A NIN SRAN BO YALƐ KOKOLƐ BO
LIKE SUANLƐ 6
Nán srɛ kun wɔ
Ndɛ cinnjin’n: “E Ɲanmiɛn’n yoli maan e trali e awlɛn e boli i jasin fɛ’n e kleli amun yakpa su.”—1 Tes. 2:2.
Like nga Zezi yoli’n
1. Nian VIDEO’N, annzɛ kanngan Liki 19:1-7 nun. I sin’n, bu kosan nga’m be akunndan:
(1). ?Atrɛkpa’n, ngue ti yɛ sran wie’m b’a faman be wun b’a mantanman Zase-ɔ?
(2). ?Ngue ti yɛ Zezi liɛ’n ɔ boli jasin fɛ’n kleli i-ɔ?
?Ngue yɛ like nga Zezi yoli’n kle e-ɔ?
2. Ɔ fata kɛ e yo yakpafuɛ naan y’a bo Ɲanmiɛn i Sielɛ’n i jasin fɛ’n y’a kle sran kwlaa.
Sɔnnzɔn Zezi
3. Fa ɔ wla guɛ i Zoova su. Ɲanmiɛn i wawɛ’n ukali Zezi naan w’a bo jasin fɛ’n, ɔ kusu ɔ kwla uka ɔ wie. (Mat. 10:19, 20; Lik. 4:18) Srɛ Zoova kɛ ɔ man ɔ wunmiɛn naan w’a bo jasin w’a kle be nga srɛ kun wɔ be wun’n.—Yol. 4:29.
4. Nán di sran’m be jɔlɛ. Ninnge wie’m be ti’n, e kwla sisi e bo naan y’a bo jasin fɛ’n y’a kle sran kun. Ɔ kwla yo sika m’ɔ le i’n annzɛ m’ɔ lemɛn i’n annzɛ i wun wlawlalɛ wafa’n annzɛ i ninnge yolɛ wafa’n, annzɛ kusu i Ɲanmiɛn sulɛ wafa’n. Sanngɛ nán ɔ wla fi su kɛ:
(1). E kwlá siman like ng’ɔ o sran kun i awlɛn nun’n, sanngɛ Zoova nin Zezi be liɛ’n, be si i.
(2). Ɔ leman sran kun sa mɔ Zoova kwlá ukɛmɛn i-ɔ.
5. Yo yakpafuɛ sanngɛ yo aɲinyiɛfuɛ nin ngwlɛlɛfuɛ wie. (Mat. 10:16) Nán a nin sran’n be si akplowa. Sɛ ɔ kunndɛman kɛ ɔ́ tíe ɔ ndɛ’n, annzɛ sɛ a wun kɛ be kwla yo ɔ like yaya’n, srɛ atin.—Ɲan. 17:14.