɲanmiɛn m’ɔ la nglo lɔ plaii’n kwla se nzue’n kɛ ɔ tɔ?
E Ɲanmiɛn Zoova, ɔ kunngba cɛ yɛ a kwla yo sɔ-ɔ.+
Ɔ su yɛ e fa e wla’n e gua-ɔ,
afin ɔ kunngba cɛ yɛ a yoli like kwlaa sɔ mun-ɔn.