Like nga Ɲanmiɛn Ndɛ’n kle’n

Ɲanmiɛn nuan ndɛ’n wo Biblu’n nun, yɛ ɔ ti e liɛ. Ɔ kle e like nga e kwla yo naan e liɛ w’a yo ye’n, ɔ nin like nga e kwla yo naan Ɲanmiɛn i klun w’a jɔ e wun’n. Asa’n, ɔ tɛ kosan nga’m be su:

WAFA NGA E KWLA WUN BIBLU’N NUN NDƐ MMA MUN’N

Biblu’n nun fluwa’m be ti 66. Be buli nun akpasua nɲɔn: I bue nga i klikli nun’n be klɛli i Ebre nin Aramun nun’n (“Aenguɛ Laa’n”), ɔ nin nga i klikli nun’n be klɛli i Glɛki nun’n (“Aenguɛ Uflɛ’n”). Biblu’n nun fluwa’m be kwlaa be le ndɛ tre mun nin ndɛ mma mun. Kɛ be bo Biblu’n nun ndɛ kun su’n, nimielo klikli’n ti i ndɛ tre’n, yɛ nimielo nɲɔn su’n ti ndɛ mma’n. I wie yɛle kɛ, kɛ be klɛ Bo Bolɛ 1:1, be kɛnngɛn i kɛ Bo Bolɛ ndɛ tre 1 i mma 1.