Srɛ w’a kunman Davidi

?Kɛ srɛ kun wɔ’n, ngue yɛ a yo ɔ?— Atrɛkpa’n, a wanndi kɔ ɔ baba nin ɔ manmin be sin naan be uka ɔ. Sanngɛ sran kun ekun o lɛ’n, ɔ kwla uka ɔ wie. Ɔ le wunmiɛn tra sran kwlaa. ?A si sran sɔ’n?— Ɲanmiɛn Zoova ɔ. Maan e kan gbanflɛn kaan kun i ndɛ. Be flɛ i Davidi. Ndɛ sɔ’n ɔ o Biblu’n nun. Davidi si kɛ Zoova úkɛ i titi. I sɔ’n ti’n, srɛ kunmɛn i.

I nun mɔ Davidi te yo bakan kpa’n, i baba nin i manmin be kleli i Zoova i klolɛ. I sɔ’n ukali Davidi. Ɔ si kɛ Zoova ti i janvuɛ naan ɔ́ úkɛ i. I sɔ’n ti’n, kɛ sa kekle wie’m be tɔli i su’n, srɛ w’a kunmɛn i. Le kun Davidi su nian bua’m be su. Kpɛkun asɔmɔli dan kun wa trali be nun kun. Ɔ o i nuan nun. ?A si like nga Davidi yoli’n? Ɔ fuannin asɔmɔli’n lelee ɔ fɛli i sa ngbɛn ko kunnin i. Kpɛkun kɛ nnɛn dan kun mɔ be flɛ i ursu’n wluli i bua mun be nun’n, Davidi kunnin i wie. ?Kɛ a niɛn i sa’n, wan yɛ ɔ ukali Davidi ɔ?— Zoova ɔ.

Cɛn kun ekun’n, Davidi yoli yakpa dan. Kɛ ɔ́ yó sɔ’n, nn Izraɛlifuɛ mun be nin be nga be flɛ be Filistifuɛ mun’n be su kun alɛ. Filistifuɛ’m be sonja kun ti tɛnndɛn kpa. Ɔ yo sro o! I dunman’n yɛle Goliati. Bian tɛnndɛn sɔ’n ɔ yaciman Izraɛlifuɛ’m be sonja mun ɔ nin Zoova be klɔklɔlɛ. Goliati seli Izraɛlifuɛ’m be sonja mun be kɛ be bla naan be nin i be kun. Sanngɛ Izraɛlifuɛ’m be kwlaa be sro i. Kɛ Davidi tili ndɛ sɔ’n, ɔ seli Goliati kɛ: ‘E nin wɔ é kún. Zoova úka min, yɛ ń kwlá wɔ.’ ?A bu i kɛ Davidi yoli yakpa?— Nanwlɛ, ɔ yoli yakpa dan. ?A kunndɛ kɛ á sí sa nga ɔ juli i sin’n?

Davidi fɛli i kpafloko’n ɔ nin yɛbuɛ mma treketreke nnun. Yɛ ɔ ɔli kɛ ɔ nin Goliati bé kó kún. Kɛ Goliati wunnin kɛ Davidi ti bakan’n, ɔ yoli i finfin. Sanngɛ Davidi seli i kɛ: ‘A nin min bá kunlɛ ɔ, tokofi o ɔ sa nun. Sanngɛ min liɛ’n, Zoova i dunman’n yɛ n fa ba ɔ.’ Yɛ ɔ fali yɛbuɛ kun wlɛli i kpafloko’n nun. Ɔ wanndi ɔli Goliati wun lɔ. Kpɛkun flala, yɛ ɔ toli yɛbuɛ’n niɔn. Yɛbuɛ’n ko finnin Goliati i ngban kpa’n su sa kpo. Yɛ gblu sran sroesroe sɔ’n tɔli ɔ. Ɔ wuli. Srɛ m’ɔ kunnin Filistifuɛ mun ti’n, be wanndili. ?Ɔ yo sɛ yɛ bakan kɛ Davidi sa’n ɔ kwla kunnin sran sroesroe sɔ’n niɔn?— Zoova yɛ ɔ ukɛli ɔ. Zoova i wunmiɛn’n tra sran sroesroe sɔ’n i liɛ’n leleele.

?Ngue yɛ Davidi i su ndɛ’n kle wɔ ɔ?— Sran fi i wunmiɛn’n juman Zoova liɛ’n nun kaan sa. Yɛ kusu ɔ ti ɔ janvuɛ. I sɔ’n ti’n, cɛn nga srɛ kun ɔ’n, nán ɔ wla fi kɛ Zoova kwla yo maan a yo yakpafuɛ!